ដោយៈសាខុម

អន្តរជាតិៈ ការព្យាករណ៍ថ្មីមួយបានរកឃើញថា តម្លៃប្រាក់ដុល្លារទំនងជានឹងបន្តធ្លាក់ចុះរយៈពេលយ៉ាងតិច៦ខែទៀត ស្របពេលបណ្ដាវិនិយោគិន បន្តងាកទៅវិនិយោគលើទ្រព្យសកម្មមានហានិភ័យ (Risky asset) ដែលផ្ដល់ផលចំណេញខ្ពស់។ នេះបើយោងតាមលទ្ធផលស្ទង់មតិរបស់ទីភ្នាក់ព័ត៌មាន Reuters ដែលបានសាកសួរក្រុមអ្នកជំនាញខាងរូបិយប័ណ្ណ។

ក្រុមអ្នកជំនាញបានឲ្យដឹងថា ក្រោយភាគហ៊ុនឡើងថ្លៃឡើងវិញ កាលពីខែវិច្ឆិកា រូបិយប័ណ្ណដុល្លារ បានធ្លាក់ថ្លៃប្រមាណ៣,០សេនកាលពីខែមុន ហើយបន្តធ្លាក់ថ្លៃជិត៦សេននៅឆ្នាំនេះ ធ្វើឱ្យរូបិយប័ណ្ណមួយនេះសំយ៉ុងក្បាលចុះ ឆ្ពោះទៅរកលទ្ធផលប្រចាំឆ្នាំដ៏អាក្រក់បំផុត របស់ខ្លួនចាប់តាំងពីឆ្នាំ២០១៧មក។

ថ្វីបើពលរដ្ឋអាមេរិករហូតដល់ទៅប្រមាណ១៤លាននាក់ បានឆ្លងវីរុសកូវីដ-១៩ យ៉ាងណាក្ដី ក៏គេនៅតែមានក្ដីសង្ឃឹមថា ស្ថានភាពនឹងល្អប្រសើរឡើងក្នុងឆ្នាំសារពើពន្ធថ្មី ហើយវ៉ាក់សាំងកូវីដ-១៩ នឹងជួយជំរុញឱ្យភាគហ៊ុនពិភពលោកឡើងថ្លៃ ខណៈរូបិយប័ណ្ណដុល្លារ បន្តធ្លាក់ថ្លៃក្នុងរយៈពេលវែងគួរសម។

តាមការព្យាករណ៍ ធនាគារកណ្ដាលរបស់អាមេរិក ឬFederal Reserve នឹងផ្ដល់ការតម្រង់ទិសកាន់តែប្រសើរថា តើរយៈពេលយូរប៉ុណ្ណា ដែលខ្លួននឹងបន្តទិញប័ណ្ណបំណុ​ល ដើម្បីជួយស្ដារសេដ្ឋកិច្ចរបស់សហរដ្ឋអាមេរិក ដែលអាចធ្វើឱ្យប៉ះពាល់ដល់រូបិយប័ណ្ណដុល្លារ។

ជាង២ភាគ៣នៃក្រុមអ្នកវិភាគ ពោលគឺចំនួន៥១រូបក្នុងចំណោម៧២រូប ដែលបានឆ្លើយសំណួរដាច់ដោយឡែកពីគ្នា របស់ទីភ្នាក់ព័ត៌មាន Reuters ពួកគេបានរំពឹងថា ការធ្លាក់ថ្លៃនៃរូបិយប័ណ្ណដុល្លារ ទំនងជានឹងបន្តយ៉ាងហោចណាស់ ដល់ពាក់កណ្ដាលឆ្នាំ២០២១។ ចំណែកឯអ្នកវិភាគចំនួន២១រូបទៀតនិយាយថា រូបិយប័ណ្ណដុល្លារនឹងឡើងថ្លៃវិញឆាប់ជាងនេះ៕

ដោយ ៖ វុត្ថា

ភ្នំពេញ ៖ រហូតមកដល់ពេលនេះ ប្រទេសចិនបានជួយអភិវឌ្ឍន៍កម្ពុជាឱ្យមានការរីកចំរើន តាមរយៈការផ្តល់សម្បទានហិរញ្ញប្បទានប្រមាណជិត ៣០០០លានដុល្លារអាមេរិក ក្នុងការកសាងសង់ប្រព័ន្ធហេដ្ឋារចនាសម្ព័ន្ធនៅក្នុងប្រទេសកម្ពុជា ។

លោក ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន តាមប្រព័ន្ធវីដេអូពីចម្ងាយ ក្នុងវេទិកាវិនិយោគហេដ្ឋារចនាសម្ព័ន្ធ និងសំណង់លើកទី១១ ដែលបានប្រារព្ធធ្វើនៅទីក្រុងម៉ាកាវនៃចិន រយៈពេលពីរថ្ងៃ២-៣ ខែធ្នូ ឆ្នាំ២០២០បញ្ជាក់ថា ក្រៅតែពីការផ្តល់ជំនួយសម្បទានហិរញ្ញប្បទាននេះ ក្រុមហ៊ុនចិនក៏បានចូលរួមស្ថាបនាប្រព័ន្ធហេដ្ឋារចនាសម្ព័ន្ធនៅកម្ពុជាផងដែរ ដែលមានប្រវែងជាង ៣០០០ គីឡូម៉ែត្រនៅទូទាំងប្រទេស និងស្ពានធំៗចំនួន ៨ ដែលមានប្រវែង ៨គីឡូម៉ែត្រសម្រាប់ប្រទេសកម្ពុជាផងដែរ។

លោកបន្តថា “បន្ថែមពីនេះ គម្រោងសាងសង់ផ្លូវល្បឿនលឿនពីភ្នំពេញទៅកាន់ខេត្តព្រះសីហនុ ដែលជាផ្លូវល្បឿនលឿនលើកដំបូងនៅកម្ពុជា ក៏កំពុងត្រូវបានសាងសង់ដោយក្រុមហ៊ុនចិន China Road and Bridge ដែលមានតម្លៃវិនិយោគប្រមាណ ២០០០លានដុល្លារអាមេរិក” ។

លោកបន្ថែមថា “ជាមួយគ្នានេះ ក្រុមហ៊ុននេះ បានសិក្សាសមិទ្ធិលទ្ធភាពក្នុងការសាងសង់ផ្លូវល្បឿនលឿនពីភ្នំពេញទៅកាន់ក្រុងបាវិត នៃព្រំដែនកម្ពុជា-វៀតណាម ដោយតភ្ជាប់ទៅកាន់ទីក្រុងហូជីមិញ”។

បើតាមលោក ស៊ុន ចាន់ថុល ក្រៅពីការទទួលបានសម្បទានហិរញ្ញប្បទានពីប្រទេសចិន កម្ពុជាក៏ទទួលពីសប្បទានហិរញ្ញប្បទាន និង ជំនួយឥតសំណង ពីប្រទេសជប៉ុន កូរ៉េ ធនាគារពិភពលោក ធនាគារអភិវឌ្ឍន៍ហេដ្ឋារចនាសម្ព័ន្ធអាស៊ាន និង ដៃគូអភិវឌ្ឍន៍លើប្រព័ន្ធហេដ្ឋារចនាសម្ព័ន្ធជាច្រើនខ្សែផងដែរ។

លោក ស៊ុន ចាន់ថុល បញ្ជាក់ថា មូលនិធិទាំងអស់នេះទាំងពីវិស័យឯកជន និងសាធារណៈត្រូវបានយកមកស្តារ និងលើកកម្ពស់គុណភាពនូវបណ្តាញហេដ្ឋារចនាសម្ព័ន្ធនៅទូទាំងប្រទេសកម្ពុជាដោយតភ្ជាប់ពីភ្នំពេញទៅកាន់បណ្តាខេត្តនានានៅទូទាំងប្រទេស ដើម្បីបង្កើនការដឹកជញ្ជូនៅក្នុងស្រុក និងធ្វើពាណិជ្ជកម្មអន្តរជាតិ ព្រមទាំងការវិនិយោគ។

លោក ស៊ុន ចាន់ថុល ក៏បានលើកឡើងពីសគម្រោងផ្លូវដែកពីភ្នំពេញទៅកាន់ខេត្តព្រះសីហនុ និងពីភ្នំពេញទៅកាន់ព្រំដែនកម្ពុជា-ថៃក៏ត្រូវបានកែលម្អឱ្យកាន់តែប្រសើរសម្រាប់ធ្វើការដឹកជញ្ជូន។ ជាមួយគ្នានេះ កំពង់ផែកទឹកជ្រៅនៅក្រុងព្រះសីហនុដែលអាចធ្វើពាណិជ្ជកម្មបានប្រមាណ៧០ ភាគរយក៏ត្រូវបានពង្រីក និងធ្វើទំនើបកម្ម។ ក្រៅពីនេះ កំពង់ផែស្វាយ័តភ្នំពេញថ្មីនៅតាមដងទន្លេមេគង្គ ព្រលានយន្តហោះអន្តរជាតិភ្នំពេញថ្មី និងព្រលានយន្តហោះអន្តរជាតិក៏កំពុងត្រូវបានសាងសង់យ៉ាងសកម្មនាពេលបច្ចុប្បន្ននេះ ។

លោករដ្ឋមន្ត្រីរូបនេះបញ្ជាក់ថា ការអភិវឌ្ឍន៍ប្រព័ន្ធហេដ្ឋារចនាសម្ព័ន្ធនៅកម្ពុជាបានជួយឱ្យសេដ្ឋកិច្ចមានការរីកចំរើនក្នុងរង្វង់៧ភាគរយអស់រយៈពេលជាង២ទសវត្សកន្លងមកនេះ ហើយនឹងអាចជួយឱ្យកម្ពុជាក្លាយជាប្រទេសដែលមានចំណូលមធ្យមកម្រិតខ្ពស់នៅឆ្នាំ២០៣០ និងជាប្រទេសដែលមានចំណូលខ្ពស់នៅឆ្នាំ២០៥០៕

ដោយៈ រ៉ាណេត

ភ្នំពេញៈ សម្ដេចតេជោហ៊ុន សែន នាយករដ្ឋមន្ត្រីនៃកម្ពុជាបានមានប្រសាសន៍បញ្ជាក់ថា ស្ថិតនៅក្នុងកាលៈទេសៈ ដែលកំពុងប្រឈមនៅពេលបច្ចុប្បន្ននេះ សាមគ្គីភាព និងឯកភាពគ្នាក្នុងតំបន់ និងជាសកល គឺជាធាតុសកម្មមិនអាចខ្វះបាននោះឡើយ។

សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា បានថ្លែងនៅក្នុងសម័យប្រជុំពិសេសលើកទី៣១ របស់មហាសន្និបាតអង្គការសហប្រជាជាតិ នៅព្រឹកថ្ងៃទី៤ ធ្នូ ឆ្នាំ២០២០នេះថា មកដល់បច្ចុប្បន្នជំងឺ Covid-19 បានឆ្លងរីករាលដាលដល់គ្រប់ប្រទេស និងបានធ្វើឱ្យមនុស្សរាប់សែននាក់បាត់បង់ជីវិត ។ ក្នុងន័យនេះ កម្ពុជាយល់ឃើញថា ការប្រយុទ្ធប្រឆាំងនឹងជំងឺ Covid-19 មិនគួរត្រូវបានប្រទេសណាមួយឆ្លៀតយកមកអនុវត្តន៍ ជារបៀបវារៈភូមិសាស្ត្រនយោបាយរបស់ខ្លួននោះឡើយ ។

សម្ដេចមានប្រសាសន៍បន្តថា “ខណៈដែលជីវិតមនុស្សរាប់លាននាក់នៅទូទាំងពិភពលោក កំពុងស្ថិតនៅក្នុងហានិភ័យ ការធ្វើនយោបាយរបស់ប្រទេសណាមួយលើបញ្ហាសុខភាពសាធារណៈ និងបរិហាររបស់ពួកគេលើសមត្ថភាពគ្រប់គ្រង ការរីករាលដាលនៃជំងឺឆ្លង គឺមិនមានប្រយោជន៍អ្វីដល់ការប្រយុទ្ធប្រឆាំង នឹងជំងឺឆ្លងនេះឡើយ។ ផ្ទុយទៅវិញ សាមគ្គីភាព និងឯកភាពគ្នាក្នុងតំបន់ និងជាសកលគឺជាធាតុសកម្មមិនអាចខ្វះបាននៅក្នុងអំឡុងពេលនៃវិបត្តិបែបនេះ”។

សម្ដេចបានបន្ថែមថា “ទោះបីជាវិបត្តិសុខភាពសាធារណៈនេះ អាចនឹងបញ្ចប់ទៅនាពេលអនាគតខ្លីខាងមុខប្រទេសទាំងអស់ នឹងនៅតែត្រូវដោះស្រាយបន្តទៀតនូវបញ្ហាប្រឈមក្នុងដំណាក់កាល នៃការស្ដារសម្បទាសេដ្ឋកិច្ចឡើងវិញ”។ លោកបន្តថា “ជាការពិត ជំនួយអាចជាចំណែកតូចមួយនៃការស្តារនេះ ក៏ប៉ុន្តែកត្តាដែលសំខាន់មិនអាចខ្វះបាន គឺការបន្តរក្សាបាននូវយន្តការពហុភាគីនិយម សាកលភាវូបនីយកម្មនិយម ពាណិជ្ជសរីភាវូបនីយកម្ម ខ្សែច្រវាក់ផ្គត់ផ្គង់តំបន់ និងពិភពលោក ពាណិជ្ជកម្មឆ្លងកាត់ព្រំដែន ការវិនិយោគ ទេសចរណ៍អន្តរជាតិ និងការធ្វើដំណើរជាទូទៅ”។

សម្តេចបន្តថា ក្នុងន័យនេះ កម្ពុជាគាំទ្រពេញទំហឹងនូវគំនិតផ្តួចផ្តើម របស់អគ្គលេខាធិការ អសប អំពីការបង្កើតមូលនិធិ អសប សម្រាប់ការឆ្លើយតបនឹងជំងឺ Covid-19 និងការរៀបចំស្ដារសម្បទាសេដ្ឋកិច្ចឡើងវិញ ដែលត្រូវបានដាក់ចេញកាលពីដើមឆ្នាំនេះ”៕

ដោយ ៖ រ៉ាណេត

កោះកុង ៖ ជាមួយនឹងភាពអំណោយផល និងសក្ដានុពលដែលកំពុងទាក់ទាញគម្រោងវិនិយោគធំៗ ដែលមានតម្លៃទឹកប្រាក់ដ៏មហាសាលរាប់ពាន់លានដុល្លារលើគ្រប់វិស័យនៅពេលបច្ចុប្បន្ននេះ ខេត្តកោះកុងកំពុងពង្រឹងសមត្ថភាពបន្ថែមទៅលើការពង្រឹងលើផ្នែកហេដ្ឋារចនាសម្ព័ន្ធនានា ការផ្គត់ផ្គង់ទឹកស្អាតនៅទូទាំងខេត្តដោយផ្តើមពីការធ្វើពិពិធកម្មអាងស្តុកទឹកឱ្យលើស៣លានម៉ែត្រគូបក្នុងមួយឆ្នាំ ជាពិសេសតម្រូវការប្រើប្រាស់ក្នុងក្រុងខេមរភូមិន្ទ។

លោកខ្លឹម គរគី ប្រធានមន្ទីរឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ខេត្តកោះកុងបានប្រាប់ឱ្យដឹងនៅថ្ងៃទី៤ ខែធ្នូ ឆ្នាំ២០២០ថា ក្រុងខេមរភូមិន្ទបច្ចុប្បន្នកំពុងមានភាពរីកចម្រើនខ្លាំងលើវិស័យអចលនទ្រព្យ។ ម៉្យាងវិញទៀតកំណើនប្រជាជនក៏កាន់តែមានការកើនឡើង ហើយការបង្កើតមុខរបរ ផ្សេងៗក៏មានកំណើនផងដែរ។ ជាពិសេសនោះតំបន់សេដ្ឋកិច្ចពិសេស ដែលបានអភិវឌ្ឍន៍ និងគ្រោងធ្វើការអភិវឌ្ឍន៍ថ្មីៗរបស់ក្រុមហ៊ុនធំៗជាច្រើនក៏មានការក៏គ្រោងចូលមកវិនិយោគបន្ថែមទៀតផងដែរ។

លោកបន្តថា ក្នុងរដូវប្រាំងខាងមុខនេះគ្រាន់តែមានការបារម្ភតិចតួចប៉ុណ្ណោះ ចំពោះការចែកចាយទឹកស្អាតដល់ប្រជាពលរដ្ឋ ប្រសិនបើក្នុងរដូវប្រាំងនេះមានការអូសបន្លាយយូរ និងពុំមានភ្លៀងកក់ខែនោះវានឹងអាចមានការខ្វះខាតទឹកប្រើប្រាស់មានចំនួនតិចតួចមិនដល់ថ្នាក់ដូចជាឆ្នាំកន្លងទៅនោះទេ។

អាងស្តុកទឹកបានសាងសង់រួចរាល់អាចផ្ទុកទឹកបានរហូតដល់ទៅជាង ៣លានម៉ែត្រគូប និងមានអាងប្រតិកម្មដែលមានសមត្ថភាពអាចផលិតទឹកស្អាតបានក្នុងចន្លោះ ១៨០០០ដល់ ២០០០០ម៉ែត្រគូបក្នុងមួយថ្ងៃ សម្រាប់ផ្គត់ផ្គង់ដល់អ្នកប្រើប្រាស់។ ដូច្នេះវានឹងអាចឆ្លើយតប នឹងតម្រូវការនាពេលបច្ចុប្បន្នបាន។

តំណាងក្រុមហ៊ុន LYP គ្រុប ដែលជាក្រុមហ៊ុនទទួលបានសិទ្ធិវិនិយោគផ្គត់ផ្គង់ទឹកស្អាតនៅខេត្តកោះកុង លោក ផាត់ ប៊ុនហួ បានប្រាប់ឱ្យដឹងថា នៅក្នុងអំឡុងឆ្នាំ២០២០ ក្រុមហ៊ុនត្រៀមបរិមាណទឹកស្អាតជាង ៣លានម៉ែត្រគូបដើម្បីបម្រើសេចក្តីត្រូវការ និងកំពុងតបណ្តាញចេញពីអាងស្តុកទឹកបន្តចែកចាយឲ្យបានគ្រប់ច្រកល្ហក នៅតាមមូលដ្ឋានរបស់ពលរដ្ឋក្នុងក្រុងខេមរភូមិន្ទ និងស្រុកមណ្ឌលសីមា ខេត្តកោះកុង ឱ្យកាន់តែមានវិសាលភាពទូលំទូលាយជាងបណ្តាឆ្នាំកន្លងទៅ។

តាមក្រុមបច្ចេកទេសតបណ្តាញទឹករបស់ក្រុមហ៊ុន LYP Group បានឱ្យដឹងថា ដោយសារបញ្ហាជំងឺកូវីដ១៩ បានធ្វើឱ្យការងារតបណ្តាញទឹករបស់ក្រុមហ៊ុនមានភាពយឺតយ៉ាវមួយចំនួន ប៉ុន្តែក្រុមហ៊ុនប្តេជ្ញាថា នឹងខិតខំពន្លឿនការងារតបណ្តាញនេះឱ្យរួចរាល់នៅក្នុងក្រុងខេមរភូមិន្ទនៅដំណាច់ឆ្នាំនេះ មុននឹងពង្រីកវិសាលភាពទៅស្រុកមណ្ឌលសីមាបន្ថែមទៀត៕