ចំណេះដឹង! តើគោលនយោបាយដីធ្លីត្រូវបានបែងចែកដូចម្តេច?

ដោយៈវុត្ថា

ភ្នំពេញ៖ ចក្ខុវិស័យស្តីពីគោលនយោបាយដីធ្លីនៅកម្ពុជា គឺដីធ្លីត្រូវបានគ្រប់គ្រង រៀបចំ និងបែងចែកតាមរបៀបមួយ ដើម្បីរួមចំណែកធ្វើឱ្យសម្រេចនូវគោលដៅជាតិដ៏ទូលំទូលាយក្នុងការកាត់បន្ថយភាពក្រីក្រ ការអភិវឌ្ឍន៍សេដ្ឋកិច្ច និងសង្គមសេដ្ឋកិច្ចប្រកបដោយសមធម៌ អភិបាលកិច្ចល្អនៅក្នុងសង្គមប្រជាធិតេយ្យ ដែលតម្រង់ទិសទៅរកទីផ្សារដូចបានពិពណ៌នា នៅក្នុងសេចក្តីប្រកាសស្តីពីគោលនយោបាយដីធ្លី។

យោងតាមឯកសាររបស់ក្រសួងរៀបចំដី នគរូបនីយកម្ម និងសំណង់ស្តីពី ក្របខ័ណ្ឌយុទ្ធសាស្ត្រ នៃគោលនយោបាយដីធ្លីបានឱ្យដឹងថា ចក្ខុវិស័យនេះ ត្រូវបានបែកនៅក្នុងទិដ្ឋភាពធំ៣គឺ៖

១) ដីត្រូវបានគ្រប់គ្រងតាមវិធិ ដែលធ្វើឱ្យសិទ្ធិលើអចលនទ្រព្យ មានភាពច្បាស់លាស់ និងមានសុវត្ថិភាពធ្វើឱ្យការផ្ទេរជាផ្លូវការនូវសិទ្ធិទាំងនោះមានភាពងាយស្រួល និងល្មមអាំចំណាយបាន។ វិវាទនឹងថយចុះជាលំដាប់ ហើយចំពោះករណីណាដែលមានលទ្ធភាពអាចដោះស្រាយ បាននិងដោះស្រាយនៅក្រៅប្រព័ន្ធតុលាការ។

២) ដីត្រូវបានរៀបចំតាមវិធីមួយ ដែលធ្វើឱ្យការប្រើប្រាស់បានល្អប្រកបដោយចីរភាព និងត្រឹមត្រូវតាមបែបបទបរិស្ថាន ។ នៅក្នុងតំបន់ច្រើន ការប្រើប្រាស់ដីទាមទារឱ្យមានតុល្យភាពរវាងអ្នកប្រើប្រាស់ទាំងឡាយ និងការប្រើប្រាស់ច្រើនគោលដៅ ទន្ទឹមនេះ ទាមទារឱ្យមានការចូលរួមពីអ្នកពាក់ព័ន្ធនានា។

៣) ដីរដ្ឋត្រូវបានការពារសម្រាប់ការប្រើប្រាស់ ជាសាធារណៈតាមកន្លែងណា ដែលសមនឹងប្រើ ក្រៅពីនោះត្រូវបែអចែកសំរាប់ជាប្រយោជន៍ឯកជន តាមរយៈដំណើរការដែលមានតម្លៃភាព។

ពេលសម្រេចបានចក្ខុវិស័យទាំងនេះ នឹងអនុញ្ញាតឱ្យកម្ពុជាប្រើប្រាស់ដីប្រកបដោយប្រសិទ្ធិភាព សម្រាប់គោលដៅសេដ្ឋកិច្ច និងសង្គមកិច្ច និងធ្វើឱ្យមានការដោះដូរដីធ្វើបានដោយសេរី ព្រមទាំងទទួលបានផលចំណេញ ពីដីដែលជាបិតិកភណ្ឌសាធារណៈ ៕

ការអភវិឌ្ឍលំនៅឋានតម្លៃថ្លៃ ចាប់ផ្តើមរីកសាយភាយទៅកាន់តំបន់ជាយក្រុង

ដោយៈ ម៉ាណេត

ភ្នំពេញៈ អ្នកជំនាញបានអះអាងថា ការអភិវឌ្ឍន៍លំនៅឋានតម្លៃថ្លៃៗ បាននិងកំពុងរីកសាយភាយ ទៅកាន់តំបន់ជាយរាជធានីភ្នំពេញ ស្ទើរតែគ្រប់ទិសក្នុងរយៈពេលប៉ុន្មានឆ្នាំចុងក្រោយនេះ។

ប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា លោកច្រឹក សុខនីម បានថ្លែងប្រាប់តាមទូរសព្ទកាលពីថ្មីៗនេះថា ការរីកសាយនៃការអភិវឌ្ឍន៍លំនៅឋានតម្លៃថ្លៃទៅកាន់ជាយរាជធានី ដោយសារតែតម្លៃដីនៅក្បែរៗ ឬកណ្ដាលរាជធានីមានការឡើងថ្លៃខ្ពស់ ដែលធ្វើឱ្យអ្នកវិនិយោគមិនអាចរកប្រាក់ចំណេញបាន។

លោកបានថ្លែងថា “ដូច្នេះពួកគេត្រូវការតម្លៃដីទាប ល្មមដែលអាចឱ្យពួកគេចំនេញពីការវិនិយោគ។ ម្យ៉ាងទៀតនៅក្បែរ ឬកណ្ដាលរាជធានីក៏មិនមានដីទូលាយសម្រាប់អភិវឌ្ឍន៍ជាបុរីបានស្រួលនោះដែរ” ។ លោកបន្តថា “នៅតំបន់ជាយរាជធានីភ្នំពេញ នាពេលបច្ចុប្បន្ននេះ ក៏មានការអភិវឌ្ឍហេដ្ឋារចនាសម្ព័ន្ធបានច្រើនផងដែរ ដែលជំរុញអោយវិនិយោគិនងាកទៅរកតំបន់ជាយៗក្រុងសម្រាប់អភិវឌ្ឍន៍គម្រោងរបស់ខ្លួន” ។

លោកច្រឹក សុខនីមបានថ្លែងថា តាមផែនការមេរបស់រាជរដ្ឋាភិបាល ក៏បានកំណត់ការអភិវឌ្ឍជុំវិញរាជធានីជាមុំ៣៦០ដឺក្រេ ដូច្នេះហើយគ្រប់ទិសនៃរាជធានី គឺត្រូវមានការអភិវឌ្ឍជាបន្តបន្ទាប់។ សម្រាប់តម្លៃត្រឹម២០ ឬ៣០ម៉ឺនដុល្លារអាមេរិក នៅតំបន់ជាយរាជធានី បច្ចុប្បន្នគឺនៅមានការគាំទ្រច្រើន ពីប្រជាពលរដ្ឋព្រោះថាវាក៏មិនទាន់ថាឆ្ងាយប៉ុន្មានពីរាជធានីភ្នំពេញដែរ។

បើតាមផែនការមេរបស់សាលារាជធានីភ្នំពេញ ក៏ដូចជា រដ្ឋាភិបាលនឹងបន្តពង្រីកក្រុងភ្នំពេញបន្តទៀត ជាក់ស្ដែងបច្ចុប្បន្ននេះ រាជរដ្ឋាភិបាលបាននិងកំពុងសាងសង់ហេដ្ឋារចនាសម្ព័ន្ធ នានាជាច្រើនដូចជាផ្លូវក្រវ៉ាត់ក្រុង ស្ពានអាកាស និងបណ្ដាញទឹកភ្លើងជាច្រើនទៀត ។

តាមការសង្កេតជាក់ស្ដែងនេះ គម្រោងលំនៅឋានតម្លៃខ្ពស់មួយចំនួនបានងាកចេញពីកណ្ដាល ឬក្បែរក្រុងទៅតំបន់អភិវឌ្ឍន៍ថ្មីមួយចំនួន ដូចជាផ្លូវជាតិលេខ៦ ដែលមានបុរីលំនៅឋានតម្លៃ រហូតដល់កន្លះលានដុល្លារអាមេរិក តំបន់ក្រាំងធ្នង់ដែលពីមុនគេចាត់ទុកជាវាលស្រែ ក៏មានការអភិវឌ្ឍលំនៅឋានតម្លៃ រាប់សិបម៉ឺនដុល្លារអាមេរិកផងដែរ។

យោងតាមសេចក្តីប្រកាសព័ត៌មាន របស់បុរីដឹអ័រគីដេវីឡានៅតំបន់ក្រាំងធ្នង់ បានឱ្យដឹងថា គម្រោងរបស់ខ្លួនបានលក់អស់ ត្រឹមតែរយៈពេលប៉ុន្មានថ្ងៃនេះ បន្ទាប់ពីបើកលក់ប៉ុណ្ណោះ បើទោះបីជាតម្លៃលំនៅឋាននេះ មានតម្លៃដល់ជិតកន្លះលានដុល្លារអាមេរិកក្នុងមួយល្វែងក៏ដោយ៕

គម្រោងសាងសង់ផ្លូវជាតិលេខ១០ សម្រេចបានជិត ៤០ភាគរយហើយ

ដោយៈវុត្ថា

ភ្នំពេញៈ គម្រោងសាងសង់ផ្លូវជាតិលេខ១០ តភ្ជាប់ពីស្រុកសំឡូត ខេត្តបាត់ដំបង ពោធិសាត់មកកានក់ខេត្កោះកុង សម្រេចបានប្រមាណជិត៤០ភាគរយហើយ រហូតមកដល់ពេលនេះ ខណៈដែលក្រុមហ៊ុនកំពុងតែពន្លឿនការសាងសង់ និងដោះស្រាយផលប៉ះពាល់។

លោកសុខ សុទ្ធី អ្នកនាំពាក្យរដ្ឋបាលខេត្តកោះកុង នៅថ្ងៃទី ៣ ខែធ្នូឆ្នាំ ២០២០នេះ ឱ្យដឹងថា បច្ចុប្បន្ននេះ អាជ្ញាធរពាក់ព័ន្ធបាន និងកំពុងដោះស្រាយផលបះពាល់ឱ្យនៅតិចបំផុត ចំពោះគម្រោងសាងសង់ផ្លូវជាតិលេខ១០នេះ ខណៈដែលគម្រោងនេះ មានផលប៉ះពាល់ ចំពោះចំការកៅស៊ូរបស់ប្រជាពលរដ្ឋមួយចំនួន ២០ទៅ២៥ភាគប៉ុណ្ណោះ ។

លោកបន្តថា ផ្លូវជាតិលេខ១០នេះ មានប្រវែងសរុបជាង១៩៨ គីឡូម៉ែត្រ ដែលនឹងត្រូវចំណាយថវិកាសរុបប្រមាណ១៨៨លានដុល្លារអាមេរិក ជាហិរញ្ញប្បទានពីរដ្ឋាភិបាលចិន និងត្រូវបានប្រកាសបើកការដ្ឋានកាលពីថ្ងៃទី០៩ ខែមីនា ឆ្នាំ២០២០កន្លងមកនេះ។

លោកស៊ុន ចាន់ថុល ទេសរដ្ឋមន្ត្រី និងរដ្ឋមន្ត្រីក្រសួងសាធារណការ និងដឹកជញ្ជូនធ្លាប់បានឱ្យដឹងថា ផ្លូវជាតិលេខ១០នេះ នឹងត្រូវសាងសង់ស្របទៅតាមស្តង់ដារ ផ្លូវថ្នល់កម្រិត៣ នៃបទដ្ឋានបច្ចេកទេសរបស់សាធារណរដ្ឋប្រជាមានិតចិន មានទទឹងតួផ្លូវសរុប៩ម៉ែត្រ ក្រាលកៅស៊ូពីរស្រទាប់ (DBST) ទទឹង ៨ម៉ែត្រ ដែលនឹងត្រូវប្រើរយៈពេលសាងសង់៤៨ខែ គិតចាប់ខែធ្នូ ឆ្នាំ២០១៩ ដល់ខែធ្នូ ឆ្នាំ២០២៣ ។

ផ្លូវជាតិលេខ១០ មានប្រវែងសរុបចំនួន១៩៨,៧១គីឡូម៉ែត្រ គិតចាប់ពីតំបន់វាលវែងខេត្តពោធិ៍សាត់ ឆ្លងកាត់ខេត្តបាត់ដំបង ស្រុកសំឡូត និងបន្តឆ្ពោះទៅកាន់ក្រុងខេមរភូមិន្ទ ខេត្តកោះកុង។

ផ្លូវជាតិមួយខ្សែនេះ គឺមានសារៈសំខាន់បំផុត សម្រាប់ការធ្វើចរាចរណ៍របស់ប្រជាពលរដ្ឋ ជាពិសេសបម្រើដល់វិស័យដឹកជញ្ជូនរវាងខេត្តទាំង៣ រួមមាន ខេត្តពោធិ៍សាត់ បាត់ដំបង និងខេត្តកោះកុង ហើយក៏អាស្រ័យផល និងផ្តល់ភាពងាយស្រួលដល់ខេត្តជិតខាងមួយចំនួនទៀតផងដែរ។

សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជាធ្លាប់បានមានប្រសាសន៍ថា បើទោះបីជាវិបត្តិសេដ្ឋកិច្ចសាកល ដែលបណ្តាលមកពីជំងឺឆ្លង Covid-19 យ៉ាងណាក៏ដោយ វាមិនមែនជាឧបសគ្គរបស់កម្ពុជាក្នុងការកសាង និងអភិវឌ្ឍន៍ហេដ្ឋារចនាស ម្ព័ន្ធនៅទូទាំងប្រទេសនោះទេ។ ផ្ទុយទៅវិញនៅក្នុងកាលៈទេសៈនេះ កម្ពុជាបានព្យាយាមជំនះ និងធ្វើពិពិធកម្មក្នុងវិស័យសំខាន់ៗ មួយចំនួនឱ្យកាន់តែមានភាពរីកចម្រើន និងល្អប្រសើរថែមមួយកម្រិតទៀត៕

ហេដ្ឋារចនាសម្ព័ន្ធសំខាន់ៗទាំង៩នៅខេត្តកែប នឹងបង្កើនទេសចរណ៍ធុរកិច្ចក្នុងតំបន់

ដោយៈ រ៉ាណេត

កែប៖ ស្ថិតនៅក្នុងគោលនយោបាយ ដែលបានដាក់ចេញដោយប្រមុខរាជរដ្ឋាភិបាលកម្ពុជា ដែលមានសម្ដេចតេជោ ហ៊ុន សែន ជានាយករដ្ឋមន្ត្រី ដែលបានកំណត់យកខេត្តកែប ជាគោលដៅទេសចរណ៍កម្រិតខ្ពស់ បច្ចុប្បន្នរដ្ឋបាលខេត្ត បាននិងកំពុងអនុវត្តតាមយុទ្ធសាស្ត្រ ដោយការអភិវឌ្ឍន៍អាទិភាព ទៅលើហេដ្ឋារចនាសម្ព័ន្ធសំខាន់ៗនៅទូទាំងខេត្ត ជាពិសេសតំបន់ទេសចរណ៍ធម្មជាតិនាតំបន់ឆ្នេរ។

អភិបាលខេត្តកែប លោកសោម ពិសិដ្ឋ បានមានប្រសាសន៍ប្រាប់ឱ្យដឹងនៅល្ងាចថ្ងៃទី៣ ខែធ្នូ ឆ្នាំ២០២០កន្លងមកថា ក្នុងពេលបច្ចុប្បន្ននេះ រដ្ឋបាលខេត្តបានបានដាក់ចេញនៅយុទ្ធសាស្ត្រនានា ក្នុងការអភិវឌ្ឍខេត្ត ដោយក្នុងមានគម្រោងអភិវឌ្ឍន៍ចំនួន៩កំពុងដំណើរការ។

លោកបានបញ្ជាក់ថា “មានផ្លូវមានសង្ឃឹម ដែលប្រយោគនេះបានក្លាយទៅជាចក្ខុវិស័យក្នុងការអភិវឌ្ឍន៍ខេត្ត ក៏ដូចជាកែប្រែមុខមាត់ខេត្ត ឱ្យកាន់តែរីកចម្រើន ជាពិសេសគឺលើកកម្ពស់ជីវភាពប្រជាពលរដ្ឋ នៅតាមទីប្រជុំជនរហូតដល់ជនបទតាមរយៈការកសាងផ្លូវនេះឯង” ។ លោកបន្តថា “ម្យ៉ាងទៀត តាមរយៈការអភិវឌ្ឍហេដ្ឋារចនាសម្ព័ន្ធកាន់តែល្អប្រសើរ វាក៏ជាចលករយ៉ាងសំខាន់ក្នុងការជំរុញ និងបង្កើនកំណើនធុរកិច្ចទេសចរណ៍បន្ថែមពីលើអ្វីដែលកំពុងមានស្រាប់” ។

លោកសោម ពិសិដ្ឋបានបន្តថា ជាក់ស្តែងពេលនេះ មានការដ្ឋានសាងសង់គម្រោងធំៗចំនួន៩ កំពុងដំណើរការនៅទូទាំងខេត្ត ចាប់ពីថ្នាក់ក្រុង-ស្រុក ឃុំ-សង្កាត់ ដែលក្នុងចំណោមគម្រោងធំៗទាំងនោះមាន គម្រោងជួលជុលផ្លូវចំនួន៦គម្រោង ដោយគម្រោងជួសជុលផ្លូវអ៊ុតកៅស៊ូ អាសេមាន១គម្រោង មាន១០កំណាត់ខ្សែ ស្ថិតនៅក្រុងកែប គម្រោងជួសជុលផ្លូវក្រាលកៅស៊ូ DBST ចំនួន៣គម្រោង ស្ថិតនៅមូលដ្ឋានក្រុងកែប និងស្រុកដំណាក់ចង្អើរ។

គម្រោងជួសជុលផ្លូវចាក់បេតុងអាមេ ប្រវែង១.៨០០ម៉ែត្រ នៅចំណុចផ្លូវស្រែអំបិលភូមិអំពេង និងគម្រោងជួសជុលផ្លូវក្រាលគ្រួសក្រហម ប្រវែង ១.៨៩០ម៉ែត្រ លើកំណាក់ផ្លូវ ១៣៣អា ស្ថិតក្នុងភូមិកែប ក្រុងកែប” ។

ក្រៅពីគម្រោងជួសជុលផ្លូវ ខេត្តក៏កំពុងដំណើរការកាដ្ឋានគម្រោងសាងសង់ រូបសំណាកនាងមច្ឆានុ ដែលស្ថិតនៅភូមិអំពេង គម្រោងសាងសង់សាលប្រជុំស្តង់ដារបស់សាលាខេត្តកែប និងគម្រោងដាក់បង្គោលភ្លើងបំភ្លឺផ្លូវសាធារណៈ ដងគោមបំភ្លឺ និងតបណ្តាញអគ្គិសនីនៅទូទាំងខេត្តកែបទាំងមូលផងដែរ៕

គម្រោងតំបន់ទេសចរណ៍របស់ក្រុមហ៊ុន Naga Corp នៅសៀមរាប នឹងមានទំហំធំជាង Diseyland នៅអាមេរិក

ដោយ៖ ប៊ី

សៀមរាបៈ គម្រោង Angkor Lake of Wonder នៅលើផ្ទៃដី៧៥ហិកតារបស់ក្រុមហ៊ុន ណាហ្គាខប (NagaCorp) នឹងមានទំហំធំជាងកន្លែងកម្សាន្តអន្តរជាតិពីររួមបញ្ចូលគ្នានៅរដ្ឋ Los Angeles របស់សហរដ្ឋអាមេរិក ខណៈគម្រោងនេះ រួមបញ្ចូលសណ្ឋាគារលំដាប់ខ្ពស់ ឧទ្យានទឹក សួនឧទ្យាន បច្ចេកវិទ្យា កន្លែងកម្សាន្តតាមដងទឹក និងកន្លែងប្រជុំធ្វើសន្និសីទ និងតាំងពិព័រណ៍។

ក្រុមហ៊ុនណាហ្គាខប ដែលជាម្ចាស់និងប្រតិបត្តិករណាហ្គាវើល ក្នុងរាជធានីភ្នំពេញ កាលពាក់កណ្តាលខែវិច្ឆិកា ឆ្នាំ២០២០ បានបង្ហាញផែនការអភិវឌ្ឍរមណីយ ដ្ឋានមិនមានល្បែង ក្នុងទំហំទឹកប្រាក់វិនិយោគចំនួន៣៥០លានដុល្លារនេះ នៅខេត្តសៀមរាប ក្នុងគោលបំណងលើកកម្ពស់តំបន់ប្រាសាទអង្គរវត្ត ដែលបានចុះបញ្ជីជាបេតិកភណ្ឌពិភពលោក។

រដ្ឋាភិបាលកម្ពុជាបានផ្តល់សិទ្ធិឲ្យក្រុមហ៊ុន NagaGroup Global Limited ដែលជាក្រុមហ៊ុនបុត្រសម្ព័ន្ធ របស់ក្រុមហ៊ុនណាហ្គា ដោយជួលរយៈពេល៥០ឆ្នាំ លើផ្ទៃដី៧៥ហិកតា ដែលមានចម្ងាយតែ៥០០ម៉ែត្រពីភាគខាងត្បូងតំបន់ហាមឃាត់ខាងក្រៅជុំវិញប្រាសាទអង្គរវត្ត។

ក្រុមហ៊ុនបានឱ្យដឹងថា “គម្រោងនេះមានឈ្មោះជាផ្លូវការថា Angkor Lake of Wonder នៅលើផ្ទៃដី៧៥ហិកតាធំជាងទំហំរួម នៃកន្លែងកម្សាន្តខ្នាតអន្តរជាតិ Disneyland និង Disney California ផ្សងព្រេងនៅ Los Angeles រួមបញ្ចូលសណ្ឋាគារលំដាប់ខ្ពស់ ឧទ្យានទឹក សួនឧទ្យាន បច្ចេកវិទ្យា កន្លែងកម្សាន្តតាមដងទឹក និងកន្លែងប្រជុំធ្វើសន្និសីទ និងតាំងពិព័រណ៍” ។

មិនតែប៉ុណ្ណោះ ក៏មានកន្លែងកម្សាន្តមួយឈ្មោះថា Siem Reap China Town ផ្តល់ជូននូវអាហារតាមចិញ្ចើមថ្នល់ Street Food ហាងស្រា តន្ត្រី និងដើរទិញឥវ៉ាន់ ដែលនឹងត្រូវបានរួមបញ្ចូល ជាមួយនឹងសួនច្បារ និងត្រូវបានការពារ ដោយគម្របដំបូលអាកាសធាតុ ដែលជួយលើកកម្ពស់មិនប៉ះពាល់ដល់បរិស្ថាន។

ក្រុមហ៊ុនណាហ្គាខបបានឱ្យដឹងថា “ការអភិវឌ្ឍនេះ នឹងបម្រើដល់គោលបំណងជាច្រើនដូចជា ការបង្កើនដំណើរទស្សនកិច្ចរបស់ភ្ញៀវទេសចរ ទៅកាន់ខេត្តសៀមរាប ស្របពេលណាហ្គាវើលដ៏ អនុវត្តន៍យុទ្ធសាស្ត្រធ្វើដំណើរថ្មីភ្ជាប់ខេត្តសៀមរាប និងភ្នំពេញ” ។

ក្រុមហ៊ុននេះ មានបំណងអនុវត្តន៍យុទ្ធសាស្ត្រ ធ្វើការជាមួយភ្នាក់ងារទេសចរណ៍តាមអ៊ិនធឺរណែត និងភ្នាក់ងារទេសចរណ៍ប្រទេសចិន និងកន្លែងផ្សេងទៀត ដើម្បីផ្តល់ជូននូវដំណើរកម្សាន្ត ដោយផ្អែកលើមូលដ្ឋានពេញលេញ ក្នុងខេត្តសៀមរាប និងរាជធានីភ្នំពេញ៕

ក្រុមហ៊ុនអាមេរិកបោះទុន១១ពាន់លានដុល្លារទិញអចលនទ្រព្យនៅក្នុងប្រទេសជប៉ុន

ដោយវុត្ថា

ប្ររទេសជប៉ុនៈ ក្រុមហ៊ុនភាគហ៊ុនឯកជនដ៏ធំមួយ របស់សហរដ្ឋអាមេរិក Blackstone Group បានសម្រេចចំណាយទុនប្រមាណ១១០ពាន់លានយ៉េនដែលស្មើ១,០៥ពាន់លានដុល្លាអាមេរិក ដើម្បីទិញអចលនទ្រព្យនៅក្នុងទីក្រុងធំ ៗរបស់ប្រទេសជប៉ុន ។

សារព័ត៌មាន Nikei បានចុះផ្សាយកាលពីថ្ងៃទី៣ ខែធ្នូ ថា ការទិញអចចលនទ្រព្យ នៅក្នុងប្រទេសជប៉ុននេះរំពឹងថា នឹងមានតម្រូវការជួលរយៈពេលវែងនាពេលខាងមុខនេះ ខណៈក្រុមហ៊ុនរបស់មកពីតំបន់អាស៊ី បានទិញអចលនទ្រព្យនៅក្នុងប្រទេសជប៉ុនចំនួន៨ ដែលភាគច្រើនត្រូវបានទិញ អចលនទ្រព្យដោយក្រុមហ៊ុន General Electric។

សារព័ត៌មានដដែលបន្តថា លំហូរទុនវិនិយោគបរទេស កំពុងជំរុញការទិញលក់អចលនទ្រព្យរបស់ជប៉ុន បន្ទាប់ពីការធ្លាក់ចុះយ៉ាងខ្លាំង ក្នុងពេលមានជំងឺរាតត្បាតកូវីដ ១៩ ។ ក្រុមហ៊ុន Blackstone គឺជាក្រុមហ៊ុនតែមួយគត់ ត្រូវបានគេដឹងថានឹងបោះទុន ក្នុងទំហំទឹកប្រាក់ចំនួន៦០០ ពាន់លានយ៉េននៅក្នុងវិស័យអចលនទ្រព្យរបស់ជប៉ុននៅឆ្នាំនេះ។

ក្រុមហ៊ុន Blackstoneនេះ បាននិងកំពុងធ្វើឱ្យវិស័យអចលនទ្រព្យកាន់តែមានផលចំណេញនៅក្នុងប្រទេសជប៉ុន តាមរយៈការជួសជុល និងបង្កើនតម្លៃមុនពេលលក់ទៅឱ្យវិនិយោគិនផ្សេងទៀត ក្នុងរយៈពេលវែងទៅឱ្យក្រុមហ៊ុនធានារ៉ាប់រង ឬអ្នកដែលមានធនធានខ្ពស់។

វិនិយោគិនបរទេសបានទិញអចលនទ្រព្យ នៅក្នុងប្រទេសជប៉ុនកើនឡើងប្រមាណ៤០% នៃកិច្ចព្រមព្រៀង នៅក្នុងរយៈពេល៣ត្រីមាសដំបូងនៃឆ្នាំ២០២០នេះ ។ បើយោងតាមក្រុមហ៊ុនសេវាកម្ម អចលនទ្រព្យរបស់ប្រទេសជប៉ុន Jones Lang LaSalle បានបញ្ជាក់ថា ការសម្រេចបានក្នុងទំហំនេះ ដោយសារមានផលប៉ះពាល់តិចតួច នៃជំងឺរាតត្បាតនៅក្នុងប្រទេសជប៉ុន បើប្រៀបធៀបជាមួយប្រទេសនៅក្នុងតំបន់អ៊ឺរ៉ុប និងសហរដ្ឋអាមេរិកប។

ក្រុមហ៊ុន Blackstone បានបង្កើនការវិនិយោគនៅក្នុងប្រទេសជប៉ុនដោយផ្តោតលើវិស័យភ័ស្តុភារ ដឹកជញ្ជូន និងអចលនទ្រព្យសម្រាប់ការរស់នៅ។ កាលពីខែមុនក្រុមហ៊ុននវ បានសម្រេចចិត្តទិញអាជីវកម្មអាផាតមិនជួលរបស់ប្រតិបត្តិករបស់ក្រុមហ៊ុ Isetan Mitsukoshi Holdings ក្នុងកិច្ចព្រមព្រៀងដែលរមានតម្លៃជិត ២៩០ លានដុល្លារអាមេរិក៕

លោកឧកញ៉ា លឹម ហេងៈកម្ពុជាកំពុងធ្វើពិពិធកម្មពាណិជ្ជកម្មថ្មី ជាមួយទីផ្សារប្រទេសចិន

ដោយៈ រ៉ាណេត

ភ្នំពេញៈ ត្បិតថាទីផ្សារប្រទេសចិន គឺជាដៃគូពាណិជ្ជកម្មស៊ីជម្រៅជាមួយកម្ពុជា ប៉ុន្តែសម្រាប់ការនាំចេញនូវផ្លែស្វាយស្រស់ លើកដំបូងរបស់កម្ពុជានាពេលនេះ វាគឺជាការធ្វើពិពិធកម្មពាណិជ្ជកម្មថ្មីមួយទៀតរបស់កម្ពុជា ហើយក៏ជាបទពិសោធន៍ថ្មីផងដែរសំេាប់អ្នកនាំចេញកម្ពុជា។

អនុប្រធានសភាពាណិជ្ជកម្មកម្ពុជា លោកឧកញ៉ា លឹម ហេង បានមានប្រសាសន៍នៅល្ងាចថ្ងៃទី៣ ខែធ្នូ ឆ្នាំ២០២០នេះថា ក្នុងដំណាក់កាលនេះ វាគឺជាជំហានដំបូងរបស់កម្ពុជា ហើយក៏ជាបទពិសោធន៍ថ្មីផងដែរ លើការនាំយកផលិតផលកសិផលផ្លែស្វាយស្រស់ទៅកាន់ទីផ្សារប្រទេសចិន។

លោកឧកញ៉ាបានបញ្ជាក់ថា កាលពីពេលកន្លងទៅ ការនាំស្វាយស្រស់ពីកម្ពុជាទៅកាន់ទីផ្សារអន្តរជាតិ ធ្លាប់មានរួចមកហើយតាមរយៈក្រុមហ៊ុនកូរ៉េ និងក្រុមហ៊ុនក្នុងស្រុករបស់លោកឧកញ៉ា ម៉ុង ឫទ្ធី ហើយរហូតនាំយកទៅកាន់ទីផ្សារអឺរ៉ុបផងដែរ។ ប៉ុន្តែសម្រាប់ការនាំចេញទៅកានើទីផ្សារប្រទេសចិន ដែលជាទីផ្សារដ៏ធំរបស់កម្ពុជានៅពេលនេះ វាគឺជាលើកដំបូង ហើយក៏ជាបទពិសោធន៍ថ្មីផងដែរ។

លោកឧកញ៉ាបញ្ជាក់ថា “ប្រសិនបើការនាំចេញលើកដំបូងនេះ ទទួលបានលទ្ធផលល្អ នោះវានឹងក្លាយជាចលករថ្មីជួយជំរុញ និងពង្រីកទំហំពាណិជ្ជកម្មរវាងប្រទេសទាំង២បន្ថែមទៀត ហើយកាន់តែល្អសម្រាប់ប្រជាពលរដ្ឋកម្ពុជា ដែលកំពុងបង្កើនផលលើដំណាំស្វាយ និងកំពុងមានឧបសគ្គទីផ្សារនាពេលបច្ចុប្បន្ន”។

បច្ចុប្បន្ន អគ្គនាយកដ្ឋានកសិកម្ម បានទទួលពាក្យស្នើសុំចុះបញ្ជីចម្ការស្វាយ និងទីតាំងវេចខ្ចប់ សម្រាប់នាំចេញផ្លែស្វាយស្រស់កម្ពុជា ទៅកាន់ប្រទេសចិនមានចំនួន៤៨ក្រុមហ៊ុនរួមមានម្ចាស់ចម្ការ និងសហគមន៍កសិកម្ម។

នៅក្នុងដំណាក់កាលទី១: អគ្គនាយកដ្ឋានកសិកម្ម បានចាត់មន្រ្តីជំនាញចុះពិនិត្យ វាយតម្លៃលើកសិដ្ឋានដែលមានសក្តានុពលខ្ពស់ និងស្របតាមលក្ខខណ្ឌតម្រូវភូតគាមអនាម័យរបស់ប្រទេសចិនចំនួន០៥ និងទីតាំងវេចខ្ចប់ដែលបានសាងសង់រួចរាល់ចំនួន១ និងបានផ្ញើជូនGACC កាលពីថ្ងៃទី២៨ ខែមិថុនា ឆ្នាំ២០២០។

ជាមួយគ្នានេះ ដើម្បីបំពេញតាមលក្ខខណ្ឌ តម្រូវភូតគាមអនាម័យឱ្យបានល្អសម្រាប់ការនាំចេញផ្លែស្វាយស្រស់ពីកម្ពុជា ទៅកាន់ប្រទេសចិន អគ្គនាយកដ្ឋានកសិកម្ម បាននិងកំពុងអនុវត្តសកម្មភាពមួយចំនួន នៅតាមទីតាំងចម្ការដែលបានដាក់ពាក្យស្នើសុំឱ្យបំពេញបាននូវលក្ខខណ្ឌ តម្រូវភូតគាមអនាម័យរបស់ប្រទេសចិន៕

ហេតុអីតំបន់ជ្រោយចង្វារក្លាយជាទីតាំងសំរាប់វិនិយោគខុនដូ កាន់តែពុះកញ្រ្ជោល?

ដោយគង់ សូរិយា

ភ្នំពេញៈ តំបន់ជ្រោយចង្វារបាន និងកំពុងក្លាយជាតំបន់ដែលមានការរីកចម្រើនលឿន ដោយសារការវិនិយោគកើនឡើង ពីសំណាក់អ្នកវិនិយោគក្នុងស្រុក និងអន្តរជាតិ។

ហេតុផលជាច្រើន ដែលអ្នកវិនិយោគជាតិ អន្តរជាតិបាននិងកំពុងជ្រើសរើសតំបន់នេះ សំរាប់សាងសង់ខុនដូគឺមានច្រើនចំណុចដូចជា ទី១ មានទន្លេអមសងខាង ដែលផ្តល់បរិយាកាសរស់នៅ ប្រកបដោយផាសុខភាព ទី២ មានទេសភាពស្រស់ស្អាត ដែលអាចគយគន់ដងទន្លេបានយ៉ាងស្រស់ស្រាយ ទី៣ ជាតំបន់ដែលមានការតភ្ជាប់ហេដ្ឋារចនាសម្ព័ន្ឋបានយ៉ាងល្អប្រសើរ និងទី៤ កត្តាហុង ស៊ុយ ដែលអ្នកមានជំនឿលើផ្នែកនេះ តែងតែគិតដល់ ព្រោះហុងស៊ុយគឺពាក់ព័ន្ឋដល់ជីវិត និងគុណភាពជីវិត។

ទីប្រឹក្សាសមាគមអចលនទ្រព្យសកល លោកយិន លាងគង់បានមានប្រសាសសន៍ឲ្យដឹងតាមទូរស័ព្ទ កាលពីរសៀលថ្ងៃទី៣ ធ្នូនេះថា តំបន់ជ្រោយចង្វារប្រៀបបីដូចជាមេដែកឆក់មួយ ដែលបាននិងកំពុងជំរុញឲ្យតម្លៃដីធ្លីនៅតំបន់នេះកើនឡើង ពិសេសគំរោងខុនដូមិនក្រោម២០គំរោងនោះទេ ដែលបានបញ្ចប់ និងកំពុងដំណើរកាេេសាងសង់នៅតំបន់នេះ។

លោកបន្តថា “វាជាតំបន់ស៊ីវិល័យមួយនាពេលអនាគត វាក៏នឹងជាតំបន់សំរាប់lifestyle មួយសំរាប់អនាគតផងដែរ ព្រោះបច្ចុប្បន្នគំរោងជាច្រើនបាននិងកំពុងផ្តល់នូវការរស់នៅកាន់តែសម្បូរបែបនៅតំបន់នេះ”។លោកបន្តថា “ផ្សារទំនើប Sky barនៅលើអាគារធំៗបាន និងកំពុងស្រូបយកការចាប់អារម្មណ៍ពីអ្នកមានជីវភាពធូរធារចូលទៅកាន់តំបន់នេះ”។

លោកយិន លាងគង់បានបន្តថា បរិយាកាសរស់នៅល្អប្រសើរ អាចស្រូបយកខ្សយល់អាកាសបរិសុទ្ឋ អាចគយគន់ទេសភាពពេលរាត្រី ក៏ដូចជា ពេលព្រះអាទិត្យរះនាព្រឹកព្រលឹម សុទ្ឋតែជាបំណងប្រាថ្នារបស់មនុស្សគ្រប់រូប ប៉ុន្តែលទ្ឋភាពទទួលបាននូវការរស់នៅប្រកបដោយស៊ីវិល័យ និងភាពថ្លៃថ្នូរជារឿងមួយទៀត។

យោងតាមការសិក្សារបស់ក្រុមហ៊ុនUrban Living Solutions បានឲ្យដឹងថា ទីក្រុងភ្នំពេញ នឹងមានមនុស្សរស់នៅដល់៤,៥ ទៅ៥លាននាក់ នៅឆ្នាំ២០៣០ខាងមុខ ដែលធ្វើឲ្យប្រជាជនកម្ពុជា សម្រេចចិត្តរស់នៅតាមខុនដូកាន់តែច្រើន ដោយសារកត្តាមួយចំនូនដូចជា ទី១ កំនើនតម្លៃអចលនទ្រព្យនៅក្នុងទីក្រុង ទី២ កម្រិតការកកស្ទះចរាចរណ៍កើនឡើង ទី៣ គុណភាពជីវិតកាន់តែល្អប្រសើរ ដោយសារការរីកចម្រើននៃបច្ចេកវិទ្យា និងទី៤ ការរស់នៅខុនដូមានភាពងាយស្រួល ដែលផ្តល់នូវកញ្ចប់សេវាស្ទើរទាំងស្រុងនៃតម្រូវការប្រចាំថ្ងៃរបស់ពួកគេ៕

អាមេរិក បានអនុម័តច្បាប់ដើម្បីបង្ខំឱ្យក្រុមហ៊ុនធំៗរបស់ចិនគោរពតាមគោលការណ៍របស់ខ្លួន

ដោយ៖ សុខុម

អន្តរជាតិ៖ ក្រុមសមាជិកសភាអាមេរិក បានអនុម័តសេចក្ដីព្រាងច្បាប់មួយកាលពីថ្ងៃពុធ ទី០២ ខែធ្នូនេះ ដែលអាចរាំងខ្ទប់បណ្ដាក្រុមហ៊ុនចិន មិនឱ្យចុះបញ្ជីភាគហ៊ុនរបស់ខ្លួននៅលើទីផ្សារភាគហ៊ុនអាមេរិក ដរាបណាក្រុមហ៊ុនទាំងនោះមិនគោរពតាមស្ដង់ដារគណនេយ្យភាពរបស់សហរដ្ឋអាមេរិក ឱ្យបានម៉ឺងម៉ាត់បំផុតទេនោះ។ នេះបើយោងតាមគេហទំព័រ channelnewsasia.com ចុះផ្សាយកាលពីថ្ងៃទី៣ ធ្នូនេះ។

សេចក្ដីព្រាងច្បាប់នេះត្រូវបានអនុម័យជាឯកច្ឆន្ទ បន្ទាប់ពីព្រឹទ្ធសភាអនុម័តកាលពីដើមឆ្នាំនេះ រួចបញ្ជូនទៅសេតវិមាន ដែលរំពឹងថា ប្រធានាធិបតី ដូណាល់ ត្រាំ ទំនងជានឹងចុះហត្ថលេខាសម្រេចឱ្យវាក្លាយជាច្បាប់ជាធរមាន។

“ច្បាប់ជំរុញឱ្យក្រុមហ៊ុនបរទេសទទួលខុសត្រូវ” ឬ Holding Foreign Companies Accountable Act ខាងលើនេះហាមមិនឱ្យចុះបញ្ជីភាគហ៊ុននៃបណ្ដាក្រុមហ៊ុនបរទេសនៅលើទីផ្សារភាគហ៊ុនរបស់សហរដ្ឋអាមេរិកឡើយ ប្រសិនបើក្រុមហ៊ុនទាំងនោះមិនគោរពតាមការណែនាំរបស់ក្រុមសវនករនៃក្រុមប្រឹក្សាត្រួតពិនិត្យគណនេយ្យភាពសាធារណៈ (Public Accounting Oversight Board) របស់សហរដ្ឋអាម៉េរិក រយៈពេល៣ឆ្នាំជាប់គ្នាទេនោះ។

ជាការពិតណាស់ ទោះបីជាច្បាប់នេះអនុវត្តទៅលើក្រុមហ៊ុនមកពីគ្រប់ប្រទេសដោយស្មើភាពគ្នាយ៉ាងណាក្ដី ក៏គេមើលឃើញថា ច្បាប់នេះមានបំណងដាក់សម្ពាធលើក្រុមហ៊ុនចិន ដូចជាក្រុមហ៊ុន Alibaba ក្រុមហ៊ុនបច្ចេកវិទ្យា Pinduoduo និងក្រុមហ៊ុនប្រេងខ្នាតយក្ស PetroChina ជាដើម។

គេសង្កេតឃើញថា វិធានការតឹងរ៉ឹងនានា ដើម្បីដាក់សម្ពាធលើក្រុមហ៊ុនចិន និងការអនុវត្តពាណិញ្ជកម្មរបស់ចិន គឺតែងតែងឆ្លងផុតដំណាក់កាលអនុម័តនៅរដ្ឋសភាដោយសំឡេងភាគច្រើន ព្រោះទាំងបក្សប្រជាធិបតេយ្យ និងបក្សសាធារណរដ្ឋរបស់លោក ដូណាល់ ត្រាំ សុទ្ធតែប្រកាន់ជំហរប្រឆាំងនឹងរដ្ឋាភិបាលក្រុងប៉េកាំង។

សមាជិកព្រឹទ្ធសភាមកពីគណបក្សប្រជាធិបតេ្យ លោក គ្រីស វែន ហូឡិន (Chris Van Hollen) ដែលជាអ្នកតាក់តែងសេចក្ដីព្រាងច្បាប់នេះជាមួយសមាជិកព្រឹទ្ធសភាមកពីគណបក្សសាធារណរដ្ឋ លោក ចន កេណ្ណឌី (John Kennedy) បានលើកឡើងក្នុងសេចក្ដីថ្លែងការណ៍ថា បណ្ដាវិនិយោគិនអាមេរិក “បានចាញ់បោកលុយ បន្ទាប់ពីបណ្ដាក្រុមហ៊ុនចិន ដែលមើលពីសម្បកក្រៅហាក់ស្របច្បាប់ មិនត្រូវបានចាប់បង្ខំឱ្យគោរពតាមស្តង់ដារតែមួយ ដែលគោរពដោយបណ្ដាក្រុមហ៊ុនចុះបញ្ជីសាធារណៈ”៕

លោកទេសរដ្ឋមន្ត្រី ស៊ុន ចាន់ថុល ៖ ការវិនិយោគលើហេដ្ឋារចនាសម្ព័ន្ធ និងសំណង់ រួមចំណែកយ៉ាងខ្លាំងក្នុងការអភិវឌ្ឍសេដ្ឋកិច្ចជាតិ

ដោយ ៖ វុត្ថា
ភ្នំពេញ ៖ លោកទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងសាធារណៈការ និងដឹកជញ្ជូន បានអះអាងថា ការវិនិយោគលើវិស័យហេដ្ឋារចនាសម្ព័ន្ធ និងសំណង់ នឹងចូលរួមចំណែកយ៉ាងខ្លាំងក្លានៅក្នុងការអភិវឌ្ឍសេដ្ឋកិច្ច និងសង្គមជាតិដ៏មានប្រសិទ្ធភាព។

លោកទេសរដ្ឋមន្ត្រី ស៊ុន ចាន់ថុល នៅក្នុងវេទិកាវិនិយោគហេដ្ឋារចនាសម្ព័ន្ធ និងសំណង់លើកទី១១ នៅថ្ងៃទី២-៣ ខែធ្នូ ឆ្នាំ២០២០ ដែលបានប្រារព្ធធ្វើនៅទីក្រុងម៉ាកាវសាធារណរដ្ឋប្រជាមានិតចិនបានលើកឡើងថា ការវិនិយោគលើហេដ្ឋារចនាសម្ព័ន្ធ និងសំណង់ នឹងចូលរួមចំណែកយ៉ាងខ្លាំងក្លានៅក្នុងការអភិវឌ្ឍសេដ្ឋកិច្ចនិងសង្គម ពីព្រោះវាជាកត្តាដែលនាំឱ្យមានការបង្កើតនូវឱកាសការងារ ជំរុញកំណើនសេដ្ឋកិច្ចជាតិ ព្រមទាំងពង្រឹង និងពង្រីកទំនាក់ទំនងជាមួយបណ្តាប្រទេសនានាក្នុងតំបន់ផងដែរ។

ជាមួយគ្នានោះផងដែរ លោកបានបញ្ជាក់ថា “បណ្តាប្រទេសកំពុងអភិវឌ្ឍន៍នានា កំពុងប្រឈមនឹងតម្រូវការក្នុងការអភិវឌ្ឍហេដ្ឋារចនាសម្ព័ន្ធដែលត្រូវការថវិកាដ៏ច្រើនសន្ធឹកសន្ធាប់ ពោលគឺតម្រូវឱ្យស្វែងរកប្រភពហិរញ្ញប្បទានពីបណ្តាដៃគូអភិវឌ្ឍនានារួមមានដូចជា គំនិតផ្តួចផ្តើម “ខ្សែក្រវ៉ាត់ និងផ្លូវ” “ខ្សែក្រវ៉ាត់សេដ្ឋកិច្ចនៃវិថីសូត្រ” “វិថីសូត្រតាមផ្លូវសមុទ្រនៅសតវត្សទី២១” ហើយលើសពីនេះទៀត ធនាគារវិនិយោគហេដ្ឋារចនាសម្ព័ន្ធអាស៊ីរបស់ចិន (Asian Infrastructure Investment Bank-AIIB) នឹងដើរតួនាទីយ៉ាងសំខាន់ក្នុងវិស័យហេដ្ឋារចនាសម្ព័ន្ធរបស់បណ្តាប្រទេសកំពុងអភិវឌ្ឍន៍ផងដែរ”។

បច្ចុប្បន្ន រាជរដ្ឋាភិបាលកម្ពុជា ក្រោមការដឹកនាំដោយសម្ដេចតេជោ ហ៊ុន សែន ជានាយករដ្ឋមន្ត្រី បាននិងកំពុងបណ្តាក់ទុនវិនិយោគយ៉ាងច្រើនទៅលើហេដ្ឋារចនាសម្ព័ន្ធនានានៅទូទាំងប្រទេស ជាពិសេស ក្រៅពីរាជធានីភ្នំពេញដែលជាមជ្ឈមណ្ឌលពាណិជ្ជកម្មកំពូលប្រចាំប្រទេស និងជាប៉ូលសេដ្ឋកិច្ចទី១ គឺមានការវិនិយោគនៅប៉ូលសេដ្ឋកិច្ចទី២ និងទី៣ ដែលរួមមានខេត្តព្រះសីហនុស្ថាបនាផ្លូវចំនួន៣៤ខ្សែ ដែលចំណាយប្រមាន២០០លានដុល្លារ គ្រោងនឹងបញ្ចប់ទាំងស្រុងនៅត្រឹមដើមឆ្នាំ២០២១ បន្ថែមពីលើផ្លូវល្បឿនលឿនភ្នំពេញ ព្រះសីហនុ ការវិនិយោគនៅខេត្តសៀមរាបក៏សាងផ្លូវចំនួន៣៨ខ្សែ គ្រោងចំណាយថវិកា ១៥០លានដុល្លារ ដែលទើបបើកការដ្ឋានសាងសង់កាលពីថ្ងៃទី៣០ ខែវិច្ឆិកា ឆ្នាំ២០២០ ក្រោមអធិបតីដ៏ខ្ពង់ខ្ពស់របស់សម្ដេចតេជោ ហ៊ុន សែន។

បន្ថែមពីនេះ ក្រៅពីគម្រោងសាងសង់ផ្លូវជាតិលេខ៣ ដែលនឹងបញ្ចប់នៅពេលឆាប់ៗខាងមុខនេះ សម្រាប់ឆ្នាំ២០២១ គម្រោងអាទិភាពនៃការសាងសង់ និងស្ថាបនាផ្លូវជាតិសំខាន់ៗរួមមានចំនួន៣ទៀត គឺផ្លូវជាតិលេខ៤១ ផ្លូវជាតិលេខ៣១ និងផ្លូវជាតិលេខ៣៣ ៕