ទ្រព្យសកម្មក្នុងស្រុកសុទ្ធនៃគ្រឹះស្ថានទទួលបានប្រាក់បញ្ញើកើនទំហំទឹកប្រាក់ជាង ១៥,៣១ពាន់លានដុល្លារ

ដោយៈម៉ាណេត

ភ្នំពេញៈ ទ្រព្យសកម្មក្នុងស្រុកសុទ្ធ នៃគ្រឹះស្ថានទទួលបានប្រាក់បញ្ញើបានកើនឡើង១,១% ដល់ ៦១.២៤៦,៧ ប៊ីលានរៀល (ប្រមាណ ១៥,៣១ ប៊ីលាន ឬពាន់លានដុល្លារ) ក្នុងខែកក្កដា ឆ្នាំ២០២០ ធៀបនឹងខែមិថុនា។

កំនើននេះ បណ្តាលមកពីការកើនឡើង នៃខ្ទង់ឥណទេយ្យក្នុងស្រុកសុទ្ធ១,៧% ខណៈដែលខ្ទង់ផ្សេងៗ សុទ្ធបានថយចុះ ២,៥% ។ នេះបើយោងតាមរបាយការណ៍របស់ធនាគារជាតិនៃកម្ពុជា (NBC) ចេញផ្សាយនៅថ្ងៃទី២១ ខែតុលា ឆ្នាំ២០២០ ។

ការកើនឡើងនៃខ្ទង់ឥណនេយ្យក្នុងស្រុកសុទ្ធជាចម្បង ឆ្លុះបញ្ចាំងពីការកើនឡើងនៃខ្ពង់ឥណទានសុទ្ធ ចំពោះគ្រឹះស្ថានសាធារណៈមិនមែនហិរញ្ញវត្ថុ ឥណទានសុទ្ធចំពោះរដ្ឋាភិបាល និងខ្ទង់ឥណទានចំពោះវិស័យឯកជន២៧,៥% ១,៤% និង១,៣% រៀងគ្នា ខណៈដែលឥណទានសុទ្ធ ចំពោះគ្រឹស្ថានហិរញ្ញវត្ថុផ្សេងៗ បានថយចុះ ១,៨% ។

ការថយចុះនៃខ្ទង់ផ្សេងៗសុទ្ធ ជាចម្បងបណ្តាលមកពីការកើនឡើងនៃខ្ទង់ដើមទុន ៤% ខណៈដែលខ្ទង់ផ្សេងៗបានកើនឡើង ៨,២% ។

ជាមួយគ្នានេះដែរ ទ្រព្យសកម្មសរុបរបស់គ្រឹះស្ថានទទួល បានប្រាក់បញ្ញើផ្សេងៗទៀត (រាប់បញ្ចូលធនាគារពាណិជ្ជ និងគ្រឹះស្ថានមីក្រូហិរញ្ញវត្ថុទទួលប្រាក់បញ្ញើ)ក្នុងកក្កដា ឆ្នាំ២០២០ នេះ មានចំនួន ២២២.៥០២,១ ប៊ីលានរៀល បានកើនឡើង ១,៦% ធៀបនឹងខែមិថុនា។

ទ្រព្យសកម្មវិស័យធនាគារបានកើនឡើងយ៉ាង ឆាប់រហ័សពីប្រមាណត្រឹមតែ០,៥ ប៊ីលានដុល្លារអាមេរិកក្នុងឆ្នាំ១៩៩៨ ដល់៥៦ប៊ីលានដុល្លារអាមេរិក នាពេលបច្ចុប្បន្នគឺកើនឡើងប្រមាណ១១២ដង ។ ឥណទានប្រព័ន្ធធនាគារ ដែលត្រូវបានបែងចែកទៅកាន់គ្រប់វិស័យនៃសេដ្ឋកិច្ច និងប្រាក់បញ្ញើក្នុងស្រុកបានកើនឡើង១៦៥ដង ប្រហាក់ប្រហែលគ្នា គឺពីចំនួនប្រមាណតែ០,២ពាន់លានដុល្លារអាមេរិក ដល់ជាង៣៣ពាន់លានដុល្លារអាមេរិក។

ប្រព័ន្ធធនាគារបានអភិវឌ្ឍយ៉ាងឆាប់រហ័ស និងប្រកបដោយស្ថិរភាព ក្រោយពីការកែទម្រង់វិស័យធនាគារ ត្រូវបានបញ្ចប់ដោយជោគជ័យចាប់ពីឆ្នាំ២០០០មក។ ប្រព័ន្ធធនាគារ ក៏ត្រូវបានធ្វើទំនើបកម្មជាបន្តបន្ទាប់ ស្របតាមនិម្មាបនកម្មហិរញ្ញវត្ថុ អន្តរជាតិ និងបានរួមចំណែកស្នូល ក្នុងការរក្សាស្ថិរភាពម៉ាក្រូសេដ្ឋកិច្ច គាំទ្រកំណើនសេដ្ឋកិច្ច លើកកម្ពស់បរិយាបន្នសេដ្ឋកិច្ចនិងសង្គម និងកាត់បន្ថយភាពក្រីក្រ៕

អ្នកអភិវឌ្ឍន៍អចលនទ្រព្យចាប់ផ្តើមបង្ហាញសកម្មភាពឡើងវិញនៅក្នុងត្រីមាសទី៤

ដោយវុត្ថា

ភ្នំពេញៈ វិស័យអចលនទ្រព្យកម្ពុជា ក៏ដូចជាវិស័យផ្សេងៗទៀត បានទទួលរងនូវផលប៉ះពាល់យ៉ាងធ្ងន់ធ្ងរ ចាប់តាំងពីការផ្ទុះឡើងនូវវិបត្តិសេដ្ឋកិច្ចសកល ប៉ុន្តែចាប់តាំងពីចុងមាសទី៣ និងដើមត្រីមាសទី៤នៃឆ្នាំនេះ ត្រូវបានអ្នកជំនាញមើលឃើញថាអ្នកអភិវឌ្ឍន៍លើវិស័យអចលនទ្រព្យ បាននិងកំពុងចាប់ផ្តើមធ្វើសកម្មភាពបណ្តើរឡើងវិញ។

លោកស្រី ចេវ សុឃុន ប្រធានសមាគមអ្នកជំនាញអចលនទ្រព្យកម្ពុជា នៅក្នុងកិច្ចសម្ភាសជាមួយ គេហទំព័រ Propertyarea.asia កាលពីពេលថ្មីៗនេះឱ្យដឹងថា នៅចុងត្រីមាសទី៣ និងនៅត្រីមាសទី៤នៃឆ្នាំ២០២០នេះ ទាំងសកម្មភាពទិញ-លក់ និង ការអភិវឌ្ឍន៍ពីវិនិយោគិន លើវិស័យអចលទ្រព្យបានចាប់ផ្តើមមានសន្ទុះឡើងវិញ គួរឱ្យកត់សម្គាល់។

លោកស្រីបន្តថា “ខ្ញុំអាចនិយាយបានថា នៅក្នុងឆ្នាំក្រោយនេះ នឹងមានសញ្ញាវិជ្ជមាន នៅក្នុងវិស័យរបស់យើងអាចនឹងល្អឡើងវិញ ព្រោះថាអ្នកអភិវឌ្ឍន៍មួយចំនួនបានចាប់ផ្តើមអភិវឌ្ឍន៍បណ្តើរៗ នៅក្នុងចុងត្រីមាសទី៣ និងដើមត្រីមាសទី៤នេះ ដោយមិនរងចាំនោះទេ បើទោះបីមានបញ្ហាប្រឈមយ៉ាងណាក៏ដោយ” ។

លោកស្រីបន្ថែមទៀតថា អ៊ីចឹង យើងឃើញសញ្ញាវិជ្ជមានសម្រាប់ឆ្នាំ២០២១ វិស័យយើងនឹងល្អប្រសើរជាងឆ្នាំ២០២០នេះ ជាពិសេសវានឹងអាចមានការរីកចំរើន ដោយសារអ្នកអភិវឌ្ឍន៍មានការទិញដីទុក ហើយនៅពេលដែលវិបត្តិ មានការធូស្បើយខ្លាំងហើយពួកគាត់នឹងចាប់ផ្តើមអភិវឌ្ឍន៍នៅក្នុងឆ្នាំក្រោយនេះ។

ប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា លោក ច្រឹក សុខនីម បានឱ្យដឹងដែរថា “សម្រាប់ការយល់ឃើញរបស់ខ្ញុំ នៅក្នុងឆ្នាំ២០២១ វាហាក់ដូចជាមានភាពស្រពេចស្រពិលនៅឡើយ សម្រាប់ធ្វើការព្យាករណ៍ ដោយសារតែវ៉ាក់សាំងមិនទាន់ប្រាកដប្រជា” ។

លោកបន្តថា ទោះជាយ៉ាងណាក៏ដោយ វិស័យអចលនទ្រព្យនៅកម្ពុជានៅតែបន្តមានសកម្មភាព ជាពិសេសអតិថិជនក្នុងស្រុកនៅតែបន្តទិញ-លក់ ប៉ុន្តែអាចនឹងមិនកម្រើកច្រើននោះទេ។

ប្រធានសមាគមរូបនេះបានបញ្ជាក់ទៀតថា “ធនាគារមួយចំនួននៅតែបន្តគាំទ្រផ្តល់កម្ចីដល់វិស័យអចលនទ្រព្យ ដែលវាជារឿងល្អ និងអនុញ្ញាតឱ្យវិស័យនេះនៅតែមានដង្ហើម បើទោះជាកម្ពុជាជួបឧបសគ្គយ៉ាងណាក៏ដោយ។ ដើម្បីឱ្យកិច្ចការងារលើវិស័យអចលនទ្រព្យដំណើរការ តាមរយៈគោលនយោបាយរបស់រាជរដ្ឋាភិបាល វិស័យធនាគារ និងតម្រូវការក្នុងស្រុក គឺជាកត្តាសំខាន់ជួយជម្រុញ ឱ្យវិស័យអចលនទ្រព្យរីកចម្រើននាពេលអនាគត” ៕

តើស្ពានឆ្ពោះទៅកាន់តំបន់អរិយក្សត្រអាចនឹងសាងសង់ចេញពីទីក្រុងកោះនរា?

ដោយស៊ីវ ម៉េង

ភ្នំពេញៈ នៅថ្ងៃទី២៦ តុលាខាងមុខនេះ ស្ពានតភ្ជាប់រវាងទីក្រុងកោះពេជ្រ និងទីក្រុងកោះនរា នឹងបើកការដ្ឋានស្ថាបនាជាផ្លូវការ ក្រោមអធិបតីភាពសម្តេចតេជោហ៊ុន សែននាយករដ្ឋមន្ត្រីនៃកម្ពុជា។

ប៉ុន្តែមានសំណួរជាច្រើន បានសាកសួរមកកាន់គេហទំព័រ Propertyarea.asia ពីគំរោងសាងសង់ស្ពានតភ្ជាប់ទៅតំបន់អរិយក្សត្រថា តើនឹងសាងសង់នៅពេលណា? ចម្លើយដែលយើងអាចឆ្លើយបាន គឺស្ពាននេះប្រាកដជាសាងសង់នាពេលខាងមុខ ប៉ុន្តែនៅពេលណាមិនទាន់ប្រាកដនៅឡើយទេ។

អគ្គនាយករងក្រុមហ៊ុន OCIC លោកទូច សំណាង បានមានប្រសាសន៍ឲ្យដឹងតាមទូរស័ព្ទកាលពីថ្ងៃទី២១ តុលាកន្លងមកថា ក្រុមហ៊ុនមិនមានគំរោងសាងសង់ស្ពាន ចេញពីទីក្រុងកោះនរា ទៅកាន់តំបន់អរិយក្សត្រនោះឡើយ ប៉ុន្តែអ្វីៗក៏អាចកើតមានផងដែរនាពេលអនាគត ព្រោះយើងមិនអាចបដិសេធ ១០០ភាគរយនោះទេ។

ជាមួយនឹងសកម្មភាពស្ថាបនា ទីក្រុងកោះនរាថ្មីយ៉ាងមមាញឹក ប្លង់គោលអភិវឌ្ឍន៍ទីក្រុងនេះ ត្រូវបានបើកបង្ហាញជាផ្លូវការហើយ ដោយផ្ទាំងរូបគំនូរជាលក្ខណៈ 3D បានដាក់បង្ហាញនៅលើជញ្ជាំង ដែកដែលហ៊ុំព័ទ្ឋគមរោង D.I RIVIERA ។

លោកទូច សំណាង បានបន្តថា រហូតមកទល់ពេលនេះ យើងមិនអាចបញ្ជាក់បានថាស្ពាននឹងត្រូវសាងសង់តភ្ជាប់ជាមួយ នឹងទីក្រុងកោះនរាទៅកាន់តំបន់អរិយក្សត្រទេ ប៉ុន្តែអ្វីៗក៏អាចកើតឡើងបានដែរ ព្រោះវាអាស្រ័យលើការសម្រេចចិត្តរបស់រដ្ឋាភិបាល។

ទីប្រឹក្សាសមាគមអចលនទ្រព្យសកល ស្ថាបនិក និងជាអគ្គនាយកនៃគេហទំព័រPropertyarea.asia លោកយិន លាងគង់ បានមានប្រសាសន៍ថា យោងតាមការវិវត្តនៃផ្នែកនគរូបនីយកម្មទីក្រុង ពិសេសការកសាងទីក្រុងកោះនរាថ្មី បានធ្វើឲ្យលទ្ឋភាពនៃការសាងសង់ស្ពានតភ្ជាប់ពីតំបន់ក្តីតាកុយ ផ្លូវជាតិលេខ១ទៅតំបន់អរិយក្សត្រ នឹងអាចលើកចេញពីទីតាំងនេះ ដោយសារលក្ខខ័ណ្ឌមួយចំនួនដូចជា ទី១ ប្រសិនបើកការស្ថាបនាស្ពានចេញពីក្តីតាកុយ ទៅអរិយក្សត្រ នឹងធ្វើឲ្យខូចសម្រស់ទីក្រុងនេះ។

ទី២ បើសាងសង់ចេញពីទីតាំងដដែល នឹងធ្វើឲ្យតស្ពានវែង ដែលត្រូវចំណាយថវិកាច្រើន និងមិនសូវមានសោភ័ណភាព ទី៣ បើសិនជាអាចសាងសង់ស្ពានចេញពីទីក្រុងកោះនរា នឹងលើកកំពស់សោភ័ណភាពទីក្រុងថ្មីផង និងជួយកាត់បន្ថយចម្ងាយស្ពានផង។

លោកបន្តថា “ការសាងសង់ស្ពាន នឹងចាប់ផ្តើមនៅពេលណាមួយឆាប់ៗនេះ ឬយូរអាស្រ័យលើថា តើស្ពាននេះស្ថិតក្នុងគោលដៅអាទិភាពកម្រិតណា ប៉ុន្តែការសាងសង់ប្រាកដជាសាងសង់ ព្រោះគំរោងបុរីធំៗនិងល្បីឈ្មោះជាច្រើន បានទិញដីនៅតំបន់នោះរួចហើយ” ។

លោកយិន លាងគង់់បានបន្តថា សម្តេចតេជោធ្លាប់បានមានប្រសាសន៍រួចហើយ ពីគម្រោងសាងសង់ស្ពានចេញពីតំបន់ក្តីតាកុយ ទៅកាន់តំបន់អរិយក្សត្រនៅពេលសម្តេចតេជោអញ្ជើញជាអធិតបី ក្នុងពិធីបើកសម្ភោធឲ្យប្រើប្រាស់ជាផ្លូវការ នូវមហាវិថីសម្តេចតេជោឬផ្លូវ ៦០ម៉ែត្រ៕

សេដ្ឋវិទូគាំទ្រសំណើរដ្ឋាភិបាលទៅកាន់ធនាគារឯកជន និងគ្រឹះស្ថានហិរញ្ញវត្ថុលើការពន្យារពេលបង់ប្រាក់

ដោយៈរ៉ាណេត

ភ្នំពេញៈ អនុវត្តតាមការណែនាំរបស់សម្ដេចតេជោ ហ៊ុន សែន ប្រមុខដឹកនាំរាជរដ្ឋាភិបាលកម្ពុជា ធនាគារជាតិនៃកម្ពុជា បានចេញសេចក្តីជូនដំណឹងបន្ទាប់មួយ ស្នើសុំដល់គ្រឹះស្ថានធនាគារ និងហិរញ្ញវត្ថុ បន្តកិច្ចសហការល្អ ក្នុងក្របខណ្ឌកិច្ចការពារអតិថិជន និងបន្តផ្តល់ការអនុគ្រោះ តាមលទ្ធភាពចំពោះអ្នកខ្ចីប្រាក់ ដែលបានរងផលប៉ះពាល់ជាក់ស្តែងដោយសារទឹកជំនន់។

លោកបណ្ឌិត ហុង វណ្ណៈ អ្នកវិភាគ និងស្រាវជ្រាវសេដ្ឋកិច្ចនៃរាជបណ្ឌិត្យសភាកម្ពុជា នៅល្ងាចថ្ងៃទី២១ ខែតុលា ឆ្នាំ២០២០ បានប្រសាសន៍ថា ប្រសិនបើបណ្តាធនាគារឯកជន ក៏ដូចជាគ្រឹះស្ថានហិរញ្ញវត្ថុនានា អនុវត្តន៍តាមការស្នើសុំរបស់រាជរដ្ឋាភិបាលបានទាំងអស់គ្នា វាគឺជារឿងមួយដ៏ល្អ ហើយក៏ជាសកម្មភាព ចូលរួមចែករំលែកនូវទុក្ខលំបាករបស់ប្រជាពលរដ្ឋ ក៏ដូចជាផលលំបាករបស់រដ្ឋាភិបាលផងដែរ។

លោកបណ្ឌិតបន្តថា “វាដូចជាមុនមានផលប៉ះពាល់ ទៅដល់គ្រឹះស្ថានហិរញ្ញវត្ថុណាមួយនោះទេ ព្រោះជាការស្ម័គ្រចិត្តចូលរួមអនុវត្តតែប៉ុណ្ណោះ ហើយក៏មិនមែនជាការកំណត់របស់រាជរដ្ឋាភិបាលនោះដែរ” ។ លោកបន្ថែមថា “តែជាសំណើរសុំឱ្យមានការចូលរួមក្នុងគ្រា ដែលកំពុងប្រឈមនឹងផលលំបាករបស់ប្រជាពលរដ្ឋ ស្ទើរទូទាំងប្រទេសផ្ទួនៗ ព្រោះវិបត្តិ Covid-19 មិនទាន់ផុតរលត់ផង គ្រោះជំនន់បានមកបន្តបន្ថែមមួយតង់ទៀត” ។

អ្នកវិភាគសេដ្ឋកិច្ចរូបនេះបានបញ្ជាក់ថា រាល់ការចូលរួមពីសំណាក់ធនាគារឯកជន ក៏ដូចជាគ្រឹះស្ថានហិរញ្ញ ទាំងអស់ គឺពួកគេសុទ្ធតែបានសិក្សាលម្អិត ពីគោលការណ៍ផ្ទៃក្នុងរបស់ពួកគេរួចរាល់ មុនពេលសម្រេចអនុវត្តន៍ នៅក្នុងដំណាក់កាលណាមួយជាមិនខាន។

ធនាគារជាតិនៃកម្ពុជានៅល្ងាចថ្ងៃទី២១ ខែតុលា ឆ្នាំ២០២០ នេះបានបញ្ជាក់ថា ធនាគារជាតិនៃកម្ពុជា សូមថ្លែងសរសើរចំពោះគ្រឹះស្ថានធនាគារ និងហិរញ្ញវត្ថុ ដែលបានចូលរួមសហការអនុវត្តន៍យ៉ាងល្អ ក្នុងការអនុវត្តវិធានការនានា របស់រាជរដ្ឋាភិបាល និងធនាគារជាតិនៃកម្ពុជា ដែលបានដាក់ចេញ ដូចជា សារាចរណែនាំស្តីពីឥណទានរៀបចំឡើងវិញ ការអនុគ្រោះ បន្ទូរ-បន្ថយកម្រៃសេវាផ្សេងៗ ពាក់ព័ន្ធនឹងឥណទាន និង/ឬលើកលែងការផាកពិន័យផ្សេងៗ និងការរឹបអូសទ្រព្យបញ្ចាំ ដោយមិនមានដីកាពីតុលាការជាដើម ក្នុងកំឡុងពេល នៃការរីករាលដាលនៃជំងឺកូវីដ១៩ ដើម្បីសម្រាលបន្ទុករបស់អ្នកខ្ចីប្រាក់។

ទន្ទឹមនេះ ក្នុងស្ថានភាពដែលខេត្ត-ក្រុងមួយចំនួន នៃប្រទេសកម្ពុជា ទទួលរងផលប៉ះពាល់ពីគ្រោះទឹកជំនន់ ធនាគារជាតិនៃកម្ពុជា ក៏ស្នើសុំដល់គ្រឹះស្ថានធនាគារ និងហិរញ្ញវត្ថុ បន្តកិច្ចសហការល្អ ក្នុងក្របខណ្ឌកិច្ចការពារអតិថិជន និងបន្តផ្តល់ការអនុគ្រោះ តាមលទ្ធភាពចំពោះអ្នកខ្ចីប្រាក់ ដែលបានរងផលប៉ះពាល់ជាក់ស្តែង ដោយសារទឹកជំនន់។

ធនាគារជាតិនៃកម្ពុជា សង្ឃឹមយ៉ាងមុតមាំថា គ្រឹះស្ថានធនាគារនិងហិរញ្ញវត្ថុ នឹងបន្តចូលរួមសហការ ប្រកបដោយការយោគយល់ និងអធ្យាស្រ័យខ្ពស់ ស្របតាមស្ថានភាពជាក់ស្តែងរបស់អតិថិជន៕

ក្រុមហ៊ុន ប៉េង ហួត គ្រុប ឧបត្ថម្ភរថយន្ត ២គ្រឿង ដល់រដ្ឋបាលខណ្ឌច្បារអំពៅ និងអង្ករចំនួន៥០តោន ជូនសាលារាជធានីភ្នំពេញ

កាលពីព្រឹកថ្ងៃទី២១ ខែតុលា ឆ្នាំ២០២០ ក្រុមហ៊ុន ប៉េង ហួត គ្រុប បាននាំយក រថយន្តចំនួន០២គ្រឿង ( រថយន្តបោសសំអាតផ្លូវចំនួន ០១គ្រឿង និងរថយន្តផ្ទុកទឹកចំណុះ ៨,០០០លីត្រ ចំនួន ០១គ្រឿង) សរុបជាថវិកាស្មើនឹង ១៣៥,០០០ (មួយរយសាមសិបប្រាំពាន់ដុល្លាអាមេរិកគត់) ជូនដល់រដ្ឋបាលខណ្ឌច្បារអំពៅសម្រាប់ការងារសម្អាតបរិស្ថានដើម្បីលើកកម្ពស់សោភ័ណភាពក្នុងមូលដ្ឋាន។

ថ្លែងក្នុងពិធីប្រគល់រថយន្ត លោកជំទាវ ហុង ដានី អគ្គនាយិកា ក្រុមហ៊ុន បុរី ប៉េង ហួត បានលើកឡើងថា៖ ” នាងខ្ញុំមានកិត្តិយស និងសេចក្តីរីករាយដែលបានចូលរួមចំណែកអភិវឌ្ឍទីក្រុងស្អាតជាមួយគម្រោងអភិវឌ្ឍដែលធំជាងគេរបស់ក្រុមហ៊ុនមកក្នុងខណ្ឌច្បារអំពៅនេះ។ សូមថ្លែងអំណរគុណផងដែរដល់រដ្ឋបាលខណ្ឌច្បារអំពៅដែលតែងតែសហការ គាំទ្រ និងជួយសម្រួលដល់ការអភិវឌ្ឍរបស់ក្រុមហ៊ុន។ ជាមួយឡានទាំង០២គ្រឿងនេះ នាងខ្ញុំសង្ឃឹមថា យើងចូលរួមទាំងអស់គ្នាថែរក្សាបរិស្ថាន និងសំអាតទីក្រុងរបស់យើងឲ្យបានកាន់តែស្អាត “។

លោកចេង មុនីរ៉ា អភិបាលនៃគណៈអភិបាលខណ្ឌច្បារអំពៅ បានថ្លែងអំណរគុណយ៉ាងជ្រាលជ្រៅចំពោះក្រុមហ៊ុន ប៉េង ហួត គ្រុប ដែលតែងតែចូលរួមសហការជាមួយរដ្ឋបាលខណ្ឌច្បារអំពៅលើផ្នែកកិច្ចការសាធារណៈជាច្រើនដូចជា៖ ការរក្សាសណ្ដាប់ធ្នាប់សន្តិសុខ ការកសាងហេដ្ឋារចនាសម្ព័ន្ធ ការលើកកម្ពស់សោភ័ណភាពបរិស្ថានស្អាត និងការអភិវឌ្ឍធនធាននានា។ល។ ក្នុងគោលបំណងចូលរួមសហការជាមួយអជ្ញាធរមូលដ្ឋាន ដើម្បីធានានូវឌ្ឍនភាព សណ្ដាប់ធ្នាប់សន្តិសុខសង្គម សោភ័ណភាពទីក្រុងស្អាត របស់មូលដ្ឋានខណ្ឌច្បារអំពៅ និងប្រជាពលរដ្ឋទាំងអស់គ្នា។

លោកបានបន្ថែមថា៖ ” រថយន្តទាំងពីគ្រឿងនេះ ពិតជានឹងបានចូលរួមចំណែកយ៉ាងសំខាន់ ក្នុងការលើកកម្ពស់សោភ័ណបរិស្ថាន ការអភិវឌ្ឍទីក្រុងស្អាត ព្រមទាំងចូលរួមអនុវត្តសំអាតការងារអនាម័យ ដើម្បីថែរក្សាបរិស្ថានស្អាតសម្រាប់មូលដ្ឋានខណ្ឌច្បារអំពៅ និងបម្រើដល់ការងារសង្គមផ្សេងៗទៀត “។

ក្នុងថ្ងៃដដែលនេះដែរ តំណាងរបស់ក្រុមហ៊ុន ប៉េង ហួត គ្រុប ក៏បាននាំយកនូវអង្ករចំនួន៥០តោន ឧបត្ថម្ភដល់សាលារាជធានីភ្នំពេញ ដើម្បីជួយសម្រួល និងសង្គ្រោះដល់បងប្អូនប្រជាពលរដ្ឋដែលរងគ្រោះដោយសារទឹកជំនន់។

ទីផ្សារអចលនទ្រព្យ និងលំនៅដ្ឋានក្នុងខណ្ឌសែនសុខ នៅតែបន្តមានតម្រូវការ

ដោយ ៖ សំំណាង

ភ្នំពេញ ៖ ខណៈពេលដែលទីផ្សារអចលនទ្រព្យនៅតាមតំបន់មួយចំនួននៃរាជធានីភ្នំពេញកំពុងទទួលរងនូវការធ្លាក់ចុះក្រោមឥទ្ធិពលនៃវិបត្តិសេដ្ឋកិច្ចជាសកល ដែលកំពុងគំរាមកំហែងនោះ សម្រាប់តែតំបន់ខ័ណ្ឌសែនសុខ នៅតែបង្ហាញពីភាពល្អប្រសើរនៃទីផ្សាររបស់ខ្លួនជាមួយនឹងគម្រោងអភិវឌ្ឍន៍ជាច្រើន។

ប្រធានសមាគមអចលនទ្រព្យសកល (GRA) លោក សំ សុខនឿន បានមានប្រសាសន៍ប្រាប់តាមទូរស័ព្ទនៅល្ងាចថ្ងៃទី២១ ខែតុលា ឆ្នាំ២០២០ថា តំបន់សែនសុខ នៅតែបន្តមានសកម្មភាពអភិវឌ្ឍន៍ទាំងលើផ្នែកហេដ្ឋារចនាសម្ព័ន្ធពីសំណាក់រាជរដ្ឋាភិបាល និងវិស័យឯកជន ដែលក្នុងនោះវិស័យសំណង់លំនៅដ្ឋានបានបង្ហាញពីភាពលេចធ្លោជាងគេ។

លោកបញ្ជាក់ថា “ខណ្ឌសែនសុខ បានក្លាយទៅជាតំបន់ដែលមានប្រជាប្រិយភាពខ្ពស់ ក្នុងវិស័យសំណង់លំនៅដ្ឋានកម្រិតមធ្យម និងកំពុងឈានទៅរកកម្រិតខ្ពស់ជាបណ្ដើរៗ ហើយក៏បានត្រៀមខ្លួនរួចរាល់ជាស្រេច ក្នុងទទួលយកវត្តមានថ្មីនៃវិស័យខុនដូ ដែលកំពុងមានតម្រូវការនាពេលបច្ចុប្បន្ននេះ” ។

លោក សំ សុខនឿន បានបញ្ជាក់ថា “ខណ្ឌសែនសុខ គឺជាតំបន់ដែលមានសក្ដានុពខ្ពស់ សម្រាប់បម្រើដល់វិស័យពាណិជ្ជកម្ម ដែលក្រៅពីជាតំបន់ប្រមូលផ្តុំទៅលំនៅដ្ឋានកម្រិតមធ្យម និងកម្រិតខ្ពស់ ក៏មានមជ្ឈមណ្ឌលពាណិជ្ជកម្មធំៗ ដូចជាផ្សារទំនើប AEON2 ផ្សារ Makro ផ្សារ Global House ផ្សារទំនើបជីបម៉ុង មណ្ឌលវិមានសែនសុខ រួមជាមួយនឹងអាគារពាណិជ្ជកម្មអន្តរជាតិមួយចំនួនទៀត ដែលជំរុញឱ្យវិស័យអចលនទ្រព្យ នៅក្នុងតំបន់នេះ កាន់តែមានសក្តានុពលខ្ពស់”។

នាយិកាក្រុមហ៊ុនអចលនទ្រព្យ AMATAK Property Service លោកស្រី តាំង ហួរ បានមានប្រសាសន៍ថា ខណ្ឌសែនសុខ ពេលនេះបានអភិវឌ្ឍន៍ខ្លួនក្លាយជាតំបន់ពាណិជ្ជកម្មកម្រិតខ្ពស់រួចទៅហើយ។ លោកស្រីបានមានប្រសាសន៍បញ្ជាក់ថា “ខណ្ឌសែនសុខបច្ចុប្បន្ននេះបានបំពេញទៅដោយគម្រោងបុរីលំនៅដ្ឋានធំៗ ក៏ដូចជាបណ្តុំលំនៅដ្ឋានកម្រិតខ្ពស់ រួមជាមួយវត្តមាននៃអគារខ្ពស់ៗដែលបម្រើឱ្យវិស័យពាណិជ្ជកម្ម”។

លោកស្រីបានលើកឡើងទៀតថា ពីមុនតំបន់ខណ្ឌសែនសុខ ស័ក្ដិសមទៅនឹងការវិនិយោគ និងអភិវឌ្ឍន៍ទៅលើគម្រោងលំនៅដ្ឋានកម្រិតមធ្យម និងក្រោមមធ្យម ប៉ុន្តែសព្វថ្ងៃនេះខុសពីកាលពីឆ្នាំកន្លងទៅ។ ការវិនិយោគលើគម្រោងលំនៅដ្ឋានកម្រិតមធ្យមនៅទីនេះលែងមានទៀតហើយ ប៉ុន្តែសម្រាប់គម្រោងអភិវឌ្ឍន៍លំនៅដ្ឋានកម្រិតខ្ពស់ ឬមជ្ឈមណ្ឌលពាណិជ្ជកម្មគឺនៅមានឱកាស ជាពិសេសវិស័យខុនដូកម្រិតមធ្យម ដោយសារតែតម្លៃដីនៅតំបន់ខណ្ឌនេះបានឡើងខ្ពស់ផុតពីកម្រិតនៃការអភិវឌ្ឍវិស័យលំនៅដ្ឋានកម្រិតទាប ឬក្រោមមធ្យមនោះទៀតហើយ៕

សម្តេចតេជោ៖ រដ្ឋាភិបាលនឹងពិនិត្យគម្រោងវិនិយោគអគ្គិសនីធំៗចំនួន ២ នៅចុងសប្តាហ៍នេះ

ដោយ៖វុត្ថា

ភ្នំពេញ៖ សម្តេតេជោ ហ៊ុន សែន នាយករដ្ឋមន្ត្រីនៃកម្ពុជា បានបញ្ជាក់ថា រដ្ឋាភិបាលនឹងចាប់ផ្តើមពិនិត្យលើគម្រោងវិនិយោគវិស័យអគ្គិសនីធំៗចំនួន ២ នៅចុងសប្តាហ៍នេះ ។

សេចក្តីប្រកាសព័ត៌មានរបស់ទីស្តីការគណរដ្ឋមន្ត្រី នៅថ្ងៃទី ២១ ខែតុលា ឆ្នាំ ២០២០នេះ ឱ្យដឹងថា យោងតាមចំណាររបស់សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជាំ ចុះថ្ងៃទី ២០ ខែតុលា ឆ្នាំ ២០២០ នៅក្នុងកិច្ចប្រជុំពេញអង្គគណៈរដ្ឋមន្ត្រី នៅថ្ងៃទី ២៣ ខែតុលា ឆ្នាំ ២០២០នេះ នឹងបន្ថែមនូវរវបៀបវរៈថ្មីមួយទភ ។

សេចក្តីប្រកាសព័ត៌មានបញ្ជាក់ថា របៀបវារៈថ្មីមនេះ ស្តីពីការអភិវឌ្ឍន៍គម្រោងវារីអគ្គិសនីស្ទឹងតាតៃ លើអនុភាព ១៥០ មេហ្គាវ៉ាត់ នៅស្រុកថ្មបាំង ខេត្តកោះកុង និងគម្រោងវិនិយោគសាងសង់ខ្សែបណ្តាញបញ្ជូនអគ្គិសនី ៥០០ មេហ្គាវ៉ាត់ ពីរាជធានីភ្នំពេញទៅព្រំដែនកម្ពុជា-ឡាវ និងពីបាត់ដំបង ទៅព្រំដែនកម្ពុជា-ថៃ ។

បើតាមលោក ផៃ ស៊ីផាន អ្នកនាំពាក្យនៃរាជរដ្ឋាភិបាលកម្ពុជា បានឱ្យដឹងដែរថា គណៈរដ្ឋមន្រ្តីនឹងបើកកិច្ចប្រជុំពេញអង្គគណៈរដ្ឋមន្រ្តី ក្រោមអធិបតីភាពតេជោ ហ៊ុន សែន នាយករដ្ឋមន្រ្តីនៃកម្ពុជានៅថ្ងៃទី២៣ ខែតុលា ឆ្នាំ២០២០ចុងសប្តាហ៍នេះ ដើម្បីពិភាក្សា និងឆ្លងលើរបៀបវារៈដូចខាងក្រោម៖
១-សេចក្តីព្រាងច្បាប់ស្តីពីហិរញ្ញវត្ថុសម្រាប់ការគ្រប់គ្រងឆ្នាំ២០២១ ២-សេចក្តីព្រាងច្បាប់ស្តីពីការទូទាត់ថវិកាទូទៅរបស់រដ្ឋសម្រាប់ការគ្រប់គ្រងឆ្នាំ២០១៩ និង ៣-បញ្ហាផ្សេងៗ៕

KOICA ផ្តល់ហិរញ្ញប្បទានចំនួន ៨០ លានដុល្លារ អនុវត្តគម្រោងអភិវឌ្ឍន៍ចំនួន ១២ នៅកម្ពុជា

ដោយវុត្ថា

ភ្នំពេញ៖ ទីភ្នាក់ងារសហប្រតិបត្តិការអន្តរជាតិកូរ៉ (KOICA) បាននឹងកំពុងគាំទ្ររាជរដ្ឋាភិបាលកម្ពុជាក្នុងការអភិវឌ្ឍនប្រទេស តាមរយៈការផ្តល់ហិរញ្ញប្បទានឥតសំណង។ ជាក់ស្តែង KOICA កំពុងអនុវត្តគម្រោងចំនួន ១២ គម្រោង ដែលមានទឹកប្រាក់ចំនួន ៨០ លានដុល្លារអាមេរិក និងមានគម្រោងអាទិភាព មួយចំនួនទៀត សម្រាប់អនុវត្តក្នុងឆ្នាំ ២០២១ និងឆ្នាំ ២០២២។

នេះ បើតាមការបញ្ជាក់ពីលោក RHO Hyunjun ប្រធានតំណាង នៃទីភ្នាក់ងារ សហប្រតិបត្តិការអន្តរជាតិកូរ៉េ (KOICA) ប្រចាំប្រទេសកម្ពុជា នៅក្នុងជំនួបពិភាក្សាជាមួយ លោក ឈៀង យ៉ាណារ៉ា រដ្ឋមន្ត្រី ប្រតិភូអមនាយករដ្ឋមន្ត្រី និងជាអគ្គលេខាធិការគណៈកម្មាធិការនិតិកម្ម និងអភិវឌ្ឍន៍កម្ពុជា នៃក្រុមប្រឹក្សាអភិវឌ្ឍន៍កម្ពុជានៅថ្ងៃទី ២១ ខែតុលាឆ្នាំ ២០២០នេះ ។

លោក RHO Hyunjun បន្តថា ចំពោះការចួលរួមជាមួយរាជរដ្ឋាភិបាលក្នុងទប់ស្កាត់ជំងឺកូវីដ ១៩ KOICA បានបន្តផ្តល់ជំនួយ សង្គ្រោះបន្ទាន់ជាច្រើន និងផ្តល់ហិរញ្ញប្បទាន សម្រាប់ចូលរួមស្តារ និងជំរុញកំណើនសេដ្ឋកិច្ចកម្ពុជាផងដែរ។

លោក ឈៀង យ៉ាណារ៉ា រដ្ឋមន្ត្រី ប្រតិភូអមនាយករដ្ឋមន្ត្រី និងជាអគ្គលេខាធិការគណៈកម្មាធិការនិតិកម្ម និងអភិវឌ្ឍន៍កម្ពុជា នៃក្រុមប្រឹក្សាអភិវឌ្ឍន៍កម្ពុជាបានវាយតម្លៃខ្ពស់ចំពោះការគាំទ្ររបស់រដ្ឋាភិបាលកូរ៉េ នាពេលកន្លងមក ដែលបានរួមចំណែកដល់ការអភិវឌ្ឍសង្គម-សេដ្ឋកិច្ចកម្ពុជា តាមរយៈការអនុវត្តគម្រោង និងកម្មវិធីនានា។

លោក រដ្ឋមន្ត្រីប្រតិភូ ក៏បានថ្លែងអំណរគុណយ៉ាងជ្រាលជ្រៅ ចំពោះ KOICA ដែលបានគាំទ្ររាជរដ្ឋាភិបាលកម្ពុជាក្នុងការប្រយុទ្ធប្រឆាំងនឹងជំងឺកូវីដ ១៩ និងអរគុណជាថ្មីម្តងទៀតដល់ការគាំទ្រ និងកិច្ចសហប្រតិបត្តិការក្នុងភាពជាដៃគូល្អរបស់ KOICA។

ភាគីទាំងពីរនៅក្នុងជំនួបនេះក៏បានពិភាក្សាផ្លាស់ប្តូរយោបល់លើកិច្ចសហប្រតិបត្តិការអភិវឌ្ឍន៍កម្ពុជា-កូរ៉េ ក្នុងពេលបច្ចុប្បន្ន និងអនាគត៕

តើរាជរដ្ឋាភិបាលមានលទ្ធភាពខ្ចីឥណទានសម្បទានពីបរទេសត្រូវឈរលើគោលការណ៍អ្វីខ្លះ?

ដោយ៖វុត្ថា

ភ្នំពេញ៖ ដើម្បីមានលទ្ធភាពក្នុងការខ្ចីឥណទានសម្បទានពីដៃគូអភិវឌ្ឍន៍ ឬពីបរទេស រាជរដ្ឋាភិបាលកម្ពុជា បានដាក់ចេញនូវគោលការណ៍មួយចំនួន ស្របតាមកំណើនសេដ្ឋកិច្ច និងសេចក្តីត្រូវការរបស់ប្រទេសដែលកំពុងមានការរីកចំរើន។

លោក ជាម យៀប តំណាងរាស្ត្រមណ្ឌលព្រៃវែង និងជាប្រធានគណៈកម្មការទី២នៃរដ្ឋសភាបានបញ្ជាក់ថា ក្នុងការខ្ចីឥណទានសម្បទានពីបរទេស គឺរាជរដ្ឋាភិបាលកម្ពុជា ចាំបាច់ត្រូវឈរលើគោលការណ៍គន្លឹះសំខាន់ៗ ចំនួន ៤ ដូចខាងក្រោមនេះ៖

១) ខ្ចីឥណទានសម្បទាននៅក្នុងទំហំ សមស្របចំពោះស្ថានភាពថវិកា និងសេដ្ឋកិច្ចជាតិដែលអាចទ្រាំទ្របាន ។ ក្នុងន័យនេះលោកជាម យៀបពន្យល់ថា “យើងខ្ចីគេ លុះត្រាតែរំពឹងឃើញថា ទៅអនាគត យើងអាចមានលទ្ធភាពក្នុងការសងគេវិញ ហើយជំរាបប្រាប់ទៅម្ចាស់ឥណទានទៅតាមអ្វីដែលយើងអាចសងគេវិញបាន”។

២) ខ្ចីឥណទានសម្បទានណាដែលមានកម្រិតសម្បទាន ឬ លក្ខខណ្ឌអនុគ្រោះខ្ពស់ ។ លោក ជាម យៀបពន្យល់ថា “ខ្ចីប្រាក់គេលុះត្រាណាគេផ្តល់សម្បទាន និងការប្រាក់ទាបបំផុតដែលយើងអាចទ្រាំទ្របាន គឺជាគោលការណ៍រួមដែលប្រមុខនៃរាជរដ្ឋាភិបាលបានណែនាំ ដល់ក្រសួងសេដ្ឋកិច្ច និងហិរញ្ញវត្ថុ ឱ្យធ្វើយ៉ាងដូច្នេះ ទើបអាចខ្ខីគេបាន”។

៣) ខ្ចីឥណទានសម្បទានសម្រាប់វិស័យអាទិភាព ទ្រទ្រង់ចីរភាព គណនេយ្យភាព ប្រសិទ្ធិភាព សក្តិសិទ្ធិភាពខ្ពស់បំផុត។ លោក ជាម យៀបពន្យល់ថា “យើងខ្ចី យើងមែនហើយ ប៉ុន្តែយើងប្រើប្រាស់ចំពោះតែវិស័យណាដែលត្រូវអនុវត្តការងារ ឱ្យជាការងារអាទិភាពនៅក្នុងឆ្នាំនីមួយៗ”។

៤) ខ្ចីឥណទានសម្បទានឱ្យស្របទៅនឹងតម្លាភាព និងគណនេយ្យភាព ។ លោកជាម យៀបពន្យល់បន្ថែមថា “ក្នុងន័យនេះ គឺរាជរដ្ឋាភិបាល ក៏រាជរដ្ឋាភិបាលលើកឡើងនូវគោលការណ៍ទី ៥ ថ្មីមួយទៀត គឺ ប្រើប្រាស់ឥណទានសម្រាប់ ហិរញ្ញប្បទានវិនិយោគ លើហេដ្ឋារចនាសសម្ព័ន្ធសាធារណៈ ដែលមានស្តង់ដារ និងគុណភាពខ្ពស់”៕

ប្លង់គោលអភិវឌ្ឍន៍ទីក្រុងកោះនរាបានបង្ហាញរូបរាងច្បាស់លាស់ហើយ

ដោយស៊ីវ ម៉េង

ភ្នំពេញៈ ប្លង់គោលអភិវឌ្ឍន៍ទីក្រុងកោះនរាលំអិត បានដាក់តាំងបង្ហាញជាផ្លូវការហើយ ខណៈសកម្មភាពរៀបចំហេដ្ឋារចនាសម្ព័ន្ឋទីក្រុងនេះបាន និងកំពុងដំណើរការយ៉ាងសកម្ម។

អគ្គនាយករងក្រុមហ៊ុនOCIC លោកទូច សំណាងបានមានប្រសាសន៍ឲ្យដឹងកាលពីពេលថ្មីៗនេះថា ការរៀបចំហេដ្ឋារចនាសម្ព័ន្ឋសំរាប់កសាងទីក្រុងកោះនរា ដែលមានទំហំផ្ទៃដីជាង១០០ហិកតា នឹងបញ្ចប់តាមផែនការនៅឆ្នាំ២០២៣ខាងមុខនេះ ដោយគ្រោងចំណាយទុកវិនិយោគ ប្រមាណ២០០០លានដុល្លារអាមេរិក(គិតតែការរៀបចំហេ ដ្ឋារចនាសម្ព័ន្ឋ)។

លោកបន្តថា “ផែនការអភិវឌ្ឍន៍ទីក្រុងកោះនរា មានសភាពស្រដៀងគ្នានឹងទីក្រុងកោះពេជ្រនាពេលបច្ចុប្បន្ននេះ ដោយវានឹងក្លាយជាមជ្ឈមណ្ឌលពាណិជ្ជកម្ម លំនៅដ្ឋានលំដាប់អន្តរជាតិ”។លោកបន្តថា “ជាមួយគ្នានេះការបើកការដ្ឋានសម្ភោធស្ពានឆ្លងពីកោះពេជ្រ ទៅកាន់ទីក្រុងកោះនរា ក្រោមអធិបតីភាពរបស់សម្តេចតេជោ នឹងប្រព្រឹត្តិទៅតាមការគ្រោងទុក”។

លោកទូច សំណាងបានបន្តថា បច្ចុប្បន្នសកម្មភាព នៃការសាងសង់រចនាសម្ព័ន្ឋ ការចាក់គ្រឹះចេញពីទន្លេ ដើម្បីកសាងទីក្រុងនេះបាន និងកំពុងទទួលបានជោគជ័យ ដោយមិនបង្កឲ្យមានផលប៉ះពាល់បរិស្ថានណាមួយឡើយ ព្រោះក្រុមហ៊ុនបានសិក្សាពីបរិស្ថាន និងផលប៉ះពាល់ច្បាស់លាស់ណាស់ ទើបសម្រេចកសាងទីក្រុងនេះឡើង ព្រោះទីតាំងទីក្រុងនេះជាអតីតកោះចាស់ ដែលបានបាក់ចូលទឹកទន្លេកំឡុងទសវត្សរ៍កន្លងមកនេះ៕