សា​ទរៈ Balactan ផលិតផល​ទឹកដោះគោ​ដែល​ផ្តោតលើ​សុខភាព​និង​អនាគត​របស់​កុមារ

ដោយៈ​រ៉ា​ណេ​ត

ភ្នំពេញៈ សេចក្តីស្រលាញ់​របស់​មា​តា បិតា​បាន​កើតមាន​ដំបូងបង្អស់ នៅពេល​ពួកគេ​ដឹងថា ពួកគេ​បានផ្តល់​កំណើត​ដល់​ទារក សំរាប់​ស្នង​ត្រកូល​ឬ​ទាយាទ​របស់​ពួកគេ​នាពេល​អនាគត។

ហេតុនេះ ការយកចិត្តទុកដាក់​ដល់​សុខភាព​របស់​ទារក និង​កុមារ​ជា​រឿង​សំខាន់ ដែល​ឳ​ពុក ម្តាយ​គ្រប់រូប​តែងតែ​យកចិត្តទុកដាក់​ជា​ចម្បង ប៉ុន្តែ​ការជ្រើសរើស​ផលិតផល​សំរាប់​ទារក និង​កុមារ​ត្រូវតែ​ជា​រឿង​សំខាន់ ខណៈ​វត្តមាន​ទឹកដោះគោ Balactan Premium Gold ម្សៅ​ទឹកដោះគោ​គ្មាន​ជាតិ​សណ្ដែក ដ៏​ល្បីឈ្មោះ​ត្រូវបាន​នាំចូល​មកពី​ប្រទេស​អេស្បាញ។

ម្សៅ​ទឹកដោះគោ បា​ឡាក់​តាន់ នូ​ទ្រី​សិន ដែល​ផលិត​ដោយ​សាជីវកម្ម​ផ្នែក​ចំណី អាហារ​របស់​ប្រទេស​អេ​ស្ប៉ា​ញ ប្រើប្រាស់​នូវ​បច្ចេកវិទ្យា​ចុងក្រោយ​បំផុត នៃ​ចង្វាក់​ផលិតកម្ម និង​ការអភិវឌ្ឍន៍​ស្រាវជ្រាវ លើ​គ្រប់​ផលិតផល​របស់ខ្លួន រហូត​ក្លាយជា​ម៉ាក​សញ្ញា​ឈានមុខ​គេ ឈរ​នៅ​លំដាប់​លេខ១នៅ​ទ្វីបអឺរ៉ុប លើ​ការផ្គត់ផ្គង់​ប្រភេទ​ទឹកដោះគោ​ម្សៅ​សំរាប់​ទារក​ដែល​គ្មាន​ជាតិ​សណ្តែក។

ទឹកដោះគោ​ម្សៅ បា​ឡាក់​តាន់ ព្រី​មៀម​ហ្គោល (Balactan Premium Gold) គឺជា​ទឹកដោះគោ​ម្សៅ ដែលមាន​រូបមន្ត​ឈានមុខ​គេ ដោយ​រួមបញ្ចូល​នូវ​ជីវជាតិ​ចិញ្ចឹម ដែល​បំពេញ​នូវ តំរូវការ​នៃ​ការលូតលាស់ ទៅតាម​វ័យនីមួយៗរបស់​កុមារ។

អគ្គនាយិកា​ក្រុមហ៊ុន MYSL C, Ltd លោកស្រី ថេ​ង សុខលី បាន​មានប្រសាសន៍​បញ្ជាក់ប្រាប់​ឲ្យ​ដឹងថា ចំណុចខ្លាំង​របស់​ទឹកដោះគោ​ម្សៅ បា​ឡាក់​តាន់ ព្រី​មៀម​ហ្គោល គឺមាន​កេរ្តិ៍ឈ្មោះ​ល្បីល្បាញ និង​ឈរ​នៅ​លំដាប់​កំពូល​នៅក្នុង​ទ្វីបអឺរ៉ុប ដោយបាន​ទទួលស្គាល់​ពី​ស្ថាប័ន និង​អង្គការ​សុខភាព​ជាច្រើន រហូត​ទទួលបាន​វិញ្ញាបនបត្រ បញ្ជាក់​ពី​គុណភាព និង​គុណសម្បត្តិ នៃ​ផលិតផល​រហូតដល់​ចំនួនផ្សេងៗគ្នា។

លោកស្រី​បញ្ជាក់ថា “អ្វីដែល​ពិសេស និង​កាន់តែ​មានគុណ​ប្រយោជន៍​ចំពោះ​សុខភាព​ខួរក្បាល ប្រាជ្ញារ​ស្មារតី និង​រាងកាយ គឺ​វត្ថុធាតុដើម​ចាំបាច់ ដែល​បាន​ចំរាញ់​ចេញពី​ប្រភេទ​បន្លែ ផ្លែឈើ​សរីរាង្គ មិនមាន​សារធាតុ​អវិជ្ជមាន ដល់​គុណភាព​និង​បរិស្ថាន” ។

ជាមួយគ្នានេះ អ្នក​ម្តាយ​ជាច្រើន​បាន​គាំទ្រ​លើ​ផលិតផល​នេះ ដែល​ពួកគេ​បានសម្រេច​ចិត្ត​ប្រើប្រាស់​វា ដោយសារ​ពួកគេ​មើលឃើញ​ពី​គុណភាព​របស់ Balactan ។

រោងចក្រ​ផលិត​ម្សៅ​ទឹកដោះគោ​នេះ បាន​ផលិតឡើង​យ៉ាង​សំរិតសំរាំង​បំផុត ដើម្បី​ផ្តល់​ការលូតលាស់​ដល់​ទារក និង​កុមា​រទាំង​សតិបញ្ញា​ស្មារតី។ ផលិតផល​នេះ​មាន​ចំនួន៣ប្រភេទ សំរាប់​ទារក និង​កុមារ​ដូចជា ទី១ ផលិតផល​ទឹកដោះគោ Balactan លេខ១ ប្រើប្រាស់​សំរាប់​កុមារ​ចាប់ពី០ខែ រហូតដល់៦ខែ។

ទី២ Balactan លេខ2 ប្រើប្រាស់​សំរាប់​កុមារ​ចាប់ពី៦ខែ រហូតដល់១២ខែ និង​ទី៣ Balactan លេខ៣ សំរាប់​កុមារ​ចាប់ពី ១២ខែ រហូតដល់ ៣៦ខែ។

លោកស្រី​ថេ​ង សុខលី​បាន​បន្ត​ជាមួយ​ស្នាមញញឹម​បណ្តើ​រថា “ដោយសារ​ខ្ញុំ​ជា​ម្តាយ ដែលមាន​បុត្រ​ចំនួន៤នាក់ ហេតុនេះ​ការប្រើប្រាស់​ផលិតផល​អ្វីមួយ ខ្ញុំ​តែងតែ​យកចិត្តទុកដាក់​បំផុត លើ​ការលូតលាស់​សុខភាព​ស្មារតី​របស់​ពួកគេ។ ដូច្នេះហើយ​ទើប​ខ្ញុំ​សម្រេច​នាំចូល​ផលិតផល​នេះ​មក​កម្ពុជា ដើម្បី​ផ្តល់ជូន​អ្នក​ម្តាយ​គ្រប់រូប នូវ​ផលិតផល​សំរាប់​កូន​ជាទី​ស្រលាញ់​របស់​ពពួក​គេ” ។

លោកស្រី​បន្ថែមថា “ខ្ញុំ​ក៏បាន​ប្រើប្រាស់​ផលិតផល Balactan Premium Gold ដើម្បី​ផ្តល់​ការលូតលាស់​ដល់​កូន​របស់ខ្ញុំ ឲ្យ​មាន​សុខភាព​ល្អ ប្រាជ្ញា​វាងវៃ​ផងដែរ” ។

មាន​សារធាតុ Prebiotic ជំនួយ​ដល់​ការលូតលាស់​បាក់តេរី​ល្អ ក្នុង​ពោះវៀន ដែល​ជួយ​អោយ​ការ​ស្រូបយក​សារធាតុចិញ្ចឹម​បានល្អ និង​ងាយ​បន្ទោ​របង់ រួម​ជាមួយនឹង​សារធាតុ Nucleotides ជំនួយ​ដល់​ការបង្កើត​នៅ​កោសិការ​សរីរាង្គ (ឌី​អេ​ន​អេ និង អរ​អេ​ន​អេ)។

យោងតាម​ឯកសារ​របស់​ក្រុមហ៊ុន​បាន​ឲ្យ​ដឹងថា នៅក្នុង​វត្ថុធាតុដើម​មិនមាន​សារជាតិ​ប្រេងដូង (Palm Oil Free) ជួយ​អោយ​កុមារ​ស្រូបយក ឌី​អេ​ច​អេ និង​កាល់ស្យូម​បាន​កាន់តែ​ប្រសើរ កាត់បន្ថយ​អត្រា​ជំងឺ​ពុក​ឆ្អឹង​នា​ថ្ងៃ​អនាគត និង​ជួយ​អោយ​ស្រួល​បន្ទោ​របង់ មាន​ជាតិ Taurine ជួយ​ទ្រទ្រង់​ដល់​ការលូតលាស់​ខួរក្បាល ភ្នែក និង​បេះដូង។

ផលិតផល​នេះ ក៏មាន​ផ្ទុក DHA ដែល​ជួយ​ដល់​ការលូតលាស់​ខួរក្បាល និង​ប្រាជ្ញា​ស្មារតី ហើយ​ថែមទាំង​មាន Calcium ជំនួយ​ដល់​ការ​លូត​កម្ពស់​យ៉ាង​ល្អប្រសើរ។ អតិថិជន ក៏ដូចជា​អ្នកប្រើប្រាស់ ពិសេស​អ្នក​ម្តាយ​គ្រប់រូប ដែល​ចង់បាន​បុត្រ​ធីតា​មាន​សុខ​ភាពល្អ គួរ​ឲ្យ​ស្រលាញ់ សូម​ទំនាក់ទំនង​លេខ​ទូរស័ព្ទ៖ 087 924 777, 078 925 777 ៕

ក្រុមហ៊ុន PTT ត្រៀម​ទុន ២,៥ពាន់​លាន​ដុល្លារ​ពង្រីក​អាជីវកម្ម​នៅ​កម្ពុជា

ដោយ:សុខុម

បាងកក: ក្រុមហ៊ុន​ប្រេងឥន្ធនៈ និង​អាជីវកម្ម​លក់រាយ​ខ្នាត​យក្ស​របស់​ថៃ PTT Oil and Retail Business (PTTOR) ដែល​គេ​ស្គាល់​ថា PTT គ្រោង​ចំណាយ​ដើមទុន​រហូតដល់​ប្រមាណ២,៥ពាន់​លាន​ដុល្លារ​អាមេរិក សម្រាប់​ផែនការ​ពង្រីក​អាជីវកម្ម​ស្នូល​ទាំង៣ របស់ខ្លួន​ពី​ឆ្នាំ២០២១ ដល់​ឆ្នាំ២០២៥ ។ នេះ​បើ​យោងតាម​ការបញ្ជា​ក់រប​ស់លោក​ស្រី Jiraphon Kawswat អគ្គនាយិកា​ស្ដីទី​នៃ​ក្រុមហ៊ុន​នេះ។

យោងតាម​កាសែត The Nation ចុះផ្សាយ​កាលពី​ថ្ងៃទី២១ ខែមករា បានឱ្យដឹងថា ក្នុងចំណោម​ដើមទុន​សរុប យ៉ាងច្រើន​សន្ធឹកសន្ធាប់​នេះ ចំនួន ៣៤,៦% នឹងត្រូវ​យកទៅ​វិនិយោគ​លើ​អាជីវកម្ម ប្រេងឥន្ធនៈ ២៨,៦ភាគរយ វិនិយោគ​លើ​អាជីវកម្ម​មិនមែន​ប្រេង និង ២១,៨ភាគរយ វិនិយោគ​លើ​អាជីវកម្ម​អន្តរជាតិ​របស់ខ្លួន។ ហើយ​សល់ ១៥% ទៀត​នឹងត្រូវ​វិនិយោគ​លើ​អាជីវកម្មផ្សេងៗទៀត និង​លើ​ការស្វែងរក​ឱកាស​អាជីវកម្មថ្មី។

លោកស្រី Jiraphon Kawswat បាន​គូសបញ្ជាក់ថា សម្រាប់​អាជីវកម្ម​ប្រេងឥន្ធនៈ​របស់ខ្លួន ក្រុមហ៊ុន​មាន​គម្រោង​បង្កើន​ស្ថានីយ​ប្រេង PTT នៅក្នុង​ប្រទេស​ថៃ ពី​ចំនួន១.៩៨៦ស្ថានីយ ដល់ ៣.១០០ស្ថានីយ ត្រឹម​ឆ្នាំ២០២៥ ។

សម្រាប់​អាជីវកម្ម​មិនមែន​ប្រេងឥន្ធនៈ​របស់ខ្លួន ក្រុមហ៊ុន​មាន​គម្រោង​ពង្រីក​ហាង​កាហ្វេ Cafe Amazon ក្នុងប្រទេស​ថៃ ពី​ចំនួន ៣.១៨៦ សាខា​ដល់ ៥.៨០០សាខា។ សម្រាប់​អាជីវកម្ម​អន្តរជាតិ​របស់ខ្លួន ក្រុមហ៊ុន​នឹង​ផ្ដោតលើ​ការពង្រីក​ស្ថានីយប្រេងឥន្ធនៈ និង​សាខា​ហាង​កាហ្វេ Cafe Amazon ក្នុងប្រទេស​កម្ពុជា ឡាវ មី​យ៉ាន់​ម៉ា វៀតណាម និង​ហ្វីលីពីន។

ក្រុមហ៊ុន​ក៏​នឹង​បង្កើន​សាខា​ហាង​កាហ្វេ Cafe Amazon នៅក្នុង​ប្រទេស​ចិន បន្ថែមទៀត​ផងដែរ។ បច្ចុប្បន្ន​ក្រុមហ៊ុន PTT មាន​ស្ថានីយប្រេងឥន្ធនៈ រហូតដល់​ទៅ៣២៩ស្ថានីយ​នៅក្នុង​ទីផ្សារ​បរទេស។

លោកស្រី Jiraphon Kawswat បាន​បន្ថែមទៀតថា ក្រុមហ៊ុន​ក៏​នឹង​បើក​ស្ថានីយ​បញ្ចូល​ថាមពល​សម្រាប់​រថយន្ត​អគ្គិសនី នៅលើ​ផ្លូវសំខាន់ៗទូទាំងប្រទេស​ថៃ ផងដែរ។

បច្ចុប្បន្ន ក្រុមហ៊ុន​កំពុង​សាកល​ល្បង​សេវា​កម្មនេះ នៅតាម​ស្ថា​នី​ប្រេងឥន្ធនៈ PTT នៅ២៥ទីតាំង​របស់ខ្លួន៕

កត្តា​អ្វីខ្លះ​ជួយ​ជម្រុញ​ឲ្យ​ខណ្ឌ​ចំនួន២ នៅ​ភាគខាងត្បូង​នៃ​ទីក្រុង​ភ្នំពេញមានការ​រីកចំរើន​លឿន

ដោយ​គង់ សូរិយា

ភ្នំពេញៈ ប្រធាន​សមាគម​អ្នកជំនាញ​អចលនទ្រព្យ​កម្ពុជា បាន​មើលឃើញថា ខណ្ឌ​ចំនួន២នៅ​ភាគខាងត្បូង នៃ​ទីក្រុង​ភ្នំពេញ​នាពេល​បច្ចុប្បននេះ បាន​នឹង​កំពុង​សក្តានុពល និង​រីកចំរើន​ខ្លាំង លើ​វិស័យ​សំណង់ និង​អចលនទ្រព្យ បើ​ធៀប​ជាមួយនឹង​បណ្តា​ទិស​ផ្សេងទៀត។

លោកស្រី​ចេ​វ សុ​ឃុន​អ​តី​តៈ​ប្រធាន​សមាគម​អ្នកជំនាញ​អចលនទ្រព្យ​កម្ពុជា បាន​មានប្រសាសន៍ប្រាប់​គេហទំព័រ Propertyarea.asia កាលពីពេលថ្មីៗនេះ​បានឱ្យដឹងថា ខណ្ឌ​ចំនួន​ពីរ ដែល​លោកស្រី មើលឃើញ​ដែល​កំពុងមាន​សក្តានុពល លើ​វិស័យ​អចលនទ្រព្យ​នេះ គឺ​ខណ្ឌមានជ័យ និង ខណ្ឌដង្កោរ របស់​រាជធានី​ភ្នំពេញ។

លោកស្រី​ថ្លែងថា “តំបន់​ដែលមាន​សក្តានុពល​ខ្លាំង នាពេល​បច្ចុប្បន្ននេះ​យើង​ឃើញ​នៅ​តំបន់​ភាគខាងត្បូង​មាន​សន្ទុះ​ខ្លាំង ជាពិសេស​នៅ​ខាង​ខណ្ឌដង្កោរ ក៏ដូចជា​នៅ​ខាង​ង​ខណ្ឌមានជ័យ នៅ​តំបន់​គម្រោង​ផ្សារ​ទំនើប​អេ​អន៣ (តំបន់​ផ្លូវ៦០ម៉ែត្រ) ដែល​អ្នក​អភិវឌ្ឍន៍​មួយចំនួន​កំពុង​អនុវត្ត​គម្រោងធំៗរបស់ខ្លួន” ។

លោកស្រី​បន្ថែមថា នៅ​តំបន់​នេះ មាន​គម្រោង​អភិវឌ្ឍន៍ធំៗជាច្រើន ដែល​បាននិងកំពុង​ដុះ​ឡើង និង​កំពុងអភិវឌ្ឍន៍ ដែល​នឹង​ជួយ​ឱ្យ​វិស័យ​អចលនទ្រព្យ កាន់​តែមាន​សន្ទុះ​រីកចំរើន​កាន់តែខ្លាំង  តែ​យ៉ាងណា​នៅ​តំបន់ផ្សេងៗ ទៀត​ក៏មាន​ការរីកចំរើន​ផងដែរ។

ជាមួយគ្នានេះ លោកស្រី​តាំង ហ៊ួ​រ នាយិការ​ក្រុមហ៊ុន​អចលនទ្រព្យ Amatak Property Service ធ្លាប់បាន​ឱ្យដឹង​ដែរ​ថា តំបន់​ភាគខាងត្បូង​នៃ​រាជធានី​ភ្នំពេញ​បាន និង​កំពុង​រីកចំរើន​ខ្លាំង លើ​វិស័យ​អចលនទ្រព្យ​ច្រើន ជាង​បណ្តា​ជាយក្រុង​នានា ជាពិសេស​តំបន់​ផ្លូវ៦០ម៉ែត្រ ឬ​មហាវិថី​សម្តេច​តេ​ជោ​ហ៊ុនសែន ដោយសារ​មាន​គម្រោងធំៗជាច្រើន​ទៅកាន់​ទីនោះ។

លោកស្រី​បន្តថា “តំបន់​ផ្លូវ៦០ម៉ែត្រ ហាក់​មាន​សកម្មភាពរ​ស់រ​វើក​ខ្លាំង​ជាង ដោយសារតែ​តំបន់​នេះ មាន​គម្រោងធំៗជាច្រើន កំពុង​រីកដុះដាល់​នៅ​តំបន់​នេះ ជាពិសេស​មាន​គម្រោង​ផ្សារ​ទំនើប AEON Mall ៣ ដោយពេល​ខ្លះ អ្នក​វិយោគ​ស្វែងរក​ទិញ​នៅ​តំបន់​នេះ​មិនបាន ព្រោះ​វា​មានតម្លៃ​ខ្ពស់” ។

ទីប្រឹក្សា​សមាគម​អចលនទ្រព្យ​សកល លោក​យិន លាង​គង់​បាន​មានប្រសាសន៍ថា ការរីកចម្រើន​ភាគខាងត្បូង​ក្រុងភ្នំពេញ មិនមែនជា​រឿង​ចៃដន្យ​នោះទេ ប៉ុន្តែ​វា​កើតឡើង​ដោយ​លក្ខ​ខ័​ណ្ឌ​មួយ​ចំនូ​ន​ដូចជា ការរីកចម្រើន​នៃ​នគរូបនីយកម្ម ការកើនឡើង​នូវ​ចំនួន​ប្រជាពលរដ្ឋ​ចូលមក​រស់នៅ​ក្រុងភ្នំពេញ (កត្តា​ប្រជាសាស្ត្រ) ការវិនិយោគ​លើ​ហេ​ដ្ឋា​រចនា​ស​ម្ព័​ន្ឋធំៗរបស់​រដ្ឋាភិបាល ដូចជា ព្រលានយន្តហោះ​អន្តរជាតិ​ភ្នំពេញ​ថ្មី ផ្លូវ​ក្រវ៉ាត់​ក្រុង​ទី៣ ជាពិសេស​តំបន់​ភាគខាងត្បូង​ទីក្រុង​ភ្នំពេញ មាន​ហេ​ដ្ឋា​រចនា​ស​ម្ព័​ន្ឋ​ត​ភ្ជាប់​ទៅកាន់​បណ្តាញ​ផ្កូ​វ​ជាតិធំៗជាច្រើន ដូចជា​ផ្លូវជាតិ​លេខ២ ផ្លួ​វ​ជាតិ​លេខ៣ ផ្លូវជាតិ​លេខ៤ជាដើម។

លោក​បន្តថា “ការរីកចម្រើន​នៃ​សេដ្ឋកិច្ចជាតិ ដោយសារ​កត្តា​សុខសន្តិភាព ពិតជា​តម្លៃ​ស្នូល​មិនអាច​ខ្វះ​បាន ដែល​ជំរុញ​ឲ្យ​ប្រទេស​កម្ពុជា មានការ​រីកចម្រើន​យ៉ាង​ឆាប់រហ័ស និង​ឈានទៅ​កាន់​លំដាប់​ថ្មី​មួយទៀត” ៕

គម្រោង Naga 3 តម្លៃ ៣,៥ពាន់​លាន​ដុល្លារ​នឹង​ក្លាយជា Image ថ្មី​មួយ លើកសម្រស់​ក្រុងភ្នំពេញ

ដោយៈ ប៊ី

ភ្នំពេញៈ ក្រុមហ៊ុន NagaCorp មានបំណង​ធ្វើការ​ពង្រីក​ការវិនិយោគ​ម្រោ​ង Naga 3 របស់ខ្លួន​ឲ្យ​មាន​ទំហំ​ធំ​ជាង​មុន ខណៈ​គម្រោង Naga 3 ដែល​បានប្រកាស​ពី​ផែនការ​នៅ​ខែ មេសា ឆ្នាំ២០១៩ ជាមួយនឹង​ទុនវិនិយោគ ៣,៥ពាន់​លាន​ដុល្លារ នឹង​ក្លាយជា Landmark ឬ Image ថ្មី​មួយ​សម្រាប់​រាជធានី​ភ្នំពេញ។

គំរោង​នេះ គ្រោង​នឹង​បញ្ចប់​ក្នុង​ឆ្នាំ២០២៥ ខណៈដំណើរ​ការបើក​ការដ្ឋាន​សាងសង់​បាននិងកំពុង​ចាប់ផ្តើម​ជាមួយ​ការ​ខួង​គ្រឹះ​ដ៏​ជ្រៅ និង​ប្រកបដោយ​បទដ្ឋាន​អន្តរជាតិ។ នេះ​បើ​យោងតាម​គេហទំព័រ CalvinAyre ។

ការពង្រីក​គម្រោង​គម្រោង Naga 3 នេះ​នាំមក​នូវ​រូបភាព​ថ្មី និង​ជម្រើស​ល្បែង​ជាច្រើន​ទៀត ដើម្បី​ទាក់ទាញ​មនុស្ស​កាន់តែច្រើន ស្របពេល​គម្រោង​នេះ​ទទួលបាន​ការគាំទ្រ​ពី​ម្ចាស់​ភាគហ៊ុន​របស់​ក្រុមហ៊ុន​ដែល​ឥឡូវនេះ បានផ្តល់​ការយល់ព្រម​សម្រាប់​ការពង្រីក​ចាប់ផ្តើម។

ប្រតិបត្តិ​ករ​សណ្ឋាគារ និង​កាស៊ីណូ​ដែល​ចុះបញ្ជី​នៅ​ហុងកុង​នេះ បាន​បើក​កិច្ចប្រជុំ​ទូទៅ​មួយ​នាពេលថ្មីៗនេះ ដោយ​អញ្ជើញ​ម្ចាស់​ភាគហ៊ុន​ភាគតិច​ឱ្យ​ថ្លឹងថ្លែង លើ​គម្រោង​នេះ។ ៩៨ភាគរយ នៃ​អ្នក​ដែល​បាន​ចូលរួមបាន​និយាយថា ណាហ្គា​ខ​ប​គួរតែ​ឈានទៅ​មុខ។

ម្ចាស់​ភាគហ៊ុន​ធំ​បំផុត​របស់​ក្រុមហ៊ុន និង​ជានា​យក​ប្រតិបត្តិ​របស់ខ្លួន​ផងដែរ​មិន​អនុញ្ញាត​ឲ្យ​ចូលរួម​បោះឆ្នោត​ដោយ​អះអាងថា ការមិន​ចូលរួម​របស់លោក គឺ​សម្រាប់​គោលបំណង​អភិបាលកិច្ច​ល្អ។ លោក Chen Lip Keong ម្ចាស់​ហ៊ុន​ធំ​ត្រូវបាន​គេ​រាយការណ៍​ថា​នឹង​ចំណាយ​ពាក់កណ្តាល​លើ​គម្រោង​នេះ។

ការពង្រីក​នេះ​ត្រូវបាន​រំពឹងថា នឹងមាន​អាគារ ៦៨ជាន់ ដែល​នឹងមាន​សណ្ឋាគារ កន្លែង​ស្នាក់នៅ កន្លែង​សន្និបាត កន្លែង​បរិភោគ​អាហារ ហាង​លក់រាយ​ក ន្លែ​ង​កម្សាន្ត និង​កន្លែង​ជាច្រើន​ទៀត ក៏ដូចជា​ជាន់​កាស៊ីណូ​ធំ​មួយ​ផងដែរ។ បន្ទប់​សណ្ឋាគារ​ដែលមាន​ចំនួន​សរុប ៤.៧២០ នឹងត្រូវ​បន្ថែម​ដែលជា​ការឆ្លើយតប ទៅនឹង​ការរំពឹងទុក​ថា រាជធានី​ភ្នំពេញ នឹងមាន​កន្លែង​សណ្ឋាគារ ១០០,០០០ បន្ទប់​នៅ​ឆ្នាំ២០២៥ ។

គម្រោង Naga 3 នឹង​ធំ​ជាង​បី​ដង បើ​ធៀន​នឹង Naga 1 និង Naga 2 ។ ការងារ​អចិន្ត្រៃយ៍​ចំនួន ១៨,០០០ នឹង​ត្រូវបាន​បន្ថែម ហើយ​នៅពេល​បញ្ចប់​ការសាងសង់​គម្រោង គម្រោង​នេះ ផ្តល់​ការងារ​ប្រហែល ៥០,០០០កន្លែង ក្នុងដំណាក់កាល​សាងសង់។ ជាមួយនឹង​ការដាក់បញ្ចូល Naga 3 បរិវេណ Naga World នឹង​ក្លាយជា​ការវិនិយោគ​វិស័យ​ឯកជន​ធំ​បំផុត​នៅ​កម្ពុជា៕

ខេត្តកំពត​ទទួលបាន​ទុនវិនិយោគ​ក្នុង​វិស័យ​សំណង់​ជាង ៣៧លាន​ដុល្លារ

ដោយៈ រ៉ា​ណេ​ត

កំ​ពតៈ ពេញ​មួយឆ្នាំ២០២០កន្លងទៅនេះ ខេត្តកំពត​ដែលជា​គោលដៅ​វិនិយោគ​ក្នុង​វិស័យ​អចលនទ្រព្យ ក្នុង​ទីផ្សារ​ទេសចរណ៍​ដ៏​ទាក់ទាញ ទទួលបាន​កំណើន​ទុនវិនិយោគ​ក្នុង​វិស័យ​សំណង់​សរុប​ចំនួន ៣៧លាន​ដុល្លារ ទៅលើ​គម្រោង​សំណង់៣០១គម្រោង មាន​ផ្ទៃក្រឡា​សរុប​ចំនួន ១០២២៨៥ម៉ែត្រការ៉េ។

លោក​ជាវ តា​យ អភិបាលខេត្ត​កំពត​បា​ន​មានប្រសាសន៍​ប្រាប់ឱ្យដឹង​នៅ​ល្ងាច​ថ្ងៃទី២២ ខែមករា ឆ្នាំ២០២១ថា បច្ចុប្បន្ននេះ វិស័យ​សំណង់ និង​អចលនទ្រព្យ​នៅ​ទូទាំង​ខេត្ត​កំពុងមាន​ការរីកចម្រើន​យ៉ាងខ្លាំង ដែល​បាន​ជម្រុញ​ការរីកលូតលាស់ នៃ​សេដ្ឋកិច្ច​ខេត្តកំពត។

យោងតាម​របាយការណ៍​របស់​មន្ទីរ​រៀបចំ​ដែនដី នគរូបនីយកម្ម​សំណង់ និង​សុរិយោដី​ខេត្តកំពត​នៅក្នុង​ឆ្នាំ២០២០ វិស័យ​សំណង់​មាន​ចំនួន៣០១គម្រោង មាន​ផ្ទៃក្រឡា​សរុប​ស្មើនឹង១០២,២៨៥ម៉ែត្រការ៉េ ដែល​គិត​ជា​តម្លៃ​ទុនវិនិយោគ​ស្មើនឹង​ប្រមាណ៣៧លាន​ដុល្លា​អាមេរិក កើន២,៧ភាគរយ និង​ចំនួន​គម្រោង​កើនឡើង៣៩ភាគរយ​ធៀប​នឹង​ឆ្នាំ២០១៩ ។

ជាមួយនឹង​ភាព​រីកចម្រើន និង​កំណើន​នៃ​គម្រោង​អភិវឌ្ឍន៍ នៅក្នុង​វិស័យ​សំណង់ និង​អចលនទ្រព្យ​នៅ​ទូទាំង​ខេត្ត​នៅពេលនេះ លោក​អភិបាលខេត្ត បាន​ក្រើនរំលឹក​ដល់​គណៈកម្មកា​រ​ខេត្ត ត្រួតពិនិត្យ​សំណង់​គ្រប់​ប្រភេទ ទាំង​នៅតាម​បណ្តា​ក្រុង ស្រុក ក៏ដូចជា​ទូទាំង​ខេត្ត ត្រូវ​បន្ត​ចុះ​ត្រួតពិនិត្យ​ពង្រឹង និង​តាមដាន​សកម្មភាព​សំណង់ និង​ក្រុម​ជាងសំណង់​ទាំងអស់​ដើម្បី​ពង្រឹងគុណភាព និង​សុវត្ថិភាព​សំណង់ ហើយ​អាជ្ញាធរ​មូលដ្ឋាន​ត្រូវ​ផ្សព្វផ្សាយ​ដល់​ប្រជាពលរដ្ឋ​ឲ្យ​ចូលរួម​គោរព​ច្បាប់ ដោយ​ដាក់​ពាក្យសុំ​លិខិតអនុញ្ញាត​សាងសង់ និង​ជួសជុល​បណ្តា​សំណង់​គ្រប់​ប្រភេទ។

ភ្ជាប់​ជាមួយនឹង​ការទទួលបាន​គម្រោង​វិនិយោគ និង​អភិវឌ្ឍន៍​ជាច្រើន​នៅ​ទូទាំង​ខេត្តកំពត លោក​បណ្ឌិត តេង រិទ្ធី អគ្គនាយក​ក្រុមហ៊ុន​អចល​ទ្រព្យ R Investment Group បានបង្ហាញ​ពី​ក្ដី​សាទរ ទៅនឹង​អ្វីដែល​ខេត្តកំពត​ទទួលបាន​នៅពេលនេះ ជាមួយនឹង​ការបញ្ជា​ក់ថា គម្រោង​បណ្តាក់​ទុនវិនិយោគ ដែលមាន​ទំហំ​ជាច្រើន​លាន​ដុល្លារ​ខាងលើនេះ ដែល​ភាគច្រើន ជាការ​វិនិយោគ​ទៅលើ​ការបង្កើត​តំបន់​កម្សាន្ត​ទ្រង់ទ្រាយ​ធំ រួម​ជាមួយនឹង​ការសាងសង់​លំនៅដ្ឋាន​បែប​លំហែរ​កាយ។

លោក​បណ្ឌិត​បាន​បន្តទៀត​ថា “បច្ចុប្បន្ននេះ​មាន​អ្នកវិនិយោគ​ជាច្រើន បាន​ទម្លាក់​ទុន​ធ្វើការ​អភិវឌ្ឍ​តំបន់​មួយចំនួន ឱ្យក្លាយ​ទៅជា​តំបន់​កម្សាន្ត​បែប​កែច្នៃ និង​ធម្មជាតិ ជាពិសេស​តំបន់​ដែល​ស្ថិតនៅ​ជាប់មាត់​ព្រែក ជាប់​សមុទ្រ និង​តំបន់​ក្បែរ​ជើងភ្នំ” ។ លោក​បន្តថា “ជាមួយនឹង​សកម្មភាព​ដែល​កំពុង​បន្ត​អភិវឌ្ឍន៍ ក៏មាន​គម្រោង​ថ្មី​បន្តបន្ទាប់​ទៀត ដែល​មិនយូរ​មិនឆាប់​ខេត្តកំពត នឹង​ក្លាយទៅជា​ទីតាំង​គោលដៅ​ទេសចរណ៍ ដ៏​មាន​ប្រជាប្រិយភាព​ជាក់​មិន​ខាន” ។

ជាមួយនឹង​ការបង្ហាញ​ពី​សក្ដានុពល ក្នុងការ​វិនិយោគ​ខាងលើនេះ លោក​បណ្ឌិត តេង រិទ្ធី ក៏បាន​បញ្ជាក់ថា សម្រាប់​ការអភិវឌ្ឍ​លើ​វិស័យ​លំនៅដ្ឋាន បែប​លំហែរ​កាយ​នៅពេល​បច្ចុប្បន្ន ត្រូវបាន​ធ្វើឡើង​ជាច្រើន​គម្រោង និង​ច្រើន​កម្រិត ហើយ​តម្លៃ​ក៏​អាស្រ័យ​ទៅតាម​គម្រោង​ផងដែរ ដែល​ក្នុងនោះ​មានតម្លៃ​ចាប់ពី​ជាង៣ទៅ ៤ម៉ឺន​ដុល្លារ​ឡើងទៅ​សម្រាប់​លំនៅដ្ឋាន​បែប​លំហែរ​មួយ​ខ្នង៕

កម្ពុជា-ចិនឈានដល់ការចុះកិច្ចព្រមព្រៀងបណ្តុះបណ្តាលជំនាញវិជ្ជាជីវៈទេសចរណ៍

កោះកុង ៖កម្ពុជា-ចិនបានចុះហត្ថលេខាលើកិច្ចព្រមព្រៀងសហប្រតិបត្តិការរវាងក្រុមហ៊ុនអភិវឌ្ឍន៍ទីក្រុងតំបន់ឆ្នេរ និងវិទ្យាស្ថានទេសចរណ៍គួយលីន ដែលប្រារព្ធឡើងរួមគ្នាតាមរយៈអនឡាញនៅទីតាំងបីកន្លែងផ្សេងគ្នាគឺខេត្តកោះកុង ទីក្រុងធានជីង និងទីក្រុងគួយលីន។

លោក ជា បូរ៉ា រដ្ឋលេខាធិការក្រសួងទេសចរណ៍ បានមានប្រសាសន៍ឱ្យនៅថ្ងៃទី២២ ខែមករា ឆ្នាំ២០២១ថា ក្រោមការដឹកនាំរបស់សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា បាននាំឱ្យកម្ពុជាបច្ចុប្បន្នមានសុខសន្តិភាព ស្ថិរភាពនយោបាយ សន្តិសុខសណ្តាប់ធ្នាប់ពេញលេញ និងមានការអភិវឌ្ឍរីកចម្រើនលើគ្រប់វិស័យ ក្នុងនោះវិស័យទេសចរណ៍មានការរីកចម្រើនគួរជាទីមោទនៈ។

លោកបានបន្តថា វិស័យទេសចរណ៍កម្ពុជាត្រូវបានចាត់ទុកជាវិស័យអាទិភាពមួយដើរតួជាមាសបៃតង រួមចំណែកដល់ការអភិវឌ្ឍសេដ្ឋកិច្ច-សង្គម និងការការពារបរិស្ថាន ពោលគឺចូលរួមដល់ការកសាងសេដ្ឋកិច្ចបៃតងនៅកម្ពុជា ដែលជាផ្នែកគាំទ្រដល់ការសម្រេចបាននូវគោលដៅអភិវឌ្ឍប្រកបដោយចីរភាព (SDGs) ឆ្នាំ២០៣០ របស់អង្គការសហប្រជាជាតិ (UN)។

កិច្ចព្រមព្រៀងសហប្រតិបត្តិការនេះ ផ្តោតសំខាន់លើការជំរុញ និងពង្រឹងកិច្ចសហប្រតិបត្តិការនៃភាពជាដៃគូក្នុងការជំរុញការបណ្តុះបណ្តាលជំនាញវិជ្ជាជីវៈទេសចរណ៍ ការអភិវឌ្ឍធនធានមនុស្ស និងការសិក្សាស្រាវជ្រាវក្នុងវិស័យទេសចរណ៍ តាមរយៈការរៀបចំឱ្យមានកម្មវិធីហ្វឹកហ្វាត់ការងារសម្រាប់សិស្ស និស្សិត និងបុគ្គលិក ព្រមទាំងការបង្កើតឱ្យមានមជ្ឈមណ្ឌលផ្លាស់ប្តូរ និងស្រាវជ្រាវនវានុវត្តន៍ទេសចរណ៍-វប្បធម៍កម្ពុជា-ចិន ដែលនឹងចូលរួមជំរុញការអភិវឌ្ឍវិស័យទេសចរណ៍ និងប្រែក្លាយកម្ពុជាឲ្យក្លាយជាគោលដៅទេសចរណ៍ដ៏ទាក់ទាញលំដាប់ថ្នាក់ពិភពលោក និងផ្តល់ភាពកក់ក្តៅដល់ភ្ញៀវទេសចរ៕

អ្នកជំនាញ ៖ ទីផ្សារអចលនទ្រព្យនៅក្នុងខេត្តព្រះសីហនុដើរយឺតជាងខេត្តកំពត

ភ្នំពេញ ៖ កាលពីឆ្នាំ២០២០កន្លងទៅនេះ គេសង្កេតឃើញថា សកម្មភាពវិនិយោគនៅខេត្តព្រះសីហនុ ជាពិសេសនៅកណ្តាលក្រុងមានសភាពស្ងប់ស្ងាត់ និងមិនពុះកញ្ច្រោលដូចប៉ុន្មានឆ្នាំឡើយ តែបែរជាមានកំណើនសកម្មភាពវិនិយោគនៅខេត្តតំបន់មាត់សមុទ្រផ្សេងទៀត ដូចជាខេត្តកំពត និងកែប ។ តើកត្តាអ្វី ដែលធ្វើឱ្យខេត្តតំបន់មាត់សមុទ្រមួយនេះថមថយសកម្មភាពបែបនេះ ?

លោកប៉ូ អ៊ាវគង់ អគ្គនាយកក្រុមហ៊ុនអចលនទ្រព្យ Advance បានឱ្យដឹងថា នៅក្នុងឆ្នាំ២០២០ គេសង្កេតឃើញថា សកម្មភាពវិនិយោគនៅក្នុងខេត្តព្រះសីហនុពិតជាមានការថមថយពិតមែន ដោយសារតែខេត្តនេះ វាហាក់ដូចជាឆ្អែតទៅហើយសម្រាប់វិស័យអចលនទ្រព្យ ហើយតម្លៃដីធ្លីក្នុងខេត្តនេះក៏បានឡើងខ្ពស់រួចទៅហើយ ។

លោកបន្តថា ក្នុងឆ្នាំ២០២០ក៏ជាឆ្នាំដែលវិស័យអចលនទ្រព្យជួបបញ្ហា ដូច្នេះវិនិយោគិនបរទេសក៏មិនបានមកកម្ពុជាដើម្បីស្វែងរកការវិនិយោគដែរ ហើយខេត្តព្រះសីហនុពេលនេះ វិនិយោគិនក្នុងស្រុកតិចតួចដែលអាចចូលវិនិយោគ ដោយសារតែតម្លៃអចលនទ្រព្យឡើងខ្ពស់។

សម្រាប់ខេត្តកំពត និងកែបវិញ នៅតែទទួលបានសកម្មភាពវិនិយោគ ហើយភាគច្រើននៃវិនិយោគិន គឺជាអ្នកនៅក្នុងស្រុក ដោយកត្តាតម្លៃដីធ្លីនៅមានកម្រិតបើធៀបនឹងខេត្តព្រះសីហនុ ។ ម្យ៉ាងទៀតសក្ដានុពលនៅក្នុងខេត្តកំពត និងកែប នៅរយៈពេលចុងក្រោយនេះ ក៏ឃើញថាមានឱកាសវិនិយោគពីអ្នកក្នុងស្រុកច្រើនដែរ។

លោកសុខ គែន ភ្នាក់ងារអចលនវត្ថុមួយរូបប្រចាំខេត្តកំពត បាននិយាយថា ទោះបីជាកម្ពុជាជួបវិបត្តិដោយសារតែកូវីដ១៩ក្តី ក៏ខេត្តកំពតនៅតែទទួលបានការទិញលក់ដីធ្លីជាធម្មតា ជាពិសេសអ្នកមកពីភ្នំពេញ បានស្វែងរកទិញដីធ្លី នៅក្នុងខេត្តនេះ ដើម្បីទុកវិនិយោគ និងទុកដើម្បីអភិវឌ្ឍន៍នៅពេលអនាគត៕

កម្ពុជាស្នើអាស៊ានបង្កើនមូលនិធិជំនួយដល់វិស័យឯកជនដើម្បីពង្រឹងអាជីវកម្មក្នុងពេលជួបវិបត្តិ

ដោយ ៖ រ៉ាណេត

ភ្នំពេញ ៖ រាជរដ្ឋាភិបាលកម្ពុជាតាមរយៈក្រសួងការបរទេស និងសហប្រតិបត្តិការអន្តរជាតិបានលើកសំណើទៅកាន់មន្ត្រីការបរទេសអាស៊ានគួរបង្កើនមូលនិធិបរិច្ចាគជាមួយវិស័យឯកជនបន្ថែមទៀតដើម្បីអាចពង្រឹងជីវកម្ម និងស្ដារឡើងវិញនូវផែនការសមាហរណកម្មអាស៊ានឆ្នាំ២០២១-២០២៥។

ឧបនាយករដ្ឋមន្ត្រី លោកប្រាក់ សុខុន ប្រមុខការទូតកម្ពុជានៅក្នុងកិច្ចប្រជុំរដ្ឋមន្ត្រីការបរទេសអាស៊ាននៅថ្ងៃទី២១ ខែមករា ឆ្នាំ២០២១ថា ក្នុងការឆ្លើយតបទៅនឹងបញ្ហារាតត្បាតជាសកលដោយជំងឺកូវីដ–១៩ អាស៊ានគួរបង្កើនមូលនិធិបរិច្ចាគជាមួយវិស័យឯកជន ដើម្បីជំរុញ និងស្តារឡើងវិញនូវផែនការសមាហរណកម្មអាស៊ានឆ្នាំ២០២១–២០២៥។

លោកបានសង្កត់ធ្ងន់ថា ដើម្បីឆ្លើយតបនឹងការប្រយុទ្ធប្រឆាំងនឹងជំងឺកូវីដ១៩ អាស៊ានគួរតែបង្កើនចំនួនទឹកប្រាក់មូលនិធិអាស៊ានក្នុងការឆ្លើយតបទៅនឹងជំងឺកូវីដ១៩ តាមរយៈការធ្វើទំនាក់ទំនងជាមួយវិស័យឯកជន ដើម្បីចូលរួមការបរិច្ចាគ។

ក្នុងកិច្ចប្រជុំចង្អៀត ក៏បានពិភាក្សាអំពីការពន្លឿនការធ្វើសមាហរណកម្មអាស៊ាន តាមរយៈការអនុវត្តផែនការការងារនៃគំនិតផ្ដួចផ្ដើមសម្រាប់សមាហរណកម្មអាស៊ានលើកទី៤ (២០២១–២០២៥) ការអនុវត្តនូវផែនការមេស្តីពីការតភ្ជាប់អាស៊ាន ឆ្នាំ២០២៥ ឲ្យបានពេញលេញ និងគាំទ្រការស្ដារឡើងវិញក្នុងតំបន់ក្រោយពីជំងឺរាតត្បាតសកល។

កិច្ចប្រជុំនោះ រដ្ឋមន្ត្រីការបរទេសអាស៊ាន បានគាំទ្រមូលបទរបស់ប្រទេសប្រ៊ុយណេ ដែលបានលើកឡើងថា «យើងយកចិត្តទុកដាក់, យើងត្រៀមលក្ខណៈ, យើងរីកចំរើន» និងចំណុចអាទិភាពគន្លឹះទាំងបី ដែលផ្តោតជាសំខាន់ទៅលើ ការកសាងសហគមន៍មួយប្រកបដោយភាពសុខដុមរមនា ការត្រៀមលក្ខណៈនិងសម្របខ្លួនសម្រាប់ពេលអនាគត ដើម្បីធានាសុខុមាលភាពប្រជាជនអាស៊ាន និងអនាគតដែលប្រកបដោយសន្តិភាព ចីរភាព និងវិបុលភាព ក៏ដូចជាជំរុញការស្តារឡើងវិញរបស់អាស៊ានពីជំងឺរាតត្បាតសកលកូវីដ–១៩។

ចំពោះការឆ្លើយតបជាលក្ខណៈតំបន់ទៅនឹងជំងឺរាតត្បាតសកលកូវីដ–១៩ កិច្ចប្រជុំបានបង្ហាញការប្តេជ្ញាចិត្តដើម្បីអនុវត្តក្របខណ្ឌស្តារឡើងវិញគ្រប់ជ្រុងជ្រោយរបស់អាស៊ានឱ្យបានឆាប់រហ័ស ប្រើប្រាស់មូលនិធិសម្រាប់ការឆ្លើយតបទៅនឹងជំងឺកូវីដ–១៩ របស់អាស៊ាន និងធ្វើការងារឆ្ពោះទៅរកការបង្កើតក្របខណ្ឌក្នុងការរៀបចំច្រកធ្វើដំណើរក្នុងអាស៊ាន៕

ក្រុមហ៊ុន ជីប ម៉ុង លែន ចាប់ផ្តើមគម្រោងថ្មីនៅផ្លូវជាតិលេខ៦A លើផ្ទៃដី១២០ហិកតា

ដោយ ៖ គង់ ម៉ាលីន

ភ្នំពេញ ៖ ជីប ម៉ុង លែន បានប្រកាសបើកលក់គម្រោង ផាក លែន ៦A ដ៏ធំរបស់ខ្លួននៅតំបន់ជ្រោយចង្វារជាផ្លូវការ ចាប់ពីថ្ងៃទី២២នេះ ដល់ថ្ងៃទី២៤ ខែមករា ឆ្នាំ២០២១ ជាមួយ ការបញ្ចុះតម្លៃដ៏អស្ចារ្យ ជូនអតិថិជន រហូតដល់៨ភាគរយ មិនចាំបាច់មានប្រាក់កក់ និងមិនគិតការប្រាក់រហូតដល់១៨ខែ។

ផាក លែន ៦A គឺជាគម្រោងអភិវឌ្ឍន៍លំនៅឋានដ៏ប្រណិត ដែលលាតសន្ធឹងលើផ្ទៃដីរហូតដល់១២០ហិកតា ស្ថិតនៅតាមបណ្តោយផ្លូវជាតិលេខ ៦A និងអមដោយទន្លេធំៗចំនួន២ គឺទន្លេសាប និងទន្លេមេគង្គ ដែលធ្វើឱ្យទីនេះត្រជាក់ស្រស់ស្រាយគ្រប់រដូវកាល។

លោកឧកញ៉ា លាង ហួង (ហេនរី) អគ្គនាយកក្រុមហ៊ុន ជីប ម៉ុង លែន បានមានប្រសាសន៍ថា គម្រោង ផាក លែន ៦A ត្រូវបានអភិវឌ្ឍប្រកបដោយចក្ខុវិស័យវែងឆ្ងាយ និងយុទ្ធសាស្ត្រច្បាស់លាស់ ដោយមានគោលដៅមួយរួមចំណែកក្នុងការអភិវឌ្ឍតំបន់ជ្រោយចង្វារនេះ ឲ្យក្លាយជាតំបន់រស់នៅប្រកបដោយភាពស៊ីវិល័យ ថ្លៃថ្នូរ ផាសុកភាព និងមានអ្វីៗគ្រប់បែបយ៉ាង។

លោកឧកញ៉ា លាង ហួង (ហេនរី) បញ្ជាក់ថា៖ «គម្រោង ផាក លែន ៦A នឹងមានវត្តមានមណ្ឌលផ្សារទំនើបដ៏ធំ មជ្ឈមណ្ឌលកីឡាដែលមានផ្ទៃប្រើប្រាស់រហូតដល់ ១ម៉ឺនម៉ែត្រការ៉េ សួនឧទ្យាន៦A លាត សន្ធឹង ស្ទើរ ពាសពេញគម្រោង មុខងារពិសេសជាងគេ ផ្ទៃសួនកាន់តែធំព្រមទាំងមានហេដ្ឋារចនា សម្ព័ន្ធពេញលេញធំទូលាយ»។ គម្រោង ផាក លែន ៦A របស់ជីប ម៉ុង លែន ផ្តល់ជូនម៉ូតផ្ទះរហូតដល់១០ប្រភេទ ដែលផ្ទះនីមួយៗត្រូវបានរចនាយ៉ាងល្អឥតខ្ចោះ និងអាច បំពេញគ្រប់តម្រូវការរបស់អតិថិជន។

អតិថិជន ដែលចាប់អារម្មណ៍ គម្រោង ផាក លែន ៦A សូមអញ្ជើញមកកាន់កម្មវិធីបើកលក់ជាផ្លូវការ ចាប់ពីថ្ងៃទី២២នេះ ដល់២៦ ខែមករា ឆ្នាំ២០២១ នៅគម្រោង ផាក លែន ៦A ផ្ទាល់ដែលមានទីតាំងនៅតាមបណ្តោយផ្លូវជាតិលេខ៦A មានចំងាយត្រឹមតែ១០នាទីពីស្ពានជ្រោយចង្វារ។ព័ត៌មានបន្ថែម សូមទាក់ទងមកកាន់៖ ០៦១ ៩៩៧ ៨៨៨៕

ក្រុមហ៊ុនគេហទំព័រអចលនទ្រព្យ Property Area Asia ចុះកិច្ចអនុស្សារណយោគយល់ជាមួយសមាគមអ្នកអភិវឌ្ឍន៍ដីឡូត៍កម្ពុជា

ដោយ ៖ រ៉ាណេត

ភ្នំពេញ ៖ ក្រុមហ៊ុនគេហទំព័រអចលនទ្រព្យ Property Area Asia បានចុះកិច្ចអនុស្សារណយោគយល់គ្នា(MOU)ជាមួយសមាគមអ្នកអភិវឌ្ឍន៍ដីឡូត៍កម្ពុជាក្នុងគោលបំណងចូលរួមជួយជំរុញ និងលើកកម្ពស់វិស័យអចលនទ្រព្យនៅកម្ពុជាឱ្យកាន់តែមានភាពល្អប្រសើរតាមរយៈការផ្សព្វផ្សាយព័ត៌មានពិតពីវិស័យមួយនេះទៅកាន់សាធារណជន ក៏ដូចជាបណ្តាអ្នកវិនិយោគជាតិ និអន្តរជាតិ។

សហស្ថាបនិក និងជាអគ្គនាយកក្រុមហ៊ុនគេហទំព័រ Property Area Asia លោកយិន លាងគង់ បានមានប្រសាសន៍ថា តាមរយៈព្រមព្រៀង និងចុះហត្ថលេខាលើកិច្ចអនុស្សារណយោគយល់នៅពេលនេះគឺជាការរួមចំណែកក្នុងការជួយធ្វើឱ្យវិស័យអចលនទ្រព្យនៅកម្ពុជាកាន់តែមានភាពល្អប្រសើរ។

លោកបន្តថា “គោលដៅនៃការចុះ MOU នៅពេលនេះក្នុងគោលបំណងជួយផ្សព្វផ្សាយនូវរាល់ព័ត៌មាន និងសកម្មភាពនានារបស់សមាគមអ្នកអភិវឌ្ឍន៍ដីឡូតិ៍កម្ពុជាទៅកាន់ទីផ្សាររួមដោយឥតគិតថ្លៃ ហើយអ្វីដែលសំខាន់គឺការចូលរួមលើកកម្ពស់វិស័យអចលនទ្រព្យកម្ពុជាឱ្យឈានទៅមុខប្រកបដោយចិរភាពតាមរយៈគេហទំព័រអចលនទ្រព្យ www.propertyarea.asia ដែលបណ្តាញផ្សព្វផ្សាយព័ត៌មានប្រកបដោយក្របសីលធម៌ និងវិជ្ជាជីវៈយ៉ាងពិតប្រាកដ”។

លោកឧកញ៉ាម៉ន សុខា ប្រធានសមាគមអ្នកអភិវឌ្ឍន៍ដីឡូត៍កម្ពុជាបានមានប្រសាសន៍ថា បន្ទាប់ពីការចុះហត្ថលេខាលើកិច្ចអនុស្សារណៈយោគយល់នៅពេលនេះ ខ្ញុំសង្ឃឹមថាទាំងសមាគមអ្នកអភិវឌ្ឍន៍ដីឡូត៍កម្ពុជា ទាំងគេហទំព័រអចលនទ្រព្យ propertyarea.asia នឹងរួមកម្លាំងគ្នាក្នុងការលើកកម្ពស់វិស័យអចលនទ្រព្យនៅកម្ពុជាឱ្យកាន់តែប្រសើរ តាមរយៈការផ្សព្វផ្សាយព័ត៌មានដែលពិតប្រាកដទីកាន់សាធារណជនទូទៅឱ្យកាន់តែទូលាយ ជាពិសេសបន្តផ្សព្វផ្សាយទៅដល់បណ្តាអ្នកវិនិយោគ អ្នកអភិវឌ្ឍន៍ទាំងក្នុងស្រុក និងអន្តរជាតិ”។

ជាមួយនឹងកិច្ចព្រមព្រៀងនៃការចុះអនុស្សារណយោគយល់គ្នានេះផងដែរ គេហទំព័រអចលនទ្រព្យ www.propertyarea.asia ក៏បានផ្តល់នូវអត្ថប្រយោជន៍បន្ថែមទៅដល់សមាគមអ្នកអភិវឌ្ឍន៍ដីឡូត៍កម្ពុជាផងដែរដោយការបញ្ចុះតម្លៃចំនួន២០ភាគរយសម្រាប់ការចូលរួមផ្សព្វផ្សាយរបស់ក្រុមហ៊ុនដែលជាសមាជិកពេញសិទ្ធិរបស់សមាគម រួមជាមួយនឹងការផ្តល់ជូន១០ភាគរយទៅកាន់សមាគមផ្ទាល់សម្រាប់ប្រើប្រាស់នៅក្នុងសមាគម។ ដោយឡែកសមាគមអ្នកអភិវឌ្ឍន៍ដីឡូត៍កម្ពុជានឹងជួយផ្សព្វផ្សាយពីគេហទំព័រអចលនទ្រព្យ www.propertyarea.asiaរួមជាមួយនឹងការជួយរកដៃគូផ្សព្វផ្សាយពាណិជ្ជកម្មផងដែរ៕