លោក ឡោ វិចិត្រ ៖ ជោគជ័យរបស់ក្រុមហ៊ុនអចលនទ្រព្យមាន២ប្រភេទ ដែលមានទាំងភាពវិជ្ជមាន និងអវិជ្ជមាន

ដោយ ៖ រ៉ាណេត

ភ្នំពេញ ៖ នៅក្នុងវិស័យអចលនទ្រព្យនាពេលនាបច្ចុប្បន្នគេសង្កេតឃើញមានមនុស្សជាច្រើនបានចាប់អារម្មណ៍ងាកមកប្រឡូកយ៉ាងសកម្មដោយសារយល់ឃើញថា វិស័យមួយនេះអាចទទួលបានចំណូលយ៉ាងក្រាសក្រែល។

អ្នកជំនាញនៅក្នុងវិស័យអចលនទ្រព្យកម្ពុជា លោក ឡោ វិចិត្រ អនុប្រធានសមាគមអចលនទ្រព្យសកលរាជធានីភ្នំពេញ បានមានប្រសាសន៍នៅព្រឹកថ្ងៃទី៥ ខែធ្នូ ឆ្នាំ២០២០ បានមានប្រសាសន៍ថា គ្រប់បណ្តាភ្នាក់ងារ ក៏ដូចជាក្រុមហ៊ុនដែលបម្រើសេវានៅក្នុងវិស័យអចលនទ្រព្យសុទ្ធតែចង់បាននូវភាពជោគជ័យទៅលើគម្រោងរបស់ខ្លួន ប៉ុន្តែសំណួរសួរថា តើភាពជោគជ័យមួយនេះអាចសម្រេចបានដោយរបៀបណា គួរធ្វើយ៉ាងណាទើបអាចសម្រេចបានភាពជោគជ័យនេះ។

លោក ឡោ វិចិត្រ បានលើកឡើងថា “ភាពជោគជ័យរបស់ក្រុមហ៊ុនភ្នាក់ងារអចលនទ្រព្យគឺមាន២ប្រភេទ ទី១គឺជោគជ័យត្រឹមរយៈពេលខ្លី និងទី២ ជោគជ័យក្នុងរយៈពេលវែង”។

លោកបានបញ្ជាក់ថា “ជោគជ័យរយៈពេលខ្លី គឺសំដៅទៅលើក្រុមហ៊ុនដែលផ្តោតលើបរិមាណ និងរូបភាពខាងក្រៅ ធ្វើយ៉ាងម៉េចឱ្យសាធារណៈជនមើលឃើញថាក្រុមហ៊ុនគាត់សម្បើម ហើយមានភ្នាក់ងារច្រើនក្នុងរយៈពេលដ៍ខ្លី, ពេលនោះនឹងមានម្ចាស់គំរោងជាច្រើនទាក់ទងមកគាត់ដើម្បីលក់គម្រោង ក៏ដូចជាមានភ្នាក់ងារជាច្រើនដាក់ពាក្យចូលធ្វើជាភ្នាក់ងារ”។

ក្នុងរូបភាពបែបនេះ បើក្រលែកមើលមួយភ្លែតគឺក្រុមហ៊ុនមួយនោះជោគជ័យជាមួយកំណើនភ្នាក់ងារដ៏ច្រើននោះ ហើយបន្តភាគរយនៃភាពជោគជ័យដោយការណែនាំពីគម្រោង ព្រមទាំងបិទការលក់ ដើម្បីបានកំរៃជើងសាពីម្ចាស់គម្រោង។

លោកបញ្ជាក់ថា “នៅពេលភ្នាក់ងាជាច្រើនចូលក្រុមហ៊ុនគាត់ហើយ តែមិនមានសមត្ថភាពបិទការលក់ ពួកគេនឹងប្តូរក្រុមហ៊ុនអចលនទ្រព្យថ្មីមួយទៀតជាមិនខាន។ ពេលនោះម្ចាស់គម្រោងដឹងភ្លាមថា ក្រុមហ៊ុនគាត់ផ្តោតតែលើបរិមាណភ្នាក់ងារដើម្បីចរចាយកគម្រោងទៅលក់ តែអត់មានសមត្ថភាពបិទការលក់ដូចរូបភាពខាងក្រៅដែលសម្បើមនោះទេ, នេះគឺអ្វីដែលខ្ញុំសំដៅថា ជោគជ័យរយៈពេលខ្លី”។

លោកថា “ជោគជ័យរយៈពេលវែង គឺសំដៅលើការបណ្តុះបណ្តាលភ្នាក់ងារ និងផ្តល់សេវាកម្មឱ្យបានល្អជាមួយគ្រប់អតិថិជនដោយមិនផ្តោតលើបរិមាណ ឬបំប៉ោងរូបភាពខាងក្រៅឱ្យសម្បើមទាំងដែលសមត្ថភាពភ្នាក់ងារខ្លួននៅខ្សោយ ហើយការបំរើសេវាកម្មចំពោះអតិថិជននៅមានកម្រិត”។

លោកបានបញ្ជាក់ថា “ក្រុមហ៊ុនអាចជោគជ័យរយៈពេលវែងលុះត្រាមានភ្នាក់ងារដែលមានសមត្ថភាពពិតប្រាកដ ដើម្បីបំរើសេវាអតិថិជនប្រកបដោយវិជ្ជាជីវៈនិងគុណភាពមិនមែនបង្ហាញរូបភាពល្អមើលតែខាងក្រៅនោះទេ ហើយក្រុមហ៊ុនតែងតែមានវគ្គបណ្តុះបណ្តាលជំនាញជាប្រចាំជូនភ្នាក់ងារ ដើម្បីពង្រឹងសមត្ថភាពភ្នាក់ងារឱ្យរឹងមាំទើបអាចឆ្លើយតបនឹងសំណួរ ក៏ដូចជាកង្វល់អតិថិជនលើការវិនិយោគក្នុងវិស័យអចលនទ្រព្យបាន៕

អ្នកជំនាញអន្តរជាតិៈទិញការិយាល័យសំរាប់ជួលមានអត្រាចំណេញ២០ភាគរយ ពីការវិនិយោគប្រចាំឆ្នាំ

ដោយគង់ សូរិយា

ភ្នំពេញៈ អ្នកជំនាញអន្តរជាតិបានលើកឡើងថា ការទិញការិយាល័យសំរាប់ជួលនៅទីក្រុងភ្នំពេញ មានផលចំណេញរហូតដល់២០ភាគរយប្រចាំឆ្នាំ ពីការវិនិយោគរបស់ពួកគេ(return of investment)។

អគ្គនាយកក្រុមហ៊ុនCSA Real Estate Group លោកAlan Neoបានមានប្រសាសន៍ឲ្យដឹងកាលពីល្ងាចថ្ងៃសុក្រកន្លងមកថា ការទិញការិយាល័យសំរាប់ជួលយកផលចំណេញ វាជានិន្នាការថ្មីមួយនៅទីក្រុងភ្នំពេញ ប៉ុន្តែទស្សនទាននេះវាបាននិងកំពុងមកដល់ទីក្រុងភ្នំពេញ ខណៈប្រជាជនកម្ពុជាតិចតួចនៅឡើយបានដឹងរឿងនេះ ប៉ុន្តែវាជាការវិនិយោគដ៏ល្អមួយ។

លោកបន្តថា “និន្នាការនេះនឹងផ្លាស់ប្តូរនៅតំបន់បឹងកេងកង១ ហើយផលចំណេញពីការវិនិយោគខ្ពស់បែបនេះ នឹងធ្វើឲ្យការទិញការិយាល័យសំរាប់ជួល នឹងកើនឡើងនៅទីក្រុងភ្នំពេញ”។

ដោយសារទស្សនទាន និងនិន្នាការទីផ្សារថ្មីនេះហើយ បានធ្វើឲ្យអ្នកសាងសង់ការិយាល័យសំរាប់ជួលបានចាប់ផ្តើម ជាមួយគំរោងGolden Tower322 ដែលបាននិងកំពុងសាងសង់ ពិសេសគម្រោងនេះបានផ្តល់នូវគំនិតច្នៃប្រឌិត និងនាំមកនូវស្តង់ដាការិយាល័យលំដាប់ពិភពលោក(Google office)។

លោកAlan Neoបានមានប្រសាសន៍ពន្យល់ថា ហេតុផលដែលការទិញការិយាល័យសំរាប់វិនិយោគមានផលចំណេញខ្ពស់ ដោយសារតំបន់បឹងកេងកង១ មិនសូវមានការិយាល័យសំរាប់ជួល តំបន់នេះទាក់ទាញភ្ញៀវបរទេស ការកើនឡើងនូវក្រុមហ៊ុនថ្មីៗ ការចូលមកដល់របស់ក្រុមហ៊ុនអន្តរជាតិកាន់តែច្រើន ដែលពួកគេត្រូវការការិយាល័យស្តង់ដា និងនិន្នាការផ្លាស់បប្តូរការិយាល័យតាមផ្ទះ មកការិយាល័យស្តង់ដាកំពុងកើនឡើង។

លោកបន្តថា “ទីផ្សារការិយាល័យ បានចាប់ផ្តើមផ្លាស់ប្តូរផ្នត់គំនិតលើការវិនិយោគរបស់ប្រជាពលរដ្ឋខ្មែរនាពេលអនាគតឆាប់ៗនេះ”៕

ស្រុកកៀនស្វាយនឹងស្វាគមន៍រោងចក្រស្រាបៀរធំមួយដែលមានទុនវិនិយោគ៧៨លានដុល្លារ

ដោយៈប៊ី

ភ្នំពេញៈ ក្រុមប្រឹក្សាអភិវឌ្ឍន៍កម្ពុជា (CDC) បានសម្រេចអនុម័តរោងចក្រផលិតស្រាបៀរដ៏ធំមួយរបស់ក្រុមហ៊ុន “INTER-MATTRID BEVERAGE (CAMBODIA) ដែលមានមានទុនវិនិយោគចំនួន ៧៨លានដុល្លារអាមេរិក ក្នុងស្រុកកៀនស្វាយ ខេត្តកណ្តាល។ នេះបើយោងតាមសេចក្តីប្រកាសព័ត៌មានរបស់ CDC នៅល្ងាចថ្ងៃទី៤ ខែធ្នូ ឆ្នាំ២០២០ ។

យោងតាមសេចក្តីប្រកាសព័ត៌មានខាងលើបានឱ្យដឹងថា តាមសំណើសុំវិនិយោគរបស់ក្រុមហ៊ុន គណៈកម្មាធិការវិនិយោគកម្ពុជា នៃក្រុមប្រឹក្សាអភិវឌ្ឍន៍កម្ពុជា បានសម្រេចចេញវិញ្ញាបនបត្រចុះបញ្ជីជាស្ថាពរ ជូនដល់ក្រុមហ៊ុន “INTER-MATTRID BEVERAGE (CAMBODIA) CO., LTD” គម្រោងបង្កើតរោងចក្រផលិតស្រាបៀរ ដែលមានទីតាំងវិនិយោគស្ថិតនៅភូមិស្តៅកន្លែង២ ឃុំដីឥដ្ឋ ស្រុកកៀនស្វាយ ខេត្តកណ្តាល មានទុនវិនិយោគចំនួន៧៨លានដុល្លារអាមេរិក និងអាចបង្កើតការងារបានចំនួន៥៥០កន្លែង។

បច្ចុប្បន្ននេះ រដ្ឋាភិបាលតាមរយៈក្រុមប្រឹក្សាអភិវឌ្ឍន៍កម្ពុជា (CDC) នៅតែបន្តទទួលបានគម្រោងវិនិយោគថ្មីៗបន្ថែមទៀត ក្នុងតម្លៃទុនរាប់លានដុល្លារអាមេរិក បើទោះបីកម្ពុជាស្ថិតនៅក្នុងវិបត្តិនៃរាតត្បាតជាកលនូវជំងឺឆ្លងប្រភេទថ្មី Covid-19 ។

ស្ថានភាពវិនិយោគក្នុងស្រុក ធុរកិច្ច និងវិនិយោគមកពីបរទេសមកកាន់កម្ពុជា មិនមានការប្រែប្រួលខ្លាំងនោះទេ ដោយសកម្មភាពពាណិជ្ជកម្ម និងវិនិយោគមានភាពធម្មតា។

ការរីករាលដាលជំងឺកូវីដ១៩ បានធ្វើឲ្យពិភពលោករងផលប៉ះពាល់យ៉ាងខ្លាំង ក្នុងនោះក៏មានកម្ពុជាដែលផ្នែកជាច្រើន ជាពិសេសវិស័យទេសចរណ៍ បាននូវផលប៉ះពាល់យ៉ាងខ្លាំង ដូចជាទីផ្សារបម្រើដល់វិស័យទេសចរណ៍បានធ្លាក់ចុះ ធ្វើឲ្យបាត់បង់ការងារ និងបាត់បង់ប្រាក់ចំណូល៕

ចំណេះដឹង! តើការរៀបចំដែនដីទីក្រុងមានសារៈសំខាន់យ៉ាងណា?

ដោយៈវុត្ថា

ភ្នំពេញៈ ការរៀបចំដែនដីទីក្រុង កាន់តែមានសារៈសំខាន់ណាស់នៅកម្ពុជា ខណៈដែលទីក្រុងរីកធំយ៉ាងរហ័យ តម្រូវការលំនៅឋាន និងទីកន្លែងសម្រាប់ធុរៈកិច្ចកាន់តែកើនឡើងច្រើន ហើយសំពាធលើសេវភាព និងហេដ្ឋារចនាសម្ព័ន្ធ កាន់តែខ្លាំង។

យោងតាមឯកសាររបស់ក្រសួងរៀបចំដែនដី នគរូបនីយកម្ម និងសំណង់ស្តីពីក្របខ័ណ្ឌយុទ្ធសាស្ត្រ គោលនយោបាយដីធ្លីបានឱ្យដឹងថា រាជធានីភ្នំពេញគឺជាឧទាហរណ៍ធំមួយ ប៉ុន្តែបណ្តាខេត្តនានាក៏ប្រឈមមុខនឹងបញ្ហាដូចគ្នាដែរ។ ការរៀបចំដែនដីទីក្រុង ទាមទានូវការអភិវឌ្ឍន៍ជាច្រើន ដើម្បីឈានដល់កំរិតនៃជីវភាពដែលត្រូវធានា។

ម្យ៉ាងទៀតការរៀបចំដែនដីក្រុង ដើម្បីមានការទាក់ទាញការវិនិយោគ និងដើម្បីធ្វើឱ្យទីតាំងដីបានប្រសើរឡើង និងដើម្បីអាចរកដីបានទាមទារត្រូវមានកត្តាផ្សេងទៀត ពីការផ្តល់លំនៅឋានដែលអាចទិញបាន និងសេវាកម្មផ្សេងទៀត។

ដំណាក់ការសំខាន់មួយគឺ ត្រូវបញ្ជាក់ឱ្យបានច្បាស់ពីសមត្ថកិច្ចរបស់ក្រុង និងឃុំ សង្កាត់ ក្នុងការកសាងផែនការប្រើប្រាស់ដី ផែនការអភិវឌ្ឍន៍ ក្រមសំណង់ បទបញ្ញត្តិកំណត់តំបន់ នីតិវិធីកែតម្រូវក្បាលដី និយន្តការសម្រាប់អនុវត្ត។ ដំណាក់ការគន្លឹះទីពពីរគឺត្រូវបញ្ជាក់ច្បាស់ពីយន្តការបែងចែកដីសម្រាប់អភិវឌ្ឍទីក្រុង។

ការបញ្ជាក់ទាំងនេះ គ្របដណ្តប់លើកលែងដីសាធារណៈ (សម្រាប់គោលដីដឹកជញ្ជូន សេវាកម្មសាធារណៈ ការសង់លំនៅឋាន និងពាណិជ្ជកម្ម) តួនាទីនៃទីផ្សារដីក្នុងការ អភិវឌ្ឍន៍ថ្មី និងតម្រូវការក្នុងការកែតម្រូវក្បាលដី (កែតម្រូវព្រំប្រទល់ក្បាលដី និងហេដ្ឋារចនាសម្ព័ន្ធ)។

ដំណាក់កាលនេះ ត្រូវបានគ្រោងដាក់បញ្ចូលទៅក្នុងអនុក្រឹត្យស្តីពី ផែនការប្រើប្រាស់ដី និងការរៀបចំដែនដីទីក្រុង។ អនុក្រឹត្យទាំងត្រូវបញ្ជាក់ផងដែរ អំពីដំណើរការត្រួតពិនិត្យ និងការអនុម័តលើផែនការអភិវឌ្ឍរបស់មូលដ្ឋាន៕

ម្ចាស់គម្រោងអភិវឌ្ឍលំនៅឋានបច្ចុប្បន្នកំពុងផ្តល់លក្ខខណ្ឌពិសេសដល់អតិថិជន

ដោយវុត្ថា

ភ្នំពេញៈ ស្របពេលដែលកម្ពុជា កំពុងតែជួបវិបត្តិនៃការរីករាលដាលជាសកល នៃជំងឺ Covid-19 នាពេលបច្ចុប្បន្ននេះ ម្ចាស់គម្រោងអភិវឌ្ឍលំនៅឋានមួយចំនួន បានផ្តល់លក្ខខណ្ឌពិសេសជូនដល់អតិថិជន ខណៈការទិញលក់នៅតែមានតម្រូវការ។

លោក ម៉ាន់ ចាន់ឌី អគ្គនាយកក្រុមហ៊ុន Premium Group ឱ្យដឹងកាលពីពេលថ្មីៗនេះថា បើទោះបីកម្ពុជាស្ថិតនៅក្នុងវិបត្តិជំងឺ Covid-19 យ៉ាងណាក្តី តែការតម្រូវការលំនៅឋាននៅតែមានជារៀងរាល់ថ្ងៃ ជាពិសេសគឺអ្នកដែលស្វែងរកទិញ ទទួលបាននូវលក្ខខណ្ឌពិសេសពីម្ចាស់គម្រោង។

លោកបន្តថ្លែងថា “តម្រូវការទិញលក់លំនៅឋាននៅតែមាន ហើយស្ថិតនៅក្នុងលក្ខណពិសេស ដូចជាទិញដោយគ្មានប្រាក់កក់ និងមានការថែមនូវសម្ភារៈប្រើប្រាស់ផ្សេងៗនៅក្នុងផ្ទះបាយ ដូចជាទូទឹកកកជាដើម” ។ លោកបន្ថែមថា “ទាំងលក្ខខណ្ឌនៃការបង់រំលស់ផ្ទះ ក៏ស្ថិតនៅក្នុងស្ថានភាពល្អប្រសើរផងដែរ” ។

តែយ៉ាងណាក៏ដោយ លោកថា ការទិញលក់លំនៅឋាននេះ ស្ថិតនៅក្នុងស្ថានភាពយឺតយ៉ាជាងពេលមុន ដែលមិនទាន់មានការផ្ទុះឡើយនៅជំងឺ Covid-19 កាលពីកន្លងមកនេះ។ លោកបន្តថា ទន្ទឹមនឹងការទិញលក់នៅតែមាន ក៏គម្រោងអភិវឌ្ឍន៍លំនៅឋាននានា នៅតែបន្តមានផងដែរ ដើម្បីឆ្លើយតបទៅនឹង តម្រូវការនេះ។

ចំណែក លោកស្រី តាំង ហួរ អគ្គនាយិកាក្រុមហ៊ុន Amatak Property Service បានឱ្យដឹងដែរថា ជាការពិតណា តម្រូវការលំនៅឋានសម្រាប់រស់នៅនៅតែមាន ហើយមានលក្ខខណ្ឌពិសេស ខណៈការទិញលក់លំនៅឋាន សម្រាប់ធ្វើការវិនិយោគបន្តមិនទាន់មាននោះទេ។

លោកថ្លែងថា “នាពេលបច្ចុប្បន្ននេះ ម្ចាស់គម្រោងមួយចំនួនបាន និងកំពុងបន្ធូរបន្ថយនូវលក្ខខណ្ឌពិសេស ដល់អតិថិជនរបស់ខ្លួន តាមរយៈការបោះរំលស់១០០ភាគរយ និងផ្តល់នូវសម្ភារៈប្រាស់ប្រាស់ផ្សេងៗ ហើយបើមិនបន្ធូរបន្ថយទេ នឹងមានការលំបាក។

លោកបន្ថែមថា “នៅពេលដែលអ្នកអភិវឌ្ឍន៍បន្ធូបន្ថយ នូវលក្ខខណ្ឌពិសេនេះ អតិថិជន ដែលជាអ្នកស្វែងរកលំនៅឋានសម្រាប់រស់នៅ ហើយមានលទ្ធភាពគួរតែទិញទុកអោយហើយ ជាពិសេសតម្លៃក៏មានលក្ខខណៈសមរម្យ បើទៅមុខទៀត តម្លៃនឹងមានការកើនឡើង” ។

សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា ធ្លាប់បានមានប្រសាសន៍កាលពីពេលថ្មីៗនេះ ថា វិបត្តិនៃជំងឺ Covid-19 មិនមែនជាឧបសគ្គក្នុងអភិវឌ្ឍហេដ្ឋារចនាសម្ព័ន្ធទូទាំងប្រទេសកម្ពុជានោះទេ ជាពិសេសគម្រោងលំនៅឋានដែលមានតម្លៃសមរម្យ ខណៈដែលប្រជាពលរដ្ឋកម្ពុជា នៅតែមានលទ្ធភាពទិញសម្រាប់រស់នៅ៕

ស្រុកកៀនស្វាយខេត្តកណ្តាលទទួលបានគម្រោងវិនិយោគ៣ និងមានទុនវិនិយោគ សរុបជិត១១០លានដុល្លារ

ដោយៈ រ៉ាណេត

កណ្តាលៈ ស្រុកកៀនស្វាយ ដែលជាចំណុះខេត្តកណ្តាល មានព្រំប្រទល់ជាប់រាជធានីភ្នំពេញ ទទួលបានគម្រោងវិនិយោគធំៗចំនួន៣ព្រមគ្នា ដែលមានទុនសរុបរហូតដល់ជិត១១០លានដុល្លារ លើការសាងសង់រោងចក្រផលិតស្រាបៀរ រោងចក្រផលិតជីកសិកម្ម និងរោងចក្រផលិតផលិតផលពីប្លាស្ទិក។

តាមរយៈសេចក្ដីប្រកាសជាផ្លូវការ របស់ក្រុមប្រឹក្សាអភិវឌ្ឍន៍កម្ពុជា នៅថ្ងៃចុងស ប្ដាហ៍នេះបានឲ្យដឹងថា រាជរដ្ឋាភិបាលកម្ពុជាបានសម្រេចគាំទ្រ និងអនុម័តទាំងស្រុកទៅលើគម្រោងវិនិយោគធំៗចំនួន៣ស្ថិតនៅក្នុងស្រុកកៀន ជាមួយទុនសរុបជិត១១០លានដុល្លារ និងបង្កើតការងារជូនប្រជាពលរដ្ឋបានជិត៨០០នាក់។

គម្រោងទាំង៣ ដែលទើបតែទទួលបានការអនុម័ត ពីសំណាក់រាជរដ្ឋាភិបាលកម្ពុជា រួមមានក្រុមហ៊ុន SING FU SUN (CAMBODIA) PLASTIC CO., LTD ជាគម្រោងបង្កើតរោងចក្រផលិតផលិតផលពីប្លាស្ទិក (Preform, Cap, Bottle) មានទីតាំងស្ថិតនៅភូមិព្រែកតានប់២ ឃុំកំពង់ស្វាយ ស្រុកកៀនស្វាយ ខេត្តកណ្តាល មានទុនវិនិយោគប្រមាណ១១,៧លានដុល្លារ អាចបង្កើតការងារបានចំនួន៥២កន្លែង។

ក្រុមហ៊ុន RUIZEXING CHEMICAL TECHNOLOGY CO., LTD ជាគម្រោងបង្កើតរោងចក្រផលិតថ្នាំកសិកម្មមានទីតាំង ស្ថិតនៅភូមិព្រែកត្រែង ឃុំសំរោងធំ ស្រុកកៀនស្វាយ ខេត្តកណ្តាល មានទុនវិនិយោគប្រមាណ២០,១លានដុល្លារ បង្កើតការងារបានចំនួន១៧៤កន្លែង។

ក្រុមហ៊ុន INTER-MATTRID BEVERAGE (CAMBODIA) CO., LTD ជាគម្រោងដែលធំជាងគេ គឺបង្កើតរោងចក្រផលិតស្រាបៀរ មានទីតាំងស្ថិតនៅភូមិស្តៅកន្លែង២ ឃុំដីឥដ្ឋ ស្រុកកៀនស្វាយ ខេត្តកណ្តាល មានទុនវិនិយោគចំនួន៧៨លានដុល្លារអាមេរិក និងអាចបង្កើតការងារបានចំនួន៥៥០កន្លែង។

ជាមួយនឹងការសម្រេចគាំទ្រ ទៅលើគម្រោងទាំងអស់ខាងលើនេះ រាជរដ្ឋាភិបាលក៏បានកំណត់ និងតម្រូវឱ្យក្រុមហ៊ុនអភិវឌ្ឍន៍ និងវិនិយោគ ធ្វើរបាយការណ៍ពីផលប៉ះពាល់នានានៃគម្រោង ដល់ប្រជាពលរដ្ឋ សង្គម និងបរិស្ថាន ដើម្បីអាចធ្វើឱ្យគម្រោងមានដំណើរដោយរលូន។

បច្ចុប្បន្ននៅក្នុងស្រុកកៀនស្វាយ ជាពិសេសនៅតាមតំបន់ផ្លូវជាតិលេខមួយ បាន និងកំពុងមានការអភិវឌ្ឍគួរឱ្យកត់សម្គាល់ ដែលក្នុងនោះវិស័យលំនៅដ្ឋាន បានបង្ហាញពីភាពលេចធ្លោ ជាមួយនឹងគម្រោងបុរីលំនៅដ្ឋានជាច្រើន ដូចជា គម្រោងបណ្ដុំកៀនស្វាយផ្លាហ្សា បុរីកៀនស្វាយផាក ជាពិសេសគម្រោងអភិវឌ្ឍន៍សួនកម្សាន្ត ដែលមានតម្លៃរាប់រយលានដុល្លារ។ បន្ថែមពីនេះ នៅមានគម្រោងពង្រីកកំពង់ផែភ្នំពេញ រួមជាមួយនឹងគម្រោងបង្កើតកំពង់ផែទេសចរណ៍ផងដែរ ដែលជំរុញឱ្យតំបន់កាន់តែមានសក្ដានុពល៕

ខេត្តកំពតនឹងមានរដ្ឋបាលប្រមូលផ្តុំនាពេលខាងមុខនេះ និងលើកទី១សំរាប់បណ្តាខេត្តជាប់តំបន់ឆ្នេរ

ដោយៈវុត្ថា

ភ្នំពេញៈ ខេត្តកំពត នឹងមានរដ្ឋបាលប្រមូលផ្តុំនាពេលខាងមុខនេះ ស្របតាមបំណងរបស់ប្រមុខនៃរាជរដ្ឋាភិបាលកម្ពុជា ដើម្បីបង្កភាពងាយស្រួលក្នុងការផ្តល់សេវានានាជូនប្រជាពលរដ្ឋនៅក្នុងខេត្តទាំងមូល។

លោកជាវ តាយ អភិបាលខេត្តកំពត បានឱ្យដឹងកាលពីពេលថ្មីៗនេះថា ប្រមុខរាជរដ្ឋាភិបាលឱ្យខេត្តរៀបចំរដ្ឋបាល ប្រមូលផ្តុំដើម្បីបង្កភាពងាយស្រួល ក្នុងការបំរើសេវាសំខាន់ៗនានាជូន ខណៈដែលរដ្ឋបាលប្រមូលផ្តុំនេះ បណ្តុំទៅដោយមន្ទីរស្ថាប័នគ្រប់ជំនាញ។

លោកបន្តថា “ផែនការនេះបង្កើតឱ្យមានរដ្ឋបាលប្រមូលផ្តុំនេះ ត្រូវការទាមទាឱ្យមានការសិក្សាលម្អិត និងពេលវេលាបន្ថែមទៀត ខណៈដែលរដ្ឋបាលប្រមូលផ្តុំនេះ មានគ្រប់សេវាទាំងអស់ពីអង្គភាពគ្រប់ស្ថាប័ន និងមន្ទីរជំនាញ ដោយប្រជាពលរដ្ឋមិនបាច់ទៅរកនៅទីន្លែងផ្សេងនោះទេ” ។ លោកន្ថែមថា “រឿងបង្កើតរដ្ឋបាលប្រមូលផ្តុំនេះ គឺជាការគិតរបស់ប្រមុខនៃរាជរដ្ឋាភិបាលទៅមុខទៀត យើងត្រៀមធ្វើវា ខ្ញុំមិនទាន់ឆ្លើយតបភ្លាមៗនោះទេ គឺត្រូវការគិតគូរ និងពេលវេលាបន្ថែម” ។

ប្រមុខរាជរដ្ឋាភិបាលកម្ពុជា សម្ដេចតេជោ ហ៊ុន សែន កាលពីកន្លងមកនេះ បានស្នើឱ្យរដ្ឋបាលខេត្តកំពត បើកកិច្ចប្រជុំជាមួយមន្ត្រីជំនាញ សិក្សាទៅលើលទ្ធភាពនៃការបង្កើតតំបន់រដ្ឋបាលប្រមូលផ្តុំ និងគម្រោងសាងសង់ពហុកីឡាដ្ឋានថ្មី ប្រចាំនៅក្នុងខេត្តកំពត ដើម្បីចូលរួមលើកកម្ពស់សក្ដានុពល និងសេដ្ឋកិច្ចខេត្តឱ្យកាន់តែរីកចម្រើន។

រដ្ឋាភិបាលបានកំណត់យកទីក្រុងកំពត ជាទិសដៅទេសចរណ៍ សំខាន់បំផុតមួយ និងជាកន្លែងប្រមូលផលិតផលកសិកម្ម សម្រាប់ការនាំចេញទៅទីផ្សារអន្តរជាតិ ខណៈហេដ្ឋារចនាសម្ព័ន្ធរូបវ័ន្ត ក្នុងទីក្រុបឆ្នេរសមុទ្រមួយនេះ កំពុងត្រូវបានកសាង និងអភិវឌ្ឍន៍។

យោងតាមចក្ខុវិស័យដល់ឆ្នាំ២០៣០ នៃប្លង់គោលប្រើប្រាស់ដីក្រុងកំពតគឺ រដ្ឋាភិបាលកំពុងសំដៅរៀបចំ និងអភិវឌ្ឍ ក្រុងកំពតជាក្រុងគុជបៃតង ឆ្នេរសមុទ្រ ធម្មជាតិ វប្បធម៍ និងពាណិជ្ជកម្ម តាមរយៈការអភិវឌ្ឍន៍ជាទីក្រុង រមណីយដ្ឋានគុជទេសចរណ៍ឆ្នេរសមុទ្រ ធម្មជាតិ វប្បធ៌ម ដែលស្អាតបំផុតលើសកលលោក។

តាមរយៈចក្ខុវិស័យនគររូបនីយកម្មនេះ ទីក្រុងកំពតនឹងអភិវឌ្ឍទៅជាមជ្ឈមណ្ឌលកែច្នៃផលិផល កសិកម្ម ឧស្សាហកម្ម ទីផ្សារអន្តរជាតិសម្រាប់ផលិតផលកសិកម្ម និងចែកចាយទំនិញ និងជាទីក្រុងទំនើប ដែលមានហេដ្ឋារចនាសម្ព័ន្ធ សេវាកម្មទីក្រុង និងគុណភាពបរិស្ថានរស់នៅប្រសើរ៕

ក្រុមហ៊ុនថៃធំៗចំនួន៤ចុះកិច្ចព្រមព្រៀងអភិវឌ្ឍសួនឧស្សាហកម្មខ្នាតយក្សនៅមីយ៉ាន់ម៉ា

ដោយៈសុខុម

អន្តរជាតិៈក្រុមហ៊ុនថៃធំៗចំនួន៤ រួមមានក្រុមហ៊ុន B.Grimm Group ក្រុមហ៊ុន Amata Corporation ក្រុមហ៊ុន PTT និងក្រុមហ៊ុន Global Power Synergy បានចុះកិច្ចព្រមព្រៀងលើ គម្រោងអភិវឌ្ឍន៍សួនឧស្សាហកម្មខ្នាតយក្សមួយ លើផ្ទៃដីរហូតដល់ទៅ ៨០០គីឡូម៉ែត្រការ៉េក្នុងប្រទេសមីយ៉ាន់ម៉ា។

លោកហារ៉ល លីង (Harald Link) ប្រធានក្រុមហ៊ុន B.Grimm បានថ្លែងថា តាមការរំពឹងទុក អនុស្សរណៈនៃការយោគយល់ (MoU) មួយអាចនឹងត្រូវចុះហត្ថលេខានៅដើមឆ្នាំ២០២១ ដ៏ខ្លីខាងមុខ។

លោកបានបន្តថា “តួនាទីសំខាន់របស់ក្រុមហ៊ុន B.Grimm នៅក្នុងការចាប់ដៃសហការនេះ គឺដំណើរការរោងចក្រផលិតថាមពលអគ្គិសនីមួយ នៅក្នុងសួនឧស្សាហកម្មនេះ សម្រាប់ផ្គត់ផ្គង់ ដល់សួនឧស្សាហកម្មនេះទាំងមូល ហើយសល់ប៉ុន្មានលក់ទៅឱ្យរដ្ឋាភិបាលមីយ៉ាន់ម៉ា” ។

ទោះជាយ៉ាងណា លោកមិនបានផ្ដល់ព័ត៌មានលម្អិតបន្ថែមទៀត ទាក់ទិននឹងគម្រោងអភិវឌ្ឍន៍ខ្នាតយក្សនេះឡើយ។

លោកលើកឡើងថា អាជីវកម្មផលិតថាមពលអគ្គិសនីរបស់ក្រុមហ៊ុន B.Grimm Group នឹងក្លាយជាកម្លាំងចលករដ៏សំខាន់ ក្នុងការស្វែងរកប្រាក់ចំណូល ក្នុងរយៈពេល៨ ឆ្នាំបន្ទាប់ ដោយកំណត់គោលដៅប្រាក់ចំណូល សរុបរហូតដល់ទៅ១៥០ពាន់លានបាត (ប្រមាណ ៥ ពាន់លានដុល្លារ) នៅត្រឹមឆ្នាំ២០២៨ ។

នៅឆ្នាំនេចំនួន ៧០% នៃប្រាក់ចំណូលប៉ាន់ស្មានសរុបរបស់ក្រុមហ៊ុននេះ (៦០ ពាន់លានបាត ឬប្រមាណ២ពាន់លានដុល្លារ) បានពីក្រុមហ៊ុនផលិតថាមពលអគ្គិសនី B.Grimm Power Plc. ដែលជាក្រុមហ៊ុនបុត្រសម្ព័ន្ធរបស់ខ្លួន។

ក្រុមហ៊ុន B.Grimm ដំណើរការអាជីវកម្មថាមពលអគ្គិសនី ដែលមានសមត្ថភាពផ្គត់ផ្គង់អគ្គិសនីសរុប ៣.០១៩ មេហ្គាវ៉ាត់នៅក្នុងប្រទេសជាច្រើន រួមមាន ប្រទេសថៃ ប្រទេសឡាវ និងប្រទេសវៀតណាម ដែលចែកចាយបន្តមកប្រទេសកម្ពុជាយើងផងដែរ៕

តាមសំណើសុំវិនិយោគរបស់ក្រុមហ៊ុន គណៈកម្មាធិការវិនិយោគកម្ពុជានៃក្រុមប្រឹក្សាអភិវឌ្ឍន៍កម្ពុជា បានសម្រេចចេញវិញ្ញាបនបត្រចុះបញ្ជីជាស្ថាពរ ជូនដល់ក្រុមហ៊ុនដូចខាងក្រោម៖

១- “CHUNTENG INDUSTRIAL (CAMBODIA) CO., LTD” គម្រោងបង្កើតរោងចក្រផលិតសម្ភារៈពីក្រណាត់ សម្រាប់សត្វចិញ្ចឹម (ឆ្កែ និងឆ្មា) ដែលមានទីតាំងវិនិយោគស្ថិតនៅភូមិចាស់ ឃុំពេជ្រមុនី ស្រុកគងពិសី ខេត្តកំពង់ស្ពឺ មានទុនវិនិយោគប្រមាណ ២,៦លានដុល្លារអាមេរិក និងអាចបង្កើតការងារបានចំនួន ៣៥៨កន្លែង។

២- “BLISSFULL CAPITAL CO., LTD” គម្រោងបង្កើតមជ្ឈមណ្ឌលពាណិជ្ជកម្ម ដែលមានទីតាំងវិនិយោគស្ថិតនៅដីឡូតិ៍៥៣២ ផ្លូវជាតិលេខ២ សង្កាត់ចាក់អង្រែលើ ខណ្ឌមានជ័យ រាជធានីភ្នំពេញ មានទុនវិនិយោគប្រមាណ ៩,៥លានដុល្លារអាមេរិក និងអាចបង្កើតការងារបានចំនួន ២០០កន្លែង។

៣- “SING FU SUN (CAMBODIA) PLASTIC CO., LTD” គម្រោងបង្កើតរោងចក្រផលិតផលិតផលពីប្លាស្ទិក (Preform, Cap, Bottle) ដែលមានទីតាំងវិនិយោគស្ថិតនៅភូមិព្រែកតានប់២ ឃុំកំពង់ស្វាយ ស្រុកកៀនស្វាយ ខេត្តកណ្តាល មានទុនវិនិយោគប្រមាណ ១១,៧លានដុល្លារអាមេរិក និងអាចបង្កើតការងារបានចំនួន ៥២កន្លែង។

៤- “RUIZEXING CHEMICAL TECHNOLOGY CO., LTD” គម្រោងបង្កើតរោងចក្រផលិតថ្នាំកសិកម្ម ដែលមានទីតាំងវិនិយោគស្ថិតនៅភូមិព្រែកត្រែង ឃុំសំរោងធំ ស្រុកកៀនស្វាយ ខេត្តកណ្តាល មានទុនវិនិយោគប្រមាណ ២០,១លានដុល្លារអាមេរិក និងអាចបង្កើតការងារបានចំនួន ១៧៤កន្លែង។

៥- “INTER-MATTRID BEVERAGE (CAMBODIA) CO., LTD” គម្រោងបង្កើតរោងចក្រផលិតស្រាបៀរ ដែលមានទីតាំងវិនិយោគស្ថិតនៅភូមិស្តៅកន្លែង២ ឃុំដីឥដ្ឋ ស្រុកកៀនស្វាយ ខេត្តកណ្តាល មានទុនវិនិយោគចំនួន ៧៨លានដុល្លារអាមេរិក និងអាចបង្កើតការងារបានចំនួន ៥៥០កន្លែង។

ខេត្តព្រះសីហនុ ទទួលបានចំណូលជាង ២,២២លានដុល្លារ ពីការប្រមូលពន្ធលើមធ្យោបាយដឹកជញ្ជូន

ដោយ ៖ វត្ថា

ព្រះសីហនុ ៖ លទ្ធផលនៃការប្រមូលពន្ធលើមធ្យោបាយដឹកជញ្ជូនគ្រប់ប្រភេទនៅក្នុងខេត្តព្រះសីហនុ សម្រេចបានជិត៨៩០០លានរៀល ស្មើនឹងជាង ២,២២លានដុល្លារនៅក្នុងឆ្នាំ២០២០ ជាមួយចំនួនយានយន្តសរុប ១៦,២៥០គ្រឿង។

ប្រធានសាខាពន្ធដារខេត្តព្រះសីហនុ លោក សន ស៊ីផល បានឱ្យដឹងនៅថ្ងៃទី៤ ខែធ្នូ ឆ្នាំ២០២០នេះថា ការប្រមូលពន្ធលើមធ្យោបាយដឹងជញ្ជូនគ្រប់ប្រភេទប្រចាំឆ្នាំ២០២០ ត្រូវបានបិទបញ្ចប់កាលពីថ្ងៃទី៣០ ខែវិច្ឆិកា ឆ្នាំ២០២០ កន្លងមក ដោយសាខាពន្ធដារខេត្តព្រះសីហនុប្រមូលថវិកាលើមធ្យោបាយដឹកជញ្ជូនគ្រប់ប្រភេទមានចំនួន ១៦,២៥០គ្រឿង និងប្រមូលថវិកាបានចំនួន ៨,៨៩៦,៥១០,០០០រៀល បើធ្វើការប្រៀបធៀបរយៈពេលដូចគ្នាក្នុងឆ្នាំ២០១៩ មានយានយន្តកើនឡើងចំនួន ៣,១៨១គ្រឿង និងប្រាក់ពន្ធកើនឡើង ១,៨២៦,៩៨០,០០០រៀល ស្មើនឹង២៥ភាគរយ។

លោកបានបន្តឱ្យដឹងបន្ថែមទៀតថា ការប្រមូលពន្ធលើមធ្យោបាយដឹកជញ្ជូនគ្រប់ប្រភេទមានការកើនឡើងក្នុងឆ្នាំ២០២០នេះ ដោយសារតែបងប្អូនប្រជាពលរដ្ឋមានការយល់ដឹង និងភ្ញាក់រលឹកពីកាតព្វកិច្ចបង់ពន្ធចូលមកបង់ពន្ធ នៅតាមសាខាពន្ធដារ និងតាមធនាគារនានាបានទាន់ពេលវេលាមានការកើនឡើងជាបន្ត បន្ទាប់ជារៀងរាល់ឆ្នាំ ទោះបីកម្ពុជា និងពិភពលោកកំពុងរួមគ្នាប្រយុទ្ធប្រឆាំង នឹងជំងឺឆ្លង កូវីដ-១៩ យ៉ាងណាក៏ដោយ។

លោកប្រធានសាខាពន្ធដារបានបញ្ជាក់ថា ដោយមានការចង្អុលបង្ហាញពីប្រតិភូរាជរដ្ឋាភិបាលទទួលបន្ទុកអគ្គនាយកនៃអគ្គនាយកដ្ឋានពន្ធដារ ក្នុងការបើកសិក្ខា សាលាផ្សព្វផ្សាយអំពីច្បាប់លិខិតបទដ្ឋានគតិយុត្តនានាដល់អាជ្ញាធរ និងប្រជាពលរដ្ឋក្នុងក្រុង ស្រុក ឃុំ សង្កាត់ ស្តីពីកាតព្វកិច្ចបង់ពន្ធជូនដល់បងប្អូនប្រជាពលរដ្ឋ។

បច្ចុប្បន្នប្រជាពលរដ្ឋមានការយល់ដឹងអំពីកាតព្វកិច្ចបង់ពន្ធជូនរដ្ឋកាន់តែច្រើន ពួកគាត់បាននាំគ្នាចូលមកបង់ពន្ធជូនរដ្ឋនៅតាមស្នាក់ការសាខាពន្ធដារក្រុង ស្រុក និងតាមធនាគារដែលបានសហការចុះកិច្ចព្រមព្រៀង (MOU) ជាមួយអគ្គនាយកដ្ឋានពន្ធដារក្នុងការប្រមូលពន្ធនៅតាមធនាគារ មានដូចជាធនាគារអេស៊ីលីដា ធនាគារការណាឌីយ៉ា ធនាគារវឌ្ឍនៈ ធនាគារកម្ពុជា សាធារណៈ និងធនាគារ ANZ រ៉ូយ៉ាល់ជាដើម៕