ដោយ ហ្សូលី

ភ្នំពេញ៖ ព្រលានយន្តហោះអន្តរជាតិទាំង ៣ របស់កម្ពុជា បានជាប់នៅលំដាប់កំពូលថាជាអាកាសយានដ្ឋានដែលមានសុវត្ថិភាពជាងគេ សម្រាប់ព្រលានយន្តហោះខ្នាតតូចដែលមានអ្នកដំណើរក្រោម ១៥លាននាក់ក្នុងមួយឆ្នាំ។

យោងតាមការវាយតម្លៃទទួលស្គាល់ផ្នែកសុខភាពតាមព្រលានយន្តហោះពីក្រុមប្រឹក្សាព្រលានយន្តហោះអន្តរជាតិបានឱ្យដឹងថា ព្រលានយន្តហោះដែលបើកដំណើរការដោយក្រុមហ៊ុន CAmbodia Airports នៅទីក្រុងភ្នំពេញ ខេត្តសៀមរាប និងខេត្តព្រះសីហនុ ជាប់នៅលំដាប់កំពួលជាអាកាសយានដ្ឋានដែលមានវិធានការនិងរក្សាសុវត្ថិភាពល្អបំផុត។

លោក ស៊ីន ចាន់សិរីវុត្ថា អ្នកនាំពាក្យអាកាសចរស៊ីវិលកម្ពុជាបានមានប្រសាសន៍ថា ការទទួលបានការវាយតម្លៃនេះគឺជាការលើកតម្កើងមុខមាត់អាកាសយានដ្ឋានអន្តរជាតិទាំង ៣ថា ជាអាកាសយានដ្ឋានមានសុវត្ថិភព។

ទន្ទឹមនេះ នាយកប្រតិបត្តិនៃក្រុមហ៊ុន Cambodia Airports ថ្លែងថា ក្រុមហ៊ុននៅតែរក្សាភាពស្មោះត្រង់ក្នុងនាមជាក្រុមហ៊ុនផ្តល់សេវាសាធារណៈដ៏សំខាន់មួយនៅព្រះរាជាណាចក្រកម្ពុជាតាមរយៈការផ្តល់អាទិភាពជាចម្បងទៅលើសុវត្ថិភាព ផ្នែកសុខភាពរបស់អ្នកធ្វើដំណើរ និងសម្រាប់អ្នកប្រើប្រាស់ក្នុងព្រលានយន្តហោះ។
វិធានការទាំងនោះរួមមាន ការលាងសម្អាត និងការបាញ់ថ្នាំសម្លាប់មេរោគ ការរក្សាគម្លាតសុវត្ថិភាព ការការពារ បុគ្គលិក ការកំណត់ទីតាំងឈរ ទំនាក់ទំនងរវាងអ្នកដំណើរ និងកន្លែងសម្រាប់អ្នកដំណើរ។

អគ្គនាយកក្រុមប្រឹក្សាព្រលានយន្តហោះអន្តរជាតិ (ACI) ប្រចាំតំបន់អាស៊ីប៉ាស៊ីហ្វ៊ិក លោក Stefano Baronci បានឱ្យដឹងថា សូមអបអរសាទរព្រលានយន្តហោះដំណើរការនៅទីក្រុងភ្នំពេញ ខេត្តសៀមរាប និង ខេត្តព្រះសីហនុ ដែលទទួលបាននូវការវាយតម្លៃទទួលស្គាល់ផ្នែកសុខភាពតាមព្រលានយន្តហោះពី ACI។

ជាការបញ្ជាក់ប្រាប់ទៅពិភពលោក និងសហគមន៍ ក្រុមហ៊ុនបម្រើសេវាកម្មនានាថា វិធានការផ្នែកសុខភាព ប្រកបដោយប្រសិទ្ធភាព ត្រូវបានដាក់ឱ្យអនុវត្តស្របទៅតាមស្តង់ដាខ្ពស់បំផុត តាមការណែនាំរបស់អង្គការ អាកាសចរណ៍ស៊ីវិលអន្តរជាតិ (ICAO)។

ព្រលាន យន្តហោះ ទាំង ៣ ស្ថិត នៅ ក្នុង ចំណោម ព្រលានយន្តហោះ នានា ក្នុង តំបន់ អាស៊ាន ដែល ទទួល បាន នូវ ការទទួល ស្គាល់ ដូច គ្នា នៅក្នុង ចង្កោម ព្រលាន យន្តហោះ ធំៗ ក្នុង តំបន់ ដូចជា នៅ ប្រទេស សិង្ហបុរី ទីក្រុង ហ្សាការតា និង ទីក្រុង ម៉ានីល៕

ដោយ ៖ រ៉ាណេត

ព្រះសីហនុ ៖ ផែនការមេសំខាន់ៗចំនួន៤ពាក់ព័ន្ធទៅនឹងការស្ថាបនាវិថី៧មករា ឬផ្លូវ២០០ ដែលស្ថិតនៅភូមិ៤ សង្កាត់លេខ៤ ក្រុងព្រះសីហនុ ខេត្តព្រះសីហនុ ចាប់ផ្តើមអនុវត្ត ដើម្បីគម្រោងអាចអនុវត្តទៅបានដោយរលូន និងលើកសោភ័ណភាពក្រុង បង្កភាពងាយស្រួលចរាចរណ៍។

ផែនការមេចំនួន៤សំខាន់ៗដែលពាក់ព័ន្ធទៅនឹងការស្ថាបនាវិថី៧មករា ត្រូវបានលោក គួច ចំរើន អភិបាលខេត្តព្រះសីហនុប្រកាសនៅព្រឹកថ្ងៃទី១ ខែធ្នូ ឆ្នាំ២០២០ ឱ្យអនុវត្តដើម្បីជំរុញ និងបង្ករភាពងាយស្រួលដល់ដំណើរការសាងសង់វិថី៧មករា ដែលមានទទឹង៤០ម៉ែត្រ ស្របតាមប្លង់ប្រព័ន្ធសុរិយោដី។

ផែនការស្ថាបនាវិថី៧មករា ឬផ្លូវលេខ២០០ ដែលស្ថិតនៅជុំវិញមន្ទីរពេទ្យបង្អែកខេត្តរួមមានការអភិវឌ្ឍន៍ហេដ្ឋារចនាសម្ព័ន្ធដើម្បីផលប្រយោជន៍សាធារណៈ, ការលើកកម្ពស់ការផ្តល់សេវាសុខាភិបាល និងសុខមាលភាពសាធារណៈ ការលុបបំបាត់ការយកទីតាំងសាធារណៈមកធ្វើអាជីវកម្ម និងជាសម្បត្តិឯកជន រួមជាមួយនឹងការលើកស្ទួយសោភ័ណ្ឌភាពទីក្រុង និងសុវត្ថិភាពសាធារណៈ។ល។

លោក គួច ចំរើន បានមានប្រសាសន៍ថា “ដើម្បីឱ្យដំណើរការគម្រោងស្ថាបនាវិថី៧មករា (ផ្លូវលេខ២០០) នេះទទួលបានជោគជ័យ រដ្ឋបាលខេត្តស្នើសុំកិច្ចសហការពីបងប្អូនប្រជាពលរដ្ឋដែលបានរស់នៅ និងកំពុងធ្វើការសាងសង់សំណង់មិនរៀបរយនៅលើដីចំណីផ្លូវ(ផ្លូវលេខ២០០)នេះ ធ្វើការរុះរើសំណង់របស់ខ្លួន និងប្រគល់ទីតាំងដីផ្លូវលេខ២០០នេះមកឱ្យរដ្ឋបាលខេត្តធ្វើការស្ថាបនាផ្លូវទៅតាមផែនការអភិវឌ្ឍន៍របស់ខេត្ត”។

គម្រោងស្ថាបនាវិថី៧មករា ឬផ្លូវលេខ២០០ នេះស្ថិតនៅក្នុងគម្រោងរួមនៃការសាងសង់ហេដ្ឋារចនាសម្ព័ន្ធនៅទូទាំងខេត្ត ដើម្បីធ្វើឱ្យល្អប្រសើរឡើង និងលើកកម្ពស់សោភ័ណភាពស័ក្ដិសមទៅនឹងប៉ូលសេដ្ឋកិច្ចសំខាន់របស់ប្រទេសជាតិក្នុងនាមជាមជ្ឈមណ្ឌលពាណិជ្ជកម្មទំនើបពហុបំណង។

អ្នកនាំពាក្យរដ្ឋបាលខេត្តព្រះសីហនុបានបញ្ជាក់ថា សកម្មភាពក្រុមការងារស្ថាបនានៅតែបន្តដោយមិនមានការឈប់សម្រាកនោះឡើយ ហើយនៅក្នុងរង្វង់ខែធ្នូ ឆ្នាំ២០២០នេះ នឹងរៀបចំចាក់កៅស៊ូគ្រប់ផ្លូវទាំង ៣៤ ខ្សែ ដែលនឹងឱ្យរួចរាល់នៅមុនឱកាសនៃពិធីបុណ្យចូលឆ្នាំថ្មីប្រពៃណីជាតិខ្មែរឆ្នាំ២០២១ នាពេលខាងមុខនេះ។

ក្រៅពីនេះ មានការបំពាក់កាមេរ៉ាសុវត្ថិភាព គូសគំនូសចរាចរណ៍ រៀបចំបន្ទប់អនាម័យនៅតាមតំបន់ឆ្នេរ ដើម្បីមានភាពងាយស្រួលក្នុងការគ្រប់គ្រងសភាពការណ៍ និងអនាម័យបរិស្ថានតំបន់ឆ្នេរឱ្យមានសោភ័ណភាព និងមានភាពងាយស្រួលសម្រាប់ប្រជាពលរដ្ឋ ភ្ញៀវទេសចរជាតិ និងអន្តរជាតិមកលេងកម្សាន្ត។

បច្ចុប្បន្ននេះ ការស្ថាបនាផ្លូវទាំង ៣៤ខ្សែ ដែលរាជរដ្ឋាភិបាល បានទម្លាក់កញ្ចប់ថវិកា ដើម្បីកែលម្អសោភ័ណភាព និងបរិស្ថានតំបន់ឆ្នេរក្រុងព្រះសីហនុ បាននិងកំពុងដំណើរការយ៉ាងមមាញឹក ទោះបីជាស្ថានភាព ជំងឺកូវីដ-១៩ កំពុងរីករាលដាលជាសកល ហើយព្រះរាជាណាចក្រកម្ពុជាក៏ ជួបបញ្ហាជំងឺនេះក៏ដោយ៕

ដោយ៖ ប៊ី
ភ្នំពេញៈ ផលិតផលថ្នាំលាប ថេមភល (Temple) ដែលជាផលិតផលបង្កើតឡើងដោយកូនស្នាដៃខ្មែរសុទ្ធសាធ ហើយកំពុងចរាចរណ៍នៅលើទីផ្សារកម្ពុជា កំពុងរួមចំណែកលើកកម្ពស់ផលិតផលខ្មែរ តាមរយៈការផលិតប្រកបដោយការយកចិត្តទុកដាក់លើគុណភាពសម្រាប់សម្រាប់អ្នកប្រើប្រាស់។

ផលិតផលនេះបានផលិតតាមរូមបន្តចុងក្រោយបង្អស់ នៃបច្ចេកវិទ្យាទំនើបរបស់ប្រទេសអាឡឺម៉ង់ ដែរមានភាពរឹងមាំ រលោង ជាងនេះទៅទៀតជាប្រភេទថ្នាំដែលធន់នឹងទឹក អាចលាងសម្អាតបាន ដើម្បីអោយផ្ទៃជញ្ជាំងទាំងមូល រក្សានូវភាពស្អាត និងរឹងមាំបានយូរអង្វែង គ្មានធាតុផ្សំ APEO ដែលបង្ករផលប៉ៈពាល់ទៅដល់ បរិស្ថាន អាចប្រើប្រាស់បាននៅក្នុងសំណង់ច្រើនប្រភេទ មានដូចជា បេតុង ជញ្ជាំងឥដ្ឋ ដែលបានបូកស៊ីម៉ង់ រួចជាស្រេច និង ម្នាងសិលា គ្រប់ប្រភេទ រួមទាំងពិដាន ឬប្រើប្រាស់សម្រាប់ការតុងតែងផ្សេងៗ ការពារជញ្ជាំងផ្នែកខាងក្នុងជាមួយនឹង សារធាតុផ្សំមូលដ្ឋានដ៏ទៃទៀតបាន។

លោកធួន ស៊ីណាន ប្រធានក្រុមហ៊ុន IMCT Co., Ltd បានថ្លែងប្រាប់ថា “យើងមានរោងចក្រនៅទីនេះ ដែលមានទីតាំងនៅផ្លូវ២០០៤ ហើយផលិតផលរបស់យើងដាក់ឱ្យចរាចរណ៍នៅលើទីផ្សាររយៈពេលពីបីរខែចុងក្រោយនេះ” ។ លោកបន្តថា “ផលិតផលរបស់យើងចរាចរនៅលើទីផ្សារយៈពេលខ្លីក្តី ប៉ុន្តែយើងទទួលបានការគ្រាំទ្រច្រើនពីអតិថិជន” ។

លោកបានបន្តថា “ក្រុមហ៊ុនយើងខ្ញុំបាន ទទួលការអនុញ្ញាតពីក្រសួងឧស្សាហកម្ម វិទ្យាសាស្ត្រ បច្ចេកទេស និងនវានុវត្តន៍ មានអនុញ្ញាតដំណើរការផលិតផល ថ្នាំលាបស្ពេត្រូជាចំបង”។

ក្រុមហ៊ុន បានឱ្យដឹងថា ការធានាលើគុណភាព ក្នុងរយៈពេល១០ឆ្នាំ តែត្រូវចាំបាច់អនុវត្តន៍អោយបានខ្ចាប់ខ្ជួន ទៅតាមបទដ្ឋានបច្ចេកទេស។

ថេមភល (Temple) ជាភាសាអន្តជាតិ ដែលបានន័យជាភាសាជាតិថា “ប្រាសាទ” ឬកន្លែងទីគោរពសក្ការៈ របស់មនុស្សនិងទេព្ដា។ ដើម្បីជាទីគោរពដឹងគុណដល់បុព្វបុរសខ្មែរ ដែលបានលះបង់សាច់ស្រស់ ឈាមស្រស់ បន្សល់ទុកស្នាដៃដ៏មហស្សចារ គ្មានពីរក្នុងលោក ក្រុមហ៊ុន IMCT Co., Ltd បានទទួលការអនុញ្ញាតិ ពីរាជរដ្ឋាភិបាលកម្ពុជា តាមរយៈក្រសួងពាណិជ្ជកម្ម និងក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ ដើម្បីបានប្រើឈ្មោះប្រាសាទអង្គរវត្ត ជាទីគោរពសក្ការៈ នៅក្នុងម៉ាកយីរហោ ផលិតផលថ្នាំលាប របស់ក្រុមហ៊ុន IMCT Co., Ltd ដែលជាផលិតផល បង្កើតឡើងដោយកូនខ្មែរសុទ្ធសាធ ដើម្បីទុកជាការតបស្នងសងគុណ នូវឧបការៈគុណ ចំពោះបុព្វបុរសខ្មែរ ដើម្បីឱ្យមនុស្សក្នុងលោកចងចាំនូវឈ្មោះប្រាសាទនានា ដែលជាកេរិ៍ដំណែលដូនតាខ្មែរយើង៕

ដោយគង់ សូរិយា

        ភ្នំពេញៈ ទោះបីកំពុងស្ថិតក្នុងវិបត្តិ ដោយសារការបាត់បង់ទេសចរណ៍ក្តី ប៉ុន្តែខេត្តសៀមរាប នៅតែបន្តទាក់ទាញគំរោងវិនិយោគធំៗៗជាច្រើន ពិសេសគំរោងអភិវឌ្ឍន៍របស់វិស័យឯកជននិងសាធារណៈ។

ខេត្តដែលពោរពេញដោយសក្តានុពលនេះ បាននិងកំពូងរៀបចំខ្លួនដើម្បីក្លាយជាទីក្រុងទំនើប និងរីកចម្រើនខ្លាំងនាពេលខាងមុខ ដោយសារគម្រោងអភិវឌ្ឍធំៗ៤ ពីស្ថាប័នរដ្ឋាភិបាល និងក្រុមហ៊ុនឯកជន។ ហេដ្ឋារចនាសម័ន្ធនឹងប្រសើរឡើង ជីវភាពប្រជាជនក្នុងស្រុកនឹងធូរធារ ហើយចំនួនភ្ញៀវទេសចរណ៍ នឹងកើនឡើងនាពេលខាងមុខនៅពេលវិស័យទេសចរត្រលប់មករកស្ថានភាពល្អវិញ។

គម្រោងស្ថាបនាផ្លូវ៣​៨​ខ្សែ  

សម្តេចតេជោហ៊ុន សែននាយករដ្ឋមន្រ្តីនៃកម្ពុជាកាលពីម្សិលម៉ិញ បានប្រកាសបើកការដ្ឋានស្ថាបនា និងកែលំអរផ្លូវចំនួន៣៨ខ្សែក្នុងក្រុងសៀមរាប បានបើកការដ្ឋានសាងសង់ជាផ្លូវការនៅព្រឹកថ្ងៃទី៣០ ខែ​វិច្ឆិកា ឆ្នាំ២០២០ ក្រោមអធិបតីភាពសម្តេចតេជោ​នាយករដ្ឋមន្រ្តី ហ៊ុន សែន។  ផ្លូវទាំង៣៨ខ្សែនេះមានប្រវែងជាង១០៨គីឡូ​ម៉ែត្រ គ្រោងប្រើប្រាស់​ថវិកាជាតិសរុបជាង១៤៩លានដុល្លារ។

តាម​ការគ្រោងទុក គម្រោងនេះនឹងបញ្ចប់ការសាងសង់នៅចុងឆ្នាំ២០២១។សម្តេ​ច​តេជោបានគូសបញ្ជាក់ថា ការ​​អភិវឌ្ឍហេដ្ឋារចនាសម័្ពន្ធទ្រង់ទ្រាយធំ​បែបនេះនឹងធ្វើឱ្យទីក្រុងសៀមរាបប្រែក្លាយរូបរាងជាទីក្រុងទំនើប និងទេសចរណ៍​ដ៏មាន​សក្តា​​នុពលដែលត្រូវបានកំណត់ជាតំបន់ស្នូលនៃប៉ូល​អភិ​វឌ្ឍ​ជាតិ។

គម្រោងកែលម្អផ្លូវនៅមុខប្រាសាទអង្គរវត្ត និងស្តារ-កែលម្អដងស្ទឹងសៀមរាប

គម្រោងកែលម្អផ្លូវចូល និងទីធ្លាមុខប្រាសាទអង្គរវត្ត ក្រោមការរៀបចំនិងដឹកនាំដោយអាជ្ញាធរជាតិអប្សារា ជិតបញ្ចប់ជាស្ថាពរមកដល់ពេលនេះ ដោយមានការរៀបចំសួនច្បារ ដាំដើមឈើប្រណិត និងឈើផ្កាព្រៃស្រស់បំព្រង។ គម្រោងកែលម្អនេះចាប់ផ្តើមនៅចុងឆ្នាំ២០១៩ ដើម្បីកែប្រែសោភ័ណ្ឌភាព នៅបរិវេណមុខប្រាសាទអង្គរវត្ត ឱ្យសក្ដិសមជាសម្បត្តិបេតិកភណ្ឌពិភពលោក។

ទន្ទឹមគ្នានេះ រដ្ឋាភិបាលក៏បានត្រៀមថវិកា៥លានដុល្លារ ដើម្បីស្តារនិងកែលម្អដង​ស្ទឹងសៀមរាប។ គម្រោងទាំងពីរនេះ នឹងជួយលើកកម្ពស់សោភ័ណភាពទីក្រុងសៀមរាប ដើម្បីបង្កើនភាពទាក់ទាញ ក៏ដូចជាត្រៀមស្វាគមន៍ នៃការមកដល់ភ្ញៀវទេសចរជាតិ និងអន្តរជាតិនាពេលខាងមុខ។

រមណីយដ្ឋានលំដាប់អន្តរជាតិតម្លៃ៣៥០លានដុល្លារ

ក្រុមហ៊ុនNaga Corp ​ចុះបញ្ជី​ក្នុង​ផ្សារ​ភាគហ៊ុន​ក្រុង​ហុងកុង ចេញសេចក្តីជូនដំណឹងមួយកាលពីថ្ងៃទី១៥ ខែវិច្ឆិកា ឆ្នាំ២០២០ ដោយបញ្ជាក់ថា ក្រុមហ៊ុនគ្រោងអភិវឌ្ឍរមណីយដ្ឋានលំដាប់អន្តរជាតិនៅខេត្តសៀមរាប ដោយមិនមានបញ្ចូលកាស៊ីណូនោះទេ។  គម្រោងនេះមានឈ្មោះថា «Angkor Lake of Wonder» គ្រប់ដណ្តប់លើផ្ទៃដី ៧៥ហិកតា ហើយគ្រោងចំណាយប្រមាណ៣៥០លានដុល្លារ ហើយគ្រោងបញ្ចប់ដំណាក់កាលដំបូងនៅឆ្នាំ២០២៥ ខាងមុខ។

ដំណាក់កាលដំបូង នៃគម្រោងអភិវឌ្ឍចម្រុះនេះមានដូចជា សួនទឹក សណ្ឋាគារលំដាប់ផ្កាយប្រាំ កន្លែងជិះទូកកម្សាន្ត (canal system)​ និងទីក្រុងចិន (Chinatown) ជាដើម។

គោលដៅទេសចរណ៍ថ្មីៗ

គោលដៅទេសចរណ៍ថ្មីចំនួន៤ធំៗបន្ថែមទៀតលើគោលដៅទេសចរណ៍២ ដែលមានស្រាប់ អាចនឹងត្រូវបានបង្កើតឡើង ដែលរួមមានតំបន់បឹងទន្លេសាប តំបន់ភ្នំគូលែន តំបន់បន្ទាយស្រី និងទីក្រុងសៀមរាបថ្មី។

ផែនការទាំងនេះ ត្រូវបានដាក់បញ្ចូលទៅក្នុងផែនការមេ អភិវឌ្ឍន៍ទេសចរណ៍ខេត្តសៀមរាប ដែលបច្ចុប្បន្នក្រសួងទេសចរណ៍ កំពុងរៀបចំកែសម្រួល ដើម្បីដាក់ឆ្លងរាជរដ្ឋាភិបាលពិនិត្យនិងអនុម័ត នៅពេលខាងមុខ ក្នុងគោលដៅទាក់ទាញភ្ញៀវទេសចរអន្តរជាតិឲ្យបានដល់៧លាននាក់ក្នុងមួយឆ្នាំ សម្រាប់ខេត្តសៀមរាបគិតចាប់ពីឆ្នាំ២០៣៥ទៅ។

គំរោងព្រលានយន្តហោះអន្តរជាតិថ្មី

ក្រុមហ៊ុនចិនបាននិងកំពុងសាងសង់ព្រលានយន្តហោះថ្មី ស្ថិតក្នុងស្រុកសូទ្រនិគម ខេត្តសៀមរាប ដែលព្រលានយន្តហោះថ្មីនេះ នឹងអាចអនុញ្ញាត្តឲ្យក្រុមហ៊ុនអាកាសចរណ៍ ហោះឆ្លងកាត់អន្តរទ្វីបអាចចុះចតបាន។ តាមផែនការគំរោងនេះ នឹងលើកកំពស់ការទាក់ទាញភ្ញៀវទេសចរណ៍ជាតិ អន្តរជាតិ និងការវិនិយោគកាន់តែច្រើនផងដែរ។

តាមផែនការព្រលានយន្តហោះអន្តរជាតិថ្មីនេះ នឹងបញ្ចប់ដំណាក់កាលទី១ និងដាក់​ឲ្យដំណើរការនៅឆ្នាំ២០២៣ខាងមុខនេះ។ ព្រលានយន្តហោះនេះត្រូវបានវវិនិយោគក្នុងទំហំទឹកប្រាក់ប្រមាណ៩០០លានដុល្លារអាមេរិក៕

ដោយ៖ រ៉ាណេត
ភ្នំពេញ៖ ទុនវិនិយោគសរុបជាង៥០លានដុល្លារទៅលើគម្រោងចំនួន១២ ត្រូវបានរដ្ឋាភិបាលកម្ពុជាសម្រេចអនុម័ត និងគាំទ្រ ទាំងស្រុងអនុញ្ញាតឱ្យមានដំណើរប្រតិបត្តិជាផ្លូវការ ដែលក្នុងភាគច្រើនស្ថិតនៅក្នុងវិស័យឧស្សាហកម្ម និងរោងចក្រកាត់ដេរសម្លៀកបំពាក់ ដែលបានផ្តល់ឱកាសការងាររាប់ពាន់កន្លែង។

ក្រុមទាំង១២ ដែលទទួលបានការអនុញ្ញាតពីរាជរដ្ឋាភិបាលកម្ពុជាតាមរយៈគណៈកម្មាធិការវិនិយោគកម្ពុជានៃក្រុមប្រឹក្សាអភិវឌ្ឍន៍កម្ពុជា និងបានសម្រេចចេញវិញ្ញាបនបត្រចុះបញ្ជីជាស្ថាពរមានឈ្មោះដូចខាងក្រោម៖

១- ក្រុមហ៊ុន “EAST GOLDEN PAPER INDUSTRY (CAMBODIA) CO., LTD” គម្រោងបង្កើតរោងចក្រផលិតកេសកាតុង និងប្រអប់ក្រដាសគ្រប់ប្រភេទ ដែលមានទីតាំងវិនិយោគស្ថិតនៅភូមិពាម សង្កាត់ព្រៃស ខណ្ឌដង្កោ រាជធានីភ្នំពេញ មានទុនវិនិយោគប្រមាណ ៣លានដុល្លារអាមេរិក និងអាចបង្កើតការងារបានចំនួន ២០២កន្លែង។

២- ក្រុមហ៊ុន “SHANDA (CAMBODIA) TEXTILE CO., LTD ” គម្រោងបង្កើតរោងចក្រកាត់ដេរ និងចាក់សម្លៀកបំពាក់ ដែលមានទីតាំងវិនិយោគស្ថិតនៅភូមិត្រពាំងឫស្សី ឃុំសូភី ស្រុកបាទី ខេត្តតាកែវ មានទុនវិនិយោគប្រមាណ ៣,៦លានដុល្លារអាមេរិក និងអាចបង្កើតការងារបានចំនួន ៩១៤កន្លែង។

៣- ក្រុមហ៊ុន “CHARMGO (CAMBODIA) CO., LTD” គម្រោងបង្កើតរោងចក្រផលិតកាបូបគ្រប់ប្រភេទ ដែលមានទីតាំងវិនិយោគស្ថិតនៅភូមិបុស្សតានៃ ឃុំកាហែង ស្រុកសំរោងទង ខេត្តកំពង់ស្ពឺ មានទុនវិនិយោគប្រមាណ ៥,៦លានដុល្លារអាមេរិក និងអាចបង្កើតការងារបានចំនួន ១.៥១៨កន្លែង។

៤- ក្រុមហ៊ុន “K R R PROCESSING FOOD CO., LTD.” ដែលជាគម្រោងបង្កើតរោងចក្រកែច្នៃផ្លែឈើ ដែលមានទីតាំងវិនិយោគស្ថិតនៅភូមិទី៣ ឃុំត្រែងត្រយឹង ស្រុកភ្នំស្រួច ខេត្តកំពង់ស្ពឺ មានទុនវិនិយោគប្រមាណ ៦,៣លានដុល្លារអាមេរិក និងអាចបង្កើតការងារបានចំនួន ៣៦២កន្លែង។

៥- ក្រុមហ៊ុន “ABLE POINT INDUSTRY CO.,LTD.”គម្រោងបង្កើតរោងចក្រផលិតសក់សិប្បនិម្មិត និងផលិតម៉ាស់ ដែលមានទីតាំងវិនិយោគស្ថិតនៅភូមិចាក់ជ្រូក សង្កាត់សំរោងក្រោម ខណ្ឌពោធិ៍សែនជ័យ រាជធានីភ្នំពេញ មានទុនវិនិយោគប្រមាណ ២,៣លានដុល្លារអាមេរិក និងអាចបង្កើតការងារបានចំនួន ២៤៦កន្លែង។

៦- ក្រុមហ៊ុន “LIAN FENG SHOES MATERIAL CO.,LTD.” គម្រោងបង្កើតរោងចក្រផលិតគ្រឿងបន្សំស្បែកជើង កាបូប និងសម្លៀកបំពាក់ ដែលមានទីតាំងវិនិយោគស្ថិតនៅភូមិអង្គរោង ឃុំមហាឫស្សី ស្រុកគងពិសី ខេត្តកំពង់ស្ពឺ មានទុនវិនិយោគប្រមាណ ២,១លានដុល្លារអាមេរិក និងអាចបង្កើតការងារបានចំនួន ២៩១កន្លែង។

៧- ក្រុមហ៊ុន “G4TEC PROPERTY & INVESTMENT CO.,LTD.”គម្រោងបង្កើតរោងចក្រផលិតស្រោមដៃ ដែលមានទីតាំងវិនិយោគស្ថិតនៅភូមិព្រៃពាយ ឃុំត្រពាំងភ្លាំង ស្រុកឈូក ខេត្តកំពត មានទុនវិនិយោគប្រមាណ ៣,៩លានដុល្លារអាមេរិក និងអាចបង្កើតការងារបានចំនួន ៥៧៩កន្លែង។

៨- ក្រុមហ៊ុន “ZHONG BAO (CAMBODIA) FOOD SCIENCE & TECHNOLOGY CO.,LTD.”គម្រោងបង្កើតរោងចក្រកែច្នៃផ្លែឈើគ្រប់ប្រភេទ ដែលមានទីតាំងវិនិយោគស្ថិតនៅភូមិវាលធំ (ទី៦) ឃុំត្រែងត្រយឹង ស្រុកភ្នំស្រួច ខេត្តកំពង់ស្ពឺ មានទុនវិនិយោគប្រមាណ ៥,១លានដុល្លារអាមេរិក និងអាចបង្កើតការងារបានចំនួន ១.២១៦កន្លែង។

៩- ក្រុមហ៊ុន “MING YUNG HUNG ENTERPRISE (CAMBODIA) CO.,LTD.”គម្រោងបង្កើតរោងចក្រផលិតអំពូលភ្លើង គ្រឿងបង្គុំអំពូលភ្លើង ខ្សែភ្លើង និងផលិតផលពីប្លាស្ទីកគ្រប់ប្រភេទ ដែលមានទីតាំងវិនិយោគស្ថិតនៅភូមិកន្ទោកជើង សង្កាត់កន្ទោក ខណ្ឌកំបូល រាជធានីភ្នំពេញ មានទុនវិនិយោគប្រមាណ ៥,៥លានដុល្លារអាមេរិក និងអាចបង្កើតការងារបានចំនួន ៥០៤កន្លែង។

១០-ក្រុមហ៊ុន “GAO LONG JIANG PLASTIC PIPE CO.,LTD.”គម្រោងបង្កើតរោងចក្រផលិតបំពង់ទីបជ័រ និងទុយោជ័រគ្រប់ប្រភេទ ដែលមានទីតាំងវិនិយោគស្ថិតនៅផ្លូវជាតិលេខ២១ ភូមិទួលក្រសាំង សង្កាត់រកាខ្ពស់ ក្រុងតាខ្មៅ ខេត្តកណ្តាល មានទុនវិនិយោគប្រមាណ ៧,៤លានដុល្លារអាមេរិក និងអាចបង្កើតការងារបានចំនួន ១៧៩កន្លែង។

១១- ក្រុមហ៊ុន SEAN ZORINA FASHION (CAMBODIA) CO., LTD. គម្រោងកាត់ដេរសម្លៀកបំពាក់ ដែលមានទីតាំងវិនិយោគស្ថិតនៅភូមិថ្នល់ទទឹង ឃុំដំណាក់អំពិល ស្រុកអង្គស្នួល ខេត្តកណ្តាល មានទុនវិនិយោគប្រមាណ ៣លានដុល្លារអាមេរិក និងអាចបង្កើតការងារបានចំនួន ៦៧៣កន្លែង។

១២. ក្រុមហ៊ុន HARMONY APPAREL CO., LTD. គម្រោងកាត់ដេរសម្លៀកបំពាក់ ដែលមានទីតាំងវិនិយោគស្ថិតនៅភូមិចំការឪឡឹក សង្កាត់កាកាប២ ខណ្ឌពោធិ៍សែនជ័យ រាជធានីភ្នំពេញ មានទុនវិនិយោគប្រមាណ ២,៨លានដុល្លារអាមេរិក និងអាចបង្កើតការងារបានចំនួន ៧៨៤កន្លែង៕

ដោយ ៖ រ៉ាណេត
ព្រះសីហនុ ៖ ក្រុមហ៊ុនអាមេរិកជាច្រើន បាននិងកំពុងសិក្សាពីសក្ដានុព និងឱកាសចូលមកវិនិយោគនៅក្នុងខេត្តព្រះសីហនុ ដែលក្នុងនោះវិស័យទេសចរណ៍ និងការអភិវឌ្ឍលើវិស័យហេដ្ឋារចនាសម្ព័ន្ធស្ថិតនៅចំណុចអាទិភាព។

អនុប្រធានផ្នែកបេសកកម្ម នៃស្ថានទូតសហរដ្ឋអាមេរិកប្រចាំព្រះរាជាណាចក្រកម្ពុជា លោក Benjamin Wohlauesនៅល្ងាចថ្ងៃទី៣០ ខែវិច្ឆិកា ឆ្នាំ២០២០ម្សិលមិញនេះ នៅក្នុងឱកាសចូលជួបសម្ដែងការគួរសម និងពិភាក្សាការងារជាមួយអភិបាលខេត្តព្រះសីហនុ បានបង្ហាញពីការកោតសរសើរពីភាពរីកចម្រើនយ៉ាងឆាប់រហ័សរបស់ខេត្តព្រះសីហនុ ជាពិសេសភាពរីកចម្រើនផ្នែកហេដ្ឋារចនាសម្ព័ន្ធ និងសំណង់អាគារពាណិជ្ជកម្មធំៗ។

លោក លោក Benjamin Wohlaues ក៏បានបង្ហាញពីគោលបំណងចម្បងក្នុងការសិក្សាស្វែងយល់ពីសក្ដានុពលសំខាន់ៗរបស់ខេត្តព្រះសីហនុ ដើម្បីផ្សព្វផ្សាយទៅកាន់បណ្តាក្រុមហ៊ុនអាមេរិកជាច្រើនដែលកំពុងតែមានបំណងចូលមកបណ្តាក់ទុនវិនិយោគនៅក្នុងប្រទេសកម្ពុជា ជាពិសេសខេត្តព្រះសីហនុដែលជាគោលដៅពិសេសរបស់ពួកគេ។

លោក គួច ចំរើន អភិបាលខេត្តព្រះសីហនុ បានមានប្រសាសន៍ថា ក្នុងឆ្នាំ២០២០នេះ រដ្ឋបាលខេត្តបានជួបមន្ត្រីទូតសហរដ្ឋអាមេរិកចំនួន៤លើករួចមកហើយ ដោយក្នុងនោះសុទ្ធតែមានគោលបំណងចង់ស្វែងយល់ម្អិតពីសក្ដានុពលរបស់ខេត្តព្រះសីហនុ។

លោកអភិបាលបានបន្តថា ខេត្តព្រះសីហនុ មានហេដ្ឋារចនា សម្ព័ន្ធផ្លូវថ្នល់ ឆ្នេរសមុទ្រប្រវែង ១៧៥គីឡូម៉ែត្រ កោះ ៣២ កំពង់ផែអន្តរជាតិទឹកជ្រៅសម្រាប់ការដឹកជញ្ជូនទំនិញនាំចេញ-ចូល ជាង ៧០ភាគ រយទូទាំងប្រទេស ។ បច្ចុប្បន្នដោយមានការគាំទ្រពីរដ្ឋាភិ បាលជប៉ុន កំពុងកសាង និងអភិវឌ្ឍន៍កំពង់ផែឆ្នាំ២០២០ ដល់ ២០២៥ ជំហានទី១ អាចឱ្យនាវាជំរៅទឹក ៩.៥០ ម៉ែត្រចូលចត ជំហានទី២ អាចឱ្យនាវាជំរៅទឹក ១៣ម៉ែត្រ និងបន្តទៅជំហានទី៣ និងទី៤ ពីឆ្នាំ២០២៥ កសាងកំពង់ផែទឹកជ្រៅអាចឱ្យនាវាមានជំរៅទឹកជ្រៅចូលចត ដើម្បីកាត់បន្ថយថ្លៃដឹកជញ្ជូនតាមផ្លូវសមុទ្រ និងមានព្រលានយន្តហោះអន្តរជាតិមានផ្លូវរត់ ៣,២០០ម៉ែត្រ ដែលអាចឱ្យយន្តហោះប្រភេទធំ ចុះចតបាន និងបន្តពង្រីកបន្ទប់រង់ចាំ ។

រាជរដ្ឋាភិបាលបានកសាងផ្លូវល្បឿនលឿនពីភ្នំពេញ-ខេត្តព្រះសីហនុ ដែលបើកកាដ្ឋានសាង សង់កាលពីពាក់កណ្តាលឆ្នាំ២០១៩ និងគ្រោងបញ្ចប់នៅចុងឆ្នាំ២០២២ខាងមុខ ជួយកាត់បន្ថយការកកស្ទះ និងពេលវេលា ខេត្តមានផ្លូវដែក មិនទាន់មានក្រុមហ៊ុន ឬអ្នកវិនិយោគលើផ្លូវដែក។ តាមរយៈមន្ត្រីស្ថានទូតសហរដ្ឋអាមេរិក ក៏ដូចជាអ្នកតំណាងវិស័យពាណិជ្ជកម្មអាមេរិក នឹងកៀរគរអ្នកវិនិយោគ និងធុរកិច្ចជនជាតិអាមេរិកមកកាន់ខេត្តព្រះសីហនុ ដើម្បីធ្វើការនាំទំនិញចូលទៅអាមេរិកកាន់តែច្រើនថែមទៀត ព្រោះខេត្តព្រះ សីហនុមានសក្តានុពលឆ្នេរ កោះ ភ្នំ ជាឱកាសល្អសម្រាប់អ្នកវិនិយោគលើវិស័យទេសចរណ៍ និងវាយភណ្ឌ៕