គេហទំព័រPropertyarea.asiaនឹងចាប់ផ្តើមផ្សព្វផ្សាយពីច្បាប់និងស្លាកសញ្ញាចរាចរណ៍ចាប់ពីខែកុម្ភៈខាងមុខនេះ

        ដោយស៊ីវ ម៉េង

        ភ្នំពេញៈ ក្នុងគោលដៅបង្កើនការយល់ដឹងដល់ប្រជាពលរដ្ឋ និងអប់រំទាក់ទងនឹងច្បាប់ចរាចរណ៍ផ្លូវគោក គេហទំព័រPropertyarea.asia នឹងចូលរួមជាមួយរដ្ឋាភិបាល ដោយនឹងចាប់ផ្តើមផ្សព្វផ្សាយច្បាប់ និងស្លាកសញ្ញាចរាចរណ៍ចាប់ពីខែខែកុម្ភៈខាងមុខតទៅ។

សហស្ថាបនិកនិងជាអគ្គនាយកនៃគេហទំព័រPropertyarea.asia និងគេហទំព័រCambodiafinancialtimes.com លោកយិន លាងគង់បានមានប្រសាសន៍ថា ការធ្វើចរាចរណ៍របស់ប្រជាពលរដ្ឋកម្ពុជា នៅតែប្រឈមមុខនឹងបញ្ហាដ៏ធំមួយ ដែលអត្រាគ្រោះថ្នាក់ និងស្លាប់បានកើតមានលើដងផ្លូវជារៀងរាល់ថ្ងៃ ដែលជាមធ្យមអត្រាស្លាប់មានចំនួន៥នាក់ក្នុងមួយថ្ងៃ​។ អត្រាមរណៈភាពនេះ បានឈានមុខលើជំងឺនានា វាជាឃាតករស្ងៀមស្ងាត់លើដងផ្លូវ ដែលមនុស្សភាគច្រើនមិនបានយកចិត្តទុកដាក។

លោកបន្តថា “ខ្ញុំគាំទ្រប្រសាសន៍សម្តេចតេជោនាយករដ្ឋមន្រ្តីនៃកម្ពុជា ដែលធ្លាប់បានមានប្រសាសន៍ថា គ្រោះថ្នាក់ចរាចរណ៍លើដងផ្លូវ បានធ្វើឲ្យមនុស្សស្លាប់ច្រើនជាងពេលមានសង្រ្គាម”។លោកបន្តថា “ជំងឺនានាដូចជាជំងែកូវីដ១៩ មិនបានសម្លាប់ប្រជាជន​កម្ពុជាទេ ប៉ុន្តែប្រជាជនកម្ពុជាមានភាពភ័យខ្លាច និងតក់ស្លុត ហើយបើប្រជាជនខ្លាចគ្រោះថ្នាក់លើដងផ្លូវដូចខ្លាចជំងឺកូវីដ១៩ អត្រាគ្រោះថ្នាក់ចរាចរណ៍នឹងត្រូវកាត់បន្ថយនៅកម្ពុជា”។

តាមការសិក្សារបស់អង្គការក្រៅរដ្ឋាភិបាលបានបង្ហាញថា អត្រាគ្រោះថ្នាក់ចរាចរ ណ៍ភាគច្រើនបង្កឡើងដោយមនុស្ស បច្ចេកទេសយានយន្ត និងបញ្ហាផ្សេងៗទៀត។

លោកយិន លាងគង់បានបន្តថា បច្ចុប្បន្នប្រជាពលរដ្ឋមួយចំនួន ដែលបានបើកបរយានយន្តលើដងផ្លូវ មិនបានឆ្លងកាត់សាលាបើកបរនោះទេ ហើយសាលាបង្រៀនបើកបរមួយចំនួន ក៏មិនបានបំពាក់បំប៉នគ្រូរបស់ខ្លួនពីច្បាប់ចរាចរណ៍ឡើយ។ ករណីបែបនេះបានធ្វើឲ្យមានការបំពានលើសិទ្ឋអាទិភាព បំពានភ្លើងសញ្ញាចរាចរណ៍ និងស្លាកសញ្ញាចរាចរណ៍ជាដើម ខណៈមន្រ្តីប៉ូលីសចរាចរណ៍បាន និងកំពុងខិតខំបំពេញការងារយ៉ាងសកម្មលើដងផ្លូវ ដើម្បីផាកពិភ័យ ជាជាងអប់រំប្រជាពលរដ្ឋ៕

កម្ពុជា-ហុង​គ្រី​នឹង​ចុះហត្ថលេខា​លើ​ការជំរុញ​ការ​អភិ​វ​ឌ្ឃ​សេដ្ឋកិច្ច​នៅ​រសៀល​ថ្ងៃនេះ

ដោយ: គង់ សូរិយា

ភ្នំពេញ: មន្ត្រីជាន់ខ្ពស់​ក្រសួងពាណិជ្ជកម្ម និង​មន្ត្រីជាន់ខ្ពស់​ហុង​គ្រី​នឹង​ចុះ​កិច្ចព្រមព្រៀង​លើ​កិច្ចសហប្រតិបត្តិការ​ទ្វេរ​ភាគី ដើម្បី​ពង្រឹង​និង​ជំរុញ​ការអភិវឌ្ឍ​សេដ្ឋកិច្ច​រវាង​ប្រទេស​ទាំងពីរ។

ពិធី​ចុះហត្ថលេខា​នេះ នឹងធ្វើ​នៅ​រសៀល​ថ្ងៃ​ព្រហស្បតិ៍ ទី២១ ខែមករា ដោយមាន​ការចូលរួម​ជា​អធិបតី ពី​លោកស្រី តឹក​រ៉េត កំរង រដ្ឋលេខាធិការ​ក្រសួងពាណិជ្ជកម្ម​កម្ពុជា និង​លោក អ៊ី​ស្វាន់ ចូ (István Joó) អនុរដ្ឋមន្ត្រី​ទទួលបន្ទុក​វិស័យ​អភិវឌ្ឍ​ការនាំចេញ នៃ​ក្រសួងការបរទេស​និង​ពាណិជ្ជកម្ម​ហុង​គ្រី នឹង​បើក​កិច្ចប្រជុំ​ដើម្បី​ជំរុញ​ការអនុវត្ត​កិច្ចព្រមព្រៀង និង​អនុស្សារណៈ​ដែល​បាន​ចុះហត្ថលេខា​កន្លងមក។

ក្រោយ​ចប់​កិច្ចប្រជុំ​លើក​ទី១ គណៈកម្មការ​ចម្រុះ​នៃ​កិច្ចសហប្រតិបត្តិការ លើ​វិស័យ​សេដ្ឋកិច្ចកម្ពុជា-ហុង​គ្រី ក្រសួងពាណិជ្ជកម្ម​បាន​ឱ្យដឹងថា កិច្ចប្រជុំ​កម្រិត​បច្ចេកទេស​ត្រៀម សម្រាប់​កិច្ចប្រជុំ​លើក​ទី១ កាលពី​សៀ​ល​ថ្ងៃទី២០ ខែមករា ឆ្នាំ២០២១កន្លងទៅ តាមរយៈ​ប្រព័ន្ធ​វីដេអូ (Virtual Conference) ក្រោម​ការដឹកនាំ​របស់​លោក ប៉ែន សុ​វិជាតិ អនុរដ្ឋលេខាធិការ​ក្រសួងពាណិជ្ជកម្ម​កម្ពុជា តំណាង​គណៈប្រតិភូ​កម្ពុជា និង​លោកស្រី​បណ្ឌិត Judit Pekári-Vékei ប្រធាន​នាយកដ្ឋាន​ទទួលបន្ទុក​គណៈកម្មកា​រ​សេដ្ឋកិច្ច​ចម្រុះ នៃ​ក្រសួងការបរទេស​និង​ពាណិជ្ជកម្ម​ហុង​គ្រី តំណាង​គណៈប្រតិភូ​ហុង​គ្រី ភាគី​ទាំង​ពីរបាន​ឯកភាព​លើ​ខ្លឹមសារ សេចក្តីព្រាង​កំណត់ហេតុ​រួម​នៃ​កិច្ចប្រជុំ​លើក​ទី១ ហើយ​កំណត់ហេតុ​រួម​នៃ​កិច្ចប្រជុំ​នេះ នឹងត្រូវ​ចុះហត្ថលេខា​ក្នុង​កិច្ចប្រជុំ​លើក​ទី១ នា​រសៀល​ថ្ងៃទី២១នេះ។

នៅក្នុង​កិច្ចប្រជុំ​នេះ ភាគី​កម្ពុជា​និង​ភាគី​ហុង​គ្រី បាន​ពិភាក្សា​លើ​សេចក្តីព្រាង​កំណត់ហេតុ​រួម នៃ​កិច្ចប្រជុំ​លើក​ទី១ គណៈកម្មការ​ចម្រុះ​នៃ​កិច្ចសហប្រតិបត្តិការ វិស័យសេដ្ឋកិច្ច​កម្ពុជា-ហុង​គ្រី។

តាមរយៈ​កិច្ចប្រជុំ​នេះដែរ ភាគី​ទាំង​ពីរបាន​ឯកភាព​ពង្រីក កិច្ចសហប្រតិបត្តិការ​លើ​វិស័យ​សក្តានុពលសំខាន់ៗរួមមាន ពាណិជ្ជកម្ម និង​សេដ្ឋកិច្ច កសិកម្ម សន្តិសុខ​ស្បៀង និង​រុក្ខាប្រមាញ់ វិស័យ​គ្រប់គ្រង​ធនធានទឹក អប់រំ យុវជន​និង​កីឡា វប្បធម៌ ទេសចរណ៍ ឧស្សាហកម្ម បច្ចេកវិទ្យា​និង​នវានុវត្តន៍ និង​អាកាសចរ​ស៊ីវិល៕

វិភាគ៖ ហេតុអ្វី​បានជា​វិស័យ​ធនាគារ​កម្ពុជា​នៅតែ​រក្សាសុខ​ភាពល្អប្រសើ​រ ទោះ​ស្ថិតក្នុង​អំឡុងពេល​មាន​វិបត្តិ?

ដោយៈ ប៊ី

ភ្នំពេញៈ បណ្តា​ស្ថាប័នហិរញ្ញវត្ថុ (ធនាគារ) ជាច្រើន បាននិងកំពុង​ពង្រីក​វត្តមាន​របស់ខ្លួន​នៅ​កម្ពុជា ដោយ​ផ្តល់​សេវា​ហិរញ្ញវត្ថុខុសៗគ្នា​ដល់​អតិថិជន ខណៈ​ធនាគារ និង​ស្ថាប័ន​មីក្រូហិរញ្ញវត្ថុ នៅតែ​មានឱកាស​ជាច្រើន ក្នុងនាម​ជា​អ្នកផ្តល់​សេវា​ហិរញ្ញវត្ថុ​នៅ​កម្ពុជា ព្រោះ​កម្ពុជា​មិនទាន់មាន​ការអភិវឌ្ឍ​វិស័យ​ហិរញ្ញវត្ថុ​គ្រប់គ្រាន់​នៅឡើយ។

វិស័យ​ធនាគារ​នៅ​កម្ពុជា នៅតែ​បន្ត​មាន​វឌ្ឍនភាព ប្រកបដោយ​ទំនុកចិត្ត និង​បានរួម​ចំណែក​យ៉ាងសកម្ម គាំទ្រ​សកម្មភាព​សេដ្ឋកិច្ច ដែល​ធ្វើឱ្យមាន​កំណើន​វិនិយោគ​ក្នុងការ​បង្កើត​ធនាគារ និង​គ្រឹះស្ថាន​ហិរញ្ញវត្ថុ​ជាច្រើន​នៅក្នុង​ប្រទេស។

កម្ពុ​ជាមាន​គ្រឹះស្ថាន​ធនាគារ​និង​ហិរញ្ញវត្ថុ រួមមាន ធនាគារពាណិជ្ជ​ចំនួន៥១ ធនាគារ​ឯកទេស​ចំនួន១៤ គ្រឹះស្ថាន​មីក្រូហិរញ្ញវត្ថុ​ទទួល​ប្រាក់​បញ្ញើ ពី​សាធារណជន​ចំនួន៦ គ្រឹះស្ថាន​មីក្រូហិរញ្ញវត្ថុ មិន​ទទួល​ប្រាក់​បញ្ញើ​ចំនួន៧៦ និង​គ្រឹះស្ថាន​ឥណទាន​ជនបទ​ចំនួន២៤៦រហូតមកដល់​បច្ចុប្បន្ន​នេះ។ នេះ​បើ​យោងតាម​របាយការណ៍រ​បស់​ធនាគារជាតិ​នៃ​កម្ពុជា។

បណ្តាញ​ប្រតិបត្តិការ និង​សេវា​ហិរញ្ញវត្ថុ​បាន​អភិវឌ្ឍ​ជា​បន្តបន្ទាប់ ដោយ​ចំនួន​ទីស្នាក់ការ និង​សាខា​គ្រឹះស្ថាន​ធនាគារ និង​ហិរញ្ញវត្ថុ​នៅ​ទូទាំងប្រទេស​បាន​កើន​ដល់២.៤៦៥ ហើយ​ម៉ាស៊ីន​ដក និង​ដាក់​ប្រាក់​ស្វ័យប្រវត្តិ (ATM) មាន​ចំនួន៣,០៨១ គណនី​ប្រាក់​បញ្ញើ​អតិថិជន កើន​ដល់៨.២លាន​គណនី និង​គណនី​ឥណទាន​កើន​ដល់៣.២លាន​គណនី។

ធនាគារជាតិ​នៃ​កម្ពុជា​បានឱ្យដឹងថា ស្ថាប័ន​នេះ​បាន​ប្រឹងប្រែង​យ៉ាងខ្លាំង ក្នុងការ​ត្រួតពិនិត្យ​សុខមាលភាព របស់​គ្រឹះស្ថាន​ធនាគារ និង​ហិរញ្ញវត្ថុ និង​ការអនុវត្ត​ច្បាប់ និង​បទ​ប្បញ្ញត្តិ។ ជា​លទ្ធផល​វិស័យ​ធនាគារ និង​ហិរញ្ញវត្ថុ​ស្ថិតក្នុង​ស្ថាន​ភាពល្អ។

ការឆ្លើយតប​នឹង​វិបត្តិ​បច្ចុប្បន្ន

គ្រឹះស្ថាន​ធនាគារ និង​គ្រឹះស្ថាន​មីក្រូហិរញ្ញវត្ថុ បាន​បន្ធូរបន្ថយ និង​បញ្ចុះ​អត្រា​ការប្រាក់​កម្ចី​ទាប ដល់​អ្នកប្រើប្រាស់​កម្ចី ដើម្បី​ឆ្លើយតប​នឹង​វិបត្តិ ដែល​កំពុង​កើតមាន។

ការពន្យា​ទាមទារ​នូវ​ដើមទុន​ត្រលប់(ការសង​ត្រលប់) ការបន្ធូរបន្ថយ​ទុនបម្រុង​ជាការ​ខិតខំ​របស់​រដ្ឋា​ភិ​បាល ដោយ​ក្រសួង​សេដ្ឋកិច្ច និង​ហិរញ្ញវត្ថុ តាមរយៈ​អគ្គនាយក​ពន្ធដារ បាន​បន្ធូរបន្ថយ​លើ​ពន្ធ​កាត់​ទុក​លើ​ប្រាក់កម្ចី​ពី​បរទេស ធ្វើឱ្យ​ប្រភព​ទុន​ក្នុងស្រុក​សម្បូរ ដែល​អាច​យកមកប្រើ​ប្រាស់​បាន ហើយ​កំណើន​ឥណទាន ក៏​មិនសូវ​ខ្ពស់​ដែរ ដោយសារ​អាជីវកម្ម​ច្រើន បាននិងកំពុង​រង​ផលប៉ះពាល់​ដោយសារ​កូ​វីដ១៩ ។

ដូច្នេះហើយ បានជា​គ្រឹះស្ថាន​ធនាគារ និង​គ្រឹះស្ថាន​មីក្រូហិរញ្ញវត្ថុ បាន​បញ្ចុះ​អត្រា​ការប្រាក់​កម្ចី​ទាប ដែល​យើង​និយាយ​ជាទូទៅ ទាប​ក្រោម៧ភាគរយ ធ្វើឱ្យមាន​ការប្រកួតប្រជែង​ក្នុងតម្លៃ (price competition) ដូច្នេះហើយ​ផលប្រយោជន៍ នឹង​បាន​ទៅ​អ្នកប្រើប្រាស់​កម្ចី​ពី​ប្រកួតប្រជែង​នេះ ដូចជា ប្រភព​ទុន​ដែលមាន​អត្រា​ការប្រាក់​ទាប ហើយ​អ្នកប្រើប្រាស់​កម្ចី​អាច​ប្រើប្រាស់​បាន​រយៈពេល​វែង។

ធនាគារ និង​គ្រឹ​ស្ថាន​ហិរញ្ញវត្ថុ ក៏មាន​ការយោគយល់ សម្រាប់​ការរួមរស់​និង​រីកចម្រើន​ជាមួយនឹង​អតិថិជន។ ស្រប​ពេលដែល រាជរដ្ឋាភិបាល​បាន​បន្ធូរបន្ថយ​អនុ​បាត​ខ្លះ ដើម្បី​ឱ្យមាន​ប្រភព​ទុន​ទូលំទូលាយ ហើយ​ធនាគារ​ធ្វើជា​មួយ​អា​តិ​ថិ​ជន​យូរអង្វែង ដោយ​ធនាគារ​ផ្ទាល់ ក៏បាន​បន្ធូរបន្ថយ​ដែរ ដោយ​បន្ធូរបន្ថយ​ទាំង​អត្រា​ការប្រាក់​កម្ចី និង​រយៈពេល​សង ដើម្បីឱ្យ​អតិថិជន​មាន​ពេល​គ្រប់គ្រាន់ ក្នុង​ការយក​មូលនិធិ​នេះ ទៅប្រើ​ប្រាស់   ឱ្យបាន​យូរអង្វែង​សម្រាប់​គ្រប់​វិស័យ​ទាំងអស់។

ជាទូទៅ​នៅពេល​មាន​សកម្មភាព​សេដ្ឋកិច្ច​ខ្លាំង មូលនិធិ​របស់​ប្រជាពលរដ្ឋ គាត់​យកទៅ​វិនិយោគ​អស់ហើយ ប៉ុន្តែ​ពេល​មាន​ចលនា​សេដ្ឋកិច្ច​តិច គាត់​យក​មូលនិធិ​មក​ផ្ញើ​នៅ​ធនាគារ ធ្វើឱ្យ​ប្រភព​ទុន​នៅ​ស្រុក​មាន​ច្រើន ដូចជា ប្រាក់​សន្សំ​ដែលមាន​កាលកំណត់។

ថ្វីត្បិតតែ​មាន​ប្រភព​ទុន​ក្នុងស្រុក​ក៏ដោយ ក៏​យើង​ទៅ​តែ​យក​ពី​បរទេស ដែល​កម្ចី​ពី​បរទេស​មាន​រយៈពេលរ​ហូត​ទៅ៥ ទៅ៧ឆ្នាំ ដើម្បី​យកមក​ឆ្លើយតប​ជាមួយនឹង​តម្រូវការ​ឥណទាន​របស់​វិស័យ SME ដែល​គាត់​ត្រូវការ៥ទៅ៧ឆ្នាំ​ដែរ ដើម្បី​ជៀសវាង​អតុល្យភាព​នៃ​មូលនិធិ ដូច្នេះ​បានជា​យើង​យកមក​ពី​ក្រៅ​មក​បន្ថែម។

ក្នុង​ប្រភព​ទុន ដែល​ប្រើប្រាស់​ក្នុង​វិស័យ​ធនាគារ១៥ភាគរយ បានមកពី​ដើមទុន​របស់​ខ្លួនឯង ១៥ភាគរយ​ទៀត​បានមក​កម្ចី​ពី​បរទេស និង៧០ភាគរយ​គឺ​បានមកពី​ប្រាក់​បញ្ញើ​សន្សំ។

ប្រទេស​កម្ពុជា​គឺជា​ចំណែក​មួយ​នៃ​សេដ្ឋកិច្ច​សកល។ បើសិន​សេដ្ឋកិច្ច​សកល​មាន​ផលប៉ះពាល់​យូរ យើង​ក៏​ដូចគ្នា​ដែរ។

ធនាគារជាតិ និង​ក្រសួង​ពាក់ព័ន្ធ ដឹង​ពី​ស្ថានភាព​ដូចគ្នា ហើយ​កំណើនសេដ្ឋកិច្ច​វិល​មករក​ភាព​ធម្មតា​បន្តិចម្តងៗ ដូច្នេះ​ការណ៍​ដែល​យើង​សម្រួល ដល់​អតិថិជន​គឺមាន​រយៈពេល​វែង​ដូចគ្នា ដើម្បីឱ្យ​អតិថិជន​មាន​ពេល​គ្រប់គ្រាន់។

ប្រតិបត្តិ​ករ​ក្នុង​វិស័យនេះ បានលើកឡើង​ជា​ឧទាហរណ៍​ថា ឥណទាន​យើង​ឱ្យ​គាត់​មាន​រយៈពេល​វែង៧ឆ្នាំ ហើយ​ដល់ពេល​ស្ថានភាព​ស្រួល​ឡើងវិញ យើង​មិន​សុំឱ្យ​អតិថិជន​សង​ក្នុង​រយៈពេល៥ឆ្នាំ​នោះទេ។ យើង​នៅតែ​រក្សា​កិច្ចសន្យា​ជាមួយ​ពួកគាត់​ដដែល អត្រា​ប្រាក់​ដូចគ្នា​ចឹ​ង​ដែរ កាល​យើង​ព្រមព្រៀងគ្នា​ក្នុង​រយៈពេល៧ឆ្នាំ គឺ​យើង​អត់​កែ​មកវិញ​នោះទេ។ យើង​រួមរស់​រីកចម្រើន​ចម្រើន​ជាមួយ​អតិថិ​របស់​យើង។

ចំពោះ​អាជីវករ​ខ្នាតតូច​ក្នុងស្រុក មាន​ភាពល្អប្រសើរ​ជាង​មុន​ដែរ។ តែ​យ៉ាងណាក្តី ផលប៉ះពាល់​ពី​កូ​វីដ១៩ នៅតែមាន​សម្រាប់​វិស័យ​មួយចំនួន ដែល​មិនទាន់​អាច​ស្តារឡើងវិញ​បាន​នៅឡើយ​ទេ ទោះបីជា​បញ្ហា​កូ​វីដ១៩មាន​ភាព​ធូរស្បើយ​ក្តី។

សម្រាប់​ឆ្នាំ២០២១ទាំងមូល វិស័យ​ហិរញ្ញវត្ថុ​ក្នុងស្រុក នៅតែមាន​បង្ហាញ​វិជ្ជមាន ថ្វីត្បិតតែ​ជួប​ការលំបាក​ជួបប្រទះ​ក៏ដោយ។

ដោយសារ​រដ្ឋាភិបាល​ក​ម្ពុ​ជា បាន​គ្រប់គ្រង​បញ្ហា​កូ​វីដ១៩បានល្អ​ប្រសើរ មិនមាន​ការបិទ​ប្រទេស ឬមួយ​ក៏​ត្រឡប់​ដើរ​វិញ ហើយ​ប្រជាជន​យើង​ក៏​នៅតែ​ប្រក​បរបរ​ធ្វើដំណើរ​ធម្មតា។

លោក​ឧកញ៉ា​ហួត អៀង​តុង អគ្គនាយក​ធនាគារ​ហ​ត្ថា​បាន​មានប្រសាសន៍​ឲ្យ​ដឹង​កាលពីពេលថ្មីៗនេះ​ថា សុខភាព​ក្នុង​វិស័យ​ហិរញ្ញវត្ថុ នៅតែមាន​ភាពល្អប្រសើរ​និង​កំនើន​រ៉ឹង​មាំ បើទោះបីជា​កម្រិត​បំណុល​សង​ត្រលប់់​យឺត​បាន​កើនឡើង​ក្តី ប៉ុន្តែ​វា​ស្ថិតក្នុង​កម្រិត​មួយ ដែល​អាច​គ្រប់គ្រង​បាន។

លោក​បន្តថា “ការគាំទ្រ​ពី​ធនាគារជាតិ និង​គោលនយោបាយ​នានា​របស់​រដ្ឋាភិបាល បាន​ជួយ​ឲ្យ​វិស័យនេះ​នៅតែមាន​ភាព​សុខភាព​ល្អប្រសើរ និង​បន្ត​រីកចម្រើន​ខ្លាំង​បន្តទៀត​នា​បណ្តា​ឆ្នាំ​ខាងមុខ” ។

សេដ្ឋវិទូ​កម្ពុជា លោក​បណ្ឌិត​ម៉ី កល្យាណ​បាន​មានប្រសាសន៍ថា ចំណាត់ការ​របស់​រដ្ឋា​ភិ​បាល និង​គោលនយោបាយ​ត្រឹមត្រូវ​របស់​ធនាគារជាតិ ដែល​បានដាក់​របា​អត្រា​ការប្រាក់​កន្លងមក បាន​ជួយ​ច្រើន​ដល់​វិស័យនេះ ហើយ​កម្រិត​នៃ​កំណើន​ឥណទាន​ខ្លាំង​ក៏​មិនជា​ការល្អប្រសើរ​ដែរ​ស​ម្រា​ប់​ប្រទេសមួយ។

លោក​បន្តថា “ឥណទាន​ប្រៀបដូចជា​ខ្លាញ់​ក្នុង​ខ្លួន​របស់​មនុស្ស​យើង រា​ង្គ​កាយ​មនុស្ស​ត្រូវការ​ខ្លាញ់ ដើម្បី​ជួយ​ដំណើរការ​សរីរាង្គ​ដទៃ ប៉ុន្តែ​នៅពេល​មាន​ខ្លាញ់​ច្រើនពេក ក៏​ធ្វើ​ឲ្យ​រាងកាយ​មាន​បញ្ហា​ផងដែរ” ៕

បុរី Krek City Garden តម្លៃ​ជាង ៣០លាន​ដុល្លារ​ផ្តោតលើ​ប្លង់​ស្ថាបត្យកម្ម​បែប​ឆ្លាត​វៃ និង​ផាសុខភាព

ដោយ​ស៊ីវ ម៉េង

ត្បូងឃ្មុំៈ ស្ថាបត្យករ​ជំនាញ ដែល​បាននិងកំពុង​គូរ​ប្លង់​បុរី Krek City Gardenបាន  ផ្តោត​ចម្បង លើ​សំណង់​ស្ថាបត្យកម្ម​បែប​ឆ្លាត​វៃ ដែល​ផ្តល់នូវ​ផាសុខភាព​ដល់​អ្នករស់នៅ ជាមួយនឹង​សំណង់​ប្រកបដោយ​សោភ័ណភាព ទាក់ទាញ និង​ផាសុខភាព។

លោក​បណ្ឌិត​តេង រិទ្ធី ម្ចាស់​បុរី Krek City Garddenនិង​ជា​ស្ថាបត្យករ ដែល​បានបញ្ចប់​ការសិក្សា​លើ​ជំនាញ​ស្ថាបត្យកម្ម នៅក្រៅ​ប្រទេស​បាន​មានប្រសាសន៍៍​ឲ្យ​ដឹង​កាលពី​រសៀល​ថ្ងៃទី២០ មករា​កន្លងមក​ថា ការសាងសង់​បុរី​ដែលមាន​ផ្ទៃដី​ជិត២០ហិកតា នាពេល​បច្ចុប្បន្ននេះ យើង​ផ្តោត​សំខាន់​លើ​គុណភាព សោភ័ណភាព និង​ផាសុខភាព​ដល់​ការរស់នៅ​របស់​អ្នករស់នៅ​ក្នុង​បុរី​នេះ។

លោក​បន្តថា “បុរី​នេះ​ផ្តោត​សំខាន់​លើ​សំណង់​ជាពិសេស ដោយ​ផ្តោតលើ​លំហរ​នៃ​ការប្រើប្រាស់​ក្នុងការ​រស់នៅ លំហ​ណា​មិន​ប្រើប្រាស់ យើង​មិន​ផលិត​វា​ឡើង​នោះទេ។ ឧទាហរណ៍​ផ្ទះ​អាជីវកម្ម​របស់​យើង យើង​មិន​ធ្វើ​ឡៅតឿ​នោះទេ ដោយសារ​វា​មិនមាន​លំហរ​គ្រប់គ្រាន់ ដែល​មើលទៅ​មាន​សភាព​ចង្អៀត និង​មិនមាន​ខ្យល់​ចេញចូល​គ្រប់គ្រាន់” ។ លោក​បន្តថា “ជំនួស​ជាន់​ឡៅតឿ យើង​បាន​ធ្វើឡើង​មួយ​ជាន់​ទៀត ពិសេស​ទំហំ​ផ្ទះ​យើង​សាងសង់​ទទឹង៤,៥ម៉ែត្រ ដើម្បី​មាន​លំហ​គ្រប់គ្រាន់ ធ្វើ​ឲ្យ​ផ្ទះ​មាន​ភាព​ទូលាយ និង​ធ្វើ​ឲ្យ​បរិយាកាស​ក្នុងផ្ទះ​ត្រជាក់ និង​មាន​ភាព​សុខដុម” ។

ជាមួយគ្នានេះ ជណ្តើរ​ផ្ទះ​ក៏​យើង​មិន​ធ្វើ​ចោទ​ខ្លាំង​នោះទេ ហេតុនេះ​ទើប​យើង​ធ្វើ​ជណ្តើរ​មិន​ឲ្យ​មានការ​បាំង​ផ្ទះ ដែល​កាំ​និមួយៗមាន​កំពស់​ល្មម និង​មិន​ហត់ និង​ងាយស្រួល​ឡើង​ចុះ មិន​លំបាក​ចោទ​ខ្លាំង​ធ្វើ​ឲ្យ​មាន​គ្រោះថ្នាក់​នោះឡើយ។

លោក​បណ្ឌិត​តេង រិទ្ធី បាន​បញ្ជាក់ថា “ហេតុនេះ​នៅក្នុង​ប្លង់​ស្ថាបត្យកម្ម យើង​មិន​គិត​តែ​ពី​ផលចំណេញ​មួយ​មុខ​ទេ ប៉ុ​ន្ត​តែ​យើង​គិតដល់​គុណភាព​ជីវិត ធ្វើយ៉ាងណា​ឲ្យ​អ្នករស់នៅ​មាន​ភាពងាយស្រួល កក់ក្តៅ ប្រកបដោយ​ផាសុខភាព និង​សុខដុមរមនា​ក្នុង​លំនៅដ្ឋាន” ។ លោក​បន្តថា “យើង​ផ្តោតលើ​អ្វីដែល​ស្អាត និង​ប្រើប្រាស់​មាន​ភាពងាយស្រួល ព្រោះ​អ្វី​យើង​ផ្តោតលើ​ស្ថាបត្យកម្ម​មាន​ភាពងាយស្រួល ប៉ុន្តែ​អ្នក​សាងសង់​ខ្លះ​មិន​ផ្តោតលើ​ពន្លឺ​ក្នុងផ្ទះ​នោះទេ ដោយ​ធ្វើ​បង្អួចតូចៗ ដែល​មិន​ផ្តល់​ពន្លឺ​និង​ខ្យល់អាកាស​ចេញចូល​បាន​ស្រួល​ឡើយ” ។

ផ្ទះ​ខ្លះ​យើង​បាន​សាងសង់​ចិញ្ចើម​មុខផ្ទះ នៅសល់១៥ម៉ែត្រ ខ្លះ៣៥ម៉ែត្រ ដែលមាន​សួនច្បារ និង​ដាំ​ដើមឈើ​ខៀវស្រងាត់ ពិសេស​មាន​ផ្លូវ​ថ្មើ​ជើង កន្លែង​ហាត់ប្រាណ និង​ផ្សារ​ដែលមាន​ស្តង់​ទំហំធំៗចាប់ពី៣ម៉ែត្រ គុណ​នឹង៣ម៉ែត្រ និង​ទំហំ៤ម៉ែត្រ គុណ​នឹង៤ម៉ែត្រ ដោយ​ផ្តោតលើ​ភាព​ស្អាត អនាម័យ​ជាមួយ​មុខទំនិញ​សម្បូរបែប ដោយ​បើក​លក់​ពេលព្រឹក ថ្ងៃត្រង់ រ​ហួត​ដល់ពេល​រាត្រី។

លោក​បណ្ឌិត​តេង រិទ្ធី បាន​បន្ត​ឲ្យ​ដឹង​ទៀតថា ជាមួយនឹង​ផ្តោត​កា​រលើ​បរិយាកាស​នៃ​ការរស់នៅ បែបផែន​ជីវិត​សម័យថ្មី បរិបទ​នៃ​ការប្រែប្រួល​អាកាសធាតុ ស្ថាបត្យកម្ម​សំណង់​បុរី Krek City Garden ក៏បាន​គិតពី​ពី​បែបផែន​សំណង់​ស្ថាបត្យកម្ម ដែល​ឆ្លើយតប​នឹង​លក្ខ​ខ័​ណ្ឌ​ភូមិសាស្ត្រ នគរូបនីយកម្ម និង​លក្ខ​ខ័​ណ្ឌ​អាកាសា​ធាតុ​ផងដែរ។លោក​បន្តថា ជាមួយនឹង​ការគិតគូ​យ៉ាង​ចម្បង​នេះ ការសាងសង់​លំនៅដ្ឋាន​ក្នុង​បុរី​នេះ បានធ្វើ​កំពស់​រហូតដល់៦ម៉ែត្រ គិតពី​ជាន់​ក្រោម​ដល់​ជាន់​ទី១ ដែល​ធ្វើ​ឲ្យ​អ្នករស់នៅ​ដកដង្ហើម​ស្រួល សម្រាកលំហែរ នេះ​ជា​អ្វីដែល​ប្រជាពលរដ្ឋ​ចង់បាន។

លោក​បន្តថា “នេះ​ជា​ភាព​ច្នៃប្រឌិត និង​ទស្សនវិស័យ​វែងឆ្ងាយ ដែល​ធ្វើ​ឲ្យ​យើង​មាន​ផលចំណេញ​តិច ប៉ុន្តែ​យើង​គិតពី​ជីវិត ព្រោះ​យើង​មិន​ចង់​ឲ្យ​ប្រជាជន​ដកដង្ហើម​ក្នុង​ប្រអប់​ទេ វា​មាន​គ្រោះថ្នាក់់​ណាស់​ដល់​សុខភាព ហើយ​ប្រជាជន​យើង​បច្ចុប្បន្នកំពុង​ប្រឈម​បញ្ហា​នេះ” ។ លោក​បន្តថា “បន្ទប់ទឹក​ក៏​ជា​ប្រភព​នៃ​បញ្ហា​ផងដែរ ព្រោះ​វា​យើង​រៀបចំ​មិនបាន​ល្អ វា​នឹងធ្វើ​ឲ្យ​សាយភាយ​ខ្យល់​កខ្វក់ និង​សាយភាយ​មេរោគ ដែល​ប៉ះពាល់​ដល់​សុខភាព​ដល់​អ្នករស់នៅ” ។

លោក​បណ្ឌិត​តេង រិទ្ធី បាន​បន្តទៀតថា គំរោងធំៗដែល​លោក​បាន​ចូលរួម​ដេញថ្លៃ​កន្លងមក គឺ​យើង​ឈ្នះ​លើ Master Plan ហ្នឹង​តែម្តង ដោយ​យើង​បាន​ឌី​សាញ​ផ្លូវ​និមួយៗមាន​ទំហំ​ធំ ផ្លូវ​មិន​ទាល់ ជាក់ស្តែង​នៅ​បុរី Krek City Gardenមាន​ផ្លូវ​ព័​ទ្ឋ​ជុំវិញ មិន​ទាល់​ឡើយ ហើយ​មាន​ផ្លូវ​រំដោះ​ចរាចរណ៍ ករណី​មាន​អគ្គិភ័យ​នៅ​ប្លុក​ណាមួយ​កើតឡើង។ លោក​បន្តថា ពី​ផ្លូវ​មួយ​ទៅ​ផ្លូវ​មួយ​ពី​អាគារ​មួយ ទៅ​អាគារ​មួយ​មាន​ប្រវែង៥០ម៉ែត្រ ដែល​ធ្វើ​ឲ្យ​បរិយាកាស នៃ​ការរស់នៅ​មាន​ខ្យល់​ចេញចូល ដែល​ផ្ទះ​ខ្លះ​មានមុខ​ផ្ទះ​ចន្លោះ១៥ ទៅ៣៥ម៉ែត្រ។

លោក​បន្តថា “ខ្ញុំ​ចង់​ផ្តល់​បរិយាកាស​រស់នៅ ដូច​នៅ​ប្រទេស​ជឿនលឿន​នានា​ដូចជា​អាមេរិក បារាំង​ជាដើម ជាក់ស្តែង​ទីក្រុង​ឌូ​បៃ​ពី​អាគារ​មួយ ទៅ​អាគារ​មួយ​ជាមួយ​ផ្លូវ​កាត់​ទទឹង​មាន​ប្រវែង២០០ម៉ែត្រ” ។ លោក​បន្ថែមថា “ហេតុនេះ​ទើប​ខ្ញុំ​សង់ផ្លូវធំៗ ព្រោះ​ទស្សន​របស់ខ្ញុំ មាន​ផ្លូវធំ គឺមាន​ក្តីសង្ឃឹម​ធំ” ៕

ក្រុមហ៊ុន​ដ៏​ធំ​មួយ​របស់​ចិន​នឹង​បង្កើត​តំបន់​សេដ្ឋកិច្ច​ពិសេស​ដើម្បី​បម្រើឱ្យ​វិស័យក​សិ-ឧស្សាហកម្ម​នៅ​កម្ពុជា

ដោយៈ​ប៊ី

ភ្នំពេញៈ ក្រុមហ៊ុន Khmer Holding Group ដឹក​ដោយ​លោក​ឆាវ អ៊ី​ន​ទ័​រ បានប្រកាសថា ក្រុមហ៊ុន​ជ្រើសរើស​រក​ទីតាំងនៅ​ខេត្តកំពង់ស្ពឺ និង​ទីតាំង​អាទិភាព​មួយចំនួន ដើម្បី​បង្កើត​តំបន់​សេដ្ឋកិច្ច​ពិសេស សម្រាប់​បម្រើឱ្យ​វិស័យ​ក​សិ-ឧស្សាហកម្ម។

ក្នុងជំនួប​ជាមួយ​លោក​វេ​ង សាខុន​រដ្ឋមន្ត្រីក្រសួង​កសិកម្ម រុក្ខាប្រមាញ់​និង​នេសាទ​កាលពី​ថ្ងៃ​ម្សិល​ម៉ិ​ញ លោក ឧកញ៉ា ឆាវ​អគ្គនាយក​ក្រុមហ៊ុន​ឆាវ អ៊ីង​ទ័​រ​បាន​មានប្រសាសន៍​ឲ្យ​ដឹងថា ខេត្តកំពង់ស្ពឺ​ជ្រើសរើស​រក​ទីតាំង​បង្កើត​តំបន់ សេដ្ឋកិច្ច​ពិសេស សម្រាប់​បម្រើឱ្យ​វិស័យ​ក​សិ-ឧស្សាហកម្ម ហើយ​បច្ចុប្បន្ន ទីតាំង​មួយចំនួន​ត្រូវបាន​ជ្រើសរើស ជា​អាទិភាព​រួច រង់ចាំ​វាយតម្លៃ​ចុងក្រោយ ហើយក៏​កំពុង​រៀបចំ​ឯកសារ​គតិ​យុត្ត ដើម្បី​ដាក់ជូនទៅ​ក្រុមប្រឹក្សា​អភិវឌ្ឍន៍​កម្ពុជា (CDC) ដើម្បី​ពិនិត្យ​សម្រេច។

លោក​បន្តថា “អ្វីដែល​សំខាន់​ចង់​ជម្រាបជូន​លោក​រដ្ឋមន្ត្រី នាពេលនេះ​ផងដែរ គឺ​គម្រោង​នេះ​ទទួលបាន​កិច្ច សហការ​ពី​មជ្ឈមណ្ឌល​អភិវឌ្ឍន៍​ផ្លូវ និង​ខ្សែក្រវាត់​មួយ​ដោយមាន​តំណាង​អញ្ជើញ​មក​ចូលរួម​ផងដែរ” ។

ជាមួយគ្នានេះ ក្រុមហ៊ុន Khmer Holding Group ក៏បាន​ចុះ​សិក្សា​ស្រាវជ្រាវ​លើ​គុណភាព​ដី ប្រភពទឹក ស្ថានភាព​ក្សេត្រ​បរិស្ថាន ផ្លូវ​គមនាគមន៍ នៅតាម​បណ្តា​ខេត្ត​គោលដៅ​មាន​ខេត្ត​មណ្ឌល​គី​រី ឧ​ត្ត​រ​មានជ័យ ស្ទឹងត្រែង និង​ខេត្តកោះកុង ដើម្បី​ជ្រើស​យក​ជា​កន្លែង​បង្កើត​វិទ្យាស្ថាន​ដាំ​ដុះ និង​ស្រាវជ្រាវ​រុក្ខជាតិ​ឱសថ និង​រោងចក្រ​ចំរាញ់ កែច្នៃ វេច​ខ្ចប់ សម្រាប់​នាំចេញ។

លោក​បាន​ថ្លែងថា “តំបន់​សេដ្ឋកិច្ច​ពិសេស គួរពិនិត្យមើល​ទីតាំង​នៅក្នុង​ខេត្តកំពង់ស្ពឺ គឺជា​ជម្រើស​ដ៏​ល្អ” ។

លោក​វេ​ង សាខុន​បាន​មានប្រសាសន៍៍ថា គម្រោង​វិនិយោគ ដែលជា​ជំនួយ​របស់រ ដ្ឋា​ភិ​បាល​ចិន​នេះ ពិត​ជាមាន​សារសំខាន់ ក្នុងការ​លើកកម្ពស់​ចំណង​សាមគ្គីភាព មិត្តភាព និង​កិច្ចសហប្រតិបត្តិការ​រ​វាង​ប្រទេស និង​ប្រជាជន​ទាំងពីរ​ឲ្យ​កាន់តែ​ស៊ីជម្រៅ រឹងមាំ គ្រប់​ជ្រុង​ជ្រ​យ និង​ស្ថិត​ស្ថិរ​យូ​អង្វែង​ថែមទៀត។

លោក​បាន​បន្តថា “កសិកម្ម​កម្ពុជា​មា​នស​ក្តា​នុព​ល តែ​យើង​នៅ​ខ្វះ​វិនិយោគិន​ក្នុង និង​ក្រៅប្រទេស ដើម្បី​ប្រើប្រាស់​សក្តានុពល ដែល​យើង​មាន​ឲ្យ​អស់​លទ្ធភាព​សំដៅ​លើកស្ទួយ​ផលិតភាព​ផលិតកម្ម ប្រកួតប្រជែង កែច្នៃ និង​នាំចេញ​ឆ្លើយតប​តាម​តម្រូវការ​ទីផ្សារ​គឺ​ស្តង់ដារ​ផលិត ធានា​បរិមាណ​ផ្គត់ផ្គង់ គុណភាព សុវត្ថិភាព​និង​ការប្រកួតប្រជែង​តម្លៃ” ៕

ដំណោះស្រាយ៖ ថែរក្សា​ស្ថិរភាព​ចរន្ត​សេដ្ឋកិច្ច​ក្រុមហ៊ុន ឬ​អាជីវកម្ម​ឱ្យ​រ៉ឹង​មាំគួរ​ធ្វើ​បែបណា

ដោយៈ រ៉ា​ណេ​ត

ភ្នំពេញៈ ការបង្កើត​ក្រុមហ៊ុន​មួយ​វា​មិនមែនជា​រឿង ដែល​លំបាក​ពេក​នោះទេ ប៉ុន្តែ​ការគ្រប់គ្រង​បុគ្គលិក ប្រកបដោយ​ប្រសិទ្ធភាព​ខ្ពស់ និង​បន្តដំណើរ​ការ​របស់​ក្រុមហ៊ុន​ឱ្យមាន​ភាព​រីកចម្រើន​នោះ ទើប​ជា​រឿង​ដែល​លំបាក ដែល​ត្រូវតែមាន​យុទ្ធសាស្ត្រ​ក្នុងការ​អនុវត្ត។


ការអនុវត្ត​ជាច្រើន ដែល​ត្រូវធ្វើ​ប្រសិនបើ​អ្នកជា​ម្ចាស់ទុន និង​រឹតតែ​ជា​ប្រធាន​ទីផ្សារ​នៃ​ការលក់ ដែល​តម្រូវឱ្យ​មានការ​ស្គាល់ នូវ​សមាសភាព​បុគ្គលិក​គ្រប់គ្រង និង​ដឹកនាំ​ក្រុមហ៊ុន​ឱ្យមាន​ភាព​រីកចម្រើន។ គ្រប់​អ្នកដឹកនាំ និង​អ្នកគ្រប់គ្រង​ទាំងអស់ គឺ​សុទ្ធ​តែមាន​យុទ្ធសាស្ត្រផ្សេងៗពីគ្នា ប៉ុន្តែ​សម្រាប់​រូបលោក​ផ្ទាល់ បាន​អនុវត្ត​នូវ​យុទ្ធសាស្ត្រ​ចំនួន៤ចំណុច​នេះ។

ទី១ ទុក​បុគ្គលិក​ដូចជា​បងប្អូន​បង្កើត

ធម្មតា​បុគ្គលិក ដែល​ចូលមក​បម្រើ​ការងារ នៅក្នុង​ក្រុមហ៊ុន​ដែល​ជ្រក​នៅក្រោម​ដំបូល​តែមួយ វា​ប្រៀបបាន​ទៅនឹង​ក្រុមគ្រួសារ។ ដូច្នេះ​ការយោគយល់ ការផ្តល់​ក្ដី​អាណិត​ស្រឡាញ់ ក្នុងនាម​ជា​សមាជិកគ្រួសារ ចាំបាច់​ត្រូវតែ​ផ្តល់​ដល់​ពួកគេស្មើៗគ្នា។ នៅពេល​មាន​បញ្ហា​ណាមួយ​កើតឡើង ត្រូវតែ​ការជជែក​វែក​ញ៉ែ​ក​ពី​ហេតុ​បង្ក រួម​ជាមួយនឹង​ការស្វែងរក​ដំណោះស្រាយ ជាជាង​ការស្ដីបន្ទោស​ទាំង​កម្រោល និង​គ្មាន​ហេតុផល​នោះទេ។

ទី២ ភាពស្មោះត្រង់ និង​ផ្តល់​ទំនុកចិត្ត និង​ក្ដីសង្ឃឹម​ដល់​បុគ្គលិក

លើសពី​ការចាត់​ទុកជា​សមាជិក នៅក្នុង​ក្រុមគ្រួសារ​តែមួយ ក្នុងនាម​ជា​អ្នកគ្រប់គ្រង និង​ដឹកនាំ ត្រូវ​ប្រកាន់ខ្ជាប់​នូវ​សីលធម៌ ភាពស្មោះត្រង់ និង​ផ្តល់​ទំនុកចិត្ត​ខ្ពស់ ជាពិសេស​ផ្តល់នូវ​ក្ដីសង្ឃឹម​ដល់​បុគ្គលិក​ក្រោយ​ឱវាទ។

នៅពេល​បុគ្គលិក​បំពេញការងារ បាន​លទ្ធផល​ល្អប្រសើរ​គឺ​ប្រាប់ថា​ល្អ ប្រសិនបើ​ការងារ​ជួប​បញ្ហា ឬ​ជួប​ភាពបរាជ័យ ប្រាប់ថា​បរាជ័យ​នៅ​ចំពោះ​បុគ្គលិក ដើម្បី​កែប្រែ​កំហុស ដែល​វា​ជា​វិធី​ល្អ​មួយ ក្នុងការ​កែតម្រូវ​បុគ្គលិក ឱ្យ​កាន់​តែមាន​ប្រសិទ្ធភាព​ការងារ ល្អ​ជាង​ការ​គាំ​ទុក​ក្នុង​ចិត្ត ដែល​ប្រៀបបាន​ទៅនឹង​ការ​ជម្រុញ ឱ្យ​ធ្លាក់​ជ្រោះ​ជ្រៅ​យ៉ាង​ដូច្នោះ​ដែរ។

ទី៣ បរិយាកាស​ការងារ​គឺ​យក​លទ្ធផល​ជាធំ

ក្រុមហ៊ុន ឬ​កន្លែងធ្វើការ មិនមែនជា​កន្លែង​ហាត់រៀន​ច្បាប់​ទាហាន​នោះទេ។ មានន័យថា បរិយាកាស​នៃ​កន្លែង​បំពេញការងារ ក៏ត្រូវ​តែមាន​ភាព​រីក​រាយ​ស្រស់ស្រាយ ដើម្បី​ជម្រុញ​អារម្មណ៍ និង​ស្មារតី​របស់​បុគ្គលិក ឱ្យ​ចេះ​ស្រឡាញ់​ការងារ ខិតខំ​បំពេញភារកិច្ច​ជាប់​ជាប្រចាំ។

លទ្ធផល​ការងារ​ជាធំ ដូច្នេះ​សំពាធ​ស្មារតី និង​អារម្មណ៍ ទៅលើ​ច្បាប់ទម្លាប់​ហាក់​ត្រូវបាន​កាត់បន្ថយ​ខ្លះ។ ប៉ុន្តែ​មិនមែន​មានន័យថា មាន​ភាព​ធូរ​លុង​រហូត​បាត់បង់​វិន័យ​នៅក្នុង​ក្នុង​ក្រុមហ៊ុន​នោះទេ។

ទី៤ ការផ្តល់​រង្វាន់ និង​ការដាក់ពិន័យ

នេះ​ជា​ចំណុច​រួមមួយ ដែល​ស្ទើរតែ​គ្រប់​បុគ្គលិក​ទាំងអស់​ត្រូវការ។នៅពេល​បំពេញការងារ​បានល្អ ទទួលបាន​លទ្ធផល​ប្រសើរ គួរតែមាន​ការលើកទឹកចិត្ត តាមរយៈ​ការផ្តល់​ជា​រង្វាន់ ជា​ប្រាក់ឧបត្ថម្ភ​បន្ថែម​ទៅលើ​មុខងារ ដែល​ជាការ​ជម្រុញ​ទឹកចិត្ត​បុគ្គលិក​ឱ្យ​កាន់តែ​បង្កើន​ភាព​ខិតខំ​របស់ខ្លួន។

ប៉ុន្តែ​នៅពេលដែល​បុគ្គលិក​បង្ក​ជា​បញ្ហា ដែល​លើសពី​ការគិត ចាំបាច់​ត្រូវតែមាន​ការពិន័យ ឬ​បង្គាប់​ឱ្យមាន​ការកែតម្រូវ ទៅលើ​ការអនុវត្ត​របស់​បុគ្គ​លិ​ក ដែល​អនុវត្តន៍​ខុស​គោលការណ៍​ក្រុមហ៊ុន ដើម្បី​ជាការ​ព្រមាន និង​បង្ហាញ​ទៅដល់​បុគ្គលិក​ដទៃទៀត​ដែរ៕

ឥណទានក្នុងវិស័យធនាគារបានកើនឡើងដល់៣៧,៣ពាន់លានដុល្លារ ខណៈប្រាក់បញ្ញើកើនដល់៣៣,៨ពាន់លានដុល្លារ

ដោយ ៖ ប៊ី

ភ្នំពេញ ៖ យោងតាមរបាយការណ៍របស់ធនាគារជាតិនៃកម្ពុជាស្ដីពីការអភិវឌ្ឍវិស័យធនាគារក្នុងរយៈពេល៥ឆ្នាំចុងក្រោយចាប់តាំងពីឆ្នាំ២០១៦រហូតដល់ឆ្នាំ២០២០ ទំហំឥណទាន និងប្រាក់បញ្ញើមានការកើនឡើងយ៉ាងខ្លាំងគួរឱ្យកត់សម្គាល់។

តាមរយៈរបាយការណ៍ដដែលបានបង្ហាញថា កាលពីឆ្នាំ២០១៦ ឥណទានក្នុងវិស័យធនាគារមានប្រមាណ៨៥ភាគរយនៃផលិតផលក្នុងស្រុកសរុប និងប្រាក់បញ្ញើមានប្រមាណ៧៥ភាគរយនៃផលិតផលក្នុងស្រុកសរុប។ ដោយឡែក ឆ្នាំ២០១៧ ឥណទានបានកើនឡើង៩១ភាគរយនៃផលិតផលក្នុងស្រុកសរុប ហើយប្រាក់បញ្ញើក៏បានកើនឡើងដល់៨៦ភាគរយនៃផលិតផលក្នុងស្រុកសរុប។

អ្វីដែលគួរឱ្យកត់សម្គាល់គឺរហូតមកដល់ឆ្នាំ២០២០ ទ្រព្យសកម្មសរុបនៃវិស័យធនាគារមានរហូតដល់១៨៩ភាគរយនៃផលិតផលក្នុងស្រុកសរុប ឥណទានមានប្រមាណ ១១៩ភាគរយនៃផលិតផលក្នុងស្រុកសរុប និងប្រាក់បញ្ញើមាន១១៣ភាគរយនៃផលិតផលក្នុងស្រុកសរុប ហើយឥណទានអតិថិជនបានកើនឡើងប្រមាន១៤,៨ភាគរយ គិតជាទឹកប្រាក់ ៣៧,៣ភាគរយ ប្រាក់បញ្ញើអតិថិជនមានកំណើន១៥,៤ភាគរយ និងកើនឡើងដល់៣៣,៨ពាន់លានដុល្លារអាមេរិក ខណៈទ្រព្យសកម្មរបស់ប្រព័ន្ធធនាគារមានកំណើន១៥,៧ភាគរយ គឺកើនឡើងដល់៥៩,៤ភាគរយ ។

លោកបណ្ឌិតអ៊ិន ចាន់នីប្រធានសមាគមធនាគារនៅកម្ពុជា បានមានមានប្រសាសន៍ថា ក្នុងឆ្នាំ ២០២០នេះ បើទោះបីជាកម្ពុជា ជួបវិបត្តិដោយសារកូវីដ១៩ ក្ដី តែវិស័យធនាគារបានហែលឆ្លងផុតក្នុងវិបត្តិនេះដោយចូលមកកាន់ឆ្នាំ ២០២១ ។

លោកបណ្ឌិតបន្ថែមថា ក្នុងឆ្នាំ ២០២០ ធនាគារទាំងអស់ឃើញថានៅតែមានប្រាក់ចំណេញ តែប្រាក់ចំណេញនោះមិនច្រើនទេ ជាក់ស្ដែងធនាគារអេស៊ីលីដា ក៏មានការរីកលូតលាស់ប្រមាណ១៥ភាគរយដែរក្នុងឆ្នាំ ២០២០ ។ ការរីកលូតលាស់នេះ គឺបានមកពីការជួយជ្រោមជ្រែងរបស់រដ្ឋាភិបាល ជាពិសេសធនាគារជាតិនៃកម្ពុជា ដូចជាការជួយអនុគ្រោះនានាដល់ប្រតិបត្តិករធនាគារ និងការរៀបចំឥណទានឡើងវិញជាដើម ៕

ចិន បញ្ចេញរថភ្លើងម៉ូតគំរូដែលអាចរត់លឿនដូចហោះរហូតដល់ទៅជាង ៦០០ គីឡូម៉ែត្រក្នុងមួយម៉ោង

សុខុម

CNN: យោងតាមសារព័ត៌មាន CNN ចុះផ្សាយកាលពីថ្ងៃទី១៨ មករា ឱ្យដឹងថា ប្រទេសចិន បានបញ្ចេញម៉ូតគំរូ (prototype) សម្រាប់រថភ្លើងល្បឿនលឿន Maglev Train ដែលអាចរត់លឿនដូចហោះក្នុងល្បឿនរហូតដល់ទៅ ៦២០ គីឡូម៉ែត្រក្នុងមួយម៉ោងស្ទើរមិនគួរឱ្យជឿ។

រថភ្លើងនេះនឹងដំណើរការដោយថាមពលមានសីតុណ្ហភាពខ្ពស់ (High-Temperature Superconducting (HTS)) ដែលយើងមើលទៅឃើញដូចវាហោះស្ទុយតាមផ្លូវដែកដែលមានដែនម៉ាញេទិចខ្លាំង។

យោងតាមសារព័ត៌មាន Xinhua News ដែលគ្រប់គ្រងដោយរដ្ឋឱ្យដឹងថា ម៉ូតគំរូរថភ្លើងដ៏គួរឱ្យទាក់ទាញប្រវែង ២១ ម៉ែត្រនេះត្រូវបានបញ្ចេញឱ្យក្រុមអ្នកសារព័ត៌មានបានឃើញនៅក្នុងទីក្រុង Chengdu ខេត្ត Sichuan ប្រទេសចិន កាលពីថ្ងៃទី១៤ ខែមករា ឆ្នាំ២០២១។ លើសពីនេះ ក្រុមអ្នកសិក្សាស្រាវជ្រាវថែមទាំងបានសាងសង់ផ្លូវដែកប្រវែង ១៦៥ ម៉ែត្រដើម្បីបង្ហាញថាតើរថភ្លើងនេះមានសភាពបែបណាពេលនៅលើផ្លូវដែកជាក់ស្ដែងទៀតផង។

សាស្ត្រាចារ្យ He Chuan សាកលវិទ្យាធិការរងនៃសាកលវិទ្យាល័យ Southwest Jiaotong University ដែលជាអ្នកបង្កើតម៉ូតគំរូនេះឡើងបានប្រាប់ក្រុមអ្នកយកព័ត៌មានថា រថភ្លើងនេះអាចនឹង “ដាក់ឱ្យដំណើរការ” ក្នុងរយៈពេល ៣ ទៅ ១០ ឆ្នាំខាងមុខ។

លោកបានបន្ថែមថា “ខេត្ត Sichuan មានធនធានផែនដីដ៏កម្រដែលផ្ដល់អត្ថប្រយោជន៍ខ្លាំងដល់ការសាងសង់ផ្លូវដែកដែនម៉ាញេទិកអចិន្ត្រៃយ៍របស់យើង ដូចនេះវានឹងជួយពន្លឿនការបង្កើតការពិសោធរបស់យើង”។

ប្រទេសចិន ជាកន្លែងដែលមានបណ្ដាញផ្លូវដែកល្បឿនលឿនធំបំផុតរបស់ពិភពលោក ដែលលាតសន្ធឹងប្រវែងរហូតដល់ទៅជាង ៣៧.០០០ គីឡូម៉ែត្រ និងរថភ្លើងដឹកអ្នកដំណើរលឿនបំផុត នោះគឺរថភ្លើង Shanghai Maglev៕

ស្ថានភាពទីផ្សារដីធ្លីក្នុងខេត្តកែបក្រោយរដ្ឋាភិបាលប្រកាសកំណត់បង្កើតប៉ូលទេសចរណ៍ធំៗចំនួន៤

ដោយ ៖ រ៉ាណេត

កែប ៖ ទីផ្សារដីធ្លីនៅក្នុងខេត្តកែបត្រូវបានគេដឹងរួចមកហើយថាមានភាពស្ថានភាពល្អប្រសើរជាងបណ្តាខេត្តផ្សេងៗដែលហាក់មិនទទួលរងនូវសម្ពាធពីវិបត្តិសាកលខ្លាំងក្លានោះទេ ផ្ទុយទៅវិញទាំងការទិញលក់ និងសកម្មភាពអភិវឌ្ឍន៍គម្រោងនានានៅតែបន្តមានដើម្បីបម្រើដល់វិស័យទេសចរណ៍ ដែលស្ថិតនៅក្នុងផែនការនៃការបង្កើតតំបន់ប៉ូលទេសចរណ៍ធំៗចំនួន៤ក្នុងខេត្តរបស់រដ្ឋាភិបាល។

អគ្គនាយិកាក្រុមហ៊ុនភ្នាក់ងារអចលនទ្រព្យ AMATAK Property Service លោកស្រីតាំង ហួរបានមានប្រសាសន៍នៅរសៀលថ្ងៃទី២០ ខែមករា ឆ្នាំ២០២១នេះថា ទីផ្សារអចលនទ្រព្យខេត្តកែបគឺមានភាពល្អប្រសើរជាងបណ្តាខេត្តមួយចំនួនដោយសារតែខេត្តនេះមិនសូវមានតំបន់ពាណិជ្ជកម្មដូចជាខេត្តព្រះសីហនុ និងសៀមរាបនោះទេ។

លោកស្រីបានបន្តថា “នៅក្នុងខេត្តនេះមានភាពទាក់ទាញផ្នែកទេសចរធម្មជាតិ ជាពិសេសតំបន់ឆ្នេរ និងតំបន់ជាប់មាត់ព្រែកដែលកំពុងត្រូវបានក្រុមហ៊ុនក្នុងស្រុកមួួយចំនួនកំពុងបោះទុនធ្វើការអភិវឌ្ឍបន្ថែមយ៉ាងសកម្មដើម្បីបង្កើនភាពទាក់ទាញពីលើអ្វីដែលមានស្រាប់ដែលក្នុងនោះរួមមានដូចជាការបង្កើតជាតំបន់កម្សាន្ត ការអភិវឌ្ឍជាសំណង់លំនៅដ្ឋានបែបលំហែរ ក៏ដូចជាការកែច្នៃបឹងហ្គាឡូជាដើម ហើយទាំងអស់នេះភាគច្រើនគឺជាគម្រោងដែលបានបង្កើតឡើងតាំងពីឆ្នាំចាស់ ឬមុនឆ្នាំ២០២០ម្លេះ”។

លោកស្រីបានបន្តថា “ជាការអបអរសាទរជាមួយនឹងការប្រកាសជាផ្លូវការណ៍របស់រាជរដ្ឋាភិបាលក្នុងការកំណត់ និងបង្កើតប៉ូលទេសចរណ៍សំខាន់ប្រចាំខេត្តកែប ប៉ុន្តែសម្រាប់ពេលនេះតម្លៃដីធ្លីហាក់មិនទាន់មានការប្រែប្រួល ឬកើនឡើងនោះទេ ពោលគឺនៅក្នុងកម្រិតដូចគ្នាទៅនឹងចុងឆ្នាំ២០២០កន្លងទៅដូចគ្នា ហើយដីទីតាំងដែលល្អ និងមានសក្ដានុពលក្នុងការអភិវឌ្ឍក៏មិនសូវមានទំនេរច្រើននោះដែរ ព្រោះភាគច្រើនត្រូវបានគេទិញទុកសម្រាប់អភិវឌ្ឍន៍រួចរាល់”។

អភិបាលខេត្តកែប លោកសោម ពិសិដ្ឋ បានមានប្រសាសន៍ថា ក្រសួងទេសចរណ៍កបានរៀបចំផែនការមេ ដើម្បីប្រែក្លាយខេត្តកែបទៅជាតំបន់វិស្សមកាលកម្រិតខ្ពស់នៅកម្ពុជា។ ជាមួយគ្នានេះលោកបានជំរុញ និងលើកទឹកចិត្តដល់អ្នកវិនិយោគលើវិស័យទេសចរណ៍ សណ្ឋាគារ និងអចលនទ្រព្យ ដើម្បីចូលរួមអភិវឌ្ឍន៍ខេត្តកែបកាន់តែរីកចម្រើនបន្ថែមទៀត ខណៈខេត្តជាប់មាត់សមុទ្រមួយនេះ បាននឹងកំពុងមានភាពទាក់ទាញលើវិស័យទេសចរណ៍។

លោកបានបន្តថា ក្រសួងទេសចរណ៍ប្រកាសហើយអំពីគម្រោងសម្រេចបង្កើតប៉ូលទេសចរណ៍ធំៗចំនួន៤ និងគម្រោងអភិវឌ្ឍន៍ចំនួន២៥១គម្រោងទៀតត្រូវបានដាក់បញ្ចូលទៅក្នុងសេចក្តីព្រាងផែនការមេ ក្នុងការអភិវឌ្ឍន៍វិស័យទេសចរណ៍នៅខេត្តកែប ដោយប៉ូលអភិវឌ្ឍន៍ទេសចរណ៍ធំៗទាំង៤នោះ រួមមានទីក្រុងកែបបច្ចុប្បន្ន តំបន់អង្កោល តំបន់ភ្នំវល្លិ និងតំបន់ប្រជុំកោះ៕

រដ្ឋាភិបាលទទួលបានចំណូលពីប្រៃសណីយ៍កម្ពុជា ៦.៥លានដុល្លារ ក្នុងឆ្នាំ២០២០

ដោយ ៖ រ៉ាណត

ភ្នំពេញ ៖ នៅក្នុងឆ្នាំ២០២០កន្លងទៅនេះតាមរយៈប្រៃសណីយ៍កម្ពុជា រដ្ឋាភិបាលទទួលបានចំណូលចំនួន៦.៥លានដុល្លារ មានការធ្លាក់ចុះប្រមាណ៤៦ភាគរយប្រៀបធៀបកាលពីឆ្នាំ២០១៩ ដែលមានចំណូលប្រមាណ១៣លានដុល្លារ។

ប្រតិភូរាជរដ្ឋាភិបាល លោកអោក បូរ៉ាទទួលបន្ទុកជាអគ្គនាយកប្រៃសណីយ៍កម្ពុជា បានប្រសាសន៍នៅថ្ងៃទី២០ ខែមករា ឆ្នាំ២០២១នេះថា កាលពីឆ្នាំ២០២០កន្លងទៅនេះ ប្រៃសណីយ៍កម្ពុជារកបានចំណូល ៦.៥លានដុល្លារធ្លាក់ចុះ៤៦ភាគរយ ក្រោមហេតុផលបណ្តាលមកពីការទទួលរងនូវឥទ្ធិពលនៃជំងឺកូវីដ-១៩។

លោកបានបញ្ជាក់ថា “ចំណូលចាប់ពីខែមីនា ដល់ខែកក្កដា គឺ០ភាគរយ អីចឹងដាច់ឆ្នាំនេះ ចំណូលប្រៃសណីយ៍ធ្លាក់ចុះ៤៦ភាគរយ ខណៈដែលកាលពីឆ្នាំ២០១៩ យើងទទួលបានប្រមាណ១៣លានដុល្លារ និងដាច់ឆ្នាំ២០២០ ទទួលបានតែ៦.៥លានដុល្លារប៉ុណ្ណោះ”។

លោកបន្តថា “ក្នុងឆ្នាំ២០២០ ចាប់ពីខែមីនា រហូតដល់ខែកក្កដា បានបិទទាំងស្រុងបញ្ញើទៅអន្ដរជាតិ ព្រោះថា ប្រៃសណីយ៍កម្ពុជា ពឹងផ្អែកលើមធ្យោបាយក្រុមហ៊ុនដឹកជញ្ជូនអន្ដរជាតិ ហើយនៅពេលនោះ ជាពេលដែលកូវីដ-១៩ រាតត្បាតខ្លាំង ដែលធ្វើជើងហោះហើរត្រូវបានបិទទាំងស្រុង”។

ចំពោះផែនការដើម្បីបង្កើនចំណូលក្នុងឆ្នាំ២០២១នេះ ត្រូវបានលោក អោក បូរ៉ា ប្រាប់ឱ្យដឹងថា ដើម្បីពង្រឹងចំណូលឡើងវិញ គឺមានតែស្រូបបញ្ញើក្នុងស្រុក ដោយពង្រឹងប្រព័ន្ធដឹកជញ្ជូនក្នុងស្រុក ដូចថ្ងៃនេះបានចាប់ដៃគូសហការ ដើម្បីពង្រឹងប្រព័ន្ធដឹកជញ្ជូនក្នុងស្រុក។

លោកអគ្គនាយកប្រៃសណីយ៍កម្ពុជា បានគូសបញ្ជាក់ថា “ជារៀងរាល់ឆ្នាំ ប្រៃសណីយ៍កម្ពុជា ពឹងផ្អែកលើអន្ដរជាតិ ប្រមាណ៩៥ភាគរយ ដូច្នេះហើយនៅពេលដែលបិទជើងហោះហើរ ប្រៃសណីយ៍កម្ពុជា គឺស្លាប់តែម្ដង”។

លោក អោក បូរ៉ា បានបន្ថែមឱ្យដឹងថា បច្ចុប្បន្ន ប្រៃសណីយ៍កម្ពុជា បានខិតខំស្វែងរកភ្នាក់ងារ ដើម្បីជួយប្រមូលបញ្ញើក្នុងការសាងបច្ចេកទេសរឹងមាំ ក្នុងគោលបំណងពង្រីងចំណូល ដើម្បីទប់ស្កាត់នឹងជំងឺកូវីដ-១៩។ ធ្វើដូច្នេះ ប្រៃសណីយ៍កម្ពុជានឹងអាចកើនចំណូលពី១៥ ទៅ២០ភាគរយក្នុងឆ្នាំ២០២១៕