កម្ពុជា និងប្រទេសចំនួន ១៥ នៅក្នុងតំបន់អាស៊ី – ប៉ាស៊ីហ្វិក ជំរុញឱ្យឥណ្ឌាចូលតុចរចាពាណិជ្ជកម្មសេរីឡើងវិញ

ដោយ ៖ វុត្ថា

ភ្នំពេញ ៖ កម្ពុជា និងប្រទេសចំនួន ១៥ ផ្សេងទៀតនៅក្នុងតំបន់អាស៊ី – ប៉ាស៊ីហ្វិកដែលបាននឹង
កំពុងចរចាកិច្ចព្រមព្រៀងពាណិជ្ជកម្មសេរី កាលពីម្សិលមិញនេះ បានទទូចឱ្យប្រទេសឥណ្ឌាត្រឡប់ចូលតុចរចាវិញ ខណៈ ដែលកិច្ចព្រមព្រៀងពាណិជ្ជកម្មសេរីនេះ ផ្អែកតាមផែនការ នឹងត្រូវចុះតហត្ថលេខានៅចុងឆ្នាំនេះ។

តាមការចុះផ្សាយរសារព័ត៌មាន kyodo ដែលមានមូលដ្ឋាននៅក្នុងប្រទេសជប៉ុនបានឱ្យដឹងថា ប្រទេសឥណ្ឌា បានដកខ្លួនចេញពីការចរចាពាណិជ្ជកម្មសេរីជាមួយនឹងប្រទេសនៅក្នុងតំបន់អាស៊ី – ប៉ាស៊ីហ្វិកជាច្រើនលើកច្រើនសារ ដោយបានបង្ហាញការព្រួយបារម្ភថា ការបើកទីផ្សាររបស់ខ្លួននឹងបង្កើនឱនភាពពាណិជ្ជកម្មជាមួយប្រទេសចិន។

សារព័ត៌មាន Kyodo ចុះផ្សាយថា “ ប្រទេសឥណ្ឌាបានលើកពេលអត់ចូលរួមរាល់ការចរចាសម្រាប់ក្របខ័ណ្ឌភាពជាដៃគូសេដ្ឋកិច្ចគ្រប់ជ្រុងជ្រោយក្នុងតំបន់នៅឆ្នាំនេះ (Regional Comprehensive Economic Partnership framework ) ។

រដ្ឋមន្រ្តីមកពីសមាជិកទាំង ១០ នៃសមាគមប្រជាជាតិអាស៊ីអាគ្នេយ៍រួមមានប្រទេសព្រុយណេ កម្ពុជា ឥណ្ឌូនេស៊ី ឡាវ ម៉ាឡេស៊ី មីយ៉ាន់ម៉ា ហ្វីលីពីន សឹង្ហបូរី ថៃ និងវៀតណាម និង ជប៉ុន អូស្រ្តាលី ចិន នូវែលហ្សេឡង់ និងកូរ៉េខាងត្បូង បានចូលរួមនៅក្នុងកិច្ចចរចាសម្រាប់ក្របខ័ណ្ឌភាពជាដៃគូសេដ្ឋកិច្ចគ្រប់ជ្រុងជ្រោយក្នុងតំបន់ (RCEP)មិនដែលខកខាន ។

ក្របខ័ណ្ឌភាពជាដៃគូសេដ្ឋកិច្ចគ្រប់ជ្រុងជ្រោយក្នុងតំបន់ (RCEP) បានបង្ហាញពីគោលបំណងបង្កើតច្បាប់រួមមួយសម្រាប់ធ្វើពាណិជ្ជកម្មតាមប្រព័ន្ធអេឡិចត្រូនិច ពាណិជ្ជកម្ម និងកម្មសិទ្ធិបញ្ញា។ ក្របខណ្ឌនេះនឹងគ្របដណ្តប់លើមួយភាគបី នៃសេដ្ឋកិច្ចពិភពលោក និងពាក់កណ្តាលនៃចំនួនប្រជាជនពិភពលោកប្រសិនបើប្រទេសឥណ្ឌាត្រូវបានបញ្ចូល៕

អចលនវត្ថុ ២ ប្រភេទដែលប្រជាជនកម្ពុជានិយមចំណាយលុយវិនិយោគ ងាយស្រួលសម្រួលចរន្តសាច់ប្រាក់

ដោយ ៖ ហ្សូលី

ភ្នំពេញ ៖ ប្រជាជនកម្ពុជានៅបច្ចុប្បន្ននេះមានចំណេះដឹងកាន់តែទូលាយនៅក្នុងការចំណាយលុយវិនិយោគ ជាពិសេសវិស័យវិស័យអចលនទ្រព្យ ដែលពលរដ្ឋកម្ពុជា ហ៊ានចំណាយលុយវិនិយោគ ជាមួយភាពជឿជាក់ថាអាចទទួលបានផលចំណេញត្រឡប់មកវិញច្រើន។

ប្រធានសមាគមអ្នកវាយតម្លៃ និងភ្នាក់ងារអចលវត្ថុកម្ពុជា លោក ច្រឹក សុខនីម បានមានប្រសាសន៍ប្រាប់គេហទំព័រ Property Area Asia នៅព្រឹកថ្ងៃទី១៥ ខែតុលា ឆ្នាំ២០២០ថា ក្នុងនាមជាអ្នកប្រឡូកក្នុងវិស័យអចលនទ្រព្យ និងមានបទពិសោធន៍អស់រយៈពេលជាច្រើនឆ្នាំ លោកសង្កេតឃើញថា ប្រជាជនកម្ពុជាភាគច្រើននិយមចំណាយលុយវិនិយោគទៅលើវិស័យលំនៅដ្ឋាន និងវិស័យដីធ្លី។

លោកបន្តថា “វាអាស្រ័យទៅលើស្ថានភាពរបស់អ្នកវិនិយោគដែរ ទីមួយប្រសិនបើជាអ្នកមានធនធានច្រើន នោះពួកគាត់ចូលចិត្តវិនិយោគទៅលើធីធ្លី អញ្ចឹងហើយគាត់គិតថាអាចទទួលបានប្រាក់ចំណេញច្រើន។
ទី២ ប្រសិនបើអ្នកនោះប្រើប្រាស់ប្រាក់មកពីប្រភពផ្សេងដូចជា កម្ចីពីធនាគារ ឬស្ថាប័នហិរញ្ញវត្ថុណាមួយ នោះពួកគាត់ច្រើនតែវិនិយោគជាផ្នែកខ្លះទៅលើផ្ទះ និងផ្នែកខ្លះទៀតទៅលើដីធ្លី”។

ប្រធានសមាគមរូបនេះរៀបរាប់ឱ្យដឹងថា មូលហេតុដែលបណ្តាលឱ្យផ្ទះ និងដីធ្លីក្លាយជាមុខព្រួញ និងជាគោលដៅមានតម្រូវការច្រើន ដោយសារតែផ្ទះអាចរកបានប្រាក់ចំណូលពីការជួលប្រចាំខែ ដែលវាធ្វើឱ្យចរន្តលំហូរសាច់ប្រាក់មិនមានបញ្ហា។ រីឯការទិញដី វាមានផលលំបាកដែលពិបាកនឹងដាក់ជួល ប៉ុន្តែអាចទុករង់ចាំពេលវេលាណាមួយលក់យកចំណេញ លើកលែងតែចំនុចមួយគឺដីគ្មានចរន្តលំហូរសាច់ប្រាក់បង្វិលឡើយ។

ទន្ទឹមនេះ លោក ច្រឹក សុខ នីម បានណែនាំដល់អ្នកទិញអចលនទ្រព្យទាំងឡាយដែលមិនមានធនធានគ្រប់គ្រាន់ គួរណាកុំវិនិយោគលើវិស័យដីធ្លី យល់ល្អគប្បីវិនិយោគលើវិស័យលំនៅដ្ឋានវិញ។ ចំណែកឯអ្នកមានជីវភាពមធ្យម ឬមានប្រភពចំណូលគ្រប់គ្រាន់ អាចចំណាយថវិកាខ្លះវិនិយោគលើវិស័យលំនៅដ្ឋាន និងមួយផ្នែកទៀតវិនិយោគលើវិស័យដីធ្លីទើបជាការល្អប្រសើរ៕

បណ្តាញសំខាន់ៗចំនួន៩ខ្សែ ត្រូវបានប្រកាសផ្អាកចរាចរណ៍បណ្តោះអាសន្ន

ដោយ ៖ រ៉ាណេត

កណ្តាល ៖ ក្រសួងសាធារណៈ និងដឹកជញ្ជូន តាមរយៈរដ្ឋបាលខេត្តកណ្តាលបានប្រកាសផ្អាកចរាចរណ៍ជាបណ្តោះអាសន្ននៅតាមបណ្តាញផ្លូវជាតិសំខាន់ៗចំនួន៩ខ្សែ ជាពិសេសប្រភេទរថយន្ដធុនធ្ងន់ដើម្បីបញ្ចៀសគ្រោះថ្នាក់ និងធ្វើឱ្យផ្លូវរងនូវការខូចតាត។

ក្រោមស្ថានភាពគំរាមកំហែងពីគ្រោះជំនន់ទឹកភ្លៀងដែលកំពុងបន្តជន់លិចស្ទើទូទាំងខេត្ត ជាពិសេសនៅតាមតំបន់សំខាន់ៗមួយចំនួន នៅយប់ថ្ងៃទី១៤ ខែតុលា ឆ្នាំ២០២០ មន្ទីរសាធារណការខេត្តកណ្ដាលបានសម្រេចផ្អាកការធ្វើចរាចរណ៍ រថយន្តធុនធំនៅតាមផ្លូវជាតិសំខាន់ៗចំនួន៩ខ្សែ។

នៅក្នុងសេចក្ដីជូនដណឹងរបស់មន្ទីរសាធារណការខេត្តកណ្ដាលបានបញ្ជាក់ថា៖ សេចក្តី ជូន ដំណឹង ស្តីពី ការ បិទ ចរាចរណ៍ រថយន្ត ដឹក ទំនិញ ធុន ធំ គ្រប់ ប្រភេទ នៅ លេី កំណាត់ ផ្លូវ ជាតិ លេខ ២ ,៣,៤,៥ ផ្លូវ ជាតិ លេខ ២០,២០អា,២១,២១អា និង ផ្លូវ ជាតិ លេខ ២១បេ ស្ថិតក្នុង ភូមិ សាស្ត្រ ខេត្ត កណ្តាល ជា បណ្ដោះ អាសន្ន។
ការអនុវត្តនៃការបិទចរាចរណ៍នៅតាមបណ្តាញផ្លូវជាតិសំខាន់ៗនៅជុំវិញ ដែលមានព្រំប្រទល់ជាប់នឹងរាជធានីភ្នំពេញ ខេត្តតាកែវ កំពង់ស្ពឺ និងខេត្តកំពត ក៏ដូចជានៅក្នុងខេត្តកណ្តាល មានប្រសិទ្ធភាពចាប់ពីពេលចេញសេចក្ដីប្រកាសនេះតទៅ រហូតដល់ពេលមានការជូនដំណឹងសាជាថ្មីស្ដីពីការបើកឱ្យចរាចរណ៍ឡោះងវិញ ។

សេចក្ដីលម្អិតមានបង្ហាញនៅក្នុងសេចក្ដីជូនដំណឹងដូចខាងក្រោម៖

IMF ព្យាករណ៍ថា សេដ្ឋកិច្ចកម្ពុជា នឹងមានកំណើនដល់ទៅ ៦,៨ភាគរយនៅឆ្នាំក្រោយ

ដោយ ៖ ប៊ី
ភ្នំពេញ ៖ មូលនិធិរូបិយវត្ថុអន្តរជាតិ (IMF) បានធ្វើការព្យាករណ៍ថា កម្ពុជានឹងមានកំណើនសេដ្ឋកិច្ច ៦,៨ ភាគរយ ដែលនឹងក្លាយជាប្រទេសមានសេដ្ឋកិច្ចរីកចម្រើនលំដាប់ទី៣ នៅតំបន់អាស៊ាននាឆ្នាំក្រោយ និងជាប្រទេសដែលមានកំណើនសេដ្ឋកិច្ចខ្ពស់ជាងគេបំផុតនៅក្នុងតំបន់នៅឆ្នាំ២០២៥ ។

យោងតាមការសិក្សារបស់ IMF ដែលត្រូវបានចេញផ្សាយក្នុងអំឡុងកិច្ចប្រជុំប្រចាំឆ្នាំរបស់ខ្លួន កាលពីថ្ងៃអង្គារ បានឱ្យដឹងថា សេដ្ឋកិច្ចរបស់ប្រទេសកម្ពុជាត្រូវបានព្យាករណ៍ថានឹងធ្លាក់ចុះ ២,៨ ភាគរយនៅឆ្នាំនេះ ខណៈការព្យាករណ៍ធ្លាក់ចុះចំនួន ១,៥ ភាគរយសម្រាប់ប្រទេសឥណ្ឌូនេស៊ី។

អំឡុងពេលជំងឺរាតត្បាកូវីដ១៩ ការធ្លាក់ចុះ ៨,៣ ភាគរយត្រូវបានព្យាករណ៍សម្រាប់ហ្វីលីពីន ៧,១ ភាគរយសម្រាប់ប្រទេសថៃនិង ៦,០ ភាគរយសម្រាប់ទាំងម៉ាឡេស៊ី និងសិង្ហបុរី។

ប្រទេសមីយ៉ាន់ម៉ាត្រូវបានព្យាករណ៍ថានឹងមានកំណើនសេដ្ឋកិច្ចក្នុងអាស៊ានលឿនបំផុតនៅឆ្នាំនេះ ដោយផលិតផលក្នុងស្រុកសរុបកើនឡើង ២,០ ភាគរយ បន្ទាប់មកគឺប្រទេសវៀតណាមមានកំណើន ១,៦ ភាគរយ។

ប្រទេសឡាវត្រូវបានព្យាករណ៍ថានឹងកើនឡើងត្រឹមតែ ០,២ ភាគរយ និងព្រុយណេត្រឹមតែ ០,១ ភាគរយប៉ុណ្ណោះ។
ដោយឡែក នៅឆ្នាំ២០២១ ប្រទេសម៉ាឡេស៊ីត្រូវបានគេមើលឃើញថាមានការងើបឡើងវិញយ៉ាងខ្លាំង (៧,៨ ភាគរយ) បន្ទាប់មកទៀតគឺប្រទេសហ្វីលីពីន (៧,៤ ភាគរយ) ប្រទេសកម្ពុជា (៦,៨ ភាគរយ) និងប្រទេសវៀតណាម (៦,៧ ភាគរយ) ។

ក្នុងចំណោមសេដ្ឋកិច្ចអាស៊ានផ្សេងទៀតកំណើនសេដ្ឋកិច្ចយឺតត្រូវបានព្យាករណ៍សម្រាប់ឥណ្ឌូណេស៊ី (៦,១ ភាគរយ) មីយ៉ាន់ម៉ា ៥,៧ ភាគរយសិង្ហបុរី ៥,០ ភាគរយឡាវ ៤,៨ ភាគរយថៃ ៤,០ ភាគរយ និងព្រុយណេ (៣,២ ភាគរយ) ។

ការព្យាករណ៍រយៈពេលមធ្យមរបស់ IMF សម្រាប់ឆ្នាំ ២០២៥ បង្ហាញថា ប្រទេសកម្ពុជាមានកំណើនសេដ្ឋកិច្ចខ្ពស់ជាងការព្យាករណ៍កំណើន ៦,៩ ភាគរយ ដែលធ្វើឱ្យប្រទេសនេះក្លាយជាប្រទេសមានសេដ្ឋកិច្ចរីកចម្រើនលឿនបំផុតនៅក្នុងតំបន់។

កំណើនសេដ្ឋកិច្ចទាបត្រូវបានព្យាករណ៍សម្រាប់ប្រទេសវៀតណាម (៦,៦ ភាគរយ) មីយ៉ាន់ម៉ា និងហ្វីលីពីន (៦,៥ ភាគរយ) ឡាវ (៦,១ ភាគរយ) ឥណ្ឌូណេស៊ី (៥,១ ភាគរយ) ម៉ាឡេស៊ី (៥ ភាគរយ) ថៃ (៣,៧ ភាគរយ) សិង្ហបុរី (២,៥ ភាគរយ) និងព្រុយណេ (១,៨ ភាគរយ)៕

ការសិក្សា៖ វិស័យអចលនទ្រព្យនៅកម្ពុជាចាប់ផ្តើមងាកទៅរកភាពប្រក្រតីឡើងវិញ

ដោយ ៖ ប៊ី

ភ្នំពេញៈ ឆ្នាំ២០២០ គឺជាឆ្នាំមួយដែលមានបញ្ហាកើតឡើងមិនធ្លាប់មានពីមុនមកដោយសារជំងឺកូវីដ១៩ ហើយផលប៉ះពាល់របស់វាលើទីផ្សារអចលនទ្រព្យនៅកម្ពុជាគឺមានភាពខុសគ្នា។

នៅក្នុងត្រីមាសទី៣ ឆ្នាំ២០២០ ការកែតម្រូវអត្រាជួល និងកម្រិតនៃការជួលមានភាពយឺតជាងការរំពឹងទុក។ នេះបើយោងតាមការសិក្សារបស់ក្រុមហ៊ុនអន្តរជាតិមួយប្រចាំកម្ពុជា។

ទោះបីជាយ៉ាងណាក៏ដោយ គម្រោងអភិវឌ្ឍន៍ជាច្រើន ព្រមទាំងប្រតិបត្តិការជួល និងលក់ បានកើនឡើងនៅត្រីមាសទី៣ បើប្រៀបធៀបនឹងត្រីមាស២ ឆ្នាំ២០២០នេះ ប៉ុន្តែបើប្រៀបធៀបនឹងរយៈពេលដូចគ្នាក្នុងឆ្នាំ២០១៩ គឺមានធ្លាក់ចុះ។ ដូច្នេះក៏ដោយ ក៏វានៅតែបានបង្ហាញថា សកម្មភាពក្នុងវិស័យអចលនទ្រព្យ ចាប់ផ្តើមត្រឡប់មករកសភាពដើមជាបណ្តើរៗហើយ។

វិស័យលំនៅដ្ឋាន ៖ គម្រោងដីបុរីថ្មីចំនួន៤ ត្រូវបានបញ្ចប់ និងប្រគល់ជូនអតិថិជននៅខណ្ឌចំនួន៤ ដូចជាខណ្ឌមានជ័យ ច្បារអំពៅ ខណ្ឌពោធិ៍សែនជ័យ និងខណ្ឌជ្រោយចង្វារក្នុងរយៈពេល ៦ ខែគិតចាប់ពីត្រីមាសទី២ ឆ្នាំ ២០២០ ដល់ត្រីមាសទី៣ ឆ្នាំ ២០២០ ។ នេះបើយោងតាមរបាយការណ៍របស់ក្រុមហ៊ុន CBRE Cambodia។

របាយការណ៍បានបន្តថា “អ្វីដែលគួរអោយកត់សំគាល់ជាងនេះគឺថា ក្នុងរយៈពេលដូចគ្នា ទោះបីមានភាពមិនប្រាកដប្រជា ផ្នែកសេដ្ឋកិច្ចដែលកំពុងបន្តកើតមាន ក៏គម្រោងចំនួន១២ ត្រូវបានដាក់ដំណើរការនៅទូទាំង៧ ខណ្ឌស្មើនឹងប្រមាណ៤០០០យូនីត ដែលបង្ហាញពីការបន្តមានទំនុកចិត្តរឹងមាំលើវិស័យនេះ” ។

ខណ្ឌសែនសុខ បន្តទទួលបានគម្រោងថ្មីៗច្រើនជាង ដោយគម្រោងចំនួន៤ចាប់ ផ្តើមដាក់ដំណើរការសាងសង់ ខណៈដែលជ្រោយចង្វារ និងមានជ័យទាំងពីរ បានឃើញការបន្ថែមគម្រោងថ្មីចំនួន២រៀងខ្លួន។ អ្នកអភិវឌ្ឍន៍ដែលមានស្រាប់បានចូលរួមចំណែកដល់គម្រោងភាគច្រើន ទោះយ៉ាងណាអ្នកអភិវឌ្ឍន៍ថ្មីបានចំណែក២៥ភាគរយ នៃការបើកដំណើរគម្រោងថ្មី ក្នុងរយៈពេលនេះ ដែលបង្ហាញពីការផ្គត់ផ្គង់យ៉ាងទូលំទូលាយ នាពេលអនាគតនៅក្នុងវិស័យនេះ។

ខុនដូ ៖ ការផ្គត់ផ្គង់ខុនដូសរុបនៅទូទាំងរាជធានីភ្នំពេញ មានការកើនឡើង៣,៩៧%ក្នុងរយៈពេលត្រីមាសទី៣ ខណៈការកើនឡើងនេះ មានការចូលរួមតែមួយពីការបញ្ចប់ដំណាក់កាលទី១របស់គម្រោង Urban Village ហើយបានបង្កើនការផ្គត់ផ្គង់ខុនដូតម្លៃសមរម្យ ១៥.៦៧%។

អំឡុងត្រីមាសទី៣នេះ មិនមានគម្រោងថ្មីណាមួយ ត្រូវបានដាក់ឱ្យដំណើរការទេ ប៉ុន្តែមានគម្រោង៣ បានដាក់ចេញការអភិវឌ្ឍនូវដំណាក់កាលថ្មីៗ ទៅក្នុងទីផ្សារផ្គត់ផ្គង់ ដែលបង្ហាញថា អ្នកអភិវឌ្ឍន៍ដែលស្គាល់ពីទីផ្សារក្រុងភ្នំពេញ នៅតែមានសុទិដ្ឋិនិយមចំពោះវិស័យនេះ។
របាយការណ៍បានឱ្យដឹងថា គេរំពឹងថានៅត្រីមាសទី៤ឆ្នាំនេះ នឹងឃើញការបញ្ចប់គម្រោងចំនួន៤បន្ថែមទៀត ដែលនឹងចូលរួមចំណែកក្នុងទីផ្សារ ប្រមាណ២,៦០០យូនីត ។ ទោះយ៉ាងណា ការពន្យាពេលនៃការសាងសង់ នៅតែបន្តកើតមាននៅក្នុងវិស័យនេះ ដោយបច្ចុប្បន្នមានគម្រោងចំនួន៦ ពន្យាពេលបញ្ចប់គម្រោងទៅឆ្នាំ២០២។

តម្លៃលក់ជាមធ្យមនៅគ្រប់ផ្នែក បានបន្តប្រឈមនឹងសម្ពាធធ្លាក់ចុះ នៅក្នុងត្រីមាសទី។ ខុនដូតម្លៃមធ្យមធ្លាក់ចុះ១,៣៩% ខុនដូតម្លៃសមរម្យធ្លាក់ចុះ១,១៧% និងខុនដូប្រណីតធ្លាក់ចុះ ១,០២% ។
អ្នកអភិវឌ្ឍន៍នៅតែសកម្ម ក្នុងការផ្តល់ការបញ្ចុះតម្លៃ និងការផ្សព្វផ្សាយពីខុនដូយូនីតនៅក្នុងគម្រោងរបស់ពួកគេ ដើម្បីរក្សាល្បឿនលក់។

ការិយាល័យជួល ៖ អាគារការិយាល័យជួលថ្មីចំនួន៣ ត្រូវបានបញ្ជាប់ការសាងសង់នៅត្រីមាសទី៣ មានដូចជាអគារការិយាល័យ TK Central អគារ The Point និងអគារ Sayon Phnom Penh ដែលនឹងចូលរួមចំណែក ក្នុងទីផ្សារផ្គត់ផ្គង់ការិយាល័យបន្ថែម៣០,០០៧ ម៉ែត្រការ៉េ។
នៅដំណាច់ឆ្នាំនេះ អត្រាការិយាល័យជួលនៅទំនេរ នៅទូទាំងទីផ្សារត្រូវបានព្យាករណ៍ថា នឹងកើនឡើងដល់កម្រិតខ្ពស់បំផុត គិតចាប់តាំងពីឆ្នាំ ២០១១ ។ នៅត្រីមាសទី៣ អត្រានៃការកាន់កាប់មាន ៧៤,៧%។ ទោះយ៉ាងណាជា មួយនឹងការបញ្ចប់គម្រោងជាច្រើននៅត្រីមាសទី៤ ឆ្នាំ២០២០ នឹងធ្វើឱ្យអត្រានៃការកាន់កាប់ការិយាល័យជួលទំនងជានឹងធ្លាក់ចុះថែមទៀត។ គម្រោងការិយាល័យជួលចំនួន៨ ត្រូវបានបញ្ចាប់ការសាងសង់ គិតចាប់តាំងពីដើមឆ្នាំរហូតមកដល់ពេលនេះ ដោយអត្រាទំនេរគិតជាមធ្យម មានការកើនឡើងខ្ពស់។ ការអភិវឌ្ឍការិយាល័យជួល មួយចំនួននឹងត្រូវបានពន្យារពេល ដោយមានប៉ាន់ស្មានថា មានទំហំ ៥០,០០០ ម៉ែត្រការ៉េត្រូវបានពន្យារពេលទៅដល់ឆមាសទី១ ឆ្នាំ២០២១ ។

ទីផ្សារលក់រាយ ៖ គម្រោងផ្សារទំនើបបែបសហគមន៍ (Community Mall) ចំនួន២ត្រូវបានបញ្ចប់ការសាងសង់នៅក្នុងត្រីមាសទី៣ ឆ្នាំ២០២០នេះ ដែលបានធ្វើឱ្យទំហំនេះកើនឡើងដល់ ២១,៨០០ ម៉ែត្រការ៉េ។

យោងតាមរបាយការណ៍របស់ក្រុមហ៊ុន CBRE Cambodia ចេញផ្សាយកាលពីពេលថ្មីនេះបង្ហាញថា គម្រោងផ្សារទំនើបបែបសហគមន៍ (Community Malls) ចំនួន២ រួមមានផ្សារទំនើប The One Mall និង 313 Quayside ដែលផ្សារទាំងពីរនេះបន្ថែមដល់ ២១,៨០០ម៉ែត្រការ៉េ ស្មើនឹង២៦.១ភាគរយ ក្នុងចំណោមកផ្សារទាំងអស់ និងប្រមាណ ៦.០៩ ភាគរយ ទៅនឹងការផ្គត់ផ្គង់ផ្សារទំនើបនៅក្នុងត្រីមាសទី៣នេះ៕

ប្រទេសអៀរឡង់សម្រេចបោះទុន ១៤០ លានផោនរៀបចំកំពង់ផែ និងសាងសង់អគារខ្ពស់ជាងគេនៅក្នុងប្រទេសខ្លួន

ដោយវុត្ថា

អៀរឡង់៖ ក្រុមប្រឹក្សាក្រុង Cork របស់ប្រទេសអៀរឡង់ (Cork City Council) បានចេញសេចក្តីសម្រេចឱ្យមានការអភិវឌ្ឍន៍ក្រុងកំពង់ផែចំណាស់មួយ (Port of Cork) ក្នុងទំហំថវិកាចំនួន ១៤០ ផោន រូមជាមួយនឹងការសាងសង់អគារខ្ពស់ជាងគេនៅក្នុងប្រទេស។

តាមការចុះផ្សាយរបស់ គេហទំព័ត៌មាន www.rte.ie បានឱ្យដឹងថា
អគារដែលនឹងត្រូវសាងសង់នេះ នៅ Custom House Quay នឹងមានកម្ពស់ ១៤០ ម៉ែត្រឬ ៣៤ ជាន់និងមានសណ្ឋាគារលំដាប់ផ្កាយ ៥ និង ២៤១ បន្ទប់។

ក្រុមហ៊ុនអភិវឌ្ឍន៍អគារ Tower Holdings បានសម្តែងការស្វាគមន៍ចំពោះព័ត៌មានចំពោះការអនុញ្ញាតិឱ្យមានការសាងសង់អគារប្រើប្រាស់ចម្រុះនេះ មានទំាងផ្សារទំនើប និងមជ្ឈមណ្ឌលសម្រាប់ភ្ញៀវទេសចរដោយផ្តោតសំខាន់លើវប្បធម៌ និងបេតិកភណ្ឌសមុទ្រ។

មន្ត្រីរដ្ឋបាលក្រុង Cork បានឱ្យដឹងថា “យើងបានធ្វើការយ៉ាងជិតស្និតជាមួយនឹង ក្រមប្រឹក្សាក្រុង (Cork City Council) ក្នុងការរៀបចំប្លង់ ដើម្បីធានា ថា បានបំពេញនូវរាល់តម្រូវការទាំងអស់ជាពិសេសទាក់ទងនឹងវិធីអភិរក្ស និងសមាហរណកម្មឆ្ពោះទៅរកអគារប្រវត្តិសាស្រ្តដែលមានស្រាប់” ។

មន្ត្រីរូបនោះថ្លែងថា “ឥឡូវនេះ យើងត្រូវពិនិត្យឱ្យបានពេញលេញនូវលក្ខខណ្ឌនៃការធ្វើផែនការ និងចំណុចជាក់លាក់មួយចំនួនដើម្បីបង្កើតប្រសិទ្ធភាពទៅលើគ្រោងការណ៍នេះ”។

ក្រុមប្រឹក្សាក្រុង ក៏បានដាក់ចេញនូវផែនការកែលម្អរអគារ ប្រវត្តិសាស្ត្រ Custom House ដែលនឹងរៀបចំឱ្យមានឃ្លាំងផ្ទុកទំនិញ ហើយនឹងត្រូវបើកជាសាធារណៈជាលើកដំបូងរបស់ខ្លួន។

បច្ចុប្បន្នអគារខ្ពស់ជាងគេរបស់ប្រទេសអៀរឡង់គឺជា អគារ Capital Dock ដែលមានកម្ពស់ ២២ ជាន់នៅទីក្រុង Dublin ។

វិស័យសំណង់នៅតំបន់អាស៊ីអាគ្នេយ៍រងភាពក្រឡាប់ចាក់មិនធ្លាប់មានក្នុងប្រវត្តិសាស្ត្រ

ដោយ ហ្សូលី

ភ្នំពេញៈ យោងតាមរបាយការណ៍របស់ GlobalData បានអោយដឹងថា ការចាក់សោរ និងការឃ្លាតឆ្ងាយពីសង្គមយ៉ាងតឹងរ៉ឹង ដោយសារតែជំងឺរាតត្បាតរ៉ាំរ៉ៃ បានបង្អាក់ឧស្សាហកម្មសំណង់ នៅទូទាំងអាស៊ីខាងត្បូងនិងអាស៊ីអាគ្នេយ៍។

ឧស្សាហកម្មសំណង់ក្នុងតំបន់ត្រូវបានគេរំពឹងថា នឹងធ្លាក់ចុះ៨,៥ភាគរយក្នុងឆ្នាំ ២០២០ ។ ទោះបីយ៉ាងណា បើការរាលដាលនៃរលកឆ្លងលើកទី២ ទិន្នផលនឹងកើនឡើងយ៉ាងខ្លាំងនៅឆ្នាំ២០២១ ដោយសារឥទ្ធិពលមូលដ្ឋានទាប និងសក្តានុពលជាមូលដ្ឋានសម្រាប់កំណើនក្នុងតំបន់។

របាយការណ៍នេះបានបង្ហាញថា ដោយសារតែការកើនឡើង នៃចំនួនប្រជាជនវណ្ណៈកណ្តាល និងការវិនិយោគ ដែលបានភ្ជាប់មកនៅក្នុងលំនៅដ្ឋាន និងហេដ្ឋារចនាស ម្ព័ន្ធ ការវិនិយោគធ្លាក់ចុះនេះ ត្រូវបានឆ្លុះបញ្ចាំងពីការធ្លាក់ចុះយ៉ាងខ្លាំង ដែលមិនធ្លាប់មានពីមុនមកនៅក្នុងត្រីមាសទី២ នៅក្នុងប្រទេស ដូចជា សិង្ហបុរី (៥៩,៣ ភាគរយ) ឥណ្ឌា (៥០,៣ ភាគរយ) ម៉ាឡេស៊ី (៤៤,៥ ភាគរយ) និងហ្វីលីពីន (៣៣,៥ ភាគរយ) ។

របាយការណ៍បានចង្អុលបង្ហាញថា សំណង់ឧស្សាហកម្ម អាចទទួលបានផលប្រយោជន៍ដោយផ្ទាល់ ក្នុងរយៈពេលពីមធ្យមទៅរយៈពេលវែង ព្រោះប្រទេសឧស្សាហកម្មកំពុងធ្វើពិពិធកម្ម ខ្សែសង្វាក់ផ្គត់ផ្គង់របស់ពួកគេឱ្យឆ្ងាយពីប្រទេសចិន។ ជាលទ្ធផល អាស៊ីខាងត្បូង និងអាស៊ីអាគ្នេយ៍ ផ្តល់នូវជម្រើសគួរឱ្យទាក់ទាញ ដោយតម្លៃពលកម្មទាបក៏ដូចជាទីផ្សារដ៏ធំមួយ នៅក្នុងទម្រង់នៃការកើនឡើងចំនួនប្រជាជនវណ្ណៈកណ្តាល។

លោក Dhananjay Sharma អ្នកវិភាគផ្នែកសំណង់នៅ GlobalData មានប្រសាសន៍ថា“ ហេដ្ឋារចនាសម្ព័ន្ធត្រូវបានគេរំពឹងថា នឹងក្លាយជាកត្តាជំរុញកំណើន ដ៏សំខាន់មួយនៅឆ្នាំ២០២១ និងលើសពីនេះ នៅពេលដែលរដ្ឋាភិបាលនៅទូទាំងតំបន់ ពិនិត្យមើលការវិនិយោគលើហេដ្ឋារចនាសម្ព័ន្ធ ដើម្បីជំរុញសេដ្ឋកិច្ចនិងបង្កើតការងារ” ។

នេះនឹងត្រូវបានជួយដោយការវិនិយោគរបស់ចិន នៅក្នុងគម្រោងខ្សែក្រវាត់ និងផ្លូវផ្តួចផ្តើម (BRI)នៅក្នុងតំបន់អាស៊ីខាងត្បូង និងអាស៊ីអាគ្នេយ៍ ដែលនឹងគាំទ្រដល់កំណើនហេដ្ឋារចនាសម្ព័ន្ធនៅក្នុងប្រទេសប៉ាគីស្ថាន បង់ក្លាដែស ក៏ដូចជា សមាជិកអាស៊ានរួមមានប្រទេសមីយ៉ាន់ម៉ា វៀតណាម ម៉ាឡេស៊ី និងឥណ្ឌូនេស៊ី ។ ការបង្កើនការវិនិយោគក្នុងគម្រោងថាមពលកកើតឡើងវិញ និងហេដ្ឋារចនាសម្ព័ន្ធ5G ក៏នឹងជួយគាំទ្រដល់កំណើនក្នុងរយៈពេលមធ្យមនិងរយៈពេលវែងផងដែរ។

ខណៈដែលទីផ្សារលំនៅដ្ឋានខ្សោយ នៅក្នុងប្រទេសមួយចំនួនក្នុងតំបន់ សូម្បីតែមុនពេលការផ្ទុះឡើង នៃការរាតត្បាត និងការចាក់សោរក្រុងជាបន្តបន្ទាប់ បានធ្វើឱ្យស្ថានការណ៍កាន់តែអាក្រក់ទៅ។ វិស័យនេះនឹងបន្តការតស៊ូ នៅពេលសកម្មភាពសេដ្ឋកិច្ចចុះខ្សោយការថយចុះប្រាក់ និងការគ្មានការងារធ្វើកើនឡើង។ សារាចរដែលមិនបានបង្ហាញនឹងដាក់សម្ពាធបន្ថែមទៀត នៅពេលដែលអ្នកអភិវឌ្ឍន៍ នឹងបញ្ឈប់ឬលុបចោលគម្រោងនានាក្នុងរយៈពេលខ្លី។

លើសពីនេះទៀតវិស័យពាណិជ្ជកម្ម ក៏ត្រូវបានគេរំពឹងថា នឹងរងផលប៉ះពាល់យ៉ាងខ្លាំងពីការផ្ទុះឡើងនៃវីរុស ដោយការវិនិយោគនៅក្នុងទីផ្សារពាណិជ្ជកម្ម ត្រូវបានគេរំពឹងថានឹងត្រូវលុបចោល ឬរុញច្រានថយក្រោយ ដែលឆ្លុះបញ្ចាំងពីការដួលរលំនៅក្នុងឧស្សាហកម្មទេសចរណ៍។

វិស័យឧស្សាហកម្មត្រូវបានរំពឹងថា នឹងរងផលប៉ះពាល់ក្នុងរយៈពេលខ្លី ដែលរងផលប៉ះពាល់ ដោយការបិទទ្វារជាបណ្តោះអាសន្ន នៃផ្នែកផលិតកម្មរបស់ក្រុមហ៊ុនផ្សេងៗនៅទូទាំងតំបន់។ នេះនឹងប៉ះពាល់ដល់ការវិនិយោគ ព្រោះថាក្រុមហ៊ុនអាចកាត់បន្ថយផែនការពង្រីករបស់ខ្លួន។

ទោះយ៉ាងណា ក្នុងរយៈពេលវែងផ្នែកសំណង់ឧស្សាហកម្ម ទំនងជានឹងទទួលបានអត្ថប្រយោជន៍ ពីសង្គ្រាមពាណិជ្ជកម្មរវាងសហរដ្ឋអាមេរិក និងចិន ក៏ដូចជា ការផ្លាស់ប្តូរខ្សែសង្វាក់ផ្គត់ផ្គង់ពីប្រទេសចិន បន្ទាប់ពីមានការរអាក់រអួលកាលពីដើមឆ្នាំ២០២០ ៕

តើកត្តាអ្វីខ្លះកំពុងជម្រុញឲ្យប្រជាពលរដ្ឋខ្មែររស់នៅខុនដូកាន់តែច្រើន

ដោយគង់ សូរិយា

ភ្នំពេញៈ មានកត្តាសំខាន់ៗជាច្រើនបាននិងកំពុងធ្វើឲ្យមានការផ្លាស់ប្តូរបែបផែនជីវិតរបស់ប្រជាពលរដ្ឋកម្ពុជា ខណៈពួកគេកាន់តែច្រើនបានសម្រេចចិត្តវិនិយោគលើខុនដូ និងទិញសំរាប់ការរស់នៅ។

យោងតាមការសិក្សារបស់ក្រុមហ៊ុន Urban Living Solution បានរកឃើញថា ទីក្រុងភ្នំពេញនឹងមានប្រជាពលរដ្ឋ រស់នៅប្រមាណ៥លាននាក់នៅឆ្នាំ២០៣០ខាងមុខ ដែលកំនើនប្រជាសាស្ត្រនេះបាន និងកំពុងជះឥទ្ឋិពលដល់ការផ្លាស់ប្តូរបែបផែនជីវិត ការផ្លាស់ប្តូរផ្នែកនគររូបនីយកម្មទីក្រុង។ ការសិក្សានេះបានរកឃើញកត្តាសំខាន់ៗចំនួន៣ ដូចជា ទី១ កំនើនតម្លៃអចលនទ្រព្យពិសេសលំនៅដ្ឋាន នឹងធ្វើឲ្យប្រជាជនរស់នៅតាមខុនដូ ទី២ ការកកស្ទះចរាចរណ៍នឹងកើនឡើងកាន់តែខ្លាំង ហេតុនេះ ប្រជាពលរដ្ឋនឹងស្វែងរកកន្លែងរស់នៅជិតកន្លែងធ្វើការរបស់ពូកគេ។

ទី៣ ការផ្លាស់ប្តូរគុណភាពជីវិត មានន័យថាគុណភាពជីវិតកាន់តែប្រសើរឡើង ដោយសារការរីកចម្រើននៃបច្ចេកវិទ្យា ដោយពួកគេអាចកុំម៉ង់អាហារញុំាបានតាមការចង់បាន និងមានសេវាកម្មដឹកដល់ផ្ទះរបស់ពួកគេ។

ទីប្រឹក្សាសមាគមអចលនទ្រព្យសកល និងជាអគ្គនាយកនៃ Propertyarea.asiaដែលបានតាមដានកាវិវត្ត នៃវិស័យអចលនទ្រព្យនៅកម្ពុជា បានយល់ស្របនឹងការសសិក្សាខាងលើ ដោយលោកបានថ្លែងថា ពិតណាស់ការរីកចម្រើននៃវិស័យបច្ចេកវិទ្យា ការកើនឡើងនូវការយល់ដឹងរបស់ប្រជាពលរដ្ឋ និងការរីកចម្រើននៃសេដ្ឋកិច្ចសង្គម ពិតជាបាននិងកំពុងផ្លាស់ប្តូររបៀបនៃការគិតរបស់ប្រជាពលរដ្ឋ។

លោកបន្តថា “ការស្នាក់នៅតាមខុនដូ បានផ្តល់ភាពងាយស្រួលច្រើនដោយសារគំរោងខ្លះបានផ្តល់សេវាកម្ម ជាកញ្ចប់នៅក្នុងគម្រោងរបស់ពួកគេ ដូចជា មានអាហែងទឹក មាន Sky Bar មានMini Mart សេវាកម្មហាត់ប្រាណ និងកន្លែងកំសាន្តនៅលើដំបូលដទៃទៀត” ។

លោកយិន លាងគង់បានបន្តទៀតថា បទពិសោធន៍បែបនេះ បានធ្លាប់កើតមាននៅប្រទេសថៃ ម៉ាឡេស៊ី វៀតណាមជាដើម ដែលប្រជាពលរដ្ឋដំបូងឡើយពួកគេមិនចង់រស់នៅតាមខុនដូនោះទេ ប៉ុន្តែការរីកចម្រើនផ្នែកនគរូបនីយកម្ម បានផ្លាស់ប្តូរប្រព័ន្ឋនៃការគិតរបស់ពួកគេយ៉ាងឆាប់រហ័ស ហើយប្រជាជនខ្មែរបាននិងកំពុងទទួលឥទ្ឋិពលនេះ៕

គម្រោងតំបន់ទេសចរណ៍ “កំពតឋានសួគ៌” តម្លៃច្រើនលានដុល្លារ គ្រោងបើកសម្ពោធនៅដើមឆ្នាំ២០២១

ដោយៈ រ៉ាណេត

កំពតៈ គម្រោងអភិវឌ្ឍន៍ជាតំបន់កម្សាន្ត និងលំហែរកម្រិតខ្ពស់ប្រចាំខេត្ត “កំពតឋានសួគ៌” ដែលចំណាយដើមទុន ក្នុងវិនិយោគជាច្រើនលាន់ដុល្លារ គ្រោងនឹងចាប់បើកដំណើរជាផ្លូវការនៅត្រឹមថ្ងៃទី១ខែមករា ឆ្នាំ២០២ឆាប់ៗខាងមុខនេះ ដើម្បីបម្រើសេចក្ដីត្រូវការរបស់ទេសចរជាតិ និងអន្តរជាតិ។

លោកឧកញ៉ានួន អកម្ចាស់គំរោងអភិវឌ្ឈន៍គំរោងនេះបានមានប្រសាសន៍កាលពីល្ងាចថ្ងៃទី១៤ ខែតុលា ឆ្នាំ២០២០ថា កំពតជាខេត្តមួយដែលមានសក្ដានុពល និងអំណោយផលពីធម្មជាតិ ដែលក្រៅពីទីតាំងភូមិសាស្ត្រល្អជាតំបន់សមុទ្រ និងមានដៃសមុទ្រកាត់ខ្វាត់ខ្វែង នៅកៀកភ្នំពេញ ដែលមានភាពងាយស្រួល និងចំណាយពេលតិចក្នុងការធ្វើដំណើរ ហើយតម្លៃដីនៅទាបនៅឡើយ បើប្រៀបធៀបទៅនឹងខេត្តព្រះសីហនុ ដែលផ្តល់ភាពងាយស្រួលដល់អ្នកអភិវឌ្ឍន៍ និងមានឱកាសទទួលបានចំណេញច្រើនពីការវិនិយោគ។

លោកឧកញ៉ាបានបន្តថា “តាមរយៈភាពល្អប្រសើរនៃកត្តាភូមិសាស្ត្រ ជាពិសេសភាពអំណោយផលពីធម្មជាតិ ទៅលើវិស័យទេសចរណ៍ ខ្ញុំជឿជាក់ថា នៅថ្ងៃអនាគតខាងមុខដ៏ខ្លីនេះ ខេត្តកំពតនឹងទាក់ទាញទេសចរជាតិ និងអន្តរជាតិយ៉ាងច្រើនជាក់ជាមិនខាន ខណៈដែលបច្ចុប្បន្ននេះមានអ្នកវិនិយោគ និងអភិវឌ្ឍន៍ជាច្រើនចំណាយដើមទុនជាច្រើនលានដុល្លារលើការវិនិយោគ និងកែច្នៃជាតំបន់កម្សាន្តបែបធម្មជាតិជាច្រើនទីតាំង” ។

លោកឧកញ៉ានួន អក បានមានប្រសាសន៍ប្រាប់ឱ្យថា នៅក្នុងចំណោមគម្រោងអភិវឌ្ឍន៍ និងកែច្នៃបង្កើតជាតំបន់កម្សាន្តលំហែរកាយបែបធម្មជាតិ នៅតំបន់ដែលមានជួរព្រៃភ្នំ ដងស្ទឹង ក៏ដូចជាដៃសមុទ្រជាច្រើនគម្រោងនោះ លោកក៏បានបោះដើមទុនជាច្រើនលានដុល្លារ ក្នុងការវិនិយោគបង្កើតតំបន់កម្សាន្ត និងលំហែរនៅក្នុងខេត្តកំពតផងដែរ ដោយមានឈ្មោះថា កំពតឋានសួគ៌ ស្ថិតនៅភូមិអង្គ ឃុំត្រពាំងព្រីង ស្រុកទឹកឈូ ខេត្តកំពត ។

លោកឧកញ៉ាបញ្ជាក់ថា “គម្រោងមួយនេះគឺមានទំហំធំធេង និងត្រូវបានបែងចែកជាតំបន់កម្សាន្តផ្សេងៗគ្នាជាច្រើន មិនតិចជាង៥នោះទេ ដូចជា តំបន់កម្សាន្តសួនផ្កាឈូករ័ត្ន តំបន់កម្សាន្ត និងលំហែរព្រៃកោងកាង ភោជនីយដ្ឋាន តំបន់ផ្ទះលំហែរ និងសណ្ឋាគារ ដែលនៅថ្ងៃអនាគត អាចសាងសង់រហូតដល់ប្រមាណ១០០០បន្ទប់” ។

លោកឧកញ៉ាបានបញ្ជាក់ថា “ជាគោលដៅនៃភាពជោគជ័យរបស់គម្រោងគឺការប្រមូលផ្តុំនូវមនុស្ស ឱ្យទៅរស់នៅក្នុងតំបន់ដ៏ស្រស់ស្អាតមួយនេះ បានកាន់តែច្រើន រួមជាមួយនឹងការបង្កើតជាទីប្រជុំជន ដែលក្រៅពីជាតំបន់កម្សាន្ត ថែមទាំងអាចអនុញ្ញាតឱ្យបងប្អូនប្រជាជនមានការងារធ្វើ កាត់បន្ថយការចំនាកស្រុក ហើយអាចផ្តល់ប្រាក់ចំណូលចូលគ្រួសារ យ៉ាងហោចណាស់១០០០ដុល្លារក្នុងមួយខែ ក៏ដូចជាអាចផ្តល់ចំណូលដល់រាជរដ្ឋាភិបាលកម្ពុជាផងដែរ” ។

នៅទីនេះត្រូវបានហ៊ុំព័ទ្ធ ទៅដោយខ្សែទឹកសមុទ្រទាំងរដូវប្រាំង ទាំងរដូវវស្សា មានហ្វូងសត្វស្លាបទឹក ជាពិសេសមានដើមរុក្ខជាតិ ព្រៃកោងកាងនៅជុំយ៉ាងស្រស់ស្អាត ដែលនៅពេលអនាគត កំពតឋាន អាចនឹងកា្លយជាតំបន់ទេសចរណ៍ឈានមុខគេ ដែលអាចផ្តល់អត្ថប្រយោជន៍ដល់ប្រជាជនក្នុងតំបន់ ក៏ដូចជាផ្តល់ការងារជូនដល់ប្រជាពលរដ្ឋទូទៅប្រមាណ១០០០នាក់ ខណៈដែលគម្រោងដ៏អស្ចារ្យប្រចាំខេត្តកំពតមួយនេះ នឹងបើកសម្ពោធដំណើរការជាផ្លូវការនៅត្រឹមថ្ងៃទី១ ខែមករា ឆ្នាំ២០២១ខាងមុខនេះ៕

ស្វែងយល់ពីតួនាទីសំខាន់ៗចំនួន៣របស់ធនាគារជាតិនៃកម្ពុជា

ដោយៈប៊ី

ភ្នំពេញៈ ទេសាភិបាលធនាគារជាតិនៃកម្ពុជា លោកជា ចាន់តូ បានថ្លែងថា ធនាគារជាតិ គឺជាធនាគារកណ្តាលរបស់កម្ពុជា ដែលមានតួនាទីចម្បងបី ដើម្បីជួយជំរុញកំនើនសេដ្ឋកិច្ចកម្ពុជា។

លោកបានលើកឡើងថា តួនាទីចម្បងទី១របស់យើងគឺស្ថេរភាពថ្លៃ និងផ្តល់ប្រព័ន្ធធនាគារមួយដែលមានប្រសិទ្ធភាព ដើម្បីគាំទ្រដល់សេដ្ឋកិច្ចកម្ពុជា។ យើងបោះផ្សាយប្រាក់រៀលជារូបិយវត្ថុ ដែលប្រើប្រាស់រាល់ថ្ងៃ។ ដោយគ្រប់គ្រងប្រាក់រៀល ផ្អែកលើតម្រូវការសេដ្ឋកិច្ច យើងរក្សាបាននូវតម្លៃប្រាក់រៀល និងការងារអំណាចទិញនៃចំណូលរបស់ប្រជាពលរដ្ឋ។

ប្រព័ន្ធរូបិយវត្ថុជួយសម្រួលដល់ការធ្វើពាណិជ្ជកម្ម ហើយការគ្រប់គ្រងប្រាក់បានល្អ និងមានថេរភាពគឺជាមូលដ្ឋានពិប្រាកដ ក្នុងការធានាបាននូវជំនឿទុកចិត្តរបស់វិនិយោគិន និងការអភិវឌ្ឍរបស់ប្រទេស។

តួនាទីចម្បងទី២ របស់យើងគឺរក្សាថេរភាពប្រព័ន្ធធនាគារ តាមរយៈការត្រួតពិនិត្យ និងការធ្វើនិយ័តកម្មយ៉ាងតឹងរ៉ឹងលើប្រព័ន្ធធនាគារ។ យើងបានធ្វើឱ្យធនាគារទាំងឡាយមានសុវត្ថិភាព និងទទួលបាននូវការជឿទុកចិត្តពីសាធារណៈជន។

ធនាគារដើរតួនាទីយ៉ាងសំខាន់ ក្នុងការកែនប្រមូលប្រាក់ទៅឱ្យអ្នកបោះទុន។ អន្តរិយកម្មបែបនេះ ជួយដល់ការពង្រីកអាជីវកម្ម និងសកម្មភាពសេដ្ឋកិច្ចនានា។ រាល់ថ្ងៃចំនួនប្រជាជនកម្ពុជា ដែលប្រើប្រាស់សេវាកម្មធនាគារ បានកើនឡើងជាលំដាប់ ដែលមានរហូតដល់ការទិញ បណ្តាក់នូវសម្ភារៈប្រើប្រាស់នានា និងការទិញផ្ទះដោយបង់រំលស់ទៀតផង។

ខាងលើនេះអាចកើតឡើងទៅបាន នៅពេលសាធារណៈជនមានជំនឿទុកចិត្តលើប្រព័ន្ធធនាគារ និងដាក់ប្រាក់សន្សំក្នុងគណនីធនាគារ។

តួនាទីចម្បងទី៣ របស់យើង គឺការផ្តល់នូវហេដ្ឋារចនាសម្ព័ន្ធហិរញ្ញវត្ថុ ដែលជួយវិស័យធនាគារ និងហិរញ្ញវត្ថុ ដំណើរការបានដោយរលូន និងប្រសិទ្ធភាព។ ប្រព័ន្ធបច្ចេកវិទ្យាទូទាត់ថ្មីប្រកបដោយសុវត្ថិភាព និងឆាប់រហ័សសម្រួលដល់ការធ្វើពាណិជ្ជកម្ម និងការវិនិយោគទាំងក្នុងស្រុក និងអន្តរជាតិ។

យើងផ្តល់សេវាធនាគារកាន់តែមានប្រសិទ្ធភាព រក្សាបាននូវរូបិយវត្ថុ ប្រកបដោយទំនុកចិត្តនៅក្នុងសេដ្ឋកិច្ច ដែលកំពុងរីកចម្រើន សម្រាប់ប្រយោជន៍ដល់ប្រជាជនកម្ពុជាគ្រប់រូប៕

1...2,2192,2202,221...3,257 Page 2,220 of 3,257