អ្នកជំនាញៈចុងឆ្នាំ២០២១ទីផ្សារជួលអគារការិយាល័យនៅកម្ពុជានឹងមាន តម្រូវការខ្ពស់ឡើងវិញ

ដោយៈ រ៉ាណេត

ភ្នំពេញៈ បន្ទាប់ពីទទួលរងនូវសម្ពាពីវិបត្តិសេដ្ឋកិច្ចសាកល កាលពីឆ្នាំ២០២០កន្លងទៅនេះ អ្នកជំនាញនៅក្នុងវិស័យអចលនទ្រព្យបានអះអាងថា សម្រាប់ឆ្នាំ២០២១នេះទីផ្សាររួមមួយនេះ ជាពិសេសទីផ្សារជួលអគារការិយាល័យ នឹងវិលត្រឡប់មករកភាពល្អប្រសើរវិញជាបណ្តើរៗ ខណៈដែលស្ថានភាពប្រឈមត្រូវបានកាត់បន្ថយ។

អគ្គនាយកក្រុមហ៊ុនភ្នាក់ងារអចលនទ្រព្យអន្តរជាតិ Coldwell Banker Cambodia លោក Ken Lo បានមានប្រសាសន៍ប្រាប់នៅព្រឹកថ្ងៃទី១៩ ខែមករា ឆ្នាំ២០២១នេះថា ទីផ្សារជួលអគារការិយាល័យ ដែលទទួលរងនូវផលប៉ះពាល់ពីសម្ពាធ នៃសេដ្ឋកិច្ចពិភពលោក ចាប់តាំងពីដើមឆ្នាំ២០២០មកនោះ អាចនឹងចាប់ផ្តើមវិលទៅរកភាពល្អប្រសើរឡើងវិញជាបណ្តើរៗឡើងវិញហើយ។

លោកបានបន្តថា “ទីផ្សារជួលអគារការិយាល័យនៅកម្ពុជា ទើបតែមានតម្រូវការខ្ពស់កាលពីប្រមាណ២-៣ឆ្នាំមុន ខណៈដែលសេដ្ឋកិច្ចកម្ពុជាមានកំណើនល្អ សន្ទុះនៃការធ្វើពាណិជ្ជកម្ម ក៏ដូចជាសកម្មភាពនៃការវិនិយោគ អភិវឌ្ឍន៍នៅក្នុងវិស័យសំណង់ និងអចលនទ្រព្យមានការកើនឡើងខ្លាំង”។លោកបន្តថា “ប៉ុន្តែទីផ្សារមួយនេះបានធ្លាក់ចុះវិញចាប់តាំងពីដើមឆ្នាំ២០២០ ដែលបណ្តាលមកពីវិបត្តិសាកល ហើយក្នុងនោះក៏មានវិស័យផ្សេងៗជាច្រើនទៀតធ្លាក់ចុះដូចគ្នា”។

នៅពេលដែលកំណើនសេដ្ឋកិច្ចមានការកើនឡើង ការធ្វើពាណិជ្ជកម្ម និងវិនិយោគនៅក្នុងវិស័យផ្សេងៗ មានស្ថានភាពល្អប្រសើរនោះ វានឹងអំណោយផលដល់វិស័យអចល​នទ្រព្យដូចគ្នា ក្នុងនោះតម្រូវការទីផ្សារជួលអគារការិយាល័យក៏មានខ្ពស់ ប៉ុន្តែនៅពេលដែលសេដ្ឋកិច្ចធ្លាក់ចុះ វាក៏ទទួលរងនូវផលប៉ះពាល់ផងដែរ។

លោក Ken Lo បានមានប្រសាសន៍បញ្ជាក់ថា “ឆ្នាំ២០២១នេះ ខ្ញុំមានជំនឿថា ទីផ្សារអចលនទ្រព្យ ដែលរាប់បញ្ចូលទាំងតម្រូវការជួលអគារការិយាល័យ នឹងចាប់ផ្តើមមានកំណើនឡើងវិញ បន្ទាប់ពីស្ថានភាពប្រឈមនឹងជំងឺឆ្លងត្រូវបានកាត់បន្ថយ ជាពិសេសក្រោយពេលវ៉ាក់សាំងត្រូវបានចាក់ការពារទូលំទូលាយ និងមានប្រសិទ្ធភាពខ្ពស់នៅតាមបណ្តាប្រទេសនានាទូទាំងសាកល”។ លោកបន្តថា “ខ្ញុំគិតថា ប្រសិនបើការប្រើប្រាស់វ៉ាក់សាំងមានប្រសិទ្ធភាពខ្ពស់ យ៉ាងយូរនៅត្រឹមចុងឆ្នាំ២០២១ខាងមុខនេះ ទីផ្សារអចលនទ្រព្យនៅកម្ពុជា នឹងងាកទៅរកស្ថានភាពល្អប្រសើរឡើងវិញ ដោយផ្តើមចេញពីទីផ្សារក្នុងស្រុកមុនពេលអ្នកនៅក្រៅស្រុកវិលមកកម្ពុជាវិញ”។

លោកបានបញ្ជាក់ឱ្យដឹងថា ទីផ្សារអចលនទ្រព្យនៅកម្ពុជា នឹងមានភាពល្អប្រសើរឡើងវិញ ក្នុងល្បឿនលឿនជាងបណ្តាប្រទេសជិតខាងមួយចំនួន ដោយសារតែកម្ពុជាមានអំណោយផល ពីកិច្ចព្រមព្រៀងពាណិជ្ជកម្មសេរីជាមួយប្រទេសចិន ដែលអាចទាក់ទាញបណ្តាក្រុមហ៊ុនអន្តរជាតិ ឱ្យចូលមកកាន់កម្ពុជាកាន់តែច្រើន។

បន្ថែមពីនេះ កិច្ចព្រមព្រៀងពាណិជ្ជកម្មជាមួយនឹងប្រទេសកូរ៉េ ជប៉ុន ឥណ្ឌា និងបណ្តាប្រទេសផ្សេងៗមួយចំនួន ដែលបច្ចុប្បន្នកំពុងបន្តដំណើរការចរចា និងអាចសម្រេចក្នុងពេលឆាប់ៗខាងមុខនេះ។ ទាំងអស់នេះគឺជាលក្ខណៈសម្បត្តិដ៏ល្អរបស់កម្ពុជា ក្នុងការទាក់ទាញការវិនិយោគកាន់តែច្រើន។ នៅពេលមានកំណើនវិនិយោគ ទាំងសេដ្ឋកិច្ចជាតិ ទាំងទីផ្សារអចលនទ្រព្យ ក៏នឹងរីកចម្រើនដូចគ្នា ហើយក្នុងតម្រូវការទីផ្សារអគារសម្រាប់ធ្វើការរិយាល័យ ធ្វើជាទីតាំងក្រុមហ៊ុនប្រតិបត្តិការក៏មានកំណើនដូចគ្នាផងដែរ។លោកKen Loបញ្ជាក់ឲ្យដឹង៕

ផ្សារទំនើបសហគមន៍ចំនួន៥បានបើកដំណើរការខណៈអត្រាជួលបន្តធ្លាក់ចុះ

ដោយៈ ប៊ី

ភ្នំពេញៈ ផ្សារទំនើបសហគមន៍ចំនួន៥បានដាក់ដំណើរការ ដោយបានបន្ថែមចំនែ​កថ្មីចំនួណ៤០,៦៥០ម៉ែត្រក្រឡា នៅក្នុងទីផ្សារកាលពីឆ្នាំ២០២០ កើនឡើង១៧,៦ភាគរយបើធៀបនឹងឆ្នាំ២០១៩។ នេះបើយោងតាមការរបាយការណ៍របស់ក្រុមហ៊ុន CBRE Cambodia ចេញផ្សាយកាលពីពេលថ្មីៗនេះ។

អត្រាកាន់កាប់នៅផ្សារទំនើប (ទីផ្សារលក់រាយ) នៅក្នុងត្រីមាសទី៤ឆ្នាំមុន បានធ្លាក់ចុះ៥.៥ភាគរយ បើធៀបនឹងត្រីមាសទី៣ ខណៈអត្រាកាន់កាប់ ធ្លាក់ចុះ៥,៩ភាគរយក្នុងឆ្នាំ២០២០ ធៀបនឹងឆ្នាំ២០១៩។

របាយការណ៍ដដែលបានបញ្ជាក់ថា ការធ្លាក់ចុះនៃអត្រាកាន់កាប់បានកើតឡើង ដោយសារការកើនឡើង នៃការផ្គត់ផ្គង់ក្នុងឆ្នាំ២០២០ ស្របពេលដែលភាពប្រឈមនឹងការឆ្លងរាលដាលនៃជំងឺកូវីដ១៩ ជាពិសេស ព្រឹត្តិការណ៍២៨ វិច្ឆិកា ដែលបណ្តាលឱ្យមានការបិទជាបណ្តោះអាសន្ន នូវកន្លែងលក់រាយមួយចំនួន ធ្វើឱ្យអត្រាកាន់កាប់មានការធ្លាក់ចុះ។

ជាមួយគ្នានេះ តម្លៃជួលនៅក្នុងទីផ្សារលក់ បានបង្ហាញលទ្ធផលចម្រុះ នៅត្រីមាសទី៤ ទាំងតម្លៃជួលនៅផ្សារទំនើបក្នុងតំបន់សំខាន់ៗ និងបណ្តោយផ្លូវសំខាន់ៗ មិនមានការផ្លាស់ប្តូរនោះទេ ខណៈទីផ្សារលក់រាយនៅតំបន់ផ្សេងទៀត មានការធ្លាក់ចុះ៥,៩ភាគរយ។

ដោយឡែកតម្លៃជួលនៅទីផ្សារទំនើបបែបសហគមន៍ ក៏មានការធ្លាក់ចុះ៣.៣ភាគរយនៅត្រីមាសទី៤ ឆ្នាំ២០២០ ធៀបនឹងត្រីមាសទី៣។

ជាមួយគ្នានេះ ក្រុមហ៊ុន CBRE បានផ្ដល់អនុសាសន៍ថា ក្រុមហ៊ុនលក់រាយគួរតែកែលម្អយុទ្ធសាស្ដ្រទីផ្សាររបស់ខ្លួន តាមរយៈការបង្កើតទំនាក់ទំនងសាធារណៈដ៏ល្អ បង្កើតព្រឹត្តិការណ៍កាន់តែច្រើន និងបង្កើនការផ្សព្វផ្សាយឱ្យបានទូលាយ។ល។ ជាមួយគ្នានេះដែរ ក៏ត្រូវប្រើប្រាស់នូវប្រព័ន្ធឌីជីថល ដើម្បីកែលម្អបទពិសោធរបស់អតិថិជន តាមរយៈការទូទាត់ដោយគ្មានសាច់ប្រាក់QR កូដ ការដឹកជញ្ជូនអនឡាញ និងទីផ្សារបណ្ដាញសង្គម។ល៕

ជប៉ុនផ្តល់ជំនួយលើគម្រោងចំនួន៦៤១ ក្នុងទំហំទឹកប្រាក់សរុបប្រមាណ៦៣លានដុល្លារ

ដោយៈ រ៉ាណេត

ភ្នំពេញៈ រដ្ឋាភិបាលជប៉ុនបានផ្តល់ជំនួយ ក្រោមគម្រោងជំនួយឥតសំណងគូសាណូណិរបស់ជប៉ុនចំនួន៦៣លានដុល្លារ លើគំរោងចំនួន៦៤១ ដើម្បីគាំទ្រដល់កិច្ចខិតខំប្រឹងប្រែងរបស់កម្ពុជាក្នុងការអភិវឌ្ឍ និងស្ថាបនាប្រទេសឡើងវិញរបស់កម្ពុជា។

ឯកអគ្គរាជទូតជប៉ុនប្រចាំនៅប្រទេសកម្ពុជា លោកមិកាមិ ម៉ាសាហ៊ីរ៉ូ បានមានប្រសាសន៍នៅថ្ងៃទី១៨ ខែមករា ឆ្នាំ២០២១ម្សិលមិញនេះថា ជំនួយឥតសំណងគូសាណូណិរបស់ជប៉ុន បានចាប់ផ្តើមនៅកម្ពុជាតាំងពីឆ្នាំ១៩៩១ ដើម្បីគាំទ្រដល់កិច្ចខិតខំប្រឹងប្រែងរបស់កម្ពុជាក្នុងការអភិវឌ្ឍ និងស្ថាបនាប្រទេសឡើងវិញនៅតាមកម្រិតមូលដ្ឋាន។ គម្រោងជំនួយនេះ មានទិសដៅការពារជនងាយរងគ្រោះពីកត្តាមួយចំនួន ដូចជា ភាពក្រីក្រ និងភាពអកុសលនានា ដែលអាចគំរាមកំហែងដល់អាយុជីវិត ជីវភាពរស់នៅ និងសេចក្តីថ្លៃថ្នូរ ក៏ដូចជាជួយជំរុញនូវភាពម្ចាស់ការលើខ្លួនឯងរបស់ប្រជាសហគមន៍។

លោកបានបន្តថា ឆ្នាំ២០២០ ក្រោមគំនិតផ្តួចផ្តើមគូសាណូណិមេគង្គ ក្នុងគោលដៅអភិវឌ្ឍន៍ប្រកបដោយចីរភាព ដែលមានទឹកប្រាក់សរុប៩១លានដុល្លារអាមេរិក រដ្ឋាភិ​បាលជប៉ុននឹងបន្ត គាំទ្រដល់ការអភិវឌ្ឍសេដ្ឋកិច្ច និងសង្គមកិច្ច នៅតាមភូមិស្រុកថ្នាក់មូលដ្ឋានទូទាំងតំបន់មេគង្គ។

ដោយឡែកជាការបំពេញបន្ថែមទៅលើការផ្តល់ជំនួយនៅកម្ពុជា រដ្ឋាភិបាលជប៉ុនបានផ្តល់ជំនួយគិតជាថវិកាចំនួន២២៧,៧៣៦ដុល្លារ សម្រាប់ការធ្វើឱ្យប្រសើរទ្បើងនូវសមត្ថភាពពន្លត់អគ្គីភ័យ តាមរយៈការផ្តល់រថយន្តពន្លត់អគ្គីភ័យជូនរាជធានីភ្នំពេញ។ រថយន្តពន្លត់អគ្គីភ័យ ដែលបំពាក់ដោយកាំជណ្ដើរកម្ពស់៤០ម៉ែត្រចំនួនមួយគ្រឿង សម្រាប់ដាក់ឱ្យប្រើប្រាស់នៅរាជធានីភ្នំពេញ ព្រមទាំងរថយន្តពន្លត់អគ្គីភ័យ ដែលបំពាក់ដោយសា​រធាតុគីមីចំនួនមួយគ្រឿង និងឡានបូមទឹកពន្លត់អគ្គីភ័យចំនួនពីរគ្រឿងទៀត ដែលនឹងត្រូវបានដាក់ឱ្យប្រើប្រាស់ នៅក្នុងរាជធានីភ្នំពេញ ដើម្បីបង្កើនសមត្ថភាពពន្លត់អគ្គីភ័យ។

តំណាងរដ្ឋាភិបាលកម្ពុជា លោកឃួង ស្រេងបានសម្ដែងនូវការអរគុណចំពោះរដ្ឋាភិបានជប៉ុន ដែលជាដៃគូអភិវឌ្ឍន៍យ៉ាងជិតស្និទ្ធជាមួយកម្ពុជា ហើយតែងតែយកចិត្តទុកដាក់ជាមួយកម្ពុជា ក្នុងកិច្ចអភិវឌ្ឍទាំងវិស័យសេដ្ឋកិច្ច ធនធានមនុស្ស ការវិនិយោគ និងការធ្វើពាណិជ្ជកម្មជាដៃគូ។

បន្ថែមពីនេះ លោកក៏បានស្នើសុំដៃគូអភិវឌ្ឍន៍ជប៉ុន ជួយផ្សព្វផ្សាយពីសក្ដានុពល និងឱកាសវិនិយោគពីកម្ពុជា ដើម្បីកៀងគរអ្នកវិនិយោគជប៉ុន មកកាន់កម្ពុជាបន្ថែមទៀត៕

ច្បាប់វិនិយោគថ្មីនឹងផ្ដល់ភាពអនុគ្រោះកាន់តែច្រើនដល់កាវិនិយោគនៅកម្ពុជា

ដោយៈ លក្ខិណា

ភ្នំពេញៈ រាជរដ្ឋាភិបាលបានដាក់ចេញនូវវិធានការបន្ទាន់ ហ្មត់ចត់ ស៊ីជម្រៅ និងមានប្រសិទ្ធភាព ដើម្បីទ្រទ្រង់ និងគាំទ្រសេដ្ឋកិច្ច សង្គម សំដៅជួយរក្សាលំនឹងផលិតកម្ម អាជីវកម្ម និងជីវភាពរស់នៅរបស់ប្រជាពលរដ្ឋដែលទទួលរងគ្រោះ។

បន្ថែមពីនេះ រាជរដ្ឋាភិបាលក៏បានដាក់ចេញជាបន្តបន្ទាប់ នូវវិធានារកែទម្រង់មុតស្រួចនានា ដូចជាការកែលម្អច្បាប់វិនិយោគ និងប្រព័ន្ធលើកទឹកចិត្តដើម្បីកែសម្រួល និងបង្កបរិយាកាសល្អ សម្រាប់ធុរជន និងនិយោគិន។ នេះបើតាមសេចក្តីប្រកាសរបស់ក្រសួងការបរទេសនិងសហប្រតិបត្តិការអន្តរជាតិ ក្នុងយុទ្ធសាស្ត្រការទូតសេដ្ឋកិច្ច។

យុទ្ធសាស្ត្ររបស់រដ្ឋាភិបាលបានបង្ហាញឱ្យដឹងថា ច្បាប់វិនិយោគថ្មីនឹងផ្ដល់របបវិនិយោគកាន់តែអនុគ្រោះថែមទៀត ដើម្បីទាក់ទាញធុរកិច្ចកាន់តែច្រើន ជាពិសេសបណ្ដាក្រុមហ៊ុន ដែលកំពុងងាកមករកទីតាំងផលិតកម្មថ្មីនៅតំបន់អាស៊ាន ។ រាជរដ្ឋាភិបាលក៏កំពុងរៀបចំច្បាប់ស្ដីពី យន្តករភាពជាដៃគូរវាងរដ្ឋ និងឯកជន គម្រោងធានាឥណទានរបស់រដ្ឋ ការចុះបញ្ជីតាមប្រព័ន្ធអនឡាញ គំនិតផ្ដួចផ្ដើមរៀបចំសេដ្ឋកិច្ចឌីជីថលជាដើម។

ការចុះហត្ថលេខាលើកិច្ចព្រមព្រៀងភាពជាដៃគូ សេដ្ឋកិច្ចគ្រប់ជ្រុងជ្រោយតំបន់ នៅខែវិច្ឆិកា ឆ្នាំ២០២០ និងកិច្ចព្រមព្រៀងពាណិជ្ជកម្មសេរីរវាងកម្ពុជា និងចិននៅខែតុលា ឆ្នាំ២០២០ ព្រមទាំងដំណើរឆ្ពោះទៅមុខ នៃការចរចាកិច្ចព្រមព្រៀងដូចគ្នាជាមួយសាធារណរដ្ឋកូរ៉េ គឺជាសមិទ្ធផលថ្មីរបស់រាជរដ្ឋាភិបាល ក្នុងការកាត់បន្ថយផលប៉ះពាល់នានាផង ជំរុញការស្ដារ និងពង្រឹងសេដ្ឋកិច្ចឡើងវិញក្រោយជំងឺកូវីដ១៩ផង។

សេចក្តីប្រកាសដដែលនេះបានបង្ហាញថា ស្ថានការណ៍ទាំងនេះ កាន់តែបញ្ជាក់ច្បាស់ពីភាពត្រឹមត្រូវ និងចាំបាច់បំផុត ក្នុងការផ្លាស់ប្តូររបៀបរបបការងារពីការធ្វើការទូតតាមប្រពៃណីមកជាការទូតដែលផ្ដោតសំខាន់ដល់ការលើកស្ទួយ និងជំរុញកំណើនសេដ្ឋកិច្ច ទេសចរណ៍ និងវប្បធម៌ ព្រមទាំងប្រែក្លាយបញ្ហាប្រឈមទាំងឡាយឱ្យក្លាយជាកាលានុវត្តភាពសម្រាប់ការអភិវឌ្ឍសេដ្ឋកិច្ច-សង្គមកម្ពុជា។​

សេចក្តីប្រកាសរបស់ក្រសួងការបរទេស និងសហប្រតិបត្តិការអន្តរជាតិបញ្ជាក់ថា ក្នុងនាមជាប្រទេស ដែលមានសេដ្ឋកិច្ចបើកចំហ កម្ពុជាងាយនឹងទទួលរងនូវផលប៉ះពាល់ពីការផ្លាស់ប្តូរនិងវិបត្តិពីខាងក្រៅ ជាពិសេសក្នុងអំឡុងពេលនៃការរីករាលដាលជំងឺកូវីដ១៩។ ដូច្នេះ កម្ពុជាចាំបាច់ត្រូវតែខិតខំទ្វេដង ដើម្បីកសាងប្រព័ន្ធសេដ្ឋកិច្ច និងសង្គមឱ្យមានភាពរឹងមាំ និងអាចឆ្លើយតបទៅនឹងវិបត្តិនេះ ប្រកបដោយប្រសិទ្ធភាព។

ក្នុងបរិបទនេះ ការអនុវត្តការទូតសេដ្ឋកិច្ច មានគោលដៅពង្រឹង និងលើកស្ទួយគោល​នយោបាយការបរទេស ដើម្បីការពារផលប្រយោជន៍ជាតិ និងលើកកម្ពស់កិត្យា​នុភាពរបស់កម្ពុជានៅក្នុងតំបន់ និងពិភពលោក ដោយផ្ដោតលើវិបុលភាពសេដ្ឋកិច្ចជាប្រយោជនស្នូលបស់ជាតិ៕

ពាណិជ្ជកម្មទ្វេរភាគីកម្ពុជា-កូរ៉េសម្រេចបានទំហំទឹកប្រាក់ ៨៨៤លានដុល្លារនៅក្នុងឆ្នាំ២០២០

ដោយ ៖ រ៉ាណេត
ភ្នំពេញ ៖ ទំហំពាណិជ្ជកម្មទ្វេភាគីរវាងកម្ពុជា និងកូរ៉េខាងត្បូងមានតម្លៃ ៨៨៤ លានដុល្លារគិតត្រឹមខែធ្នូ ឆ្នាំ២០២០ មានការធ្លាក់ចុះពីមួយឆ្នាំទៅមួយឆ្នាំចំនួន ១៤ ភាគរយ ខណៈដែលកាលពីឆ្នាំ២០១៩ទំហំពាណិជ្ជកម្មបានឈានដល់ប្រមាណ១០០០លានដុល្លារ។

តួលេខពីសមាគមពាណិជ្ជកម្មអន្តរជាតិកូរ៉េបានបង្ហាញថាចាប់ពីខែមករាដល់ខែធ្នូឆ្នាំ ២០២០ ប្រទេសកម្ពុជាបាននាំចេញផលិតផលមានតម្លៃ ៣១៧ លានដុល្លារទៅកាន់ប្រទេសកូរ៉េខាងត្បូងដែលធ្លាក់ចុះ ១៨ ភាគរយបើប្រៀបធៀបនឹងឆ្នាំមុន។

ទន្ទឹមនឹងនេះដែរប្រទេសកម្ពុជាបាននាំចូលទំនិញពីប្រទេសកូរ៉េខាងត្បូងដែលមានតម្លៃ ៥៦៧ លានដុល្លារធ្លាក់ចុះ ៥ ភាគរយ។

ប្រឈមនឹងកំណើនពាណិជ្ជកម្មទ្វេភាគីធ្លាក់ចុះនៅឆ្នាំ ២០២០ ប្រទេសទាំងពីរបានបង្ហាញក្តីសង្ឃឹមខ្ពស់នៃកំណើនពាណិជ្ជកម្មលើសេចក្តីព្រាងកិច្ចព្រមព្រៀងពាណិជ្ជកម្មសេរីដែលនឹងត្រូវបញ្ចប់ឆាប់ៗនេះ។

លោក ប៉ាន សូរស័ក្តិ រដ្ឋមន្រ្តីក្រសួងពាណិជ្ជកម្មបានមានប្រសាសន៍កាលពីពេល ថ្មីៗនេះថា ភាគីទាំងពីរនឹងបញ្ចប់សេចក្តីព្រាងលើកិច្ចព្រមព្រៀងពាណិជ្ជកម្មសេរីក្នុងពេលឆាប់ៗនេះហើយ ដោយរំពឹងថាប្រទេសទាំងពីរនឹងចុះហត្ថលេខាលើកិច្ចព្រមព្រៀងនេះនៅក្នុងឆ្នាំ២០២១នេះ។

សម្រាប់ផលិតផលរបស់ប្រទេសកម្ពុជាដែលនាំចេញទៅកូរ៉េខាងត្បូងភាគច្រើនជាសម្លៀកបំពាក់ ស្បែកជើង ទំនិញធ្វើដំណើរ ភេសជ្ជៈ គ្រឿងបន្លាស់សម្រាប់ឧបករណ៍អេឡិចត្រូនិច និងផលិតផលកសិកម្មុំ ចំណែកឯ ការនាំចូលពីកូរ៉េខាងត្បូងរួមមានយានយន្ត អេឡិចត្រូនិច ឧបករណ៍ផ្ទះបាយ ភេសជ្ជៈ ឱសថ និងផលិតផលផ្លាស្ទិច។

ស្ពាន​មិត្តភាព​កម្ពុជា ចិន​ត​ភ្ជាប់​ស្រុក​ស្ទឹងត្រង់ និង​ក្រូចឆ្មារ​បាន​ត​ភ្ជាប់​រួចហើយ តែ​មិនទាន់​ដាក់​ឲ្យ​ដំណើរការ

ដោយ​ស៊ីវ ម៉េង

កំពង់ចាមៈ ស្ពាន​មិត្តភាព​កម្ពុជា ចិន ឆ្លងកាត់​ទន្លេមេគង្គរ​វាង​ស្រុក​ស្ទឹងត្រង់​ខេត្តកំពង់ចាម និង​ស្រុក​ក្រូចឆ្មារ ខេត្ត​ត្បូងឃ្មុំ​បាន​ត​ភ្ជាប់​រួចហើយ ប៉ុន្តែ​មិនទាន់​ដាក់​ឲ្យ​ដំនើរ​រ​នៅឡើយ​ទេ។

ការស្ថាបនា​ស្ពាន​នព បានសម្រេច​ប្រមាណ៩៥ភាគរយ​ហើយ នៅឡើយ​តែ​ការចាក់​កៅស៊ូ​លើ​ស្ពាន និង​រៀបចំ​បង្កាន់ដៃ ដើម្បី​លំអរ​ស្ពាន ក៏ដូចជា​ដើម្បី​បញ្ចៀស​ហានិភ័យ​នៃ​ការកើតមាន​គ្រោះថ្នាក់​ចរាចរណ៍​ប៉ុណ្ណោះ។

សំណង់​ស្ពាន​មិត្ត​កម្ពុជា – ចិន ឆ្លងកាត់​ទន្លេមេគង្គ ត​ភ្ជាប់​រវាង​ស្រុក​ស្ទឹងត្រង់​ខេត្តកំពង់ចាម និង​ស្រុក​ក្រូចឆ្មារ ខេត្ត​ត្បូងឃ្មុំ បាន​ប្រើប្រាស់​ថវិកា​ហិរញ្ញប្បទាន​របស់​សាធារណរដ្ឋ​ប្រជាមានិត​ចិន​ក្នុង​ទំហំ​ទឹកប្រាក់៥៧លាន​ដុល្លារ​អាមេរិក។

ស្ពាន​នេះ​មាន​ប្រវែង​សរុប១១៣១ម៉ែត្រ និង​ទទឹង១៣.៥០ម៉ែត្រ មាន​កម្ពស់​ពី​ផ្ទៃ​ទឹក១៥ម៉ែត្រ។ ស្ពាន​នេះ​បានចាប់ផ្ដើម​ដំណើរការ​សាងសង់ នៅក្នុង​អំឡុង​ខែកុម្ភៈ ឆ្នាំ២០១៨ ក្រោម​អធិបតីភាព​ដ៏​ខ្ពង់ខ្ពស់​សម្ដេច​អគ្គមហាសេនាបតី​តេ​ជោ ហ៊ុន សែន នាយករដ្ឋមន្ត្រី​នៃ​ព្រះរាជាណាចក្រ​កម្ពុជា និង​ឯកអគ្គរដ្ឋទូត​សាធារណរដ្ឋ​ប្រជាមានិត​ចិន​ប្រចាំ​នៅ​កម្ពុជា។

ស្ពាន​ឆ្លងកាត់​ទន្លេមេគង្គ​នេះ នៅ​ត្រើយ​ខាងលិច​ស្ថិតនៅ​ក្នុងភូមិ​បឹង​ដែង ឃុំ​ព្រែកកក់ ស្រុក​ស្ទឹងត្រង់ ខេត្តកំពង់ចាម ដែលមាន​ផ្លូវ​ត​ភ្ជាប់​ពី​ក្បាលស្ពាន ត្រូវបាន​ពង្រីក​ធំ​ទូលាយ​ក្រាល​កៅស៊ូ និង​មាន​រង្វង់​មូល​ត​ភ្ជាប់​ដោយ​ផ្លូវ​ខ្វាត់ខ្វែង​ទៀតផង។ អាជ្ញាធរខេត្ត កំពុងតែ​យកចិត្តទុកដាក់ បាន​ចុះ​ដោះស្រាយ​ពី​ផលប៉ះពាល់​នានា នៅតាម​ដងផ្លូវ ជាមួយនឹង​ប្រជាពលរដ្ឋ​រួចរាល់ និង​ផ្លូវត្រូវ​ពង្រីក​ឱ្យ​ធំ​ជាង​មុន ត​ភ្ជាប់​មក​ផ្លូវ​លេខ៧១ រហូតដល់​ស្រុក​ចំការលើ។

តាមរយៈ​វត្ត​មាននៃ​ស្ពាន​មួយ​នេះ បាន​ដើរតួ​យ៉ាងសំខាន់​ក្នុងនាម​ជា​ដង្ហើម​សេដ្ឋកិច្ច​មួយ​រវាង​ខេត្តកំពង់ចាម និង​ត្បូងឃ្មុំ ក្នុង​ការដឹក​កសិផល និង​វិស័យផ្សេងៗ ឆ្លងកាត់​ពី​តំបន់​មួយ​ទៅ​តំបន់​មួយ​កាន់តែ​ប្រសើរឡើង ដោយ​ក្នុងនោះ​ប្រជាពលរដ្ឋ​ដែល​រស់នៅ​ខេត្តស្ទឹងត្រែង និង​ខេត្តក្រចេះ ក៏​អាច​ដឹកទំនិញ​ឆ្លងកាត់​ស្ពាន​មិត្តភាព​កម្ពុជា-ចិន​នេះ​បែងចែក​ទៅតាម​បណ្តា​ខេត្ត​ដទៃទៀត ក៏ដូចជា​ឆ្ពោះ​មកកាន់​រាជធានី​ភ្នំពេញ បាន​យ៉ាង​ស្រួល។

រដ្ឋាភិបាល​គ្រោង​នឹង​សាងសង់​ស្ពាន​ឆ្លងកាត់​ទន្លេមេគង្គ នៅ​ខេត្តក្រចេះ​នាពេលខាងមុខ​ផងដែរ ដែល​គម្រោង​នេះ​បាន​សិក្សា​រួចហើយ រង់ចាំតែ​ពេលវេលា​បើក​ការដ្ឋាន​សាងសង់​នាពេលខាងមុខ​ប៉ុណ្ណោះ៕

ឧកញ៉ា​លឹម ហេង៖ ក្រុមហ៊ុន​អាមេរិក​កាន់តែច្រើន​នឹង​ចូលមក​វិនិយោគ​នៅ​កម្ពុជា

ដោយៈ រ៉ា​ណេ​ត

ភ្នំពេញៈ ភាពល្អប្រសើរ​នៃ​កិច្ចព្រមព្រៀង​ពាណិជ្ជកម្ម​សេរី រវាង​កម្ពុជា​ជាមួយ​ប  ណ្តា​ប្រទេស​នានា ជាពិសេស​ប្រទេស​ចិន ដែលមាន​ទីផ្សារ​យ៉ាង​ទូលាយ​ប្រមាណ​ជាង១៤០០លាន​នាក់ មិនយូរ​ទៀត​នោះទេ ក្រុមហ៊ុន​របស់​អាមេរិក​ជាច្រើន នឹង​ចូលមក​វិនិយោគ​នៅក្នុង​ប្រទេស​កម្ពុជា ដើម្បី​ទទួលបាន​ផលចំណេញ​រួមគ្នា​ជាមួយ​កម្ពុជា។

អនុប្រធាន​សភាពាណិជ្ជកម្ម​កម្ពុជា​លោក​ឧកញ៉ា​លឹម ហេង​បាន​មានប្រសាសន៍ប្រាប់​គេហទំព័រ www.propertyarea.asia នៅ​ល្ងាច​ថ្ងៃទី១៨ ខែមករា ឆ្នាំ២០២១ នៅពេលនេះ​កម្ពុជាប្រៀប​បីដូច​ជា​កូនក្រមុំ ដែល​កំពុងមាន​ភាព​ទាក់ទាញ និង​ការចាប់អារម្មណ៍​ពី​បណ្តា​វិ​និយោ​គិ​ន​អន្តរ​ជា​តិយ៉ាងច្រើន។

លោក​បន្តថា “យើង​មាន​ចំណុច​ល្អ និង​ចំណុច​ពិសេស​របស់​យើង។ ត្រឹមតែ​កិច្ចព្រមព្រៀង​ពាណិជ្ជកម្ម​សេរី​ទ្វេភាគី​ជាមួយ​ចិន គឺមាន​វិសាលភាព​ដ៏​ធំ​សម្រាប់​ជាការ​ទាក់ទាញ​បណ្តា​ក្រុមហ៊ុន​អន្តរជាតិ​នានា​ជាច្រើន ជាពិសេស​ក្រុមហ៊ុន​អាមេរិក​ឱ្យចូល​មក​វិនិយោគ​នៅក្នុង​ប្រទេស​កម្ពុជា សម្រាប់​នាំ​ផលិតផល​របស់ខ្លួន ចេញទៅ​កនា់​ទីផ្សារ​ប្រទេស​ចិន​ដោយ​ការ​រួច​ពន្ធ និង​មានឱកាស​ចំណេញ​ច្រើន” ។

លោក​ឧកញ៉ា​លឹម ហេង បាន​បន្តថា សង្គ្រាម​ពាណិជ្ជកម្ម​រវាង​អាមេរិក​ជាមួយ​ចិន​បាន​ក្លាយជា​សំពាធ សម្រាប់​ក្រុមហ៊ុន​អាមេរិក​មួ​ចំនួន ដែល​ត្រូវធ្វើ​ការនាំ​ទំនិញ និង​ផលិតផល ដែល​ផលិត​បាន​ទៅកាន់​ទីផ្សារ ប្រទេស​គោលដៅ​នៃ​ប្រទេស​ចិន។ ដូច្នេះ​នៅពេលដែល​កម្ពុជា ត្រូវបាន​អនុគ្រោះ​ពន្ធចំពោះ​ការនាំ​ទំនិញ​ចេញ ទៅ​ទីផ្សារ​ប្រទេស​ចិន បណ្តា​ក្រុមហ៊ុន​ដែល​រង​នូវ​សំពាធ​ទាំងនោះ នឹង​ពិចារណា​ផ្លាស់ប្ដូរ​ទីតាំង​ផលិត​របស់ខ្លួន​ចូលមក​កម្ពុជា​ជាក់​ជាមិនខាន។

ក្រៅពីនេះ​កម្ពុជា ក៏​ត្រៀម​នឹង​ចុះហត្ថលេខា​លើ​កិច្ចព្រមព្រៀង ជាមួយ​បណ្តា​ប្រទេស​ផ្សេងទៀត​ដូចជា កូរ៉េ ជប៉ុន អូស្ត្រាលី និង​ឥណ្ឌា​ជាដើម ដោយនៅ​មិនទាន់​រាប់​ប​ញ្ជូ​ល​កិច្ចព្រមព្រៀង​ពាណិជ្ជកម្ម RCEP ដែលជា​ទីផ្សារ​ដ៏​ធំ​លើ​ពិភពលោក​នោះ​ផងដែរ។

លោក​ឧកញ៉ា​លឹម ហេង​បា​នប​ញ​ញ​ជាក់​ឱ្យដឹងទៀតថា បើទោះជា​កម្ពុជា​ត្រូវ​បាត់បង់​នូវ​ប្រព័ន្ធ​អនុគ្រោះ​ពន្ធ​ពី​ទីផ្សារ​អឺរ៉ុប ប៉ុន្តែ​កម្ពុជា​ទទួលបាន​ការអនុគ្រោះ​ពន្ធ GSP ពី​ចក្រភព​អង់គ្លេស ហើយ​តាមរយៈ​ចក្រភព​អង់គ្លេស ក៏​នឹង​នាំយក​ទំនិញ​របស់​កម្ពុជា​បន្ត​ចែកចាយ​ទៅក្នុង​ទីផ្សារ​អឺរ៉ុប​ដូចគ្នា ដូច្នេះ​កម្ពុជា​នៅតែ​មិន​ទទួលរង​នូវ​ផលប៉ះពាល់​នោះទេ។

លោក​បញ្ជាក់ថា “ជាធម្មតា​នៅពេល​ដែលមាន​ក្រុមហ៊ុន​អន្តរជាតិ ចូលមក​វិនិយោគ​កាន់តែច្រើន កម្ពុជា​ក៏​ទទួលបាន​ផល​ចំណូល​ច្រើន​ដូចគ្នា។ យើង​គិត​ត្រឹ​ត​តែ​ជា​ប្រទេស​ផ្តល់​សេវា នៅពេលដែល​គេ​ចូលមក​វិនិយោគ គេ​ត្រូវការ​ទីតាំង គេ​ត្រូវ​សេវា​ដឹកជញ្ជូន ក៏ដូចជា​កម្លាំង​ពលកម្ម ដែល​ទាំងអស់នេះ​សុទ្ធតែ​ជាការ​ផ្តល់នូវ​ផ្តល់​ប្រយោជន៍ ហើយ​យើង​ក៏​អាច​កើនឡើង​នូវ​ចំណេះ ជំនាញ​បច្ចេកទេសថ្មីៗ ពី​បណ្តា​ក្រុមហ៊ុន​អន្តរជាតិ​ទាំងនោះ​ផងដែរ” ៕

ហេ​ដ្ឋា​រចនា​ស​ម្ព័​ន្ឋ​នឹង​កំណត់់​ល្បឿន​នៃ​ការ​អភិ​វ​ឌ្ឈ​ភាគ​ខាងកើត​ក្រុងភ្នំពេញ

ដោយ​ស៊ីវ ម៉េង

ភ្នំពេញៈ កត្តា​ហេ​ដ្ឋា​រចនា​ស​ម្ព័​ន្ឋ​នឹង​កំណត់​ពី​តម្លៃ និង​ល្បឿន​នៃ​ការអភិវឌ្ឍ​ភាគ​ខាងកើត​រាជធានី​ភ្នំពេញ ដែល​បច្ចុប្បន្ន​តំបន់​នេះ​ត្រូវបាន​សេដ្ឋី ឧកញ៉ា អ្នកឧកញ៉ា​នានា​បាន​ទិញ​ដី​ទុក​រួចហើយ។

ខណៈពេល​វេលា​នៃ​ការរង់ចាំ នឹង​មកដល់​នាពេលខាងមុខ ស្របពេល​គំរោង​ស្ពាន​បាននិងកំពុង​សិក្សា ដូចជា ស្ពាន​ត​ភ្ជាប់​រវាង​តំបន់​ជ្រោយចង្វារ ទៅកាន់​តំបន់​ស្វាយជ្រុំ និង​ស្ពាន​ត​ភ្ជាប់​រវាង​ទីក្រុង​កោះនរា ត​ភ្ជាប់​ទៅ​តំបន់​អរិយ​ក្សត្រ​នឹងធ្វើ​ឡើង ក្នុង​រយៈពេល​បី​ទៅ៥ឆ្នាំ​ខាងមុខ តំបន់​ភាគ​ខាងកើត​រាជធានី​ភ្នំពេញ កំពុងមាន​សកម្មភាព​អភិវឌ្ឍន៍យឺតៗ ដោយ​អ្នកវិនិយោគ ក្នុងស្រុក​រង់ចាំតែ​សម្តេច​ប្រមុខ​រដ្ឋាភិបាល ប្រកាស​សាងសង់​ស្ពាន គំរោង​នានា​នឹង​លេច​រូបរាង​ឡើង។

ខណៈ​គំរោង​ផ្លូវ​ក្រវ៉ាត់​ក្រុង​ទី៣កំពុង​សាងសង់ ផ្លូវ​ក្រវ៉ាត់​ក្រុង​ទី៤ ក៏​បាននិងកំពុង​សិក្សា​លំអិត ដែល​ផ្លូវ​នេះ​នឹង​ពង្រីក​សក្តានុពល និង​ការអភិវឌ្ឍ​នៅ​តំបន់​ភាគ​ខាងកើត​ក្រុងភ្នំពេញ​យ៉ាង​រស​រវើក​ផងដែរ។

ទីប្រឹក្សា​សមាគម​អចលនទ្រព្យ​សកល លោក​យិន លាង​គង់​បាន​មានប្រសាសន៍  ឲ្យ​ដឹង​តាម​ទូរស័ព្ទ​កាលពី​ថ្ងៃទី១៨ មករា​កន្លងមក​ថា ពិតណាស់ ហេ​ដ្ឋា​រចនា​ស​ម្ព័​ន្ឋ​បាន​បង្កើត​តម្លៃ និង​បង្កើន​តម្លៃ​អចលនទ្រព្យ ពិសេស​វា​បាន​បន្ថែម​នូវ​គុណ​តម្លៃ​សម្រាប់​តំបន់់​ណាមួយ ដែល​និន្នាការ​នេះ​បាន​រីកចម្រើន និង​មាន​ភាព​លេចធ្លោ​នៅក្នុង​ប្រទេស​កំពុងអភិវឌ្ឍន៍​ដូចជា​ប្រទេស​កម្ពុជា វៀតណាម ឡាវ​ជាដើម។

លោក​បន្តថា “អ្នក​អភិវឌ្ឍន៍​បានរួម​ចំណែក​ជាមួយ​រដ្ឋាភិបាល ក្នុងការ​បង្កើត​តម្លៃបន្ថែម​សម្រាប់​តំបន់​មួយ ហើយ​ធ្វើ​ឲ្យ​តំបន់​នោះ​អាចមាន​ការអភិវឌ្ឍ​លឿន ឬ​យឺត​អាស្រ័យ​លើ​គំរោង​របស់​ពួកគេ និង​ផែនការ​អភិវឌ្ឍ​របស់​រដ្ឋាភិបាល។លោក​បន្តថា “បច្ចុប្បន្ននេះ វិស័យ​ឯកជន​បាន​ដើរ​លឿន​ជាង​រដ្ឋាភិបាល លើ​ការ​អភិ​វ​ឌ្ឈ ដោយសារ​កត្តា​ប្រជាសាស្ត្រ ការរីកចម្រើន​ផ្នែក​នគរូបនីយកម្ម និង​ការរីកចម្រើន​នៃ​សេដ្ឋកិច្ចសង្គម” ។

លោកស្រី​អាន សុ​ធីតា​នាយិកា​ប្រចាំ​ប្រទេស​នៃ​ក្រុមហ៊ុន CBRE Cambodia បាន​ថ្លែង​ឲ្យ​ដឹង​កាលពីពេលថ្មីៗនេះ​ផងដែរ​ថា នៅ​កម្ពុជា​តម្លៃ​ដីធ្លី និង​សកម្មភាព​អភិវឌ្ឍន៍​រីកចម្រើន​លឿន មួយផ្នែក​គឺ​ដោយសារ​ការសាងសង់ ហេ​ដ្ឋា​រចនា​ស​ម្ព័​ន្ឋ​របស់​រដ្ឋាភិបាល កត្តា​សន្តិភាព និង​ការរីកចម្រើន​សេដ្ឋកិច្ចជាតិ។

លោកស្រី​បន្តថា យ៉ាងណា​បើ​និយាយ​ពី​លំហូរ​ទុនវិនិយោគ​ពី​ខាងក្រៅ ក៏​ជា​ផ្នែក​មួយ​ជួយ​ជម្រុញ​កំនើន​តម្លៃ​អចលនទ្រព្យ និង​ជម្រុញ​ល្បឿន​នៃ​ការអភិវឌ្ឍ​យ៉ាង​ឆាប់រហ័ស​ផងដែរ ប៉ុន្តែ​លំហូរ​ទុន​មកពី​ក្រៅប្រទេស​នៅ​ឆ្នាំនេះ កើនឡើង​ច្រើន​ឬ​តិច អាស្រ័យ​លើ​ស្ថានភាព​ជំងឺ​កូ​វីដ១៩ថា អាចមាន​ភាពល្អប្រសើរ​នាពេល​ណា ហើយ​វ៉ាក់សាំង​នឹងត្រូវ​ចែក​បាយ​បាន​លឿន​កម្រិតណា៕

អ្នកជំនាញ៖ រយៈពេល ៥-១០ឆ្នាំ​ខាងមុខ អ្នកធ្វើការ​ក្នុង​ទីក្រុង​ភ្នំពេញ​នឹងត្រូវ​បង្ខំចិត្ត ទិញ​ខុន​ដូ​ក្នុង​ក្រុង

ដោយៈ រ៉ា​ណេ​ត

ភ្នំពេញៈ ជាមួយនឹង​ភាព​រីកចម្រើន និង​ការកើនឡើង​នូវ​ចំនួន​មនុស្ស​ចេញ ចូលក្នុង​ក្រុង​ជា​បន្តបន្ទាប់ អ្នកជំនាញ​នៅក្នុង​វិស័យ​អចលនទ្រព្យ​បាន​អះអាងថា មិន​លើសពី៥-១០ទៀត​នោះទេ ចំពោះ​អ្នក​ដែល​បម្រើ​ការងារ​នៅក្នុង​ក្រុងភ្នំពេញ ចាំបាច់​ត្រូវតែ​ទិញ​ខុន​ដូ ដែល​ស្ថិតនៅក្នុង​ក្រុង​សម្រាប់​រស់នៅ ហើយ​វា​ក៏​ជា​ឱកាស​សម្រាប់​ការវិនិយោគ​នៅក្នុង​ទីផ្សារ​មួយ​នេះ​ផងដែរ នៅពេល​បច្ចុប្បន្ននេះ។

នាយក​ប្រតិបត្តិ​ក្រុមហ៊ុន​ភ្នាក់ងារ​អចលនទ្រព្យ YOUNGSIA Real Estate Co.,Ltd លោក Cooler Tan បាន​មានប្រសាសន៍ប្រាប់​គេហទំព័រ www.propertyarea.asia កាលពី​ល្ងាច​ថ្ងៃទី១៨ ខែមករា ឆ្នាំ២០២១ថា យ៉ាងយូរបំផុត​នៅត្រឹម​ឆ្នាំ២០៣០ សម្រាប់​អ្នក​ដែលមាន​ការងារ នៅក្នុង​រាជធានី​ភ្នំពេញ ដាច់ខាត​ត្រូវតែ​ទិញ​ខុន​ដូ​មួយ​យូ​នី​ត​ស្ថិតនៅក្នុង​ក្រុង សម្រាប់​រស់នៅ​ដើម្បី​បញ្ចៀស​បញ្ហា និង​ផលប៉ះពាល់​ដល់ពេល​វេលា បំពេញការងារ ខណៈដែល​កំណើន​នៃ​ចំនួន​មនុស្ស និង​ការកកស្ទះ​ចរាចរណ៍​កា​ន់​តែមាន​ភាព​ប្រឈម​ខ្ពស់។

លោក​បញ្ជាក់ថា “ក្នុង​រយៈពេល៥-១០ឆ្នាំ​ទៀត ទីផ្សារ​ខុន​ដូ​នឹងមាន​ប្រជាប្រិយភាព ប្រៀប​ដូច​ទីផ្សារ​លំនៅដ្ឋាន​ផ្ទាល់​ដី​តម្លៃ​សមរម្យ ដែល​ស្ថិតនៅ​តំបន់​ជាយក្រុង​នាពេល​បច្ចុប្បន្ននេះ​ជាមិនខាន” ។ លោក​បន្តថា “ការកើនឡើង​នូវ​ប្រជាប្រិយភាព​នៃ​ទីផ្សារ​ខុន​ដូ​តម្លៃ​សមរម្យ​នេះ ក៏​ព្រោះតែ​រាជធានី​ភ្នំពេញ កាន់តែ​មានការ​អភិវឌ្ឍ​ផ្នែក​សំណង់ធំៗក្នុងនាម​ជា​មជ្ឈមណ្ឌល​ពាណិជ្ជកម្ម​ប្រចាំ​ប្រទេស” ។

មាន​កំណើនប្រជាជន​ចេញចូល រាជធានី​ភ្នំពេញ​ច្រើន ជាង​ពេល​បច្ចុប្បន្ននេះ​ទ្វេដង ដែល​អាច​បណ្តាលឱ្យ​ជំនន់​នៃ​ការកកស្ទះ​ចរាចរណ៍ ត្រូវ​ចំណាយពេល​ច្រើន​ក្នុងការ​ធ្វើដំណើរ​ជាហេតុ ធ្វើឱ្យប៉ះពាល់​ដល់ពេល​វេលា​នៃ​ការបំពេញ​ការងារ។

លោក Cooler Tan បាន​បន្ដថា “យ៉ាងយូរ​នៅត្រឹម​ឆ្នាំ២០៣០ វា​នឹង​ប្រែ​ក្លាយទៅជា​សម័យកាល​មួយ​ដ៏​ក្ដៅគគុក ក្នុងការ​វិនិយោគ​ខុន​ដូ​នៅក្នុង​ទីក្រុង​ភ្នំពេញ ដូច្នេះ​យើង​គួរតែ​ត្រៀមខ្លួន​រួចជាស្រេច​ក្នុង​ការក្តោបក្តាប់​ឱកាស និង​ចាប់ផ្តើម​សម្រេចចិត្ត​វិនិយោគ​ខុន​ដូ​សម្រាប់​ថ្ងៃ​អនាគត ទើប​យើង​អាច​មានឱកាស​ក្លាយជា​អ្នក​ជោគជ័យ និង​ទទួលបាន​ផលប្រយោជន៍​ពី​ទីផ្សារ​ខុន​ដូ​ដែល​កំពុងមាន​ភាព​រីក​ចម្រើន” ។

នាយិកា​ប្រចាំ​ប្រទេស​ក្រុមហ៊ុន CBRE Cambodia លោកស្រី​អាន សុធី​តា​បាន​មានប្រសាសន៍​ផងដែរ​ថា ទីផ្សារ​ខុន​ដូ​ត្រូវបាន​គេ​ចែកចេញជា៣កម្រិត រួមមាន​ខុន​ដូ​ប្រភេទ​កម្រិត​សមរម្យ មានតម្លៃ​ប្រមាណ១២០០ ដុល្លារ​ឡើង ខុន​ដូ​កម្រិត​ធ​ម្យ​ម​មានតម្លៃ​ចាប់ពី១៥០០ ទៅ ២៥០០ ហើយ​ខុន​ដូ​កម្រិត​ខ្ពស់ អាចមាន​តម្លៃ​ចាប់ពី៣០០០ដុល្លារ​ឡើងទៅ​ក្នុង​មួយ​ម៉ែត្រការ៉េ។

លោកស្រី​បន្តថា “ចាប់ពី​ឆ្នាំ២០២១នេះ​តទៅ កំណើន​នៃ​ចំនួន​គម្រោង​ខុន​ដូ​នឹង​បន្ត​កើន​ឡើងជា ដើម្បី​ឆ្លើយតប​ទៅនឹង​តម្រូវការ​នៅក្នុង​ស្រុក ព្រោះ​ពលរដ្ឋ​ខ្មែរ​ភាគច្រើន ជាពិសេស​អ្នករស់នៅ​ក្នុង​ក្រុង បាន​ចាប់អារម្មណ៍​ខ្លាំង និង​ដឹង​ពី​អត្ថប្រយោជន៍​របស់​ខុន​ដូ” ។ លោកស្រី​បន្ថែមថា “អតិថិជន​ក្នុងស្រុក​ដែលជា​ជនជាតិខ្មែរ​ភាគច្រើន គឺ​គាត់​ទិញ​ខុន​ដូ​កម្រិត​សមរម្យ ឬ​កម្រិត​មធ្យម ប៉ុន្តែ​សម្រាប់​ខុន​ដូ​កម្រិត​ខ្ពស់ ដែលមាន​តម្លៃ​ចាប់ពី៣០០០ ដុល្លារ​ឡើង​ក្នុង​ម៉ែត្រការ៉េ  គឺ​ជនបរទេស​ចាប់អារម្មណ៍​វិនិយោគ​ច្រើន ហើយ​ភាគច្រើន​គឺជា​ជនជាតិ​ចិន” ។

និយាយ​ជារួម​ទីផ្សារ​ខុន​ដូ​នៅក្នុង​ប្រទេស​កម្ពុជា នៅតែមាន​ទីផ្សារ​ល្អប្រសើរ តាមរយៈ​កិច្ចសហការ ជាមួយ​ធនាគារ​ជា​ដៃគូ​ជាមួយ​ក្រុមហ៊ុន​អភិវឌ្ឍន៍ ដែល​កាន់តែ​ផ្តល់​ភាពងាយស្រួល​ដល់​ប្រជាពលរដ្ឋនៅក្នុង​ស្រុក។

យោងតាម​ការសិក្សា​រប​ស់​ក្រុមហ៊ុន Urban Living Solution កាលពីពេលថ្មីៗនេះ​បាន​ឲ្យ​ដឹងថា នៅ​ឆ្នាំ២០៣០ខាងមុខ ប្រជាពលរដ្ឋ​រស់នៅ​ក្រុងភ្នំពេញ​នឹង​កើនឡើង​ដល់៤,៥ ទៅ៥លាន​នាក់ ដែល​កំនើន​ប្រជាសាស្ត្រ​នេះ​នឹង​ជំរុញ​ឲ្យ​ប្រជាពលរដ្ឋ​ខ្មែរ រស់នៅ​តាម​ខុន​ដូ​កាន់តែច្រើន ដោយសារ ទី១ ការកកស្ទះ​ចរាចរណ៍​កាន់តែខ្លាំង ដែល​ធ្វើ​ឲ្យ​ប្រជាពលរដ្ឋ​ពិបាក​ក្នុងការ​ធ្វើដំណើរ ទី២ តម្លៃ​អចលនទ្រព្យ ពិសេស​លំនៅដ្ឋាន​ក្នុង​ទីក្រុង​ឡើងថ្លៃ​ខ្ពស់ ដែល​ប្រជាជនមាន​ជីវភាព​មធ្យម​មិនអាច​ទិញ​បាន ប៉ុន្តែ​ពួកគេ​អាច​ទិញ​ខុន​ដូ​រស់​នៅបាន និង​មាន​ទីតាំងនៅ​កណ្តាល​ក្រុង ជិត​កន្លែងធ្វើការ​រប​ស់​ពួកគេ និង​ទី៣ ការរីកចម្រើន​បច្ចេក​វិទ្យា នឹង​ផ្តល់​ឲ្យ​គុណភាព​ជីវិត​កាន់តែ​ប្រសើរ​ជាង​មុន៕

តម្លៃ​ដីធ្លី​នៅ​ខណ្ឌ​មួយចំនួន​ក្នុង​ទីក្រុង​ភ្នំពេញ​នៅតែ​រក្សា​កំណើន​ពី ៧,៥ ទៅ១៥ភាគរយ

ដោយៈ ម៉ា​ណេ​ត

ភ្នំពេញៈ បើ​ស្ថិតនៅ​វិបត្តិ​កូ​វីដ១៩ តំបន់​មួយចំនួន​ក្នុង​ទីក្រុង​ភ្នំពេញ​នៅមាន​សកម្មភាព​ទិញ​លក់ ដោយ្សារ​អ្នកទិញ​បន្ត​រង់ចាំ និង​មើល​ស្ថានភាព​នៃ​វិបត្តិ​នេះ ខណៈ​តម្លៃ​ដី​នៅ​ទូទាំងប្រទេស​កម្ពុ​ជាមាន​សភាព​នៅ​ទ្រឹង​កាលពី​ឆ្នាំមុន។ នេះ​បើ​យោងតាម​របាយការណ៍​ចុងក្រោយ​របស់​ក្រុមហ៊ុន CBRE Cambodia។

យោងតាម​របាយការណ៍​បានឱ្យដឹងថា ការទិញ​លក់​ខ្នាតតូច​នៅ​ជាយក្រុង ត្រូវបាន​មើលឃើញ​មាន​សកម្មភាព​ច្រើន ដោយសារ​សម្ពាធ​សេដ្ឋកិច្ច ដែល​បណ្តាលមកពី​ជំងឺ​រាតត្បាត​ជំរុញ​ឱ្យ​វិនិយោគិន​កម្រិត​មធ្យមសម្រេចចិត្ត​លើ​ប្រតិបត្តិ​ការទិញ​លក់​ច្រើន។

បើទោះបី​មាន​ភាព​ស្ងាប់់ស្ងាត់​កាលពី​ឆ្នាំមុន​ក៏ដោយ តម្លៃ​ដីធ្លី​នៅ​ទីក្រុង​ភ្នំពេញ នៅតែមាន​អត្រាកំណើន​ប្រចាំឆ្នាំ​យ៉ាងច្រើន​ចន្លោះ​ពី៧,៥% ទៅ១៥,១% ខណៈ​ខណ្ឌ​មួយចំនួនទៀត មាន​សកម្មភាព​ទិញ​លក់​ល្អ ជាង​តំបន់​ដទៃទៀត។

នាយិកា​ប្រចាំ​ប្រទេស​នៃ​ក្រុមហ៊ុន CBRE Cambodia លោកស្រី​អាន សុធី​តា​បាន​មានប្រសាសន៍ ក្នុង​កិច្ចសម្ភាសន៍​កាលពីពេលថ្មីៗនេះ​ថា តម្លៃ​ដីធ្លី​នៅ​កម្ពុជា​នឹង​បន្ត​កើនឡើង​បន្ថែមទៀត ដែល​យើង​អាច​ព្យាករ​ថា កំណើន​តម្លៃ​ដីធ្លី​នឹង​កើន៧ភាគរយ​ក្នុង​មួយឆ្នាំ​សម្រាប់​មួយ​ទសវត្សរ៍​ខាងមុខ ប៉ុ​ន្ត​មិនមែន​មានន័យថា តម្លៃ​ដីធ្លី​នឹង​កើនឡើង​ថេរ៧ភាគរយ​នោះទេ គឺ​ឆ្នាំ​ខ្លះ​អាច​តិចជាង​នេះ និង​ឆ្នាំ​ខ្លះ​អាច​ច្រើនជាង​នេះ ប៉ុន្តែ​តួលេខ៧ភាគរយ ជា​តួលេខ​ដែល​គិត​ជា​មធ្យម។

អ្នកនា​បន្តថា “ការព្យាករណ៍​បែបនេះ ដោយ​យើង​ឈរលើ​មូលដ្ឋានសំខាន់ៗដូចជា​តម្រូវ​ការទិញ​លក់​ក្នុង​ទីផ្សារ ការសិក្សា​ប្រៀបធៀប​ជាមួយ​ប្រទេស​ថៃ និង​វៀតណាម​ជាដើម ព្រោះ​ប្រទេស​ទាំងនេះ​មាន​ស្ថាន​ភាពស្រដៀងគ្នា​នឹង​កម្ពុជា” ។

អ្នកនាង​អាន សុធី​តា​បាន​បន្ត​ឲ្យ​ដឹងផង​ដែរ​ថា បើ​គិត​រយៈពេល ១០ឆ្នាំ​កន្លងមកនេះ តម្លៃ​ដីធ្លី​បាន​កើនឡើង​យ៉ាងខ្លាំង ដោយ​កាលពី​ឆ្នាំ២០០៨តម្លៃ​ដីធ្លី ដែល​ខ្ពស់​ជាងគេ​គឺមាន​តម្លៃ​ជា​មធ្យម ២០០០ដុល្លារ​ក្នុង​មួយ​ម៉ែត្រការ៉េ​ប៉ុណ្ណោះ។

ការវិភាគ​របស់​អ្នកជំនាញ​មួយចំនួនទៀត​បាន​អះអាង​ឲ្យ​ដឹងថា តម្លៃ​ដីធ្លី​នៅ​កម្ពុជា​កើន​ឡើ​ដោយសារ​កត្តាសំខាន់ៗជាច្រើន ដូចជា កត្តា​សន្តិភាព ស្ថិរភាព​នយោបាយ កំនើនសេដ្ឋកិច្ច ការអភិវឌ្ឍ​ហេ​ដ្ឋា​រចនា​ស​ម្ព័​ន្ឋ​របស់​រដ្ឋាភិបាល និង​កត្តា​ប្រជាសាស្ត្រ៕