ដោយ ៖ រ៉ាណេត

បន្ទាយមានជ័យ ៖ ក្រោមការបើកឱកាស និងផ្តល់កិច្ចសហការវិនិយោគពីសំណាក់រាជរដ្ឋាភិបាលកម្ពុជា លើការបង្កើតជាតំបន់ពិសេសសម្រាប់បម្រើសដល់វិស័យកសិ-ឧស្សាហកម្ម ដើម្បីធ្វើពិពិធកម្មលើការនាំចេញផលិតផលកសិកម្មកែច្នៃ ក្រុមហ៊ុនឯកជនបានចាប់ផ្តើមបង្ហាញពីសកម្មភាពចូលរួម ដោយផ្តើមពីការសិក្សាលម្អិតពីលទ្ធភាព និងផលប៉ះពាល់លើកដំបូងនៅក្នុងខេត្តបន្ទាយមានជ័យ។

តាមរយៈសភាពាណិជ្ជកម្មកម្ពុជា នៅព្រឹកថ្ងៃទី៦ ខែសីហា ឆ្នាំ២០២០នេះបានបញ្ជាក់ថា អនុវត្តទៅតាមផែនការរបស់រដ្ឋាភិបាលក្នុងការបង្កើនលទ្ធភាពក្នុងការផលិតកសិផលសម្រាប់នាំចេញទៅកាន់ទីផ្សារក្រៅស្រុក ជាពិសេសប្រទេសចិន ប្រធានស្តីទីសភាពាណិជ្ជកម្មខេត្តបន្ទាយមានជ័យ លោក ហ៊ុយ ឡេង រួមជាមួយមន្ត្រីតំណាងឧត្តមក្រុមប្រឹក្សាសេដ្ឋកិច្ចជាតិបានជួបពិភាក្សាស្តីពី ” ការសិក្សាពីលទ្ធភាពបង្កើតតំបន់ពិសេសសម្រាប់វិស័យកសិ-ឧស្សាហកម្ម”។

នៅក្នុងកិច្ចពិភាក្សាខាងលើនេះ ក៏មានការជជែកអំពីសក្កដានុពល កសិកម្ម ការកែច្នៃកសិ-ឧស្សាហកម្ម ដើម្បីពិនិត្យលទ្ធភាពនៃការបង្កើតតំបន់ពិសេសសម្រាប់បណ្ដុំរោងចក្រកែច្នៃផលិតផលកសិ-ឧស្សាហកម្ម បម្រើឱ្យការប្រើប្រាស់ក្នុងស្រុក និងនាំចេញនៅក្នុងខេត្តបន្ទាយមានជ័យ បន្ទាប់ពីទទួលបានការផ្តល់ឱកាសវិនិយោគដល់បណ្តាធុរជនជាតិ និងអន្តរជាតិពីសំណាក់រាជរដ្ឋាភិបាលកម្ពុជា។

អនុប្រធានសភាពាណិជ្ជកម្មកម្ពុជា លោកឧកញ៉ា លឹម ហេង បានមានប្រសាសន៍ថា កាលពីពេលថ្មីៗនេះ មន្ត្រីក្រុមការងារនៃឧត្តមក្រុមប្រឹក្សាសេដ្ឋកិច្ចជាតិ និងថ្នាក់ដឹកនាំសភាពាណិជ្ជកម្មកម្ពុជាបានជួបពិភាក្សាការងារស្តីពី ការសិក្សាពីលទ្ធភាពបង្កើតតំបន់ពិសេសសម្រាប់វិស័យកសិ-ឧស្សាហកម្ម ដើម្បីជំរុញលទ្ធភាពនៃការធ្វើពិពិធកម្មឱ្យមានភាពរីកចម្រើន និងកែច្នៃសម្រាប់ផ្គត់ផ្គង់ទីផ្សារក្នុងស្រុក និងនាំចេញទៅកាន់ទីផ្សារអន្តរជាតិ។

លោកឧកញ៉ាបានបញ្ជាក់ថា “គម្រោងនៃការបង្កើតតំបន់ពិសេសបម្រើដល់វិស័យកសិ-ឧស្សាហកម្ម ដែលជាបណ្តុំរោងចក្រកែច្នៃកសិផលនេះ ត្រូវបានបើកយ៉ាងទូលាយពីសំណាក់រាជរដ្ឋាភិបាល ដែលអាចធ្វើឡើងបាននៅគ្រប់ខេត្ត គ្រប់តំបន់ដែលនៅជិតនឹងប្រភពកសិផល ដើម្បីធ្វើយ៉ាងណាងាយស្រួលដល់ខ្សែសង្វាក់ផលិតកម្ម ហើយអ្វីដែលកាន់តែពិសេស ជាការលើកទឹកចិត្តសម្រាប់វិស័យឯកជនអាចធ្វើការវិនិយោគដោយផ្ទាល់ ឬវិនិយោគរួមគ្នាជារាជរដ្ឋាភិបាល ដើម្បីអាចសម្រេចបានលទ្ធផលគាប់ប្រសើរ”។

អនុប្រធានសភាពាណិជ្ជកម្មកម្ពុជា លោកឧកញ៉ា លឹម ហេង បានបញ្ជាក់ថា សម្រាប់លក្ខខណ្ឌនៃការវិនិយោគបង្កើតតំបន់ពិសេសដែលជាបណ្តុំរោងចក្រកែច្នៃកសិ-ឧស្សាហកម្មនេះ គ្រប់វិនិយោគិនទាំងអស់នឹងទទួលបានការលើកទឹកចិត្តពីសំណាក់រាជរដ្ឋាភិបាលច្រើនជាងការផ្តល់ជូនលើការវិនិយោគបង្កើតតំបន់សេដ្ឋកិច្ចពិសេសដែលបម្រើដល់វិស័យឧស្សាហកម្មទៅទៀត ហើយអាចកើតឡើងបានគ្រប់ទំហំចាប់ពីវិស័យ SMEs ឡើងទៅ ៕

ដោយវុត្ថា

ភ្នំពេញ៖ រដ្ឋសភាកម្ពុជាបានចាប់ផ្តើម ពិនិត្យ និងសិក្សា សេចក្តីព្រាងច្បាប់ ស្តីពីការគ្រប់គ្រងល្បែងពាណិជ្ជកម្ម មុននឹងដាក់បញ្ចូលទៅជារបៀបវារៈសម្រាប់សម័យប្រជុំពេញអង្គរបស់រដ្ឋសភា ខណៈច្បាប់នេះ ត្រូវបានគណៈរដ្ឋមន្ត្រីអនុម័តទាំងស្រុងកាលពីពេលថ្មីៗនេះ។

នេះ បើយោងតាមលទ្ធផលកិច្ចប្រជុំគណៈកម្មាធិការអចិន្រ្តៃយ៍នៃរដ្ឋសភា នៅព្រឹកថ្ងៃទី៦ ខែសីហា ឆ្នាំ២០២០នេះ ក្រោមអធិបតីភាព សម្តេច ហេង សំរិន ប្រធានរដ្ឋសភា ដោយមានការចូលរួមពីតំណាងគណៈកម្មការទាំង ១០របស់រដ្ឋសភាប្រជុំពិនិត្យសំណើសុំអនុម័តសេចក្តីព្រាងច្បាប់ចំនួន៣ ដែលបានស្នើឡើងដោយរាជរដ្ឋាភិបាលកម្ពុជា។

សេចក្ដីព្រាងច្បាប់ស្ដីពី ការគ្រប់គ្រងល្បែងពាណិជ្ជកម្ម ត្រូវបានរៀបចំឡើងក្រោមកិច្ចសហការរួមគ្នារវាងក្រសួងសេដ្ឋកិច្ច និងហិរញ្ញវត្ថុ និងក្រសួងមហាផ្ទៃ ដោយបានចំណាយពេលអស់ប្រមាណជាង ៩ឆ្នាំមកហើយ។ សេចក្តីព្រាងច្បាប់នេះ មានកិច្ចប្រជុំពិគ្រោះយោបល់ជាមួយវិស័យឯកជន កិច្ចពិភាក្សាជាមួយក្រុមប្រឹក្សាអ្នកច្បាប់ សមាជិកក្រុមប្រឹក្សាសេដ្ឋកិច្ច សង្គមកិច្ច និងវប្បធម៌នៃទីស្ដីការគណៈរដ្ឋមន្ត្រី ក្រសួងយុត្តិធម៌ និងកិច្ចប្រជុំអន្តរក្រសួងនៅទីស្ដីការគណៈរដ្ឋមន្ត្រី សរុបទាំងអស់មានចំនួន ៥៥លើក។

សេចក្ដីព្រាងច្បាប់នេះមាន ១២ជំពូក និង ៩៧មាត្រា ដែលមានវិសាលភាពអនុវត្តចំពោះមណ្ឌលល្បែងពាណិជ្ជកម្មសមាហរ័ណ និងល្បែងពាណិជ្ជកម្មនៅក្នុងព្រះរាជាណាចក្រកម្ពុជា។សេចក្តីព្រាងច្បាប់នេះ មានគោលបំណងធានាការគ្រប់គ្រងមណ្ដលល្បែងពាណិជ្ជកម្មសមាហរ័ណ និងល្បែងពាណិជ្ជកម្ម ដើម្បីរួមចំណែកជំរុញកំណើនសេដ្ឋកិច្ច លើកកម្ពស់វិស័យទេសចរណ៍ បង្កើតការងារ ប្រមូលចំណូល រក្សាសុវត្ថិភាព និងសន្តិសុខសង្គម។

សេចក្តីព្រាងច្បាប់នេះ នឹងកំណត់សមត្ថកិច្ច វិធាន និងនីតិវិធីសម្រាប់គ្រប់គ្រងមណ្ឌលល្បែងពាណិជ្ជកម្មសមាហរ័ណ និងល្បែងពានិជ្ជកម្ម សិទ្ធិ និងកាតព្វកិច្ចរបស់រូបវន្តបុគ្គល និងនីតិបុគ្គល ក្នុងការធ្វើប្រតិបត្តិការដោយផ្ទាល់ ឬចូលរួមនៅក្នុងល្បែងពាណិជ្ជកម្ម និងកំណត់សិទ្ធិជាម្ចាស់លើមណ្ឌលល្បែងពាណិជ្ជកម្មសមាហរ័ណកម្ម និងលើគ្រឹះស្ថានល្បែងពាណិជ្ជកម្ម ព្រមទាំងបង្កើតស្ដង់ដារមណ្ឌលល្បែងពាណិជ្ជកម្មសមាហរ័ណកម្ម និងល្បែងពាណិជ្ជកម្មនៃព្រះរាជាណាចក្រកម្ពុជា។

សេចក្តីព្រាងច្បាប់ស្តីពីការគ្រប់គ្រងល្បែងពាណិជ្ជកម្មនេះ ត្រូវបានរាជរដ្ឋាភិបាលកម្ពុជាអនុម័តទាំងស្រុង នៅក្នុងកិច្ចប្រជុំគណៈរដ្ឋមន្ត្រីដែលបានដឹកនាំដោយសម្តេចតេជោ ហ៊ុន សែន នាយករដ្ឋមន្ត្រីកម្ពុជា កាលពីថ្ងៃទី០៣ ខែកក្កដា ឆ្នាំ២០២០កន្លងមកនេះ៕

ដោយ៖ ប៊ី
ភ្នំពេញ៖ អង្គការ Global Green Growth Institute (GGGI) ដែលមានមូលដ្ឋាននៅទីក្រុងសេអ៊ូល បានផ្តល់ភ្លើងខៀវដល់រដ្ឋាភិបាលកម្ពុជាដើម្បីដាក់សំណើថវិកាសម្រាប់គម្រោងផលិតថាមពលពីកាកសំណល់ នៅទីលានចាក់សំរាមដង្កោរាជធានីភ្នំពេញ។

ឯកអគ្គរាជទូតកម្ពុជាប្រចាំប្រទេសកូរ៉េខាង ត្បូងឡុង ឌីម៉ង់ បានថ្លែងកាលពីពេលថ្មីៗនេះថា ការផ្តល់ភ្លើងខៀវនេះកើតឡើង បន្ទាប់ពីកិច្ចប្រជុំមួយធ្វើឡើងកាលពីសប្តាហ៍មុនរវាងលោក និងអតីតអគ្គលេខាធិការអង្គការសហប្រជាជាតិលោកបាន គីមូន ដែលបច្ចុប្បន្នជាប្រធាន GGGI។

លោកឌីម៉ង់ បានថ្លែងថា លោកបាន គីមូន និយាយថា លោកនឹងគាំទ្ររដ្ឋាភិបាលនៅក្នុងគម្រោងនេះ ហើយបានសន្យាថានឹងធ្វើការជាមួយកម្ពុជា ដើម្បីផ្តល់នូវដំណោះស្រាយការគ្រប់គ្រងកាកសំណល់ប្រកបដោយចីរភាពសម្រាប់កន្លែងចាក់សំរាមនៅក្នុងខណ្ឌដង្កោ។

លោក បានឱ្យដឹងថា “អង្គាការ GGGI មានថវិកាមួយចំនួន ដែលអាចជួយប្រទេសកម្ពុជាក្នុងការគ្រប់គ្រងសំរាម ដោយបំលែងវាទៅជាថាមពលស្អាត”។
លោក បានបន្ថែមថា “លោក បាន គីមូន ប្រាប់កម្ពុជាឱ្យធ្វើសំណើទៅ GGGI ហើយលោកនឹងពិចារណា”។

លោកបានមានប្រសាសន៍ថា “ខ្ញុំបានដាក់របាយការណ៍មួយទៅរដ្ឋមន្រ្តីក្រសួងការបរទេស [និងសហប្រតិបត្តិការអន្តរជាតិ លោក ប្រាក់ សុខុន] ដើម្បីពិនិត្យនិងពិចារណា។
លោកបានមានប្រសាសន៍ថា “GGGI ក៏មានសេចក្តីរីករាយផងដែរក្នុងការជួយប្រទេសកម្ពុជាក្នុងការផ្តល់ការពិគ្រោះយោបល់ជំនួយបច្ចេកទេស និងគោលនយោបាយគ្រប់គ្រងសំរាមបន្ថែម”៕

ដោយ ៖ រ៉ាណេត

ភ្នំពេញ ៖ គម្រោងកំពង់ផែដើរដោយប្រព័ន្ធបច្ចេកវិទ្យាទំនើប EDI តម្លៃប្រមាណ១៤លានដុល្លារ ក្រោមជំនួយឥតសំណងរបស់រដ្ឋាភិបាលជប៉ុន ដែលនឹងគ្រោងដាក់ដំណើរការនៅពាក់កណ្តាលឆ្នាំ២០២១ ខាងមុខនេះ ត្រូវបានសម្រេចផ្អាកជាបណ្តោះអាសន្ន ដោយសារតែបណ្តាលមកពីបញ្ហានៃភាពប្រឈមវិបត្តិជំងឺឆ្លង Covid-19 ។

គ្រោងអភវឌ្ឍន៍ និងដាក់ដំណើរការកំពង់ផែ Port EDI(Electronic Data Interchange ) ដែលប្រើប្រព័ន្ធផ្លាស់ប្ដូរទិន្នន័យអេឡិចត្រូនិកគ្រប់គ្រងព័ត៌មានប្រកបដោយប្រសិទ្ធិភាពលើប្រតិបត្ដិការរបស់កំពង់ផែ ត្រូវបានសម្រេចផ្អាកជាបណ្តោះអាសន្ន បន្ទាប់ពីបញ្ចប់កិច្ចប្រជុំរបស់អគ្គនាយកដ្ឋានដឹកជញ្ជូនផ្លូវទឹក ផ្លូវសមុទ្រ និងកំពង់ផែ ក្រោមការដឹកនាំដោយលោក រស់ វណ្ណា រដ្ឋលេខាធិការក្រសួងសាធារណការ និងដឹកជញ្ជូនកាលពីថ្ងៃទី៥ ខែសីហា ឆ្នាំ២០២០ម្សិលមិញនេះ។

លោករដ្ឋលេខាធិការបានមានប្រសាសន៍បញ្ជាក់ថា បើទោះជាគម្រោងខាងលើនេះត្រូវបានសម្រេចផ្អាក និងពន្យាពេលជាបណ្តោះអាសន្ន ប៉ុន្តែអគ្គនាយកដ្ឋានដឹកជញ្ជូនផ្លូវទឹក ផ្លូវសមុទ្រ និងកំពង់ផែ សហការជាមួយ កំពង់ផែស្វយ័តទាំង២ លើការផ្តល់ព័ត៌មានការចូល-ចេញរបស់នាវា ដើម្បីងាយស្រួល រាយការណ៍ជូនថ្នាក់ដឹកនាំក្រសួងបានទាន់ពេលវេលា។

ប្រព័ន្ធផ្លាស់ប្តូរទិន្នន័យអេឡិចត្រូនិកសម្រាប់កំពង់ផែឬ Electronic Data Interchange គឺជាប្រព័ន្ធដែលត្រូវបានប្រើដើម្បីគ្រប់គ្រងព័ត៌មានប្រកបដោយប្រសិទ្ធិភាពលើប្រតិបត្ដិការនាំចេញនាំចូលរបស់ទំនិញដែលនឹងធ្វើឲ្យនីតិវិធីកំពង់ផែមានភាពងាយស្រួលជាងមុន។

ដោយឡែកចំពោះរៀបចំធ្វើផែនទីនាវាចរណ៍អេឡិចត្រូនិក ENC គឺត្រូវតែបន្ត និងជំរុញបញ្ចប់ឱ្យបានឆាប់ ដោយស្នើឱ្យអគ្គនាយកដ្ឋានដឹកជញ្ជូនផ្លូវទឹក ផ្លូវសមុទ្រ និងកំពង់ផែ សិក្សាអំពីសារៈសំខាន់ និងផលប្រយោជន៍នានាក្នុងការចូលជាសមាជិក IALA IHO និង IMSO ដើម្បីដាក់ជូនលោកទេសរដ្ឋមន្រ្តី ពិនិត្យសម្រេច និងគ្រប់នាយកដ្ឋានកំណត់អាទិភាពការងារ ពន្លឿនការរៀបចំលិខិតបទដ្ឋានគតិយុត្ត ។

បន្ថែមពីនេះ លោក រស់ វណ្ណា រដ្ឋលេខាធិការក្រសួងសាធារណការ និងដឹកជញ្ជូន ក៏បានស្នើដល់អគ្គនាយកដ្ឋានយកចិត្តទុកដាក់ទៅលើចំណុចសំខាន់ៗចំនួន៤ផ្សេងទៀតរួមមាន ៖

– អគ្គនាយកដ្ឋានដឹកជញ្ជូនផ្លូវទឹក ផ្លូវសមុទ្រ និងកំពង់ផែ ត្រូវសហការជាមួយរដ្ឋបាលជលផល លើការងារចុះបញ្ជីនាវានេសាទ ដើម្បីលុបកាតក្រហមចេញពី សហគមន៍អឺរ៉ុប (EU) លើការងារប្រយុទ្ធប្រឆាំងនឹងការនេសាទខុសច្បាប់ ការនេសាទគ្មានរបាយការណ៍ និងការនេសាទគ្មានការអនុញ្ញាត (IUU) ព្រមទាំងសិក្សាស្រាវជ្រាវ អំពីស្ថិតិកំពង់ផែ និងចុះពិនិត្យទីតាំងកំពង់ផែទាំងនោះឲ្យបានច្បាស់លាស់ រួមមាន សកម្មភាពអាជីវកម្មជាក់ស្តែងរបស់កំពង់ផែ ឋបនីយភណ្ឌផែ និងជម្រៅទឹក។ល។ ជាពិសេសគឺត្រូវសហការជាមួយកំពង់ផែឯកជន ដើម្បីពង្រឹងការងារលើការស្នើសុំលិខិត អនុញ្ញាតនាវាចូលនៅតាមកំពង់ផែនៃព្រះរាជាណាចក្រកម្ពុជា។

-ស្នើឱ្យមានវត្តមានតំណាងមន្ទីរសាធារណការ និងដឹកជញ្ជូនរាជធានី-ខេត្តដែលមានការពាក់ព័ន្ធនឹងផ្លូវទឹក ចូលរួមកិច្ចប្រជុំលើកក្រោយ ដើម្បីសហការផ្តល់ព័ត៌មាន និងពិភាក្សាលើបញ្ហាប្រឈមនានា ចំពោះGuide line សម្រាប់ Oil tanker ដែលបានរៀបចំរួចរាល់ ត្រូវអញ្ជើញក្រុមហ៊ុនដឹកជញ្ជូនធ្វើការត្រួតពិនិត្យលក្ខខណ្ឌរបស់យើង តើក្រុមហ៊ុនអាចទទួលយកបានរឺអត់ ដើម្បីក្រសួងរៀបចំជាសេចក្តីណែនាំជារួមមួយ។

-ការងារផ្តល់លិខិតអនុញ្ញាតឱ្យនាវាចូលនៅតាមកំពង់ផែនៃព្រះរាជាណាចក្រកម្ពុជា ត្រូវមានការត្រួតពិនិត្យ Check & Control ដើម្បីប្រសិទ្ធភាពការងារ និងពង្រឹងការងារនេះឲ្យបានម៉ត់ចត់អគ្គនាយកដ្ឋានត្រូវសហការជាមួយមន្ទីរសាធារណការនិងដឹកជញ្ជូនរាជធានី-ខេត្ត ប្រសិនបើនាវាណាមិនមានលិខិតអនុញ្ញាតឲ្យនាវាចូល នៅតាមកំពង់ផែទេ កំពង់ផែមិនត្រូវអនុញ្ញាតឲ្យនាវាចូលចតជាដាច់ខាត។ ដោយឡែក ចំពោះការស្នើសុំE/P ដែលធ្វើឡើងចំថ្ងៃឈប់សម្រាកគឺត្រូវបន្តឲ្យមាននិរន្តភាព ដូចថ្ងៃធ្វើការធម្មតា។

-ត្រូវស្នើសុំឧបករណ៍សម្រាប់បំពាក់ការគ្រប់គ្រងចលនារបស់នាវាដោយសិក្សា និងដាក់ចូលទៅក្នុងផែនការឆ្នាំរបស់អគ្គនាយកដ្ឋាន៕

ដោយ៖ ប៊ី

ភ្នំពេញៈ ការផ្ទេរ​ប្រាក់​ពី​ក្រៅប្រទេស​ចូលមក​ប្រទេស​កម្ពុជា អាច​នឹង​ធ្លាក់ចុះ​ជាង ១៥ភាគរយ​នៅ​ឆ្នាំនេះ បើ​គិតពី​សេណា​រី​យ៉ូ​ដ៏​អាក្រក់​បំផុត ដោយសារតែ​ជំងឺ​រាតត្បាត​ឆ្លង​រាលដាល COVID-19 ។ នេះ​បើ​យោងតាម​របាយការណ៍រ​បស់​ធនាគារអភិវឌ្ឍន៍អាស៊ី (ADB) ចេញផ្សាយ​នៅក្នុង​សប្តាហ៍​នេះ។

ផ្អែកលើ​ការផ្ទេរ​ប្រាក់​ពី​ក្រៅប្រទេស សរុប​របស់​ប្រទេស​កម្ពុ​ជាមាន​ចំនួន២,៨ពាន់​លាន​ដុល្លារ​អាមេរិក​ក្នុង​ឆ្នាំ២០១៩ ទឹកប្រាក់​ជាង៤២០លាន​ដុល្លារ នឹងមិន​ត្រូវបាន​ផ្ទេរ​មក​ក្នុងប្រទេស​វិញ​ទេ​នៅ​ឆ្នាំ២០២០ ពីព្រោះ​កម្មករ​រាប់សែន​នាក់ បាន​វិលត្រឡប់​ទៅផ្ទះ​វិញ។

នៅក្នុង​របាយការណ៍រ​បស់​ខ្លួន​ស្តីពី “ផលប៉ះពាល់​នៃ​ជំងឺ COVID-19 លើ​ការធ្វើ​ចំណាកស្រុក​អន្តរជាតិ ការផ្ទេរ​ប្រាក់ និង​គ្រួសារ​អ្នកទទួល​នៅក្នុង​តំបន់​កំពុងអភិវឌ្ឍន៍ នៅ​អាស៊ី”ធនាគារអភិវឌ្ឍន៍អាស៊ី​បានឱ្យដឹងថា វិបត្តិ​សេដ្ឋកិច្ច​បណ្តាលមកពី​ជំងឺ COVID-19 គំរាមកំហែង​ដល់​សន្តិសុខ​ការងារ និង​សុខុមាលភាព​របស់​ជន​ចំណាកស្រុក អន្តរជាតិ​ជាង ៩១លាន​នាក់​មកពី​អាស៊ី​និង​ប៉ាស៊ីហ្វិក។

របាយការណ៍​ដដែល​បានឱ្យដឹងថា ការផ្ទេរ​ប្រាក់​សរុបទៅ​តំបន់​អាស៊ី​ត្រូវបាន​រំពឹងថា នឹង​ធ្លាក់ចុះ​ចន្លោះ៣១,៤ ពាន់​លាន​ដុល្លារ​អាមេរិក (សេណា​រី​យ៉ូ​មូលដ្ឋាន) ដែល​ស្មើនឹង១១,៥ភាគរយ និង៥៤,៣ពាន់​លាន​ដុល្លារ (សេណា​រី​យ៉ូ​ដ៏​អាក្រក់​បំផុត) ស្មើនឹង ១៩,៨ភាគរយ នៃ​ប្រាក់​ដែល​បាន​ផ្ញើមក​ផ្ទះ​នៅ​ឆ្នាំនេះ។

ក្នុងចំណោម​ប្រទេស​កំពុងអភិវឌ្ឍន៍​នៅ​អាស៊ីអាគ្នេយ៍ ហ្វីលីពីន​រង​ផលប៉ះពាល់​ខ្លាំងជាងគេ ដោយ​ការផ្ញើ​ប្រាក់​បាន​ធ្លាក់ចុះ​ជាង ២០ភាគរយ និង​ប្រទេស​ផ្សេងទៀត​ដូចជា​ប្រទេស​កម្ពុ​ជាជាង ១៥ភាគរយ។

ពលករ​ចំណាកស្រុក​កម្ពុជា ពី​សាធារណរដ្ឋ​កូរ៉េ និង​ជប៉ុន​បាន​ផ្ញើ​ប្រាក់​មក​ផ្ទះ​វិញ​ចំនួន ១២,៩១លាន​ដុល្លារ តាមរយៈ​ធនាគារ​អេស៊ីលីដា​ភីអិលស៊ី នៅក្នុង​ឆមាស​ទីមួយ​នៃ​ឆ្នាំនេះ ថយចុះ ១,៤១ លាន​ដុល្លារ​ធៀប​នឹង​រយៈពេល​ដូចគ្នា​កាលពី​ឆ្នាំមុន។

កាលពី​ឆ្នាំមុន​ពលករ​កម្ពុជា​ចំនួន១,២លាន​នាក់ ដែល​ធ្វើការ​នៅ​ប្រទេស​ថៃ កូរ៉េខាងត្បូង ជប៉ុន សឹង្ហ​បុរី ហុងកុង (ចិន) ម៉ាឡេស៊ី និង​អារ៉ាប៊ីសាអ៊ូឌីត​បាន​ផ្ញើរ​ប្រា​ក់មក​ផ្ទះ​វិញ​ចំនួន២,៨ពាន់​លាន​ដុល្លារ កើនឡើង​ពី១,៤ពាន់​លាន​ដុល្លារ​ក្នុង​ឆ្នាំ ២០១។ នេះ​បើ​យោងតាម​តួលេខ​ពី​ក្រសួង​ការងារ និង​បណ្តុះបណ្តាល​វិជ្ជាជីវៈ​កម្ពុជា៕