លោក ស៊ុន ចាន់ថុល៖ ជំនួយឥតសំណង និង ហិរញ្ញប្បទានរបស់ចិនសម្រាប់អភិវឌ្ឍហេដ្ឋារចនាសម្ព័ន្ធសំខាន់ៗ នៅកម្ពុជាក្នុងទិសដៅជំរុញកំណើនសេដ្ឋកិច្ច

ដោយវុត្ថា

ភ្នំពេញ៖ រដ្ឋមន្ត្រីក្រសួងសាធារណការ និងដឹកជញ្ជូន បានអះអាងថា ការផ្តល់ជំនួយឥតសំណង ព្រមទាំងហិរញ្ញប្បទានដ៏ច្រើនសន្ធឹកសន្ធាប់របស់ប្រទេសចិនសម្រាប់ការស្ដារ និងអភិវឌ្ឍហេដ្ឋារចនាសម្ព័ន្ធសំខាន់ៗ នៅក្នុងប្រទេសកម្ពុជា បាននិងកំពុងមានសក្ដានុពលជាច្រើន ក្នុងទិសដៅជំរុញកំណើនសេដ្ឋកិច្ច និងអភិវឌ្ឍកម្ពុជា។

លោកទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន បានលើកឡើងយ៉ាងដូច្នេះតាមរយៈការថ្លែងសុន្ទរកថាតាមវីដេអូ នៅក្នុងវេទិកាសហប្រតិបត្តិការសេដ្ឋកិច្ចឈូងសមុទ្រ Pan-Beibu លើកទី១១ និងសន្និសីទកិច្ចសហប្រតិបត្តិការកំពង់ផែនៃសាធារណរដ្ឋប្រជាមានិតចិន និងអាស៊ានឆ្នាំ២០២០ ដែលប្រារព្ធធ្វើឡើងនៅទីក្រុងណាននីង ខេត្វក្វាងស៊ី សាធារណរដ្ឋប្រជាមានិតចិននៅថ្ងៃទី ១៥ ខែតុលា ឆ្នាំ ២០២០នេះ ។

លោកទេសរដ្ឋមន្ត្រីថ្លែងថា វេទិកា និងសន្និសីទកំពង់ផែនេះ គឺជាយន្តការមួយសម្រាប់កសាងនូវបណ្តាញ និងពង្រឹងនូវកិច្ចសហប្រតិបត្តិការនៅក្រោមភាពជាដៃគូយុទ្ធសាស្ត្ររវាងអាស៊ាននិងចិន ដើម្បីទាញយកផលប្រយោជន៍ពីតំបន់ពាណិជ្ជកម្មសេរីរវាងអាស៊ាន និងចិន និងកិច្ចព្រមព្រៀងទ្វេភាគី។

លោកទេសរដ្ឋមន្ត្រីបញ្ជាក់ទៀតថា នេះមិនមែនជាពេលដែលចោទទម្លាក់កំហុសដាក់គ្នាទៅវិញទៅមកទេ គឺជាពេលដែលពិភពលោកត្រូវរួបរួមគ្នាក្នុងការប្រយុទ្ធប្រឆាំងនឹងការរាតត្បាតនូវជំងឺកូវីដ១៩ និងពង្រឹងពង្រីកនូវកិច្ចសហប្រតិបត្តិការរវាងគ្នា ដើម្បីជំរុញនូវកំណើនសេដ្ឋកិច្ចពិភពលោក និងជៀសវាងឱ្យបាននូវការវិលត្រឡប់ទៅរកការដាក់នូវរបាំង ឬវិធានការនានា ដែលរិតត្បិតដល់ការធ្វើពាណិជ្ជកម្មអន្តរជាតិដោយសេរី។

លោកទេសរដ្ឋមន្ត្រី ស៊ុន ចាន់ថុល ធ្លាប់បានលើកឡើងកន្លងមកនេះថា ប្រទេសចិន បានឈរនៅក្នុងលំដាប់លេខរៀងទី ១នៃការផ្តល់នូវកម្ចី និងហិរញ្ញប្បទាន ដ៏ច្រើនដល់ប្រទេសកម្ពុជាក្នុងការស្តារ និងធ្វើឱ្យប្រសើរឡើងនូវប្រព័ន្ធហេដ្ឋារចនាសម្ព័ន្ធនានានៅទូទាំងប្រទេស ។

បើតាមលោក ទេសរដ្ឋមន្ត្រី ស៊ុន ចាន់ថុល គម្រោងហេដ្ឋារនាសម្ព័ន្ធផ្លូវ និងស្ពាននានា ដែលកសាងសាងដោយក្រុមហ៊ុន ចិន និងជំនួយ និងហិរញ្ញវប្បទានរបស់ចិន មានប្រវែងជិត ៣០០០ គីឡូម៉ែត្រ នៅទូទាំងប្រទេស។

សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជាធ្លាប់បានឱ្យដឹងដែរថាគម្រោងហេដ្ឋារចនាសម្ព័ន្ធផ្លូវថ្នល់ប្រើប្រាស់ហិរញ្ញប្បទាន និងជំនួយឥតសំណង របស់មិត្តចិន បានសាងសង់រួចរាល់មានចំនួន ២៧ ខ្សែ មានប្រវែងសរុប ២,៧៧៩ គីឡូម៉ែត្រ គម្រោងកំពុងសាងសង់មានចំនួន0៥ ខ្សែ មានប្រវែង ប្រមាណ ៤៩៧,២០ គីឡូម៉ែត្រ។

សម្តេចបន្តថា ចំណែកស្ពានធំៗ ដែលបានសាងសង់រួចមានចំនួន ០៨ ស្ពាន មានប្រវែងសរុប ៧,៤៣៤ ម៉ែត្រ និងស្ពានកំពុងសាងសង់ ដូចជា ស្ពានមិត្តភាពកម្ពុជា-ចិន ក្នុងខេត្តកំពងចាម ស្ទឹងត្រង់-ក្រូចឆ្មារ និងស្ពានឆ្លងកាត់ទន្លេបាសាក់ (សិត្បូ) នៃគម្រោងខ្សែក្រវាត់ក្រុងទី៣ ជាដើម៕

អ្នកប្រតិបត្តិទីផ្សារអះអាងថា ការទិញ-លក់អចលនទ្រព្យភាគច្រើនមានសកម្មភាពតែនៅក្នុង និងជាយក្រុងតែប៉ុណ្ណោះ

ដោយ ៖ រ៉ាណេត

ភ្នំពេញ ៖ ការទិញ-លក់អចលនទ្រព្យនៅពេលបច្ចុប្បន្ននេះត្រូវបានគេទទួលស្គាល់កំពុងតែចាប់ផ្តើមងាកចេញពីភាពស្ងប់ស្ងាត់ជាបណ្ដើរៗ ប៉ុន្តែក្នុងនោះត្រូវបានអ្នកជំនាញដែលកំពុងប្រតិបត្តិនៅក្នុងវិស័យនេះអះអាងថា សកម្មភាពភាគច្រើនកើតមានតែនៅក្នុង និងតំបន់ជាយក្រុងតែប៉ុណ្ណោះ ដែលផ្ដើមចេញពីអតិថិជនក្នុងស្រុកតែប៉ុណ្ណោះ។

អគ្គនាយកក្រុមហ៊ុនភ្នាក់ងារអចលនទ្រព្យ Century21 Fortuna Investment លោក វ៉ា វីរៈ បានមានប្រសាសន៍ប្រាប់តាមទូរស័ព្ទនៅរសៀលថ្ងៃទី១៥ ខែតុលា ឆ្នាំ២០២០នេះថា លោកទទួលស្គាល់នូវសកម្មភាពទីផ្សារអចលនទ្រព្យនៅពេលនេះពិតជាមានកំណើនល្អជាងកាលពី៤-៥ខែមុន ប៉ុន្តែសកម្មភាពទាំងនេះ ក្រៅពីតំបន់ដែលមានតម្រវការអភិវឌ្ឍនៅតាមបណ្តាខេត្តស្ថិតនៅជុំរាជធានីភ្នំពេញ គឺមានតែក្នុង និងតំបន់ជាយក្រុងតែប៉ុណ្ណោះ។

លោក វ៉ា វីរៈ បានមានប្រសាសន៍បញ្ជាក់ថា “នៅក្នុងរយៈកាលជាង៧ខែកន្លងទៅនេះ ក្រៅពីតំបន់រាជធានីភ្នំពេញ ខ្ញុំបានចេញបណ្តុះបណ្តាលក្នុងវគ្គសិក្ខាសាលាជំនាញជាភ្នាក់ងារអចនទ្រព្យបានចំនួន១៦ខេត្តក្រុង ដែលក្នុងនោះខ្ញុំបានធ្វើការកត់សម្គាល់ឃើញថា សកម្មភាពទិញ-លក់អចលនទ្រព្យ ដូចជាដីធ្លី និងសំណង់លំនៅដ្ឋានផ្សេងៗនៅតាមបណ្តាខេត្តហាក់មិនសូវមានកម្រើកខ្លាំងនៅឡើយនោះទេ ដែលអាចនិយាយបានថាស្ថិតនៅទ្រឹង”។

លោកបានបន្តថា “យើងទទួលស្គាល់ថា សកម្មភាពទីផ្សារអចលនទ្រព្យបានចាប់ផ្តើមកម្រើកឡើងវិញ ប៉ុន្តែអ្វីដែលជាការគួរឱ្យសម្គាល់គឺកើតមានតែនៅក្នុងក្រុង(ទីផ្សារខុនដូកម្រិតមធ្យម) ឬនៅតាមតំបន់ជាយក្រុង (ទីផ្សារលំនៅដ្ឋានកម្រិតសមរម្យ) តែប៉ុណ្ណោះ ហើយសកម្មភាពទាំងអស់នេះក៏អស្រ័យទៅលើតម្រូវការរបស់ប្រជាជនក្នុងស្រុក រួមជាមួយនឹងការផ្លាស់ប្ដូរនូវយុទ្ធសាស្ត្រក្នុងការលក់របស់អ្នកអភិវឌ្ឍន៍ ដែលវាមិនមែនជាសកម្មភាពដែលកើតមានដោយសារអ្នកមកពីក្រៅប្រទេសនោះទេ។ ទោះជាយ៉ាងណាក៏ដោយ ពាក់ព័ន្ធទៅនឹងតម្លៃគឺមិនមានការឡើងថ្លៃនោះទេ ប៉ុន្តែមានអចលនវត្ថុមួយចំនួនលក់ក្នុងតម្លៃក្រោមទីផ្សារផងដែរ”។

អ្នកជំនាញផ្នែកលក់អចលនទ្រព្យនៅក្នុងតំបន់ខណ្ឌដង្កោ លោក សរ បញ្ញា ដែលកំពុងកាន់គម្រោងលំនៅដ្ឋាននៅក្នុងដៃ បានមានប្រសាសន៍ស្រដៀងការលើកឡើងខាងលើនេះផងដែរ ដោយលោកបានបញ្ជាក់ថា “ស្ទើរតែគ្រប់គម្រោងនៅតំបន់ជុំវិញរាជធានីភ្នំពេញភាគច្រើននៅតែមានទីផ្សារ លើកលែងតែគម្រោងដែលស្ថិតនៅទីតាំងមិនសូវអំណោយផលដែលពិបាកលក់”។

លោកបញ្ជាក់ថា “គម្រោងលំនៅដ្ឋានដែលស្ថិតនៅភាគខាងលិចក្នុងខណ្ឌដង្កោ គឺនៅតែមានទីផ្សារដដែល គ្រាន់តែមិនផុសផុលដូចគ្រាចុងឆ្នាំ២០១៩ ខណៈដែលអ្នកទិញក៏នៅតែមានសកម្មភាព។ នៅតំបន់ជាយក្រុងនេះ គម្រោងភាគច្រើនមិននៅទ្រឹងនោះទេ ដោយសារតែទីតាំងគម្រោងមានអំណោយពីហេដ្ឋារចនាសម្ព័ន្ធដែលវិនិយោគដោយរដ្ឋាភិបាលជាច្រើនខ្សែ ជាពិសេសស្ថិតនៅជិតគម្រោងធំដូចជា ផ្សារទំនើប AEON3 ស្ថិតនៅផ្លូវ៦០ម៉ែត្រ មានផ្លូវ៥០ម៉ែត្រនៅអមជាមួយ ស្ថិតនៅជិតគម្រោងព្រលានយន្តថ្មីក្នុងខេត្តកណ្តាល និងគម្រោងទីក្រុងរណបផ្សេងៗទៀត។ ប៉ុន្តែមិនរាប់បញ្ចូលពីស្ថានភាពដែលកំពុងទទួលរងនូវគ្រោះជំនន់ប៉ុន្មានថ្ងៃចុងក្រោយនេះនោះទេ”៕

JETRO ប្តេជ្ញាជួយទាក់ទាញវិនិយោគិនជប៉ុនមកកាន់កម្ពុជា

ដោយ ៖ វុត្ថា

ភ្នំពេញ ៖ អង្គការពាណិជ្ជកម្មក្រៅប្រទេសជប៉ុន JETRO បានបង្ហាញនូវជំហរក្នុងការបន្តអនុវត្តគម្រោងអភិវឌ្ឍន៍នានានៅកម្ពុជា ជាពិសេសការជួយទាក់ទាញវិនិយោគិនរបស់ជប៉ុនមកកាន់កម្ពុជា តាមរយៈការបង្កើតឱ្យមានការផ្គូរផ្គងអាជីវកម្មរវាងវិនិយោគិនកម្ពុជា-ជប៉ុន ។

លោក Masahiro Miyao ប្រធានតំណាងប្រចាំកម្ពុជា នៃអង្គការ JETRO នៅក្នុងជំនួបសម្ដែងការគួរសម និងជម្រាបលា ដែលអណត្តិបេសកកម្មនៅកម្ពុជាក្នុងខែតុលា ឆ្នាំ២០២០ នេះ ជាមួយលោកទេសរដ្ឋមន្រ្តី ចម ប្រសិទ្ធ រដ្ឋមន្ត្រីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ កាលពីម្សិលមិញនេះ បានបង្ហើបពីគម្រោង និងផែនការរបស់រដ្ឋាភិបាលជប៉ុនលើការវិនិយោគផ្នែកឧស្សាហកម្មនៅក្រៅប្រទេស។

លោកថ្លែងថា “ក្រសួងសេដ្ឋកិច្ច ពាណិជ្ជកម្ម និងឧស្សាហកម្មនៃប្រទេសជប៉ុនបានដាក់ចេញផែនការលើកទឹកចិត្ត សម្រាប់វិស័យឧស្សាហកម្មក្រៅប្រទេស និងការគាំទ្រផ្នែកសហគ្រាសធុនតូច និងមធ្យម ដែលជាឱកាសល្អមួយសម្រាប់ភាគីទាំងពីរ (កម្ពុជា-ជប៉ុន) ត្រូវរិ:រកមធ្យោបាយសមស្របសម្រាប់ការរៀបចំពិធីការផ្គូរផ្គងអាជីវកម្ម និងបង្ហាញសក្តានុពលសេដ្ឋកិច្ចរបស់កម្ពុជា ទោះក្នុងកាលៈទេសៈដែលពិភពលោកកំពុងយាយីដោយមេរោគឆ្លងCovid-19 ។

លោក ចម ប្រសិទ្ធ ទេសរដ្ឋមន្រ្តីរដ្ឋមន្ត្រីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ បានសម្ដែងនូវការស្វាគមន៍ និងវាយតម្លៃខ្ពស់ចំពោះការបំពេញបេសកកកម្មការងាររបស់លោក Masahiro Miyao រយៈពេលជាង២ឆ្នាំកន្លងទៅនេះ ក្នុងការជំរុញទំនាក់ទំនង និងកិច្ចសហប្រតិបត្តិការល្អប្រសើរផ្នែកសេដ្ឋកិច្ច និងការវិនិយោគនៅកម្ពុជា ។

លោកបន្តថា ដោយឡែក ជាមួយក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ លោកក៏បានដើរតួរយ៉ាងសំខាន់លេីវិស័យទឹកស្អាត និងការអភិវឌ្ឍន៍សហគ្រាសធុនតូចនិងមធ្យម ស្របពេលដែលលោកមានតំណែងមួយទៀតជាអគ្គលេខាធិការនៃអង្គការ JBAC ជប៉ុន។

លោក ចម ប្រសិទ្ធ ក៏បានសម្ដែងការស្វាគមន៍ និងអបអរសាទរចំពោះលោកស្រី Marisa Haruta ប្រធានតំណាងអង្គការ JETRO ថ្មីប្រចាំកម្ពុជា ដោយសង្ឃឹមថា ក្នុងអាណត្តិបំពេញការងាររបស់លោកស្រី នឹងពង្រឹងបានថែមទៀតនូវកិច្ចសហប្រតិបត្តិការ ក្នុងការបន្តលេីកកំពស់ទំនាក់ទំនងសេដ្ឋកិច្ចកាន់តែប្រសេីររវាងកម្ពុជា-ជប៉ុន ជាពិសេសការទាក់ទាញការវិនិយោគដោយផ្ទាល់ពីជប៉ុនមកកម្ពុជា ឲ្យបានកាន់តែច្រើនឡើង។

លោកស្រី Marisa Haruta ប្រធានតំណាងអង្គការ JETRO ប្រចាំកម្ពុជា ដែលទើបតែងតាំងថ្មី ក៏បានបង្ហាញនូវជំហរបន្តកិច្ចសហប្រតិបត្តិការសម្រាប់គម្រោងអភិវឌ្ឍន៍នានានៅកម្ពុជា ។

លោកស្រីបន្តថា ទោះបីការរាតត្បាតនៃជំងឺ Covid-19 នៅបន្តគំរាមកំហែង ប៉ុន្តែទំនាក់ទំនងនៃភាគីទាំងពីរមិនអាចថមថយបានឡើយ ។ លោកស្រីបន្តថា កិច្ចការអ្វីៗជាច្រើនយើងត្រូវធ្វេីតាមប្រព័ន្ធ Online ដែលវាជាវិស័យបច្ចេកវិទ្យាទំនើបនាពេលបច្ចុប្បន្ននេះ សម្រាប់ឈានទៅសម្រេចកិច្ចការសំខាន់ៗតាមការគ្រោងទុក៕

ទំនាក់ទំនងរវាងចិន និងឡាវកាន់តែមានភាពស្អិតល្មួតជាងមុន

ដោយ ៖ ហ្សូលី

ភ្នំពេញ ៖ ទីប្រឹក្សា និងជាប្រមុខការទូតបរទេសរបស់ចិន លោក វ៉ាង យី បានជួបពិភាក្សាគ្នាជាមួយនឹងដៃគូប្រទេសឡាវនៅក្នុងទីក្រុងវៀងច័ន្ទ ដែលជារដ្ឋធានីរបស់ប្រទេសឡាវ កាលពីថ្ងៃពុធ ទី១៤ ខែតុលា ឆ្នាំ ២០២០កន្លងទៅ បន្ទាប់ពីការចុះកិច្ចព្រមព្រៀងពាណិជ្ជកម្មសេរីកម្ពុជា-ចិនបានបញ្ចប់។

ភាគីទាំងពីរបានព្រមព្រៀងក្នុងការបង្កើនទំនាក់ទំនងឱ្យកាន់តែមានភាពជិតស្និទ្ធ និងជម្រុញកិច្ចសហប្រតិបត្តិការទ្វេភាគី និងបើកចំហសេដ្ឋកិច្ចតាមរយៈគម្រោងផ្តួចផ្តើមខ្សែក្រវ៉ាត់មួយ ផ្លូវមួយ ដែលជាការផ្តួចផ្តើមរបស់ប្រមុខរដ្ឋាភិបាលចិន លោក ស៊ី ជីនពីង។

ចិនបានផ្តល់ជូនការកាត់បន្ថយពន្ធសម្រាប់ផលិតផលចំនួន ៩៧ ភាគរយ ដែលជាទំនិញនាំចូលពីបណ្តាប្រទេសមួយចំនួននៅតំបន់អាស៊ីអាគ្នេយ៍ដូចជា កម្ពុជា មីយ៉ាន់ម៉ា និងឡាវ។

គម្រោងដ៏សំខាន់មួយទៀតនោះគឺជាគម្រោងផ្លូវដែកល្បឿនលឿនឡាវ-ចិន គ្រោងនឹងបញ្ចប់នៅខែធ្នូ ឆ្នាំ២០២១ ខាងមុខ។ ខ្សែផ្លូវដែកនេះនឹងរត់ចេញពីទីក្រុងគុនមីង រដ្ឋធានីនៃខេត្តយុនណាន ប្រទេសចិន ឆ្ពោះទៅកាន់ទីក្រុងវៀងច័ន្ទ រដ្ឋធានីរបស់ឡាវ។

គម្រោងនេះត្រូវការជាបន្ទាន់ ព្រោះប្រទេសឡាវបច្ចុប្បន្នមានតែផ្លូវដែកតូចចង្អៀត ដែលមានប្រវែងប្រមាណ ៣.៥គីឡូម៉ែត្រ តែប៉ុណ្ណោះ ដែលវាមិនអាចឆ្លើយតបទៅនឹងតម្រូវការសេដ្ឋកិច្ចកំពុងរីកចម្រើនយ៉ាងឆាប់រហ័សរបស់ឡាវបានឡើយ។ ចំណែកការធ្វើដំណើរតាមរយៈរថយន្តក្រុង មិនទាន់ចិត្តនោះទេ ដូច្នេះផ្លូវដែកនេះនឹងផ្តល់ឱ្យនូវការអភិវឌ្ឍដែលមិនអាចប្រកែកបាន។

ប្រទេសឡាវទទួលបានប្រាក់កម្ចីពីរដ្ឋាភិបាលចិនជាថ្នូរនឹងការគាំទ្រផ្នែកនយោបាយលើបញ្ហាដូចជាតៃវ៉ាន់។ រីឯក្រុមហ៊ុនចិនវិញទទួលបានអត្ថប្រយោជន៍ធនធានពីឡាវ និងទទួលបានការដឹកជញ្ជូនពីចិនឆ្លងកាត់ពីប្រទេសឡាវឆ្លងទៅកាន់ប្រទេសថៃ។

ប្រទេសឡាវតែងតែមានទំនាក់ទំនងជិតស្និទ្ធជាមួយសាធារណរដ្ឋប្រជាមានិតចិន និងបានចាប់ដៃគ្នាពង្រឹងកិច្ចសហប្រតិបត្តិការលើគម្រោងខ្សែក្រវ៉ាត់មួយផ្លូវមួយ បន្ទាប់ពីចិនអាចផ្សារភ្ជាប់ទៅនឹងធនធានរបស់ចិននេះ ហៅថា ពាណិជ្ជកម្ម។ ថ្វីត្បិតតែឡាវជាប្រទេសក្រីក្រ ប៉ុន្តែធនធានធម្មជាតិគឺសម្បូរទៅដោយ មាស វ៉ែ សំណប៉ាហាំង ទង់ដែង ប្រេង និងឧស្ម័ន។

តាមទស្សនៈភូមិសាស្រ្ត និងសេដ្ឋកិច្ច ការកើនឡើងនៃការភ្ជាប់ទំនាក់ទំនងរវាង ចិន ឡាវ និងថៃ គឺមិនមានអ្វីចម្លែកឡើយ។

យោងតាមអ្នកអង្កេតការណ៍នៃភាពស្មុគស្មាញវិស័យសេដ្ឋកិច្ចក្នុងឆ្នាំ ២០១៨ បានបង្ហាញឱ្យឃើញថា ការនាំចេញរបស់ឡាវប្រមាណជាង ៥០ ភាគរយ ចេញទៅថៃ និងជាង ៣១ ភាគរយទៅកាន់ប្រទេសចិន។ ដូច្នេះការបង្កើនការតភ្ជាប់រវាងចិន ឡាវ និងថៃ គឺនឹងជួយពង្រឹងកម្លាំងស្នូលសេដ្ឋកិច្ចរបស់ឡាវ ដែលផ្តល់លទ្ធភាពឱ្យមានសមត្ថភាពលើការធ្វើគម្រោងអភិវឌ្ឍផ្សេងៗទៀត៕ CGTN

អ្នកជំនាញ ៖ អ្នករកស៊ីក្នុងវិស័យអចលនទ្រព្យត្រូវមានភាពបត់បែនរកបរិបទថ្មី ដើម្បីទាក់ទាញអតិថិជន

ដោយ ៖ វុត្ថា

ភ្នំពេញ ៖ អ្នកជំនាញបានមើលឃើញពីភាពបត់បែនក្នុងបរិបទថ្មី នៃអ្នករកស៊ីក្នុងវិស័យអចលនទ្រព្យយ៉ាងច្រើន ដើម្បីទាក់ទាញអតិថិជនរបស់ខ្លួន និងមានការប្រកួតប្រជែងខ្ពស់នៅក្នុងពេលដែលប្រទេសកម្ពុជាកំពុងប្រឈមទៅនឹងវិបត្តិសេដ្ឋកិច្ចសកល។

លោកស្រី អាន សុធីតា នាយិកាប្រចាំប្រទេសក្រុមហ៊ុនអន្តរជាតិ CBRE Cambodia បានប្រាប់គេហទំព័រ propertyarea.asia កាលពីពេលថ្មីនេះថា វិបត្តិដែលបង្ករឡើងដោយជំងឺកូវីដ ១៩ នៅក្នុងឆ្នាំ២០២០នេះ គ្រប់គ្នាបានទទួលយកនូវបទពិសោធន៍ថ្មីៗ នេះ ហើយបានបត់បែនទៅតាមស្ថានការណ៍ ដើម្បីលក់អចលនទ្រព្យរបស់ពួកគេ និងកែប្រែនូវឥរិយាបថថ្មីនាពេលអនគត ។

លោកស្រីថ្លែងថា “តួរយ៉ាងទីផ្សារនៅក្នុងវិស័យអចលនទ្រព្យកាន់តែមានការប្រកួតប្រជែងខ្ពស់ ហើយបើសិនជាអ្នកវិនិយោគ បានទទួលរងនូវផលប៉ះពាល់ក្នុងការលក់នូវអចលនទ្រព្យរបស់ខ្លួន ប៉ុន្តែពួកគាត់មានភាពបត់បែន ដោយសារពួកគាត់បត់បែនទៅលើតម្លៃ កិច្ចសន្យាទិញលក់ និងផ្តល់នូវគុណភាពសេវកម្ម ព្រមជាមួយនឹងផ្តល់នូវសេវាកម្មបន្ថែមទៅលើអចលនទ្រព្យរបស់ពួកគាត់”។

លោកស្រីបន្តថា ក្រៅពីនេះ ក៏មានការផ្តល់នូវសេវាកម្មពិសេសជាច្រើនផ្សេងទៀត ដល់អតិថិជនជាអ្នកជួល ដើម្បីរក្សាជួលនៅក្នុងអាផាម៉ិន ឬក៏រក្សានូវកំណើននូវការលក់របស់អចលនទ្រព្យពួកគាត់ ដែលបានគ្រោងទុក។ បទពិសោធន៍ និងភាពបត់បែនថ្មីនេះ បានធ្វើឱ្យមានភាពល្អប្រសើរបន្តិច ប៉ុន្តែយ៉ាងណាពួកគាត់នូវតែខិតខំប្រឹងប្រែង ដើម្បីទាញយកនូវចំណែកទីផ្សារឱ្យបានដូចដើម (កាលពីមិនទាន់ទទួលរងនូវផលប៉ះពាល់)”។

លោកស្រីបានពន្យល់ទៀតថា “នាពេលបច្ចុប្បន្ននេះ អ្នកអភិវឌ្ឍន៍គម្រោងភាគច្រើន ផ្តោតលើការចាប់អតិថិជននៅក្នុងស្រុក ខណៈអតិថិជននៅក្រៅស្រុក គឺមិនទាន់មានដូចដើមនោះទេ” ។

លោក ម៉ាន់ ច័ន្ទឌី អគ្គនាយកក្រុមហ៊ុន Premium Group បានឱ្យដឹងថា នៅក្នុងបរិបទនៃការរីករាលដាលជាកលនៃជំងឺកូវីដ ១៩ នេះ ទាំងអ្នកអភិវឌ្ឍន៍ និងអ្នករស៊ីក្នុងវិស័យអចលទ្រព្យ មានការផ្លាស់ប្តូរទិសដៅនៃការលក់អចលនទ្រព្យរបស់ខ្លួនដើម្បីទាក់ទាញនូវអថិជន ។

លោកបន្តថា “ការទិញលក់អចលនទ្រព្យនាពេលបច្ចុប្បនេះ គឺស្ថិតនៅក្នុងលក្ខណពិសេស ដូចជាទិញដោយគ្មានប្រាក់កក់ និងមានការថែមនូវសម្ភារៈប្រើប្រាស់ផ្សេងៗនៅក្នុងផ្ទះបាយ ដូចជាទូទឹកកក និងសម្ភារៈប្រើប្រាស់ផ្សេងជាដើមពីក្រុមហ៊ុនអភវឌ្ឍន៍” ។

លោកបន្ថែមថា “ទំាងលក្ខខណ្ឌនៃការបង់រំលស់ផ្ទះក៏ស្ថិតនៅក្នុងស្ថានភាពល្អប្រសើរផងដែ ដូចជាការបង់រំលស់អត់ការប្រាក់ក្នុងរយៈពេលយូរ និងមានភាពងាយស្រួលដល់អតិថិជន”៕

កញ្ចប់ហិរញ្ញប្បទាន ៥០លានដុល្លារ ជួយគាំទ្រវិស័យ SME ប្រើប្រាស់អស់ជាង ៥០ភាគរយហើយ

ដោយ ៖ ហ្សូលី

ភ្នំពេញ ៖ កញ្ចប់ហិរញ្ញប្បទានពិសេសរបស់រដ្ឋាភិបាល ក្នុងការជួយគាំទ្រដល់វិស័យសហគ្រាសធុនតូច និងមធ្យម ចំនួន ៥០ លានដុល្លារ គិតមកទល់បច្ចុប្បន្ននេះ បានប្រើប្រាស់អស់ជាង ៥០ភាគរយហើយ។ នេះបើតាមឱ្យដឹងពីអគ្គនាយកធនាគារអភិវឌ្ឍជនបទ និងកសិកម្ម។

លោក កៅ ថាច អគ្គនាយកធនាគារអភិវឌ្ឍជនបទ និងកសិកម្ម បានថ្លែងប្រាប់សារព័ត៌មានក្នុងស្រុកថា កញ្ចប់ថវិកាហិរញ្ញប្បទានពិសេសរបស់រដ្ឋាភិបាល សម្រាប់ការជួយគាំទ្រដល់វិស័យសហគ្រាសធុនតូច និងមធ្យម ដែលរងផលប៉ះពាល់ដោយសារវិបត្តិកូវីដ ១៩ គិតមកទល់សព្វថ្ងៃ កំពុងអភិវឌ្ឍន៍ និងដំណើរការទៅដោយរលូន ដែលអាចឆ្លើយតបមកវិញជាបណ្តើរៗ នៅក្នុងស្ថានភាពវិបត្តិសេដ្ឋកិច្ចសកល និងជំងឺរាតត្បាតដ៏សាហាវនេះ។

លោកបន្តថា ហិរញ្ញប្បទានពិសេសចំនួន ៥០លានដុល្លារនេះ អនុវត្តលើការជួយសហគ្រាសធុនតូច និងមធ្យម បានជាង ៥០ភាគរយហើយ និងកំពុងផ្តល់បន្ថែមសម្រាប់សហគ្រាសផ្សេងៗ ក្នុងការយកកញ្ចប់ថវិកាទៅប្រកប និងពង្រឹងអាជីវកម្មរបស់ខ្លួន។

ជាមួយគ្នានេះ លោក កៅ ថាច បានរៀបរាប់បន្ថែមឱ្យដឹងថា យោងតាមការសង្កេត និងតាមដានជាប្រចាំចំពោះសហគ្រាសដែលទទួលយកថវិកាទៅអភិវឌ្ឍន៍រួចហើយនោះ មានការរីកចម្រើនប្រព្រឹត្តទៅដោយរលូន នៅក្រោមគម្រោងដែលគិតគូរយ៉ាងហ្មត់ចត់ពីខាងរាជរដ្ឋាភិបាលកម្ពុជា។

ដើម្បីជំនួសការនាំចូលនៅក្នុងស្ថានភាពដ៏លំបាកនៃការរីករាលដាលវិបត្តិកូវីដ ១៩ រាជរដ្ឋាភិបាលបានសម្រេចបញ្ចេញកញ្ចប់ថវិកាពិសេសតាមរយៈធនាគារអភិវឌ្ឍន៍ជនបទ និងកសិកម្ម សម្រាប់ផ្តល់ទៅវិស័យឯកជន វិស័យសហគ្រាសធុនតូច និងមធ្យម ក្នុងវិស័យកែច្នៃផលិតផលកសិកម្ម និងវិស័យឧស្សាហកម្ម និងកសិកម្ម៕

កម្ពុជា និងប្រទេសចំនួន ១៥ នៅក្នុងតំបន់អាស៊ី – ប៉ាស៊ីហ្វិក ជំរុញឱ្យឥណ្ឌាចូលតុចរចាពាណិជ្ជកម្មសេរីឡើងវិញ

ដោយ ៖ វុត្ថា

ភ្នំពេញ ៖ កម្ពុជា និងប្រទេសចំនួន ១៥ ផ្សេងទៀតនៅក្នុងតំបន់អាស៊ី – ប៉ាស៊ីហ្វិកដែលបាននឹង
កំពុងចរចាកិច្ចព្រមព្រៀងពាណិជ្ជកម្មសេរី កាលពីម្សិលមិញនេះ បានទទូចឱ្យប្រទេសឥណ្ឌាត្រឡប់ចូលតុចរចាវិញ ខណៈ ដែលកិច្ចព្រមព្រៀងពាណិជ្ជកម្មសេរីនេះ ផ្អែកតាមផែនការ នឹងត្រូវចុះតហត្ថលេខានៅចុងឆ្នាំនេះ។

តាមការចុះផ្សាយរសារព័ត៌មាន kyodo ដែលមានមូលដ្ឋាននៅក្នុងប្រទេសជប៉ុនបានឱ្យដឹងថា ប្រទេសឥណ្ឌា បានដកខ្លួនចេញពីការចរចាពាណិជ្ជកម្មសេរីជាមួយនឹងប្រទេសនៅក្នុងតំបន់អាស៊ី – ប៉ាស៊ីហ្វិកជាច្រើនលើកច្រើនសារ ដោយបានបង្ហាញការព្រួយបារម្ភថា ការបើកទីផ្សាររបស់ខ្លួននឹងបង្កើនឱនភាពពាណិជ្ជកម្មជាមួយប្រទេសចិន។

សារព័ត៌មាន Kyodo ចុះផ្សាយថា “ ប្រទេសឥណ្ឌាបានលើកពេលអត់ចូលរួមរាល់ការចរចាសម្រាប់ក្របខ័ណ្ឌភាពជាដៃគូសេដ្ឋកិច្ចគ្រប់ជ្រុងជ្រោយក្នុងតំបន់នៅឆ្នាំនេះ (Regional Comprehensive Economic Partnership framework ) ។

រដ្ឋមន្រ្តីមកពីសមាជិកទាំង ១០ នៃសមាគមប្រជាជាតិអាស៊ីអាគ្នេយ៍រួមមានប្រទេសព្រុយណេ កម្ពុជា ឥណ្ឌូនេស៊ី ឡាវ ម៉ាឡេស៊ី មីយ៉ាន់ម៉ា ហ្វីលីពីន សឹង្ហបូរី ថៃ និងវៀតណាម និង ជប៉ុន អូស្រ្តាលី ចិន នូវែលហ្សេឡង់ និងកូរ៉េខាងត្បូង បានចូលរួមនៅក្នុងកិច្ចចរចាសម្រាប់ក្របខ័ណ្ឌភាពជាដៃគូសេដ្ឋកិច្ចគ្រប់ជ្រុងជ្រោយក្នុងតំបន់ (RCEP)មិនដែលខកខាន ។

ក្របខ័ណ្ឌភាពជាដៃគូសេដ្ឋកិច្ចគ្រប់ជ្រុងជ្រោយក្នុងតំបន់ (RCEP) បានបង្ហាញពីគោលបំណងបង្កើតច្បាប់រួមមួយសម្រាប់ធ្វើពាណិជ្ជកម្មតាមប្រព័ន្ធអេឡិចត្រូនិច ពាណិជ្ជកម្ម និងកម្មសិទ្ធិបញ្ញា។ ក្របខណ្ឌនេះនឹងគ្របដណ្តប់លើមួយភាគបី នៃសេដ្ឋកិច្ចពិភពលោក និងពាក់កណ្តាលនៃចំនួនប្រជាជនពិភពលោកប្រសិនបើប្រទេសឥណ្ឌាត្រូវបានបញ្ចូល៕

អចលនវត្ថុ ២ ប្រភេទដែលប្រជាជនកម្ពុជានិយមចំណាយលុយវិនិយោគ ងាយស្រួលសម្រួលចរន្តសាច់ប្រាក់

ដោយ ៖ ហ្សូលី

ភ្នំពេញ ៖ ប្រជាជនកម្ពុជានៅបច្ចុប្បន្ននេះមានចំណេះដឹងកាន់តែទូលាយនៅក្នុងការចំណាយលុយវិនិយោគ ជាពិសេសវិស័យវិស័យអចលនទ្រព្យ ដែលពលរដ្ឋកម្ពុជា ហ៊ានចំណាយលុយវិនិយោគ ជាមួយភាពជឿជាក់ថាអាចទទួលបានផលចំណេញត្រឡប់មកវិញច្រើន។

ប្រធានសមាគមអ្នកវាយតម្លៃ និងភ្នាក់ងារអចលវត្ថុកម្ពុជា លោក ច្រឹក សុខនីម បានមានប្រសាសន៍ប្រាប់គេហទំព័រ Property Area Asia នៅព្រឹកថ្ងៃទី១៥ ខែតុលា ឆ្នាំ២០២០ថា ក្នុងនាមជាអ្នកប្រឡូកក្នុងវិស័យអចលនទ្រព្យ និងមានបទពិសោធន៍អស់រយៈពេលជាច្រើនឆ្នាំ លោកសង្កេតឃើញថា ប្រជាជនកម្ពុជាភាគច្រើននិយមចំណាយលុយវិនិយោគទៅលើវិស័យលំនៅដ្ឋាន និងវិស័យដីធ្លី។

លោកបន្តថា “វាអាស្រ័យទៅលើស្ថានភាពរបស់អ្នកវិនិយោគដែរ ទីមួយប្រសិនបើជាអ្នកមានធនធានច្រើន នោះពួកគាត់ចូលចិត្តវិនិយោគទៅលើធីធ្លី អញ្ចឹងហើយគាត់គិតថាអាចទទួលបានប្រាក់ចំណេញច្រើន។
ទី២ ប្រសិនបើអ្នកនោះប្រើប្រាស់ប្រាក់មកពីប្រភពផ្សេងដូចជា កម្ចីពីធនាគារ ឬស្ថាប័នហិរញ្ញវត្ថុណាមួយ នោះពួកគាត់ច្រើនតែវិនិយោគជាផ្នែកខ្លះទៅលើផ្ទះ និងផ្នែកខ្លះទៀតទៅលើដីធ្លី”។

ប្រធានសមាគមរូបនេះរៀបរាប់ឱ្យដឹងថា មូលហេតុដែលបណ្តាលឱ្យផ្ទះ និងដីធ្លីក្លាយជាមុខព្រួញ និងជាគោលដៅមានតម្រូវការច្រើន ដោយសារតែផ្ទះអាចរកបានប្រាក់ចំណូលពីការជួលប្រចាំខែ ដែលវាធ្វើឱ្យចរន្តលំហូរសាច់ប្រាក់មិនមានបញ្ហា។ រីឯការទិញដី វាមានផលលំបាកដែលពិបាកនឹងដាក់ជួល ប៉ុន្តែអាចទុករង់ចាំពេលវេលាណាមួយលក់យកចំណេញ លើកលែងតែចំនុចមួយគឺដីគ្មានចរន្តលំហូរសាច់ប្រាក់បង្វិលឡើយ។

ទន្ទឹមនេះ លោក ច្រឹក សុខ នីម បានណែនាំដល់អ្នកទិញអចលនទ្រព្យទាំងឡាយដែលមិនមានធនធានគ្រប់គ្រាន់ គួរណាកុំវិនិយោគលើវិស័យដីធ្លី យល់ល្អគប្បីវិនិយោគលើវិស័យលំនៅដ្ឋានវិញ។ ចំណែកឯអ្នកមានជីវភាពមធ្យម ឬមានប្រភពចំណូលគ្រប់គ្រាន់ អាចចំណាយថវិកាខ្លះវិនិយោគលើវិស័យលំនៅដ្ឋាន និងមួយផ្នែកទៀតវិនិយោគលើវិស័យដីធ្លីទើបជាការល្អប្រសើរ៕

បណ្តាញសំខាន់ៗចំនួន៩ខ្សែ ត្រូវបានប្រកាសផ្អាកចរាចរណ៍បណ្តោះអាសន្ន

ដោយ ៖ រ៉ាណេត

កណ្តាល ៖ ក្រសួងសាធារណៈ និងដឹកជញ្ជូន តាមរយៈរដ្ឋបាលខេត្តកណ្តាលបានប្រកាសផ្អាកចរាចរណ៍ជាបណ្តោះអាសន្ននៅតាមបណ្តាញផ្លូវជាតិសំខាន់ៗចំនួន៩ខ្សែ ជាពិសេសប្រភេទរថយន្ដធុនធ្ងន់ដើម្បីបញ្ចៀសគ្រោះថ្នាក់ និងធ្វើឱ្យផ្លូវរងនូវការខូចតាត។

ក្រោមស្ថានភាពគំរាមកំហែងពីគ្រោះជំនន់ទឹកភ្លៀងដែលកំពុងបន្តជន់លិចស្ទើទូទាំងខេត្ត ជាពិសេសនៅតាមតំបន់សំខាន់ៗមួយចំនួន នៅយប់ថ្ងៃទី១៤ ខែតុលា ឆ្នាំ២០២០ មន្ទីរសាធារណការខេត្តកណ្ដាលបានសម្រេចផ្អាកការធ្វើចរាចរណ៍ រថយន្តធុនធំនៅតាមផ្លូវជាតិសំខាន់ៗចំនួន៩ខ្សែ។

នៅក្នុងសេចក្ដីជូនដណឹងរបស់មន្ទីរសាធារណការខេត្តកណ្ដាលបានបញ្ជាក់ថា៖ សេចក្តី ជូន ដំណឹង ស្តីពី ការ បិទ ចរាចរណ៍ រថយន្ត ដឹក ទំនិញ ធុន ធំ គ្រប់ ប្រភេទ នៅ លេី កំណាត់ ផ្លូវ ជាតិ លេខ ២ ,៣,៤,៥ ផ្លូវ ជាតិ លេខ ២០,២០អា,២១,២១អា និង ផ្លូវ ជាតិ លេខ ២១បេ ស្ថិតក្នុង ភូមិ សាស្ត្រ ខេត្ត កណ្តាល ជា បណ្ដោះ អាសន្ន។
ការអនុវត្តនៃការបិទចរាចរណ៍នៅតាមបណ្តាញផ្លូវជាតិសំខាន់ៗនៅជុំវិញ ដែលមានព្រំប្រទល់ជាប់នឹងរាជធានីភ្នំពេញ ខេត្តតាកែវ កំពង់ស្ពឺ និងខេត្តកំពត ក៏ដូចជានៅក្នុងខេត្តកណ្តាល មានប្រសិទ្ធភាពចាប់ពីពេលចេញសេចក្ដីប្រកាសនេះតទៅ រហូតដល់ពេលមានការជូនដំណឹងសាជាថ្មីស្ដីពីការបើកឱ្យចរាចរណ៍ឡោះងវិញ ។

សេចក្ដីលម្អិតមានបង្ហាញនៅក្នុងសេចក្ដីជូនដំណឹងដូចខាងក្រោម៖

IMF ព្យាករណ៍ថា សេដ្ឋកិច្ចកម្ពុជា នឹងមានកំណើនដល់ទៅ ៦,៨ភាគរយនៅឆ្នាំក្រោយ

ដោយ ៖ ប៊ី
ភ្នំពេញ ៖ មូលនិធិរូបិយវត្ថុអន្តរជាតិ (IMF) បានធ្វើការព្យាករណ៍ថា កម្ពុជានឹងមានកំណើនសេដ្ឋកិច្ច ៦,៨ ភាគរយ ដែលនឹងក្លាយជាប្រទេសមានសេដ្ឋកិច្ចរីកចម្រើនលំដាប់ទី៣ នៅតំបន់អាស៊ាននាឆ្នាំក្រោយ និងជាប្រទេសដែលមានកំណើនសេដ្ឋកិច្ចខ្ពស់ជាងគេបំផុតនៅក្នុងតំបន់នៅឆ្នាំ២០២៥ ។

យោងតាមការសិក្សារបស់ IMF ដែលត្រូវបានចេញផ្សាយក្នុងអំឡុងកិច្ចប្រជុំប្រចាំឆ្នាំរបស់ខ្លួន កាលពីថ្ងៃអង្គារ បានឱ្យដឹងថា សេដ្ឋកិច្ចរបស់ប្រទេសកម្ពុជាត្រូវបានព្យាករណ៍ថានឹងធ្លាក់ចុះ ២,៨ ភាគរយនៅឆ្នាំនេះ ខណៈការព្យាករណ៍ធ្លាក់ចុះចំនួន ១,៥ ភាគរយសម្រាប់ប្រទេសឥណ្ឌូនេស៊ី។

អំឡុងពេលជំងឺរាតត្បាកូវីដ១៩ ការធ្លាក់ចុះ ៨,៣ ភាគរយត្រូវបានព្យាករណ៍សម្រាប់ហ្វីលីពីន ៧,១ ភាគរយសម្រាប់ប្រទេសថៃនិង ៦,០ ភាគរយសម្រាប់ទាំងម៉ាឡេស៊ី និងសិង្ហបុរី។

ប្រទេសមីយ៉ាន់ម៉ាត្រូវបានព្យាករណ៍ថានឹងមានកំណើនសេដ្ឋកិច្ចក្នុងអាស៊ានលឿនបំផុតនៅឆ្នាំនេះ ដោយផលិតផលក្នុងស្រុកសរុបកើនឡើង ២,០ ភាគរយ បន្ទាប់មកគឺប្រទេសវៀតណាមមានកំណើន ១,៦ ភាគរយ។

ប្រទេសឡាវត្រូវបានព្យាករណ៍ថានឹងកើនឡើងត្រឹមតែ ០,២ ភាគរយ និងព្រុយណេត្រឹមតែ ០,១ ភាគរយប៉ុណ្ណោះ។
ដោយឡែក នៅឆ្នាំ២០២១ ប្រទេសម៉ាឡេស៊ីត្រូវបានគេមើលឃើញថាមានការងើបឡើងវិញយ៉ាងខ្លាំង (៧,៨ ភាគរយ) បន្ទាប់មកទៀតគឺប្រទេសហ្វីលីពីន (៧,៤ ភាគរយ) ប្រទេសកម្ពុជា (៦,៨ ភាគរយ) និងប្រទេសវៀតណាម (៦,៧ ភាគរយ) ។

ក្នុងចំណោមសេដ្ឋកិច្ចអាស៊ានផ្សេងទៀតកំណើនសេដ្ឋកិច្ចយឺតត្រូវបានព្យាករណ៍សម្រាប់ឥណ្ឌូណេស៊ី (៦,១ ភាគរយ) មីយ៉ាន់ម៉ា ៥,៧ ភាគរយសិង្ហបុរី ៥,០ ភាគរយឡាវ ៤,៨ ភាគរយថៃ ៤,០ ភាគរយ និងព្រុយណេ (៣,២ ភាគរយ) ។

ការព្យាករណ៍រយៈពេលមធ្យមរបស់ IMF សម្រាប់ឆ្នាំ ២០២៥ បង្ហាញថា ប្រទេសកម្ពុជាមានកំណើនសេដ្ឋកិច្ចខ្ពស់ជាងការព្យាករណ៍កំណើន ៦,៩ ភាគរយ ដែលធ្វើឱ្យប្រទេសនេះក្លាយជាប្រទេសមានសេដ្ឋកិច្ចរីកចម្រើនលឿនបំផុតនៅក្នុងតំបន់។

កំណើនសេដ្ឋកិច្ចទាបត្រូវបានព្យាករណ៍សម្រាប់ប្រទេសវៀតណាម (៦,៦ ភាគរយ) មីយ៉ាន់ម៉ា និងហ្វីលីពីន (៦,៥ ភាគរយ) ឡាវ (៦,១ ភាគរយ) ឥណ្ឌូណេស៊ី (៥,១ ភាគរយ) ម៉ាឡេស៊ី (៥ ភាគរយ) ថៃ (៣,៧ ភាគរយ) សិង្ហបុរី (២,៥ ភាគរយ) និងព្រុយណេ (១,៨ ភាគរយ)៕