ដោយ ៖ រ៉ាណេត

ភ្នំពេញ ៖ ស្ពានដែកបាឡេឆ្លងកាត់ទន្លេសាប ស្ថិតនៅក្នុងខណ្ឌឫស្សីកែវ រាជធានីភ្នំពេញ ដែលកំពុងចរាចរណ៍យ៉ាងមមាញឹកនៅពេលបច្ចុប្បន្ននេះ នឹងត្រូវរុះរើចេញក្រោយពេលគម្រោងសាងសង់ស្ពានបេតុងអារមេយោងខ្សែកាបថ្មី ត្រូវបានបញ្ចាប់ការសាងសង់ទាំងស្រុង។

តាមការអះអាងរបស់មន្ទីរសាធារណៈការ និងដឹកជញ្ជូនរាជធានីភ្នំពេញនៅព្រឹកថ្ងៃទី២៧ ខែមិថុនា ឆ្នាំ២០២០នេះ បានបញ្ជាក់ថា ក្រោយគម្រោងសាងសង់ស្ពានបេតុងអារមេដែលយោងដោយខ្សែកាបឆ្លងកាត់ទន្លេសាប តភ្ជាប់រវាងខណ្ឌឫស្សីកែ និងតំបន់អភិវឌ្ឍន៍របស់ក្រុមហ៊ុន OCIC ខណ្ឌជ្រោយចង្វារ ត្រូវបានបញ្ចប់ទាំងស្រុង ស្ពានដែកបាឡេដែលស្ថិតនៅស្របគ្នា នឹងត្រូវរុះរើចេញ។

ស្ពានដែកបាឡេ ដែលកំពុងធ្វើចរាចរណ៍យ៉ាងមមាញឹក និងជួយសម្រួលដល់ការធ្វើដំណើរចេញចូលរាជធានីភ្នមពេញនេះ ស្ថិតនៅចំណុចមុខឃ្លាំងសាំងសូគីមិច គីឡូម៉ែត្រលេខ៦ ខណ្ឌឫស្សីកែវ ត្រូវបានដាក់ឱ្យប្រើប្រាស់កាលពីថ្ងៃទី៨ ខែឧសភា ឆ្នាំ២០១៨ ខណៈពេលដែលស្ពានជ្រោយចង្វារទី១ ដែលជាជំនួយរបស់រដ្ឋាភិបាលជប៉ុនកំពុងជួសជុល និងកែលម្អឡើងវិញ។

ដោយឡែកសម្រាប់ស្ពានបេតុងដែលស្ថាបនានៅអមជាមួយស្ពានបាឡេនេះ ដែលយោងដោយខ្សែកាបក្រោមការអភិវឌ្ឍដោយក្រុមហ៊ុន OCIC មានប្រវែង៩២២ម៉ែត្រ និងទទឹង២០,៥ម៉ែត្រ។ ចិញ្ចើមស្ពានសម្រាប់ថ្មើរជើង មានទទឹង១,២៥ម៉ែត្រសងខាង កម្ពស់សរសរស្ពានសម្រាប់ព្យួរខ្សែកាប ធៀបនឹងកម្រាលស្ពាន៣៤ម៉ែត្រ។ សរសរសម្រាប់ព្យួរខ្សែកាបមានចំនួន៤គន្លង ខ្សែយានយន្តទទឹង៣.៧៥ម៉ែត្រ,គន្លងធ្វើចរាចរ២ខ្សែទៅ២ខ្សែមក កម្ពស់នាវាចរក្រោមស្ពានអតិបរមានៅរដូវវស្សា១០.៥ម៉ែត្រ កម្ពស់នាវាចរក្រោមស្ពានអប្បរមានៅរដូវប្រាំង២០,៥ម៉ែត្របំពាក់បង្គោលភ្លើងបំភ្លឺ និងដាក់ស្លាកសញ្ញាចរាចរណ៍ផងដែរ៕

ដោយ ៖ ប៊ី

ភ្នំពេញ ៖ ក្រុមប្រឹក្សាភិបាលនៃធនាគារពិភពលោក ថ្ងៃនេះបានអនុម័តឥណទាន ៩៣លានដុល្លារអាមេរិក ពីសមាគមអភិវឌ្ឍន៍អន្តរជាតិ (IDA) សម្រាប់គម្រោងបែងចែកដីដើម្បីសង្គមកិច្ច និងការអភិវឌ្ឍសេដ្ឋកិច្ចជំហាន៣ (LASED III) នៅប្រទេសកម្ពុជា។ នេះបើយោងតាមការសេចក្តីប្រកាសព័ត៌មានរបស់ធនាគារពិភពលោក (World Bank) នៅថ្ងៃទី២៧ ខែមិថុនា ឆ្នាំ២០២០។

គម្រោងនេះនឹងជួយបង្កើនសុវត្ថិភាពសិទ្ធិកាន់កាប់ដីធ្លី ការទទួលបានហេដ្ឋារចនាសម្ព័ន្ធ សេវាកសិកម្ម និងសង្គមសម្រាប់ប្រជាជនក្រីក្រគ្មានដី និងសហគមន៍ជនជាតិដើមភាគតិចនៅកម្ពុជា។

ការជួយឱ្យកសិករខ្នាតតូច និងសហគមន៍ជនបទមានលទ្ធភាពប្រើប្រាស់ដីធ្លី និងធនធានធម្មជាតិតាមរបៀបមួយមានចីរភាព និងឋិតថេរយូរអង្វែង គឺជាផ្នែកស្នូលមួយនៃយុទ្ធសាស្ត្រកាត់បន្ថយភាពក្រីក្ររបស់រាជរដ្ឋាភិបាលកម្ពុជា។ ក្នុងនេះ រដ្ឋាភិបាលបានបង្កើតឡើងនូវក្របខណ្ឌច្បាប់សម្រាប់ការធ្វើសម្បទានដីសង្គមកិច្ច ដែលពង្រីកសិទ្ធិកាន់កាប់ដីធ្លីសម្រាប់ជនក្រីក្រគ្មានដីនៅតាមទីជនបទ។ ទន្ទឹមគ្នានេះ រដ្ឋាភិបាលក៏លើកកម្ពស់ផងដែរនូវការផ្តល់សិទ្ធិកាន់កាប់ដីធ្លីសហគមន៍ជនជាតិដើមភាគតិច ដើម្បីពង្រឹងពង្រីកសិទ្ធិរបស់ពួកគេនៅក្នុងការកាន់កាប់ដីធ្លី។

ចាប់តាំងពីឆ្នាំ២០០៨ មក គម្រោង LASED ជំហាន១ និងជំហាន២ ដែលទទួលបានការឧបត្ថម្ភតាមរយៈធនាគារពិភពលោក បានគាំទ្រកម្មវិធីសម្បទានដីសង្គមកិច្ច ក្នុងគោលដៅជំរុញឱ្យមានការបែងចែកដីដល់ជនក្រីក្រ តាមដំណើរការមួយមានចីរភាព និងតម្លាភាពឈានទៅសម្រេចបានជោគជ័យ។ គម្រោងទាំងនេះបានជួយដល់ការអភិវឌ្ឍផ្លូវជនបទ ការកសាងប្រព័ន្ធធារាសាស្ត្រខ្នាតតូច ការសាងសង់សាលាបឋមសិក្សា មណ្ឌលសុខភាព ផ្តល់ការបណ្តុះបណ្តាលបច្ចេកទេសកែលម្អការដាំដុះ និងជួយគាំទ្រដល់ការបង្កើតឱ្យមានសេវាកាន់តែច្រើនទៀតសម្រាប់កសិករ។ តាមរយៈគម្រោងទាំងពីរដំណាក់កាលមកនេះ កម្ពុជាបានបែងចែកដីធ្លីចំនួន ១៧០០០ហិកតា សម្រាប់សង់លំនៅឋាន និងធ្វើការដាំដុះដល់គ្រួសារគ្មានដី និងគ្រួសារខ្វះដី ចំនួនជាង ៥០០០គ្រួសារ ក្នុងនោះមានជាង ៣៣៦០គ្រួសារ ទទួលបានបណ្ណកម្មសិទ្ធិដីធ្លីរួចហើយ។

លោកស្រី អ៊ីនហ្គូណា ដូប្រាចា នាយកគ្រប់គ្រងធនាគារពិភពលោកប្រចាំនៅកម្ពុជា បានមានប្រសាសន៍ថា “លទ្ធភាពទទួលបានដីធ្លី និងការផ្តល់សេវា និងការបណ្តុះបណ្តាលបច្ចេកទេសកសិកម្មដើម្បីបង្កើនផលិតភាពកសិកម្ម ក៏ដូចជាការទទួលបានសេវាសាធារណៈល្អប្រសើរ គឺពិតជាមានសារៈសំខាន់ខ្លាំងណាស់សម្រាប់ប្រជាជនក្រីក្រដែលរស់នៅតាមទីជនបទ”។

លោកស្រីបានបន្តថា “គម្រោង LASED ជំហាន៣ នេះ នឹងបន្តជួយរដ្ឋាភិបាលក្នុងការផ្តល់ដីធ្លី និងសិទ្ធិកាន់កាប់ដីធ្លីដល់គ្រួសារគ្មានដី និងគ្រួសារខ្វះដី និងធានាឱ្យមានសន្តិសុខផ្នែកសិទ្ធិកាន់កាប់ដីធ្លីសម្រាប់សហគមន៍ជនជាតិដើមភាគតិច នៅតាមតំបន់គោលដៅរបស់គម្រោងនេះ”។

គម្រោង LASED ជំហាន៣ នឹងបន្តពង្រីកសមិទ្ធផលថែមទៀតតពីគម្រោងជំហាន១ និងជំហាន២ នៅក្នុងការអនុវត្តកម្មវិធីសម្បទានដីសង្គមកិច្ច។ ការផ្តល់សិទ្ធិកាន់កាប់ដីធ្លីសម្រាប់សហគមន៍ជនជាតិដើមភាគតិច នឹងជួយគាំទ្រផងដែរដល់ដំណើរការផ្តល់សិទ្ធិកាន់កាប់ដីធ្លីរបស់សហគមន៍ជនជាតិដើមភាគតិចដែលកំពុងតែប្រព្រឹត្តទៅឱ្យបានឈានទៅចប់សព្វគ្រប់។

ជាមួយគ្នានេះ គម្រោងនឹងផ្តល់ជំនួយដល់បណ្តាសហគមន៍ដែលបានបញ្ចប់ដំណើរការផ្តល់សិទ្ធិកាន់កាប់ដីធ្លីរបស់សហគមន៍ជនជាតិដើមភាគតិចរួចរាល់ហើយផងដែរ។
គម្រោង LASED ជំហាន៣ នឹងគ្របដណ្តប់ទៅលើទីតាំង និងសហគមន៍ចំនួន៧១ នៅក្នុងខេត្តទាំងអស់នៃប្រទេសកម្ពុជា លើកលែងតែរាជធានីភ្នំពេញ។ គម្រោងនេះនឹងជួយដល់ការកសាងផ្លូវលំជនបទ ប្រព័ន្ធធារាសាស្ត្រខ្នាតតូច សម្បទាផ្នែកផ្គត់ផ្គង់សេវទឹកស្អាត និងអនាម័យ អគារសាលារៀន ផ្ទះគ្រូបង្រៀន មណ្ឌលសុខភាព និងមណ្ឌលសហគមន៍។

អ្នកទទួលផលថ្មីពីកម្មវិធីដីសម្បទានសង្គមកិច្ច នឹងទទួលបានជំនួយសម្រាប់ការដាំដុះឆ្នាំដំបូងរបស់ខ្លួន ក្នុងនោះមានគ្រាប់ពូជផងដែរ។
គម្រោងនេះនឹងផ្តល់ជំនួយបច្ចេកទេសផងដែរ ដើម្បីអនុវត្តបច្ចេកទេសកសិកម្មវៃឆ្លាតផ្នែកអាកាសធាតុ បង្កើតសមាគមន៍កសិករសម្រាប់ជាប្រយោជន៍ដល់សកម្មភាពផលិតកម្ម និងទីផ្សារ ដើម្បីគ្រប់គ្រងមូលនិធិសហគមន៍សម្រាប់ពង្រីកសកម្មភាពសេដ្ឋកិច្ចនៅក្នុងមូលដ្ឋាន៕

ដោយ ៖ រ៉ាណេត

ភ្នំពេញ ៖ រហូតមកដល់ពេលបច្ចុប្បន្ននេះ មានក្រុមហ៊ុន និងគ្រឹះស្ថានវិស័យឯកជនជាច្រើនបានទទួលរងនូវផលប៉ះពាល់ពីវិបត្តិសេដ្ឋកិច្ចពិភពលោក ដែលបណ្តាលមកពីការរាតត្បាតនៃជំងឺឆ្លង បើទោះបីជារាជរដ្ឋាភិបាលកម្ពុជាបាន និងកំពុងព្យាយាមជួយដោះស្រាយទាំងការផ្តល់នូវវិធីសាស្ត្រ និងការបញ្ចេញកញ្ចប់ថវិកាជាតិដើម្បីជួយទ្រទ្រង់ផងដែរ។

អនុប្រធានសភាពាណិជ្ជកម្មកម្ពុជា លោកឧកញ៉ា លឹម ហេង បានមានប្រសាសន៍តាមទូរស័ព្ទនៅរសៀលថ្ងៃទី២៦ ខែមិថុនា ឆ្នាំ២០២០ ថា បច្ចុប្បន្ននេះ ដើម្បីទប់ស្កាត់ការដួលរលំ និងខាតបង់ធ្ងន់ធ្ងរ ក្រុមហ៊ុន និងគ្រឹះស្ថានវិស័យឯកជនស្ទើរតែ១០០ភាគរយបានជ្រើសយកវិធីសាស្ត្រកាត់បន្ថយចំនួនបុគ្គលិក ឬកាត់ប្រាក់បៀរវត្សរ៍ចាប់ពី ៣០-៥០ ភាគរយ ដោយឡែកសម្រាប់វិស័យឧស្សាហកម្ម មានរោងចក្រមួយចំនួនបានដាក់ពាក្យស្នើសុំព្យួរផ្អាកដំណើរការផលិតកម្ម។

លោកឧកញ៉ាបានមានប្រសាសន៍បន្តទៀតថា “ទាំងនេះគ្រាន់តែជាវិធីសាស្ត្រមួយក្នុងចំណោមវិធីសាស្ត្រជាច្រើនទៀត រួមជាមួយនឹងការចូលរួមចំណែកជួយជ្រោមជ្រែងពីសំណាក់រាជរដ្ឋាភិបាលផងដែរ។ កាលពីពេលកន្លងទៅនេះ សភាពាណិជ្ជកម្មកម្ពុជា បានទទួលសំណើរពីសមាគមអាជីវកម្ម និងពាណិជ្ជករ ក៏ដូចជាសហគ្រាសជាច្រើនក្នុងការស្វែងរកដំណោះស្រាយ និងទទួលបានជំនួយពីសំណាក់រាជរដ្ឋាភិបាល។ ជាក់ស្ដែងដូចជាវិស័យមីក្រូហិរញ្ញវត្ថុ និងធនាគារ ទទួលបានការអនុគ្រោះលើការបង់ពន្ធកាត់ទុកជាដើម ដែលទាំងនេះត្រូវបានធ្វើឡើងតាមរយៈសភាពាណិជ្ជកម្មកម្ពុជា ដែលស្នើបន្តទៅកាន់អគ្គនាយកដ្ឋានពន្ធដារនៃក្រសួងសេដ្ឋកិច្ច និងហិរញ្ញវត្ថុ”។

អនុប្រធានសភាពាណិជ្ជកម្មកម្ពុជា លោកឧកញ៉ា លឹម ហេង បានមានប្រសាសន៍បន្តទៀតថា “សព្វថ្ងៃនេះ សភាពាណិជ្ជកម្មកម្ពុជា មានសហក្រុមពិភាក្សាការងារ ចំនួន១៣ក្រុម ដូច្នេះសម្រាប់ក្រុមហ៊ុន ក៏ដូចជាសហគ្រាសពាណិជ្ជកម្មក្នុងវិស័យផ្សេងៗ ដែលជួបផលលំបាក និងទទួលរងផលប៉ះពាល់ធ្ងន់ធ្ងរ ត្រូវដាក់សំណើមកកាន់សភាពាណិជ្ជកម្មកម្ពុជា ដើម្បីសហក្រុមការងារទាំង១៣លើកយកមកពិភាក្សានៅក្នុងវេទិការរាជរដ្ឋាភិបាល និងវិស័យឯកជន រកដំណោះស្រាយ ហើយក្នុងករណីដែលរដ្ឋមន្ត្រីមិនអាចមានលទ្ធភាពក្នុងការដោះស្រាយ យើងនឹងស្នើសុំរហូតដល់សម្ដេចនាយករដ្ឋមន្ត្រីធ្វើការជួយដោះស្រាយ និងអារកាត់”។

ជាមួយនឹងការលើកឡើងខាងលើនេះ លោកឧកញ៉ា លឹម ហេង បានជំរុញឱ្យបណ្តាក្រុមហ៊ុន និងគ្រឹះស្ថានអាជីវកម្មក្នុងវិស័យនានាដែលជួបផលលំបាក គួរដាក់សំណើរមកកាន់សភាពាណិជ្ជកម្មកម្ពុជា ដើម្បីសភាពាណិជ្ជកម្មកម្ពុជាជួយអន្តរាគមន៍ និងស្នើសុំទៅរាជរដ្ឋាភិបាលបន្ត ព្រោះការដោះស្រាយផលប៉ះពាល់ទាំងអស់នេះមានទំហំធំធេងពាក់ព័ន្ធដល់ថ្នាក់ជាតិ៕