បឹងកេងកងនៅតែបន្តឈានមុខគេជាតំបន់ដែលមានតម្លៃថ្លៃជាងគេក្នុងទីក្រុងភ្នំពេញ

ដោយ ហ្សូលី

ភ្នំពេញៈ បឹងកេងកង ដែលជាតំបន់ពោរពេញដោយគម្រោងអភិវឌ្ឍជាច្រើន នៅតែបន្តជាប់ឈ្មោះជាតំបន់ ដែលមានតម្លៃអចលនទ្រព្យខ្ពស់ជាងគេ ប្រចាំទីក្រុងភ្នំពេញដដែល បើទោះបីជាកម្ពុជាទទួលរងនូវវិបត្តិយ៉ាងណាក្តី។

នាយិកាក្រុមហ៊ុនអចលនទ្រព្យ Amatak Property Service លោកស្រី តាំង ហ៊ួរ បានថ្លែងប្រាប់គេហទំព័រ PropertyArea.Asia ថា បើប្រៀបធៀបទីតាំងទាំងអស់នៅក្នុងទីក្រុងភ្នំពេញ បឹងកេងកងមានតម្លៃថ្លៃជាងគេតែម្តង។

លោកស្រីបន្តថា “តំបន់នេះមានតម្លៃថ្លៃស្រាប់ទៅហើយ ប៉ុន្តែតម្លៃនៅតែបន្តកើនឡើងជារៀងរាល់ថ្ងៃ បើក្រឡេកទៅមើលតម្លៃដីនៅកែងជិតៗផ្លូវធំ តម្លៃជិត១០,០០០ ដុល្លារទៅហើយក្នុងមួយម៉ែត្រការ៉េ”។ លោកស្រីបន្ថែមថា “ប៉ុន្តែបើផ្លូវកាត់ៗ តម្លៃមិដល់ប៉ុណ្ណឹងនោះទេ ហើយវាស៊ីសងទៅតាមទំហំដីតូចធំផងដែរ”។

បឹងកេងកង១ និងតំបន់ស្ថិតក្នុងសង្កាត់បឹងកេងកង២ និងទី៣ បានក្លាយជាបណ្តុំសំណង់អគារខ្ពស់ ដែលបម្រើលើវិស័យពាណិជ្ជកម្ម ខុនដូ និងអាផាតមិនដែលជាប្រភេទតម្លៃកម្រិតខ្ពស់ បច្ចុប្បន្ននេះក៏នៅតែបន្តប្រជាប្រិយភាព និងទាក់ទាញគម្រោងអភិវឌ្ឍន៍ធំបន្ថែមទៀត។

បើតាមការចុះផ្សាយរបស់គេហទំព័រ Invest Asian បានឱ្យដឹងថា បឹងកេងកងគឺជាសង្កាត់ មានប្រជាជនរស់នៅកាន់តែច្រើនឡើង ដែលស្ថិតនៅក្នុងខណ្ឌចំការមន រាជធានីភ្នំពេញ។ ជាមួយនឹងកន្លែងស្នាក់នៅភោជនីយដ្ឋាន និងសណ្ឋាគារកាន់តែច្រើន វាក្លាយជាតំបន់ដែលគួរអោយចង់រស់នៅបំផុតនៅក្នុងទីក្រុង។

គេហទំព័រដដែលបន្តថា បឹងកេងកងត្រូវបានគេស្គាល់ផងដែរថា តំបន់នេះជាសហគមន៍សម្រាប់ជនបរទេស និងជាកន្លែងដែលមានស្ថានទូត និងធុរកិច្ចអន្តរជាតិជាច្រើន ក្នុងនោះវត្តមាននៃសាលាអន្តរជាតិ បានទាក់ទាញក្រុមគ្រួសារជនបរទេសផងដែរ ដោ​យសារតំបន់បឹងកេងកង មានប្រជាប្រិយភាពខ្លាំង ក្នុងចំណោមជនបរទេសទីផ្សារខុនដូរបស់វាមានតម្លៃថ្លៃ។

ខុនដូមួយយូនីតជាធម្មតា មានតម្លៃជាង២០០,០០០ដុល្លារ ហើយអ្នកទិញទំនង​ជានឹងទទួលបានប្រាក់ចំណេញមកវិញនូវការវិនិយោគ។ ទោះយ៉ាងណាក៏ដោយ ប្រសិ​នបើអ្នកទិញកំពុងស្វែងរកកន្លែងរស់នៅ បឹងកេងកងគឺនៅតែជាជម្រើសដ៏គួរឱ្យទាក់ទាញ៕

កម្ពុជាស្នើសភាពាណិជ្ជកម្មអឺរ៉ុបជំរុញអ្នកវិនិយោគមកកម្ពុជាបន្ថែម ដើម្បីស្ដារសេដ្ឋកិច្ចឡើងវិញ

ដោយ ៖ រ៉ាណេត

ភ្នំពេញ ៖ រដ្ឋាភិបាលកម្ពុជា តាមរយៈរដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ បានស្នើដល់សភាពាណិជ្ជកម្មអឺរ៉ុបប្រចាំនៅកម្ពុជា (EuroCham) ឱ្យជួយទាក់ទាញ និងកៀរគរអ្នកវិនិយោគដែលជាសមាជិករបស់ខ្លួនមកបណ្តាក់ទុននៅកម្ពុជាបន្ថែមទៀត ដើម្បីចូលរួមជួយស្ដារសេដ្ឋកិច្ចឡើងវិញ ក្រោយវិបត្តិជំងឺ Covid-19 ត្រូវបានបញ្ចប់។

រដ្ឋមន្ត្រីក្រសួងការងារ និងបណ្ដុះបណ្ដាលវិជ្ជាជីវៈ លោក អ៉ិត សំហេង នាព្រឹកថ្ងៃទី១៤ ខែតុលា ឆ្នាំ២០២០នេះ នៅក្នុងឱកាសជំនួបជាមួយលោក Tassilo BRINZER ប្រធានសភាពាណិជ្ជកម្មអឺរ៉ុបប្រចាំកម្ពុជា ដែលទើបទទួលតំណែងថ្មី នៅទីស្ដីក្រសួងការងារ បានធ្វើការបង្ហាញពីវឌ្ឍនភាពការងារដែលកម្ពុជាសម្រេចបាន ក្រោមកិច្ចសហប្រតិបត្តិការជាមួយសភាពាណិជ្ជកម្មអឺរ៉ុបប្រចាំកម្ពុជា នាពេលកន្លងមក ទាំងលើវិស័យការងារ បណ្ដុះបណ្ដាលវិជ្ជាជីវៈ ពិសេសលើវិស័យវិនិយោគ។

លោករដ្ឋមន្ត្រីបានបញ្ជាក់ថា “ដោយសារវិបត្តិជំងឺ Covid-19 សេដ្ឋកិច្ចកម្ពុជាបានរងផលប៉ះពាល់យ៉ាងខ្លាំង ពិសេសលើវិស័យការងារ ទេសចរណ៍ ការនាំចេញផលិតផល និងវិស័យនានាមួយចំនួនទៀត ខណៈរាជរដ្ឋាភិបាលកម្ពុជាក៏បានខិតខំដោះស្រាយបញ្ហាទាំងនេះផងដែរ ដោយបានធ្វើពិពិធកម្មសេដ្ឋកិច្ចឡើងវិញ។ ជាមួួយគ្នានេះ លោកក៏បានស្នើដល់សភាពាណិជ្ជកម្មអឺរ៉ុបប្រចាំកម្ពុជា ធ្វើយ៉ាងណាផ្ដល់កិច្ចសហប្រតិបត្តិការជាមួយក្រសួងការងារ និងបណ្ដុះបណ្ដាលវិជ្ជាជីវៈ ដើម្បីចូលរួមក្នុងការអនុវត្តគោលនយោបាយជាតិនានារបស់កម្ពុជា”។

ចំពោះសំណើនេះ ត្រូវបានលោក Tassilo BRINZER ឯកភាពយល់ព្រម និងបានបញ្ជាក់ថា លោកនឹងប្រកាសកៀរគរអ្នកវិនិយោគដែលជាសមាជិករបស់សភាពាណិជ្ជកម្មអឺរ៉ុបទាំងឡាយ ពិសេសនៅប្រទេសជិតខាង មានប្រទេសថៃ វៀតណាមជាដើម ឱ្យចាប់អារម្មណ៍ងាកមកវិនិយោគនៅកម្ពុជាបន្ថែមទៀត ខណៈបរិយាកាសវិនិយោគនៅកម្ពុជាគឺពិតជាមានភាពល្អប្រសើរ។

ប្រធានសភាពាណិជ្ជកម្មអឺរ៉ុបបានធានាថានឹងខិតខំធ្វើឱ្យផលិតផលដែលផលិតបាននៅកម្ពុជា មានលក្ខខណ្ឌការងារ និងបរិយាកាសនៅកន្លែងធ្វើការល្អប្រសើរជាងមុន ដើម្បីធានាថាផលិតផលដែលនាំចេញទៅកាន់សហភាពអឺរ៉ុប សហរដ្ឋអាមេរិក និងបណ្ដាប្រទេសមួយចំនួនទៀតកាន់តែមានស្ដង់ដាខ្ពស់។

រីឯផែនការយុទ្ធសាស្រ្តរយៈពេល២ឆ្នាំខាងមុខទៀតរបស់សភាពាណិជ្ជកម្មអឺរ៉ុប គឺធ្វើយ៉ាងណាខិតខំជំរុញ និងទាក់ទាញវិនិយោគិនរបស់អឺរ៉ុបមកកាន់កម្ពុជាកាន់តែច្រើនបន្ថែមទៀត ព្រោះកម្ពុជាជាគោលដៅវិនិយោគប្រកបដោយសក្តានុពលមួយនៅក្នុងតំបន់។

ភាគីទាំងពីរបានឯកភាពគ្នាលើការពង្រឹងកិច្ចសហប្រតិបត្តិការឱ្យបានជិតស្និទ្ធបន្ថែមទៀត ដើម្បីសម្រេចបាននូវការរីកចម្រើនសេដ្ឋកិច្ចរបស់កម្ពុជាឱ្យកាន់តែល្អប្រសើរ ទោះបីមានបញ្ហា EBA ឬបញ្ហាជំងឺ Covid-19 ក៏ភាគីទាំងពីរនៅតែប្រកៀកស្មាគ្នាជម្នះឧបសគ្គឱ្យបាន។

គួរជម្រាបជូនផងដែរថា សភាពាណិជ្ជកម្មអឺរ៉ុបនៅកម្ពុជា ត្រូវបានបង្កើតឡើងក្នុងឆ្នាំ២០១១ ដោយមានសមាគមពាណិជ្ជកម្មបារាំង អាល្លឺម៉ង់ និងចក្រភពអង់គ្លេស។ មកទល់បច្ចុប្បន្នមានសមាជិកជាង ៣៥០ និង ៦ សាខាទូទាំងប្រទេសកម្ពុជា ដែលក្នុងនោះមាន ១១ ប្រទេសពីសហភាពអឺរ៉ុប។ សកម្មភាពចម្បងរបស់សភាពាណិជ្ជកម្ម គឺផ្សព្វផ្សាយ គាំទ្រ និងតំណាងសមាជិករបស់ខ្លួន ក្នុងការសន្ទនាជាមួយរាជរដ្ឋាភិបាលកម្ពុជា ដើម្បីសម្រួលបរិយាកាសពាណិជ្ជកម្ម និងឱកាសវិនិយោគនៅកម្ពុជា៕

លោក ស៊ុន ចាន់ថុល៖ ក្រសួងសាធារណការនឹងចុះជួលជុលផ្លូវឬស្ពានភ្លាម បើមានករណីដាច់ខូចខាត

ដោយ ហ្សូលី

ភ្នំពេញ៖ លោក ស៊ុន ចាន់ថុល រដ្ឋមន្ត្រីក្រសួងសាធារណការនិងដឹកជញ្ជូន បានប្រាប់ដល់អង្គភាពក្រោមឱវាទថា ក្នុងករណីមានផ្លូវ-ស្ពាន ដាច់ឬខូចខាត មិនអាចធ្វើចរាចរណ៍បាន ដោយសារគ្រោះទឹកជំនន់ គឺត្រូវចាត់កម្លាំងជាបន្ទាន់ ចុះជួសជុល និងតភ្ជាប់ផ្លូវស្ពាននោះ ដើម្បីធានាឱ្យមាននិរន្តរភាពចរាចរណ៍។

លោកបានមានប្រសាសន៍ថា រាល់មានការដាច់ផ្លូវ-ស្ពានដោយទឹកជំនន់ ត្រូវលើកសំណើរសុំគោលការណ៍ចំណាយមកក្រសួងឱ្យបានឆាប់រហ័សបំផុត។ ជាមួយគ្នានេះ ត្រូវចាត់កម្លាំងតម្លើងស្លាកសញ្ញាចរាចរណ៍ និងស្លាកសញ្ញាសុវត្ថិភាពនៅតាមទីតាំងដែលកំពុង និងងាយរងគ្រោះដោយទឹកជំនន់ ដើម្បីចៀសវាងនូវគ្រោះថ្នាក់ជាយថាហេតុដល់អ្នកដំណើរ។

តាមរយៈសេចក្តីណែនាំ ចុះកាលបរិច្ឆេទ ថ្ងៃទី ១៣ ខែតុលា ឆ្នាំ២០២០ រដ្ឋមន្ត្រីក្រសួងសាធារណការនិងដឹកជញ្ជូនរូបនេះ បានបញ្ជាក់ថា អង្គភាពពាក់ព័ន្ធត្រូវគោរពតាមដូចជា៖

១- ចូលរួមផ្សព្វផ្សាយអំពីសភាពការណ៍គ្រោះអាសន្ននានា និងប្រមូលព័ត៌មានឱ្យបានគ្រប់ជ្រុងជ្រោយពីខ្សែបណ្ដោយគណៈកម្មាធិការជាតិគ្រប់គ្រងគ្រោះមហន្តរាយ និងត្រូវចូលរួមសម្របសម្រួលជាមួយស្ថាប័នពាក់ព័ន្ធ និងអាជ្ញាធរគ្រប់លំដាប់ថ្នាក់ ក្នុងការធ្វើប្រតិបត្តិការឆ្លើយតបទៅនឹងគ្រោះអាសន្ន និងការស្តារឡើងវិញក្រោយគ្រោះទឹកជំនន់។

ទន្ទឹមគ្នានេះ ត្រូវសហការជាមួយអាជ្ញាធរមូលដ្ឋានគ្រប់លំដាប់ថ្នាក់ មន្ទីរជំនាញពាក់ព័ន្ធ ដើម្បីទប់ទល់គ្រោះទឹកជំនន់ និងទប់ស្កាត់មធ្យោបាយដឹកជញ្ជូនធន់ធ្ងន់ដែលឆ្លងកាត់ទីតាំងកំពុងរងគ្រោះដោយទឹកជំនន់ និងត្រូវផ្សព្វផ្សាយផ្តល់ព័ត៌មានផ្លូវការជូនប្រជាពលរដ្ឋ អ្នកធ្វើដំណើរ និងក្រុមហ៊ុនដឹកជញ្ជូនផ្សេងៗ។

ជាពិសេស ត្រូវសហការប្រើប្រាស់មធ្យោបាយ និងសម្ភារបរិក្ខាររបស់អង្គភាព ដើម្បីត្រៀមចូលរួមធ្វើអន្តរាគមន៍ រុករក និងសង្គ្រោះប្រជាពលរដ្ឋក្នុងករណីចាំបាច់ និងស្តារឡើងវិញ នូវហេដ្ឋារចនាសម្ព័ន្ធផ្លូវថ្នល់-ស្ពាន ដែលកំពុងទទួលរងផលប៉ះពាល់ដោយសារជំនន់ទឹកភ្លៀង និងស្ថិតក្រោមសមត្ថកិច្ចរបស់ក្រសួងសាធារណការ និងដឹកជញ្ជូន៕

របាយការណ៍! ការផ្គត់ផ្គង់គម្រោងខុនដូនៅក្នុងទីក្រុងភ្នំពេញកើនតិចតួចនៅក្នុងត្រីមាសទី ៣នេះ

ដោយវុត្ថា

ភ្នំពេញ៖ នៅក្នុងត្រីមាសទី ៣ នៃឆ្នាំនេះ ការផ្គត់ផ្គង់គម្រោងខុនដូនៅក្នុងទីក្រុងភ្នំពេញ មានកំណើនប្រមាណ ៣.៩៧ ភាគរយប៉ុណ្ណោះ ខណៈនៃការបញ្ចប់នៅក្នុងដំណាក់កាលទី១មានតែមួយគម្រោង គឺ គម្រោង Urban Village ដែលកើនឡើងនូវការផ្គត់ផ្គង់នៅក្នុងផែ្នកតម្លៃសមរម្យ ១៥.៦៧ ភាគរយ ។

ក្រមហ៊ុនអន្តរជាតិ CBRE Cambodia បានចេញរបាយការណ៍ចុងក្រោយរបស់ខ្លួនថា គ្មានគម្រោងខុនដូណាមួយត្រូវបានសម្ពោធដាក់ចូលនៅក្នុងទីផ្សារក្នុងត្រីមាសទី ៣ នៃឆ្នាំនេះ ប៉ុន្តែ មានគម្រោងចំនួន ៣ បានបង្ហាញក្នុងដំណាក់កាលថ្មីចំពោះការផ្គត់ផ្គង់បន្តទៀត ស្របពេលដែលវិនិយោគិនយល់ថា ទីក្រុងភ្នំពេញនៅតែរក្សាបាននូវសុទិដ្ឋិនិយមនឹងវិលមករកភាពល្អប្រសើរវិញនាពេលខាងមុខ។

ក្រុមហ៊ុន CBRE Cambodia បន្ថែមថា សម្រាប់ត្រីមាសទី ៤ នាពេលខាងមុខនេះ នឹងមានឃើញគម្រោងចំនួន ៤ បន្ថែមទៀត នឹងត្រូវសាងសង់បញ្ចប់ ដែលមាន ២៦០០ យូនីត។ ប៉ុន្តែការសាងសាង់នៅក្នុងវិស័យខុនដូនេះត្រូវបានពន្យាពេល ជាមួយនឹងគម្រោងចំនួន ៦ កំពុងពន្យាពេលសាងសង់ ហើយអាចនឹងបញ្ចប់នៅក្នុងឆ្នាំ ២០២១ ខាងមុខន។

លោកស្រី អាន សុធីតា នាយិកាក្រុមហ៊ុន CBRE Cambodia បានឱ្យដឹងដែរថា នៅត្រីមាសទី៣ ទីផ្សារខុនដូដែលទទួលរងនូវផលប៉ះពាល់យ៉ាងខ្លាំងពីវិបត្តិសេដ្ឋកិច្ចនោះ បានចាប់ផ្តើមមានកំណើនឡើងវិញគួរឱ្យកត់សម្គាល់ ដោយក្នុងនោះមានគម្រោងជាច្រើនបានបង្ហាញពីលទ្ធផលល្អក្នុងការលក់ដូចគ្នា។

លោកស្រីបន្តថា គម្រោងខុនដូដែលមានតម្រូវការទីផ្សារនេពេល ជាប្រភេទខុនដូកម្រិតមធ្យម ដែលមានតម្លៃនៅលើទីផ្សារចាប់ពីជាង ៧ម៉ឺនដុល្លារ ឬមានតម្លៃក្រោម២០០០ដុល្លារក្នុងមួយម៉ែត្រការ៉េតែប៉ុណ្ណោះ។

លោកស្រីបន្តថា “កំណើនទីផ្សារនៅពេលនេះ ក៏ព្រោះតែអ្នកអភិវឌ្ឍន៍បានប្ដូរនូវយុទ្ធសាស្ត្រនៃគម្រោងរបស់ខ្លួនដោយងាកមកចាប់ចំណែកទីផ្សារពីប្រជាជនខ្មែរវិញ រួមជាមួយនឹងការបង្កើតកម្មវិធីងាយស្រួលក្នុងការទិញ-លក់ ដែលក្រៅពីមានតម្លៃសមរម្យ ថែមមានផ្តល់ជូននូវភាពងាយស្រួលក្នុងការបង់ប្រាក់ផងដែរ”។

លោកស្រីបញ្ជាក់ទៀតថា “បន្តិចទៀត នៅពេលដែលសេដ្ឋកិច្ចកាន់តែរឹងមាំ និងរីកចម្រើន ការអភិវឌ្ឍកាន់តែធំជាងមុន កំណើនប្រជាជនក្នុងក្រុងកាន់តែកើនឡើងច្រើន នោះតម្រូវការនៃការទីផ្សារខុនដូនឹងកើនឡើងដោយស្វ័យប្រវត្តិ”៕

សេចក្ដីព្រាងច្បាប់ថ្មីស្ដីពីកំពង់ផែទាំង ១០៥ នៅកម្ពុជា កំពុងត្រូវបានពិនិត្យ និងពិភាក្សាលម្អិតបន្ទាន់

ដោយ ៖ រ៉ាណេត

ភ្នំពេញ ៖ សេចក្ដីព្រាងច្បាប់ថ្មីស្ដីពីកំពង់ផែនៅកម្ពុជាទាំងចំនួន ១០៥ រួមមានកំពង់ផែទន្លេចំនួន ៧៨ និងកំពង់ផែសមុទ្រចំនួន ២៧ ទីតាំង ត្រូវបានលើកយកមកបើកកិច្ចប្រជុំ និងពិភាក្សា ក្រោមវត្តមានរបស់មន្ត្រីជំនាញ ដែលដឹកនាំដោយលោកទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន។

លោកទេសរដ្ឋមន្ត្រីក្រសួងសាធារណៈការ និងដឹកជញ្ជូន ស៊ុន ចាន់ថុល នាថ្ងៃទី១៣ ខែតុលា ឆ្នាំ២០២០ នៅទីស្តីការក្រសួង បានដឹកនាំកិច្ចប្រជុំពិភាក្សាលើសេចក្តីព្រាងច្បាប់ស្ដីពីកំពង់ផែ ក្នុងគោលបំណងពិនិត្យ និងកំណត់យក ឃ្លា ប្រយោគ និងនិយមន័យ ឲ្យបានគ្រប់ជ្រុងជ្រោយស៊ីជម្រៅបន្ថែមទៀត ក្នុងនោះអង្គប្រជុំបានឯកភាព និងសម្រេចកែសម្រួលអត្ថន័យតាមមាត្រានីមួយៗឱ្យមានខ្លឹមសារគ្រប់គ្រាន់។

ច្បាប់នេះមានគោលបំណងគ្រប់គ្រង និងអភិវឌ្ឍកំពង់ផែ ជំរុញពាណិជ្ជកម្មជាតិ និងអន្តរជាតិ ដើម្បីទ្រទ្រង់ការអភិវឌ្ឍសេដ្ឋកិច្ចជាតិ និងរក្សាបាននូវសណ្ដាប់ធ្នាប់សម្រាប់ការអភិវឌ្ឍកំពង់ផែ ផ្ដល់ភាពងាយស្រួលដល់អ្នកប្រើប្រាស់សេវាកំពង់ផែ ផ្តល់កាលានុវត្តភាពដល់ការវិនិយោគ ប្រកួតប្រជែងប្រកបដោយសមធម៌ ធានាសុវត្ថិភាព សន្តិសុខកំពង់ផែ និងរួមចំណែកការពារបរិស្ថាន។

លោកទេសរដ្ឋមន្ត្រី ដែលជាប្រធានអង្គប្រជុំបានស្នើឱ្យក្រុមការងារជំនាញបច្ចេកទេសពិនិត្យបន្ថែម និងសិក្សាពាក្យ ឃ្លា ប្រយោគឱ្យបានល្អិតល្អន់ស៊ីជម្រៅ ជាពិសេសឯកសារគតិយុត្តពាក់ព័ន្ធទាំងឡាយក្នុងព្រះរាជាណាចក្រកម្ពុជា ក៏ដូចជាសិក្សាគំរូច្បាប់របស់ប្រទេសនានា និងថ្លឹងថ្លែងប្រៀបធៀបដើម្បីជាមាគ៌ាក្នុងការរៀបចំសេចក្តីព្រាងច្បាប់នេះឱ្យមានលក្ខណៈគ្រប់ជ្រុងជ្រោយផងដែរ។

ជាមួយគ្នានោះផងដែរ លោកក៏បានជំរុញលើកទឹកចិត្តឱ្យក្រុមការងារបច្ចេកទេសជំនាញ ពាក់ព័ន្ធខិតខំប្រឹងប្រែងពន្លឿនការរៀបចំសេចក្តីព្រាងច្បាប់នេះឱ្យបានឆាប់តាមតែអាចធ្វើទៅបានដើម្បី ដាក់ជូនគណៈរដ្ឋមន្ត្រីប្រជុំពិភាក្សាបន្ត។

នៅក្នុងព្រះរាជាណាចក្រកម្ពុជាកំពង់ផែទន្លេមានសរុបទាំងអស់ចំនួន៧៨កំពង់ផែ ឋិតនៅតាមដងទន្លេមេគង្គ ទន្លេសាប ទន្លេបាសាក់ និងបណ្ដាខេត្តនានា ដោយឡែកកំពង់ផែសមុទ្រមាន ចំនួន២៧។ មុខងារកំពង់ផែទាំងនោះត្រូវបានបែងចែកចេញជាកំពង់ផែពាណិជ្ជកម្ម ឧស្សាហកម្ម ទេសចរណ៍ និងផែប្រេងជាដើម ហើយត្រូវបានគ្រប់គ្រងដោយរដ្ឋផង និងឯកជនផង។ កំពង់ផែទាំងនោះ មានតួនាទីសំខាន់ណាស់នៅក្នុងការជំរុញសកម្មភាពពាណិជ្ជកម្មគ្រប់ប្រភេទ ក្នុងដំណើរការអភិវឌ្ឍសេដ្ឋកិច្ចជាតិ តំបន់ និងអន្តរជាតិ៕

ផ្លូវជាតិលេខ៣ នៅបន្តបិទផ្អាកចរាចរណ៍ជាបណ្តោះអាសន្ន

ដោយ ៖ រ៉ាណេត

ភ្នំពេញ ៖ ក្រោយទទួលរងនូវការជន់លិចដោយជំនន់ទឹកភ្លៀងយ៉ាងគំហុក ដែលបណ្តាលឱ្យលិចដោយកន្លែង ជាពិសេសបន្ទាប់ពីទទួលបានបទបញ្ជាបន្ទាន់សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា នៅយប់ថ្ងៃទី១៣ ខែតុលា ឆ្នាំ២០២០ ដែលតម្រូវឱ្យផ្អាកការធ្វើចរាចរណ៍នៅលើកំណាត់ផ្លូវជាតិលេខ៣ គិតត្រឹមព្រឹកថ្ងៃទី១៤ ខែតុលា ឆ្នាំ២០២០ នៅមិនទាន់អនុញ្ញាតឱ្យចរាចរណ៍នៅឡើយនោះទេ។

ដោយក្ដីព្រួយបារម្ភពីសុខសុវត្ថិភាពរបស់ប្រជាពលរដ្ឋក្នុងតំបន់ និងអ្នកធ្វើដំណើរឆ្លងកាត់ ដឹកជញ្ជូន ក៏ដូចជាបង្ការភាពខូចខាតប៉ះពាល់ដល់គុណភាពផ្លូវ សម្ដេចតេជោ ហ៊ុន សែន បានបញ្ជាឱ្យផ្អាកការធ្វើដំណើរនៅលើកំណាត់ផ្លូវជាតិលេខ៣ជាបណ្តោះអាសន្ន ដែលគិតត្រឹមព្រឹកថ្ងៃទី១៤ ខែតុលា ឆ្នាំ២០២០នេះ នៅតំបន់មួយចំនួននៅមិនទាន់អនុញ្ញាតឱ្យធ្វើចរាចរណ៍ឡើងវិញនៅឡើយនោះទេ។

សម្តេចតេជោ បញ្ជាឱ្យបិទចរាចរណ៍កំណាត់ផ្លូវជាតិ3បណ្ដោះអាសន្ននៅយប់ថ្ងៃទី១៣ ខែតុលា ឆ្នាំ២០២០ ខណៈពេលដែលជំនន់កំពុងបន្តជន់លិច លោក ឃួង ស្រេង អភិបាលរាជធានីភ្នំពេញ បានដឹកនាំ និងចុះបញ្ជាដោយផ្ទាល់ ដោយបានរៀបចំផែនការជម្លៀសប្រជាពលរដ្ឋចេញពីកន្លែងលិចតាមដងស្ទឹងព្រែកត្នោតទៅរកទីកន្លែងមានសុវត្ថិភាព។

នៅក្នុងឱកាសចុះពិនិត្យផ្ទាល់លោក ឃួង ស្រេង បានថ្លែងប្រាប់ក្រុមអ្នកសារព័ត៌មានឲ្យដឹងថា ប្រជាពលរដ្ឋជាង៥០០គ្រួសារ ក្នុងសង្កាត់ចំនួន៤ នៅខណ្ឌដង្កោ បានទទួលរងប៉ះពាល់ដោយសារទឹកជំនន់ ហូរចេញពីដងស្ទឹងព្រែកត្នោត តាមបណ្តោយផ្លូវលេខ២០អា ដែលស្ថិតនៅភាគខាងលិចរាជធានីភ្នំពេញ និងខេត្តកណ្តាល។ ទោះបីយ៉ាងណា អភិបាលរាជធានីភ្នំពេញ បានបញ្ជាក់ថា រាជធានីភ្នំពេញ រួមនឹងកងកម្លាំងបញ្ជាការដ្ឋានអង្គរក្ស បានត្រៀមកម្លាំងជាស្រេចដើម្បីជួយសង្គ្រោះប្រជាពលរដ្ឋក្នុងមានអូប័រ ជិត៣០គ្រឿង ព្រមទាំងរថយន្តធុនធំសម្រាប់ដឹកនាំជញ្ជូនសម្ភារៈ និងជម្លៀសប្រជាពលរដ្ឋទៅកាន់ទីទួលសុវត្ថិភាពផងដែរ៕

ផែនការលម្អិតប្លង់គោលអភិវឌ្ឍន៍សម្រាប់ខេត្តកណ្តាលបានបញ្ចប់ទាំងស្រុង

ដោយវុត្ថា

ភ្នំពេញ៖ ផែនការអភិវឌ្ឍន៍នៅក្នុងខេត្តកណ្តាលទាំងមូលត្រូវបានរៀបចំរួចរាល់ ទាំងហេដ្ឋារចនាសម្ព័ន្ធ ប្រព័ន្ធធារាសាស្ត្រ នគរូបនីយកម្ម និងកាបែងបែងចែកតំបន់អភិវឌ្ឍន៍ ខណៈដែលរាជរដ្ឋាភិបាលបានឹងកំពុងរៀបចំប្លង់គោលប្រើប្រាសីដី នៅតាមបណ្តក្រុងស្រុក និងខេត្តនានានៅទូទាំងប្រទេស។

លោក វ៉ាន់ វ៉ាត អ្នកជំនាញនគរូបនីយកម្មណីយកម្ម និងសំណង់របស់កម្ពុជា បានប្រាប់គេហទំព័រ propertyarea.asia កាលពីពេលថ្មីៗនេះថា ការរៀបចំផែនការអភិវឌ្ឍន៍របស់ខេត្តកណ្តាលបានបញ្ចប់ហើយទាំងក្រុង ស្រុក នានារបស់ខេត្ត តែអ្វីដែលសំខាន់គឺមិនទាន់រដ្ឋាភិបាលមិនទាន់មានថវិកាគាំទ្រក្នុងការយកមកអភិវឌ្ឍន៍។

លោកបន្តថា “តាមពិតទៅ សម្រាប់គម្រោងថវិកាក្នុងការអភិវឌ្ឍន៍ក្នុងខេត្តកណ្តាលគឺមានផែនការរយៈពេល ១៥ ឆ្នាំ យើងមានគម្រោងហេដ្ឋារនាសម្ព័ន្ធទាំងអស់នៅទូទាំងខេត្ត ដែលអាស្រ័យលើការកំណត់គម្រោងសម្រាប់តំបន់ប្រើប្រាស់ ដូចជាតំបន់ឧស្សាហកម្ម តំបន់លំនៅឋាន តំបន់ពាណិជ្ជកម្ម តំបន់ សេដ្ឋកិច្ចពិសេស គឺយើងបែងចែករួចអស់ហើយ”។

លោកបន្ថែមថា “នៅពេលដែលយើងអនុវត្ត អ្វីៗនឹងរត់តាមផែនការរបស់យើងដែលបានកំណត់ តែអ្វីដែលសំខាន់យើងខ្វះខាតថវិកា គឺយើងធ្វើទៅតាមដំណាក់កាល ដោយផ្តោតលើគម្រោងអភិវឌ្ឍន៍អទិភាពជាមុន ហើយមួយទៀត ផែនការដែលយើងត្រៀមទុកអភិវឌ្ឍន៍ អាជ្ញាធរត្រូវតែត្រៀមទុក កុំឱ្យមានការរំលោភបំពានហើយមានការអភិវឌ្ឍន៍នៅពេលខាងមុខ”។

លោកបន្តទៀតថា “សម្រាប់ខេត្តកណ្តាល យើងមានការកំណត់ ផែនការអភិវឌ្ឍន៍ប្រើប្រាស់ដីរួចរាល់អស់ហើយ ដែលបានបែកចែកទីតាំងសម្រាប់ការរស់នៅ កន្លែងធ្វើអាជីវកម្ម ឧស្សាហកម្ម និងផលិតកម្មផ្សេងៗនៅតាមតំបន់នីមួយៗ”។
លោកបញ្ជាក់ទៀតថា “ប៉ុន្តែពលរដ្ឋមិនយល់ ហាក់មានអារម្មណ៍ថ្នាំងថ្នាក់ ហើយបើរដ្ឋទំលាក់កញ្ចប់ថវិកាសម្រាប់អភិវឌ្ឍន៍ធ្វើជំគំរូនៅក្នុងស្រុក ឬណាមួយនោះ ប្រជាពលរដ្ឋនឹងបានឃើញកាន់តែច្បាស់នូវសារសំខាន់នៃការរៀបចំក្រុងឱ្យមានភាពកាន់តែល្អប្រសើរ និងគេចផុតពីគ្រោះធម្មជាតិផងដែរ”៕

អ្នកជំនាញ៖ វិស័យ​អចលនទ្រព្យ​នៅ​កម្ពុជា​អាច​នឹងមាន​ភាព​កាន់តែ​ល្អប្រសើរឡើង​នៅ​ឆ្នាំ២០២១ខាងមុខនេះ

ដោយៈ ម៉ា​ណេ​ត

ភ្នំពេញៈ ឥទ្ធិពល​នៃ​វិបត្តិ Covid-19 បានធ្វើឱ្យ​វិស័យ​អចលនទ្រព្យ​សកល បានទទួល​រង​នូវ​ផលប៉ះពាល់​យ៉ាង​ខ្លាំ ប៉ុន្តែ​វិស័យ​អចលនទ្រព្យ​នៅ​កម្ពុជា ហាក់​មាន​ភាព​ធូរស្រាល​ជាង​បណ្តា​ប្រទេស​ដទៃ ហើយ​នៅ​ឆ្នាំ២០២១ខាងមុខនេះ អាច​នឹងមាន​ភាព​កាន់តែ​ល្អប្រសើរ​ជាង​នេះ​បន្ថែមទៀត ខណៈដែល​សកម្មភាព​ទិញ​លក់ និង​អភិវឌ្ឍ​ក្នុងស្រុក​នៅតែ​បន្ត​មាន​យ៉ាង​មមាញឹក។

ប្រធាន​សមាគម​អ្នកវាយតម្លៃ និង​ភ្នាក់ងារ​អចលនវត្ថុ​កម្ពុជា លោក ច្រឹ​ក សុខ​នី​ម បានបង្ហាញ​ទស្សនៈ​ផ្ទាល់ខ្លួន​ថា សម្រាប់​ការយល់ឃើញ​របស់លោក នៅក្នុង​ឆ្នាំ ២០២១ វា​ហាក់ដូចជា មាន​ភាពស្រពេចស្រពិល​នៅឡើយ សម្រាប់ធ្វើ​ការព្យាករណ៍ ដោយសារតែ​វ៉ាក់សាំង​មិនទាន់​ប្រាកដប្រជា ប៉ុន្តែ​ទោះជា​យ៉ាងណាក៏ដោយ វិស័យ​អចលនទ្រព្យ​នៅ​កម្ពុជា​នៅតែ​បន្ត​មាន​សកម្មភាព ជាពិសេស​អតិថិជន​ក្នុងស្រុក​នៅតែ​បន្ត​ទិញ-លក់ ប៉ុន្តែ​អាច​នឹងមិន​កម្រើក​ច្រើន​នោះទេ។

លោក​បាន​ថ្លែងថា “ធនាគារ​មួយចំនួន​នៅតែ​បន្ត​គាំទ្រ​ផ្តល់​កម្ចី ដល់​វិស័យ​អចលនទ្រព្យ ដែល​វា​ជា​រឿង​ល្អ និង​អនុញ្ញាតឱ្យ​វិស័យនេះ​នៅតែមាន​ដង្ហើម បើទោះជា​កម្ពុជា​ជួប​ឧបសគ្គ​យ៉ាងណាក៏ដោយ” ។ លោក​បន្តថា “ដើម្បីឱ្យ​កិច្ចការងារ​លើ​វិស័យ​អចលនទ្រព្យ​ដំណើរការ តាមរយៈ​គោលនយោបាយ​របស់​រាជ​រដ្ឋាភិបាល វិស័យ​ធនាគារ និង​តម្រូវការ​ក្នុងស្រុក គឺជា​កត្តា​សំខាន់​ជួយ​ជម្រុញ ឱ្យ​វិស័យ​អចលនទ្រព្យ​មាន​ភាព​រីកចម្រើន​នាពេល​អនាគត” ។

លោក​សំ សុខ​នឿន ប្រធាន​សមាគម​អចលនទ្រព្យ​សកល បានបង្ហាញ​ពី​ការព្យាករណ៍​មកកាន់​គេហទំព័រ Property Area Asia ជាមួយនឹង​ក្ដី​រំពឹងថា វិស័យ​អចលនទ្រព្យ​ក្នុង​ឆ្នាំ២០២១ អាច​នឹងមាន​សន្ទុះ​ជាង​ឆ្នាំ២០២០នេះ។

លោក​បាន​បញ្ជាក់ថា “ប្រសិនបើ​វ៉ាក់សាំង​ប្រឆាំងនឹង​ជំងឺ Covid-19 ត្រូវបាន​រកឃើញ​ជា​ស្ថាពរ និង​លុបបំបាត់​ការ​រាត់​ត្បា​ត​ជា​សកល​បាន ខ្ញុំ​ជឿជាក់ថា តាមរយៈ​រាជរដ្ឋាភិបាល អាច​នឹង​ទាក់ទាញ​វិនិយោគិន​ពី​ក្រៅ​ស្រុក ឱ្យ​ចូលមកក្នុង​ប្រទេស​កម្ពុជា​បាន​ច្រើនជាង​នេះ” ។ លោក​បន្តថា “វិស័យ​អចលនទ្រព្យ​នឹង​កាន់តែ​ក្តៅគគុក​ល្អ​ជាង​នេះ។ ខ្ញុំ​ជឿជាក់១០០ភាគរយ​ថា នៅពេល​វិនិយោគិន​ចិន និង​បណ្តា​ប្រទេសផ្សេងៗទៀត​ចូលមក​ទីផ្សារ​កម្ពុជា​សាជាថ្មី ចលនា​នៃ​ការទិញ-លក់​អចលនទ្រព្យ​នឹង​កក្រើក​ឡើងវិញ” ។

ដោយឡែក នាយិកា​ក្រុមហ៊ុន​អចលនទ្រព្យ Amatak Property Service លោកស្រី តាំង ហួរ បាន​លើកឡើងថា សម្រាប់​វិស័យ​អចលនទ្រព្យ​ឆ្នាំ២០២១ បើសិនជា​ជំងឺ​រាតត្បាត​ផុតរលត់ អ្វីៗវា​នឹង​ងើប​មក​ប្រសើរ​ឡើងវិញ តែ​បើសិនជា​វា​នៅមាន​ចំហាយ ហើយ​អូសបន្លាយ​ទៀត ស្ថានភាព​នឹងមិន​ខុសគ្នា​ពី​ឆ្នាំ២០២០នេះឡើយ។

លោកស្រី​បញ្ជាក់ថា “បើ​វា​មិន​ផុត​ទៅ​ទេ នោះ​ស្ថានភាព​នឹង​កាន់តែ​ពិបាក​ខ្លាំង តែ​យ៉ាងណា​មិន​ធ្ងន់ធ្ងរ និង​ប៉ះពាល់​គ្រប់មុខ​ដូច​សង្គ្រាមលោក​នោះទេ តែបើ​ជំងឺ​នេះ​វា​ជា​ហើយ គ្រប់យ៉ាង​នឹង​ត្រឡប់​មករក​សភា​ពធ​ម្ម​តា​ជាក់​ជាមិនខាន” ៕

ចំណេះដឹង! អ្វី​ជាការ​ឆ្លងកាត់​គយ​អន្តរជាតិ?

ដោយ​វុត្ថា

ភ្នំពេញៈ ការឆ្លងកាត់​គយ​អន្តរជាតិ គឺជា​ការដឹកជញ្ជូន​ទំនិញ​ពី​ការិយាល័យ​គយ​មាត់​ច្រកចូល ចូលទៅក្នុង​ដែន​គយ ឆ្ពោះទៅកាន់​ការិយាល័យ​គ​យ​មាត់​ច្រកចេញ ចេញទៅ​ក្រៅ​ដែន​គយ។

ប្រតិបត្តិ​ករ​ត្រូវ​ទទួល​ការអនុញ្ញាត ពី​អគ្គនាយកដ្ឋាន​គយ និង​រដ្ឋ​ករ​កម្ពុជា ដើម្បី​អនុវត្ត​នីតិវិធី​ឆ្លងកាត់​អន្តរជាតិ និង​ត្រូវ​អនុវត្តតាម​នីតិវិធី​ដូចខាងក្រោម៖

ក.នៅ​មាត់​ច្រកចូល

  • ជើងសា​គយ​ត្រូវបំពេញ​ប្រតិវេទន៍​គយ បំ​ព្រួញ​នៅ​ការិយាល័យ​ចេញដំណើរ
  • មន្ត្រី​គយ និង​រដ្ឋាករ​មាន​សម​ត្ថ​កិច្ច​ត្រូវបំពេញ​ក្នុង​ផ្នែក A និង C នៃ​ប្រតិវេទន៍​គយ។ ក្នុងករណី​ពុំមាន​ភាពមិនប្រក្រតី មន្ត្រី​គយ​មាន​សមត្ថកិច្ច​ត្រូវ​បោះត្រា និង​បញ្ជាក់​នីតិវិធី​គយ​ឆ្លងកាត់ ដោយ​កំណត់​ល័ក្ខខ័ណ្ឌ មួយចំនួន​ដូចជា តម្រាយ​ផ្លូវ​ស្របច្បាប់​និង​រយៈពេល​ឆ្លងកាត់​ហើយ​កិប សៀ​ល​គយ។

ខ.នៅ​មាត់​ច្រកចេញ។

  • ប្រតិបត្តិ​ករ​នីតិវិធី​នៃ​ការឆ្លងកាត់​គយ ឬ តំណាង​របស់ខ្លួន បង្ហាញ​ប្រតិវេទន៍​គយ​បំ​ព្រួញ ជូន​ដល់​មន្ត្រី​គយ​និង​រដ្ឋាករ​មាន​សមត្ថកិច្ច។
  • មន្ត្រី​គយ និង​រដ្ឋាករ​មាន​សម​ត្ថ​កិច្ច​នា​មាត់​ច្រកចេញ ត្រួតពិនិត្យ​នូវ​ប្រក្រតី​ភាព​នៃ​ត្រា ឬ សៀ​ល​គយ​លើ​មធ្យោបាយ​ដឹកជញ្ជូន ឬ កុងតឺន័រ​ឆ្លងកាត់។ ក្នុងករណី​យល់ថា​ពុំមាន​ភាពមិនប្រក្រតី មន្ត្រី​គយ​និង រដ្ឋាករ​បញ្ជាក់​នៅក្នុង​ផ្នែក D នៃ​ប្រតិវេទន៍​គយ រួច​កាត់​ត្រា ឬ សៀ​ល​គយ​ចេញ​មុន​អនុញ្ញាត​ឲ្យ​ដឹកជញ្ជូន​ឆ្លងកាត់​ប្រទេស​ទី​បី៕

Forbes៖ សេដ្ឋកិច្ច​អាស៊ី​កំពុង​រះ​ឡើង ស្របពេល​លោកខាងលិច​ក្រឡាប់​ចុះ

ដោយ ហ្សូ​លី

ភ្នំពេញៈ វិស័យ​ផលិតកម្ម​នៅ​តំបន់​អាស៊ី ដែល​ដឹកនាំ​ដោយ​ចិន និង​ឥណ្ឌា​កំពុងតែ​រីកចម្រើន ខណៈ​ការ​រឹតបន្តឹង​ជាច្រើន នៅតែមាន​នៅក្នុង​រដ្ឋសំខាន់ៗ របស់​សហរដ្ឋអាមេរិក​ដូចជា​កាលីហ្វ័រ​ញ៉ា និង​សហរដ្ឋអាមេរិក។

យោង​ទិន្នន័យ​ផលិតកម្ម ចេញផ្សាយ​កាលពី​សប្តាហ៍​មុន​បាន​បង្ហាញថា មានការ​ស្ទុះ​ងើបឡើង​វិញ នៃ​សកម្មភាព​ដែល​បាន​បន្ត​ដល់​ខែកញ្ញា ដោយសារ​ការ​រឹតត្បិត​ការចាក់​សោរ​ប្រទេស​ត្រូវបាន​ដកចេញ ជាពិសេស​នៅ​អាស៊ី វិស័យ​ផលិត​កម្មបាន​ផ្លាស់ប្តូរ​ខ្ពស់ជាង​មុន។  ការកែលម្អ​តម្រូវការ​ក្នុងស្រុក​និង​ខាងក្រៅ​គឺជា​កត្តា​ជំរុញ​បន្ថែម។

អាជីវកម្ម​នៅក្នុង​ទ្វីបអាស៊ី កំពុងមាន​ភាពប្រសើរ​ឡើង​ជាង​ទីផ្សារ​ដទៃទៀត ដែល​គាំទ្រ ដោយ​ការបើក​ដំណើរការ​ឡើងវិញ​នៃ​ប្រទេស​ឥណ្ឌា ទោះបីជា​ការផ្ទុក​វីរុស​ហ្ស៊ី​កា​នៅតែ​ខ្ពស់​ក៏ដោយ។

តំរូវការ​ទំនិញ​យ៉ាងច្រើន​ពី​ប្រទេស​ចិន ទាំង​ផ្នែក​នាំចេញ​រឺ​ពី​តម្រូវការ​ក្នុងស្រុក កំពុងតែ​ជួយ​ក្នុងការ​ស្តារឡើងវិញ​នៃ​សេដ្ឋកិច្ចពិភពលោក។

យោងតាម​អង្គការ សម្រាប់​កិច្ចសហប្រតិបត្តិការ​សេដ្ឋកិច្ច និង​ការអភិវឌ្ឍ​ប្រទេស​ចិន នឹង​ក្លាយជា​ប្រទេស​តែមួយគត់​របស់​ប្រទេស G20 ដែល​ប្រកាស​ពី​ចំនួន​ផលិតផល​ក្នុងស្រុក​សរុប​ខ្ពស់​នៅ​ចុងឆ្នាំ​នេះ។

លោក Christian Keller សេដ្ឋវិទូ​ប្រចាំ​ក្រុមហ៊ុន Barclays Capital នៅ​ទីក្រុង​ឡុង​ដ៍​បាន​មានប្រសាសន៍ថា ការបន្ត​ធ្វើឱ្យ​ប្រសើរឡើង​នូវ​ការបញ្ជាទិញថ្មីៗ ដែល​ត្រូវបាន​ជម្រុញ ដោយ​តម្រូវ​ការកើនឡើង កម្រិត​ស្តុក​ទាប និង​ការ​ស្ទុះ​ងើបឡើង​វិញ នៃ​ពាណិជ្ជកម្ម​អន្តរជាតិ គួរតែ​ជួយ​រក្សា​សន្ទុះ​នេះ នៅក្នុង​ផលិតកម្ម​សម្រាប់​រយៈពេល​ពេញ​មួយឆ្នាំ​នេះ។

សុខភាព​របស់​ផលិតកម្ម​អាស៊ី ឆ្លុះបញ្ចាំង​ពី​តំរូវការ​ទំនិញ ដែល​រង​ផលប៉ះពាល់​ពី​ការ​រឹតត្បិត​ទាក់ទង​នឹង​រោគរាតត្បាត ដោយសារតែ​ភាពមិន​ប្រើ​សេវាកម្ម ជាក់លាក់​បាន​បង្វែរ​កា​រ​ប្រើប្រាស់​ទៅរក​ទំនិញ ដែល​អាច​ទិញ​បាន​យ៉ាង​ងាយស្រួល​តាម​អ៊ិន​ធឺ​ណេ​ត។  ទោះយ៉ាងណា​ក៏ដោយ​ដោយ សារ​សារៈសំខាន់​នៃ​វិស័យ​សេវាកម្ម ការ​ងើប​ឡើងវិញ​ប្រកបដោយ​ចីរភាព អាច​កើតឡើង​បាន​លុះត្រា តែ​ការ​រឹតបន្តឹង​លើ​ការបញ្ជាទិញ​ត្រូវបាន​លើក​ចេញ។

នាពេលថ្មីៗនេះ ប្រទេស​ចិន​បាន​ឆ្លងកាត់​ថ្ងៃ​ឈប់សម្រាក ថ្ងៃបុណ្យ​ជាតិ​ដ៏​ធំ​របស់ខ្លួន។  ទិន្នន័យ​ទេសចរណ៍​របស់​រដ្ឋាភិបាល បាន​បង្ហាញថា​ជើងហោះហើរ និង​ចរាចរណ៍​រថភ្លើង​ដឹក​អ្នកដំណើរ បាន​ធ្លាក់ចុះ​ប្រហែល២០ ភាគរយ​បើ​ប្រៀបធៀប​ទៅនឹង​ឆ្នាំមុន។  ទោះជា​យ៉ាងណាក៏ដោយ​ហ្វូងមនុស្ស​កំពុង​វិលត្រឡប់​មកវិញ។

នៅក្នុង​ខែសីហា សៀង​ហៃ Disneyland បាន​បើក៥០ ភាគរយ ពោលគឺ​កើនឡើង​ពី​ប្រមាណ ២៥% ។

នៅ​សហរដ្ឋអាមេរិក និង​ផ្នែក​ខ្លះ​នៃ​ទ្វីប​អ៊ឺរ៉ុប ចំនួន​អ្នក​ឆ្លង​រលក​ទី​ពីរ​អាច​បំភ័យ​អាជីវកម្ម និង​អ្នកបង្កើត​គោលនយោបាយ។  នៅ​សហរដ្ឋអាមេរិក ករណី​បាន​កើនឡើង​នៅក្នុង​ទីក្រុង​ញូវយ៉ក ដែលជា​ចំណុចកណ្តាល នៃ​ការរីក​រាលដាល​នៃ​វីរុស ប៉ុន្តែ​ជាទូទៅ​ទីក្រុង មិន​ត្រូវបាន​វាយប្រហារ​ដោយ​រលក​ទី​ពីរ ស្រដៀង​នឹង​មជ្ឈមណ្ឌល​ទីក្រុង​អឺរ៉ុប​ដូចជា​ម៉ា​ឌ្រី​ដ។

ហោប៉ៅ​សេដ្ឋកិច្ច ដែល​នៅតែ​បន្ត​តស៊ូ​ហើយ​ការ​ជម្រុញ សារពើពន្ធ​ជុំ​បន្ថែម​អាចធ្វើឱ្យ​សេដ្ឋកិច្ច​អាមេរិក​អាច​រំកិល​ចូលឆ្នាំ២០២១ ៕