ដោយ ហ្សូលី

ភ្នំពេញៈ បើគិតមកដល់បច្ចុប្បន្ន ប្រទេសកម្ពុជាយល់ព្រមទទួលយកជំនួយសម្រា​ប់អភិវឌ្ឍន៍ខ្នាតតូចចំនួនជាង៦០០គម្រោងហើយពីប្រទេសជប៉ុន។

ជំនួយនោះ នឹងត្រូវប្រើប្រាស់សម្រាប់អភិវឌ្ឍន៍ហេដ្ឋារចនាសម្ព័ន្ធផ្លូវថ្នល់ ការលើកកម្ពស់ការអប់រំនៅកម្រិតមូលដ្ឋាន សុខាភិបាលកម្រិតមូលដ្ឋាន កសិកម្ម និងរួមចំណែកលើកកម្ពស់ជីវភាពរស់នៅប្រជាជននៅកម្ពុជា។ នេះបើតាមប្រសាសន៍ឯកឧត្តម Mikami Masahiro ឯកអគ្គរាជទូតជប៉ុនប្រចាំកម្ពុជា ថ្លែងក្នុងពិធីចុះហត្ថលេខាលើកិច្ចសន្យាផ្តល់ជំនួយឥតសំណង ក្រោមគម្រោងទ្រង់ទ្រាយតូចសន្តិសុខមនុស្សជាតិ (គូសាណូណិជប៉ុន) នាព្រឹកថ្ងៃទី១៩ ខែមីនាឆ្នាំ ២០២០ នេះនៅស្ថានទូតជប៉ុនប្រចាំកម្ពុជា។

ចាប់តាំងពីឆ្នាំ១៩៩១រដ្ឋាភិបាលជប៉ុន បានផ្តល់ថវិកាជាង៦០លានដុល្លារអាមេរិកដល់អាជ្ញាធរមូលដ្ឋាន និងអង្គការក្រៅរដ្ឋាភិបាល ដើម្បីអនុវត្តន៍ គម្រោងគូសាណូណិនេះចំនួន៦២៤គម្រោង នៅទូទាំងប្រទេសកម្ពុជា។

លោកMikami Masahiro បានមានប្រសាសន៍ថា ការចុះហត្ថលេខាលើកិច្ចសន្យាផ្តល់ជំនួយឥតសំណងរបស់រដ្ឋាភិបាលជប៉ុនថ្ងៃនេះ រដ្ឋាភិបាលជប៉ុនបានឯកភាពផ្តល់ជំនួយឥត សំណងក្រោមគម្រោងទ្រង់ទ្រាយតូចសន្តិសុខមនុស្សជាតិ (ជំនួយគូសាណូណិជប៉ុន) សម្រាប់ការសាងសង់អគារសិក្សា និងប្រព័ន្ធផ្គត់ផ្គង់ទឹកនៅកម្ពុជា ដូចជានៅខេត្តរតនៈគិរី ក្រចេះ មណ្ឌលគិរី ពោធិ៍សាត់ ជាដើម ដើម្បីធានាឱ្យប្រជាជនក្នុងតំបន់ អាចទទួលបានទឹកស្អាត និងអនាម័យយ៉ាងងាយស្រួល ព្រមទាំងកែលម្អជីវភាពរស់នៅកា​ន់តែប្រសើរថែមទៀត។

ឯកអគ្គរាជទូតរំពឹងថា “គម្រោងជំនួយរបស់រដ្ឋាភិបាលជប៉ុនទាំងអស់នេះ ពិតជានឹងទទួលបានផលប្រយោជន៍សម្រាប់ប្រជាជនកម្ពុជា”។

តាមសេចក្តីប្រកាសព័ត៌មានរបស់ស្ថានទូតជប៉ុនប្រចាំកម្ពុជា ជំនួយគូសាណូណិរបស់ជប៉ុន” ជាគ្រោងការណ៍ជំនួយឧបត្ថម្ភឥតសំណងរបស់ រដ្ឋាភិបាលជប៉ុន។ គម្រោងនេះមានទិសដៅការពារជនងាយរងគ្រោះ ពីកត្តាមួយចំនួនដូចជា៖ ភាពក្រីក្រ និងភាពអកុសល ដែលអាចគំរាមកំហែងដោយផ្ទាល់ដល់ជីវភាពរស់នៅ ការចិញ្ចឹមជីវិត និងសេចក្តីថ្លៃថ្នូររបស់ពួកគេ ក៏ដូចជាជួយជំរុញនូវភាពម្ចាស់ការលើខ្លួនឯង របស់ប្រជាសហគមន៍៕

ដោយៈ រ៉ាណេត

ភ្នំពេញៈ ទើបតែទទួលបានការផ្គត់ផ្គង់វត្ថុធាតុដើម ពីប្រទេសមហាមិត្តចិន ដើម្បីសម្រួលដល់ដំណើរការសង្វាក់ផលិតកម្ម កាលពីសប្ដាហ៍មុននោះ ពេលនេះស្រាប់ទីផ្សារសំខាន់ធំៗមួយចំនួននៅអឺរ៉ុប និងទីផ្សារនៅអាមេរិក ផ្អាកការបញ្ជាទិញផលិតផលវិស័យកាត់ដេរពីកម្ពុជា ក្រោយទទួលរងការវាយប្រហារដោយមេរោគ Covid-19។

តាមរយៈការធ្វើបទសម្ភាសន៍ជាមួយវិទ្យុបារាំង-អន្តរជាតិ នៅថ្ងៃទី១៩ ខែមីនា ឆ្នាំ២០២០នេះ លោក កាំង ម៉ូនីកា អគ្គលេខាធិការរង និងជាអ្នកនាំពាក្យ សមាគមរោងចក្រកាត់ដេរ នៅកម្ពុជា (GMAC)បានថ្លែងថា អ្នកកម្មង់ទិញ សម្លៀកបំពាក់ពីកម្ពុជាមួយចំនួន បានជូនដំណឹងមកខាងGMAC ដោយស្នើឱ្យមានការផ្អាក ការដឹកជញ្ជូនទំនិញវាយនភណ្ឌនៃវិស័យកាត់ដេរទៅកាន់ទីផ្សារអឺរ៉ុប-អាមេរិក ដោយសារការរីករាលដាលនៃមេរោគ Covid-19។

លោកកាំង ម៉ូនីកា បានមានប្រសាសន៍ថា “ទីផ្សារបញ្ជាទិញមួយចំនួនបានស្នើឱ្យមានការផ្អាកដឹកជញ្ជូន ទំនិញទៅកាន់ទៅទីនោះ (ទីផ្សារសហរដ្ឋអាមេរិក និងទីផ្សារអឺរ៉ុប) ខណៈដែលពេលនេះទីផ្សារធំៗទាំង២ កំពុងទទួលរងនូវផលប៉ះពាល់ពី Covid-19 យ៉ាងខ្លាំង”។ លោកបានបន្តទៀតថា “ប្រឈមនឹងការរាលដាលនៃមេរោគ Covid-19 នៅដើមឆ្នាំ២០២០នេះ រោងចក្រមួយចំនួន បានប្រកាសព្យួរការងារដោយសារខ្វះវត្ថុធាតុដើម ដោយផ្តល់ប្រាក់ឈ្នួលសរុបដល់កម្មករ និយោជិតចំនួន៦០ភាគរយ ភ្ជាប់នឹងលក្ខ​ខណ្ឌតម្រូវឱ្យកម្មករ ត្រូវចូលរួមបណ្តុះបណ្តាលជំនាញបន្ថែម។

ប៉ុន្តែកាលពីសប្តាហ៍មុន ប្រទេសចិនបានបញ្ជូនវត្ថុធាតុដើមជាច្រើននាវា មកកម្ពុជា ជាហេតុធ្វើឱ្យសង្វាក់ផលិតកម្ម នៃវិស័យកាត់ដេរបានដំណើរការឡើងវិញ។

ក្រោមការជួយផ្គត់ផ្គង់វត្ថុធាតុដើមកាលពីសប្ដាហ៍មុននេះ បានធ្វើឱ្យរោងចក្រមួយចំនួនមានដំណើរការសង្វាក់ផលិតកម្ម ដើម្បីផលិតទំនិញសម្រាប់ផ្គត់ផ្គង់ឡើងវិញ ប៉ុន្តែបែរជាមិនមានទីផ្សារនាំចេញ ដោយសារអ្នកបញ្ជាទិញនៅអឺរ៉ុប និងអាមេរិកឱ្យផ្អាកការផ្គត់ផ្គង់ទំនិញ ខណៈដែលតំបន់ទាំង២ ដែលជាទីផ្សារសំខាន់របស់វិស័យកាត់ដេរកម្ពុជាកំពុងប្រឈមនឹងការឆ្លងរាលដាលនៃមេរោគCovid-19។

ទោះយ៉ាងណា អ្នកនាំពាក្យ សមាគមរោងចក្រកាត់ដេរកម្ពុជា បានបញ្ជាក់ថាសមា​គមនៅមិនទាន់ មានការសម្រេចយ៉ាងណានៅឡើយទេ ដោយពេលនេះកំពុងធ្វើការស្រង់ព័ត៌មានពីក្នុងចំណោមសមាជិករបស់ខ្លួនថា តើគួរតែមានការផ្អាកផលិតកម្មនៃវិស័យនេះជាបណ្តោះអាសន្ន ឬយ៉ាងណា៕

ដោយ ប៊ី

ចិន៖ ប្រទេសចិនមិនមានករណីឆ្លងថ្មីនៃវីរុស COVID-19 នៅក្នុងស្រុកជាលើកដំបូង ចាប់តាំងពីការចាប់ផ្តើមនៃវិបត្តិដែលបានធ្វើឱ្យប្រជាជនចិនជាង ៨ ម៉ឺននាក់ឆ្លង។ ប៉ុន្តែវាអាចជាសញ្ញាមួយដែលប្រទេសនេះបានយកឈ្នះលើជំងឺនេះដែលបណ្តាលឱ្យស្លាប់។

ខណៈពេលដែលចំណុចកណ្តាលនៃការផ្ទុះបានផ្លាស់ប្តូរទៅទ្វីបអឺរ៉ុប ដែលបច្ចុប្បន្នមានករណីជាច្រើនត្រូវបានគេរាយការណ៍ជារៀងរាល់ថ្ងៃច្រើនជាងកម្រិតវិបត្តិនៅប្រទេសចិន អ្នកជំនាញខាងរោគឆ្លងព្រមានថាយក្សអាស៊ីអាចប្រឈមមុខនឹងរលកនៃការឆ្លងជាបន្តបន្ទាប់ដោយផ្អែកលើគំរូដែលត្រូវបានគេឃើញនៅក្នុងរោគរាតត្បាតផ្សេងទៀត។

ធម្មជាតិនៃវីរុសពិសេសនេះក៏បង្កើនហានិភ័យនៃការកើតឡើងវិញផងដែរ។ វីរុសនេះគឺពិបាកក្នុងការរកឃើញ និងមានរយៈពេលយូរជាងមួយដែលបណ្តាលឱ្យមានរោគសញ្ញាផ្លូវដង្ហើមធ្ងន់ធ្ងរក្នុងឆ្នាំ ២០០៣ ដែលបានឆ្លងមនុស្សចំនួន ៨០០០ នាក់។ នោះនឹងធ្វើឱ្យរលកនាពេលអនាគតនៃជំងឺរាតត្បាតថ្មីកាន់តែពិបាកការពារ។

នៅពេលដែលប្រទេសដទៃទៀតកំពុងប្រយុទ្ធជាមួយនឹងការរស់នៅរបស់ពលរដ្ឋ ពួកគេនឹងត្រូវមើលប្រទេសចិន ដែលវីរុសនេះបានលេចចេញកាលពីខែ ធ្នូ ឆ្នាំ២០១៩ ដើម្បីមើលថាមានអ្វីកើតឡើងនៅពេលដែលវាទប់ទល់នឹងការបិទទ្វារយ៉ាងតឹងរ៉ឹង និងវិធានការណ៍ដាក់ឱ្យឃ្លាតឆ្ងាយពីសង្គម ដែលបានជួយទប់ស្កាត់ការផ្ទុះឡើងនៃជំងឺនេះ។

វាមិនមានករណីថ្មីណាមួយត្រូវបានគេរាយការណ៍កាលពីថ្ងៃ ព្រហស្បតិ៍ នៅទីក្រុងវូហាន ដែលជាទីក្រុងនៅខេត្តហ៊ូប៉ី ភាគកណ្តាលនៃប្រទេសចិនដែលការផ្ទុះឡើងនៃជំងឺនេះបានចាប់ផ្តើម។ មិនមានករណីថ្មីនៅក្នុងប្រទេសនេះអស់រយៈពេល ៧ ថ្ងៃដែលជាការធ្លាក់ចុះយ៉ាងខ្លាំងពីកម្ពស់នៃការផ្ទុះដែលបានសម្លាប់មនុស្សជាង ៣,០០០ នាក់ និងបង្កឱ្យមានការធ្លាក់ចុះសេដ្ឋកិច្ចជាប្រវត្តិសាស្ត្រ។

លោក David Heymann សាស្ត្រាចារ្យផ្នែករោគឆ្លងនៃសាលាក្រុងឡុង បាននិយាយថា វិធានការណ៍របស់ប្រទេសចិនដែលរាប់បញ្ចូលទាំងតំបន់ដាច់ស្រយាលមួយនៃខេត្តហ៊ូប៉ីដែលមានប្រជាជន ៦០ លាននាក់ទទួលបានជោគជ័យនៅក្នុងប្រទេស៕

ដោយ ៖ រ៉ាណេត

ភ្នំពេញ ៖ រដ្ឋាភិបាលជប៉ុន តាមរយៈឯកអគ្គរដ្ឋទូតវិសាមញ្ញ និងពេញសមត្ថភាពជប៉ុនប្រចាំនៅកម្ពុជា បានបង្ហាញពីគោលបំណង និងឆន្ទៈរបស់ខ្លួនយ៉ាងច្បាស់ថា មិនថាទោះជាស្ថិតនៅក្នុងស្ថានភាពដែលកំពុងតែប្រឈមនឹងវត្តបត្តិសាកលដែលកំពុងកើតមានក៏ដោយ រដ្ឋាភិបាលជប៉ុននៅតែបន្តការគាំទ្រ និងផ្តល់ហិរញ្ញប្បទានសម្រាប់កិច្ចសហប្រតិបត្តិការអភិវឌ្ឍន៍ផ្លូវការដល់កម្ពុជាដដែល។

តាមរយៈសេចក្ដីប្រកាសព័ត៌មានផ្លូវការណ៍របស់ក្រសួងសេដ្ឋកិច្ច និងហិរញ្ញវត្ថុ ដែលគេហទំព័រ Property area.asia ដែលទទួលបានមុននេះបានបញ្ជាក់ថា ទោះជាស្ថិតនៅក្នុងបរិការណ៍ពិភពលោក ដែលកំពុងតែមានគ្រោះអាសន្ននេះរដ្ឋាភិបាលជប៉ុន នៅតែមានឆន្ទៈខ្ពស់ និងស្មោះត្រង់ជាមួយកម្ពុជា ដោយការបន្តកិច្ចគាំទ្រ និងផ្តល់ជំនួយក្នុងនាមជាដៃគូអភិវឌ្ឍន៍។

ឯកអគ្គរដ្ឋទូតវិសាមញ្ញ និងពេញសមត្ថភាពជប៉ុនប្រចាំនៅកម្ពុជា លោក ម៉ាសាហុីរូ មុីកាមុី (Masahiro MIKAMI) បានមានប្រសាសន៍ប្រាប់លោកបណ្ឌិតសភាចារ្យ អូន ព័ន្ធ មុនីរ័ត្ន ឧបនាយករដ្ឋមន្ត្រី និងជារដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ នៅក្នុងកិច្ចជំនួបពិភាក្សាការងារកាលពីពេលថ្មីៗនេះថា “នៅក្នុងអាណត្តិបំពេញកិច្ចការទូតនេះ ខ្ញុំនឹងខិតខំពង្រឹង និងពង្រីកកិច្ចសហប្រតិបត្តិការលើគ្រប់វិស័យអាទិភាពរបស់រាជរដ្ឋាភិបាលកម្ពុជា ព្រមទាំងបន្តនូវកិច្ចគាំទ្រ្តល់ហិរញ្ញប្បទាន សម្រាប់កិច្ចសហប្រតិបត្តិការអភិវឌ្ឍន៍ផ្លូវការ (ODA) ទាំងក្នុងក្របខ័ណ្ឌ ដូចជាហិរញ្ញប្បទានឥតសំណងជាដើម”។

លោកបានបន្តទៀតថា “ជំនួយផ្សេងៗទៀតរួមមានដូចជា ឥណទានសម្បទាន និងជំនួយបច្ចេកទេស ជាពិសេស ជំរុញការអភិវឌ្ឍវិស័យឯកជននានាឱ្យកាន់តែរីកចម្រើនបន្ថែមទៀតផងដែរ”។ ជាមួយគ្នានេះលោកក៏បានថ្លែងអំណរគុណចំពោះរដ្ឋាភិបាលកម្ពុជា ដែលតែងផ្តល់នូវកិច្ចសហប្រតិបត្តិការដ៏ល្អប្រសើររវាងប្រទេសកម្ពុជា- ជប៉ុន នាពេលកន្លងមកនេះ ហើយលោនឹងបន្តជួយផ្សព្វផ្សាយ និងជំរុញវិស័យពាណិជ្ជកម្មរវាងប្រទេសទាំង២ឱ្យកាន់តែល្អបន្ថែមទៀត ។

លោកបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្ត្រី និងជារដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ បានសម្ដែនូវការថ្លែងអំណរគុណយ៉ាងជ្រាលជ្រៅចំពោះកិច្ចខិតខំប្រឹងប្រែងជួយជ្រោមជ្រែងរបស់រដ្ឋាភិបាលជប៉ុនតាមរយៈការឧបត្ថម្ភគាំទ្រទាំងកម្លាំងកាយ និងកម្លាំងចិត្ត ក៏ដូចជាធនធានជាច្រើនមកដល់រដ្ឋាភិបាលកម្ពុជា ព្រមទាំងប្រជាជនកម្ពុជាផងដែរ។

លោកបណ្ឌិតសភាចារ្យបានមានប្រសាសន៍ថា “រដ្ឋាភិបាលជប៉ុន តែងតែផ្ដល់នូវកិច្ចគាំទ្រដល់រដ្ឋាភិបាលកម្ពុជា ក្នុងការអភិវឌ្ឍន៍ក្នុងភាពជាដៃគូតាំងពីដើមរៀងមក ដែលសកម្មភាពទាំងអស់នេះ បានឆ្លុះបញ្ចាំងយ៉ាងច្បាស់ថា ប្រទេសជប៉ុននៅតែជាដៃគូយុទ្ធសាស្ត្រអភិវឌ្ឍន៍ដ៏សំខាន់សម្រាប់ប្រទេសកម្ពុជា”៕

ដោយ ហ្សូលី

ភ្នំពេញ៖ គម្រោងថាមពលពន្លឺព្រះអាទិត្យ (Solar) ដែលបានពង្រីកសក្តានុពលនៅកម្ពុជា ត្រូវបានពន្យាពេលដោយសារខ្វះខាតសម្ភារៈ និងបញ្ហាមួយចំនួនទៀត។

ការពន្យាពេលនៃគម្រោងថាមពលពន្លឺព្រះអាទិត្យនេះមិនមែនតែនៅកម្ពុជាម្នាក់ឯងឡើយ តែប្រទេសនៅតំបន់អាស៊ីអាគ្នេយ៍មួយចំនួនដូចជា ថៃ វៀតណាម ម៉ាឡេស៊ី ក៏ត្រូវពន្យាពេលដូចគ្នា ដោយសារកត្តាខ្វះខាតសម្ភារៈក្នុងការផលិតប្រព័ន្ធថាមពល និងធនធានផ្សេងៗទៀតពីប្រទេសចិន។

អ្នកវិនិយោគបង្ហាញនូវភាពទុទិដ្ឋិនិយមចំពោះការជាប់គាំងសង្វាក់ផលិតកម្មវត្ថុធាតុដើម ដើម្បីស្ថាបនាហេដ្ឋារចនាសម្ព័ន្ធឱ្យកាន់ធំ ជាពិសេសក៏មានការពាក់ព័ន្ធនឹងបញ្ហាហិរញ្ញវត្ថុមួយចំនួនផងដែរ ដោយសារសេដ្ឋកិច្ចសកលលោកកំពុងធ្លាក់ចុះ។

សម្ភារៈដែលត្រូវបានផលិតនោះគឺមានរោងចក្រនៅតំបន់ វូហាន ស៊ីឈាន់ និង ស៊ីជាំង ជាដើម ដែលខ្លះផ្អាកដំណើរការ ចំណែកខ្លះទៀតមានភាពយឺតយ៉ាវផ្នែកផលិតកម្ម។ អ្វីដែលកាន់តែគួរឱ្យបារម្ភនោះគឺ ធនធានមនុស្សមានមិនគ្រប់គ្រាន់។

យ៉ាងណាមិញ ផលិតកម្មនៃផលិតផលទាំងនោះនៅតែបន្តដំណើរការងារផលិតដើម្បីព្យាបាលការពន្យាពេល ហើយត្រូវផ្តោតមកលើការដឹកជញ្ជូនផងដែរ ព្រោះថាតម្រូវការមានគ្រប់បណ្តារប្រទេសនៅលើទីផ្សារសកលលោក។

ម្យ៉ាងវិញទៀត ថាមពលដើរដោយខ្យល់ គឺនៅតែសម្លឹងឆ្ពោះទៅមុខក្នុងឆ្នាំ ២០២០ដដែល បើទោះបីជាមានការគម្រាមកំហែងពីហានិភ័យផ្សេងៗក៏ដោយ៕

ដោយ ហ្សូលី

ភ្នំពេញ៖ ការលុបចោលព្រឹត្តិការណ៍នានាដូចជា កិច្ចប្រជុំរបស់ថ្នាក់ដឹកនាំ សន្និបាត ព្រឹត្តិការណ៍ ពិធីបុណ្យជាតិនៅតាមតំបន់អាស៊ី ធ្វើឱ្យប៉ះពាល់ដល់ក្រុមហ៊ុនពាណិជ្ជកម្មនិងរៀបចំព្រឹត្តការណ៍មួយចំនួនដែលបណ្តាលឱ្យខាតបង់ទឹកប្រាក់ប្រមាណលើសពី ១៧ ពាន់លានដុល្លារ។

ថ្មីៗនេះ មានការលុបចោល ឬពន្យាពេលកម្មវិធីជាបន្តបន្ទាប់ដោយសារតែរដ្ឋាភិបាលរបស់ប្រទេសនិមួយៗក្នុងតំបន់អាស៊ី បានហាមឃាត់មិនឱ្យមានការជួបជុំជាបណ្តោះអាសន្ន ដោយសារការផ្ទុះនៃមេរោគឆ្លងទូទាំងសកលលោក។

បើតាមអ្នកវិភាគនៅក្រុមហ៊ុនទីផ្សារមួយបានវិភាគថា ក្នុងតំបន់អាស៊ីការលុបចោលព្រឹត្តការណ៍ដែលប្រើទុនចន្លោះពីជាង ១៤ពាន់លាន ទៅជាង ២៥ពាន់លានដុល្លារ។ កម្មវិធីធំៗទាំងនោះកំពុងត្រូវការកាត់បន្ថយការចំណាយនៅលើ សណ្ឋាគារ ហាង និងភោជនីយដ្ឋាន ជាពិសេសសម្រាប់អ្នកចូលរួមមកពីក្រៅប្រទេសក៏ពួកគេលុបចោលដំណើរឆ្ពោះមកកាន់ព្រឹត្តការណ៍ផងដេរ។

ជាក់ស្តែងដូចជា ការដាក់តាំងបង្ហាញយានយន្តនៅប្រទេសចិន ការប្រគុំតន្រ្តីអន្តរជាតិ ព្រឹត្តការណ៍ខ្សែភាពយន្តប្រចាំឆ្នាំ ការតាំងពិពរណ៌ និងដំណើរកម្សាន្តរបស់សិស្សនិស្សិត សុទ្ធតែត្រូវបានពន្យាពេលនិងលុបចោល ដែលជាហេតុធ្វើឱ្យមជ្ឈមណ្ឌលពាណិជកម្មខាតបង់ទឹកប្រាក់ គ្មានចំណូល និងបណ្តាលឱ្យកម្មករ បុគ្កលិកបាត់បង់ការងារទៀតផង។

ប្រទេសដែលរងគ្រោះខ្លាំងជាងគេនោះនៅតំបន់អាស៊ីគឺប្រទេសថៃ និងសិង្ហបុរី ព្រោះពួកគេជាប្រទេសដែលពឹងផ្អែកលើវិស័យទេសចរណ៍មួយផ្នែកធំផងដែរ។ លើសពីនេះ ប្រទេសសិង្ហបុរី បានដើរតួជាម្ចាស់ផ្ទះសម្រាប់កិច្ចប្រជុំ សិក្ខាសាលា សន្និបាតធំៗបែបអន្តរជាតិ តែបែរជាត្រូវលុបចោលធ្វើខាតបង់ទឹកប្រាក់ប្រមាណជាង ៨ពាន់លានដុល្លារ៕

(Forbes)