ក្រសួងដែនដីប្រកាសពីបែបបទនិងនីតិវិធីនៃការផ្តល់ ការព្យួរ និងការដកហូតវិញ្ញាបនបត្រវាស់វែង

ដោយ វុត្ថា

ភ្នំពេញៈ ក្រសួងរៀបចំដែនដីនគរូបនីយកម្ម និងសំណង់ បានចេញប្រកាស្តីពីបែបបទ និងនីតិវិធីនៃការផ្តល់ ការព្យួរ និងការដកហូរវិញ្ញាបនបត្រវាស់វែង ក្នុងគោលបំណងដើម្បីធានាប្រសិទ្ធិភាព នៃការរៀបចំផែនការរៀបចំដែនដី នគរូបនីយកម្ម និងអភិវឌ្ឍហេដ្ឋារចនាសម្ព័ន្ធនៅកម្ពុជា។

យោងតាមប្រកាសលេខ ១៧៥ ដ.ន.ស/ប្រក ដែលចុះហត្ថលេខាដោយ លោក ឧបនាយករដ្ឋមន្ត្រីជា សុផារ៉ា រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ ដែលគេហទំព័រ proprertyarea.asia ទទួលបានៅថ្ងៃទី ៦ ខែធ្នូ ឆ្នាំ ២០១៩ នេះបានឱ្យដឹថា ធានាភាពជាក់លាក់នៃលទ្ធផលការងារវាស់វែង និងផលិតផែនទី។ ធានាប្រសិទ្ធិភាពនៃការគ្រប់គ្រងការវាសវែង និងការផលិតផែនទី បង្ការ និងទប់ស្កាត់ការផ្សព្វផ្សាយ ការប្រើប្រាស់ជាសាធារណៈនូវផែនទី និងទិន្ន័យវាស់វែងដែលមិនត្រូវ និងគ្មានការអនុញ្ញាត។

សេចក្តីប្រកាសនេះ មានគោលដៅ កំណត់កម្រិតវិញ្ញាបនបត្រវាស់វែង សម្រាប់អ្នកវាស់វែអ និងកំណត់បែបបទ និងនីតិវិធីនៃការផ្តល់ ការព្យួរ និងការដកហូតវិញ្ញាបនត្រវាស់វែង៕

សូមអានសេចក្តីប្រកាសខាងក្រោម៖

បុរី ខេស៊ី ផ្តល់ជូនជម្រើសបង់ប្រាក់ងាយស្រួលសម្រាប់អតថិជនរបស់ខ្លួន

ដោយៈ រ៉ាណេត

ភ្នំពេញៈ ជាការសម្រួលនិងឆ្លើយតប ទៅនឹងតម្រូវការជាក់ស្ដែងរបស់អតិថិជន ដែលមានចំណូលកម្រិតមធ្យម និងមានបំណងចង់បានលំនៅដ្ឋានកម្មសិទ្ធិ សម្រាប់ស្នាក់នៅ និងអាចប្រកបអាជីវកម្មបានប្រចាំថ្ងៃបាន បុរី ខេស៊ី ដែលកំពុងតែដំណើរការសាងសង់លំនៅដ្ឋានបែបប្រណីត និងទាន់សម័យ បានផ្តល់ជូនជម្រើសងាយស្រួលកាន់តែច្រើនជាងមុន។

ស្ថិតនៅក្នុងតំបន់ដែលកំពុង តែមានសក្ដានុពលក្រោមគម្រោងអភិវឌ្ឍធំៗជាច្រើនរបស់រាជរដ្ឋាភិបាលកម្ពុជា ក្នុងការប្រែក្លាយតំបន់ជាយក្រុងរាជធានីភ្នំពេញ ឱ្យទៅជាតំបន់លំនៅដ្ឋានប្រកបដោយផាសុកភាព រួមជាមួយនឹងបណ្តុំឧស្សាហកម្មផងដែរនោះ បុរី ខេ ស៊ី បច្ចុប្បន្ននេះបាន និងកំពុងតែមានសកម្មភាពយ៉ាងមមាញឹក ក្នុងការអភិវឌ្ឍគម្រោងលំនៅដ្ឋានបែបទាន់សម័យ ស៊ីវិល័យ និងប្រណីតភាព ដែលគ្រោងនឹងបញ្ចប់នៅត្រឹមឆ្នាំ២០២១ឆាប់ៗខាងមុខនេះ។

ជាមួយនឹងទីតាំងល្អ អំណោយផលដល់ការរស់នៅ និងប្រកអាជីវកម្មគ្រប់ប្រភេទ បុរី ខេស៊ី ស្ថិតនៅជាប់ផ្លូវធំទំហំ៣០ម៉ែត្រ ជាផ្លូវតភ្ជាប់រវាងផ្លូវជាតិលេខ៥ និងមហាវិថី ឈ្នះ ឈ្នះ នៃទីក្រុងមរតកសម្ដេចតេជោ ឆ្ពោះទៅកាន់ផ្លូវជាតិលេខ៤ និងមានហ៊ុព័ទ្ធទៅដោយទីប្រជុំជនជាច្រើន ដូចជា ខាងក្រោយមានផ្សារព្រែកព្នៅចាស់ នៅខាងមុខជាប់ផ្លូវ មានផ្សារព្រែកព្នៅ សាលារៀនរដ្ឋ និងឯកជន មណ្ឌលសុខភាព គ្លីនិកឯកជន និងបណ្តាញហេដ្ឋារចនាសម្ព័ន្ធផ្លូវថ្នល់ខ្វាត់ខ្វែងជាច្រើន។

ចំពោះលក្ខខណ្ឌនៃការក្លាយខ្លួនជាម្ចាស់លំនៅដ្ឋាន នៅក្នុងបុរី ខេ ស៊ី គឺមានភាពងាយស្រួលបំផុត ដោយលោកអ្នកគ្រាន់តែមានប្រាក់ដំបូង ត្រឹមតែ១០០០ដុល្លារ តែប៉ុណ្ណោះ រួមជាមួយនឹងការបង់បណ្តាក់ក្នុងរូបភាពជាបង់រំលស់ ជាបន្តបន្ទាប់ស្របទៅតាមគោលការណ៍ ដែលបានកំណត់ដោយក្រុមហ៊ុនអភិវឌ្ឍលំនៅដ្ឋានតែប៉ុណ្ណោះ។

នៅក្នុងគម្រោងបុរី ខេ ស៊ី ត្រូវបានរៀបចំនូវហេដ្ឋារចនាសម្ព័ន្ធស្របតាមស្ដង់ដារសំណង់ ដូចជាផ្លូវបេតុងមេមានទំហំ១២ម៉ែត្រ ផ្លូវតូចមានទំហំ៨ម៉ែត្រ មានប្រព័ន្ធទឹកស្អាត និងបណ្តាញរំដោះទឹកយ៉ាងត្រឹមត្រូវ និងមានការរៀបចំសាងសង់ជាទីធ្លាសម្រាប់អង្គុយកម្សាន្ត ហាត់ប្រាណសាធារណៈ និងសួនច្បារ ដែលបំពាក់ទៅដោយចង្កៀងអគ្គិសនី LED យ៉ាងភ្លឺច្បាស់ត្រជាក់ភ្នែកផងដែរ។

លំនៅដ្ឋាននៅក្នុង ខេស៊ី ត្រូវបានសាងសង់ឡើងជា៣ប្រភេទ រួមមានប្រភេទ Link House, Shop House និងប្រភេទ Twin Villa ដែលសុទ្ធតែសមស្របទៅនឹងការរស់នៅដែលពោរពេញទៅដោយផាសុកភាពខ្ពស់ទាំងអស់។

ប្រភេទលំនៅដ្ឋាន Link House មានទំហំ៥ X ៩,៥០ ម៉ែត្រ (Eo, E1) មានបន្ទប់គេងចំនួន២ បន្ទប់ទឹកចំនួន៣ ទីធ្លាក្នុងផ្ទះធំទូលាយ នៅសល់ទីធ្លាខាងមុខ៥ម៉ែត្រ និងខាងក្រោយផ្ទះសល់ ២ម៉ែត្រ ។ ប្រភេទលំនៅដ្ឋាន Shop House មានទំហំ៥ X ១៥ ម៉ែត្រ ក្នុងនោះរួមមានបន្ទប់គេងចំនួន៤ ទីធ្លាក្នុងផ្ទះធំទូលាយ នៅសល់ទីធ្លាខាងមុខ ៧ម៉ែត្រ និងខាងក្រោយផ្ទះសល់ ៣ម៉ែត្រ ។

ប្រភេទលំនៅដ្ឋាន Twin Valla មានទំហំ ៦ X ១២ ម៉ែត្រ មានបន្ទប់គេងចំនួន៤ បន្ទប់ទឹកចំនួន៥ ទីធ្លាក្នុងផ្ទះធំទូលាយ ជាមួយនឹងការរចនាម៉ូដយ៉ាងល្អវិចិត្រ ហើយនៅសល់ទីធ្លាខាងមុខ៥ម៉ែត្រ និងខាងក្រោយផ្ទះសល់ ២ម៉ែត្រ។

សម្រាប់ព័ត៌មានបន្ថែម លោកអ្នកអាចទំនាក់ទំនងបាន តាមរយៈទូរស័ព្ទលេខ ៖ ០៨៩ ៧៨៧ ៧២១ / ០៨៧ ៣៦ ៩៥ ៣៦៕

ជប៉ុនកំពុងចំណាយប្រាក់ ១២០ ពាន់លានដុល្លារដើម្បីស្រោចស្រង់សេដ្ឋកិច្ចរបស់ខ្លួនពីការដាំក្បាលចុះ

ដោយ ប៊ី

ជប៉ុន៖ លោកនាយករដ្ឋមន្រ្តី ស៊ីនហ្សូ អាបេ បានប្រកាសកាលពីថ្ងៃ ព្រហស្បតិ៍ថា ជប៉ុននឹងចំណាយប្រាក់ជិត ១២០ ពាន់លានដុល្លារដើម្បីជំរុញសេដ្ឋកិច្ចដែលកំពុងធ្លាក់ចុះ និងដើម្បីជួយដល់តំបន់មួយចំនួនដែលរងផលប៉ះពាល់ដោយព្យុះទីហ្វុង Hagibis។

ផែនការចំណាយថ្មីគឺសំដៅដោះស្រាយបញ្ហាប្រឈមផ្នែកសេដ្ឋកិច្ចដែលប្រឈមមុខនឹងមេដឹកនាំយូរអង្វែងរបស់ប្រទេសជប៉ុនដែលបានកសាងកេរ្តិ៍ឈ្មោះរបស់ខ្លួនលើកំណើនដ៏រឹងមាំរបស់ប្រទេសនេះ បន្ទាប់ពីការជាប់គាំងអស់រយៈពេលជាច្រើនឆ្នាំ។

ប៉ុន្តែកញ្ចប់ជំនួយ ប្រសិនបើត្រូវបានអនុម័ត វានឹងបន្តវដ្តនៃការខ្ចីប្រាក់ និងការចំណាយរបស់ជប៉ុនដើម្បីជំរុញកំណើន និងចំណាយសម្រាប់ថ្លៃសេវាសុខុមាលភាពសង្គមរបស់ប្រទេសដើម្បីពង្រីកដល់ប្រជាជនវ័យចំណាស់យ៉ាងឆាប់រហ័ស។ ប្រទេសនេះមានបន្ទុកបំណុលធំបំផុតរួចទៅហើយនៅក្នុងប្រទេសអភិវឌ្ឍន៍ដែលទាក់ទងនឹងទំហំសេដ្ឋកិច្ចរបស់ខ្លួន។

រដ្ឋបាលរបស់លោក អាបេ បានសន្យានឹងសម្រួលនិន្នាការខ្ចីប្រាក់។ កាលពីពីរខែមុនរដ្ឋាភិបាលបានតំឡើងពន្ធលើការប្រើប្រាស់របស់ប្រទេសខ្លួនដើម្បីជួយបង្កើនហិរញ្ញវត្ថុរបស់ប្រទេសនេះ ដោយសារការលក់រាយធ្លាក់ចុះ។

នៅក្នុងការប្រកាសអំពីកញ្ចប់ថវិកាដែលរំពឹងទុកជាង ១៣ ទ្រីលានយ៉េន លោក អាបេ បានប្រាប់កិច្ចប្រជុំមួយនៃគណបក្សប្រជាធិបតេយ្យសេរីរបស់លោកថា វិធានការណ៍សេដ្ឋកិច្ចគឺដើម្បី «ជៀសផុតពីហានិភ័យដែលបណ្តាលធ្លាក់ចុះ និងជួយប្រទេសនេះរក្សា ឬលើកកម្ពស់លទ្ធភាពសេដ្ឋកិច្ច បន្ទាប់ពីព្រឹតិ្តការណ៍អូឡាំពិកឆ្នាំ ២០២០ ដែលទីក្រុងតូក្យូនឹងធ្វើជាម្ចាស់ផ្ទះនារដូវក្តៅខាងមុខនេះ៕

រដ្ឋាភិបាលកំពុងសិក្សាការប្រើប្រាស់យានយន្តអគ្គិសនីនៅតំបន់អង្គរ

ដោយ វុត្ថា

ភ្នំពេញ៖ រដ្ឋាភិបាលកំពុងសិក្សាអំពីការប្រើប្រាស់យានយន្តអគ្គិសនីនៅតំបន់អង្គរដើម្បីអភិរក្សប្រាសាទអង្គរក៏ ដូចជាបរិស្ថានទូទៅនៅជុំវិញរមណីយដ្ឋានអង្គរ។

លោកទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងសាធារណៈការ និងដឹកជញ្ជូន មានប្រសាសន៍បែបនេះ នៅក្នុងវេទិកាស្តីពីចលភាពក្នុងទីប្រជុំជនដែលរៀបចំឡើងដោយកម្មវិធី អភិវឌ្ឍន៍សហប្រជាជាតិ (UNDP) កាលពីថ្ងៃទី ៥ ខែធ្នូម្សិលមិញនេះ ដើម្បីចែករំលែកគំនិត ការយល់ដឹង និងបទពិសោធន៍ ក៏ដូចជា ផ្តល់នូវដំណោះស្រាយដើម្បីប្រែក្លាយ និងវិនិយោគលើភាពចលភាពនៅក្នុងទីប្រជុំជនសម្រាប់ប្រជាពលរដ្ឋទាំងអស់។

អ្នកនាំពាក្យអាជ្ញាធរអប្សរា លោក ឡុង កុសល បានប្រាប់គេហទំព័រ propertyare.asia នៅថ្ងៃទី ៦ ខែវិច្ឆិកា ឆ្នាំ ២០១៩ នេះថា លោកមិនទាន់បានដឹងពីការសិក្សារបស់រដ្ឋាភិបាលឱ្យមាការដាក់ឱ្យដំណើរការនូវយានយន្តអគ្គិសនីនេះទេ តែលោក បានសម្តែងការស្វាគមន៍ចំពោះគម្រោងដ៏ល្អមួយនេះ ព្រោះវាបានចូលរួមកាត់បន្ថយបរិស្ថា និងការពារប្រសាទបានយូអង្វែង។

លោកថា “ជាទស្សនវិស័យ គឺយើងគាំទ្រចំពោះការប្រើប្រាស់មធ្យោបាយដែលកាត់បន្ថយផលប៉ះពាល់ទៅដល់បរិស្ថាន ; ហើយនេះ គឺជំហររបស់យើង ។ ហើយការកាត់បន្ថយផលប៉ះពាល់ប្រាង្គប្រាសាទយើងហ្នឹងគឺមានលក្ខណៈសំខាន់ ព្រោះបើមានផ្សែងចេញមកពីយានយាន្តច្រើន គឺធ្វើឱ្យប៉ះពាល់ដល់ប្រាង្គប្រាសាទ” ។

លោកបន្តថា “កាលពីន្លងមកនេះ អាជ្ញាធរអប្សរាបានរៀបចំឱ្យមានផ្លូវសម្រាប់ជិះកង់ ដើម្បីកាត់បន្ថយបរិស្ថាននៅក្នុងតំបន់រមណីយដ្ឋានអង្គរកាន់តែតិចៗទៅ” ។

បើតាមលោក ស៊ុនចាន់ថុល បន្តថា រាជរដ្ឋាភិបាលកម្ពុជាយកចិត្តទុកដាក់ជាអាទិភាពលើ ការអភិវឌ្ឍហេដ្ឋារចនាសម្ព័ន្ធ និងការដឹកជញ្ជូន ដូចជា ការពង្រីកនិងធ្វើឱ្យប្រសើរឡើងនូវគុណភាពផ្លូវថ្នល់ និងផែនការអភិវឌ្ឍផ្លូវថ្នល់ ផ្លូវល្បឿនលឿន ស្ពាន ស្ពានអាកាស និងកំពង់ ផែជាដើម ដែលរួមបញ្ចូលទាំងការកសាងគន្លងយានយន្ត គន្លងឡានក្រុង និងភ្លើងចរាចរណ៍ឆ្លាតវៃដើម្បីជា មធ្យោបាយកាត់បន្ថយការកកស្ទះចរាចរណ៍។

លោករដ្ឋមន្ត្រីថា “បច្ចុប្បន្ននេះ រដ្ឋាភិបាលកំពុងអភិវឌ្ឍ និងសាងសង់ហេដ្ឋារចនា សម្ព័ន្ធស្តង់ដានៅខេត្តព្រះសីហនុ ដើម្បីជាគំរូសម្រាប់ខេត្តផ្សេងទៀត។ លើសពីនេះទៀត រដ្ឋាភិបាលកំពុងសិក្សាអំពីការប្រើប្រាស់យានយន្តអគ្គិសនីនៅតំបន់អង្គរដើម្បីអភិរក្សប្រាសាទអង្គរក៏ ដូចជាបរិស្ថានទូទៅផងដែរ”។

លោករដ្ឋមន្ត្រីបន្ថែមថា “រដ្ឋាភិបាលក៏បាននិងកំពុងធ្វើការសិក្សាលើផ្លូវក្រោមដី (subways) ផ្លូវដែក (monorails) និងការអភិវឌ្ឍ ហេដ្ឋារចនាសម្ព័ន្ធផ្សេងទៀតក្នុងគោលបំណងលុបបំបាត់ការកកស្ទះចរាចរណ៍ នៅក្នុងតំបន់ប្រជុំរបស់យើង។ ជាមួយនឹងការអភិវឌ្ឍន៍ហេដ្ឋារចនាសម្ព័ន្ធ ការដឹកជញ្ជូនសាធារណៈនិងឯកជនកំពុងត្រូវបានជំរុញ ឱ្យមានការរីកចម្រើន និងធ្វើប្រតិបត្តិការប្រកបដោយសុវត្ថិភាព និងអាចទទួលសេវាបានទាន់ពេលវេលា”៕

ក្រុមហ៊ុនជីព ម៉ុង បោះទុន ៤លានដុល្លារបង្កើតរោងចក្រកែច្នៃ និងគ្រប់គ្រងសំណល់លើកដំបូងនៅកម្ពុជា

ដោយ ៖ រ៉ាណេត

កំពត ៖ គម្រោង ជីប ម៉ុង អេកូសាយខល (Ecocycle) កែច្នៃសំណល់ ដែលជាដំណោះស្រាយនៃការគ្រប់គ្រងសំណល់ឧស្សាហកម្មប្រកបដោយនិរន្តរភាពដំបូងគេនៅកម្ពុជាត្រូវបានសម្ពោធដាក់ឱ្យដំណើរការជាផ្លូវការហើយ ជាមួយនឹងការចំណាយទុនវិនិយោគចំនួន៤លានដុល្លារសហរដ្ឋអាមេរិក។

គម្រោង ជីប ម៉ុង អេកូសាយខល (Ecocycle) ដែលជាដំណោះស្រាយនៃការគ្រប់គ្រងសំណល់ឧស្សាហកម្មប្រកបដោយនិរន្តរភាពដំបូងគេនៅប្រទេសកម្ពុជារបស់ ក្រុមហ៊ុនជីបម៉ុង អ៊ិនស៊ី ស៊ីមេន ដែលមានទីតាំងនៅស្រុកបន្ទាយមាស ខេត្តកំពត ត្រូវបានសម្ពោធដាក់ឱ្យដំណើរការជាផ្លូវការ នៅព្រឹកថ្ងៃទី៥ ខែធ្នូ ឆ្នាំ ២០១៩ នេះក្រោមអធិបតីភាពឯកឧត្តម សាយ សំអាល់ រដ្ឋមន្រ្តី ក្រសួង បរិស្ថាន ។

លោកឧកញ៉ា លាង ឃុន ម្ចាស់ភាគហ៊ុនធំក្រុមហ៊ុនជីបម៉ុង អ៊ិនស៊ី ស៊ីមេន ខបភើរេសិន បានមានប្រសាសន៍ថា “ក្នុងដំណាក់កាលចាប់ផ្តើម គម្រោងមានបុគ្គលិកបម្រើការងារផ្ទាល់ជាង ១០នាក់ និងអ្នកម៉ៅការបន្តជាង៥០នាក់ ហើយបន្តបង្កើតឱកាសការងារបន្ថែមទៀតនៅពេលខាងមុខ”។

លោកបន្តថា “បច្ចុប្បន្នគម្រោងនេះបានធ្វើកិច្ចការផ្ទាល់ជាមួយតំបន់សេដ្ឋកិច្ចពិសេសភ្នំពេញ និងខេត្តព្រះសីហនុ។ ឡ អេកូសាយខល មានសមត្ថភាពដុតកំទេចសំណល់ឧស្សាហកម្មក្នុងបរិមាណ១០តោនក្នុងមួយម៉ោង ឬ ២៤០តោនក្នុង១ថ្ងៃ ឬក៏ ជាង ៧០០០ តោនក្នុង១ខែ”។

រដ្ឋមន្ត្រីក្រសួងបរិស្ថាន លោក សាយ សំអាល់ បានសម្តែងនូវការកោតសរសើរនិងវាយតម្លៃ ខ្ពស់ចំពោះក្រុមហ៊ុន ជីប ម៉ុង ដែលបាននាំចូលនូវបច្ចេកវិទ្យាទំនើប ឆ្លើយតបនឹងបទដ្ឋានបរិស្ថាន។ ការវិនិយោគរបស់ក្រុមហ៊ុនជីបម៉ុងលើវិស័យថ្មីៗដូចជាគម្រោងធ្វើការកែច្នៃសំណល់នេះ ជាការចូលរួមលើកកម្ពស់បរិស្ថាន។

ជាមួយគ្នានេះ លោកក៏បានលើកទឹកចិត្តឱ្យមានការវិនិយោគបន្ថែមទៀតលើបញ្ហាសំរាម និងលើកទឹកចិត្តក្រុមហ៊ុនដទៃទៀតអនុវត្តគោល ការណ៍បរិស្ថានដូចដែលក្រុមហ៊ុន ជីប ម៉ុង បាននិងកំពុងប្រតិបត្តិដែលប្រែក្លាយសំណល់ទៅជាផលប្រយោជន៍សេដ្ឋកិច្ច។

ជីប ម៉ុង អេកូសាយខល ជាគម្រោងថ្មីមួយថិតនៅក្រោមដំបូល របស់ ក្រុមហ៊ុនជីបម៉ុង អ៊ិនស៊ី ស៊ីមេន ត្រូវបានប្រសូតចេញពីការវិនិយោគទុនរួមគ្នាក្នុងទឹកប្រាក់ ២៦២ លានដុល្លារអាមេរិក ក្នុងនោះ ៦០ ភាគរយ មកពីក្រុមហ៊ុន ជីប ម៉ុង ដែលជាក្រុមហ៊ុនក្នុងស្រុកដ៏ធំមួយ និងមានបទពិសោធន៍ជិត៤០ឆ្នាំ ក្នុងវិស័យសំណង់ និង វិស័យចែកចាយលើទីផ្សារ និង ៤០ភាគរយ ទៀតមកពីក្រុមហ៊ុនស្យ៉ាម ស៊ីធី ស៊ីមេន (SCCC) នៃព្រះរាជាណាចក្រថៃ ដែលជាក្រុមហ៊ុនដ៏ ធំសម្បើម មានបទពិសោធន៍ជាង៥០ឆ្នាំ ក្នុងការផលិតស៊ីម៉ងត៍។

គម្រោង ជីប ម៉ុង អេកូសាយខល នេះអាចកែច្នៃកាកសំណល់ដែលមានគ្រោះថ្នាក់ និង មិនមានគ្រោះថ្នាក់ ដោយប្រើបច្ចេកវិទ្យាថ្មីមួយដែលគេហៅថា ខូ-ប្រូសេសស៊ីង (co-processing) ដែលជាពាក្យបច្ចេកទេសប្រើសម្រាប់ការកំចាត់កាកសំណល់ ឧស្សាហកម្ម តាមរយៈការដុតដោយឡស៊ីម៉ងត៍ ស្របពេលដែលកំពុងដំណើរការផលិតស៊ីម៉ងត៍ ដោយមិនប៉ះពាល់ដល់ប្រសិទ្ធភាពណាមួយឡើយ។

បច្ចេកវិទ្យា “ខូ-ប្រូសេសស៊ីង” ត្រូវបានប្រើប្រាស់ដោយជោគជ័យនៅសហរដ្ឋអាមេរិក សហភាពអឺរ៉ុប និង ជប៉ុន អស់រយៈពេលជាង40ឆ្នាំ។ វាត្រូវបានទទួលស្គាល់ដោយអង្គការអន្តរជាតិជាច្រើន រួមទាំងអង្គការសុខភាពពិភពលោក និង អង្គការ (ជីធីហ្សិត) GTZ ក៏ដូចជាអនុសញ្ញា បាសែល (Basel) និង ស្តុកខុម (Stockholm)។

ធនាគារកូរ៉េកំពុងពង្រីកការប្រកួតប្រជែងក្នុងទីផ្សារហិរញ្ញវត្ថុនៅកម្ពុជា

ដោយ ប៊ី

ភ្នំពេញ៖ ធនាគារ Shinhan Bank កំពុងចូលទីផ្សារទូទាត់សាមញ្ញនៅកម្ពុជា ខណៈធនាគារបានប្រកាសថា ខ្លួននឹងដាក់ឱ្យដំណើរការសេវាកម្មកាបូបអេឡិចត្រូនិច រួមគ្នាជាមួយក្រុមហ៊ុន MVL។

ធនាគារ Shinhan Bank បានផ្តល់នូវដំណោះស្រាយកាបូបអេឡិចត្រូនិកទៅដល់ក្រុមហ៊ុន MVL ដែលនឹងត្រូវបានប្រើជាមធ្យោបាយទូទាត់ដែលពេញចិត្តសម្រាប់ TADA, កម្មវិធីហៅរថយន្តរបស់ក្រុមហ៊ុន MVL។ នេះគឺជាគម្រោងដំបូងរបស់ក្រុមហ៊ុនទាំងពីរចាប់តាំងពីពួកគេបានចុះហត្ថលេខាលើកិច្ចព្រមព្រៀងសហប្រតិបត្តិការកាលពីខែ មិថុនា ឆ្នាំនេះ។

ធនាគារបានឱ្យដឹងថា ប្រព័ន្ធទូទាត់ប្រាក់របស់ក្រុមហ៊ុនផ្សេងទៀតគឺមិនស្រួល ខណៈដែលអតិថិជនត្រូវការដំណើរការកម្មវិធីដាច់ដោយឡែកដើម្បីទូទាត់វិក័យប័ត្រ បន្ទាប់ពីបានទៅដល់គោលដៅ។

ក្រុមហ៊ុនទាំងពីរនឹងអនុវត្តទីផ្សារទំនើបតាមរយៈការវិភាគទិន្នន័យដ៏ធំមួយនៃយានយន្តប្រតិបត្តិការ ការបើកបរ និងព័ត៌មានទីតាំងរបស់អ្នកបើកបរ និងអ្នកដំណើរ។ ក្រុមហ៊ុនក៏គ្រោងនឹងចាប់ផ្តើមផ្តល់ប្រាក់កម្ចីរថយន្ត និងផលិតផលឥណទានខ្នាតតូចផងដែរ។

ធនាគារ Shinhan Bank ក៏មានគម្រោងភ្ជាប់កាបូបអេឡិចត្រូនិចដែលទើបនឹងបើកថ្មីទៅនឹងសេវាកម្មធនាគារលក់រាយរបស់ខ្លួននៅកម្ពុជា ដែលជាក្រុមហ៊ុនបុត្រសម្ព័ន្ធរបស់ខ្លួននៅកម្ពុជាតាមរយៈការពង្រីកការប្រើប្រាស់កាបូបអេឡិចត្រូនិក។ធនាគារ Shinhan Bank បានចូលមកប្រទេសកម្ពុជាក្នុងឆ្នាំ ២០០៧ មុនធនាគារក្នុងស្រុកផ្សេងទៀត។

រួមគ្នាជាមួយធនាគារ Shinhan Bank នៅវៀតណាម និងធនាគារ Shinhan Bank នៅឥណ្ឌូណេស៊ី ធនាគារ Shinhan Bank នោកម្ពុជាបង្កើតជាសសរស្តម្ភដ៏សំខាន់នៃអាជីវកម្មរបស់ធនាគារ Shinhan Bank នៅអាស៊ីអាគ្នេយ៍៕

រោងចក្រផលិតក្រដាស់វេចខ្ចប់ថ្មីមួយទៀត នឹងបង្ហាញខ្លួននៅក្នុងស្រុកសង្កែ ខេត្តបាត់ដំបង

ដោយ ៖ រ៉ាណេត

បាត់ដំបង ៖ រដ្ឋាភិបាលបានសម្រេចអនុម័តឱ្យមានការវិនិយោគលើវិស័យរោងចក្រផលិតក្រដាស់វេចខ្ចប់គ្រប់ប្រភេទថ្មីមួយទៀត ដែលមានទីតាំងនៅក្នុងស្រុកសង្កែ ខេត្តបាត់ដំបង ដែលតាមរយៈការអនុម័តនេះ នឹងចូលរួមលើកកម្ពស់សេដ្ឋកិច្ចក្នុងខេត្ត ក៏ដូចជាផ្តល់ឱកាសការងារជាច្រើនកន្លែងសម្រាប់ប្រជាពលរដ្ឋផងដែរ។

បន្ទាប់ពីបានទទួលសំណើស្នើសុំវិនិយោគបង្កើតរោងចក្រផលិតក្រដាស់វេចខ្ចប់គ្រប់ប្រភេទរបស់ក្រុមហ៊ុន ដុងលាង ផេភើរ មីល អ៊ិនដាសស្ទ្រី ថេកណូឡជី (ខេម បូ ឌា) នៅលើផ្ទៃដីទំហំជាង៤១ហិកតា ស្ថិតនៅក្នុងភូមិស្រះកែវ ឃុំកំពង់ស្រះ ស្រុកសង្កែ ខេត្តបាត់ដំបង កាលពីពេលកន្លងទៅនោះ ក្រោយកិច្ចប្រជុំវាយតម្លៃពីផលប៉ះពាល់របស់អន្តរអន្តរក្រសួង និងក្រុមប្រឹក្សាអភិវឌ្ឍកម្ពុជា កាលពីថ្ងៃទី៥ ខែធ្នូ ឆ្នាំ២០១៩ ម្សិលមិញនេះ រដ្ឋាភិបាលបានសម្រេចអនុម័ត និងគាំទ្រលើគម្រោងវិនិយោគមួយនេះទាំងស្រុង។

អភិបាលនៃគណៈអភិបាលខេត្តបាត់ដំបង លោក ងួន រតនៈ បានបង្ហាញពីក្ដីសាទរ និងគាំទ្រទៅលើគម្រោងថ្មីនៃការវិនិយោគក្នុងវិស័យរោងចក្រនេះ ដោយហេតុថា នៅទូទាំងខេត្តបាត់ដំបង់ វិស័យមួយនេះហាក់នៅមានកម្រិតតិចតួចនៅឡើយបើប្រៀបធៀបជាមួយបណ្តាខេត្តដទៃទៀត។

លោក ងួន រតនៈ បានមានប្រសាសន៍ប្រាប់តាមទូរស័ព្ទកាលពីព្រឹកថ្ងៃទី៦ ខែធ្នូ ឆ្នាំ២០១៩នេះថា “ថ្វីដ្បិតខេត្តបាត់ដំបង បានខិតខំធ្វើការអភិវឌ្ឍលើគ្រប់វិស័យ ជាពិសេសវិស័យកសិកម្ម និងពាណិជ្ជកម្ម ដែលជំរុញឱ្យកម្រិត GDP បានកើន ឡើងដល់ជាង ១៥៥០ដុល្លារក្នុងម្នាក់ ប៉ុន្តែសម្រាប់វិស័យរោងចក្រគឺនៅមានកម្រិតនៅឡើយ ដោយបច្ចុប្បន្ននេះយើងមានតែរោងចក្រផលិតឱសថ រោងចក្រផលិតស៊ីម៉ង់តិ៍ រោងចក្រម្សៅមី រួមជាមួយនឹងប្រភេទសិប្បកម្មខ្នាតតូច និងលក្ខណៈគ្រួសារតែប៉ុណ្ណោះ”។

ជាមួយនឹងវត្តមានថ្មីនៃរោងចក្រផលិតក្រដាស់វេចខ្ចប់ខាងលើនេះ លោក ងួន រតនៈ ក៏បានលើកទឹកចិត្តដល់បណ្តាវិនិយោគិននានា ឱ្យបន្ថែមការវិនិយោគនៅក្នុងវិស័យរោងចក្រនៅក្នុងខេត្តបាត់ដំបងកាន់តែច្រើនបន្ថែមទៀត ស្របពេលដែលខេត្តបាត់ដំបងជាតំបន់ដែលមានសក្ដានុពលលើកត្តាភូមិសាស្ត្រ និងមានហេដ្ឋារចនាសម្ព័ន្ធអនុគ្រោះដល់ការដឹកជញ្ជូនបានយ៉ាងប្រសើរ។

គម្រោងបង្កើតរោងចក្រផលិតក្រដាសវេចខ្ចប់គ្រប់ប្រភេទ នៅលើផ្ទៃដីទំហំ ៤១.៦១៦ម៉ែត្រការ៉េ ដែលមានទីតាំងនៅក្នុងភូមិសាស្ត្រខាងលើនេះត្រូវបានសិក្សា និងរៀបចំរបាយការណ៍វាយតម្លៃហេតុប៉ះពាល់បរិស្ថានដោយក្រុមហ៊ុនទីប្រឹក្សា អេស ប៊ី ខេ ស្រាវជ្រាវ និងអភិវឌ្ឍន៍ ៕

អ្នកវិនិយោគចិនគ្រោងវិនិយោគបង្កើតតំបន់សេដ្ឋកិច្ចពិសេស លើផ្ទៃដី ២៨០ហិកតានៅខេត្តព្រះសីហនុ

ដោយ វុត្ថា

ខេត្តព្រះសីហនុ៖ ក្រុងស៊ិនយ៉ាងនៃប្រទេសចិនគ្រោងនាំសហគ្រាសចិន មកធ្វើការវិនិយោគនៅខេត្តព្រះសីហនុ ដោយបង្កើតតំបន់សេដ្ឋកិច្ចពិសេស លើផ្ទៃដី ២៨០ហិកតា ក្នុងនោះមានរោងចក្រដូចជា ការតំឡើងម៉ាស៊ីនបរិក្ខាផ្សេងៗជួយជម្រុញគម្រោងអភិវឌ្ឍនៅខេត្តព្រះសីហនុ កាន់តែលឿនរវាងក្រុង ខេត្តបងប្អូននាពេលខាងមុខ ។

លោក HAN DONGTAI ប្រធានគណ:កម្មការប្រឹក្សានយោបាយក្រុងស៊ិនយ៉ាង សាធារណរដ្ឋប្រជាមានិតចិន នៅក្នុងជំនួបពិភាក្សាការងារជាមួយលោក លៀម សុដា អភិបាលរងខេត្តព្រះសីហនុ កាលពីថ្ងៃទី ៥ ខែធ្នូ ម្សិលមិញនេះថាក្រុងស៊ិនយ៉ាង ជាទីក្រុងបច្ចេកវិទ្យា ផលិតយន្តហោះចម្បាំង និងជាទីក្រុងបុរាណនៃប្រទេសចិន បច្ចុប្បន្នទទួលបានការវិនិយោគមានសន្ទុះរីកចម្រើន ។

លោកបានថបានថ្លែងអំណរគុណលោកអភិបាលរងខេត្តព្រះសីហនុ អនុញ្ញាតិឱ្យគណ:ប្រតិភូចូលជួបពិភាក្សាការងារ និងបានឈ្វេងយល់ពីសក្តានុពល នៃការវិនិយោគនៅខេត្តព្រះសីហនុ ខណៈខេត្តជាប់មាត់សមុទ្រមួយនេះ មានសន្ទុះរីកចំរើនយ៉ាងខ្លាំងលើវិស័យអទិភាពផ្សេងៗ។

លោក លៀម សុដា អភិបាលរងខេត្តព្រះសីហនុ បានឱ្យដឹងថា នាពេលបច្ចុប្បន្ន មានអ្នកវិនិយោគ និងទេសចរចិន មកខេត្តព្រះសីហនុ លំដាប់លេខ១ ខេត្តព្រះសីហនុ មានវិស័យជាច្រើនក្នុងការទាក់ទាញវិនិយោគដូចជា កំពង់ផែអន្តរជាតិទឹកជ្រៅ អាកាសយានដ្ឋានអន្តរជាតិ កំពុងត្រូវបានពង្រីក ឆ្លើយតបទៅនឹងតម្រូវការរីកចម្រើនសេដ្ឋកិច្ចនាពេលបច្ចុប្បន្ន ។

លោកបន្តថា ខេត្តមានតំបន់សេដ្ឋកិច្ចពិសេសចំនួន៩ ក្នុងនោះ ៥កំពុងដំណើរការ និងចំនួន ៤ទៀត ត្រៀមបើកឱ្យដំណើរការនាពេលខាងមុខ មានរោងចក្រ ២១១ និងសិប្បកម្មជាង ១.០០០កន្លែង ស្រូបយកកម្លាំងពល កម្មជាង ៩ម៉ឺននាក់ ក្នុងនោះជនបរទេសជិត ៣ម៉ឺននាក់ ។ វិស័យទេសចរទទួលបានភ្ញៀវ ២លាននាក់ ។

លោកបន្ថែមថា ខេត្តមានកាស៊ីណូ ៧១កន្លែង ដោយឡែកវិស័យសំណង់ មានការរីកលូតលាស់យ៉ាងឆាប់រហ័ស ចាប់ពីឆ្នាំ២០១៧ដល់ឆ្នាំ២០១៩នេះ មាន ៨១៦គម្រោង ទន្ទឹមនឹងការអភិវឌ្ឍរីកចម្រើន ក៍ជួបនូវបញ្ហាប្រឈមមួយចំនួនដូចជា ហេដ្ឋារចនាសម្ពន្ធ័ផ្លូវថ្នល់ លូ អូរ ប្រឡាយ ទឹកស្អាត អគ្គិសនី កាកសំណល់ បរិស្ថាន និងចរាចរណ៍ជាដើម ។

លោកអភិបាលរងខេត្តបានបញ្ជាក់ថា ក្នុងនាមរដ្ឋបាលខេត្ត សូមគាំទ្រគោលនយោបាយផ្លូវ១ ខ្សែក្រវ៉ាត់១ និងផ្លូវសូត្រសមុទ្រ របស់ឯកឧត្តម ស៊ី ជីនពីង ប្រធានាធិបតីចិន ដើម្បីពង្រឹងពង្រីកចំណងមិត្តភាព ការទូតរវាងកម្ពុជា និងរដ្ឋាភិបាលចិន ពិសេសខេត្តព្រះសីហនុ ។

លោកសង្ឃឹមថា គណ:ប្រតិភូ នឹងទទួលបាននូវពត៌មានថ្មី នៃការវិវឌ្ឍរបស់ខេត្ត និងនាំយកចំណុចល្អៗទៅបន្តផ្សព្វផ្សាយដល់ប្រជាជនពលរដ្ឋចិន ក៍ដូចជាអ្នកវិនិយោគចិន មកកាន់នៅខេត្តព្រះសីហនុបន្តទៀត៕

ក្រុមហ៊ុន Big C គ្រោងពង្រីកបើកផ្សារទំនើបជាច្រើនកន្លែងនៅភ្នំពេញនិងខេត្តសៀមរាប

ដោយ ម៉ាណេត

ភ្នំពេញៈ ក្រុមហ៊ុន Big C Super Center គ្រោងនឹងបើកផ្សារទំនើប Big C ចំនួន៥ ឬ ៦ នៅភ្នំពេញ និងសៀមរាបក្នុងរយៈពេល ២ឆ្នាំខាងមុខ ខណៈខ្លួននឹងចំណាយថវិកាចំនួន ៦,៥ពាន់លានបាតនៅឆ្នាំក្រោយ សម្រាប់ការពង្រីកទាំងក្នុងស្រុក និងក្រៅស្រុក។

លោក Gary Hardy ប្រធានផ្នែកប្រតិបត្តិការរបស់ក្រុមហ៊ុន សម្រាប់ប្រតិបត្តិការអន្តរជាតិបានបានថ្លែង ក្នុងសេចក្តីរាយការណ៍ក្នុងកាសែតបាងកកប៉ុស្តិ៍ថា កាលពីម្សិល មិញថា ក្រុមហ៊ុនបានបើកការសម្ពោធផ្សារទំនើប Big C ប៉ោយប៉ែត ហើយក្រុមហ៊ុនរំពឹងថានឹងពង្រីកអាជីវកម្មជាច្រើននៅកម្ពុជា និងបង្កើតការងារចំនួន ១,២០០ កន្លែងក្នុងរយៈពេល ៥ឆ្នាំ ខាងមុខ។

លោកបានបន្តថា “ក្រុមហ៊ុនគ្រោងនឹងបើកផ្សារទំនើប Big C ៥ ឬ ៦កន្លែងនៅភ្នំពេញ និងសៀមរាបក្នុងរយៈ ពេល២ឆ្នាំ ខាងមុខ”។

លោក Aswin បានមានប្រសាសន៍ថា “ចាប់ពីឆ្នាំក្រោយយើងនឹងយកចិត្តទុកដាក់បន្ថែមទៀត ដើម្បីពង្រីកអាជីវកម្មលក់រាយរបស់យើងនៅក្រៅប្រទេស ដោយផ្តោតលើកម្ពុជា ឡាវ មីយ៉ាន់ម៉ា និងវៀតណាមដែលមានសេដ្ឋកិច្ចរឹងមាំ”។

ផលិតផលក្នុងស្រុកសរុបរបស់កម្ពុជា មានការកើនឡើងយ៉ាងខ្លាំង៧ភាគរយ ក្នុងមួយឆ្នាំជាមធ្យមក្នុងរយៈពេល៥ឆ្នាំកន្លងមក ហើយអំណាចនៃការទិញក្នុងចំណោមប្រជាជន ក្នុងស្រុកកំពុងតែកើនឡើង។ ផ្សារទំនើប Big C ប៉ោយប៉ែត គឺជាផ្សារដំបូងគេរបស់យើងនៅកម្ពុជា។

លោកបន្តថា ក្រុមហ៊ុនបានវិនិយោគ៣០០លានបាត ដើម្បីសាងសង់ Big C Poipet លើផ្ទៃដីទំហំ២០រ៉ៃ។ផ្សារទំនើបមានទំហំ៨,០០០ម៉ែត្រការ៉េ ដែលមានផ្ទៃដីលក់ ៣,០០០ ម៉ែត្រការ៉េ និងមានទំហំជួល៥,០០០ ម៉ែត្រការ៉េ។

រាល់ទីធ្លាទាំងអស់ត្រូវបានជួលដោយសហគ្រិនថៃ និងក្នុងស្រុក មកពីវិស័យជាច្រើន រួមមាន រោងភាពយន្ត Major Cineplex ដែលជាប្រតិបត្តិកររោងកុនធំបំផុតរបស់ថៃ។

លោក Hardy រំពឹងថានឹងលក់បាន២៥០លានបាត ពីសាខា Big C Poipet ក្នុងឆ្នាំដំបូងនៃប្រតិបត្តិការ ហើយរំពឹងថានឹងមានកំណើនប្រចាំឆ្នាំ ជាមធ្យម៥ និង៦ភាគរយនាពេលអនាគត។

នៅឆ្នាំ ២០១៩ Big C ប្រតិបត្តិការផ្សារទំនើបធំៗចំនួន១៥៣ផ្សារ ផ្សារ Big C ខ្នាតមធ្យម៦៣ កន្លែង និងហាងBig Mini C ចំនួន១,០១៨ ដែលមានផ្ទៃដី៩០០,០០០ ម៉ែត្រការ៉េ។ ការលក់របស់ Big C មានចំនួនសរុប១៤០ពាន់លានបាត កាលពីឆ្នាំ២០១៨ ហើយរំពឹងថានឹងកើនឡើង៥ភាគរយនៅឆ្នាំនេះ៕

អានអត្ថបទ៖ ផ្សារទំនើបធំៗចំនួន៣ មកពីប្រទេសថៃ នឹងបង្ហាញខ្លួននៅក្រុងប៉ោយប៉ែត

តើព្រលានយន្តហោះថ្មីចំនួន៣ នឹងជួយសេដ្ឋកិច្ចកម្ពុជាដូចម្តេច?

ដោយគង់ សូរិយា

ភ្នំពេញ៖ ប្រទេសកម្ពុជានឹងមានព្រលានយន្តហោះអន្តរជាតិចំនួន៣ បន្ថែមទៀត នាពេលអនាគត ដើម្បីឆ្លើយតបទំនឹងកំណើនភ្ញៀវទេសចរណ៍ជាតិ និងអន្តរជាតិ ព្រមទាំងសមត្ថភាពយន្តហោះចុះចតកាន់តែធំជាងមុនច្រើនជាងមុន។

ព្រលានយន្តហោះទាំង៣នោះរួមមាន ទី១ ព្រលានយន្តហោះលំដាប់អន្តរជាតិ4F ដែលវិនិយោគដោយក្រុមហ៊ុន Union Development Group ស្ថិតនៅខេត្តកោះកុងដែលបាននិងកំពុងសាងសង់ ទី២ នៅខេត្តសៀមរាប ដែលសម្តេចតជោ គ្រោងនឹងញ្ជើញទៅបើករដ្ឋាននាពេលខាងមុខដ៏ខ្លី។ ព្រលានយន្តហោះនេះ វិនិយោគទឹកប្រាក់ប្រមាណ ៩០០លានដុល្លារអាមេរិក ស្ថិតក្នុងសូទ្រនិគម ខេត្តសៀមរាប និងទី៣ ព្រលានយន្តហោះអន្តរជាតិភ្នំពេញថ្មី ដែលវិនិយោគដោយក្រុមហ៊ុនOCIC លើផ្ទៃដី ២៦០០ហិកតា ក្នុងតម្លៃ ១៥០០លានដុល្លារអាមេរិក។

ព្រលានយន្តហោះនេះ នឹងសាងសង់នៅចន្លោះព្រំប្រទល់ខេត្តកណ្តាល និងតាកែវ ដែលអជ្ញាធរកំពុងតែដុតជើងដុតដៃក្នុងការរៀបចំហេដ្ឋារចនាសម្ព័ន្ធ។

លោកជា អូន រដ្ឋលេខាធិការប្រចាំការ និងជាអ្នកនាំពាក្យអាកាសចរណ៍ស៊ីវិលបានឱ្យដឹងកាលពីពេលថ្មីៗនេះថា ការសាងសង់ព្រលានយន្តហោះអន្តជាតិបន្ថែមនេះ ដោយសារបច្ចុប្បន្ននេះ ព្រលានយន្តហោះអន្តរជាតិភ្នំពេញ អាចឱ្យយន្តហោះដែលប្រើរយៈពេល ៦ម៉ោងចុះក្រោមចុះចតបាន ពោលគឺយន្តហោះក្នុងតំបន់ ប៉ុន្ដែមិនអាចឱ្យយន្តហោះផ្លូវឆ្ងាយមកពីទ្វីប ផ្សេងៗចុះចតកើតនោះទេ។

លោកបានបន្ដថា ព្រលានអន្តរជាតិថ្មីពីរកន្លែងទៀត នៅចន្លោះខេត្តកណ្តាល និងខេត្តតាកែវ និងមួយកន្លែងទៀតនៅ ខេត្តសៀមរាបអាចឱ្យហោះយន្តហោះឆ្លងទ្វីបអាចចុះចតបាន។ ដូច្នេះរាល់យន្តហោះ ដែលហោះឆ្លងទ្វីបក្នុងរយៈពេល១២ ទៅ ១៦ម៉ោង អាចហោះត្រង់មកចុះចតនៅព្រលានយន្ដហោះអន្តរជាតិថ្មី នៅភ្នំពេញ និងព្រលានយន្ដហោះអន្តរជាតិថ្មីនៅសៀមរាបបាន។

លោកបញ្ជាក់ថា តែទោះបីយ៉ាងណាសព្វថ្ងៃក្រុមហ៊ុនវិនិយោគកំពុង សិក្សាយ៉ាងយកចិត្តទុកដាក់បំផុត មុននឹងចុះកិច្ចព្រមព្រៀងបោះទុនវិនិយោគជាផ្លូវការក្នុងការ សាងសង់ព្រលានយន្ដហោះក្នុងស្រុក។ ជាមួយគ្នានេះ នៅពេលមានការកសាងសង់ព្រលានយន្ដហោះក្នុងស្រុកបានកាន់តែច្រើន នឹងធ្វើឱ្យធុរជនដែលមានការងារបន្ទាន់ ងាយស្រួលធ្វើដំណើរបានលឿនទៅកាន់ខេត្តឆ្ងាយៗ និងមានសុវត្ថិភាពជាងការធ្វើដំណើរតាមផ្លូវគោក។

រដ្ឋាភិបាលបានព្យាករណ៍ថា កម្ពុជាអាចទទួលបានអ្នកដំណើរឆ្លងកាត់តាមផ្លូវអាកាសចំនួន៣០លាននាក់នៅឆ្នាំ២០៣០ខាងមុខនេះ៕