បុរី ប៉េង ហួត បញ្ចេញគម្រោងអភិវឌ្ឍថ្មីដ៏ធំសម្បើមអស្ចារ្យមួយទៀតហើយ!

ដោយ វុត្ថា

ភ្នំពេញ៖ ក្រោយពីទទួលបានជោគជ័យ និងគាំទ្រពីសំណាក់អតិថិជន ទៅលើការអភិវឌ្ឍគម្រោងថ្មី ៥ គម្រោងព្រមគ្នា កាលពីដើមឆ្នាំ២០១៩ កន្លងទៅថ្មីៗនេះ។

នាពីព្រឹកម្សិលមិញថ្ងៃសុក្រ ទី៦ ខែធ្នូ ឆ្នាំ២០១៩ បុរី ប៉េង ហួត បានរៀបចំពិធីបញ្ចុះបឋមសិលា បើកការដ្ឋានសាងសង់ គម្រោងដ៏ធំសម្បើមអស្ចារ្យថ្មីមួយទៀត ដែលមានឈ្មោះថា ហ្គ្រេន ស្តាផ្លាទីនីម ដំណាក់កាលទី២ នាតំបន់បឹងស្នោ នាចុងឆ្នាំ២០១៩នេះ ដើម្បីបន្ថែមជម្រើសដល់អតិថិជន ព្រមទាំងស្វាគមន៍ឆ្នាំ២០២០ ខាងមុខនេះ ។

អតិថិជននឹងទទួលបាន ការរស់នៅដ៏ល្អឥតខ្ចោះ ប្រកបដោយផាសុកភាព ពីគម្រោងថ្មីដ៏ធំសម្បើមនេះ ដែលបានរួមបញ្ចូលនូវបរិយាកាសធម្មជាតិ ប្រវត្តិសាស្ត្រ និង វប្បធម៏ខ្មែរ ផងដែរ។

គម្រោងហ្គ្រេន ស្តាផ្លាទីនីម ដំណាក់កាលទី២ នេះ ជាគម្រោងអភិវឌ្ឍថ្មីដ៏ធំអស្ចារ្យថ្មីមួយបន្ថែមពីលើគម្រោងធំ ដែលមានស្រាប់ ស្ថិតក្នុងតំបន់បឹងស្នោ មានចំងាយត្រឹមតែ៥ នាទីប៉ុណ្ណោះ ពីស្ពានព្រះមុនីវង្ស (ច្បារអំពៅ) ។

អ្វីដែលកាន់តែពិសេសជាងនេះទៅទៀត នាថ្ងៃទី១២ ខែធ្នូ ឆ្នាំ២០១៩ ខាងមុខនេះ គម្រោងដ៏ធំសម្បើម ហ្គ្រេន ស្តាផ្លាទីនីម ដំណាក់កាលទី២ នឹងបើកសម្ពោធជាផ្លូវការ ជាមួយនឹងការផ្តល់ជូន ដែលលោកអ្នកនឹកស្មានមិនដល់ថែមទៀតផង។

ប្រសិនបើអតិថិជនចង់ដឹងអំពីគម្រោងដ៏ធំថ្មីមួយនេះ អស្ចារ្យឥតខ្ចោះកម្រិតណានោះ សូមអញ្ជើញមកការិយាល័យលក់ ដែលនៅជិតលោកអ្នកបំផុត ឬ សូមទាក់ទងទូរសព្ទលេខ ០១៦ / ០១៧/ ០៩៨ ៥៩ ៦៧៨៩ ដើម្បីទទួលព័តមានអោយកាន់តែលម្អិត ចាប់ពីថ្ងៃនេះតទៅ រៀងរាល់ម៉ោងធ្វើការ៕

ក្រុមហ៊ុនគ្រឿងសង្ហារឹមដ៏ធំមួយមកពីប្រទេសបារាំងឈានជើងចូលទីផ្សារកម្ពុជា

ដោយ វុត្ថា

ភ្នំពេញៈ ក្រុមហ៊ុន CONFORAMA ដែលជាក្រុមហ៊ុនលំដាប់លេខ១ផ្នែកផលិតនិងផ្គត់ផ្គង់គ្រឿងសង្ហាររឹមមកពីប្រទេសបារាំង បានឈានជើងចូលទីផ្សារកម្ពុជា ដោយសារការរីកចម្រើននៃវិស័យសំណង់ និងអចលនទ្រព្យនៅកម្ពុជា។

លោកស្រីសុង ធីតា ប្រធានក្រុមហ៊ុន LINDA GOLD CRUCIBLE ថ្លែងនៅក្នុងពិធីចុះហត្ថលេខាលើអនុស្សាហរណៈយោគយល់គ្នា ក្នុងភាពជាដៃគូពាណិជ្ជកម្មជាមួយក្រុមហ៊ុន LINDA GOLD CRUCIBLE កាលពីពេលថ្មីៗនេះថា នេះពិតមានមោទនភាពខ្លាំងណាស់ ក្នុងការចាប់ដៃគូពាណិជ្ជកម្មផ្តាច់មុខ ជាមួយក្រុមហ៊ុន CONFORAMA ពីព្រោះគឺជាក្រុមហ៊ុនយក្សមួយ ដែលជាប់ចំណាត់ថ្នាក់លេខ១នៅប្រទេសបារាំង និងចំណាត់ថ្នាក់លេខ២នៅអឺរ៉ុប។

លោកស្រីបន្តថា “នេះមិនមែនជាការចៃដន្យទេ ដែលក្រុមហ៊ុនយក្សមួយនេះមកកម្ពុជា។ នេះជាផ្លែផ្កានៃការខំប្រឹងប្រែងអស់រយៈពេលជាង២ឆ្នាំ ដែលយើងបានទំនាក់ទំនងផ្ទាល់ជាមួយថ្នាក់ដឹកនាំ CONFORAMA នៅទីក្រុងប៉ារីស ដោយបានធ្វើការសិក្សាទីផ្សារយ៉ាងល្អិតល្អន់ អស់រយៈពេលរាប់ខែនៅកម្ពុជា ដោយមានអ្នកជំនាញមកពីក្រុមហ៊ុន CONFORAMA”។

លោកស្រីបន្តថា “លទ្ធផលទាំងនេះ ក៏អាស្រ័យជាបឋមដោយក្រុមការងារយុវជននៅទ្វីបអឺរ៉ុបដឹកនាំដោយលោកហួត ហាក់ តាមការចង្អុលទិស និង ការណែនាំជាប្រចាំពីសំណាក់លោកបណ្ឌិត ហ៊ុន ម៉ាណែត ដែលតែងប្រឹងប្រែងគៀងគរក្រុមហ៊ុនឬវិនិយោគិនពីក្រៅប្រទេស ដោយឡែកពីទ្វីបអឺរ៉ុប ឬពីប្រទេសបារាំង ឲ្យមកវិនិយោគនៅប្រទេសកម្ពុជា”។

លោក STANISLAS CONSEILLER តំណាងក្រុមហ៊ុន CONFORAMA បានមានប្រសាសន៍ថា ក៏ដោយបានឃើញមានស្ថិរភាពខាងកំណើនសេដ្ឋកិច្ច និងកម្ពុជាជាប្រទេសកំពុងអភិវឌ្ឍមិនឈប់ឈរ ដែលផ្តល់ឪកាសឲ្យអតិថិជនវ័យក្មេង សម្រាប់តម្រូវការរបស់ខ្លួន នៅតាមគេហដ្ឋាននូវគ្រឿងសង្ហារឹមដែលទាន់សម័យ គុណភាពល្អ តម្លៃសមរម្យ ដែលអាចជម្រុញឲ្យមានសន្ទុះជាវិជ្ជមានក្នុងការពង្រីកហាង CONFORAMA យ៉ាងលឿននៅទីនេះ។

លោស្រីម៉ែន សំអន ឧបនាយករដ្ឋមន្រ្តី រដ្ឋមន្រ្តីក្រសួងទំនាក់ទំនងជាមួយរដ្ឋសភា-ព្រឹទ្ធសភា និងអធិការកិច្ចបានថ្លែងដែរថា កិច្ចសហប្រតិបត្តិការរវាងក្រុមហ៊ុនកម្ពុជា និងក្រុមហ៊ុនបារាំងនាពេលនេះ បានបញ្ជាក់ពីការលូតលាស់ឥតឈប់ឈរ នៃកិច្ចសហប្រតិបត្តិការរវាងព្រះរាជាណាចក្រកម្ពុជា និងប្រទេសមហាអំណាចសេដ្ឋកិច្ចផ្សេងៗដ៏ទៃទៀតលើលោក ។ ចាប់ពីពេលទទួលសន្តិភាពពេញលេញមក ព្រះរាជាណាចក្រកម្ពុជាបានក្លាយជាប្រភព នៃអ្នកវិនិយោគទុនបរទេសដ៏មានសក្តានុពល ព្រមទាំងជាដៃគូពាណិជ្ជកម្មដ៏ល្អបំផុត ព្រមទាំងក៏ជាប្រទេសដែលមានចំនួនភ្ញៀវទេសចរដ៏ច្រើន ដែលកំពុងមកទស្សនាកម្ពុជា។

លោកស្រីឧបនាយករដ្ឋមន្រ្តី បានសម្តែងការគាំទ្រចំពោះកិច្ចសហប្រតិបត្តិការវិនិយោគរួមគ្នា ក្នុងការចាប់ដៃគូពាណិជ្ជកម្មរវាងក្រុមហ៊ុនបរទេស និងក្រុមហ៊ុនក្នុងស្រុក ហើយរាជរដ្ឋាភិបាលសង្ឃឹមយ៉ាងមុតមាំថា បន្ទាប់ពីការសហការវិនិយោគរួមគ្នារវាងក្រុមហ៊ុនទាំងពីរ អតិថិជននឹងបានអង់សែនផ្សារទំនើបមួយថ្មី ដែលមានផលិតផលថ្មីប្រកបដោយគុណភាពខ្ពស់ និងតម្លៃសមរម្យ ។ ផ្សារទំនើបថ្មីនេះ នឹងអាចបង្កើតការងារ និងប្រាក់ចំណូលយ៉ាងច្រើនដល់ប្រជាពលរដ្ឋកម្ពុជា ដើម្បីរួមចំណែកដល់ការអភិវឌ្ឍសេដ្ឋកិច្ចប្រកបដោយចីរភាព៕

តើអ្វីទៅជាយុទ្ធសាស្ត្រធនាគារដីធ្លី (Land Banking) ?

ដោយៈ រ៉ាណេត

ភ្នំពេញៈ Land Banking ជាយុទ្ធសាស្រ្តវិនិយោគលើវិស័យដីធ្លី ដោយទិញដីស្តុកទុក ក្នុងដំណាក់កាលដែលមនុស្សជាច្រើន មើលមិនឃើញពីតម្លៃ ឬឱកាសក្នុងការវិនិយោគ រួចលក់ចេញនៅពេលដែលទីផ្សារ ចាប់មានតំរូវការខ្លាំងនិងទទួលបានតម្លៃខ្ពស់។

ប្រភពនៃផលចំណេញពីការធ្វើ Land Banking មានពីរ ។ នេះបើផ្អែកតាមសំណេររបស់លោក ង៉ែត ជូ អ្នកវិភាគសេដ្ឋកិច្ច និងជាអ្នកជំនួញនៅក្នុងវិស័យអចលនទ្រព្យ។

នៅលើបណ្តាញទំនាក់ទំនងសង្គម តាមរយៈគណនីផ្ទាល់ខ្លួន លោកង៉ែត ជូបានលើកយកប្រភពនៃផលចំណេញសំខាន់ៗទាំងពីរ ទី១ ផលចំណេញពីការលក់ដីក្នុងតម្លៃខ្ពស់ជាងតំលៃនៅពេលទិញ។ ទី២ ផលចំណេញពីការជួលដី ឬប្រកបរបរនានាដូចជាការដាំឈើ ដាំដូងក្រអូប ចិញ្ចឹមត្រីលក់។

យុទ្ធសាស្រ្ត Land Banking នេះមិនមែនជាយុទ្ធសាស្រ្តថ្មីនោះទេ។ កាលពីជាង៥០០ឆ្នាំមុន អ្នកវិនិយោគជនជាតិអាមេរិកកាំង ដើមកំណើតអាល្លឺម៉ង់លោកJohn Jacop Aster បានប្រើយុទ្ធសាស្រ្តនេះ ដើម្បីប្រែខ្លួនលោកជាមហាសេដ្ឋី មានទ្រព្យរហូតដល់១១០ពាន់លានដុល្លាអាមេរិក និងជាមហាសេដ្ឋីជាប់លំដាប់លេខបួន ក្នុងប្រវត្តិសាស្រ្តអាមេរិក។

លោកបានទិញដី ដែលមានទំហំធំដែលសព្វថ្ងៃ ត្រូវបានគេស្គាល់ថា ជាទីក្រុងមែនហាថែន (Manhattan) ដែលជាផ្នែកមួយនៃទីក្រុងញូវញ៉ក។

ករណីសិក្សាមួយផ្សេងទៀត មហាសេដ្ឋីអចលនទ្រព្យរបស់ថៃ លោក Songsakdi ដែលបានទិញវាលស្រែជាង១៦០ហិកតា ក្នុងកំឡុងឆ្នាំ១៩៨០ រួចអភិវឌ្ឍន៍ជាខុនដូ និងអាគារពាណិជ្ជកម្មនៅឆ្នាំ២០០០ប្លាយ។ ដូចគ្នានេះដែរយើងកំពុងអនុវត្តន៍ យុទ្ធសាស្រ្ត Land Banking ដែលត្រូវបានអោយឈ្មោះថាជា “គំរោងមហាយាន”។

គំរោងនេះជាគំរោង Land Banking ខ្នាតតូច។ យើងមានទស្សនវិស័យអភិវឌ្ឍន៍ជាគំរោងខ្នាតធំនៅថ្ងៃអនាគត។

បញ្ហានៅត្រង់ថា អ្នកវិនិយោគជាច្រើន មិនមានចំណាប់អារម្មណ៍ នឹងឱកាសនេះទេ ព្រោះពួកគេខ្វះការអត់ធ្មត់។ ពួកគេចង់បានប្រាក់ចំពេញភ្លាមៗ ហើយមិនចង់រង់ចាំទទួលបានផលចំណេញច្រើន ក្នុងរយៈពេលវែងរហូតដល់រាប់ទសវត្សរ៍នោះទេ។ មានតែមនុស្សដែលមានការអត់ធ្មត់ខ្ពស់នោះទេ ទើបអាចចំអិនត្រីធំបានហូបប្រកបដោយឱជារសឈ្ងុយឆ្ងាញ់៕

ចំណេះដឹង! តើអ្វីជាគោលនយោបាយអត្រាប្តូរប្រាក់?

ដោយ វុត្ថា

ភ្នំពេញៈ គោលនយោបាយអត្រាប្តូរប្រាក់ របស់ធនាគារជាតិនៃកម្ពុជា គឺជាឧបករណ៍នយោបាយមួយរបស់គោល នយោបាយរូបិយវត្ថុ ដែលមានគោលដៅចម្បងរក្សាស្ថិរភាពថ្លៃ។

យោងតាមឯកសាររបស់ធនាគារជាតិនៃកម្ពុជាបានឱ្យដឹងថា ជាមួយនឹងការអនុវត្តរបបអត្រាប្តូរប្រាក់អណ្តែត មានការគ្រប់គ្រង ធនាគារជាតិ នឹងធ្វើអន្តរាគមលើទីផ្សារប្តូរប្រាក់ ដើម្បីគ្រប់គ្រងនិងរក្សាស្ថិរភាព អត្រាប្តូរប្រាក់ ទៅតាមគោលដៅដែលបានកំណត់ ។ អត្រាប្តូរប្រាក់ផ្លូវការជាអត្រាទិញ-លក់រវាងរូបិយវត្ថុជាតិ និងរូបិយប័ណ្ណបរទេសផ្សេងទៀត ។

អត្រាប្តូរប្រាក់ផ្លូវការនេះ ត្រូវបានកំណត់ដោយធនាគារជាតិនៃកម្ពុជា និងដាក់ឲ្យប្រើប្រាស់សម្រាប់រាល់ប្រតិបត្តិការ រវាងធនាគារជាតិនៃកម្ពុជាជាមួយនឹងភាគីពាក់ព័ន្ធ។ លើសពីនេះ ក្រសួង-ស្ថាប័នរាជរដ្ឋាភិបាល ក៏ដូចជា សាធារណៈជនអាចប្រើប្រាស់អត្រាប្តូរប្រាក់ផ្លូវការនេះ ទៅតាមគោលដៅរៀងៗខ្លួន ហើយអត្រានេះក៏ជា អត្រាប្តូរប្រាក់គោលប្រើដោយវិស័យឯកជនផងដែរ។

ធនាគារជាតិនៃកម្ពុជា កំណត់អត្រាប្តូរប្រាក់ផ្លូវការ ដូចជា “គណៈកម្មការកំណត់អត្រាប្តូរប្រាក់ផ្លូវការ” ដែលរួមមានសមាសភាពមកពីនាយកដ្ឋានពាក់ព័ន្ធ ដូចជានាយកដ្ឋានគ្រប់គ្រងប្តូរប្រាក់ នាយកដ្ឋានបោះផ្សាយនិងឃ្លាំងបេឡា នាយកដ្ឋានប្រតិបត្តិការ នាយកដ្ឋានស្ថិតិ និងនាយកដ្ឋានស្រាវជ្រាវសេដ្ឋកិច្ច និងសហប្រតិបត្តិការអន្តរជាតិ គឺជាអ្នកកំណត់អត្រាប្តូរប្រាក់ផ្លូវការ ។

សមាជិកគណៈកម្មការនេះ ជួបប្រជុំគ្នាជារៀងរាល់ព្រឹក ដើម្បីពិភាក្សានិងវិភាគទៅលើសូចនាករសំខាន់ៗមួយចំនួន ដែលត្រូវប្រើប្រាស់ជាមូលដ្ឋាន ក្នុងការកំណត់អត្រាប្តូរប្រាក់ផ្លូវការប្រចាំថ្ងៃ។ បន្ទាប់មកអត្រាប្តូរប្រាក់ផ្លូវការនេះ ត្រូវដាក់ជូនថ្នាក់អគ្គនាយកបច្ចេកទេសសម្រេច និងផ្សព្វផ្សាយជាសាធារណៈ។

ករណីដែលទីផ្សារមានការប្រែប្រួលខ្លាំង គណៈកម្មការនឹងមានការប្រជុំជាបន្ទាន់ ដើម្បីរកដំណោះស្រាយ និងកំណត់យុទ្ធសាស្ត្រ ៕

ខណ្ឌចំការមននៅតែឈរលំដាក់លេខរៀងទី១លើការអភិវឌ្ឍវិស័យអចលនទ្រព្យ

ដោយ វុត្ថា

ភ្នំពេញៈ ខណ្ឌចំការមននៅក្នុងចំណោមខណ្ឌទាំង១៤ នៃរាជធានីភ្នំពេញនៅតែឈរនៅលំដាប់លេខរៀងទី១ ដែលមានភាពទាក់ទាញការវិនិយោគ និងលេចធ្លោរខ្លាំងលើវិស័យអចលនទ្រព្យនៅក្នុងឆ្នាំ២០១៩នេះ ។

លោកស្រីតាំង ហ៊ួរ អគ្គនាយិកាក្រុមហ៊ុន Amatak Property Service បានប្រាប់គេហទំពរ័ propertyarea.asia នៅថ្ងៃទី ៦ ខែធ្នូ ឆ្នាំ ២០១៩កន្លងមកថា នៅក្នុងចំណោមខណ្ឌទាំង១៤ នៃរាជធានីភ្នំពេញនេះ គឺខណ្ឌចំការមន នៅតែឈរលំដាប់លេខរៀងទី១ ទាំងតម្លៃដីធ្លី និងការវិនិយោគលើវិស័យអចលនទ្រព្យ។

លោកស្រីបន្ថែមថា “កត្តាជាច្រើនដែលធ្វើឱ្យខណ្ឌមួយនេះ នៅតែឈរលំដាប់លេខរៀងទី១ ដោយសារតែមានការទាក់ទាញ លើការវិនិយោគទៅលើសណ្ឋាគារ អគារខុនដូ អាផាតមិន និងអគារពាណិជ្ជកម្មផ្សេងៗជាច្រើន”។ លោកស្រីបន្តថា “ខណ្ឌដែលឈរនៅលំដាល់លេខរៀងទី២ គឺខណ្ឌដូនពេញ”។

លោកបន្ថែមថា ខណ្ឌមួយនេះ ស្ថិតនៅក្នុងកណ្តាលក្រុង និងនៅជាប់មាត់ទន្លេ និងជាតំបន់ដែលមានទេសចរណ៍ច្រើន ដែលធ្វើឱ្យតម្លៃអចលនទ្រព្យកើនឡើង ជារៀងរាល់ឆ្នាំពីមួយឆ្នាំទៅមួយឆ្នាំ។

នាយិកាប្រតិបត្តិក្រុមហ៊ុនអចលនទ្រព្យអន្តរជាតិ Century21 Cambodia លោកស្រី Grace Rachny Fong បានឱ្យដឹងដែរថា ខណ្ឌទាំង១៤នៃរាជធានីភ្នំពេញ គឺមានសក្តានុពលក្នុងការប្រើប្រាស់ និងមានតម្រូវការខុសៗពីគ្នា ដែលវាអាស្រ័យទៅតាមតំបន់ និងទីតាំង។

លោកស្រីបានបន្តថា “ខណ្ឌដែលត្រូវបានចាត់បញ្ចូលជាតំបន់ ដែលមានសក្ដានុពលខ្លាំង លើវិស័យអចលនទ្រព្យ នៅក្នុរាជធានីភ្នំពេញ រួមមានដូចជា ខណ្ឌបឹងកេងកងដូនពេញ ទួកគោក ច្បារអំពៅ ជ្រោយចង្វារ ៧មករា សែនសុខ ខណ្ឌពោធិ៍សែនជ័យ និងខណ្ឌចំការមន”។

លោកស្រីបានបន្តទៀតថា “បើទោះជាខណ្ឌទាំងអស់នេះ មានសក្ដានុពលក្នុងវិស័យមួយនេះក្ដី ប៉ុន្តែតម្រូវការនៃការប្រើប្រាស់ ត្រូវបានបែងចែកចេញពីគ្នា។ ក្រៅពីនេះ ខណ្ឌដែលមានសក្ដានុពល និងមានតម្រូវការខ្ពស់លើវិស័យ លំនៅដ្ឋានបែបអាជីវកម្ម គឺខណ្ឌ៧មករា ខណ្ឌដូនពេញ និងខណ្ឌចំការមន”។

ខណ្ឌចំការមនមានផ្ទៃក្រឡាប្រមាណ១១គីឡូម៉ែត្រការ៉េ បានបង្ហាញពីសក្តានុពលយ៉ាងខ្លាំង ដោយសារការកើនឡើងនៃសំណង់អគារស្នាក់នៅចម្រុះ អគារសហកម្មសិទ្ធិ(ខុនដូ)ផ្សារទំនើប ដែលបន្តរីកដុះឡើងដូចផ្សិត ក្នុងរយៈពេលប៉ុន្មានឆ្នាំចុងក្រោយនេះ។

លោក ប៊ុន សុភ័ក្ត្រ អភិបាលរងខណ្ឌចំការមនធ្លាប់បានឱ្យដឹងថា ការអភិវឌ្ឍមានគ្រប់វិស័យនៅក្នុងមូលដ្ឋាននេះ រាប់ទាំងការសាងសង់ប្រព័ន្ធហេដ្ឋារចនាសម្ព័ន្ធ និងការបញ្រ្ជាបចំណេះដឹងជំនាញ។

ទាក់ទងទៅនឹងហេដ្ឋារចនាសម្ព័ន្ធ មិនសំដៅទៅលើតែសំណង់ខ្ពស់ៗធំៗនោះទេ ប៉ុន្តែក្នុងការអភិវឌ្ឍប្រទេសជាតិ គឺសំដៅទៅលើគ្រប់វិស័យទាំងការអភិវឌ្ឍស្ពាន ផ្លូវថ្នល់ ប្រព័ន្ធលូ សំណង់នានា សណ្តាប់ធ្នាប់សាធារណៈ អនាម័យ និងការចូលរួមសម្អាតបរិស្ថាន (ទីក្រុងស្អាត)» ។

លោកបានបង្ហាញថា តម្រូវការសម្រាប់ទីក្រុង និងជនបទមានភាពខុសគ្នា ពីព្រោះការរស់នៅមានភាពខុសគ្នាទៅតាមតំបន់។ ឧទាហរណ៍ ដូចជានៅតាមតំបន់ជនបទខ្លះត្រូវការប្រព័ន្ធធារាសាស្ត្រ ប្រឡាយទឹកសម្រាប់កសិកម្ម។ ចំណែកទីក្រុងវិញ ប្រជាជនចង់មានផ្លូវស្អាត ភ្លើងបំភ្លឺផ្លូវ គ្មានភាពកកស្ទះ គ្មានសំរាមនៅមុខផ្ទះ និងគ្មាន ចោរលួចប្លន់នៅកន្លែងរស់នៅជាដើម៕

សមាគមអ្នកជំនាញអចលនទ្រព្យកម្ពុជា នឹងបោះឆ្នោតជ្រើសតាំងប្រធានអាណត្តិទី២ នៅថ្ងៃស្អែកនេះ

ដោយ ៖ រ៉ាណេត

ភ្នំពេញ ៖ នៅត្រឹមថ្ងៃទី៧ ខែធ្នូ ឆ្នាំ២០១៩ ស្អែកនេះ សមាគមអ្នកជំនាញអចលនទ្រព្យកម្ពុជា (CREA) នឹងធ្វើការជួបជុំសមាជិករបស់ខ្លួនដើម្បីធ្វើការបោះឆ្នោតជ្រើសតាំងប្រធានសមាគមថ្មីសម្រាប់អាណត្តិទី២ ដែលនឹងប្រព្រឹត្តទៅនៅសណ្ឋាគារ Le Royal Phnom penh ចាប់ពីម៉ោង២រសៀល។

អនុប្រធានសមាគមអ្នកជំនាញអចលនទ្រព្យកម្ពុជា អ្នកស្រី នុត រត្ថា ទទួលបន្ទុកទំនាក់ទំនងសាធារណៈ និងជានាយិកាក្រុមហ៊ុនរៀបចំកម្មវិធី រំដួល បានមានប្រសាសន៍ថា “ការរៀបចំឱ្យមានការបោះឆ្នោតជ្រើសរើសប្រធានសមាគមមានអាណត្តិសម្រាប់ដឹកនាំនេះ គឺជាលើកទី១ ដែលអាស្រ័យដោយបានជាលទ្ធផលពីការប្រជុំទាំងក្រុមប្រឹក្សា ទាំងគណៈកម្មាធិកា ទាំងខាងគណៈគ្រប់គ្រងនៃសមាគម គឺបានសម្រេចគ្នាជាផ្លូវការ តម្រូវឱ្យប្រធានសមាគមទាំងអស់ គួរតែមានអាណត្តិនៅក្នុងការដឹកនាំរបស់ខ្លួន” ។

អ្នកស្រី បានបន្តទៀតថា “យើងតម្រូវឱ្យប្រធានសមាគម មានអាណត្តិគ្រប់គ្រង ក្នុងការដឹកនាំ ១ឆ្នាំម្តង នឹងត្រូវធ្វើការបោះឆ្នោតជ្រើសតាំងជាថ្មី ចំណែកប្រធានក្រុមប្រឹក្សា គឺមានរយៈពេល២ឆ្នាំម្តង ។

ទើបតែឆ្នាំនេះទេ ដែលយើងតម្រូវឱ្យប្រធានសមាគមមានមួយអាណត្តិ ហើយប្រធានសមាគមម្នាក់ អាចឈរឈ្មោះរយៈពេល ២អាណត្តិ ជាប់គ្នាបាន ប៉ុន្តែក្នុងមួយអាណត្តិ មានរយៈពេលតែ១ឆ្នាំប៉ុណ្ណោះ ។ ដូចគ្នា ប្រធានក្រុមប្រឹក្សា មានអាណត្តិ២ឆ្នាំ និងឈរឈ្មោះជាប់គ្នា ២អាណត្តិដែរ”។

បន្ទាប់ពីធ្វើការបោះឆ្នោតជ្រើសរើសប្រធានសមាគមសម្រាប់អាណត្តិទី២ ក៏មានពិធីជួបជុំទទួលទានអាហារសាមគ្គី ជប់លៀងប្រចាំឆ្នាំរបស់សមាគមអ្នកជំនាញអចលទ្រព្យកម្ពុជា (CREA) ផងដែរ ចាប់ពីម៉ោង ៥ រហូតដល់ម៉ោង ៩យប់។ សម្រាប់ការចូលរួមក្នុងកម្មវិធីនេះ សូមទូរស័ព្ទ៖ កញ្ញា ណានី ០១៧ ៧៨ ៧៩ ៧២ ។

ខេត្តព្រះសីហនុនឹងមានមហាវិថីធំៗចំនួន៣បន្ថែមទៀត ដើម្បីសម្រួលដល់ចរាចរណ៍ និងលើកម្ពស់សោភណភាពខេត្ត

ដោយ វុត្ថា

ភ្នំពេញ៖ មហាវិថីរាម មហាវិថីឆ្នេររាម និងមហាវិថីជំទាវម៉ៅក្នុងចំណោមផែនការផ្លូវ ៣៤ខ្សែ នឹងបើកឱ្យបងប្អូនធ្វើដំណើរជាបណ្តើរៗនាចុងខែធ្នូនេះ ដើម្បីសម្រួលចរាចរណ៍ចំពោះបងប្អូនដែលមានបំណង់ចូលមកកំសាន្តក្នុងក្រុងព្រះសីហនុនាឱកាសបុណ្បឆ្លងឆ្នាំសកលខាងមុខនេះ ។

លោក គួច ចំរើន អភិបាល នៃអភិបាលខេត្តព្រះសីហនុ ក្នុងពិធីដឹកនាំមន្ត្រីជំនាញចុះត្រួតពិនិត្យការដ្ឋានស្ថាបនាផ្លូវទាំង៣៤ខ្សែនៅថ្ងៃទី ៦ ខែធ្នូ ឆ្នាំ ២០១៩ នេះ បានឱ្យដឹងថា ចាប់ពីបានប្រកាសបើកកាដ្ឋានស្ថាបនាផ្លូវ កាលថ្ងៃទី១៦ ខែវិច្ឆិកា ឆ្នាំ២០១៩ រហូតដល់ចុងខែធ្នូឆ្នាំ២០១៩ កន្លងមកនេះ ក្រុមហ៊ុនស្ថាបនាផ្លូវបានដំណើរការឈូសឆាយ កាយផ្លូវយ៉ាងសកម្មដើម្បីសម្រេចតាមផែនការកំណត់ និងប្រកបដោយគុណភាពខ្ពស់។

វិស័យសំណង់នៅក្នុងក្រុងព្រះសីហនុមានការរីកលូតលាស់យ៉ាងឆាប់រហ័ស ចាប់ពីឆ្នាំ២០១៧ ដល់ឆ្នាំ២០១៩ បានជួបនូវបញ្ហាប្រឈមមួយចំនួនដូចជា ហេដ្ឋារចនាសម្ពន្ធ័ផ្លូវថ្នល់ លូ អូរ ប្រឡាយ ទឹកស្អាត អគ្គិសនី កាកសំណល់ បរិស្ថាន និងចរាចរណ៍ជាដើមដែលជំរុញឱ្យរដ្ឋាភិបាលស្ថាបនាផ្លូវក្នុងក្រុងព្រះសីហនុ ចំនួន ៣៤ខ្សែ មានប្រវែង ៨៤.៥០៥គីឡូម៉ែត្រ ដើម្បីឆ្លើយតប និងដោះស្រាយបញ្ហាទាំងនេះ ។

សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា ធ្លាប់បានលើកឡើងថា ដោយសារតែបច្ចុប្បន្ននេះ ហេដ្ឋារចនាសម្ព័ន្ធក្នុងក្រុងព្រះសីហនុ គឺមិនអាចប្រើប្រាស់បន្តទៀតបាន ដូច្នេះហើយទើបរដ្ឋាភិបាលត្រូវចាប់ផ្តើមកសាងឡើងវិញទាំងអស់ ដើម្បីបំពេញតម្រូវការចាំបាច់របស់ក្រុងដែលកំពុងមានសក្តានុពល។

សម្តេចបញ្ជាក់ថា ការសាងសង់ផ្លូវនេះ គឺមានក្រុមហ៊ុនចំនួន៨ ទទួលធ្វើ ដោយត្រូវចំណាយទុនប្រមាណ ២៩៤លានដុល្លារអាមេរិក ហើយផ្លូវនេះគឺជាផ្លូវដ៏ប្រណិត ដោយចែកចេញជា៣ប្រភេទ គឺ១)ប្រភេទមហាវិថី , ២)វិថី និង ៣)អនុវិថី។

ចំពោះមហាវិថីមានចំនួន៣ខ្សែ គឺមានទទឹងផ្លូវរហូតដល់ទៅ៥០ម៉ែត្រ, ចំពោះវិថីវិញគឺមានទទឹងពី២០ ទៅ៤០ម៉ែត្រ ឬឯប្រភេទបែបអនុវិថីវិញ គឺមានទទឹងពី៨ ទៅ៤០ម៉ែត្រ ហើយផ្លូវទាំងអស់គឺមានទ្រូងផ្លូវ ចិញ្ចើមផ្លូវ (សម្រាប់អ្នកដើរ សម្រាប់កង់ ម៉ូតូ) គំនូសចរថាចរណ៍ត្រឹមត្រូវ បង្គោលភ្លើងបំភ្លឺផ្លូវ និងមានបំពាក់កាមេរ៉ាសុវត្តិភាពតាមដងផ្លូវផងដែរ។ផ្លូវនេះត្រូវប្រើរយៈពេលក្នុងការសាងសង់ត្រឹមតែ៨ខែតែប៉ុណ្ណោះ ដូច្នេះនៅឆ្នាំក្រោយនេះ ក្រុងព្រះសីហនុ នឹងប្រែមុខមាត់ថ្មី ក្លាយទៅជាទីក្រុងដែលមានសុវត្ថិភាពបំផុត និងទាក់ទាញសម្រាប់ភ្ញៀវទេសចរណ៍ និងអ្នកវិនិយោគនានា៕

កំណើនយានយន្តកើនឡើងជិត២លានគ្រឿង បានធ្វើឱ្យជំនន់ចរាចរណ៍កាន់តែអាក្រក់នៅក្រុងភ្នំពេញ

ដោយ ៖ រ៉ាណេត

ភ្នំពេញ ៖ បច្ចុប្បន្ននេះ ការកកស្ទះចរាចរណ៍នៅក្នុងរាជធានីភ្នំពេញបានក្លាយជាបញ្ហាប្រឈមដ៏ធំមួយ ដែលរាជរដ្ឋាភិបាលកំពុងតែព្យាយាមស្វែងរកដំណោះស្រាយ ដើម្បីបន្ធូរបន្ថយវិបត្តិមួយនេះឱ្យមានភាពល្អប្រសើរ តាមរយៈការស្ថាបនាហេដ្ឋារចនាសម្ព័ន្ធនានា ដូចជាស្ពានអាកាស និងស្ពានថ្មើរជើងជាដើម ខណៈដែលកំណើនយានយន្តបានកើនឡើងរហូតដល់ជិត២លានគ្រឿង។

ស្ទើរតែនៅគ្រប់ទីកន្លែងនៃរាជធានីភ្នំពេញ ជាពិសេសនៅតាមបណ្តាផ្លូវសំខាន់ៗនៃជាយក្រុងតែម្ដង កំពុងតែជួបនូវវិបត្តិជំនន់កកស្ទះចរាចរណ៍យ៉ាងណែនណាន់តាន់តាប់រាប់ម៉ោង ពោលគឺចាប់ពីម៉ោង ៦ៈ៣០នាទី រហូតដល់ម៉ោង១០ព្រឹក និងពេលរសៀលចាប់ពីអំឡុងម៉ោង ៥រហូតដល់ម៉ោង ៧យប់។

ចំណុចដែលតែងជួបវិបត្តិកកស្ទះខ្លាំង គឺកើតមាននៅតំបន់ស្ពានជ្រោយចង្វារ តំបន់ស្ពានព្រះមុនីវង្ស (ស្ពានច្បារអំពៅ) តំបន់ខេមកូស៊ីធី តំបន់រង្វង់មូលចោមចៅរួមជាមួយនឹងបណ្តាផ្លូវធំៗមួយចំនួនទៀតនៅក្នុងរាជធានីភ្នំពេញផងដែរ។ រដ្ឋមន្ត្រីក្រសួងសាធារណៈការ និងដឹកជញ្ជូន លោក ស៊ុន ចាន់ថុល បានមានប្រសាសន៍កាលពីថ្ងៃទី៥ ខែធ្នូ ឆ្នាំ២០១៩ ម្សិលមិញនេះថា ការកកស្ទះចរាចរណ៍នៅក្នុងរាជធានីភ្នំពេញដែលកំពុងតែកើតមាននេះ បច្ចុប្បន្នរដ្ឋាភិបាលបានព្យាយាមរកដំណោះស្រាយជាមួយនឹងវិធីសាស្ត្រជាច្រើន ដែលក្នុងនោះមានដូចជាការបង្កើនចំនួនរថយន្តក្រុង និងការបង្កើតខ្សែរត់បន្ថែម ការស្ថាបនាផ្លូវថ្មើរជើង ការបង្កើតផ្លូវក្រោមដី និងការសាងសង់ស្ពានអាកាសបន្ថែមជាដើម។

លោកទេសរដ្ឋមន្ត្រី ស៊ុន ចាន់ថុល បានមានប្រសាសន៍បន្តទៀតថា “ការកកស្ទះទាំងនេះគឺកើតឡើងគួបផ្សំកត្តាជាច្រើន ដូចជាកត្តាហេដ្ឋារចនាសម្ព័ន្ធនៅក្នុងក្រុងតូច កត្តាអ្នកបើកបរមិនគោរពច្បាប់អាទិភាព ជាពិសេសកត្តានៃកំណើនចំណូលរបស់ប្រជាពលរដ្ឋដែលអាចមានលទ្ធភាពក្នុងការទិញយានយន្ត ដែលរហូតមកដល់ពេលនេះមានចំនួនកើនឡើងរហូតដល់១,៨លានគ្រឿង”។

លោកបានបន្តទៀតថា “នៅក្នុងចំណោមយានយន្តទាំង ១,៨លានគ្រឿងនេះ មានរថយន្តប្រមាណកន្លះលាន ម៉ូតូកង៣ប្រមាណ៤ម៉ឺនគ្រឿង ហើយក្រៅពីនេះគឺម៉ូតូ ខណៈដែលចំនួនម៉ូតូដែលត្រូវបានដាក់ចូលទីផ្សារប្រមាណ ៣០ម៉ឺនគ្រឿងក្នុង១ឆ្នាំ”។

បច្ចុប្បន្ននេះ បន្ថែមពីលើការកសាងស្ពានអាកាស និងស្ពានថ្មើរជើងដែលជាវិធីសាស្ត្រក្នុងការជួយកាត់បន្ថយការកកស្ទះចរាចរណ៍ រដ្ឋបាលរាជធានីភ្នំពេញបានសិក្សាពីគម្រោងស្ថាបនាផ្លូវសម្រាប់អ្នកថ្មើរជើង និងផ្លូវសម្រាប់ម៉ូតូនៅលើចិញ្ចើមថ្លូវនៅបណ្តាខណ្ឌមួយចំនួនដែលជួបបញ្ហាកកស្ទះខ្លាំង។

បន្ថែមពីនេះ សម្ដេច តេជោ ហ៊ុន សែន ក៏បានបង្គាប់ឱ្យរដ្ឋបាលរាជធានីភ្នំពេញសិក្សា និងស្វែករកក្រុមហ៊ុនអភិវឌ្ឍនានា ដើម្បីសាងសង់ទីចំណតរថយន្តនៅក្នុងសួនច្បារ ឬក្រោមដី ដែលអាចជួយចូលរួមកាត់បន្ថយបញ្ហាដែលកំពុងតែប្រឈមមួយនេះផងដែរ ៕

រដ្ឋាភិបាលកំពុងត្រៀមខ្លួនគាំទ្រដល់សេដ្ឋកិច្ចឌីជីថលនិងបដិវត្តន៍ឧស្សាហកម្មជំនាន់ទី៤

ដោយ វុត្ថា

ភ្នំពេញៈ ក្រសួងប្រៃសណីយ៍ និងទូរគមនាគមន៍ បាននិងកំពុងធ្វើការ ដើម្បីត្រៀមខ្លួនគាំទ្រដល់សេដ្ឋកិច្ចឌីជីថល និងបដិវត្តន៍ឧស្សាហកម្មជំនាន់ទី៤ ក្នុងនោះការកសាងបទដ្ឋានគតិយុត្ត ការតភ្ជាប់ឌីជីថល ការបណ្តុះបណ្តាលធនធានមនុស្ស សន្តិសុខព័ត៌មាន ការអភិវឌ្ឍវិស័យប្រៃសណីយ៍ ដើម្បីទ្រទ្រង់ដល់ឡូជីស្ទិក (Logistic)។

លោក ត្រាំ អ៊ីវតឹក រដ្ឋមន្ត្រីក្រសួងប្រៃសណីយ៍និងទូរគមនាគមន៍ នៅក្នុងជំនួបជាមួយ លោកស្រី Boutheina Guermazi នាយកនៃនាយកដ្ឋានការអភិវឌ្ឍផ្នែកឌីជីថល នៃធនាគារពិភពលោក នៅថ្ងៃទី៦ ខែធ្នូ ឆ្នាំ ២០១៩នេះថា ក្រសួងបានទទួលភារកិច្ចពីរាជរដ្ឋាភិបាល ក្នុងការរៀបចំក្របខណ្ឌរដ្ឋាភិបាលឌីជីថល និងបានយកចិត្តទកដាក់ផងដែរ ពីសារ:សំខាន់ ក្នុងការបង្កើនការបណ្តុះបណ្តាលចំណេះដឹងឌីជីថលផងដែរ។

ក្រសួងក៏បានផ្តោតលើការពង្រីកហេដ្ឋារចនាសម្ព័ន្ធ បណ្តាញទូរស័ព្ទចល័ត និងអ៊ីនធឺណិត រហូតដល់ជនបទ ក្នុងគុណភាពល្អ និងតម្លៃសមរម្យ ដែលសម្រាប់ប្រទេសកម្ពុជា តម្លៃអ៊ីនធឺណិត ស្ថិតក្នុងប្រទេសដែលមានតម្លៃអ៊ីនធឺណិតធូរថ្លៃជាងគេ នៅលើពិភពលោក។ ស្របពេលជាមួយគ្នា ការពង្រឹងសន្តិសុខព័ត៌មានវិទ្យា ក៏ជាសរសរស្តម្ភមួយដែលទ្រទ្រង់ដល់សេដ្ឋកិច្ចសង្គមឌីជីថល។

លោករដ្ឋមន្ត្រីបន្ថែមថា ក្រសួងបានកំពុងខិតខំបង្កើនការគ្របដណ្តប់ នៃបណ្តាញអ៊ីនធឺណិត និងបណ្តុះបណ្តាលផ្នែកឌីជីថល នៅតាមជនបទតាមរយ:មូលនិធិកាតព្វកិច្ចសេវាសកលទូរគមនាគមន៍ (មូលនិធិ ក.ស.ទ.-USO Fund) និងមូលនិធិនៃការកសាងសមត្ថភាព ការស្រាវជ្រាវ និងការអភិវឌ្ឍវិស័យទូរគមនាគមន៍ បច្ចេកវិទ្យាគមនាគមន៍និងព័ត៌មាន(មូលនិធិ ស.អ.-CBRD Fund) ក៏ដូចជាគម្រោងភូមិឌីជីថល ដើម្បីធានានូវបរិយាប័ន្ននៃការទទួលនូវសេវានេះ ព្រមទាំងបានយកចិត្តទុកដាក់ លើសុវត្ថិភាពនៃការប្រើប្រាស់ប្រព័ន្ធនេះ ពិសេសការការពារដល់កុមារលើការប្រើប្រាស់អនឡាញផងដែរ។

លោកត្រាំ អ៊ីវតឹកបានបញ្ជាក់ទៀតថា ដើម្បីឆ្លើយតបនឹងការរីកដុះដាលនៃវិស័យពាណិជ្ជកម្មអេឡិកត្រូនិក ការអភិវឌ្ឍវិស័យប្រៃសណីយ៍ ក៏ត្រូវបានយកចិត្តទុកដាក់ក្នុងការពង្រីកសេវាកម្មនេះកាន់តែសំបូរបែប ដើម្បីសម្រួលដល់សេវាឡូជីស្ទិក(Logistic) និងការពង្រីកសេវាកម្មប្រៃសណីយ៍ ទៅលើផ្នែកផ្សេងៗទៀត ដូចជាផ្នែកធានារ៉ាប់រង និងហិរញ្ញវត្ថុផងដែរ។

លោកស្រី Boutheina Guermazi នាយកនៃនាយកដ្ឋានការអភិវឌ្ឍផ្នែកឌីជីថល នៃធនាគារពិភពលោក បានវាយតម្លៃខ្ពស់ចំពោះការងារ ដែលក្រសួងបាននិងកំពុងធ្វើ ហើយបានសន្យាថា នឹងយកចំណុចទាំងនេះទៅពិនិត្យ ពិចារណា ជាមួយធាតុចូល ដែលទទួលបានពីក្រសួងផ្សេងទៀត ដើម្បីរៀបចំវិស័យអាទិភាព ដែលធនាគារពិភពលោក នឹងសហការជាមួយកម្ពុជា ក្នុងអភិក្រមនៃវិស័យទាំងមូល ប្រទាក់ក្រឡាគ្នា និងមាននូវបរិយាប័ន្ន៕

អង្គការសម្រាប់សហប្រតិបត្ដិការសេដ្ឋកិច្ច និងការអភិវឌ្ឍអះអាងថានិស្សិតអាស៊ីឆ្លាតជាងគេលើពិភពលោក

ដោយ Donald Lee

ភ្នំពេញៈ អង្គការសម្រាប់សហប្រតិបត្ដិការសេដ្ឋកិច្ច និងការអភិវឌ្ឍ (OECD) បានឱ្យដឹងថា និស្សិតអាស៊ីបន្តបង្ហាញថា ពួកគេជាសិស្សឆ្លាតជាងគេនៅលើពិភពលោក។

អង្គការ OECD បានចេញផ្សាយលទ្ធផល នៃកម្មវិធីសម្រាប់ការវាយតម្លៃនិស្សិតអន្តរជាតិ (PISA) ដែលជាការសាកល្បងការអាន គណិតវិទ្យា និងវិទ្យាសាស្ត្រដែលបានផ្តល់ដល់ក្មេងអាយុ ១៥ឆ្នាំ ដែលបានវិភាគលើនិស្សិត៦០០,០០០នាក់ នៅក្នុង៧៩ប្រទេសជុំវិញពិភពលោក។

ការវាយតម្លៃបានរកឃើញថា ជនជាតិចិន សឹង្ហបូរី ហុងកុងជាប់ចំណាត់ថ្នាក់ខ្ពស់ជាងគេក្នុងការអាន និងគណិតវិទ្យា។

និស្សិតចិននៅទីក្រុងប៉េកាំងសៀងហៃ ចាងស៊ូ និងស៊ីជាំងបាននាំមុខ ក្នុងការសិក្សាលើនិស្សិតទូទាំងពិភពលោក។

របាយការណ៍បានបង្ហាញ “និស្សិតអាយុ១៥ឆ្នាំ នៅក្នុងខេត្ត/ក្រុងចំនួន៤នៃប្រទេសចិនគឺទីក្រុងប៉េកាំង សៀងហៃ ចាងស៊ូ និងស៊ីជាំង បានទទួលជោគជ័យជាងមិត្តភក្តិរបស់ពួកគេ នៅក្នុងប្រព័ន្ធអប់រំចំនួន៧៨ផ្សេងទៀត។ ក្នុងគណិតវិទ្យា និងវិទ្យាសាស្ត្រដោយទទួលបានលទ្ធផលយ៉ាងទូលំទូលាយ ហើយមានតែសឹង្ហបូរី បានប្រដេញជាមួយនិសិត្សចិន”។

របាយការណ៍បានបន្ថែមទៀតថា “គុណភាពនៃសាលារៀនរបស់ពួកគេសព្វថ្ងៃនេះនឹងជួយពង្រឹងសេដ្ឋកិច្ចរបស់ពួកគេនាពេលអនាគត”។

ភ្លាមៗរដ្ឋាភិបាលទីក្រុងប៉េកាំងបានអបអរសាទរ ចំពោះប្រព័ន្ធអប់រំរបស់ខ្លួនសម្រាប់ការទទួលបានពិន្ទុខ្ពស់។

របាយការណ៍បានបញ្ជាក់ថា “ក្នុងរយៈពេលបួនទសវត្សរ៍កន្លងមក ចាប់តាំងពីការកែទម្រង់ និងការបើកចំហរចិន បានខិតខំប្រឹងប្រែងយ៉ាងខ្លាំងក្នុងវិស័យអប់រំ។ ការវិនិយោគសរុបរបស់ខ្លួន លើវិស័យអប់រំបានកើនឡើងជិត៥០០ ដងពី១,៣ ពាន់លានដុល្លារក្នុងឆ្នាំ១៩៧៨ ដល់៦៥៥ពាន់លានដុល្លារនៅឆ្នាំ២០១៨ ហើយការអប់រំបានក្លាយជាតំបន់ធំបំផុតរួចទៅហើយ នៃការចំណាយរបស់រដ្ឋាភិបាល”។

របាយការណ៍បានបន្ថែមថា កាលពីឆ្នាំ២០១៨ ដោយមានសាលារៀនចំនួន ៥១៤,០០០កន្លែង និងមានសិស្សចំនួន២៧០លាននាក់ កម្រិតនៃការអប់រំរបស់ចិនបានជាប់ចំណាត់ថ្នាក់លេខ១នៅលើពិភពលោក”។

ផ្ទុយទៅវិញ និស្សិតអាមេរិកបានជាប់ចំណាត់ថ្នាក់ទី១៣ គួរឱ្យភ្ញាក់ផ្អើលក្នុងការអានអក្ខរកម្ម និងទទួលបានពិន្ទុទាបជាងមធ្យមភាគគណិតវិទ្យា។

ទន្ទឹមនឹងនេះដែរ និស្សិតថៃបានបង្ហាញលទ្ធផលមិនល្អ ដោយទទួលបានពិន្ទុលើគ្រប់វិស័យដែលទាបជាងមធ្យមភាគ។ យោងតាមការស្ទង់មតិ ថៃបានជាប់ចំណាត់ថ្នាក់ទី ៥៦ សម្រាប់គណិតវិទ្យាទី៦៦ សម្រាប់ការអាននិងទី៥២សម្រាប់វិទ្យាសាស្ត្រ៕