កិច្ចសម្ភាសន៍ពិសេស៖ លោកខន គង្គាអគ្គនាយក ERA មានសុទិដ្ឋិនិយមដូចម្តេចពីទីផ្សារខុនដូនៅកម្ពុជា

ដោយស៊ុំ ម៉ាណេត

ភ្នំពេញៈ ខុនដូដែលជាប្រភេទលំនៅដ្ឋានបែបសហកម្មសិទ្ឋ ជាផ្នែកថ្មីមួយនៃវិស័យអចលនទ្រព្យ ដែលបាននិងកំពុងលូតលាស់ខ្លាំងនៅកម្ពុជា ហើយលំនៅដ្ឋានប្រភេទនេះត្រូវបានអ្នកជំនាញនៅតែបន្តបង្ហាញពីភាពវិជ្ជមាន ក្នុងរយៈពេលខ្លី និងវែង ខណៈចំនួនគម្រោងអភិវឌ្ឍន៍ខុនដូ បាននិងកំពុងកើនឡើងជាបន្តបន្ទាប់។

ទុនវិនិយោគក្នុងវិស័យសំណង់នៅក្នុងឆ្នាំនេះ មានចំនួន៩៣០០លានដល្លារ កើនឡើងប្រមាណ៧៨ភាគរបើធៀបនឹងឆ្នាំមុន ដោយភាគច្រើនគំរោងមានការកើនឡើង នៅក្នុងខេត្តព្រះសីហនុ។

អគ្គនាយកក្រុមហ៊ុអចលនទ្រព្យអន្តរជាតិ ERA លោកខន គង្គា បានផ្តល់កិច្ចសម្ភាសន៍ពិសេសជាមួយ លោកស៊ុំ ម៉ាណេត អ្នកសារព៌តមានជាន់ខ្ពស់របស់គេហទំព័រ Propertyarea.asia ស្តីពី ស្ថានភាពខុនដូនាពេលបច្ចុប្បន្ន និងអនាគតរយៈពលខ្លីនិងវែង?

តើលោកយល់ឃើញយ៉ាងដូចម្តេចដែរ ចំពោះវិស័យខុនដូនាពេលបច្ចុប្បន្ន និងនៅឆ្នាំ ២០២០ខាងមុខ?

សម្រាប់ខ្ញុំ ដោយខ្ញុំលក់ខុនដូ និងធ្វើការងារក្នុងទីផ្សារនេះ ខ្ញុំឃើញសន្ទុះនៃការទិញរបស់ភ្ញៀវយើងអត់មានការធ្លាក់ចុះទេ និងទិញភ្ញៀវរាល់ថ្ងៃ។ សម្រាប់ឆ្នាំ ២០១៩ យើងឃើញថា ប្រជាជនក្នុងស្រុក និងក្រៅស្រុកបន្តទិញធម្មតា ហើយការផ្គត់ផ្គង់ខុនដូនឹងមានច្រើន ហើយវាជាឱកាសល្អសម្រាប់អ្នកវិនិយោគ ដែលពួកគាត់មានជម្រើសកាន់តែច្រើន ក្នុងការជ្រើសរើសគម្រោងណាមួយពួកគាត់ស្រឡាញ់។

តើលោកយល់ឃើញយ៉ាងដូចម្តេច ចំពោះស្ថានភាពផ្គត់ផ្គង់ និងតម្រូវការក្នុងវិស័យខុនដូសម្រាប់អនាគត?

បើសិនជាវាស់រវាងការផ្គត់ផ្គង់ និងតម្រូវការ ការផ្គត់ផ្គង់មានច្រើននៅក្នុងទីផ្សារហើយបើយើងវាស់តែជាមួយតម្រូវការក្នុងស្រុក គឺវាមិនទាន់គ្រប់គ្រាន់ទេ។ តែយើងត្រូវដឹងថាខុនដូ គឺខុសពីប្រភេទលំនៅដ្ឋានបែបបុរី ព្រោះខុនដូចអាចរកទិញបានដោយគ្រប់ជនជាតិទាំងអស់ ដូច្នេះទីផ្សារនេះមិនមានការរឹតត្បិតទេ។

បើវាស់តែក្នុងស្រុកមិនគ្រប់គ្រាន់ទេ យើងត្រូវវាស់ដល់ទីផ្សារអន្តរជាតិ។ បើវាស់លក្ខណៈទីផ្សារអន្តរជាតិ យើងត្រូវសិក្សាពីគោលនយោបាយរបស់រដ្ឋាភិបាលដូចគ្នា ហើយបច្ចុប្បន្នយើងឃើញថា គោលនយោបាយរបស់រដ្ឋាភិបាល គឺបើកចំហរសម្រាប់ការវិនិយោគពីគ្រប់ទិសទីលើពិភពលោក។ វាធ្វើឱ្យមានការទាក់ទាញការវិនិយោគ។

បើប្រៀបធៀបនឹងតំបន់ផ្សេងៗ ដូចជាវៀតណាមនៅមានការរឹតបណ្តឹង មីយ៉ាន់ម៉ានៅមានការរឹតបណ្តឹង ថៃ ម៉ាឡេស៊ី និងសឹង្ហបូរី មានសាងសង់ខុនដូដូចគ្នា តែនៅមានការរឹតបណ្តឹង និងហិរញ្ញវត្ថុ។ វាមានន័យថា លុយទាល់តែយកគាត់ទៅទិញបាន ប៉ុន្តែប្រទេសយើង ចង់ចាយលុយចិនក៏ទិញបាន ចង់យកលុយដុល្លារមកទិញក៏បាន ដូច្នេះវាមានភាពងាយស្រួលសម្រាប់អ្នកវិនិយោគ ហើយដុល្លារនៅប្រទេសណាក៏គេប្រើប្រាស់ដែរ។

បើប្រៀបធៀបសឹង្ហបូរី មានប្រជាជនដើមតែ១,៥លាននាក់ទេ ប៉ុន្តែបច្ចុប្បន្នសឹង្ហបូរីមានជាង៥លាននាក់ ដោយសារចំណូលនៃជនជាតិបរទេស ដែលមករស់ប្រទេសសឹង្ហបូរី ដូច្នេះប្រទេសយើងក៏ដូចតែគ្នាដែរ ហើយអនាគត ការហូរចូលនៃជនជាតិបរទេសមកធ្វើការវិនិយោគ និងរស់នៅ និងបង្កើតអាជីវកម្មនៅកម្ពុជា នឹងមានកំណើនដូចគ្នា។ ដូច្នេះបើថ្លឹងការផ្គត់ផ្គង់ និងតម្រូវការវាពឹងផ្អែកគ្នាទៅវិញទៅមក។

តើលោកអាចពន្យល់បានទេទាក់ទងនឹងមូលហេតុ ដែលអ្នកវិនិយោគគួរវិនិយោគក្នុងវិស័យខុនដូសម្រាប់ផលចំណេញត្រឡប់?

មានមូលហេតុច្រើន ដែលយើងត្រូវវិនិយោគ ទី១ ខុនដូសំខាន់បំផុតគឺទីតាំង ព្រោះកន្លែងដែលសាងសង់ខុនដូ ជាទីតាំងដែលល្អ និងងាយស្រួលក្នុងការរស់នៅ ងាយស្រួលក្នុងការធ្វើដំណើរ ងាយស្រួលក្នុងការធ្វើការ ហើយបន្ទាប់មកគឺការឌីសាញ (រចនា) ដែលមានលក្ខណៈប្រណីត ល្អ បើប្រៀបធៀបជាមួយនឹងបុរី វីឡាគឺខុនដូស្អាតជាង។ ទី៣ គឺទាក់ទងនឹងប្រព័ន្ធសុវត្ថិភាព។ បើយើងនិយាយពីខុនដូ១០០ភាគរយ គឺសុវត្ថិភាពជាងរស់នៅតាមបុរី ឬវីឡា ដោយសារយើងអត់អាចដាក់ទុយោដាក់ក្នុងវីឡា និងប្រើទុយោដូចគ្នានៅក្នុងខុនដូ ព្រោះសម្ពាធទឹកខុសគ្នា។

ដូច្នេះគេប្រើប្រភេទទុយោគុណភាពល្អជាង ខ្សែភ្លើងល្អ ដើម្បីធានានូវសុវត្ថិភាព ហើយប្រព័ន្ធសុវត្ថិភាព និងប្រព័ន្ធសុវត្ថិភាពការពារអគ្គិសនីគឺរៀបចំបានល្អ។

ឧទាហរណ៍ យើងចំណាយលុយ១លានដុល្លារ ហើយទិញផ្ទះវីឡាមួយ ហើយបើយើងចំណាយលុយ១លានដុល្លារទិញខុនដូ។ ផ្ទះតម្លៃ១លានដុល្លារ អាចជួលបានតែ៣,០០០ ដុល្លារក្នុងមួយខែ ប៉ុន្តែបើយើងយក១លានដុល្លារមកទិញខុនដូ ហើយក្នុងមួយយូនីតតម្លៃ១០០,០០០ ដុល្លារ គឺយើងទិញ១០យូនីត ដោយក្នុងយូនីតយើងអាចជួលបាន៧០០ ទៅ១,០០០ ដុល្លារក្នុងមួយខែ។ ដូច្នេះការជួល១០ យូនីតអាចជួលបានចាប់ពី៧,០០០ ទៅ១០,០០០ ដុល្លារក្នុងមួយខែ។

បើប្រៀបធៀបនឹងតម្លៃជាមួយនឹងប្រទេសជិតខាង តើតម្លៃខុនដូនៅកម្ពុជាមានតម្លៃខុសគ្នាដូចម្តេចសម្រាប់ការវិនិយោគ?

បើនិយាយអំពីតម្លៃខុនដូនៅកម្ពុជា នាពេលបច្ចុប្បន្ននេះ វានៅតម្លៃល្អ បើប្រៀបធៀបក្នុងតំបន់។ យើងឃើញថា បើសិនតំបន់មានទីតាំងល្អៗបំផុត ដូចតំបន់កោះពេជ្រ យើងឃើញថា ខុនដូយើងមានតម្លៃខ្ពស់បំផុតគឺ៥០០០ ដុល្លារក្នុងមួយម៉ែត្រការ៉េ។ ប៉ុន្តែបើយើងប្រៀបធៀបជាមួយនឹងប្រទេសជាប់យើង ឧទាហរណ៍វៀតណាម ខុនដូដែលមានតម្លៃថ្លៃគឺចាប់៨,០០០ ទៅ១០,០០០ដុល្លារមួយម៉ែត្រការ៉េ ។

នៅប្រទេសថៃវិញ ខុនដូមានតម្លៃចាប់១០,០០០ ទៅ១៨,០០០ ដុល្លារក្នុងមួយម៉ែត្រការ៉េ សំរាប់ខុនដូស្ថិតនៅតំបន់កណ្តាលក្រុង ទីតាំងល្អ។ ចំណែកសឹង្ហបូរីវិញ តម្លៃខុដូមានឡើងទៅ១០០,០០០ ដុល្លាក៏មានដែរក្នុងមួយម៉ែត្រការ៉េ។

ដូច្នេះហើយនៅក្នុងតំបន់ តម្លៃនៃទីផ្សារខុនដូរបស់យើង គឺទទួលយកបាន អីចឹងហើយបានជាអ្នកវិនិយោគក្នុង និងក្រៅស្រុកនាំគ្នាទិញកាន់តែច្រើន។

តើអ្នកវិនិយោគពីក្រៅស្រុកភាគច្រើនមកពីប្រទេសណាខ្លះ?

អ្នកវិនិយោគមកពីក្រៅស្រុក គឺអាស្រ័យលើគម្រោង។ បើសិនគម្រោងមានការអភិវឌ្ឍធំភាគច្រើនមកពីសឹង្ហបូរី អ្នកទិញភាគច្រើនមកពីសឹង្ហបូរី។ បើសិនគម្រោងមានការអភិវឌ្ឍធំមកពីហុងកុង អ្នកទិញមកពីហុងកុង បើសិនគម្រោងមានអភិវឌ្ឍធំមកពីចិន អ្នកទិញភាគច្រើនមកពីចិន។ បើសិនគម្រោងមានកការអភិវឌ្ឍធំមកពីជប៉ុន អ្នកទិញមកពីជប៉ុន បើសិនគម្រោងមានអភិវឌ្ឍធំមកពីកូរ៉េ អ្នកទិញមកពីកូរ៉េភាគច្រើន។

ដូច្នេះអ្នកទិញមកពីក្រៅប្រទេស គឺអាស្រ័យលើអ្នកអភិវឌ្ឍន៍ ប៉ុន្តែគម្រោងមួយចំនួនដែលរៀបចំបានល្អ និងត្រូវលក្ខខណ្ឌ អ្នកវិនិយោគមកពីគ្រប់ប្រទេសតែម្តង។

តើទីតាំងណាខ្លះ ដែលកំពុងមានប្រជាប្រិយភាពសម្រាប់ការអភិវឌ្ឍន៍ និងការវិនិយោគខុនដូ?

ទីតាំងទី១ គឺតំបន់ជ្រោយចង្វារ ដោយសារបច្ចុប្បន្ន យើងឃើញមានការវិនិយោគកំពុងតែកើនឡើង ហើយហេតុអ្វីបានតំបន់ជ្រោយចង្វារ នាពេលអនាគតមានសក្កានុពលខ្លាំង ដោយសារវាមានទន្លេសងខាង។

នៅលើពិភពលោក ទោះអាមេរិកក៏ដោយ សឹង្ហបូរីក៏ដោយ សៀងហៃក៏ដោយ ហុងកុងក៏ដោយ តំបន់ដែលមានទន្លេសងខាង គឺជាតំបន់តម្លៃអចលនទ្រព្យថ្លៃបំផុត។ ដូច្នេះយើងឃើញថា តំបន់ជ្រោយចង្វារមានលក្ខខណ្ឌទាំងអស់នេះ ហើយទល់មុខទន្លេ យើងឃើញមានកោះពេជ្រ អីចឹងបានជាយើងឃើញអាគារមួយចំនួន មាននៅកោះពេជ្រច្រើន។ បន្ទាប់គឺផ្លូវ៦០ម៉ែត្រ ដោយសារតំបន់នោះគឺតំបន់ ដែលគេរៀបចំជាទីក្រុងថ្មីមួយ ហើយតំបន់ហ្នឹងប្រជុំដោយផ្សារទំនើប ដូចយើងឃើញគម្រោងAEON 3 គម្រោងជីបម៉ុង គម្រោងប៉េងហួត ផ្សារទំនើបផ្សេងៗពីសឹង្ហបូរី នៅក្នុងតំបន់នេះ ដូច្នេះវាទាក់ទងដល់ការវិនិយោគ។

ក្រៅពីតំបន់ទាំងនេះ តំបន់ទួលគោក គឺតំបន់ដែលមានសក្កានុពលដូចគ្នា ដោយសារតំបន់មានភាពងាយស្រួល ដែលសម្បូរដោយហាងទំនើបៗ ហាងញាំអាហារ សាលារៀន និងមន្ទីពេទ្យ ហើយវាជួយដល់ការរស់នៅមានភាពងាយស្រួល។

តើប្រភេទខុនដូណាខ្លះដែលមានប្រជាប្រិយសម្រាប់ការវិនិយោគ?

បច្ចុប្បន្នយើងមានខុនដូប្រភេទA ប្រភេទ B ប្រភេទ C។ តាមការពិតវាមានដល់ប្រភេទD។ តម្លៃខុនដូប្រភេទ A ចាប់ពី៣,៥០០ ទៅដល់៥,០០០ ដុល្លារក្នុងមួយម៉ែត្រការ៉េ ហើយជាមួយខុនដូប្រភេទនេះ ប្រជាជនកម្ពុជាយើងពិបាក ក្នុងការទទួលយក ដោយ សារតម្លៃហួសសមត្ថភាពរបស់គាត់ ហើយមានតែអ្នកមានមួយចំនួនតូច បន្ទាប់មកគឺជនជាតិបរទេស។

ជាមួយខុនដូប្រភេទ B យើងឃើញថាមានប្រជាជនកម្ពុជា ចាប់ផ្តើមផ្លាស់ប្តូរពីខុនដូប្រភេទC ដោយសារតម្លៃចាប់ពី២,០០០ ដល់៣,០០០ ដុល្លារក្នុងមួយម៉ែត្រការ៉េ ហើយប្រភេទដែលពេញនិយមបំផុត គឺមានតម្លៃចាប់ពី១,៥០០ ទៅ២,០០០ ដុល្លារក្នុងមួយម៉ែត្រការ៉េ។

កាលពីពេលថ្មីៗនេះច្បាប់ស្តីពី សំណង់ត្រូវបានដាក់ឱ្យប្រើប្រាស់ជាផ្លូវការ។ តើច្បាប់នេះ អាចជួយដល់វិស័យខុនដូយ៉ាងដូចម្តេច?

ខ្ញុំអបអរសាទរចំពោះការដាក់ចេញនូវច្បាប់ស្តីពី សំណង់ជាផ្លូវការ ។ វាជាសញ្ញាមួយល្អ។ទី១រដ្ឋាភិបាលយកចិត្តទុកដាក់ទៅដល់អ្នកប្រើប្រាស់ គឺអ្នកទិញខុនដូ ដូច្នេះរដ្ឋាភិបាលសិក្សារួចហើយពី A ដល់Z ថា តើគម្រោងហ្នឹងមានថវិកាគ្រប់គ្រាន់ ក្នុងការសាងសង់ឬអត់។ គម្រោងហ្នឹងលក្ខខណ្ឌ បទដ្ឋានបច្ចេកទេស និងច្បាប់សំណង់ច្បាស់លាស់ ឬអត់។

បើសិនជាគម្រោងមានគ្រប់លក្ខខណ្ឌ រដ្ឋាភិបាលអនុញ្ញាតឱ្យសាងសង់ ដូច្នេះវាជាសញ្ញាល្អមួយ សម្រាប់អ្នកប្រើប្រាស់ ទាំងប្រជាជនជាតិ និងអន្តរជាតិ៕

រដ្ឋមន្ត្រីសាធារណៈការបញ្ជាក់ពីដំណើរវិវត្តន៍នៃការសាងសង់ផ្លូវល្បឿនលឿនរាជធានីភ្នំពេញទៅក្រុងព្រះសីហនុ

ដោយនៅ ស៊ីវុត្ថា

ភ្នំពេញ: គម្រោងសាងសង់ផ្លូវល្បឿនលឿន ចេញរាជធានីភ្នំពេញ-ក្រុងព្រះសីហនុ ប្រវែងប្រមាណ ១៩០,០៣៥ គីឡូម៉ែត្រ និងគ្រោងប្រើប្រាស់ថវិកាវិនិយោគប្រមាណ ២ពាន់លានដុល្លារសហរដ្ឋអាមេរិក បានសម្រេចភាពជាវិជ្ជមានហើយ។

លោកទេសរដ្ឋមន្រ្តី ស៊ុន ចាន់ថុល រដ្ឋមន្រ្តីក្រសួងសាធារណការ និងដឹកជញ្ជូន បានដឹកនាំគណៈប្រតិភូក្រសួង ដែលអញ្ជើញចុះពិនិត្យមើលវឌ្ឍនភាព នៃការសាងសង់ផ្លូវល្បឿនលឿនរាជធានីភ្នំពេញ-ក្រុងព្រះសីហនុ កាលពីថ្ងៃទី៨ ខែធ្នូ ឆ្នាំ២០១៩កន្លងមក បានអោយដឹងថា ផ្លូវនេះតភ្ជាប់ពីភូមិ១ សង្កាត់សំរោងក្រោម ខណ្ឌពោធិ៍ សែនជ័យ រាជធានីភ្នំពេញ ដល់ក្រុងព្រះសីហនុ។

លោកបន្តថា ផ្លូវហាយវេជាប្រវត្តិសាស្រ្តរបស់កម្ពុជានេះ ទទួលបន្ទុកការងារសាងសង់ដោយក្រុមហ៊ុន Cambodian PPSHV Expressway Co., Ltd និងត្រួតពិនិត្យបច្ចេកទេសដោយក្រុមហ៊ុន MINCONSULT SDN. BHD. គ្រោងចំណាយថវិកាសាងសង់ប្រមាណ២ ពាន់លានដុល្លារសហរដ្ឋអាមេរិក។ រហូតមកទល់ពេលនេះ រហូតមកដល់ពេលនេះដំណើរការសាងសង់សម្រេចបាន៧,៣០%ហើយ គិតត្រឹមខែវិច្ឆិកា ឆ្នាំ២០១៩កន្លងមកនេះ។

ការសាងសង់ផ្លូវដ៏សំខាន់នេះ គ្រោងប្រើរយៈពេលសាងសង់៤៨ខែ។ ផ្លូវនេះមានគន្លងផ្លូវចំនួន៤គន្លងទទឹង២៤,៥ម៉ែត្រ មានផ្លូវបំបែកទិស៧កន្លែង កន្លែងឈប់សម្រាកចំនួន៣កន្លែង ចំណតរថយន្ត១កន្លង មណ្ឌលប្រតិបត្តិការនិងថែទាំចំនួន៤កន្លង ស្ពានធំ និងស្ពានមធ្យមចំនួន៤០កន្លែង ស្ពានតូចចំនួន៥ កន្លែង ឆ្លងកាត់រាជធានីភ្នំពេញប្រមាណ ៨,៣ គីឡូម៉ែត្រ និងខេត្តចំនួន៤ទៀត ក្នុងនោះរួមមាន ខេត្តកណ្តាលប្រវែងប្រមាណ ៩,១ គីឡូម៉ែត្រ ខេត្តកំពង់ស្ពឺប្រវែងប្រមាណ៨០,៨គីឡូម៉ែត្រ ខេត្តកោះកុងប្រវែងប្រមាណ ១,៩២ គីឡូម៉ែត្រ និងខេត្តព្រះសីហនុប្រវែងប្រមាណ៨៩,៨៩គីឡូម៉ែត្រ។

ផ្លូវល្បឿនលឿនភ្នំពេញ ក្រុងព្រះសីហនុ បានបើកការដ្ឋានសាងសង់កាលពីថ្ងៃទី២២ ខែមីនា ឆ្នាំ២០១៩ក្រោមអធិបតីភាពរបស់សម្តេចតេជោហ៊ុន សែននាយករដ្ឋមន្រ្តីនៃកម្ពុជា៕

ចំណេះដឹង! ដូចម្តេចដែលហៅថាគោលនយោបាយសារពើពន្ធ?

ដោយ វុត្ថា

ភ្នំពេញៈ គោលនយោបាយសារពើពន្ធ សំដៅលើការយកពន្ធ និងវិធីរកចំណូលផ្សេងៗទៀត និងចំណាយរបស់រដ្ឋ ដោយបែងចែកធនធានសេដ្ឋកិច្ច ក្នុងគោលបំណងជំរុញឲ្យមានកំណើនសេដ្ឋកិច្ចប្រកបដោយចីរភាពនិងសមធម៌។

ដើម្បីលើកកម្ពស់ប្រសិទ្ធភាព លើគោលនយោបាយសារពើពន្ធរដ្ឋ ត្រូវអនុវត្តសកម្មភាព សំខាន់ៗដូចជា ១. ប្រសិទ្ធភាពនៃការគ្រប់គ្រង និងគៀងគរចំណូល ២. ការធ្វើវិចារណៈកម្មចំណាយ គឺបែងចែកចំណាយថវិការដ្ឋរវាងការប្រើប្រាស់ និងការវិនិយោគសាធារណៈឲ្យបានសមស្រប។

គោលនយោបាយសារពើពន្ធរបស់ប្រទេសនីមួយៗ គួរតែមានគោលដៅ ជាគោលការណ៍ចំនួនបួនគឺ៖ (១) ការបែងចែកធនធាន (២) ស្ថេរភាពវូបនីយកម្ម (៣) កំណើន (៤) ការបែងចែកនៃប្រាក់ចំណូលនៃទ្រព្យសម្បត្តិឲ្យស្មើគ្នា។

តាមរយៈពន្ធ និងចំណាយសាធារណៈរដ្ឋាភិបាល បានដើតួនាទីសំខាន់ ក្នុងការបែងចែកបណ្តាធនធាននៅក្នុងសេដ្ឋកិច្ច និងជំរុញខ្សែសង្វាក់ផលិតកម្មឲ្យកើនឬមិនកើនឡើង៕

លោក Rick Davidson អ្នកជំនាញក្នុងវិស័យអចលនទ្រព្យកម្រិតពិភពលោកធ្វើបាឋកថា អំពីវិស័យអចលនទ្រព្យជាលើកដំបូងនៅកម្ពុជា

ដោយគង់ សូរិយា

ភ្នំពេញៈ លោក Rick Davidson ដែលជាអ្នកជំនាញដ៏សំខាន់មួយរូបក្នុងការធ្វើឲ្យម៉ាកយីហោក្រុមហ៊ុន អចលនទ្រព្យCentury 21 Real Estate របស់អាមេរិកល្បីល្បាញលើពិភពលោកបានធ្វើបឋកថាលើកដំបូងស្តីពី វិស័យអចលនទ្រព្យនៅកម្ពុជាតាមរយៈក្រុមហ៊ុន Centuruy21 Cambodia។

លោក Rick Davidson បានចំណាយពេលពេញ៣ទសវត្សរ៍ ក្នុងអាជីពក្នុងវិស័យអចលនទ្រព្យ និងការអភិវឌ្ឍន៍យីហោក្រុមហ៊ុន Century21។ ការមកដល់កម្ពុជានាពេលនេះ លោកនឹងចែករំលែកចំណេះដឹងលើប្រធានបទស្តីពី «គន្លឹះនៃភាពជោគជ័យក្នុងការកសាងម៉ាកយីហោ Century 21 Everest»។

លោកស្រី Grace Rachny Fong នាយិការក្រុមហ៊ុន Century21 Cambodia បានចាត់ទុកព្រឹតិ្តការចែករំលែកចំណេះដឹងនេះ គឺជាឱកាសកម្រសម្រាប់អ្នកមានអាជីពជាភ្នាក់ងារអចលនទ្រព្យនៅកម្ពុជា ហើយលោកស្រីរំពឹងថា អ្នកជំនាញនៅកម្ពុជានឹងទទួលបានចំណេះដឹងថ្មីៗ ដើម្បីអភិវឌ្ឍន៍សមត្ថភាពរបស់ពួកគេ និងដើម្បីប្រើប្រាស់ជាទុនសម្រាប់កសាងម៉ាកយីហោក្រុមហ៊ុន ឲ្យកាន់តែទទួលបានទំនុកចិត្តខ្លាំង ពីសាធារណៈជន។

លោកស្រីថ្លែងថា៖ «ការដែលអ្នកជំនាញដូចជាលោក Rick Davidson អាចនៅជាមួយក្រុមហ៊ុនមួយរហូតដល់ទៅ៣០ឆ្នាំ គឺជារឿងកម្រ និងជារឿងដ៏គួរឲ្យចាប់អារម្មណ៍បំផុត”។ លោកស្រីបន្ថែមថា “ទាំងនេះគឺដោយសារម៉ាកយីហោក្រុមហ៊ុន Century21 Real Estate គឺជាម៉ាកយីហោក្រុមហ៊ុនអចលនទ្រព្យដ៏គួរឲ្យទុកចិត្ត និងរឹងមាំ និងតែងមានការអភិវឌ្ឍន៍ជារៀងដរាប”។

ក្នុងនាមជាអ្នកជំនាញជាន់ខ្ពស់ លោក Davidson តែងចែករំលែកពេលវេលាដ៏មមាញឹករបស់លោក ដើម្បីធ្វើបាឋកថាដល់ភ្នាក់ងារអចលនទ្រព្យ នៅតាមប្រទេសដែលមានសេដ្ឋកិច្ច និងវិស័យអចលនទ្រព្យរីកចម្រើនខ្លាំង។ ដូច្នេះ វត្តមានរបស់លោកនៅកម្ពុជានាពេលនេះ ឆ្លុះបញ្ជាំងពីការរីកចម្រើន នៃវិសយអចលនទ្រព្យរបស់កម្ពុជា ហើយលោកប្រាកដជាសម្លឹងឃើញឱកាស ឬសក្តានុពលល្អណាមួយ ពីការរីកចម្រើននៃវិស័យអចលនទ្រព្យកម្ពុជាមិនខាន។

លោក Rick Davidson បានចំណាយពេលជិត១០ ឆ្នាំក្នុងតួនាទីជា នាយកប្រតិបត្តិក្រុមហ៊ុន Century21 Real Estate មានការិយាល័យកណ្តាលនៅសហរដ្ឋអាមេរិក និងជាក្រុមហ៊ុនមេគ្រប់គ្រង លើការិយាល័យ Century21 ទូទាំងពិភពលោក។ លោក Davidson ត្រូវបានចាត់បញ្ចូលក្នុងបញ្ជី អ្នកមានឥទ្ធិពលខ្លាំង នៅក្នុងវិស័យអចលនទ្រព្យ Inman’s Real Estate Influencers របស់សារព័ត៌មានអចលនទ្រព្យ Inman នៅចន្លោះពីឆ្នាំ២០១១ ដល់ ឆ្នាំ ២០១៧។

រហូតដល់ឆ្នាំ ២០១៧ លោក Davidson ត្រូវបានផ្ទេរតួនាទីទៅជា Principle and President របស់ក្រុមហ៊ុន Everest Group ដែលជាក្រុមហ៊ុនមេរបស់ Century21 Everest-Troop Real Estate ដែលមានការិយាល័យ១៧ នៅរដ្ឋ Utah និងរដ្ឋCalifornia សហរដ្ឋអាមេរិក ហើយបានធ្វើឲ្យ Century21 Everest ក្លាយជាក្រុមហ៊ុនអចលនទ្រព្យលេខ១លើពិភពលោកនៅឆ្នាំ ២០១៩ នេះ។

សម្រាប់ទីផ្សារប្រទេសកម្ពុជាវិញ គិតមកទល់ពេលនេះ ការិយាល័យ Century21 នៅកម្ពុជាមាន២៣ ការិយាល័យ (ភ្នំពេញ ២២ និង ព្រះសីហនុ ១) ហើយស្របពេលវិស័យអចលនទ្រព្យកម្ពុជា បន្តរីកចម្រើនខ្លាំង។

លោក Grace Rachny Fong បានបញ្ជាក់ថា នៅមានឱកាសជាច្រើនទៀតសម្រា ប់ភ្នាក់ងារអចលនទ្រព្យ ក្នុងការពង្រីកអាជីវកម្មរបស់ពួកគេ ហើយការជ្រើសរើសក្រុមហ៊ុនដែលមានម៉ាកយីហោល្បីល្បាញ និងមានបណ្តាញជុំវិញពិភពលោកដូចជា Century21 នឹងជួយឲ្យអាជីវកម្មកាន់តែប្រសើរឡើង។

លោកស្រីបន្តថា “យើងនឹងពង្រីកការិយាល័យ Century21 ឲ្យបាន៣៨ការិយាល័យនៅតាម រាជធានី និងខេត្តទាំង២៥ នៅកម្ពុជានៅឆ្នាំ ២០២០ ខាងមុខនេះ ហើយយើងបានត្រៀមខ្លួនរួចជាស្រេច ក្នុងការផ្តល់យោបល់ល្អៗដល់ការិយាល័យ Franchise Century21ថ្មីៗ ដោយទទួលបានកិច្ចសហការផ្តល់ប្រឹក្សាយោបល់ ពីស្នាក់ការ Century21 ពីសឹង្ហបុរី ជប៉ុន តៃវ៉ាន់ និងចិនជាដើម”។

លោកស្រីបន្តថា ក្រុមហ៊ុន Century21 Cambodia ដែលមានលោក គុយ វ៉ាត ជាប្រធានក្រុមប្រឹក្សាភិបាល មានទីប្រឹក្សាជំនាញៗជាច្រើន សម្រាប់ផ្តល់យោបល់ និងយុទ្ធសាស្រ្ត សម្រាប់ទីផ្សារអចលនទ្រព្យនៅក្នុងតំបន់អាស៊ីអាគ្នេយ៍ និងទីផ្សារក្នុងប្រទេសអាស៊ី។ ក្នុងនោះ លោក ឈិន ភារុណ និង លោក Sambath Sprung គឺជាទីប្រឹក្សាសម្រាប់ទីផ្សារកម្ពុជា លោក Philip Fong ជាទីប្រឹក្សាពីប្រទេសសឹង្ហបុរី លោក Gino Chen សម្រាប់ទីផ្សារតៃវ៉ាន់ និងលោក Nagamatsu Hideyuki ជាអ្នកជួយផ្តល់ប្រឹក្សាសម្រាប់ទីផ្សារប្រទេសជប៉ុន។

លោកទីប្រឹក្សាទាំង៥រូប បានលើកឡើងនៅក្នុងសេចក្តីថ្លែងរួមមួយថា “វាជាសមទ្ធិផលមួយដែលយើងបានរួមចំណែក និងបានឃើញការរីកលូតលាស់របស់ក្រុមហ៊ុន Century21 Cambodia រហូតបានក្លាយទៅជាក្រុមហ៊ុនអចលនទ្រព្យមួយ ដែលត្រូវបានទទួលស្គាល់ខ្លាំងជាងគេតំណាងកម្ពុជាសម្រាប់តំបន់អាស៊ី និង ប៉ាស៊ីហ្វិក”។

លោក Ken Lo នាយកប្រតិបត្តិក្រុមហ៊ុន Century21 Imperial Realty Co., Ltd ដែលជាសមាជិកការិយាល័យមួយរបស់ Century21 Cambodia បានបញ្ជាក់ថា ម៉ាកយីហោក្រុមហ៊ុន Century21 ពិតជាបានរួមចំណែកបង្កើនទំនុកចិត្ត ដល់អតិថិជន ហើយបានធ្វើឲ្យអាជីវកម្មរបស់លោកមានការរីកចម្រើនជាបន្តបន្ទាប់។

លោកថ្លែងថា “វត្តមានរបស់អ្នកជំនាញជាន់ខ្ពស់ ដូចជាលោក Davidson នៅទីផ្សាររបស់យើងនាពេលនេះ គឺជាសារដ៏សំខាន់បញ្ជាក់ថា ទីផ្សារយើងកំពុងមានភាពល្អឡើង សេដ្ឋកិច្ចយើងកំពុងមានភាពរឹងមាំ ហើយវិស័យអចលនទ្រព្យយើងនឹងនៅបន្តរីកចម្រើនថែមទៀត”។

សេចក្តីសង្ខេបអំពីក្រុមហ៊ុន

ក្រុមហ៊ុន Century21 Cambodia គឺជាក្រុមហ៊ុនសេវាអចលនទ្រព្យ ដែលមានបណ្តាញនៅជុំវិញពិភពលោក និងជាក្រុមហ៊ុនមេនៅកម្ពុជា ដែលទទួលសិទ្ធធ្វើអាជីវកម្មលើម៉ាកយីហោ Century21 Real Estate ដែលមានការិយាល័យកណ្តាលនៅសហរដ្ឋអាមេរិក។ គិតមកទល់ពេលនេះ ក្រុមហ៊ុន Century21 Cambodia បានផ្តល់សិទ្ធបន្តដល់ក្រុមហ៊ុនអចលនទ្រព្យដែលប្រើយីហោ Century21 ដល់ ២៣ ក្រុមហ៊ុន។

ក្រុមហ៊ុន Century21 Real Estate ត្រូវបានបង្កើតឡើងនៅឆ្នាំ ១៩៧១ ហើយគិតមកទល់បច្ចុប្បន្ន ក្រុមហ៊ុននេះកំពុងមានប្រតិបត្តិការនៅ៨១ប្រទេស និងមានការិយាល័យសរុបជាង៧ ២៥០កន្លែង។ កម្ពុជាជាប្រទេសទី៧៥ ដែលក្រុមហ៊ុនលំដាប់អន្តរជាតិរបស់អាមេរិកមួយនេះបានដាក់ប្រតិបត្តិការ៕

ក្រុមហ៊ុន Mapletree បោះទុន ៣៥៥លានដុល្លារទិញការិយាល័យនៅតូក្យូចំពេលមានការបិទផ្សារនៅហុងកុង

ដោយ វុត្ថា

ភ្នំពេញៈ ក្រុមហ៊ុន Mapletree North Asia Commercial Trust ដែលបានចុះបញ្ជីនៅប្រទេសសិង្ហបុរី បានយល់ព្រមទិញអគារការិយាល័យចំនួន២នៅតំបន់ Greater Tokyo ក្នុងតម្លៃ ៣៥៤,៧លានដុល្លារអាមេរិក ខណៈពេលដែលមានការបិតផ្សារទំនើប Festival Walk នៅទីក្រុងហុងកុងដោយសារបាតុកម្មខ្លាំងក្លា។

យោងតាមការចុះផ្សាយរបស់ពីគេហទំព័រ PAC Real Estate កាលពីពេលថ្មីៗនេះ បានឱ្យដឹងថា ក្រុមហ៊ុន Mapletree បានចំណេញទ្រព្យសម្បត្តិសុទ្ធ៤.៥% ពីអ្នកឧបត្ថម្ភរបស់ខ្លួនគឺក្រុមហ៊ុន Mapletree Investment បន្ទាប់ពីផ្សារទំនើប Festival Walk កំពស់ ៧ ជាន់ត្រូវបានខូចខាតយ៉ាងខ្លាំង អំឡុងពេលបាតុកម្មនៅហុងកុង ហើយត្រូវបានបិទទ្វារកាលពីថ្ងៃទី១៣ ខែវិច្ឆិកា ហើយគ្រោងនឹងបើកដំណើរការឡើងវិញ នៅត្រីមាសទី១ឆ្នាំ ២០២០ ។

នាយកប្រតិបត្តិនៃអ្នកគ្រប់គ្រងក្រុមហ៊ុន Mapletree លោក Cindy Chow ឱ្យដឹងថា ការទិញយកអគារការិយាល័យចំនួន២ នៅ Greater Tokyo នឹងចូលរួមចំណែកដល់ការធ្វើពិពិធកម្ម របស់ក្រុមហ៊ុន Mapletree North Asia Commercial Trust ( MNACT) ហើយក្នុងពេលតែមួយកាត់បន្ថយចំណូល និងការប្រមូលផ្តុំនៅផ្សារទំនើប Festival Walk ។

ប្រតិបត្តិការនេះរួមបញ្ចូលទាំងអគារ Omori Prime ដែលស្ថិតនៅក្នុងតំបន់ Shinagawa ដែលមានទំហំ ៦.៧៩៨ ម៉ែត្រក្រឡា ដែលមានកំពស់១៣ជាន់។ អគារ mBay Point Makuhari មានកម្ពស់ ២៦ ជាន់មានទីតាំងនៅទីក្រុងChiba បាដែលមានទំហំ ៨៤.៧៨៥ ម៉ែត្រក្រឡា។

លោក Chow បន្តថា អាគារទំាងពីនៅប្រទេសជប៉ុននេះ គឺផ្តល់នូវទិន្នផលខ្ពស់បើប្រៀបធៀបនឹងថ្លៃដើមក្នុងស្រុក បើប្រៀបធៀបនឹងទីផ្សារប្រទេសចិន។ អគារការិយាល័យទាំងពីរនេះ គឺស្ថិតនៅក្នុងតំបន់ដ៏គួរឱ្យទាក់ទាញគឺតំបន់ Greater នៃទីក្រុងតូក្យូ និងមានភាពងាយស្រួល ក្នុងការធ្វើដំណើរទៅកាន់កន្លែងដឹកជញ្ជូនសាធារណៈ និងមានលក្ខណៈល្អប្រសើរ និងជាទីតាំងដែលសន្សំសំចៃសម្រាប់អ្នកជួល៕

រោងចក្រអគ្គិសនី ៤០០មេហ្កាវ៉ាត់ថ្មីនៅខេត្តកណ្តាលបាននិងកំពុងត្រៀមចាប់ផ្តើមសាងសង់

ដោយៈ រ៉ាណេត

ភ្នំពេញៈ រោងចក្រផលិតអគ្គិសនី ៤០០មេហ្កាវ៉ាត់ថ្មីនៅស្រុកល្វាឯម ខេត្តកណ្តាល បាននិងកំពុងត្រៀមចាប់ផ្តើមសាងសង់ ដើម្បីត្រៀមបំពេញឲ្យការផ្គត់ផ្គង់សម្រាប់បណ្តាញជាតិនៅរដូវប្រាំងខាងមុខនេះ។ នេះបើយោងតាមការអោយដឹងពីគេហទំព័រអគ្គីយនីកម្ពុជាដែលបានផ្សព្វផ្សាយនៅថ្ងៃទី៨ ខែធ្នូ ឆ្នាំ ២០១៩កន្លងមកនេះ។

រដ្ឋមន្ត្រីក្រសួងរ៉ែ និងថាមពល លោកស៊ុយ សែម បានឱ្យដឹងកាលពីថ្ងៃទី៨ ធ្នូកន្លងមកនេះបានឲ្យដឹង ក្នុងពេលចុះពិនិត្យរោងចក្រ អគ្គិសនីដើរដោយប្រេងខ្មៅ នៅឃុំកោះរះ ស្រុកល្វាឯម ខេត្តកណ្តាលថា រោងចក្រផលិតអគ្គិសនីទំហំ ៤០០មេហ្កាវ៉ាត់ ស្ថិតនៅស្រុកល្វាឯម ខេត្តកណ្តាលនេះ នឹងបញ្ចេញថាមពលមកបណ្តាញជាតិ នៅមុនពាក់កណ្តាលឆ្នាំ២០២០ ខណៈក្រុមជំនាញកំពុងសម្រុកធ្វើការសាងសង់ទាំងយប់ទាំងថ្ងៃ។

លោកបន្ថែមថា “រដ្ឋាភិបាលបានចំណាយថវិការបស់ជាតិ ដើម្បីបង្កើតរោងចក្រនេះឡើង ដែលមានកំលាំងថាមពលប្រមាណ ៤០០មេហ្គាវ៉ាត់ ដោយគ្រោងសាងសង់ឲ្យរួចរាល់ជាស្ថាពរ នៅមុនពាក់កណ្តាល ឆ្នាំ២០២០ខាងមុខ ដើម្បីទ្រទ្រង់ការកង្វះអគ្គិសនីនៅរដូវប្រាំង នឹងទៅឆ្នាំខាងមុខបន្តបន្ទាប់ទៀត”។

លោកស៊ុយ សែនបានបន្តថា នៅក្នុងរដូវប្រាំងខាងមុខនេះ នឹងទៅឆ្នាំខាងមុខបន្តទៀត កម្ពុជាមិនមានការខ្វះខាតថាមពលអគ្គិសនី សម្រាប់ប្រើប្រាស់ទៀតឡើយ។ គម្រោងការសាងសង់រោងចក្រនេះ បើតាមការសន្យារបស់ក្រុមហ៊ុន គឺធ្វើយ៉ាងណាជំរុញការសាងសង់ នឹងគ្រោងដាក់ឲ្យដំណើរការ១០០មេហ្គាវ៉ាត់ជាមុនសិន នៅក្នុងរដូវប្រាំងនាមុនឱកាសបុណ្យចូលឆ្នាំប្រពៃណីខ្មែរ ដើម្បីបំពេញនឹងតម្រូវការ នៃការប្រើប្រាស់អគ្គិសនីនៅកម្ពុជា។

លោករដ្ឋមន្ត្រីបន្ថែមថា “ដូច្នេះនៅក្នុងរដូវប្រាំងខាងមុខនេះ កម្ពុជាមិនមានការខ្វះខាតថាមពលអគ្គិសនីសម្រាប់ប្រើប្រាស់ទៀតឡើយ ទោះបីរោងចក្រអគ្គិសនីដើរដោយប្រេងខ្មៅ ដែលគ្រោងដាក់ឲ្យដំណើរការ នៅក្នុងរដូវប្រាំងខាងមុខនេះ សាងសង់មិនទាន់ចប់តាមផែនការយ៉ាងណាក៏ដោយ”។

សម្តេចតេជោ ហ៊ុន សែន នាយកដ្ឋមន្ត្រីនៃកម្ពុជាកាលពីកន្លងទៅថ្មីៗនេះផងដែរ បានតម្រូវឱ្យក្រុមហ៊ុនសាងសង់ រោងចក្រផលិតអគ្គិសនីនេះ សាងសង់ទាំងយប់ទាំងថ្ងៃ ដើម្បីឆ្លើយតបទៅនឹងកង្វះខាតអគ្គិសនីប្រើប្រើប្រាស់ នៅក្នុងទីក្រុងភ្នំពេញ និងចែកចាយទៅកាន់ខេត្តជាគោលដៅរបស់កម្ពុជា។

រាជរដ្ឋាភិបាលកម្ពុជាសហការជាមួយអាជ្ញាធរអគ្គីសនីកម្ពុជា កាលពីកន្លងទៅបានបោះទុនវិនិយោគជិត៤០០លានដុល្លារអាមេរិក ដើម្បីសាងសង់លើរោងចក្រ៤០០មេហ្កាវ៉ាត់ HFO/LNG មួយនេះក្នុងគោលដៅ ដើម្បីរួមចំណែកមួយនៃផែនការបន្ថែម អានុភាពចំនួនជាង១០០០មេហ្កាវ៉ាត់ទៀត សម្រាប់ឆ្នាំ២០២០។

រោងចក្រផលិតអគ្គិសនី៤០០មេហ្កាវ៉ាត់នៅស្រុកល្វាឯមនេះ ត្រូវបានបញ្ជាទិញម៉ាស៊ីន២០០មេហ្កាវ៉ាត់ ពីប្រទេសអាល្លឺម៉ង់២០០មេហ្កាវ៉ាត់ ពីប្រទេសហ្វាំងឡង់ ហើយក្រុមហ៊ុន ចិនពីរធំជាអ្នកសាងសង់។

គិតដល់ឆ្នាំ២០១៩នេះ រោងចក្រអគ្គិសនីរបស់កម្ពុជា ដែលដាក់ឲ្យកំពុងដំណើរការមាន វារីអគ្គិសនីចំនួន៧កន្លែង អគ្គិសនីដុតធ្យូងថ្មចំនួន២ និងអគ្គិសនីដើរដោយថាមពលពន្លឺព្រះអាទិត្យចំនួន២ ក្នុងនោះចំពោះខ្សែបញ្ជូនអគ្គិសនីជាតិ តភ្ជាប់ទៅខេត្តផ្ទាល់មានចំនួន២០ និងមិនផ្ទាល់ចំនួន៥ ដែលកំពុងផ្គត់ផ្គង់ថាមពលអគ្គិសនី គ្របដណ្តប់លើភូមិចំនួន៩៣% នៃចំនួនភូមិទាំងអស់នៅទូទាំងប្រទេស នឹងបានតភ្ជាប់អគ្គិសនីប្រើប្រាស់ បានចំនួន៧៤% នៃលំនៅឋានសរុបនៅកម្ពុជាផងដែរ៕

លោកស្រី ចេវ សុឃុន ជាប់ឆ្នោតជាប្រធានសមាគមអ្នកជំនាញអចលនវត្ថុកម្ពុជា អាណត្តិទី៣ ឆ្នាំ២០២០

ដោយ ៖ រ៉ាណេត

ភ្នំពេញ ៖ ក្រោយអាណត្តិទី២ ដែលដឹកនាំដោយលោក ឃាង ពុទ្ធី ត្រូវបានបញ្ចប់ នៅត្រឹមរសៀលថ្ងៃទី៧ ខែធ្នូ ឆ្នាំ២០១៩ លោកស្រី ចេវ សុឃុន អគ្គនាយិកាក្រុមហ៊ុនអចលនទ្រព្យ KAT Appraisal Co,.Ltd បានជាប់ឈ្មោះជាប្រធានសមាគមអ្នកជំនាញអចលនទ្រព្យកម្ពុជា អាណត្តិទី៣ ឆ្នាំ២០២០ ។

សម្រាប់បេក្ខភាពដែលឈរឈ្មោះបោះឆ្នោតជាប្រធានសមាគមអ្នកជំនាញអចលនទ្រព្យកម្ពុជាអាណត្តិទី៣ ឆ្នាំ២០២០ខាងមុខនេះ មានចំនួន២រូប រួមមានលោកស្រី ចេវ សុឃុន អគ្គនាយិកាក្រុមហ៊ុនអចលនទ្រព្យ KAT Appraisal Co,.Ltd លេខរៀងទី១ និងលោក ចក់ ស៊ីណាត អគ្គនាយកក្រុមហ៊ុនអចលនទ្រព្យ Kraty Realty Co,. Ltd ។

បន្ទាប់ពីបានឆ្លងកាត់នូវការបោះឆ្នោតសម្ងាត់ និងប្រកបដោយតម្លាភាព ដែលគាំទ្រដោយសមាជិករបស់សមាគមអ្នកជំនាញអចលនទ្រព្យកម្ពុជាពេញសិទ្ធិ៤០រូប តំណាង៤០ក្រុមហ៊ុន ក្នុងចំណោមសមាជិកសរុបទាំងអស់៧៩ក្រុមហ៊ុននោះ លោកស្រី ចេវ សុឃុនត្រូវបានជាប់ឈ្មោះជាប្រធាន ដើម្បីដឹកនាំសមាគមអ្នកជំនាញអចលនទ្រព្យកម្ពុជាក្នុងអាណត្តិទី៣ ឆ្នាំ២០២០ ខាងមុខនេះ ដែលទទួលបានសម្លេងគាំទ្រចំនួន ២១សម្លេង ខណៈដែលលោក ចក់ ស៊ីណាត ទទួលបានសម្លេងគាំទ្រចំនួន១៩សម្លេង។

នៅក្នុងឱកាសនៃការបោះឆ្នោតជ្រើសតាំងប្រធានសមាគមអ្នកជំនាញអចលនទ្រព្យកម្ពុជាក្នុងអាណត្តិទី៣ ឆ្នាំ២០២០ខាងមុខនេះ លោក ឃាង ពុទ្ធី ដែលជាអតីប្រធានសមាគមអ្នកជំនាញអចលនទ្រព្យកម្ពុជា អាណត្តិទី២ ជាប់ឈ្មោះជាប្រធានក្រុមប្រឹក្សាភិបាលនៅក្នុងអាណត្តិទី៣ផងដែរ ៕

រោងចក្រចំនួន៣ បន្ថែមទៀត នឹងបង្ហាញខ្លួននៅក្នុងខេត្តកំពង់ស្ពឺ ជាមួយទំហំវិនិយោគសរុប ១០លានដុល្លារ

ដោយ ៖ រ៉ាណេត

ភ្នំពេញ ៖ គម្រោងរោងចក្រចំនួន៣បន្ថែមទៀត នឹងបង្ហាញខ្លួននៅក្នុងខេត្តិកំពង់ស្ពឺ ជាមួយនឹងទំហំទឹកប្រាក់វិនិយោគសរុបចំនួនប្រមាណ១០លានដុល្លារ ដោយក្នុងនោះរោងចំនួន២ស្ថិតនៅក្នុងស្រុកគងពិសី និងមួយទៀតស្ថិតនៅក្នុងស្រុកបរសេដ្ឋ។

ជាការឆ្លើយតបទៅនឹងការស្នើសុំវិនិយោគរបស់ក្រុមហ៊ុនចំនួន៣ទៅលើវិស័យរោងចក្រ ដែលមានទីតាំងស្ថិតនៅក្នុងខេត្តកំពង់ស្ពឺ រាជរដ្ឋាភិបាលបានសម្រេចអនុម័ត និងគាំទ្រទាំងស្រុងទៅលើគម្រោងវិនិយោគចំនួន៣បន្ថែមទៀតដែលមានទំហំទឹកប្រាក់សរុបចំនួន១០លានដុល្លារសហរដ្ឋអាមេរិក។

ក្រុមហ៊ុនដែលទទួលបានការគាំទ្រពីសំណាក់រដ្ឋាភិបាលទាំង៣រួមមាន ទី១ – ក្រុមហ៊ុន SUNRISE FASHION (CAMBODIA) CO., Ltd បង្កើតរោងចក្រកាត់ដេរសម្លៀកបំពាក់ ស្រោមខ្នើយ និងស្រោមពូក មានទីតាំងវិនិយោគស្ថិតនៅផ្លូវជាតិលេខ៣ ភូមិពោធិ៍អង្គ្រង ស្រុកបរសេដ្ឋ មានទុនវិនិយោគប្រមាណ ៣,៥លានដុល្លារអាមេរិក អាចបង្កើតការងារបានចំនួន ១.២៥៥កន្លែង។

ទី២–ក្រុមហ៊ុន BRIDGE INDUSTRY (CAMBODIA) CO., Ltd បង្កើតរោងចក្រផលិតសម្ភារៈបរិក្ខារបម្រើឱ្យ វិស័យសំណង់ ស្ថិតនៅភូមិចាស់ ឃុំពេជ្រមុនី ស្រុកគងពិសី មានទុនវិនិយោគប្រមាណ២,៧លានដុល្លារអាមេរិក អាចបង្កើតការងារបានចំនួន ២៧១កន្លែង។

ទី៣ ក្រុមហ៊ុន GD NEW SKY LEATHER PRODUCTS CO., Ltd បង្កើតរោងចក្រផលិតកាបូប និងខ្សែក្រវាត់ ដែលមានទីតាំងវិនិយោគស្ថិតនៅភូមិព្រៃថ្កូវ ឃុំព្រះនិព្វាន្ត ស្រុកគងពិសី មានទុនវិនិយោគប្រមាណ ៣,៨លានដុល្លារអាមេរិក អាចបង្កើតការងារបានចំនួន ១.៥០៦នាក់។

អភិបាលខេត្តកំពង់ស្ពឺ លោក វ៉ី សំណាង បានបង្ហាញពីការសាទរ និងគាំទ្រនូវវត្តមានក្រុមហ៊ុនទាំង៣ ដែលបានសម្រេចដាក់ទីតាំងនៅក្នុងខេត្តកំពង់ស្ពឺ។

លោកបានមានប្រសាសន៍ប្រាប់តាមទូរស័ព្ទថា “មិនថាចំពោះក្រុមហ៊ុនក្នុងស្រុក ឬមកពីក្រៅស្រុកនោះទេ រដ្ឋាភិបាល ក៏ដូចជាអជ្ញាធរខេត្តគាំទ្រជានិច្ច ជាមួយនឹងការខិតខំសម្របសម្រួលដើម្បីឱ្យគម្រោងវិនិយោគដំណើរការប្រកបដោយភាពរលូន និងទទួលបានភាពជោគជ័យ”។

លោកបានបន្តទៀតថា “បច្ចុប្បន្ននេះ នៅក្នុងខេត្តកំពង់ស្ពឺទាំងមូល គឺមានគម្រោងរោងចក្រ សហគ្រាសតូចធំជាច្រើន ដោយមួយចំនួនធំបាន និងកំពុងមានការដំណើរការ ហើយមួយចំនួនទៀតកំពុងតែរត់ការឯកសារច្បាប់”។

លោក វ៉ី សំណាង បានបញ្ជាក់ថា “គិតត្រឹមដើមខែធ្នូ ឆ្នាំ២០១៩នេះ នៅក្នុងខេត្តកំពង់ស្ពឺមានក្រុមហ៊ុនជាច្រើនកំពុងដំណើរការ ហើយសម្រាប់តែវិស័យរោងចក្រមានកំណើនយ៉ាងគំហុករហូតដល់ចំនួន ២៦១រោងចក្រ ផ្តល់ឱកាសការងារបានចំនួនជាង១៣ម៉ឺនកន្លែង ជាមួយនឹងកំណើន GDP ប្រមាណ ១៧០០ដុល្លារក្នុងម្នាក់”៕

រដ្ឋាភិបាលកំពុងសិក្សាគម្រោងហេដ្ឋារចនាសម្ព័ន្ធធំចំនួន ៣

ដោយ វុត្ថា

ភ្នំពេញ៖ រដ្ឋាភិបាលកម្ពុជាយកចិត្តទុកដាក់ជាអាទិភាពលើ ការអភិវឌ្ឍហេដ្ឋារចនាសម្ព័ន្ធ និងការដឹកជញ្ជូន ដូចជា ការពង្រីកនិងធ្វើឱ្យប្រសើរឡើងនូវគុណភាពផ្លូវថ្នល់ និងផែនការអភិវឌ្ឍផ្លូវថ្នល់ ផ្លូវល្បឿនលឿន ស្ពាន ស្ពានអាកាស និងកំពង់ ផែជាដើម ដែលរួមបញ្ចូលទាំងការកសាងគន្លងយានយន្ត គន្លងឡានក្រុង និងភ្លើងចរាចរណ៍ឆ្លាតវៃដើម្បីជា មធ្យោបាយកាត់បន្ថយការកកស្ទះចរាចរណ៍។

ជាមួយគ្នានេះ ដែររដ្ឋាភិបាលកម្ពុជាតាមរយៈក្រសួងសាធារណៈការ និងដឹកជញ្ជូន បាននឹងកំពុងសិក្សាលើគម្រោងហេដ្ឋារចនាសម្ព័ន្ធធំៗចំនួន ៣ ក្នុងចំណោមគម្រោងជាច្រើនផ្សេងទៀត ដើម្បីឆ្លើយតបទៅការកើនឡើងនៃចរាចរណ៍ និង ការដឹកជញ្ជូនតភ្ជាប់នៅក្នុងប្រទេស និងតំបន់ ដូចខាងក្រោមនេះ៖

១) ផ្លូវក្រោមដី(subways) ផ្លូវដែក(monorails)

នៅទីក្រុងភ្នំពេញរដ្ឋាភិបាលក៏បាននិងកំពុងធ្វើការសិក្សាលើផ្លូវក្រោមដី(subways) ផ្លូវដែក(monorails) និងការអភិវឌ្ឍ ហេដ្ឋារចនាសម្ព័ន្ធផ្សេងទៀតក្នុងគោលបំណងលុបបំបាត់ការកកស្ទះចរាចរណ៍ នៅក្នុងតំបន់ប្រជុំរបស់យើង។

២) ផ្លូវក្រវ៉ាក្រុងទី ៤

ផ្លូវក្រវ៉ាត់ក្រុងទី៤ បាននឹងកំពុងសិក្សាសាងសង់ឆាប់ខាងមុខនេះ ដើម្បីឆ្លើយតបទៅនឹងការឡើងនៃការដឹកជញ្ជូនទំនិញ កាត់បន្ថយការកកស្ទះ និងការធ្វើចរាចរណ៍ និងកំណើនសេដ្ឋកិច្ចកម្ពុជាមានការរីកចំរើន។ ផ្លូវក្រវាត់ក្រុងទី៤ ដែលក្រសួងកំពុងសិក្សានេះស្ថិតនៅត្រង់ណានោះទេ ដោយលោកនឹងសួរអ្នកជំនាញបន្ថែមទៀត ប៉ុន្តែលោកអាចប៉ាន់ស្មានថាផ្លូវខ្សែក្រវាត់ក្រុងទី៤នេះ នឹងធ្វើតពីផ្លូវក្រវ៉ាត់ក្រុងទី៣នៅត្រើយខាងកើត ឬក៏ធ្វើផ្លូវថ្មីចេញពីផ្លូវ៥១ មកដល់ផ្លូវជាតិលេខ៣ ឡើងដល់ភ្នំពេញ។

៣) ផ្លូវល្បឿនលឿនភ្នំពេញបាវិត

គម្រោងផ្លូវល្បឿនលឿនភ្នំពេញ-បាវិត (Phnom Penh-Bavet Expressway) ផ្លូវល្បឿនលឿនភ្នំពេញ-បាវិត មានប្រវែងសរុបប្រហែល ១៣៥ គ.មត្រូវបានរដ្ឋាភិបាលប្រគល់ទៅអោយក្រុមហ៊ុនចិនសិក្សាក្នុងរយៈពេល ២ ឆ្នាំដើម្បីបញ្ចប់លោកទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងសាធារណៈការ និងដឹកជញ្ជូន បានជំរុញឱ្យក្រុមហ៊ុន China Rail Way International Group .,Ltd ដែលទទួលធ្វើការសិក្សាគម្រោងផ្លូវល្បឿនលឿនតភ្ជាប់ភ្នំពេញបាវិតត្រឹមតែ ២ ឆ្នាំ ដើម្បីឆាប់ស្ថាបនាសាងសង់។

ក្រសួងសាធារណៈការ និងដឹកជញ្ចូន កាលពីពេលថ្មីនេះ បានចុះហត្ថលេខាលើកិច្ចព្រមព្រៀងក្របខណ្ឌសម្រាប់គម្រោងហេដ្ឋរចនាសម្ព័ន្ធផ្លូវល្បឿនលឿនតភ្ជាប់ពីភ្នំពេញទៅបាវិត ឱ្យក្រុមហ៊ុន China Rail Way International Group .,Ltd ធ្វើការសិក្សាសិក្សា៕

ការដ្ឋានសំណង់ចំនួន ៣ ទៀតសម្រេចឱ្យផ្អាកការសាងសង់នៅខេត្តព្រះសីហនុ

ដោយវុត្ថា

ភ្នំពេញ៖ លោក គួច ចំរើន អភិបាលខេត្តព្រះសីហនុ បានបញ្ជាឱ្យផ្អាកការដ្ឋានសំណង់ចំនួន ៣ទីតាំង ដែលបានធ្វើឱ្យធ្លាក់ដីចូលអូរប្រឡាយ (សុខា) បង្កឱ្យស្ទះចរន្តទឹកហូរ ស្ថិតនៅភូមិ១ សង្កាត់លេខ៣ ក្រុងព្រះសីហនុ ខេត្តព្រះសីហនុ។

លោក គួច ចំរើន អភិបាលខេត្តព្រះសីហនុ នៅក្នុងពិធីដឹកនាំមន្ត្រីជំនាញចុះត្រួតពិនិត្យការដ្ឋានសំណង់ កាលពីថ្ងៃទី ៦ ខែវិច្ឆិកា ឆ្នាំ២០១៩ ម្សិលមិញនេះ បានឱ្យដឹងថាសំណង់ទាំង៣ខាងលើជាបណ្តោះអាសន្ន ដោយតម្រូវឱ្យកាយដីដែលធ្លាក់ចូលអូរចេញវិញ និងសហការជាមួយមន្ទីរពាក់ព័ន្ធដើម្បីកំណត់និយាមការទំហំអូរប្រឡាយ និងរៀបខឿនថ្មទប់ដីផងដែរ។

លោកបន្តថាប្រតិបត្តិការនៃការចុះបិទការដ្ឋានខាងលើ គឺស្របពេលដែលរដ្ឋបាលខេត្តបានចេញសេចក្តីដំណឹង ដល់បងប្អូនប្រជាពលរដ្ឋ និងអ្នកវិនិយោគ ដែលបាននិងកំពុងរស់នៅ ឬ អាស្រ័យផលលើអូរប្រឡាយធម្មជាតិរបស់រដ្ឋ ក្នុងខេត្តព្រះសីហនុ។

លោកបន្ថែមថា ដោយក្នុងរយៈពេលកន្លងមក រដ្ឋបាលខេត្តបានសង្កេតឃើញមានបងប្អូនប្រជាពលរដ្ឋ និងអ្នកវិនិយោគមួយចំនួនបានរំលោភបំពានដោយការចាក់ដី ព្រមទាំងសាងសង់លំនៅដ្ឋាន និងសំណង់ខុសច្បាប់នានា មានទាំងប្រភេទតូចធំ ធ្ងន់ស្រាល លើនិយាមការដើមរបស់អូរប្រឡាយធម្មជាតិ ដែលជាទ្រព្យសម្បត្តិសាធារណៈរបស់រដ្ឋ ធ្វើឱ្យទំហំអូរប្រឡាយធម្មជាតិទាំងនោះរួមតូចនិងបិទមុខទឹកស្ទើរទាំងស្រុងនៅកន្លែងខ្លះមិនអាចឆ្លើយតបបានទៅនឹងបរិមាណកើនឡើងនៃទំហំទឹកភ្លៀង និងទឹកកខ្វក់ក្នុងក្រុងព្រះសីហនុ ដែលមានការកើនឡើងជាលំដាប់។

លោកបញ្ជាក់ទៀតថា នៅក្នុងរដូវវស្សាកន្លងទៅបានធ្វើឱ្យលិចលង់ លំនៅដ្ឋាន ហេដ្ឋារចនាសម្ព័ន្ធ និងខូចខាតទ្រព្យសម្បត្តិរបស់បងប្អូនប្រជាពលរដ្ឋមួយចំនួន ថែមទាំងបណ្ដាលឱ្យប៉ះពាល់ដល់អាយុជីវិតមនុស្សថែមទៀតផង។

លោកអភិបាលខេត្តរូបនេះបញ្ជាក់ថា ដើម្បីរក្សាទុកទំហំអូរប្រឡាយធម្មជាតិ ដែលជាទ្រព្យ សម្បត្តិសាធារណៈរបស់រដ្ឋតាមនិយាមការដើម និងតាមការកំណត់តាមប្លង់សុរិយោដី សម្រេចដោយគណៈកម្មការ រដ្ឋបាលខេត្តជៀសវាងការជន់លិចលំនៅដ្ឋានហេដ្ឋារចនាសម្ព័ន្ធ និងទ្រព្យសម្បត្តិផ្សេងៗ របស់ប្រជាពលរដ្ឋ នៅពេលមានជំនន់ទឹកភ្លៀង ឬនៅរដូវវស្សានោះ រដ្ឋបាលខេត្តព្រះសីហនុ សូមឱ្យបងប្អូនប្រជាពលរដ្ឋ និងអ្នកវិនិយោគទាំងអស់ដែលកំពុងរស់នៅ ឬអាស្រ័យផលលើដីចំណី អូរប្រឡាយធម្មជាតិសាធារណៈរបស់រដ្ឋ ធ្វើការរុះរើសំណង់ទាំងឡាយចេញជាបន្ទាន់ ដើម្បីឱ្យក្រុមការងារមានលទ្ធភាពក្នុងការស្ដារ និងអភិវឌ្ឍអូរប្រឡាយទាំងអស់ក្នុងក្រុងព្រះសីហនុ ធានាបានការជន់លិច ហើយថែមទាំងលើកកម្ពស់ កិត្យានុភាព សោភ័ណភាព អនាម័យបរិស្ថាន និងជាពិសេសរក្សា បាននូវសុខសុវត្ថិភាពរបស់បងប្អូនប្រជាពលរដ្ឋ និងអ្នកវិនិយោគ នៅក្នុងក្រុងព្រះសីហនុរស់នៅប្រកបដោយភាពសុខដុមរមនា៕