ធនាគារកណ្តាលចិនប្រកាសអនុញ្ញាតឱ្យបណ្តាក្រុមហ៊ុនក្នុងស្រុកអាចខ្ចីបំណុលបរទេសបន្ថែមទៀត ដើម្បីស្រូបទាញប្រាក់ដុល្លារអាមេរិក

January 29, 2025

ដោយ: គង់ លាងហួរ
ប៉េកាំង: ធនាគារកណ្តាលរបស់ប្រទេសចិនបានពង្រឹងការការពារកាន់តែរឹងមាំសម្រាប់ប្រាក់យ័ន និងទីផ្សារប្តូរប្រាក់ក្នុងស្រុក ខណៈរដ្ឋបាលរបស់ប្រធានាធិបតីអាមេរិកលោក ដូ ណាល់ត្រាំ ត្រូវបានគេរំពឹងថា នឹងបញ្ឆេះសង្គ្រាមពាណិជ្ជកម្ម និងអត្រាប្តូរប្រាក់។

តួយ៉ាង ធនាគារកណ្ដាលចិនបានប្រកាសអនុញ្ញាតឱ្យបណ្តាក្រុមហ៊ុន-សហគ្រាសចិនអាចខ្ចីប្រាក់កាន់តែច្រើនបន្ថែមទៀតពីក្រៅប្រទេស ដើម្បីទប់ស្កាត់មិនឱ្យអត្រាប្តូរប្រាក់យ័នដាំក្បាលចុះខ្លាំងធៀបនឹងប្រាក់ដុល្លារអាមេរិក។

ក្រុមអ្នកជំនាញបានលើកឡើងថា ការអនុញ្ញាតឱ្យបណ្តាក្រុមហ៊ុនចិននានាអាចខ្ចីបំណុលបរទេសកាន់តែច្រើន ស្ថិតក្នុងចំណោមគោលនយោបាយ ដែលរដ្ឋាភិបាលទីក្រុងប៉េកាំងកំពុងអនុវត្តន៍យ៉ាងប្រុងប្រយ័ត្ន ខណៈប្រាក់យ័នបានធ្លាក់ថ្លៃចុះយ៉ាងគំហុកធៀបនឹងប្រាក់ដុល្លារអាមេរិក។

លោក Zhu Tian សាស្ត្រាចារ្យផ្នែកសេដ្ឋកិច្ចនៅសាលាធុរកិច្ចអន្តរជាតិចិន-អឺរ៉ុបក្នុងទីក្រុងសៀងហៃបានអះអាងថា “ចំណាត់ការនេះអាចជួយបន្ធូរបន្ថយសម្ពាធនៃការធ្លាក់ថ្លៃនៃរូបិយបណ្ណក្នុងស្រុក និងបង្កើនទំហំបំណុលនៅក្រៅប្រទេសរបស់សហគ្រាសចិន”។

លោក Zhu Tian បានគូសបញ្ជាក់ទៀតថា “ជាលទ្ធផល ប្រសិនបើប្រាក់ដុល្លារអាមេរិកហូរចូលកាន់តែច្រើនមកកាន់ប្រទេសចិន នោះការណ៍នេះពិតជានឹងជួយធ្វើឱ្យប្រាក់យ័នមានស្ថិរភាព”។

ទុនបម្រុងអន្តរជាតិរបស់ប្រទេសចិនមានទំហំទឹកប្រាក់ចំនួន៣,២ទ្រីលានដុល្លារអាមេរិកគិតត្រឹមដំណាច់ចុងខែធ្នូ ឆ្នាំ២០២៤កន្លងទៅ។នេះបើយោងតាមការចុះផ្សាយដោយទីភ្នាក់ងារសារពត៌មាន Reuters ។

លោក Lynn Song សេដ្ឋវិទូជាន់ខ្ពស់នៅក្រុមហ៊ុន ING Greater China បានលើកឡើងថា ការរក្សាស្ថិរភាពរូបិយបណ្ណក្នុងស្រុកនៅតែជាអាទិភាពសំខាន់របស់ធនាគារកណ្តាលចិន ទោះបីជាក្រុមអ្នកវិភាគមួយចំនួនបានអះអាងអំពីលទ្ធភាពនៃការទាញទម្លាក់តម្លៃប្រាក់យ័ន ដោយចេតនា ដើម្បីទប់ទល់នឹងផលប៉ះពាល់ពីការដំឡើងពន្ធរបស់សហរដ្ឋអាមេរិកលើទំនិញចិនយ៉ាងណាក្តី។

ចំណាត់ការនេះក៏បានគូសបញ្ជាក់ផងដែរអំពីការប្តេជ្ញាចិត្តរបស់ធនាគារកណ្តាលចិនក្នុងការស្តារកំណើនសេដ្ឋកិច្ចឡើងវិញ ដោយជំរុញលំហូរសាច់ប្រាក់ និងរក្សាស្ថិរភាពរូបិយបណ្ណជាតិ ស្របពេលមានភាពមិនប្រាកដប្រជាផ្នែកនយោបាយ និងសេដ្ឋកិច្ច៕ប្រភព: Reuters & SCMP៕

តម្លៃដីធ្លីនៅប្រទេសវៀតណាមហក់ឡើងថ្លៃយ៉ាងគំហុក ដោយបង្កជាក្តីបារម្ភសម្រាប់វិស័យអចលនទ្រព្យ

January 29, 2025

ដោយ: គង់ លាងហួរ
អន្តរជាតិ: ការហក់ឡើងយ៉ាងគំហុកនៃតម្លៃដីធ្លីនៅក្នុងប្រទេសវៀតណាម កំពុងបង្កឱ្យមានការព្រួយបារម្ភពីសំណាក់ក្រុមអ្នកជំនាញ និងភាគីពាក់ព័ន្ធនានា ព្រោះស្ថានភាពនេះនឹងអាចក្លាយជាបញ្ហាប្រឈមសម្រាប់វិស័យអចលនទ្រព្យក្នុងប្រទេសវៀតណាម។

គិតត្រឹមដើមខែមករា ឆ្នាំ២០២៥នេះ អាជ្ញាធរខេត្តចំនួន២៥ទូទាំងប្រទេសវៀតណាម បានចេញក្របខណ្ឌតម្លៃដីថ្មី ដែលមានប្រសិទ្ធភាពដល់ដំណាច់ចុងឆ្នាំ២០២៥ ។ ការចេញក្របខណ្ឌនេះ ជាផ្នែកមួយនៃកំណែទម្រង់ក្រោមច្បាប់ស្តីពីភូមិបាលឆ្នាំ២០២៤ ក្នុងគោលបំណងលើកកម្ពស់តម្លាភាព និងធ្វើឱ្យតម្លៃដីស៊ីសង្វាក់គ្នាទៅនឹងតម្លៃនៅលើទីផ្សារជាក់ស្តែង។

ទោះបីជាយ៉ាងណាក្តី ការហក់ឡើងថ្លៃយ៉ាងគំហុកនៃតម្លៃដីនៅតាមតំបន់មួយចំនួន បានធ្វើឱ្យប្រជាជន និងក្រុមអ្នកវិនិយោគមានការប្រុងប្រយ័ត្ន និងបង្កជាក្តីព្រួយបារម្ភយ៉ាងខ្លាំងនៅក្នុងវិស័យអចលនទ្រព្យ។

ជាក់ស្តែង តម្លៃដីធ្លីនៅក្នុងទីក្រុងហូជីមិញបានហក់ឡើងថ្លៃចំនួន៣៨ដង ដោយដីនៅតំបន់មួយចំនួននៃទីក្រុងនេះមានតម្លៃ៦៨៧,២លានដុង (ប្រហែល២៧.០៥៥ ដុល្លារអាមេរិក)ក្នុងមួយម៉ែត្រការ៉េ។

ដោយឡែក តម្លៃដីធ្លីនៅទីក្រុងហាណូយបានកើនឡើងចន្លោះពី២ដងទៅ៦ដង ខណៈដែលតម្លៃដីនៅតំបន់មួយចំនួននៃរដ្ឋធានីមួយនេះបានហក់ឡើងដល់៦៩៥,៣លានដុង(ប្រហែល២៧.៥០០ដុល្លារ)ក្នុងមួយម៉ែត្រការ៉េ។

កំណើនដ៏ខ្ពស់នេះបានបង្កឱ្យមានការព្រួយបារម្ភក្នុងចំណោមអ្នកអភិវឌ្ឍន៍អចលនទ្រព្យ និងអ្នកវិនិយោគ អំពីលទ្ធភាព ព្រោះស្ថានភាពនេះអាចកាត់បន្ថយលទ្ធភាពនៃការទិញដី និងភាពទាក់ទាញនៃការវិនិយោគ។

លោក Nguyễn Quốc Hiệp ប្រធានសមាគមអ្នកម៉ៅការសំណង់វៀតណាម (VACC) បានបង្ហាញក្តីព្រួយបារម្ភអំពីការហក់ឡើងនៃតម្លៃដី ព្រោះវាអាចជះផលប៉ះពាល់ដល់បរិយាកាសវិនិយោគនៅប្រទេសវៀតណាម។

លោកបានអះអាងថា តម្លៃដីក្នុងកម្រិតប្រកួតប្រជែង គួបផ្សំនឹងតម្លៃកម្លាំងពលកម្មសមរម្យ និងហេដ្ឋារចនាសម្ព័ន្ធភស្តុភារប្រកបដោយប្រសិទ្ធភាព ជាកត្តាសំខាន់ក្នុងការទាក់ទាញលំហូរវិនិយោគផ្ទាល់ពីបរទេស (FDI)។

លោក Hiệp បានគូសបញ្ជាក់បន្ថែមថា “ប៉ុន្តែ នៅពេលតម្លៃពលកម្ម និងតម្លៃដីកើនឡើងព្រមគ្នា នោះសមត្ថភាពនៃការប្រកួតប្រជែងរបស់វៀតណាមអាចប្រឈមមុខនឹងហានិភ័យ ដែលអាចជះផលប៉ះពាល់ដល់ការវិនិយោគនាពេលអនាគត”៕ប្រភព:Viet Nam News៕

ការសិក្សាថ្មី: សេដ្ឋកិច្ចពិភពលោកប្រឈមការខាតបង់ក្នុងទំហំទឹកប្រាក់ចំនួន៥,៧ទ្រីលានដុល្លារពីការបែងចែករវាងលោកខាងលិច និងលោកខាងកើត

January 29, 2025

ដោយ: គង់ លាងហួរ
អន្តរជាតិ: របាយការណ៍សិក្សាស្រាវជ្រាវថ្មីមួយបានព្រមានថា ការបែងចែកបក្ខពួករវាងបណ្តាប្រទេសមហាអំណាចអាចបង្កជាការបំផ្លិចបំផ្លាញដល់សេដ្ឋកិច្ចរបស់ពិភពលោកខ្លាំងជាងវិបត្តិហិរញ្ញវត្ថុសកល ឬជំងឺរាតត្បាត។

យោងតាមការស្រាវជ្រាវពីវេទិកាសេដ្ឋកិច្ចពិភពលោក និងក្រុមហ៊ុនប្រឹក្សាយោបល់ផ្នែកគ្រប់គ្រង Oliver Wyman របស់សហរដ្ឋអាមេរិកបានឱ្យដឹងថា ការកាត់ផ្តាច់ទំនាក់ទំនងរវាងបណ្តាប្រទេសលោកខាងលិច និងបណ្តាប្រទេសលោកខាងកើតអាចធ្វើឱ្យសេដ្ឋកិច្ចរបស់ពិភពលោកខាតបង់ក្នុងទំហំទឹកប្រាក់ចំនួន៥,៧ទ្រីលានដុល្លារ។

ផលប៉ះពាល់ភាគច្រើននឹងកើតឡើងតាមរយៈរូបភាពនានា រួមមានដូចជាការធ្លាក់ចុះនៃទំហំពាណិជ្ជកម្មពិភពលោក ការធ្លាក់ចុះនៃលំហូរមូលធន និងការខាតបង់ប្រសិទ្ធភាពផ្នែកសេដ្ឋកិច្ច។

របាយការណ៍ខាងលើបានបន្តថា បណ្តាប្រទេសកំពុងអភិវឌ្ឍន៍នឹងរងផលប៉ះពាល់យ៉ាងធ្ងន់ធ្ងរបំផុត ប្រសិនបើពួកគេត្រូវបានបង្ខំឱ្យធ្វើពាណិជ្ជកម្មផ្តាច់មុខជាមួយប្លុកលោកខាងលិច ឬប្លុកលោកខាងកើត និងបានព្រមានថា ទំហំផលទុនជាតិសរុប (GDP) របស់ប្រទេសឥណ្ឌា ប្រេស៊ីល តំបន់អាមេរិកឡាទីន និងតំបន់អាស៊ីអាគ្នេយ៍អាចដាំក្បាលចុះ១០ភាគរយ ។

របាយការណ៍នេះបានកត់សម្គាល់ថាបណ្តាប្រទេសនានាកំពុងងាកទៅប្រើប្រាស់ប្រព័ន្ធហិរញ្ញវត្ថុជាអាវុធដើម្បីជំរុញគោលដៅភូមិសាស្ត្រនយោបាយរបស់ខ្លួន តាមរយៈការដាក់ទណ្ឌកម្ម ការផ្តល់ជំនួយឧបត្ថម្ភធន និងគោលនយោបាយឧស្សាហកម្មចាប់តាំងពីឆ្នាំ២០១៧មក។

យ៉ាងណាមិញ ប្រសិនបើលំហូរមូលធន និងពាណិជ្ជកម្មត្រូវបានដាក់លក្ខខណ្ឌត្រឹមតែចំពោះសន្តិសុខជាតិ និងការប្រកួតប្រជែង នោះផលប៉ះពាល់លើផលទុនជាតិសរុបរបស់ពិភពលោកនឹងមានទំហំទឹកប្រាក់ត្រឹមតែ៦០០ពាន់លានដុល្លារប៉ុណ្ណោះ។នេះបើយោងតាមលោក Matthew Blake ប្រធានមជ្ឈមណ្ឌលប្រព័ន្ធហិរញ្ញវត្ថុ និងរូបិយវត្ថុនៃវេទិកាសេដ្ឋកិច្ចពិភពលោក។

របាយការណ៍នេះត្រូវបានចេញផ្សាយ ស្របពេលមានការព្រួយបារម្ភកាន់តែខ្លាំងឡើងអំពីហានិភ័យនៃភាពតានតឹងភូមិសាស្ត្រនយោបាយ ជាពិសេសបន្ទាប់ពីលោក ដូ ណាល់ត្រាំ បានចូលកាន់តំណែងជាប្រធានាធិបតីអាមេរិកជាលើកទី២។

រដ្ឋបាលរបស់លោក ដូ ណាល់ត្រាំ កំពុងពិចារណាដាក់ពន្ធចំនួន២៥ភាគរយលើទំនិញនាំចូលពីប្រទេសម៉ិកស៊ិក និងប្រទេសកាណាដានៅដំណាច់ចុងខែមករានេះ ក៏ដូចជាការយកពន្ធចំនួន៦០ភាគរយលើការនាំចូលទំនិញរបស់ប្រទេសចិនផងដែរ៕ប្រភព: Oil price. Com៕

តើទីផ្សារអចលនទ្រព្យនៅរាជធានីភ្នំពេញអាចផ្តល់ភាគលាភពីការជួលប៉ុន្មានភាគរយក្នុងមួយឆ្នាំ?

January 29, 2025

ដោយ: គង់ លាងហួរ
ភ្នំពេញ: យោងតាមក្រុមហ៊ុនប្រឹក្សាអចលនទ្រព្យ Knight Frank បានឱ្យដឹងថា ទីផ្សារអចលនទ្រព្យនៅរាជធានីភ្នំពេញរបស់ប្រទេសកម្ពុជាអាចផ្តល់ភាគលាភពីការជួល(Rental yields) ក្នុងរង្វង់ពី៦ភាគរយទៅ៧ភាគរយក្នុងមួយឆ្នាំ។

ក្រុមហ៊ុនប្រឹក្សាអចលនទ្រព្យ Knight Frank អះអាងថា តួលេខនេះមានការប្រកួតប្រជែងបើប្រៀបធៀបនឹងទីផ្សារផ្សេងទៀតក្នុងតំបន់។

Knight Frank បានគូសបញ្ជាក់ថា តម្រូវការអចលនទ្រព្យសម្រាប់ជួលនៅតំបន់ទីប្រជុំជន ដូចជាតំបន់បឹងកេងកង១ (BKK1) កំពុងទាក់ទាញកំណើននៃការវិនិយោគក្នុងស្រុក និងការវិនិយោគពីបរទេស។

តម្រូវការនេះត្រូវបានជំរុញដោយសារតែតំបន់បឹងកេងកង១ មានទីតាំងនៅចំកណ្តាលរាជធានីភ្នំពេញ និងមានបរិក្ខារចាំបាច់នៅជិត ដែលធ្វើឱ្យតំបន់នេះមានភាពទាក់ទាញ ជាពិសេសសម្រាប់អ្នកជួល។

ទន្ទឹមនឹងនោះ តំបន់បឹងកេងកង១ កំពុងផ្តល់ផលចំណេញគួរជាទីពេញចិត្តសម្រាប់អ្នកវិនិយោគអចលនទ្រព្យលំនៅដ្ឋាន។នេះបើយោងតាមក្រុមហ៊ុនប្រឹក្សាអចលនទ្រព្យ Knight Frank។

ដោយឡែក ចំពោះប្រទេសជិតខាងរបស់កម្ពុជា ដូចជាប្រទេសថៃ ក្រុមហ៊ុន Knight Frank បានកត់សម្គាល់ឃើញថា ទីផ្សារអចលនទ្រព្យនៅទីក្រុងបាងកកមានសភាពរឹងមាំក្នុងពេលថ្មីៗនេះ ជាពិសេសនៅក្នុងផ្នែកអចលនទ្រព្យប្រណីត ដែលជំរុញដោយលំហូរវិនិយោគផ្ទាល់ពីបរទេស។

ទីផ្សារអចលនទ្រព្យប្រណីតនៅទីក្រុងបាងកកបានបង្ហាញពីភាពធន់ក្នុងរយៈពេលថ្មីៗនេះ ទោះបីជាមានបញ្ហាប្រឈមដូចជា កង្វះដីធ្លី និងការកើនឡើងថ្លៃដើមនៃការសាងសង់នៅក្នុងតំបន់ពាណិជ្ជកម្មកណ្តាល (CBD) ស្ថិតនៅតាមបណ្តោយមាត់ទន្លេចៅប្រាយ៉ា(Chao Phraya) យ៉ាងណាក្តី។

មិនខុសពីទីផ្សារអចលនទ្រព្យប្រណីតនៅកម្ពុជា ជនបរទេសបានដើរតួនាទីយ៉ាងសំខាន់នៅក្នុងទិដ្ឋភាពនៃទីផ្សារអចលនទ្រព្យប្រណីតរបស់ទីក្រុងបាងកក ដោយក្នុងនោះ អ្នកវិនិយោគចិនជាអ្នកទិញនាំមុខគេ៕ប្រភព: Knight Frank៕

ហ្វីលីពីនគ្រោងពន្លឿនការចរចាកិច្ចព្រមព្រៀងពាណិជ្ជកម្មសេរីទ្វេរភាគីជាមួយសហរដ្ឋអាមេរិក និង EU

January 28, 2025

ដោយ: គង់ លាងហួរ
អន្តរជាតិ: ប្រទេសហ្វីលីពីនគ្រោងនឹងជំរុញយ៉ាងសកម្មឱ្យមានកិច្ចព្រមព្រៀងពាណិជ្ជកម្មសេរីទ្វេរភាគី (FTA) ជាមួយសហរដ្ឋអាមេរិក ខណៈទីក្រុងម៉ានីលរំពឹងថា រដ្ឋបាលប្រធានាធិបតីអាមេរិកលោក ដូ ណាល់ត្រាំ នឹងបើកចំហចំពោះការរចរចាកិច្ចព្រមព្រៀងបែបនេះ។

លោក Ceferino Rodolfo មន្ដ្រីជាន់ខ្ពស់នៃក្រសួងពាណិជ្ជកម្មហ្វីលីពីនបានមានប្រសាសន៍ឱ្យដឹងថា “ប្រទេសហ្វីលីពីននឹងព្យាយាមស្វែងរកកិច្ចព្រមព្រៀង FTA ទ្វេរភាគីជាមួយសហរដ្ឋអាមេរិក”។

លោកបានគូសបញ្ជាក់ថា សហរដ្ឋអាមេរិកធ្លាប់បានបង្ហាញចំណាប់អារម្មណ៍នៅក្នុងការចុះកិច្ចព្រមព្រៀង FTA ជាមួយប្រទេសហ្វីលីពីនក្រោមអាណត្តិលើកដំបូងរបស់លោក ដូ ណាល់ត្រាំ ជាប្រធានាធិបតីអាមេរិក។

ផ្ទុយទៅវិញ លោក Rodolfo បានអះអាងថា រដ្ឋបាលមុនរបស់សហរដ្ឋអាមេរិកក្រោមការដឹកនាំរបស់លោក ចូ បៃដិន មានគោលជំហរប្រុងប្រយ័ត្នជាមួយហ្វីលីពីនក្នុងការចរចាកិច្ចព្រមព្រៀង FTA ទ្វេរភាគី។

លោក Rodolfo បានសម្តែងក្តីសង្ឃឹមថា “ក្រុមមន្ត្រីជាន់ខ្ពស់នៅក្នុងរដ្ឋបាលរបស់លោក ត្រាំ ដូចជាលោក Jamieson Greer ដែលត្រូវបានតែងតាំងជាមន្ដ្រីតំណាងពាណិជ្ជកម្មអាមេរិក នឹងជះឥទ្ធិពលជាវិជ្ជមានលើទំនាក់ទំនងអាមេរិក និងហ្វីលីពីន”។

ស្របពេលដែលហ្វីលីពីនជំរុញឱ្យមានកិច្ចព្រមព្រៀងពាណិជ្ជកម្មសេរីទ្វេរភាគីជាមួយអាមេរិក លោក Rodolfo សង្ឃឹមថា កិច្ចខិតខំប្រឹងប្រែងនេះក៏នឹងជួយពន្លឿនដល់ការចរចាកិច្ចព្រមព្រៀង FTA ទ្វេរភាគីរវាងហ្វីលីពីន និងសហភាពអឺរ៉ុបផងដែរ។

រដ្ឋាភិបាលហ្វីលីពីន និងសហភាពអឺរ៉ុបបានបន្តកិច្ចចរចាលើកិច្ចព្រមព្រៀង FTA ឡើងវិញកាលពីខែតុលាឆ្នាំមុន បន្ទាប់ពីការចរចាបានជាប់គាំងចាប់តាំងពីឆ្នាំ២០១៧ ខណៈការចរចាជុំបន្ទាប់នឹងប្រព្រឹត្តទៅចាប់ពីថ្ងៃទី១០ ដល់ថ្ងៃទី១៤ ខែកុម្ភៈ ឆ្នាំ២០២៥នេះ៕ប្រភព: Philstar ៕

បណ្តាក្រុមហ៊ុនអភិវឌ្ឍន៍អចលនទ្រព្យធំៗនៅទីក្រុងហុងកុងប្រឈមវិបត្តិសាច់ប្រាក់ធ្ងន់ធ្ងរ

January 28, 2025

ដោយ: គង់ លាងហួរ
អន្តរជាតិ: នៅក្នុងរយៈពេលជាច្រើនទសវត្សរ៍មកនេះ ក្រុមហ៊ុនអភិវឌ្ឍន៍អចលនទ្រព្យហុងកុងខ្នាតយក្ស New World Development ត្រូវបានគេចាត់ទុកជាពិភពជំនួញដ៏មានស្ថិរភាព និងមានសាច់ប្រាក់យ៉ាងច្រើនមហាសាល។

យ៉ាងណាមិញ នាពេលថ្មីៗនេះ ក្រុមហ៊ុនអភិវឌ្ឍន៍អចលនទ្រព្យ New World Development បាននិងកំពុងជួបប្រទះវិបត្តិទំនុកចិត្តយ៉ាងធ្ងន់ធ្ងរ បន្ទាប់ពីលោក Adrian Cheng អ្នកស្នងមរតកជំនាន់ទី៣នៃក្រុមហ៊ុន New World Development របស់ក្រុមគ្រួសារត្រកូល Cheng បានលាលែងពីមុខតំណែងជានាយកប្រតិបត្តិរបស់ក្រុមហ៊ុននេះ។

ក្រុមហ៊ុន New World បានស្នើដាក់បញ្ចាំអចលនទ្រព្យជាច្រើនរបស់ខ្លួន ដើម្បីទទួលបានប្រាក់កម្ចីចំនួន១៥ពាន់លានដុល្លារអាមេរិក និងបានគេចវេសមិនចង់ដោះស្រាយចំពោះក្តីព្រួយបារម្ភនានាអំពីការរៀបចំរចនាសម្ព័ន្ធបំណុលឡើងវិញ។

ក្រុមហ៊ុនអភិវឌ្ឍន៍អចលនទ្រព្យ New World Development បានផ្លាស់ប្តូរនាយកប្រតិបត្តិរបស់ខ្លួនចំនួនពីរដងក្នុងរយៈពេល២ខែកន្លងមកនេះ ដែលធ្វើឱ្យតម្លៃមូលបត្របំណុលរបស់ខ្លួនដាំក្បាលចុះយ៉ាងគំហុក។

លោក Patrick Wong អ្នកវិភាគរបស់ស្ថាប័ន Bloomberg Intelligence (BI) បានលើកឡើងថា “ស្ថានភាពរបស់ក្រុមហ៊ុន New World នាពេលនេះជាស្ថានភាពអាក្រក់បំផុតមិនធ្លាប់មាននៅក្នុងទីក្រុងហុងកុងគិតចាប់តាំងពីវិបត្តិហិរញ្ញវត្ថុអាស៊ីចាបពីឆ្នាំ១៩៩៧ដល់ឆ្នាំ១៩៩៩”។

តម្លៃមូលបត្របំណុលប្រាក់ដុល្លារមួយចំនួនរបស់ក្រុមហ៊ុន New World បានដាំក្បាលចុះដល់កម្រិតទាបបំផុតនៅថ្ងៃទី២២ ខែមករា ខណៈតម្លៃទីផ្សារ(Market Value)របស់ក្រុមហ៊ុននេះបានដាំក្បាលចុះជិតដល់កម្រិតនៅក្នុងឆ្នាំ២០០៣។

ក្រុមវិនិយោគិនកំពុងតាមដានយ៉ាងដិតដល់នូវសញ្ញានៃភាពតានតឹងចំពោះអ្នកអភិវឌ្ឍន៍អចលនទ្រព្យផ្សេងទៀត។

ជាក់ស្តែង ក្រុមហ៊ុន Parkview Group ដែលជាក្រុមហ៊ុនអចលនទ្រព្យដ៏លេចធ្លោមួយទៀតរបស់ទីក្រុងហុងកុងបានប្រកាសដាក់លក់អគារពាណិជ្ជកម្មដ៏ល្បីល្បាញរបស់ខ្លួននៅក្នុងទីក្រុងប៉េកាំង ដែលអគារនោះមានឈ្មោះថា“Fang Cao Di”។

លោក Richard Harris ស្ថាបនិក និងជានាយកប្រតិបត្តិនៃក្រុមហ៊ុន Port Shelter Investment Management បានលើកឡើងថា “ក្រុមហ៊ុនអភិវឌ្ឍន៍អចលនទ្រព្យហុងកុងធំៗទាំងនេះត្រូវបង្ខំចិត្តលក់អគារល្បីៗរបស់ខ្លួន ដើម្បីទម្លុះភាពទាល់ច្រក”។

លោកបញ្ជាក់បន្ថែមថា “ ភាពតានតឹងជាច្រើនមិនត្រឹមតែបានកើតឡើងចំពោះបណ្តាក្រុមហ៊ុនអចលនទ្រព្យចិនដីគោកប៉ុណ្ណោះទេ។ ប៉ុន្តែ ភាពតានតឹងផ្នែកហិរញ្ញវត្ថុក៏បានកើតឡើងចំពោះបណ្តាក្រុមហ៊ុនអចលនទ្រព្យធំៗ ដែលមានមូលដ្ឋាននៅទីក្រុងហុងកុងផងដែរ”៕ប្រភព: Bloomberg៕

ទីផ្សារលំនៅដ្ឋាននៅក្នុងប្រទេសឥណ្ឌូនេសុីបង្ហាញសក្តានុពលខ្ពស់សម្រាប់ការវិនិយោគ

January 28, 2025

ដោយ: គង់ លាងហួរ
អន្តរជាតិ: ទីផ្សារអចលនទ្រព្យរបស់ប្រទេសឥណ្ឌូនេស៊ីនឹងបង្ហាញសញ្ញាល្អប្រសើរនៅឆ្នាំ២០២៥នេះ ខណៈក្រសែភ្នែករបស់ក្រុមវិនិយោគិន និងអ្នកទិញទាំងអស់បានផ្តោតលើកំណើនសេដ្ឋកិច្ចដែលកំពុងរីកចម្រើនយ៉ាងឆាប់រហ័សរបស់ឥណ្ឌូនេសុី។

ជាមួយគ្នានេះ ការដាក់ចេញវិធានការគាំទ្រនានាពីរដ្ឋាភិបាល នវានុវត្តន៍ផ្នែកបច្ចេកវិទ្យា ការអភិវឌ្ឍន៍ប្រកបដោយនិរន្តរភាព និងការកើនឡើងនៃតម្រូវការលំនៅដ្ឋាន បានបង្កើតបរិយាកាសអំណោយផលសម្រាប់វិស័យអចលនទ្រព្យនៅឥណ្ឌូនេស៊ី។

យោងតាមការព្យាករណ៍នាពេលថ្មីៗនេះបង្ហាញថា ទីផ្សារលំនៅដ្ឋាននៅឥណ្ឌូនេស៊ីកំពុងបង្ហាញពីអត្រាកំណើនជាវិជ្ជមាន ដោយត្រូវបានគេរំពឹងថា នឹងក្លាយជាទីផ្សារទាក់ទាញបំផុតមួយក្នុងតំបន់អាស៊ាននៅឆ្នាំ២០២៥នេះ។

ទំហំទីផ្សារលំនៅដ្ឋានឥណ្ឌូនេសុីត្រូវបានព្យាករណ៍ថា នឹងសម្រេចបានអត្រាកំណើនជាមធ្យមប្រចាំឆ្នាំចំនួន៧,៩៥%ចាប់ពីពេលនេះដល់ឆ្នាំ២០២៩ខាងមុខ។ កំណើននេះសរបង្ហាញឱ្យឃើញពីការកើនឡើងនៃតម្រូវការលំនៅដ្ឋាន និងភាពទាក់ទាញរបស់ប្រទេសនេះចំពោះបណ្តាវិនិយោគិនបរទេស និងអ្នកទិញអចលនទ្រព្យ។

ជាមួយគ្នានេះ ទីក្រុងហ្សាការតានៅតែជាមជ្ឈមណ្ឌលទាក់ទាញវិនិយោគិន និងអ្នកទិញអចលនទ្រព្យ។ ទីក្រុងដែលមានប្រជាជនរស់នៅជាង១០លាននាក់នេះផ្តល់ឱកាសវិនិយោគយ៉ាងធំសម្បើម។

លំនៅដ្ឋាននៅទីក្រុងហ្សាការតាមានតម្លៃជាមធ្យមប្រហែល២.៦៩២ដុល្លារអាមេរិក ក្នុងមួយម៉ែត្រការ៉េ ដែលជាតម្លៃសមរម្យបើធៀបនឹងទីក្រុងធំៗផ្សេងទៀតនៅក្នុងតំបន់អាស៊ាន។

ដោយឡែក តម្លៃអាផាតមុិននៅក្នុងទីក្រុងហ្សាការតាអាចមានការប្រែប្រួលខុសៗគ្នា ដោយសារវាអាស្រ័យទៅលើភូមិសាស្ត្រទីតាំង ទំហំ និងគ្រឿងបរិក្ខារ។

ជាក់ស្តែង អាផាតមុិនដែលមានបន្ទប់គេងទោលអាចមានតម្លៃប្រហែល៧៥.០០០ដុល្លារក្នុងមួយយូនីត ខណៈអាផាតមុិនដែលមានបន្ទប់គេងចំនួន២មានតម្លៃប្រហែល១០៩.០០០ដុល្លារក្នុងមួយយូនីត ហើយអាផាតមុិនដែលមានបន្ទប់គេងចំនួន៣អាចមានតម្លៃប្រហែល១៨៥.០០០ដុល្លារក្នុងមួយយូនីត។

ភាគលាភពីការជួលអចលនទ្រព្យលំនៅដ្ឋាន(Rental Yields)នៅក្នុងប្រទេសឥណ្ឌូនេស៊ីមានអត្រាចាប់ពី៩ភាគរយ ទៅ១៥ភាគរយ ក្នុងមួយឆ្នាំ។ ការណ៍នេះធ្វើឱ្យទីផ្សារលំនៅដ្ឋានឥណ្ឌូនេស៊ីអាចទាក់ទាញបណ្តាអ្នកវិនិយោគអន្តរជាតិដែលកំពុងស្វែងរកឱកាសដើម្បីធ្វើពិពិធកម្មផលបត្ររបស់ពួកគេ៕ប្រភព: Centrarium៕

ដំណឹងល្អ: រដ្ឋាភិបាលថៃគ្រោងបង្កើនចំនួនផ្លូវរថយន្តក្រុងដឹកអ្នកដំណើរមកកាន់កម្ពុជា

January 28, 2025

ដោយ: គង់ លាងហួរ
អន្តរជាតិ: ក្រុមហ៊ុន Transport Company Limited ដែលជាប្រតិបត្តិកររថយន្តក្រុងរបស់រដ្ឋាភិបាលថៃបានប្រកាសថា ខ្លួនគ្រោងបើកផ្លូវរថយន្តក្រុងចំនួន១១ខ្សែទៅកាន់ប្រទេសឡាវ និងកម្ពុជាដើម្បីលើកកម្ពស់នូវការធ្វើដំណើរឆ្លងដែនបន្ថែមទៀត។

បច្ចុប្បន្ន ក្រុមហ៊ុន Transport Company Limited បានបើកផ្លូវរថយន្តក្រុងចំនួនពីរខ្សែ មកកាន់កម្ពុជា រួមមាន ផ្លូវរថយន្តក្រុងពីទីក្រុងបាងកកមកកាន់ខេត្តសៀមរាប និងផ្លូវរថយន្តក្រុងពីទីក្រុងបាងកកមកកាន់ទីក្រុងភ្នំពេញ។

លោក Atthawit Rakjamroon ប្រធានស្តីទីក្រុមហ៊ុន Transport Company Limited បានលើកឡើងថា ការបើកដំណើរការផ្លូវរថយន្ដក្រុងទាំងនេះបាននិងកំពុងសម្រួលដល់ការធ្វើដំណើររបស់ប្រជាជនថៃ ឡាវ និងកម្ពុជា ស្របតាមគោលនយោបាយរបស់រដ្ឋាភិបាលក្នុងការលើកកម្ពស់វិស័យទេសចរណ៍ទាំងនៅក្នុងប្រទេសថៃ និងបណ្តាប្រទេសជិតខាងផងដែរ។

លោកបានមានប្រសាសន៍ឱ្យដឹងបន្តថា ផ្លូវទាំងនេះដឹកអ្នកដំណើរជាមធ្យមប្រហែល៣.០០០នាក់នៅក្នុងមួយថ្ងៃ ដោយបានកើនឡើង បន្ទាប់ពីជំងឺរាតត្បាតកូវីដ-១៩បានបញ្ចប់។

លោក Atthawit បានបន្ថែមថា ក្រុមហ៊ុន Transport Company Limited ទទួលបានចំនួនអ្នកដំណើរជាមធ្យមចន្លោះពី៨មុឺននាក់ទៅ៩មុឺននាក់ក្នុងមួយថ្ងៃ ជារៀលរាល់ថ្ងៃធ្វើការ ខណៈចំនួនអ្នកដំណើរនៅថ្ងៃចុងសប្តាហ៍អាចកើនឡើងដល់ចន្លោះពី១០មុឺននាក់ទៅ១២មុឺននាក់ជាមធ្យមក្នុងមួយថ្ងៃ។

ក្រុមហ៊ុន Transport Company Limited ជាសហគ្រាសរដ្ឋស្ថិតចំណុះក្រោមក្រសួងដឹកជញ្ជូនថៃ។

ក្រុមហ៊ុននេះក៏បើកដំណើរការផ្លូវរថយន្តក្រុងនៅក្នុងស្រុកចំនួន៥៦ខ្សែផងដែរ រួមមាន ផ្លូវទៅកាន់តំបន់ភាគខាងជើងនៃប្រទេសថៃចំនួន២១ខ្សែ ផ្លូវទៅកាន់តំបន់ភាគឦសាន និងតំបន់ភាគខាងកើតចំនួន២១ខ្សែ និងផ្លូវទៅកាន់តំបន់ភាគខាងត្បូងចំនួន១៤ខ្សែ៕ប្រភព: The Nation៕

កូរ៉េកំពុងសិក្សាសាងសង់ស្ពានថ្មីមួយទៀត ឆ្លងកាត់ដៃសមុទ្រ ក្នុងខេត្តកោះកុង

January 27, 2025

ដោយៈ និស្ស័យ

កោះកុងៈ អ្នកជំនាញកូររ៉េបាននិងកំពុងសិក្សា សាងសង់ស្ពានថ្មីមួយទៀត តភ្ជាប់ពីក្រុងខេមរៈភូមិន្ទ ទៅកាន់ស្រុមមណ្ឌលសីមា ជាស្ពានថ្មី អមនឹងស្ពានដែលមានស្រាប់បច្ចុប្បន្ននេះ។

ប្រធានមន្ទីរសាធារណៈការ និងដឹកជញ្ជូនខេត្តកោះកុង លោកអន ដាវុធបានមានប្រសាសន៍ឲ្យដឹងកាលពីសប្តាហ៍មុនថា ក្រុមអ្នកជំនាញការកំពុងជីកដីនៅបាតសមុទ្រ ដើម្បីវាយតម្លៃបច្ចេកទេសសាងសង់ស្ពានថ្មីមួយបន្ថែមទៀត ជំនួសស្ពានចាស់បច្ចប្បន្ន ដែលមានទំហំតូចចង្អៀត។

លោកបន្តថា “ការសិក្សានេះ ត្រូវចំណាយពេលប្រមាណ១ឆ្នាំ មុននឹងរចនារូបភាពស្ពាន និងដំណើរការសាងសង់នៅឆ្នាំ២០២៦ ឬឆ្នាំ២០២៧ខាងមុខ”។ លោកបន្តថា “ស្ពានថ្មីនេះ នឹងមានគន្លងផ្លូវ២ទៅ២មក និងមានផ្លូវថ្មើជើងទំហំបីម៉ែត្រ”។

លោកអន ដាវុធបានបន្តថា ចំណែកផ្លូវជាតិលេខ៤៨ ដែលចេញពីស្រុកមណ្ឌលសីមា ទៅកាន់ច្រកទ្វារអន្តរជាតិចាំយាម ជាប់ព្រំប្រទល់ជាមួយប្រទេសថៃ ប្រវែងប្រមាណ១០គីឡូម៉ែត្រ និងត្រូវស្ថាបនាថ្មីដោយប្រើប្រាស់កៅស៊ូac និងមានសួនច្បារពុះចំកណ្តាលទ្រូងផ្លូវ៕ប្រភពBTV៕

Is influx of JB property buyers from Singapore, China pricing out locals?

January 27, 2025

According to a property report released by Knight Frank Malaysia on Jan 13, more than half of the properties in Johor Bahru today are priced at RM800,000 and above. This figure encompasses both new and resale homes.

Knight Frank added that for over the first nine months of 2024, the transaction value for condominium units in Johor Bahru had grown by 23.2 per cent and the transaction value of serviced apartments has more than doubled, with a 100.2 per cent increase as compared to the same period in 2023.

Serviced apartments in the Malaysia context refer to upscale condominium units built on land for commercial use.

They may be owned by individual buyers for their own stay purposes or to rent out for additional income.
Lee Kun Thye, director of Knight Frank Malaysia’s Johor branch, told CNA that this hike in price and demand is driven by foreign buyers purchasing homes near the Johor Bahru city centre.

She said that the upcoming Johor Bahru-Singapore Rapid Transit System (RTS) Link has been a “crowd puller” for the property market, and apartments within a 5km radius of the upcoming station on the JB side are “selling like hotcakes”.

The 4km JB-Singapore RTS Link is expected to begin service by the end of 2026.

It aims to ease traffic congestion on the Causeway – one of the world’s busiest border crossings – by ferrying up to 10,000 passengers an hour each way on a journey that takes about five minutes.

“Singaporean buyers have returned to Johor post COVID-19 and definitely these are buyers looking ahead to the RTS improving connectivity with Singapore,” said Lee.

Johor-based analyst Samuel Tan, chief executive of boutique firm Olive Tree Property Consultants, told CNA there has been no official data from government statistics confirming that the property boom is driven by foreigners as the data does not segment the profile of buyers.

However, he said that from conversations with developers and agents, it is clear that the first wave of buyers for recent new launches in Johor Bahru city centre has been dominated by Singaporeans and Chinese nationals.

Tan cited R&F Princess Cove development, a cluster of tall condominiums which overlooks the Causeway and the Johor Strait, as a case in point. The development, built by China-based property developer R&F Group, has launched two phases comprising more than 7,000 units.

Source: CNA

1...289290291...3,231 Page 290 of 3,231