គម្រោងរថភ្លើងអាកាសនៅក្រុងភ្នំពេញមិនទាន់កំណត់ពេលជាក់លាក់

December 20, 2017

ដោយ៖ គង់ សូរិយា

ភ្នំពេញ៖ ការផ្សព្វផ្សាយពីគំរោងសាងសង់ផ្លូវរថភ្លើងលើអាកាស កាលពីម្សិលម៉ិញមិនមានភាពជាក់លាក់ទេ ព្រោះពេលវេលានៃការចាប់ផ្តើមសាងសង់ និងចំណាយថវិកាប៉ុន្មានរយលានដុល្លារ ដើម្បីវិនិយោគលើគំរោងនេះមិនទាន់ច្បាស់លាស់នៅឡើយ។

អ្នកនាំពាក្យសាលារាជធានីភ្នំពេញលោកម៉េត មាសភក្តីបានថ្លែងឲ្យដឹងតាមទូរស័ព្ទនាព្រឹកថ្ងៃទី២០ ធ្នូនេះថា ការសិក្សាពីផែនការសាងសង់ផ្លូវរថភ្លើងលើអាកាសនេះ មិនទាន់បានបញ្ចប់នៅឡើយទេ ហើយគំរោងនេះនឹងត្រូវវិនិយោគលើទឹកប្រាក់ប៉ុន្មាន ក៏មិនទាន់មានភាពជាក់លាក់នៅឡើយដែរ ដោយសារទីភ្នាក់ងារអភិវឌ្ឍន៍អន្តរជាតិនៃប្រទេសជប៉ុន(JICA) ទើបបង្ហាញពីរបាយការណ៍សិក្សាបឋមប៉ុណ្ណោះ កាលពីម្សិលម៉ិញនេះ។

លោកបន្តថា “រហូតមកទល់ពេលនេះ យើងមិនដឹងថាការសិក្សានេះនឹងបញ្ចប់នៅពេលណា និងចាប់ផ្តើមសាងសង់នាពេលណានោះទេ ហើយចំណាយថវិកាវិនិយោគប៉ុន្មានក៏មិនទាន់ដឹងដែរ។លោកបន្តថា “គំរោងនេះជាការស្នើសុំរបស់សម្តេចតេជោហ៊ុន សែនទៅកាន់នាយករដ្ឋមន្ត្រីជប៉ុនស៊ីន ហ្សូអាបេ ក្នុងដំណើរទស្សនកិច្ចរបស់សម្តេច ទៅកាន់ប្រទេសជប៉ុនកាលពីពេលថ្មីៗនេះ។

តាមគំរោងការសាងសង់ផ្លួវរថភ្លើងអាកាសធុនស្រាល ប្រភេទ AGT នេះមានប្រវែងប្រមាណ១៨គីឡូម៉ែត្រ និងចេញពីមហាវិថីហ្សាលដឺហ្គោល មហាវិថីមុនីរ៉េត ឆ្ពោះមកផ្លូវលេខ២១៧ ទៅកាន់ផ្លូវវេងស្រេង ឆ្ពោះមកព្រលានយន្តហោះ អន្តរជាតិភ្នំពេញ និងបែកខ្នែងទៅតំបន់ផ្លូវកប់ស្រូវ និងភ្ជាប់ជាមួយផ្លូវជាតិលេខ។

លោកបណ្ឌិតវ៉ាន់ វ៉ាតអ្នកឯកទេសផ្នែកនគរូបនីយកម្មឯករាជ្យបានថ្លែងថា ការសាងសង់រថភ្លើងលើអាកាស នឹងជួយសម្រួលបញ្ហាចរាចរណ៍ និងលើកកំ ពស់សោភ័ណភាពរាជធានីភ្នំពេញ ហើយវាធ្វើឲ្យទីក្រុងរបស់យើងមានភាពស៊ីវិល័យ និងទាក់ទាញភ្ញៀវទេសចរណ៍អន្តរជាតិផងដែរ។

លោកបន្តថា “វាជាមធ្យោបាយថ្មីមួយ សម្រាប់ការធ្វើដំណើរ និងកាត់បន្ថយការកកស្ទះចរាចរណ៍ និងអត្រាគ្រោះថ្នាក់ចរាចរណ៍ផងដែរ”៕

ដំណាច់ឆ្នាំ២០១៧ ចំនួនខុនដូកើនដល់ ១៦០ទីតាំង ស្មើនឹងជាង៦ម៉ឺនយូនីត

December 20, 2017

0

ដោយ៖ គង់ សូរិយា

ភ្នំពេញ៖ ការសិក្សាថ្មីមួយបានរកឃើញថា ដំណាច់ឆ្នាំ២០១៧នេះចំនួនខុនដូនៅរាជធានីភ្នំពេញបានកើនដល់១៦០ទីតាំង និងមានផ្ទះសរុបជាង៦ម៉ឺនយូនីត។

យោងតាមការសិក្សារបស់ក្រុមហ៊ុន Vtrust Appraisal ដែលបានបញ្ចប់និងផ្សព្វផ្សាយកាលពីពេលថ្មីៗនេះបានឲ្យដឹងថា ចំនួនខុនដូនៅរាជធានីភ្នំពេញមានចំនួន១៦០ទីតាំង ក្នុងនោះ៣៣ទីតាំងបានបញ្ចប់និងដាក់ចូលទីផ្សារ ដែលធ្វើឲ្យចំនួនខុនដូនៅរាជធានីភ្នំពេញកើនដល់៦០៥០០យូនីត ក្នុងនោះ៨៧០០យូនីតបាននិងកំពុងប្រើប្រាស់ឬបញ្ចប់។ ក្រៅពីរាជធានីភ្នំពេញ នៅខេត្តព្រះសីហនុមានខុនដូចំនួនសរុបកើនដល់១៥គំរោង និងមានផ្ទះប្រមាណ៥០០០យូនីត ដែលភាគច្រើននៃខុនដូទាំងនោះកំពុងសាងសង់។

ការសិក្សាដដែលបានរកឃើញថា នៅឆ្នាំ២០១៧ខុនដូចំនួន១៨,០០០យូនីត ត្រូវបានប្រកាសលក់ក្នុងទីផ្សារជាតិ និងអន្តរជាតិ ខណៈឆ្នាំ២០១៦មានខុនដូ ចំនួន១៤,០០០យួនីតប៉ុណ្ណោះបានប្រកាសលក់។ ផ្ទុយពីនេះ ការលក់ខុនដូនៅឆ្នាំ២០១៧នេះ គិតជាមធ្យមក្នុងមួយខែលក់បាន១០០យូនីត ខណៈឆ្នាំ២០១៦ចំនួននៃការលក់មានរហូតដល់៣៨០យូនីតក្នុងមូយខែ។

ខុនដូមួយបន្ទប់គេងមានតម្លៃចន្លោះពី៦០,០០០ ទៅ១០០,០០០ដុល្លារ ខុនដូពីបន្ទប់គេងមានតម្លៃចន្លោះពី១៣០,០០០ទៅ១៥០,០០០ដុល្លារ និងខុនដូបីប ន្ទប់គេងមានតម្លៃចន្លោះពី២៥០,០០០ទៅ៣០០,០០០ដុល្លារអាមេរិក។

ប្រធានផ្នែកស្រាវជ្រាវនៃក្រុមហ៊ុន VTRUST Appraisal លោក ហ៊ឹម សីហា បានឲ្យដឹងតាមទូរស័ព្ទនាព្រឹកថ្ងៃទី១៩ ធ្នូនេះថា ទោះបីជាស្ថិតក្នុងស្ថានភាពបែបនេះក្តី ក៏ទីផ្សារនេះមិនមានសញ្ញា ហានិភ័យណាមួយនោះទេ ផ្ទុយទៅវិញវាបង្កើតឲ្យមានភាពទាក់ទាញទៅវិញ ព្រោះដើម្បីឆ្លើយតបតម្រូវការនាពេលអនាគត ប៉ុន្តែអ្វីសំខាន់គឺអ្នកវិនិយោគ ត្រូវធ្វើយ៉ាងណាឲ្យគំរោងទាំងនោះសាងសង់ចប់។ កុំឲ្យមានការផ្អាកសាងសង់ ប៉ុន្តែរហូតមកទល់ពេលនេះ យើងមិនទាន់បានរកឃើញគំរោងណាគាំងកណ្តាលទីទៀតទេ។

លោកឧកញ៉ាចេង ខេងប្រធានក្រុមប្រឹក្សាភិបាលនៃក្រុមហ៊ុន Hutton CPLបានថ្លែងថា ចំនួនខុនដូនៅកម្ពុជាមិនមានបញ្ហាទីផ្សារនោះទេ ព្រោះខុនដូនៅកម្ពុជាមិនបានស្មើ២០ភាគរយ ធៀបនឹងប្រទេសជិតខាងនៅឡើយទេ ហេតុនេះអ្វីដែលត្រូវធ្វើ គឺការវិនិយោគថ្មីៗបន្ថែមទៀតកាន់តែច្រើនកាន់តែល្អ ព្រោះទីផ្សាររបស់យើងមិនមែនជាទីផ្សាររបស់កម្ពុជាតែមួយនោះទេ តែជាទីផ្សារសម្រាប់អាស៊ានទាំងមូល ដែលមានប្រជាជនរហូតដល់ជាង៦៣០លាននាក់៕

វិនិយោគលើអាផាតម៉ិន ឬសណ្ឋាគារមូយណា មានសេរីភាពហិរញ្ញវត្ថុជាង?

December 20, 2017

0

ដោយ៖ ដែន ចែងចាំង

ភ្នំពេញ៖ នៅពេលនិយាយពីអ្នកមានប្រាក់ ពួកគេតែងតែគិតពីការវិនិយោគ ដើម្បីទទួលបានផលចំណេញ និងភាពជោគជ័យសម្រាប់រយៈពេលវែងរបស់ពួកគេ ហេតុនេះការវិនិយោគលើវិស័យអាផាតម៉ិន និងសណ្ឋាគារមួយណាមានផលចំណេញជាង? ជាអ្វីដែលជាសំណួរចាក់ដោតមួយ។

ថ្ងៃនេះគេហទំព័រ Propertyarea.asia សូមនាំលោក អ្នកសិក្សាពីការវិនិយោគលើអាផាតម៉ិន និងសណ្ឋាគារ ជាមួយអ្នកជំនាញអចលនទ្រព្យ និងជាអ្នកកំពុងវិនិយោគសាងសង់អាផាតម៉ិនសម្រាប់ជួលផងដែរ។

លោកឧកញ៉ា នួន រិទ្ឋី អគ្គនាយកក្រុមហ៊ុន Khmer Foundation Appraisal ដែលបាននិងកំពុងវិនិយោគលើអាផាតម៉ិន KFA នៅតំបន់បឹងត្របែកបានថ្លែងឲ្យដឹងកាលពីពេលថ្មីៗនេះថា ការវិនិយោគលើអាផាតម៉ិន និងសណ្ឋាគារជាការវិនិយោគសម្រាប់រយៈពេលវែងដូចគ្នា និងមានភាពវិជ្ជមានខុសៗគ្នា អាស្រ័យលើ អ្នកវិនិយោគនិមួយៗជ្រើសរើស ប៉ុន្តែសម្រាប់ទស្សននិងការយល់ឃើញរបស់លោកផ្ទាល់ គឺការវិនិយោគលើអាផាតម៉ិនមានភាពងាយស្រួលជាង។

អាផាតម៉ិន

លោកឧកញ៉ានួន រិទ្ឋីបានបន្តថា ការវិនិយោគលើអាផាតម៉ិន ជាការវិនិយោគគិតពីរយៈពេលវែង និងសម្រាប់អ្នកចង់មានសេរីភាពហិរញ្ញវត្ថុ ឬចូលនិវត្តន៍ពីការងារវ័យក្មេង ព្រោះអាផាតម៉ិនទទួលបានចំណូលទៀតទាត់ និងស្ងាត់ស្ងៀម ជាងវិនិយោគលើសណ្ឋាគារ។ ការវិនិយោគលើអាផាតម៉ិន មិនសូវត្រូវការសេវាកម្មច្រើនពេកនោះទេ គឺប្រើប្រាស់បុគ្គលិកតិច និងងាយស្រួលគ្រប់គ្រង។

ការវិនិយោគលើអាផាតម៉ិនជោគជ័យ ទាមទារឲ្យមានការចងបណ្តាញជាមួយអ្នកជំនួញ ការផ្សព្វផ្សាយ និងសេវាកម្មល្អ ពិសេសទីតាំងមានភាពអំណោយផលផងដែរ។

សណ្ឋាគារ

ការវិនិយោគលើសណ្ឋាគារ ជាការវិនិយោគរយៈពេលវែងដូចគ្នា ទទួលបានចំណូលច្រើនផងដែរ ប៉ុន្តែសណ្ឋាគារត្រូវមានសេវាកម្មច្រើនជាងអាផាតម៉ិន ដូចជា ត្រូវមានបន្ទប់ប្រជុំ មានភោជនីយដ្ឋាន កន្លែងហាត់ប្រាណ និងមានការប្រើប្រាស់បុគ្គលិកច្រើនជាងអាផាតម៉ិន ពិសេសត្រូវផ្តោតលើការរក្សានូវផាសុខភាព ភាពកក់ក្តៅ និងសុវត្ថិភាពដល់ភ្ញៀវជាចម្បង។ ផ្ទុយទៅវិញអាផាតម៉ិន មិនចាំបាច់មានភោជនីយដ្ឋាន សាលប្រជុំ ឬប្រើប្រាស់បុគ្គលិកច្រើននោះទេ។លោកឧកញ៉ានួន រិទ្ឋីបញ្ជាក់ឲ្យដឹង។

លោកឧកញ៉ាបានបន្តថា “ទោះជាយ៉ាងណាការវិនិយោគលើសណ្ឋាគារ ទទួលបានប្រាក់ចំណូលច្រើនប្រចាំថ្ងៃ ប្រសិនជាសណ្ឋាគារនោះដំណើរការដោយជោគជ័យ។លោកបន្តថា “ហេតុនេះការវិនិយោគលើអាផាតម៉ិន និងសណ្ឋាគារល្អម្យ៉ាងម្នាក់ ប៉ុន្តែការវិនិយោគលើសណ្ឋាគារ ទាមទារឲ្យម្ចាស់មានភាពមមាញឹកច្រើន”៕

វិស័យឯកជនស្នើអាជ្ញាធរសម្បូរព្រៃគុក ពន្យាពេលដំឡើងថ្លៃសំបុត្រ

December 20, 2017

0

ដោយ៖ គង់ សូរិយា

ភ្នំពេញ៖ ក្រុមការងារឯកជនផ្នែកវិស័យទេសចរណ៍ បានស្នើសុំអាជ្ញាធរសម្បូរព្រៃគុក ពន្យាពេលការដំឡើងថ្លៃសំបុត្រចូល ទស្សនារមណីយដ្ឋាននេះ សម្រាប់ភ្ញៀវជាតិ និងអន្តរជាតិ។

លោក ស្រីឆាយ ស៊ីវលីន ប្រធានសមាគមទីភ្នាក់ងារទេសចរណ៍កម្ពុជាបានថ្លែងឲ្យដឹងតាមទូរស័ព្ទនាព្រឹកថ្ងៃទី២០ ធ្នូនេះថា សមាគមស្នើសុំឲ្យអាជ្ញាធរសម្បូរព្រៃគុក ពន្យាពេលដំឡើងថ្លៃសំបុត្រចូលទស្សនាប្រាសាទនេះ ព្រោះការជូនដំ ណឹងពីការដំឡើងថ្លៃសំបុត្រនេះ មានរយៈពេលខ្លីពេក ហើយការដំឡើងថ្លៃខ្ពស់ ពេក ព្រោះកាលពីមុនមានតម្លៃត្រឹម៣ដុល្លារ ប៉ុន្តែចាប់ពីខែមករាឆ្នាំ២០១៨ អាជ្ញាធរនេះបានដំឡើងថ្លៃសំបុត្ររហូតដល់១០ដុល្លារ សម្រាប់ទេសចរណ៍ម្នាក់។

លោកស្រីបន្តថា សមាគមដែលតំណាងឲ្យក្រុមហ៊ុនទេសចរណ៍ជាង១០០ក្រុមហ៊ុន សូមស្នើសុំអាជ្ញាធរសម្បូរព្រៃគុកពន្យាពេល៦ខែទៀត ចាំដំឡើងថ្លៃសំបុត្រ ដើម្បីឲ្យប្រតិបត្តិករទេសចរណ៍នានាបានរៀបចំខ្លួនរួចរាល់ និងងាយស្រួលរៀបចំកញ្ចប់ទស្សនកិច្ចឡើងវិញ។

អាជ្ញាធរសម្បូរព្រៃគុក កាលពីពេលថ្មីៗនេះបានចេញសេចក្តីជូនដំណឹងទៅសមាគមទេសចរណ៍ និងស្ថាប័នពាក់ព័ន្ឋពីការដំឡើងថ្លៃសំបុត្រចូលទស្សនាប្រាសាទសម្បូរព្រៃគុកពី៣ដុល្លារ ដល់១០ដុល្លារ។

លោកហូ វណ្ឌី អគ្គលេខាធិការសមាគមទេសចរណ៍ជាតិកម្ពុជាបានថ្លែងឲ្យដឹងផងដែរថា ការពន្យាពេលដំឡើងថ្លៃសំបុត្រចូលទស្សនា ប្រាសាទសម្បូរព្រៃគុក សម្រាប់ភ្ញៀវទេសចរណ៍អន្តរជាតិជារឿងល្អប្រសើរ ដើម្បីឲ្យប្រតិបត្តិករទេសចរណ៍នានាបានត្រៀមខ្លួន និងរៀបចំកញ្ចប់ទស្សនកិច្ច និងកម្មវិធីទុកជាមុន ហើយបើដំឡើងថ្លៃគួរធ្វើជាជំហ៊ានៗ មិនគួរដំឡើងមានលក្ខណៈគំហុកបែបនេះទេ។លោកបន្តថា ការរៀបចំដំឡើងឲ្យមានភាពសមស្រប គឺជាគោលនយោបាយទាក់ទាញទេសចរណ៍ ហេតុនេះគួរដំឡើងជាភាគរយតិចៗសិន។

លោកបន្តថា “ការដំឡើងថ្លៃលឿនបែបនេះ អាចធ្វើឲ្យប៉ះពាល់ចំណូលជាតិ និងសហគមន៍ប្រជាពលរដ្ឋនៅតំបន់នោះ ព្រោះវាអាចប៉ះពាល់ដល់ការសម្រេចចិត្តរបស់ភ្ញៀវទេសចរណ៍អន្តរជាតិនានា”៕

Gold Tower42 ចាប់ផ្តើមឆ្នាំ២០១៨ ខណៈក្រុមហ៊ុនសាងសង់កំពុងសុំច្បាប់

December 19, 2017

0

ដោយ៖ ដួង ចន្ទ្រា

ភ្នំពេញ៖ ជាថ្មីម្តងទៀតក្រុមហ៊ុន YUNWOO Cambodia បានបង្ហាញពីឆន្ទៈក្នុងការសាងសង់អាគារតម្លៃ២៤០លានដុល្លារ នៅដើមឆ្នាំ២០១៨ខាងមុខនេះ ខណៈក្រុមហ៊ុនទទួលបន្ទុកសាងសង់ និងរចនាអាគារនេះកំពុងស្នើសុំអាជ្ញាប័ណ្ណពីក្រសួងពាក់ព័ន្ឋ។

ក្នុងសេចក្តីប្រកាសព៌តមានរបស់ក្រុមហ៊ុននេះ ដែលបាននិយាយពាក់ព័ន្ឋនឹងសុវត្ថិភាព និងគុណភាពសំណង់ទុកចោលជាច្រើនឆ្នាំនាព្រឹកថ្ងៃទី១៩ ធ្នូនេះ លោក Kim Tae Yeon ប្រធានក្រុមហ៊ុន YUNWOO ប្រចាំកម្ពុជាបានឲ្យដឹងថា អាគារនេះ បានចំណាយប្រាក់សាងសង់អស់១០០លានដុល្លារហើយ និងត្រូវចំ ណាយប្រាក់១៤០លានដុល្លារទៀត ដើម្បីបញ្ចប់គំរោងនេះនៅចុងឆ្នាំ២០១៩ខាងមុខ។ មជ្ឈមណ្ឌលពាណិជ្ជកម្មនេះរួមបញ្ចូលផ្សារទំនើប អាគារការិយាល័យ ខុនដូសរុបចំនួន៣៩៩យូនីត។

កាលពីពេលថ្មីៗនេះ ក្រុមហ៊ុន YUNWOO បានចុះកិច្ចព្រមព្រៀងដើម្បីសាងសង់បញ្ចប់អាគារនេះ នៅចុងឆ្នាំ២០១៩ខាងមុខជាមួយក្រុមហ៊ុនផ្នែករចនាគឺក្រុមហ៊ុន Hongtao Decoration និងក្រុមហ៊ុនសាងសង់ឈ្មោះ Waiman construction& Engineering ដែលមានមូលដ្ឋាននៅប្រទេសចិន។

អាគារ Gold Tower42 បានផ្អាកការសាងសង់នៅឆ្នាំ២០១០ ខណៈដែលក្រុមហ៊ុនសាងសង់បានបញ្ចប់ត្រឹមជាន់ទី៣១ នៃអាគារកំពស់៤២ជាន់នេះ៕

ក្រុមហ៊ុនអចលនទ្រព្យយក្សចិនបោះទុនវិនិយោគ ៧០០លានដុល្លាសាងសង់អាគារពាណិជ្ជកម្មចម្រុះ

December 19, 2017

0

ដោយ៖ គង់ សូរិយា

ភ្នំពេញ៖ វិស័យសំណង់ និងអចលនទ្រព្យកម្ពុជា មិនបញ្ឈប់ល្បឿននៃការអភិវឌ្ឍន៍នោះទេ ដោយក្រុមហ៊ុន R&F Properties Cambodia Co.,Ltd ជាក្រុមហ៊ុនយក្សមួយមកពីប្រទេសចិន បានបោះទុនវិនិយោគប្រមាណ៧០០លានដុល្លារអាមេរិក លើគម្រោងសាងសង់អគារពាណិជ្ជកម្មចម្រុះ។

អគ្គនាយកក្រុមហ៊ុន R&F Properties Cambodia Co.,Ltd លោក Yanli Lin ក្នុងពិធីសម្ពោធបើកដំណើរការសាងសង់អគារខុនដូ ព្រឹកថ្ងៃទី១៩ ធ្នូ ២០១៧នេះថា R&F គឺជាក្រុមហ៊ុនអភិវឌ្ឍអចលនទ្រព្យ ដែលមានបញ្ចូលនូវការរចនាអចលនទ្រព្យ ការអភិវឌ្ឍ ការគ្រប់គ្រងវិស្វកម្ម ការលក់ការគ្រប់គ្រងអចលនទ្រព្យ និងភ្នាក់ងារអចលនទ្រព្យ ។ ក្រុមហ៊ុនមានគុណវុឌ្ឍិអភិវឌ្ឍន៍ និងគ្រប់គ្រងអចលនទ្រព្យកម្រិតកម្រិតA និងជាក្រុមហ៊ុនអចលនទ្រព្យដែលមានសមត្ថភាពចម្រុះខ្លាំងបំផុតនៅប្រទេសចិន ។

លោកបានបន្តថា “គម្រោងនេះមានហេដ្ឋារចនាសម្ព័ន្ធពាណិជ្ជកម្មស្នូល ដែលមានទំហំទឹកប្រាក់ប្រហែល៧០០លានដុល្លារអាមេរិក និងគ្របដណ្តប់លើផ្ទៃដីសរុប៧,៧ហិកតា និងមានផ្ទៃក្រឡាអគារជិត៥៦ម៉ឺនម៉ែត្រការ៉េ ក្នុងនោះអាគារលំនៅដ្ឋានមានទំហំចាប់ពី ៥៥.១៣៤ម៉ែត្រការ៉េ និងមានបន្ទប់ចាប់ពី១ទៅ៣បន្ទប់ ដែលមានភាពសមស្របសម្រាប់ទាំងការវិនិយោគ និងការរស់នៅផ្ទាល់ខ្លួន។លោកបន្តថា “ក្នុងនាមជាសហគមន៍រស់នៅដ៏ធំមួយក្នុងរាជធានីភ្នំពេញ គម្រោងនេះត្រូវបានបំពាក់ដោយការតុបតែងសម្ភារៈដ៏ប្រណិត តាមបទដ្ឋានអន្តរជាតិ និងក្លឹបកម្សាន្តលំដាប់កំពូល” ។

គំរោងមជ្ឈមណ្ឌលពាណិជ្ជកម្មចម្រុះរួមមានខុនដូ អាផាតម៉ិន ការិយាល័យ មជ្ឈមណ្ឌលកំសាន្ត និងកីឡានេះស្ថិតនៅតាមបណ្តោយមហាវិថីសម្តេចតេជោហ៊ុន សែនឬផ្លូវលេខ៦០ម៉ែត្រ។

លោក Yanli Lin បានបន្តឲ្យដឹងទៀតថា វាជាការចាប់ផ្តើមដ៏ល្អមួយ គឺជាជោគជ័យពាក់កណ្តាល ក្នុងនាមក្រុមហ៊ុននិងដៃគូសាងសង់ដែលពាក់ព័ន្ធ នឹងអនុវត្តស្តង់ដារខ្ពស់ នៃការធ្វើផែនការការគ្រប់គ្រងគុណភាពខ្ពស់ និងប្រតិបតិ្តការប្រកបដោយប្រសិទ្ធភាពខ្ពស់ ក្នុងកិច្ចខិតខំប្រឹងប្រែង ដើម្បីផ្តល់ជូនម្ចាស់កម្មសិទិ្ធនូវលក្ខខណ្ឌ នៃការរស់នៅដែលមានគុណភាពខ្ពស់ ដើម្បីបង្កើតនូវគម្រោងប៊ូទិក ដែលមានអត្ថន័យទូលំទូលាយទី១ នៅរាជធានីភ្នំពេញ សម្រាប់ក្រុមហ៊ុន R&F Properties Cambodia Co.,Ltd ។

រដ្ឋលេខាធិការក្រសួងរៀបចំដែនដី នគរូបនីយកម្ម និងសំណង់លោកប៉ែន សុផល បានថ្លែងថា ការវិនិយោគនេះប្រព្រឹត្តទៅក្នុងបរិយាកាស ដែលប្រទេសកម្ពុជាកំពុងមានសុខសន្តិភាព ស្ថិរភាពនយោបាយ សេដ្ឋកិច្ចសង្គមពេញលេញ ដែលជាលទ្ធផលនៃការអនុវត្តយុទ្ធសាស្ត្រចតុកោណដំណាក់កាលទី៣ របស់រាជរដ្ឋាភិបាល ដែលបាននិងកំពុងនាំមកនូវកំនើន ការងារ សមធម៌ និងប្រសិទ្ធភាព ប្រកបដោយផ្លែផ្កាគ្រប់វិស័យ ជូនដល់ប្រជាពលរដ្ឋទូទាំងប្រទេស ។

លោកបន្តថា “លទ្ធផលគួរជាទីមោទននេះ បានកើតចេញពីការខិតខំប្រឹងប្រែងពីគ្រប់តួអង្គពាក់ព័ន្ធទាំងអស់ទាំងរដ្ឋ និងឯកជន ជាពិសេសការដាក់ចេញនូវគោលនយោបាយដ៏ត្រឹមត្រូវ ក្នុងការអភិវឌ្ឍវិស័យឯកជន និងការទាក់ទាញការវិនិយោគ។

លោក ប៉ែន សុផល បានបន្តថា កត្តាសុខសន្តិភាព ស្ថិរភាពនយោបាយបាននាំមកនូវការអភិវឌ្ឍលើគ្រប់វិស័យ ជួយទ្រទ្រង់ដល់កំនើនសេដ្ឋកិច្ចកម្ពុជា ក្នុងរង្វង់៧ភាគរយ ក្នុងរយៈពេលជាច្រើនឆ្នាំបន្តបន្ទាប់មកនេះ និងតាមការព្យាករណ៍នៅឆ្នាំ២០១៧នេះ សេដ្ឋកិច្ចកម្ពុជា នឹងសម្រេចបានក្នុងរង្វង់៧ភាគរយបន្តទៀត ក្នុងនោះវិស័យអចលនទ្រព្យ និងសំណង់ ជាសរសរស្តម្ភមួយដ៏សំខាន់ ក្នុងការទ្រទ្រង់សេដ្ឋកិច្ចជាតិ។ ជាក់ស្តែងទុនវិនិយោគវិស័យសំណង់ក្នុងឆ្នាំ២០១៦កន្លងទៅនេះ មានប្រមាណ៥៥៨០លានដុល្លារអាមេរិក បើធៀបនឹងឆ្នាំ២០១៥ គឺមានកំណើនប្រមាណ៦៧.១៥ភាគរយ និងក្នុងរយៈពេល១០ខែនៃឆ្នាំ២០១៧នេះ មានប្រមាណ៦២៦៧លានដុល្លារអាមេរិក បើធៀបនឹងរយៈពេលដូចគ្នានៃឆ្នាំ២០១៦គឺមានកំណើនប្រមាណ២៧,៦៨ភាគរយ៕

ដំណឹងល្អ តោះ ! ទៅមើលស្ថានភាពខុនដូឆ្នាំ២០១៧

December 19, 2017

0

ដោយគង់ សូរិយា

ភ្នំពេញ៖ នៅពេលនិយាយពីខុនដូ គេតែងនឹកឃើញវត្តមានអាគារខ្ពស់ៗនៅ ដែលលូតឡើងជារៀងរាល់ថ្ងៃនៅទីក្រុងភ្នំពេញ ដែលវាកំពុងផ្លាស់ប្តូរមុខមាត់ទីក្រុងនេះយ៉ាងសម្បើម។

តើស្ថានភាពនៃការវិនិយោគ ការផ្គត់ផ្គង់ និងតម្រូវការនៅក្នុងលំនៅដ្ឋានបែបសហកម្មសិទ្ឋនេះ (ខុនដូ) ប្រែប្រួលយ៉ាងដូចម្តេច? គេហទំព័យអចលនទ្រព្យ ឈានមុខគេនៅកម្ពុជា Propertyarea.asia នឹងបង្ហាញជូននូវការសិក្សាបែបវិទ្យាសាស្ត្រមួយក្នុងវិស័យនេះ។

យោងតាមការសិក្សារបស់ក្រុមហ៊ុន Vtrust Appraisal ដែលបានបញ្ចប់និងផ្សព្វផ្សាយកាលពីពេលថ្មីៗនេះបានឲ្យដឹងថា ចំនួនខុនដូនៅរាជធានីភ្នំពេញមានចំនួន១៦០ទីតាំង ក្នុងនោះ៣៣ទីតាំងបានបញ្ចប់និងដាក់ចូលទីផ្សារ ដែលធ្វើឲ្យចំនួនខុនដូនៅរាជធានីភ្នំពេញកើនដល់៦០៥០០យូនីត ក្នុងនោះ៨៧០០យូនីតបាននិងកំពុងប្រើប្រាស់ឬបញ្ចប់។ ក្រៅពីរាជធានីភ្នំពេញ នៅខេត្តព្រះសីហនុមានខុនដូចំនួនសរុបកើនដល់១៥គំរោង និងមានផ្ទះប្រមាណ៥០០០យូនីត ដែលភាគច្រើននៃខុនដូទាំងនោះកំពុងសាងសង់។

នៅឆ្នាំ២០១៧ខុនដូចំនួន១៨,០០០យូនីត ត្រូវបានប្រកាសលក់ក្នុងទីផ្សារជាតិ និងអន្តរជាតិ ខណៈឆ្នាំ២០១៦មានខុនដូ ចំនួន១៤,០០០យួនីតប៉ុណ្ណោះបានប្រកាសលក់។ ផ្ទុយពីនេះ ការលក់ខុនដូនៅឆ្នាំ២០១៧នេះ គិតជាមធ្យមក្នុងមួយខែលក់បាន១០០យូនីត ខណៈឆ្នាំ២០១៦ចំនួននៃការលក់មានរហូតដល់៣៨០យូនីតក្នុងមូយខែ។ ការសិក្សាបញ្ជាក់ឲ្យដឹង។

ខុនដូមួយបន្ទប់គេងមានតម្លៃចន្លោះពី៦០,០០០ ទៅ១០០,០០០ដុល្លារ ខុនដូពីបន្ទប់គេងមានតម្លៃចន្លោះពី១៣០,០០០ទៅ១៥០,០០០ដុល្លារ និងខុនដូបីបន្ទប់គេងមានតម្លៃចន្លោះពី២៥០,០០០ទៅ៣០០,០០០ដុល្លារអាមេរិក។

លោកហ៊ឹម សីហាប្រធានផ្នែកស្រាវជ្រាវនៃក្រុមហ៊ុន VTRUST Appraisal បានឲ្យដឹងតាមទូរស័ព្ទនាព្រឹកថ្ងៃទី១៩ ធ្នូនេះថា ទោះបីជាស្ថិតក្នុងស្ថានភាពបែបនេះក្តី ក៏ទីផ្សារនេះមិនមានសញ្ញា ហានិភ័យណាមួយនោះទេ ផ្ទុយទៅវិញវាបង្កើតឲ្យមានភាពទាក់ទាញទៅវិញ ព្រោះដើម្បីឆ្លើយតបតម្រូវការនាពេលអនាគត ប៉ុន្តែអ្វីសំខាន់គឺអ្នកវិនិយោគ ត្រូវធ្វើយ៉ាងណាឲ្យគំរោងទាំងនោះសាងសង់ចប់។ កុំឲ្យមានការផ្អាកសាងសង់ ប៉ុន្តែរហូតមកទល់ពេលនេះ យើងមិនទាន់បានរកឃើញគំរោងណាគាំងកណ្តាលទីទៀតទេ។

លោកបន្តថា “ស្ថានភាពនៃការផ្គត់ផ្គង់ វាដូចជាផ្លូវមួយដែលបានបញ្ចប់ការសាងសង់ ទោះបីមិនមានមនុស្សធ្វើដំនើរច្រើនពីមុនក្តី ប៉ុន្តែពេលសាងសង់ចប់ វានឹងទាក់ទាញអ្នកធ្វើដំណើរច្រើន។លោកបន្តថា “វាជាឳកាសសម្រាប់ទីផ្សារ សម្រាប់អតិថិជន ព្រោះពេលសាងសង់ចប់អ្នកវិនិយោគ ក៏អាចប្រែក្លាយខុនដូទៅជាអាផាតម៉ិនបាន។

អ្នកនាងអាន សុធីតានាយិកាប្រចាំប្រទេសនៃក្រុមហ៊ុន CBRE Cambodia បានថ្លែងថា នាពេលបច្ចុប្បន្នការលក់ខុនដូប្រណីត មានការយឺតយ៉ាវបន្តិច ប៉ុន្តែសម្រាប់ខុនដូដែលមានតម្លៃសមរម្យ ដោយផ្តោតលើអ្នកមានប្រាក់ចំណូលមធ្យម និងលើមធ្យមបន្តិចនៅតែមានសញ្ញាល្អប្រសើរ។អ្នកនាងបន្តថា អ្នកទិញខុនដូជាជនជាតិបរទេស ភាគច្រើនពួកគេទិញសម្រាប់ជួល និងលក់ចេញយកចំណេញ ប៉ុន្តែប្រជាជនក្នុងស្រុកទិញសម្រាប់រស់នៅ និងលក់ចេញឬទុកជួលផងដែរ។

អ្នកនាងបន្តថា “បច្ចុប្បន្នប្រជាជនខ្មែរ ដែលបានទិញខុនដូបានកើនសន្សឹមៗ ប៉ុន្តែស្ថានភាពទីផ្សារមិនមានសញ្ញាហានិភ័យនោះទេ។

ប្រធានក្រុមប្រឹក្សាភិបាលនៃក្រុមហ៊ុន Hutton CPL លោកឧកញ៉ាចេង ខេងបានថ្លែងថា ស្ថានភាពទីផ្សារនេះនៅតែល្អប្រសើរ បើទោះជាមានអ្នកខ្លះបារម្ភថា ការផ្គត់ផ្គង់លើសតម្រូវការក្តី ប៉ុន្តែការពិតវាមិនលើសតម្រូវការនោះទេ ព្រោះចំនូនខុនដូនៅកម្ពុជា ធៀបនឹងប្រទេសជិតខាងមិនទាន់បាន១០ ទៅ២០ភាគរយនៃខុនដូប្រទេសគេនៅឡើយទេ៕

និយ័តករទូរគមនាគមន៍កម្ពុជាព្រមានមិនឲ្យក្រុមហ៊ុនទូរស័ព្ទរំខានអតិថិជននៅម៉ោងសម្រាក

December 19, 2017

0

ដោយ៖ វុត្ថា

ភ្នំពេញ៖ និយ័តករទូរគមនាគមន៍កម្ពុជា (នទក) បានប្រមានចំពោះប្រតិបត្តិករ ឬក្រុមហ៊ុនផ្ដល់សេវាទូរស័ព្ទចល័ត ទាំងអស់នៅកម្ពុជាឲ្យបញ្ឈប់ជាបន្ទាន់នូវការផ្ញើរសារ ឬការផ្សព្វផ្សាយពាណិជ្ជកម្ម និងខលទៅរំខានអតិថិជនរបស់ខ្លួនក្នុងម៉ោងសម្រាក់ដែលប៉ះពាល់ និងរំខានដល់សិទ្ធឯកជនរបស់អ្នកប្រើប្រាស់សេវារបស់ខ្លួន។

ការបញ្ចេញសារប្រមានចំពោះប្រតិបត្តិករ ឬក្រុមហ៊ុនផ្ដល់សេវាទូរស័ព្ទចល័តរបស់និយ័តករទូរគមនាគមន៍កម្ពុជានេះ ធ្វើឡើងនៅព្រឹកថ្ងៃទី១៩ ធ្នូនេះ ក្រោយពីទទូលការប្តឹងពីសំណាក់អ្នកប្រើប្រាស់ថា មានក្រុមហ៊ុនផ្តល់សេវាកម្មផ្ញើរក្នុងម៉ោងសម្រាក់ ដែលរំខានដល់ដំណេករបស់ពួកគេ។

និយ័តករទូរគមនាគមន៍កម្ពុជាបានលើកឡើថា “ដោយទទួលបានអ៊ីម៉ែលពីសំណាក់អ្នកប្រើប្រាស់ ប្ដឹងមកកាន់នាយកដ្ឋានការប្រកួតប្រជែង និងការការពារអ្នកប្រើប្រាស់អំពីទូរស័ព្ទ ឬសារផ្សព្វផ្សាយ ដែលផ្ញើមករំខាននៅម៉ោងសម្រាក ជាពិសេសកំឡុងពេលចាប់ពីម៉ោង១០យប់ឡើងទៅ ឬកណ្ដាលអធ្រាតជាដើម និយ័តករទូរគមនាគមន៍កម្ពុជា សូមធ្វើការក្រើនរំលឹកឡើងវិញ ចំពោះប្រតិបត្តិករផ្ដល់សេវាទូរស័ព្ទចល័តទាំងអស់ឱ្យយកចិត្តទុកដាក់ករណីនេះ។

អាជ្ញាធរដែលគ្រប់គ្រងក្រុមហ៊ុន ទូរគមនាគមន៍ដដែលនេះបានបន្តថា “សូមប្រតិបត្តិករទាំងអស់បញ្ឈប់នូវការផ្ញើសារ ឬខលផ្សព្វផ្សាយអំពីប្រូម៉ូសិនរបស់ខ្លួននៅក្នុងម៉ោងសម្រាក ដែលចាត់ទុកជាការរំខានសិទ្ធឯកជនរបស់អ្នកប្រើប្រាស់។

គួរបញ្ជាក់ផងដែរថា Screenshots ដែលលោកអ្នកបានឃើញនេះបានផ្ញើពីក្រុមហ៊ុន ស្មាត និងម៉ូប៊ីថែល។

ទោះជាយ៉ាងនេះក្ដីនិយ័តករទូរគមនាគមន៍កម្ពុជា បានបញ្ជាក់ថា ពួកគេនឹងធ្វើការស្វែងរកថា មានការផ្ញើចេញពីក្រុមហ៊ុនផ្សេងឬអត់ ហើយសិក្សាអំពីមូលហេតុ ដែលនាំឱ្យមានការផ្ញើសារទាំងនេះជាមុនសិន ដើម្បីឱ្យច្បាស់ថាជាកំហុសរបស់ប្រព័ន្ធ ឬក៏ជាការយល់ច្រលំណាមួយ រួចន.ទ.ក. នឹងធ្វើលិខិតជូនដំណឹងផ្លូវការ ទៅកាន់គ្រប់ប្រតិបត្តិករទាំងអស់ឱ្យអនុវត្តតាម។ យើងសង្ឃឹមយ៉ាងមុតមាំថា បណ្ដាប្រតិបត្តិករទាំងអស់នឹងចូលរួមសហការល្អជាមួយគ្នា”៕

លំហូរ FDI មកកម្ពុជានៅតែមានភាពខ្លាំង ខណៈកម្ពុជាជាគោលដៅរបស់អ្នកវិនិយោគ

December 19, 2017

0

ដោយ៖ គង់ សូរិយា

ភ្នំពេញ៖ លំហូរទុនវិនិយោគដោយផ្ទាល់ពីបរទេសមកកម្ពុជា (FDI) នៅតែមានសញ្ញារ៉ឹងមាំ និងគួរឲ្យរីករាយសម្រាប់ឆ្នាំ២០១៧នេះ ដោយទំហំទឹកប្រាក់កើនដល់ជាង២៦០០លានដុល្លារ ខណៈកម្ពុជាកំពុងស្ថិតក្រោមក្រសែភ្នែកនៃអ្នកវិនិយោគអន្តរជាតិ។

នាយិកាប្រចាំប្រទេសនៃក្រុមហ៊ុន CBRE Cambodia អ្នកនាងអាន សុធីតាដែលបានតាមដានការវិវត្តន៍ នៃលំហូរទុនវិនិយោគពីបរទេសមកកាន់កម្ពុជាបានឲ្យដឹងតាមទូរស័ព្ទកាលពីពេលថ្មីៗនេះថា ដោយសារកម្ពុជាមានការរីកចម្រើននិងក្លាយជាប្រទេសមួយ ដែលអ្នកវិនិយោគផ្តោតជាគោលដៅ បានធ្វើឲ្យលំហូរទុនវុនិយោគដោយផ្ទាល់ពីបរទេស កើនដល់២៦០០លានដុល្លារកាលពីឆ្នាំមុន និងរំពឹងកើនដល់ច្រើនជាង២៦០០លានដុល្លារ សម្រាប់ឆ្នាំ២០១៧នេះ។នេះបើតាមការព្យាករណ៍របស់ក្រសួងសេដ្ឋកិច្ច និងហិរញ្ញវត្ថុ។

អ្នកនាងបន្តថា “កត្តាសុខសន្តិភាព ស្ថិរភាពនយោបាយ ច្បាប់វិនិយោគច្បាប់ពន្ឋ និងច្បាប់ពាក់ព័ន្ឋនឹងការលើកទឹកចិត្តអ្នកវិនិយោគ បានធ្វើឲ្យកម្ពុជាទទួលបានកំនើនលំហូរ FDI គួរឲ្យរីករាយ។អ្នកនាងបន្តថា “ធៀបជាមួយប្រទេសថៃកាលពីឆ្នាំមុន គឺថៃមានលំហូរ FDI ត្រឹម១៣០០លានដុល្លារប៉ុណ្ណោះ ដោយសារបញ្ហានយោបាយនៅប្រទេសថៃ ការឡើងថ្លឌពលកម្ម និងការពឹងផ្អែករបស់ថៃលើអ្នកវិនិយោគក្នុងស្រុក។

អ្នកនាងអាន សុធីតាបានបន្តថា ប្រសិនជាធៀបលំហូរ FDI មកកម្ពុជា គឺមានប្រហាក់ប្រហែលគ្នា នឹងប្រទេសវៀតណាមកាលពីឆ្នាំមុន ប៉ុន្តែនៅឆ្នាំនេះយើងមិនទាន់មានតួលេខជាក់លាក់ទេ តែតាមការព្យាករណ៍កំនើនពីរដ្ឋាភិបាលកំនើន FDI មកកម្ពុជានឹងនៅតែល្អប្រសើរ។

ទោះជាយ៉ាងណាយោងតាមប្រសាសន៍សម្តេចតេជោហ៊ុន សែននាយករដ្ឋមន្ត្រីកម្ពុជាកាលពីពេលថ្មីៗនេះបានឲ្យដឹងថា នៅក្នុងឆ្នាំ២០១៦ កម្ពុជាបានទាក់ទាញការវិនិយោគដោយផ្ទាល់ពីបរទេស ក្នុងទឹកប្រាក់សរុប៣.៦០៩.៧០លានដុល្លារ ក្នុងនោះទុនវិនិយោគលើវិស័យឧស្សាហកម្ម ៣៤ភាគរយ។ វិស័យហេដ្ឋារចនាសម្ព័ន្ធ១៥ភាគរយ វិស័យកសិកម្ម១៣ភាគរយ និងវិស័យទេសចរណ៍ ៣៨ភាគរយ។

សម្តេចបានបន្តថា កម្ពុជាបាននាំចេញទំនិញទៅបរទេស គិតជាទឹកប្រាក់សរុបប្រមាណ៨ពាន់លានដុល្លារ គឺបានកើនឡើងប្រមាណ១១ភាគរយ ធៀបទៅនឹងរយៈពេលដូចគ្នាក្នុងឆ្នាំ២០១៥»៕

ក្រុមហ៊ុនតាក់ស៊ី Grab ប្រកាសឈានជើងចូលទីផ្សារកម្ពុជាជាផ្លូវការ

December 19, 2017

0

ដោយ៖ ដែន ចែងចាំង

ភ្នំពេញ៖ ក្រុមហ៊ុន Grab ជាក្រុមហ៊ុនផ្តល់សេវាតាក់ស៊ីឈានមុខគេនៅអាស៊ីអាគ្មេយ៍បានប្រកាសចូលទីផ្សារកម្ពុជាជាផ្លូវការ បន្ទាប់ពីបានចុះកិច្ចព្រមព្រៀងជាមួយក្រសួងសាធារណៈការ និងដឹកជញ្ជូននាព្រឹកថ្ងៃទី១៩ ធ្នូនេះ។

អតិថិជនអាចហៅតាក់ស៊ី Crab តាមរយៈ App Store និង ហ្គូថហ្គល ផ្លេ (Google Play) (អនឡាញ) ជាបច្ចេកវិទ្យាក្នុងការផ្តល់សេវាកម្មតាក់ស៊ីទីមួយនៅកម្ពុជា ដែលប្រើប្រាស់បច្ចេកវិទ្យា និងទិន្នន័យផ្ទាល់រវាងអតិថិជន និងក្រុមហ៊ុន។

លោក Wee Tang Yee នាយកក្រុមហ៊ុនក្រេបឲ្យដឹងក្នុងពិធីសម្ពោធកម្មវិធីមធ្យោបាយធ្វើដំណើរលេខ១ នៅអាស៊ីអាគ្នេយ៍មកដល់ប្រទេសកម្ពុជានាព្រឹកថ្ងៃទី១៩ ធ្នូនេះថា ក្រោយពីបានចុះអនុស្សារណៈយោគយល់ ជាមួយរដ្ឋាភិបាលកម្ពុជា ក្រុមហ៊ុននឹងប្រើប្រាស់បច្ចេកវិទ្យា ដើម្បីអភិវឌ្ឍន៍សេវាដឹកជញ្ជូនប្រកប ដោយសុវត្ថិភាពជឿទុកចិត្តមានសេវាទូលំទូលាយ ចូលរួមធ្វើឲ្យការគ្រប់គ្រងចរាចរណ៍កាន់តែល្អប្រសើរ ព្រមទាំងលើកកម្ពស់បរិយាប័ន្នហិរញ្ញវត្ថុនៅកម្ពុជាផងដែរ។

លោកបានបន្តថា “Crab បានប្រតិបត្តិការ សេវាកម្មកម្មវិធីរថយន្តតាក់ស៊ីក្នុងប្រទេសចំនួន៧ ក្នុងតំបន់អាស៊ីអាគ្នេយ៍ រួមមាន ប្រទេសសឹង្ហបុរី ថៃ ឥណ្ឌូនេស៊ី ហ្វីលីពីន វៀតណាម និងមីយ៉ាន់ម៉ា។ លោកបន្តថា “ក្រុមហ៊ុននេះមានអ្នកបើកបរប្រចាំនៅក្នុងតំបន់ប្រមាណ ជាង២.១លាននាក់ ក្នុងទីក្រុងចំនួន១៥៦ និងមានការទាញយកកម្មវិធីក្រេបច្រើនជាង៧២លានដង។

លោកស៊ុន ចាន់ថុល ទេសរដ្ឋមន្ត្រី រដ្ឋមន្ត្រីក្រសួងសាធារណការ និងដឹកជញ្ជូនបានលើកឡើងថា វត្តមានរបស់ក្រេបនាពេលនេះ នឹងជំរុញឲ្យប្រសើរឡើងនូវសេវាកម្មដឹកជញ្ជូន ពិសេសចូលរួមកាត់បន្ថយគ្រោះថ្នាក់ចរាចរណ៍ ដែលក្រុមហ៊ុននេះបានគោរពស្តង់ដារពេញលេញ នៅក្នុងទីផ្សារតំបន់អាស៊ី ដែលកំពុងធ្វើប្រតិបត្តិការ ដោយប្រកាន់ខ្ជាប់នូវក្រមសីលធម៌ខ្ពស់ ក្នុងទីផ្សារដឹកជញ្ជូនដែលអាចទទួលបានសម្រាប់ប្រជាជនទាំងអស់ និងធ្វើឲ្យតំបន់អាស៊ីអាគ្នេយ៍ ក្លាយជាតំបន់សេដ្ឋកិច្ចឌីជីថល៕