ដោយ វុត្ថា
ភ្នំពេញ៖ រដ្ឋសភានៃព្រះរាជាណាចក្រកម្ពុជាកំពុងពិនិត្យ និងសិក្សាលើសេចក្តីព្រាងច្បាប់ស្តីពីហិរញ្ញវត្ថុសម្រាប់ការគ្រប់គ្រងឆ្នាំ២០១៩ ឲ្យបានហ្មត់ចត់ គ្រប់ជ្រុងជ្រោយ និងស៊ីជម្រៅ ជាពិសេសធ្វើឲ្យប្រាកដថាការវិភាជន៌ថវិកា ពិតជាឆ្លើយតបទៅនឹងវិស័យជាអាទិភាពរបស់ជាតិ ដែលជាចលករនៃកំណើនសេដ្ឋកិច្ចរបស់កម្ពុជា បន្ទាប់ពីទទួលបានពីរដ្ឋាភិបាល មុននឹងដាក់ជូនរដ្ឋសភាពិភាក្សានិងអនុម័តនាពេលខាងមុខនេះ។
លោកជាម យៀប ប្រធានគណៈកម្មការសេដ្ឋកិច្ចហិរញ្ញវត្ថុក៏បានឲ្យដឹងថា ថវិកាឆ្នាំ២០១៩ នឹងដើរតួនាទីជាឧបករណ៍គោលនយោបាយដ៏មានសារៈសំខាន់ ដើម្បីអនុញ្ញាតឲ្យរាជរដ្ឋាភិបាលអនុវត្តនូវ “ផែនការយុទ្ធសាស្ត្រ អភិវឌ្ឍន៍ជាតិឆ្នាំ២០១៩-២០២៣” និង “យុទ្ធសាស្ត្រចតុកោណដំណាក់កាលទី៤” ដើម្បីបន្តរក្សាស្ថិរភាពនយោបាយ បន្តពង្រឹងនិងពង្រីកការអនុវត្តលទ្ធិប្រជាធិបតេយ្យ បន្តរក្សាបាននូវស្ថិរភាព ម៉ាក្រូសេដ្ឋកិច្ច និងធានាបាន នូវប្រសិទ្ធិភាពខ្ពស់ក្នុងការគ្រប់គ្រងហិរញ្ញវត្ថុសាធារណៈ និងឈានទៅសម្រេចឲ្យបាននូវគោលនយោបាយគ្រឹះ គឺការធានាឲ្យបាននូវកំណើនសេដ្ឋកិច្ច ប្រកបដោយចីរភាពក្នុងរយៈពេលវែង មានអត្រាខ្ពស់ប្រមាណ៧%ក្នុងមួយឆ្នាំ នៅលើមូលដ្ឋានទូលាយ និងមានសមត្ថភាពប្រកួតប្រជែងជាងមុន។
-->
តួអង្គសំខាន់មួយរូបទៀត ដែលជាសេនាធិការរបស់រដ្ឋាភិបាល លោក អូន ព័ន្ធមុនីរ័ត្ន ឧបនាយករដ្ឋមន្ត្រី រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុបានគូសបញ្ជាក់ថា ការកសាងសេចក្តីព្រាងច្បាប់ហរិញ្ញវត្ថុសម្រាប់ការគ្រប់គ្រង ឆ្នាំ២០១៩នេះឡើង ដើម្បីឆ្លើយតបទៅនឹងសេចក្តីទុកចិត្តដ៏ច្រើន លើសលប់របស់ប្រជាពលរដ្ឋ មកលើការដឹកនាំរបស់រាជរដ្ឋាភិបាល មកពីគណបក្សប្រជាជនកម្ពុជា តាមរយៈលទ្ធផលការបោះឆ្នោតជ្រើសតាំងតំណាងរាស្ត្រនីតិកាលទី៦ កាលពីខែកក្កដា ឆ្នាំ២០១៨នេះ។
លោករដ្ឋមន្ត្រីបានបញ្ជាក់ថាសេចក្តីព្រាងច្បាប់នេះ មានគោលដៅគាំទ្រ ដល់ការអនុវត្តកម្មវិធីនយោបាយរបស់រាជរដ្ឋាភិបាល ជាពិសេសការអនុវត្តអាទិភាពគោលនយោបាយសំខាន់ៗ និងវិធានការកែទម្រង់ជាក់ស្តែងនានា ដែលនឹងត្រូវផ្តើមអនុវត្តនៅក្នុងឆ្នាំ២០១៩ ដែលជាឆ្នាំទី១នៃរាជរដ្ឋាភិបាលអាណត្តិទី៦ ឱ្យសម្រេចបាននូវលទ្ធផលផ្លែផ្កាជាអតិបរមាជូនប្រទេសជាតិ និងប្រជាពលរដ្ឋ។
សម្តេចអគ្គមហាពញ្ញាចក្រហេង សំរិន ប្រធានរដ្ឋសភា បានលើកឡើងដែរថា ថវិកាជាតិឆ្នាំ២០១៩ ត្រូវបានគិតគូរដោះស្រាយ និងត្រូវបានវិភាជន៌សម្រាប់វិស័យអាទិភាព នៃគោលនយោបាយជាតិសំខាន់ៗជាសារវ័ន្ត។ “យើងចាត់ទុកថា ថវិកាជាតិឆ្នាំ២០១៩ នេះ ជាឧបករណ៍នៃគោលនយោបាយ របស់រាជរដ្ឋាភិបាលប្រកបដោយប្រសិទ្ធភាព និងស័ក្តសិទ្ធភាព ក្នុងការថែរក្សាការពារ និងពង្រឹងថែមទៀតនូវសមិទ្ធផលដ៏ធំធេងដែលកម្ពុជាសម្រេចបានកន្លងមក ក៏ដូចជាបន្តចាក់គ្រឹះរឹងមាំ សម្រាប់បម្រើឲ្យការអភិវឌ្ឍរបស់កម្ពុជាតទៅមុខទៀត។
សម្តេចក៏បានសាទរចំពោះសមិទ្ធផល ដែលរាជរដ្ឋាភិបាលកម្ពុជា សម្រេចបានដោយជោគជ័យ ក្នុងការអនុវត្តយុទ្ធសាស្ត្រចតុកោណដំណាក់កាលទី៣ នៅក្នុងនីតិកាលទី៥ នៃរដ្ឋសភាកន្លងមក ដោយរក្សាបាននូវសុខសន្តិភាពស្ថេរភាពនយោបាយ និងការឯកភាពជាតិ សម្រេចបាននូវសូចនាករសង្គមសំខាន់ៗ ដូចជា វិស័យអប់រំ សុខាភិបាល សម្រេចបានលទ្ធផលល្អ ក្នុងការគ្រប់គ្រងហិរញ្ញវត្ថុសាធារណៈ សេដ្ឋកិច្ចមានកំណើនខ្ពស់ជាមធ្យមក្នុងរង្វង់៧ភាគរយ ភាពក្រីក្ររបស់ប្រជាពលរដ្ឋត្រូវបានកាត់បន្ថយមកនៅត្រឹមក្រោម១០ភាគរយ ដែលជាមធ្យមជាង១ភាគរយក្នុងមួយឆ្នាំ ជាពិសេសបានកសាង និងប្រែក្លាយប្រទេសកម្ពុជា ពីប្រទេសក្រីក្រមានចំណូលទាប ទៅជាប្រទេសមានចំណូលមធ្យមកម្រិតទាប និងឈានទៅកា្លយជាប្រទេសមានចំណូលមធ្យម កម្រិតខ្ពស់នៅឆ្នាំ២០៣០ខាងមុខ៕
