ដោយៈ ច្រាយ ចំណាយ

   កំពង់ឆ្នាំងៈ

សម្ដេចកិត្ដិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា នៅថ្ងៃទី១៥ ខែធ្នូ ឆ្នាំ២០២៤នេះ បានអញ្ជើ្ជញជាអធិបតីក្នុងពិធីបញ្ចុះបឋមសិលា សាងសង់អគារ១ខ្នងកម្ពស់៣ជាន់ ដែលប្រសិទ្ធនាមថា “អគារសម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន”។

អាគារនេះ ធ្វើឡើងក្រោមការឧបត្ថម្ភទាំងស្រុងរបស់ សម្ដេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភានៃកម្ពុជា និងសម្ដេចកិត្តិព្រឹទ្ធបណ្ឌិ​ត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ដែលស្ថិតនៅក្នុងព័ទ្ធសីមា វត្ដចន្ទប្បជោត្ដនារាម ហៅវត្ដតាសុត ក្នុងភូមិប៉ាតឡាង ឃុំក្រាំងលាវ ស្រុករលាប្អៀរ ខេត្ដកំពង់ឆ្នាំង។

នាឱកាសដ៏ឧត្តុង្គឧត្តមថ្លៃថ្លានេះ សម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន រួមជាមួយសម្ដេច លោកអ្នកឧកញ៉ា អ្នកឧកញ៉ា ឧកញ៉ា លោក លោកស្រី សប្បុរសជន និងពុទ្ធសាសនូបត្ថម្ភក៍ជាច្រើនកុះករ បានចូលរួមធ្វើកិច្ចនមសក្ការព្រះរតនៈត្រៃ សមាទានសីល ធ្វើពិធីបួងសួងក្រុងពាលីសាងសង់អគារ និងបញ្ចុះបឋមសិលា និងរតនវត្ថុផ្សេងៗ។

ក្នុងឱកាសនោះ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន បានវេរប្រគេនសម្រាប់វត្តចន្ទប្បជោត្តនារាម នូវទេយ្យទាន គ្រឿងអដ្ឋបរិក្ខាមួយចំនួន និងបច្ច័យចំនួន១០លានរៀល។ ប្រគេនបច្ច័យព្រះចៅអធិការវត្តចំនួន១,០០០ដុល្លារ ព្រះសង្ឃគង់អមធ្វើកិច្ច៨អង្គ ក្នុងមួយអង្គ២លានរៀល និងព្រះសង្ឃ ២១អង្គទៀត បច្ច័យ២លានរៀល។

ទន្ទឹមនឹងនេះ បច្ច័យទទួលបានពីពុទ្ធបរិស័ទសរុបចំនួន ២៥,០១០ដុល្លារ និង ១,៩៩០,០០០រៀល។ ជាមួយគ្នានោះដែរ សម្ដេចកិត្ដិព្រឹទ្ធបណ្ឌិត ប៊ុន រ៉ានី ហ៊ុនសែន ក៏បានអញ្ជើញ ជួបសំណេះសំណាលសួរសុខទុក្ខ និងក្ដីនឹករលឹកជាមួយ លោកយាយ លោកតា អាចារ្យ គណៈកម្មការ និងកម្មករបម្រើការក្នុងវត្ដ ចំនួន១៣១នាក់ និងបានជូនក្នុងម្នាក់ៗ សារុង ក្រមា និងថវិកា ៥០,០០០រៀលផងដែរ។

តាមសង្ឃដីការបស់ព្រះធម្មវនវាសី ចន្ទ មុនី”អគារ សម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន” មិនត្រឹមតែបម្រើផលប្រយោជន៍ជាសំណង់សាសនានោះទេ ប៉ុន្តែក៏ជាទីកន្លែងបណ្ដុះនូវផ្នត់គំនិតដល់សមណនិស្សិត និងភ្ញៀវដែលបានអញ្ជើញមកកាន់ទីនេះផងដែរ។

អគារនេះកសាងឡើង ដោយមានទទឹង៥៤,៥ ម៉ែត្រ និងមានជម្រៅ២៤,៦ម៉ែត្រ ជាសំណង់ដែលកសាងឡើង ក្នុងរចនាបថលាយបញ្ចូលគ្នា រួមមាន សម័យកាលអង្គរ សម័យកណ្ដាល និងសម័យចតុមុខ ដែលស្ថាបត្យកម្មនេះ កសាងឡើងចំនួន៣ថ្នាក់ តំណាងឱ្យគុណព្រះពុទ្ធ ព្រះធម៌ និងព្រះសង្ឃ។

ជាន់ផ្ទាល់ដី ជាសារមន្ទីរ សម្រាប់តម្កល់នូវឯកសារផ្សេងៗ ដល់សមណនិស្សិត សិក្សាស្វែងយល់នូវអត្ថបទផ្សេងៗ ព្រមទាំងសម្រួលដល់ពុទ្ធបរិស័ទបានសិក្សាស្វែងយល់ ពីឯកសារដែលតម្កល់ក្នុងសារមន្ទីរនេះ។

ជាន់ទី១ នៃជាសាលប្រជុំ និងការិយាល័យសង្ឃាធិបតី ដែលអាចផ្ទុកមន្ត្រីសង្ឃ និងពុទ្ធសាសនិកជនបានចំនួន៥០០ទៅ៦៥០នាក់។ ជាន់ទី២ ជាអន្តេ​វាសិកដ្ឋាន ដែលមានបន្ទប់សម្រាប់ស្នាក់នៅ របស់សមណនិស្សិត និងព្រះសង្ឃក្នុងវត្ត ទៅតាមតម្រូវការចាំបាច់។ ចំណែកឯ ផ្នែកនៃដំបូលត្រូវបានរចនាទៅជាសារមន្ទីរ ដើម្បីតម្កល់ទុកនូវបុរាណវត្ថុ និងព្រះពុទ្ធរូប សម្រាប់ភ្ញៀវជាតិ-អន្តរជាតិ និងពុទ្ធបរិស័ទអាចចូលទស្សនាបាន។ ស្ថាបត្យកម្មនៃអគារនេះ នឹងកសាងឡើង ដោយមានខ្យល់ចេញចូលគ្រប់ទិស ព្រមទាំងមានបរិស្ថានបៃតងជុំវិញផងដែរ។

ព្រះធម្មវនវាសី ចន្ទ មុនី បានថ្លែងអំណរគុណដល់ សម្ដេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភា នៃព្រះរាជាណាចក្រកម្ពុជា និងសម្ដេ​ចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ដែលបានឧបត្ថម្ភអគារដ៏ល្អវិចិត្រនេះ សម្រាប់ព្រះសង្ឃ ដែលគង់នៅវត្តចន្ទប្បជោត្តនារាម និងជាឧត្ដមប្រយោជន៍ សម្រាប់ប្រជាជនកម្ពុជា ក្នុងម្លប់សន្តិភាពស្របតាមបាវចនា ជាតិ សាសនា ព្រះមហាក្សត្រ ក្រោមការដឹកនាំប្រកប​ដោយគតិបណ្ឌិតរបស់ សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា៕

ដោយៈ ហ៊ូ ចំរើនអ្នកស្រាវជ្រាវនៃមជ្ឈមណ្ឌលអភិវឌ្ឍន៍កម្ពុជា

   ប្រទេសចិនៈ លោកស៊ី ជីនពីងប្រធានាធិបតីចិន កាលពីសប្តាហ៍មុន បានដឹកនាំកិច្ចប្រជុំការិយាល័យនយោបាយមជ្ឈិម នៃគណបក្សកុម្មុយនីស្តចិន ដើម្បីកំណត់ទិសដៅសេដ្ឋកិច្ចចិន សម្រាប់ឆ្នាំ២០២៥។

អង្គប្រជុំបានគូសបញ្ជាក់ពីសារៈសំខាន់ នៃការលើកកម្ពស់ការអភិវឌ្ឍ ប្រកបដោយគុណភាពខ្ពស់ ការធ្វើឱ្យស៊ីជម្រៅ នូវកំណែទម្រង់លើគ្រប់វិស័យ ការ​បើកទូលាយសេដ្ឋកិច្ចកម្រិតខ្ពស់  និងការដាក់ចេញគោលនយោបាយម៉ាក្រូសេដ្ឋកិច្ច ដែលមានភាពបុរេសកម្ម។

ទិសដៅសេដ្ឋកិច្ចទាំងនេះ មិនត្រឹមតែឆ្លុះបញ្ចាំងពីការប្តេជ្ញាចិត្តដ៏រឹងមាំ របស់រដ្ឋាភិបាលចិន ក្នុងការដោះស្រាយបញ្ហាប្រឈមនានា និងជំរុញកំណើនប្រកបដោយចីរភាព ក្នុងឆ្នាំ២០២៥នោះទេ ប៉ុន្តែថែមទាំងបញ្ជូនសញ្ញាវិជ្ជមាន ដល់ការអភិវឌ្ឍក្នុងតំបន់ និងពិភពលោកផងដែរ។

ការប្តេជ្ញាចិត្តរបស់ចិន ក្នុងការលើកកម្ពស់ការអភិ​វឌ្ឍប្រកបដោយគុណភាពខ្ពស់ នឹងក្លាយជាមូលដ្ឋានគ្រឹះដ៏រឹងមាំ ដើម្បីជំរុញការបង្កើតកម្លាំងផលិតថ្មី ក្នុងវិស័យបញ្ញាសិប្បនិម្មិត បច្ចេកវិទ្យា និងនវានុវត្តន៍ ហើយផ្លែផ្កា ដែលទទួលបានពីវិស័យទាំងនេះ នឹងជះឥទ្ធិពលវិជ្ជមាន ដល់បណ្តាប្រទេសនានា ជាពិសេ​សប្រទេសកំពុងអភិវឌ្ឍន៍ ក្នុងការទទួលបាននូវបច្ចេកវិទ្យាទំនើប ការផ្លាស់ប្តូរបទពិសោធន៍ លើវិស័យបញ្ញាសិប្បនិម្មិត និងសេដ្ឋកិច្ចឌីជីថលជាដើម។

តួយ៉ាង ប្រទេសចិនបានបង្កើតភាពជាដៃគូវិទ្យាសាស្ត្រជាមួយប្រទេស និងតំបន់ជាង១៦០ទូទាំងពិភពលោក ដើម្បីជំរុញវឌ្ឍនភាព ក្នុងវិស័យបញ្ញាសិប្បនិម្មិត ថាមពលស្អាត និងជីវវេជ្ជសាស្ត្រ។

កាលពីថ្ងៃទី៣ ខែធ្នូ កន្លងទៅ នៅឯទីស្នាក់ការអង្គការសហប្រជាជាតិ ប្រទេសចិនបានបង្កើតក្រុមនៃមិត្តស្តីពី “កិច្ចសហប្រតិបត្តិការកសាងសមត្ថភាពបញ្ញាសិប្បនិម្មិត” ដើម្បីរួមគ្នាអនុវត្តន៍ផែនការសកម្មភា​ព ក្នុងការកសាងសមត្ថភាព បញ្ញាសិប្បនិម្មិតសម្រា​ប់គោលបំណងល្អ និងសម្រាប់ទាំងអស់គ្នា សំដៅជំរុញគោលដៅអភិវឌ្ឍន៍ ប្រកបដោយចីរភាព។

ក្នុងនាមជាប្រទេស ដែលមានសេដ្ឋកិច្ចធំជាងគេលំដាប់ទី២លើពិភពលោក ប្រទេសចិនបានរួមចំណែ​កដល់ផលិតផល ក្នុងស្រុកសរុបរបស់ពិភពលោកជិត៣០% ក្នុងរយៈពេលប៉ុន្មានឆ្នាំចុងក្រោយនេះ ហើយតួរលេខនេះ បានឆ្លុះបញ្ចាំងឱ្យឃើញយ៉ាងច្បា​ស់ពីទំនាក់ទំនងវិជ្ជមាន រវាងសេដ្ឋកិច្ចចិន និងសេដ្ឋកិច្ចសកល ពោលគឺសន្ទុះនៃការអភិវឌ្ឍចិន នឹងនាំទៅរកសន្ទុះ នៃកំណើនសេដ្ឋកិច្ចសកល និងត្រឡប់មកវិញ។

ជាការពិតណាស់ វឌ្ឍនភាពរបស់ចិនបាននាំមកនូវកាលានុវត្តន៍អភិវឌ្ឍន៍ថ្មីៗ ជាជាងការគំរាមកំហែងដល់ស្ថិរភាពក្នុងតំបន់ និងពិភពលោក ដែលផ្ទុយទាំងស្រុងពីអ្វី ដែលជនអគតិមួយចំនួន បានលើកឡើង។

មិនថាស្ថានភាពពិភពលោក មានការប្រែប្រួលឆាប់រហ័ស និងស្មុគ្រស្មាញយ៉ាងណា ប្រទេសចិននៅតែដើរតួនាទី ជាអ្នកគាំទ្រដ៏សកម្ម ដល់ប្រព័ន្ធពហុភាគីនិយម និងការបើកទូលាយសេដ្ឋកិច្ច តាមរយៈការរៀបចំនូវវេទិកា ពិព័រណ៍ និងសន្និសីទអន្តរជាតិនានាដូចជា (១) វេទិកាខ្សែក្រវាត់ និងផ្លូវសម្រា​ប់កិច្ចសហប្រតិបត្តិការអន្តរជាតិ (២) ពិព័រណ៌នាំចូលអន្តរជាតិចិន (៣) ពិព័រណ៌នាំចូល-នាំចេញចិន (៤) ពិព័រណ៌ផលិតផល អ្នកប្រើប្រាស់អន្តរជាតិចិន និង (៥) សន្និសីទប្រចាំឆ្នាំនៃវេទិកាបូអាវ សម្រាប់អាស៊ី។ល។

កាលពីខែវិច្ឆិកាកន្លងទៅ ប្រទេសចិនក៏ទើបតែបានរៀបចំដោយជោគជ័យ នូវពិព័រណ៌នាំចូលអន្តរជាតិលើកទី៧ នៅទីក្រុងសៀងហៃ ជាមួយនឹងវត្តមា​នរបស់សហគ្រាសជាង៣.៥០០ មកពី១២០ប្រទេ​ស ចូលរួមដាក់បង្ហាញផលិតផល បច្ចេកវិទ្យាកម្រិតខ្ពស់។

ទន្ទឹមនឹងនេះ ពិព័រណ៍អាស៊ាន-ចិនដែលត្រូវបានរៀបចំជារៀងរាល់ឆ្នាំ ក៏បានក្លាយទៅជាយន្តការមួយដ៏សំខាន់ សម្រាប់ការបង្កើនកិច្ចសហប្រតិបត្តិការរវាងបណ្តាប្រទេសអាស៊ាន និងចិន ឆ្ពោះទៅរកការអភិវឌ្ឍតំបន់ពាណិជ្ជកម្ម សេរីអាស៊ាន-ចិន ៣.០។ ការប្តេជ្ញាចិត្តរបស់ចិន ក្នុងការបើកចំហសេដ្ឋកិច្ចនឹងនាំមកនូវឱកាសមហាសាល ដល់ប្រទេសនានា ក្នុងការនាំចេញផលិតផល ទៅកាន់ទីផ្សារចិន ដែលមានប្រជាជនសរុបប្រមាណ១,៤ ពាន់លាននាក់។

ក្រៅពីនេះ ការបន្ធូរបន្ថយនូវគោលនយោបាយរូបិយវត្ថុរបស់ចិន ក៏នឹងជះឥទ្ធិពលជាវិជ្ជមាន ដល់ខ្សែច្រវាក់ផ្គត់ផ្គង់សកល និងកាត់បន្ថយហានិយភ័យនៃហិរញ្ញវត្ថុសកលផងដែរ។

ត្រូវបានប្រសិទ្ធនាមថា ជារោងចក្រនៃពិភពលោ​ក ប្រទេសចិនមានទំនាក់ទំនងយ៉ាងស្អិតរមួតជាមួយនឹងខ្សែច្រវាក់ផ្គត់ផ្គង់សកល។ ក្នុងន័យនេះ ចំណាត់ការរបស់រដ្ឋាភិបាលចិន ក្នុងការពង្រីកតម្រូវការ និងពង្រឹងស្ថិរភាព ទីផ្សារអចលនទ្រព្យក្នុងស្រុក តាមរយៈការអនុវត្ត នូវគោលនយោបាយម៉ាក្រូសេដ្ឋកិច្ចប្រកបដោយបុរេសកម្ម នឹងជំរុញភាពរស់រវើកនៃសេដ្ឋកិច្ចចិន ពង្រឹងភាពធន់នៃខ្សែច្រវាក់ផ្គត់ផ្គង់សកល និងរួមចំណែកដល់ការងើបឡើង នៃសេដ្ឋកិច្ចសកល។

សរុបមកវិញ ទិសដៅសេដ្ឋកិច្ចក្នុងឆ្នាំ២០២៥ មិនត្រឹមតែផ្តល់នូវដំណោះស្រាយ ប្រកបដោយនវានុវត្តន៍សម្រាប់ចិន ក្នុងការឆ្លើយតបទៅនឹងបញ្ហាប្រឈមនានា និងជំរុញកំណើនប្រកបដោយចីរភាពទេ ប៉ុន្តែថែមទាំងផ្តល់សញ្ញាវិជ្ជមាន សម្រាប់ការអភិ​វឌ្ឍក្នុងតំបន់ និងសកល ក្នុងបរិបទដែលពិភពលោកកំពុងជួបប្រទះនូវភាពមិនច្បាស់លាស់ និងការកើនឡើងនូវគោលនយោបាយគាំពារនិយម៕

លោកយិន លាងគង់ សហស្ថាបនិក និងអគ្គនាយកគេហទំព័រPropertyarea.asia &Cambodiafinancialtimes.com សូមផ្ញើសារលិខិតគោរពជូនពរ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ក្នុងឱកាសចម្រើនជន្មាយុគម្រប់ ៧០ឈានចូល ៧១ឆ្នាំ នៅថ្ងៃទី១៥ ខែធ្នូ ឆ្នាំ២០២៤។

យើងខ្ញុំទាំងអស់គ្នា សូមអនុញ្ញាតសម្តែងនូវសោមន្សរីករាយ ដោយស្មោះអស់ពីដួងចិត្ត និងចូលរួមជូននូវសព្ទសាធុការពរជ័យ បវរមហាប្រសើរគោរពជូន សម្តេចកិត្តិព្រឹទ្ធបណ្ឌិត សូមប្រកបដោយសុខភាពល្អបរិបូរណ៍ កម្លាំងពលំមាំមួន អាយុយឺនយូរ និងប្រាជ្ញាឈ្លាសវៃ ដើម្បីដឹកនាំកាកបាទក្រហមកម្ពុជា ឱ្យសម្រេចបាននូវលទ្ធផលផ្លែផ្កាថ្មីៗជាច្រើនថែមទៀត ដែលជាបេសកកម្មដ៏ឧត្តុង្គឧត្តមរបស់ សម្តេចកិត្តិព្រឹទ្ធបណ្ឌិត ចំពោះប្រជាជន និងជាតិមាតុភូមិកម្ពុជា។

ក្នុងឱកាសដ៏វិសេសវិសាលថ្លៃថ្លានេះ យើងខ្ញុំទាំងអស់គ្នា សូមសម្តែងនូវការគោរពកោតសរសើរដ៏ស្មោះស្ម័គ្រ និងដឹងគុណយ៉ាងជ្រាលជ្រៅ ប្រកបដោយកតញ្ញូកតវេទិតាធម៌ ចំពោះបញ្ញាញាណដ៏ឈ្លាសវៃ ព្រមទាំងសកម្មភាពប្រកបដោយគុណធម៌ មនុស្សធម៌ និងព្រហ្មវិហារធម៌ របស់សម្តេចកិត្តិព្រឹទ្ធបណ្ឌិត ដែលបានចូលរួមចំណែកយ៉ាងធំធេងជាមួយនឹងរាជរដ្ឋាភិបាលកម្ពុជា ក្នុងការដោះស្រាយទុក្ខលំបាក និងជួយកាត់បន្ថយភាពក្រីក្រ របស់ប្រជាជនគ្រប់ទីកន្លែង ឱ្យមានជីវភាពកាន់តែល្អប្រសើរឡើង។

ជាថ្មីម្តងទៀត យើងខ្ញុំទាំងអស់គ្នា សូមលើកហត្ថបួងសួងដល់គុណព្រះរតនត្រ័យ និងវត្ថុស័ក្តិសិទ្ធទាំងឡាយគ្រប់ទិសទី សូមជួយតាមថែរក្សា សម្តេចកិត្តិព្រឹទ្ធបណ្ឌិត និងសម្តេចអគ្គមហាសេនាបតីតេជោ ហ៊ុន សែន ព្រមទាំងក្រុមគ្រួសារជាទីស្រឡាញ់ សូមសមប្រកបដោយពុទ្ធពរទាំងបួនប្រការ គឺ អាយុ វណ្ណៈ សុខៈ ពលៈ ជានិច្ចនិរន្តរ៍តរៀងទៅ៕

ដោយ: គង់ លាងហួរ
អន្តរជាតិ: យោងតាមស្ថាប័ន Pantheon Macroeconomics ដែលមានមូលដ្ឋាននៅចក្រភពអង់គ្លេស បានឱ្យដឹងថា ហ្វីលីពីនជាប្រទេសមួយក្នុងចំណោមបណ្តាប្រទេសមានសេដ្ឋកិច្ចកំពុងរីកចម្រើន ដែលនឹងមិនសូវរងផលប៉ះពាល់ខ្លាំងពីគោលនយោបាយពន្ធរបស់ប្រធានាធិបតីជាប់ឆ្នោតលោក ដូណាល់ត្រាំ។

នៅក្នុងរបាយការណ៍ “Emerging Asia Outlook” របស់ខ្លួនសម្រាប់ឆមាសទីមួយ ឆ្នាំ២០២៥ លោក Miguel Chanco សេដ្ឋវិទូនៅស្ថាប័ន Pantheon Macroeconomics បានលើកឡើងថា កោះតៃវ៉ាន់ ប្រទេសថៃ និងប្រទេសវៀតណាម សុទ្ធតែជាបណ្តាប្រទេសងាយរងគ្រោះចំពោះការយកពន្ធលើការនាំចូលទំនិញទាំងអស់ទៅកាន់សហរដ្ឋអាមេរិក។

យ៉ាងណាមិញ បណ្តាប្រទេស ដែលមានសេដ្ឋកិច្ចកំពុងរីកចម្រើនទាំងអស់ពុំមែនសុទ្ធតែរងផលប៉ះពាល់ខ្លាំងដូចគ្នាទេ។ តួយ៉ាង បណ្តាប្រទេស ដែលមានប្រជាជនច្រើន និងពឹងផ្អែកលើតម្រូវការក្នុងស្រុក ដូចជាឥណ្ឌា ឥណ្ឌូនេស៊ី និងហ្វីលីពីន ជាប្រទេសដែលមិនរងឥទ្ធិពលខ្លាំង ក្នុងករណីផ្ទុះសង្រ្គាមពាណិជ្ជកម្មថ្មីមួយ។

ម៉្យាងទៀត ទោះបីជាមាន ឬគ្មានពន្ធថ្មីដែលដាក់ដោយសហរដ្ឋអាមេរិក ស្ថាប័ន Pantheon Macroeconomics រំពឹងថា កំណើននៃការនាំចេញសំខាន់ៗនៅទូទាំងតំបន់អាចនឹងធ្លាក់ចុះនៅក្នុងឆមាសទីមួយនៃឆ្នាំក្រោយ។

លោក Chanco បានបន្តទៀតថា យើងក៏សង្កេតឃើញមានហានិភ័យមួយចំនួនផងដែរ សម្រាប់ក្រុមហ៊ុននាំចេញពីតំបន់អាស៊ីនៅឆ្នាំក្រោយ ដោយសារតែភាពមិនប្រាកដប្រជាលើការកំណត់ពេលវេលានៃការយកពន្ធរបស់លោក ត្រាំ។

តាមរយៈរបាយការណ៍​ថ្មីចុង​ក្រោយ លោក​បាន​អះអាង​ថា​ ជាបឋម ពន្ធ​របស់​សហរដ្ឋ​អាមេរិក​ត្រូវ​បាន​គេ​រំពឹង​ថា​ នឹង​ចាប់​ផ្តើម​ផ្តោត​មុនគេទៅលើ​ប្រទេស​ចិន កាណាដា និង​ម៉ិកស៊ិក។

ដូច្នេះហើយ លំហូរពាណិជ្ជកម្មរបស់បណ្តាប្រទេស ដែលមានសេដ្ឋកិច្ចកំពុងរីកចម្រើននៅតំបន់អាស៊ីប្រហែលជាមិនអាចរងផលប៉ះពាល់ភ្លាមៗនោះទេ ដោយត្រូវរង់ចាំរហូតដល់ឆមាសទីពីរនៃឆ្នាំ២០២៥ខាងមុខ។

សេដ្ឋវិទូបន្ថែមថា “ក្នុងពេលជាមួយគ្នានេះ កម្រិតពន្ធគយ ដែលបានស្នើឡើងរបស់លោកត្រាំ អាចជំរុញឱ្យបណ្តាក្រុមហ៊ុនអាមេរិកងាកទៅនាំចូលទំនិញពីបណ្តាប្រទេស ដែលមានសេដ្ឋកិច្ចកំពុងរីកចម្រើន”៕ប្រភព: Phistar៕