ការសិក្សា: លំហូរ FDI ចូលទីផ្សារលំនៅដ្ឋានរបស់ប្រទេសម៉ាឡេស៊ីនឹងកើនឡើង៥ភាគរយនៅឆ្នាំក្រោយ
ដោយ: គង់ លាងហួរ
អន្តរជាតិ: ក្រុមហ៊ុនប្រឹក្សាស្រាវជ្រាវអចលនទ្រព្យ Juwai IQI ដែលមានមូលដ្ឋាននៅទីក្រុងគូឡាឡាំពួរ រំពឹងថា ជនបរទេសនឹងបង្កើនការវិនិយោគក្នុងទីផ្សារលំនៅដ្ឋានរបស់ម៉ាឡេសុីនៅឆ្នាំក្រោយក្នុងអត្រាមិនលើសពី៥ភាគរយ។
លោក Kashif Ansari សហស្ថាបនិក និងជានាយកប្រតិបត្តិក្រុមហ៊ុន Juwai IQI បានអះអាងថា ជនបរទេស ដែលកាន់ទិដ្ឋាការវិនិយោគរបស់ម៉ាឡេស៊ីនឹងបោះទុនយ៉ាងតិចចំនួន១៦៦លានរីងហ្គីតនៅប្រទេសម៉ាឡេសុីក្នុងឆ្នាំ២០២៥ខាងមុខ។
អ្នកជំនាញរូបនេះបានគូសបញ្ជាក់នៅក្នុងសេចក្តីថ្លែងការណ៍មួយថា “ប្រភពអ្នកទិញធំបំផុតទី១ មិនមានការប្រែប្រួលទេ ដោយក្រុមអ្នកទិញមកពីប្រទេសចិននាំមុខគេ”។
លោក Kashif បានបន្តថា ប្រទេសម៉ាឡេស៊ីមានសក្តានុពលសំខាន់ៗចំនួន២ ដូចជា កត្តាទីផ្សារអចលនទ្រព្យមានស្ថិរភាព និងកត្តាគោលនយោបាយទិដ្ឋាការដ៏ទាក់ទាញចំពោះក្រុមអ្នកជំនួញ ក្រុមអ្នកធ្វើការក្នុងវិស័យឌីជីថល និងក្រុមអ្នកចូលនិវត្តន៍ ដែលមានទ្រព្យសម្បត្តិស្តុកស្តម្ភ។
ក្រុមហ៊ុន Juwai IQI បានប៉ាន់ប្រមាណថា កម្មវិធីម៉ាឡេសុីផ្ទះទី២របស់ខ្ញុំ ឬ Malaysia My Second Home (MM2H) របស់រដ្ឋាភិបាលម៉ាឡសេុីបានធ្វើការអនុម័តពាក្យស្នើសុំទិដ្ឋាការចំនួន៧០០ច្បាប់នៅក្នុងឆ្នាំ២០២៤នេះ។
យោងតាមការសិក្សាស្រាវជ្រាវបានបង្ហាញថា ក្រុមអ្នកធ្វើការក្នុងវិស័យឌីជីថល(Digital Nomad) ចំណាយប្រាក់ជាមធ្យមប្រចាំឆ្នាំចំនួន១៣៤.០០០រីងហ្គីត(ប្រហែល៣០.០០០ដុល្លារអាមេរិក)ក្នុងមួយនាក់។
ដូច្នេះហើយ ក្រុមហ៊ុន Juwai IQI បានទាញសេចក្តីសន្និដ្ឋានថា លំហូរវិនិយោគផ្ទាល់ពីបរទេសចូលក្នុងទីផ្សារអចលនទ្រព្យរបស់ប្រទេសម៉ាឡេសុីនឹងកើនឡើងនៅឆ្នាំ២០២៥ ព្រោះម៉ាឡេសុីជាគោលដៅដ៏ទាក់ទាញចំពោះក្រុមអ្នកធ្វើការក្នុងវិស័យឌីជីថល៕ប្រភព: NST Online៕
លំនៅដ្ឋានអភិវឌ្ឍនៅកម្ពុជាមានតម្លៃជាមធ្យមជាង៣ពាន់ដុល្លារក្នុងមួយម៉ែត្រការ៉េ
ដោយ: គង់ លាងហួរ
អន្តរជាតិ: យោងតាមក្រុមហ៊ុន C9 Hotelworks ដែលជាក្រុមហ៊ុនប្រឹក្សាផ្នែកបដិសណ្ឋារកិច្ច និងអចលនទ្រព្យ បានឱ្យដឹងថា នៅ២០២៤នេះ កម្ពុជាទទួលបានគម្រោងអភិវឌ្ឍន៍លំនៅដ្ឋានម៉ាកយីហោ(Branded Residence) សរុបចំនួន៥គម្រោង។
គម្រោងទាំង៥នោះ មានលំនៅដ្ឋានម៉ាកយីហោចំនួន៨០៧យូនីត និងមានតម្លៃដាក់លក់ជាមធ្យមចំនួន៣.១៧៨ដុល្លារអាមេរិកក្នុងមួយម៉ែត្រការ៉េ។
តើអ្វីទៅជាលំនៅដ្ឋានម៉ាកយីហោ(Branded Residence)?
ជាធម្មតា គម្រោងលំនៅដ្ឋានប្រភេទនេះ កើតចេញពីភាពជាដៃគូសហការគ្នារវាងម៉ាកយីហោល្បីៗ និងអ្នកអភិវឌ្ឍន៍។ ម្ចាស់ម៉ាកយីហោត្រូវផ្តល់អាជ្ញាប័ណ្ណដល់អ្នកអភិវឌ្ឍន៍ដើម្បីធ្វើយុទ្ធសាស្ដ្រទីផ្សារ និងលក់លំនៅដ្ឋាន ដែលស្ថិតក្រោមឈ្មោះម៉ាកយីហោរបស់ពួកគេ។
លំនៅដ្ឋានម៉ាកយីហោក៏ជាអចលនទ្រព្យលំនៅដ្ឋានឯកជនមួយប្រភេទ ដែលត្រូវបានផ្សារភ្ជាប់ជាមួយនឹងក្រុមហ៊ុនម៉ាកយីហោល្បីៗផ្នែករចនាម៉ូដ និងផ្នែកបម្រើសេវាកម្ម។
លោក Bill Barnett ស្ថាបនិក និងជានាយកគ្រប់គ្រងនៃក្រុមហ៊ុន C9 Hotelworks បានលើកឡើងថា ទីផ្សារលំនៅដ្ឋានម៉ាកយីហោនៅតំបន់អាស៊ី សម្រេចបានទំហំនៃការផ្គត់ផ្គង់ក្នុងតម្លៃជាទឹកប្រាក់ចំនួន២៦,៦ពាន់លានដុល្លារនៅឆ្នាំនេះ ដែលមានលំនៅដ្ឋានសរុបចំនួន៦៨.០០១យូនីត។
ក្នុងនោះ ប្រទេសថៃបាននាំមុខគេ ដោយក្តោបបានចំណែកទីផ្សារចំនួន២៣,៣% តាមពីក្រោយដោយប្រទេសហ្វីលីពីនចំនួន១៧,៣% និងកូរ៉េខាងត្បូងចំនួន១១,៦% ខណៈទីផ្សារដែលកំពុងរីកចម្រើនដូចជាម៉ាឡេស៊ី វៀតណាម និងឥណ្ឌាគ្រប់គ្រងចំណែកសរុបបញ្ចូលគ្នាចំនួន២៤,៥% នៃចំណែកទីផ្សារសរុប។
ប្រសិនបើគិតពីចំនួនគម្រោងវិញ ប្រទេសថៃក៏ជាប់ចំណាត់ថ្នាក់លេខ១ផងដែរ ដែលមាន៦៥គម្រោង បន្ទាប់មកវៀតណាមមានចំនួន៥៩គម្រោង។
ប៉ុន្តែ បើនិយាយពីចំនួនយូនីតសរុបវិញ ប្រទេសវៀតណាមបាននាំមុខគេទី១ ដែលមានលំនៅដ្ឋានម៉ាកយីហោចំនួន១៧.៦៨០យូនីត ខណៈប្រទេសថៃបានជាប់ចំណាត់ថ្នាក់លេខ២ ដែលមាន លំនៅដ្ឋានម៉ាកយីហោចំនួន១៦.២៧១យូនីត។
លំនៅដ្ឋានម៉ាកយីហោនៅប្រទេសថៃត្រូវបានដាក់លក់ក្នុងតម្លៃជាមធ្យមចំនួន៥.៤៧៨ដុល្លារក្នុងមួយម៉ែត្រការ៉េ ខណៈលំនៅដ្ឋានម៉ាកយីហោនៅប្រទេសវៀតណាមត្រូវបានដាក់លក់ក្នុងតម្លៃជាមធ្យមចំនួន៣.៧៤៥ដុល្លារក្នុងមួយម៉ែត្រការ៉េ៕ប្រភព: Bangkok Post៕
ទីផ្សារអចលនទ្រព្យនៅទីក្រុងហ្សាការតាប្រទេសឥណ្ឌូនេស៊ី បង្ហាញពី ភាពធន់នៅក្នុងឆ្នាំ២០២៤នេះ
ដោយ: គង់ លាងហួរ
អន្តរជាតិ: ក្រោមយុគសម័យថ្មីនៃការដឹកនាំរបស់រដ្ឋាភិបាលលោកប្រធានាធិបតី Prabowo Subianto ទីផ្សារអចលនទ្រព្យរបស់ប្រទេសឥណ្ឌូនេស៊ីត្រូវបានរំពឹងថា នឹងសម្រេចបានកំណើនថ្មី និងមានភាពសុទិដ្ឋិនិយម។
ទោះបីជាពិភពលោកនាពេលបច្ចុប្បន្នកំពុងបន្តស្ថិតក្នុងសភាពមិនច្បាស់លាស់យ៉ាងណាក្តី ក៏វិស័យអចលនទ្រព្យរបស់ឥណ្ឌូនេស៊ីនៅតែបន្តរក្សាបានភាពរឹងមាំ និងជាគោលដៅដ៏ទាក់ទាញសម្រាប់ក្រុមអ្នកវិនិយោគបរទេស។
ក្រុមអ្នកជំនាញមានទំនុកចិត្តថា វិស័យអចលនទ្រព្យនឹងដើរតួនាទីយ៉ាងសំខាន់ក្នុងការជំរុញកំណើនសេដ្ឋកិច្ចរបស់ប្រទេសឥណ្ឌូនេស៊ីនៅចុងឆ្នាំ២០២៤នេះ។ នេះបើយោងតាមលោក Adrianto P. Adhi ប្រធាននាយកនៃក្រុមហ៊ុន PT Summarecon Agung Tbk។
លោកបានបន្តថា“អចលនទ្រព្យជាក្បាលម៉ាស៊ីននៃកំណើនសេដ្ឋកិច្ចជាតិ ដែលជះឥទ្ធិពលដល់វិស័យពាក់ព័ន្ធជាង១៨៥វិស័យ។ ដូច្នេះ នៅពេលណាតម្រូវការអចលនទ្រព្យកើនឡើង នោះការអភិវឌ្ឍន៍ក៏នឹងកើនឡើងដូចគ្នាដែរ។ ការណ៍នេះនឹងជះឥទ្ធិពលលើឧស្សាហកម្មពាក់ព័ន្ធទាំងនោះ”។
ជាក់ស្ដែង ក្នុងឆ្នាំ២០២៣ ទីភ្នាក់ងារស្ថិតិជាតិរបស់ប្រទេសឥណ្ឌូនេស៊ី (BPS) បានរាយការណ៍ថា វិស័យអចលនទ្រព្យបានចូលរួមចំណែកយ៉ាងធំក្នុងការចាក់បញ្ចូលទំហំទឹកប្រាក់ចំនួន៣៤៣,៨៦ទ្រីលានរូពៀចូលទៅក្នុងផលទុនជាតិសរុបរបស់ឥណ្ឌូនេស៊ី។
លោក Rusmin Lawin អ្នកជំនាញអចលនទ្រព្យមួយរូប បានលើកឡើងថា បច្ចុប្បន្ន ប្រទេសឥណ្ឌូនេស៊ី និងវៀតណាមនាំមុខគេក្នុងទិដ្ឋភាពនៃការវិនិយោគអចលនទ្រព្យក្នុងតំបន់អាស៊ាន។
លោកបន្តថា “ប្រសិនបើយើងពិភាក្សាអំពីការវិនិយោគលើអចលនទ្រព្យនៅតំបន់អាស៊ាន ឥណ្ឌូនេស៊ី និងវៀតណាមជាជម្រើសដ៏មានសក្តានុពលខ្ពស់បំផុត ដោយសារតែឥណ្ឌូនេស៊ីមានប្រៀបលើកត្តាស្ថិរភាពនយោបាយ និងទំហំទីផ្សារធំ”។
ជាមួយគ្នានេះ ក្រុមហ៊ុនប្រឹក្សាយោបល់ផ្នែកអចលនទ្រព្យ JLL បានរាយការណ៍ពីកំណើនដ៏រឹងមាំនៅក្នុងទីផ្សារអចលនទ្រព្យរបស់ទីក្រុងហ្សាការតា ជាពិសេសការជួលការិយាល័យលំដាប់ A ក្នុងតំបន់ពាណិជ្ជកម្មកណ្តាល(CBD) ដែលសម្រេចបានអត្រាគ្របដណ្តប់ការជួលប្រហែល៧០ភាគរយ ក្នុងត្រីមាសទី៣ ឆ្នាំ២០២៤។
ដោយឡែក អត្រាគ្របដណ្តប់តម្រូវការលំនៅដ្ឋាននៅខាងក្រៅតំបន់ CBD បានស្ថិតនៅទ្រឹងក្នុងរង្វង់៧១ភាគរយ ជាពិសេសតម្រូវការខ្ពស់នៅក្នុងតំបន់ South Jakarta។
លោក Yunus Karim ប្រធានទទួលបន្ទុកផ្នែកស្រាវជ្រាវនៅក្រុមហ៊ុន JLL Indonesia អះអាងថា “យើងបានកត់សម្គាល់ឃើញពីការកើនឡើងជាវិជ្ជមាននៃទីផ្សារការិយាល័យលំដាប់ A ខណៈតម្រូវការបានកើនឡើងជាបន្តបន្ទាប់ចាប់តាំងពីដើមឆ្នាំ២០២៣”។
បន្ថែមលើនេះ ការលក់ខុនដូក្នុងទីផ្សារនៅទីក្រុងហ្សាការតាក៏បានកើនឡើងផងដែរ ជាពិសេសការលក់ខុនដូនៅក្នុងគម្រោងថ្មីៗដូចជាគម្រោង Two Sudirman និងគម្រោង LRT City Tebet ជាដើម៕ប្រភព: investindonesia.co.id៕
ប្រទេសចិនប្រកាសប្តេជ្ញាចិត្តបង្កើនវិធានការជំរុញសន្ទុះនៃកំណើនសេដ្ឋកិច្ចនៅឆ្នាំ២០២៥ខាងមុខ
ដោយ: គង់ លាងហួរ
អន្តរជាតិ: យោងតាមការិយាល័យនយោបាយនៃគណបក្សកុម្មុយនិស្តចិនអះអាងថា ប្រទេសចិនគ្រោងនឹងអនុវត្តន៍ គោលនយោបាយរូបិយវត្ថុធូររលុងនៅឆ្នាំក្រោយ រួមជាមួយនឹងគោលនយោបាយសារពើពន្ធសកម្មបន្ថែមទៀត ដើម្បីជំរុញកំណើនសេដ្ឋកិច្ច។
ប្រព័ន្ធផ្សព្វផ្សាយរដ្ឋចិន Xinhua បានរាយការណ៍ ដោយដកស្រង់លទ្ធផល ចេញពីកិច្ចប្រជុំរបស់មន្ត្រីបក្ស កុំម្មុយនិស្តចិនថា ប្រទេសចិន នឹងផ្តោតលើការពង្រីកតម្រូវការក្នុងស្រុក និងការបង្កើនការប្រើប្រាស់។
ទីភ្នាក់ងារសារព័ត៌មាន Xinhua បានអះអាងថា នៅឆ្នាំ២០២៥ អាជ្ញាធរត្រូវតែប្រកាន់ខ្ជាប់ នូវគោលការណ៍នៃការបន្តសម្រេចបានវឌ្ឍនភាព និងការរក្សាបាននូវស្ថិរភាព។ ការិយាល័យនយោបាយបានគូសបញ្ជាក់បន្ថែមថា ទីផ្សារលំនៅដ្ឋាន និងទីផ្សារភាគហ៊ុនត្រូវតែមានស្ថិរភាព។
លោក Xing Zhaopeng អ្នកយុទ្ធសាស្រ្តចិនជាន់ខ្ពស់របស់ធនាគារANZ បានអះអាងថា “យើងគិតថា ការប្រកាសនេះ ចង្អុលបង្ហាញពីការជំរុញវិធានការសារពើពន្ធដ៏រឹងមាំ ការកាត់បន្ថយអត្រាការប្រាក់ទ្រង់ទ្រាយធំ និងការទិញទ្រព្យសកម្មនៅឆ្នាំ២០២៥”។
សេដ្ឋកិច្ចរបស់ប្រទេសចិន បានជួបប្រទះការលំបាកនៅឆ្នាំនេះ ដោយជំរុញឱ្យក្រុមមន្ត្រី បង្កើតគោលនយោបាយចិន ចាត់វិធានការយ៉ាងច្រើននៅក្នុងខែកញ្ញា។
ក្នុងនោះ ធនាគារកណ្តាលចិន បានបន្ធូរបន្ថយគោលនយោបាយរូបិយវត្ថុខ្លាំងបំផុត មិនធ្លាប់មានចាប់តាំងពីជំងឺរាតត្បាត ដោយកាត់បន្ថយអត្រាការប្រាក់ និងចាក់បញ្ចូលទឹកប្រាក់១ទ្រីលានយ័ន ទៅក្នុងប្រព័ន្ធហិរញ្ញវត្ថុ និងវិធានការជាច្រើនផ្សេងទៀត។
ប្រទេសចិនត្រូវបានព្យាករណ៍ថា អាចសម្រេចបានគោលដៅកំណើនសេដ្ឋកិច្ចរបស់ខ្លួនក្នុងរង្វង់៥%នៅឆ្នាំនេះ។ ប៉ុន្តែការព្យាយាមរក្សាបាននូវល្បឿនសេដ្ឋកិច្ចចិន នៅឆ្នាំ២០២៥អាចជួបការលំបាក ស្របពេលដែលប្រធានាធិបតី ជាប់ឆ្នោតរបស់សហរដ្ឋអាមេរិកលោក ដូណាល់ត្រាំ នឹងត្រលប់មកកាន់សេតវិមានវិញ ដោយលោកបានគំរាមយកពន្ធចំនួន៦០% ឬច្រើនជាងនេះ ទៅលើការនាំចូលទំំនិញរបស់ចិន។
កាលពីខែវិច្ឆិកាកន្លងទៅ ប្រទេសចិនបានបង្ហាញកញ្ចប់បំណុលចំនួន១០ទ្រីលានយ័ន ដើម្បីបន្ធូរបន្ថយភាពតានតឹងផ្នែកហិរញ្ញប្បទានរបស់រដ្ឋបាលក្នុងតំបន់ និងស្តារស្ថិរភាពកំណើនសេដ្ឋកិច្ច៕ប្រភព: CNN៕
ខេត្តព្រះសីហនុបានទទួលសំណើរលើកទឹកចិត្តវិនិយោគចំនួន២៤២គំរោងជាមួយទុនប្រមាណ៦០០០ពាន់លានដុល្លារ
ដោយៈ គង់ សូរិយា
ព្រះសីហនុៈ បន្ទាប់ពីការប្រកាសដាក់ចេញកម្មវិធីជម្រុញការវិនិយោគ នៅខេត្តព្រះសីហនុ ដោយសម្តេចធិបតីហ៊ុន ម៉ាណែនាយករដ្ឋមន្រ្តីនៃកម្ពុជា ជាលទ្ធផលក្រុមការងារ ជំរុញការវិនិយោគក្នុងខេត្តព្រះសីហនុ ទទួលបានសំណើសុំលើកទឹក ចិត្តចំនួន២៤២គម្រោង។
ព័ត៌មាននេះ ត្រូវបានលើកឡើងដោយលោកម៉ាង ស៊ីណេតអភិបាលនៃគណៈអភិបាលខេត្តព្រះសីហនុ ក្នុងពិធីចុះហត្ថលេខាមួយដែលក្រុមហ៊ុនPrice Real Estate Group បានសហការជាមួយក្រុមហ៊ុនសណ្ឋាគារប្រណីតមួយ មកកាន់ទីក្រុងជាប់តំបន់ឆ្នេរមួយនេះ កាលពីថ្ងៃទី១០ ធ្នូកន្លងមកនេះ។
លោកម៉ាង ស៊ីណេតបានបន្តថា ក្នុងចំណោមគម្រោងទាំងនោះ គំរោងដែលទទួលបាន “លិខិតអនុញ្ញាតជាគោលការណ៍” ចំនួន២១៥គម្រោង មានទុនវិនិយោគសរុបប្រមាណ ៦ពាន់លានដុល្លារ (៦.០២៦.១០១.២០០ដុល្លារ)។ ដោយឡែកនៅសល់២៤គម្រោងទៀត គឺស្ថិតនៅក្នុងការពិនិត្យ និងវាយតម្លៃ។
លោកបន្តថា ជាមួយគ្នានេះអនុគណៈកម្មាធិការ វិនិយោគខេត្តបានចុះបញ្ជីគម្រោងវិនិយោគ មានលក្ខណៈសម្បត្តិគ្រប់គ្រាន់បានចំនួន១០គម្រោង មានទុនវិនិយោគសរុបប្រមាណ១៤លានដុល្លារអាមេរិក៕
និន្នាការទីផ្សារអចលនទ្រព្យរបស់ប្រទេសថៃ កំពុងមានការប្រែប្រួលពីការទិញមកកាន់ការជួល
ដោយ: គង់ លាងហួរ
បាងកក: ទីផ្សារអចលនទ្រព្យរបស់ប្រទេសថៃកំពុងមានការប្រែប្រួល ស្របពេលដែលមនុស្សកាន់តែច្រើនជ្រើសរើសការជួល ដោយសារបញ្ហាប្រឈមសេដ្ឋកិច្ច បំណុលគ្រួសារ និងការកើនឡើងនៃអត្រាការប្រាក់។
លោក Phuwanai Phattaraphokin នាយកប្រតិបត្តិនៃក្រុមហ៊ុនវេទិកាអចលនទ្រព្យ LivingInsider Co បានអះអាងថា ទិន្នន័យដែលបង្ហាញពីការស្រាវជ្រាវរកអចលនទ្រព្យសម្រាប់ជួលបានកើនឡើងដល់ចំនួន៥៧លានដង(view) នៅឆ្នាំនេះ កើនឡើង១៣%ធៀបនឹងឆ្នាំមុន។
ផ្ទុយទៅវិញ ទិន្នន័យនៃការស្រាវជ្រាវរកអចលនទ្រព្យសម្រាប់ទិញបានដាំក្បាលចុះដល់ចំនួន៤៧លានដង (views) ធ្លាក់ចុះ២០ភាគរយធៀបនឹងឆ្នាំ២០២៣។
លោកបន្តថា ដោយគិតពីបរិយាកាសសេដ្ឋកិច្ច និងផ្នត់គំនិតបច្ចុប្បន្ន ការជួលត្រូវបានចាត់ទុកថា ជាជម្រើសល្អជាងការទិញ។
យ៉ាងណាមិញ ទីផ្សារជួលអចលនទ្រព្យនៅក្នុងទីតាំងសំខាន់ៗមួយចំនួននៅតែបន្តមានដំណើរការល្អប្រសើរ ហើយប្រជាជនថៃនៅតែចាត់ទុកអចលនទ្រព្យជាឱកាសវិនិយោគដ៏រឹងមាំមួយ។
នៅឆ្នាំ២០២៤នេះ ចំនួន៧៤ភាគរយនៃអ្នកស្វែងរកអចលនទ្រព្យក្នុងទីក្រុង(Urban property seekers)ត្រូវបានគេរកឃើញថា ចូលចិត្តខុនដូ។ ម្យ៉ាងទៀត យូនីតខុនដូដែលមានបន្ទប់គេងចំនួនមួយទទួលបានការពេញនិយមបំផុតក្នុងចំណោមអ្នកស្វែងរកទាំងនោះ។
តើខុនដូសម្រាប់លក់ និងសម្រាប់ជួលនៅប្រទេសថៃមានតម្លៃបែបណា?
តម្លៃខុនដូសម្រាប់លក់នៅក្នុងទីក្រុងនានានៃប្រទេសថៃមានទំហំទឹកប្រាក់ជាមធ្យមចំនួន៦,៨លានបាត(ប្រហែល១៩៨.៧១១ដុល្លារ)ក្នុងមួយយូនីត ខណៈតម្លៃខុនដូនៅជាយក្រុងមានទំហំទឹកប្រាក់ជាមធ្យមចំនួន៣,២លានបាត(ប្រហែល៩៣.៥១៣ដុល្លារ)ក្នុងមួយយូនីត។
ដោយឡែក តម្លៃខុនដូសម្រាប់ជួលមានទំហំទឹកប្រាក់ជាមធ្យមចំនួន១៤.០០០បាត(ប្រហែល៤១០ដុល្លារ)ក្នុងមួយខែ ខណៈតម្លៃជួលខុនដូនៅជាយក្រុងមានទំហំទឹកប្រាក់ជាមធ្យមចំនួន៧.៤០០បាត(ប្រហែល២១៦,២៥ដុល្លារ)ក្នុងមួយខែ៕ប្រភព: The Nation ៕
បើកលក់ក្ដៅៗ! ឱកាសចំណេញចុងឆ្នាំពី បុរី ប៉េង ហួត ជាមួយគម្រោងថ្មី ម៉ូតផ្ទះថ្មី…!!!
កាលពីពេលកន្លងទៅថ្មីៗនេះ បុរី ប៉េង ហួត ទទួលបានការគាំទ្រជាខ្លាំងជាមួយគម្រោងថ្មី ដឹស្តា ផ្លាទីនីម អេកូ ប៉ូលី 1 រួចមកហើយ ដោយលក់ជិតអស់ទាំងស្រុងផងដែរ។ ហេតុដូចនេះហើយ មុនឆ្នាំថ្មីចូលមកដល់ បុរី ប៉េង ហួត បានត្រៀមបើកលក់ជាផ្លូវការនូវគម្រោងដ៏ថ្មីសន្លាងមួយ ដែលមានម៉ូតផ្ទះថ្មីចុងក្រោយគេទៀតផង ជាមួយឱកាសចំណេញជូនដ៏ច្រើនសន្ធឹកសន្ធាប់។
កម្មវិធីបើកលក់ជាផ្លូវការដែលមិនគួរខកខាននេះនឹងប្រព្រឹត្តទៅនៅក្នុងថ្ងៃទី 13-15 ខែធ្នូ ឆ្នាំ2024 ខាងមុខនេះនៅផ្ទះគំរូវីឡា ឃីង ហ្គ្រេន ក្នុងគម្រោងបុរី ប៉េង ហួត ហ្គ្រេនស្តា ផ្លាទីនីម ខណ្ឌច្បារអំពៅ។ សម្រាប់លោកអ្នកដែលមានបំណងចង់ទិញគេហដ្ឋាននាពេលចុងឆ្នាំនេះគឺដឹងតែត្រូវម៉ាច់ម៉ង។ ក្នុងកម្មវិធីនេះ លោកអ្នកនឹងទទួលបានការផ្តល់ជូនកាដូ ប្រូម៉ូសិនឈុតធំចុងឆ្នាំ ឱកាសចំណេញមិនធ្លាប់មាន បន្ថែមពីនេះលោកអ្នកក៏អាចជ្រើសរើសប្រភេទផ្ទះ និងទីតាំងបានមុនគេ ទទួលបានតម្លៃដំបូងដែលល្អបំផុត និងជាពិសេសអាចស្នើរបន្ថែមទំហំដីទៅតាមតម្រូវការទៀតផង។
សូមកុំឱ្យឱកាសដ៏ល្អនេះកន្លងផុតទៅ! ការអញ្ជើញចូលរួមកម្មវិធី លោកអ្នកក៏អាចទទួលបានបទពិសោធន៍នៃការទស្សនាផ្ទះគំរូពិតនៃវីឡាម៉ូតថ្មីៗចុងក្រោយភ្លាមៗ ស្ដាប់ការធ្វើបទបង្ហាញអំពីប្រភេទផ្ទះក្នុងគម្រោងថ្មី អេកូ ប៉ូលី 2 និងអាចសាកសួរព័ត៌មានពីគ្រប់ប្រភេទផ្ទះរបស់បុរី ប៉េង ហួត ផងដែរ។
សម្រាប់ព័ត៌មានបន្ថែមអំពីកម្មវិធី សូមទំនាក់ទំនងមកកាន់ទំព័រហ្វេសប៊ុកផ្លូវការរបស់បុរី ប៉េង ហួត ឬទំនាក់ទំនងតាមទូរសព្ទលេខ៖ 𝟎𝟏𝟔 / 𝟎𝟏𝟕 𝟓𝟗𝟔 𝟕𝟖𝟗។
Video Link for Pre-Sales Event: ចំណាប់អារម្មណ៍របស់អតិថិជនក្នុងកម្មវិធី Pre-Sales អេកូ ប៉ូលី 2
