ដោយ: គង់ លាងហួរ
អន្តរជាតិ: លោក ដូណាល់ ត្រាំ ប្រធានាធិបតីនៃសហរដ្ឋអាមេរិក បានបង្ហាញ“កាតមាស”ដំបូងបង្អស់ សម្រាប់លក់ទៅឱ្យជនបរទេសដែលមានបំណងចូលមករស់នៅ និងធ្វើការនៅសហរដ្ឋអាមេរិក ក្នុងតម្លៃ៥លានដុល្លារក្នុងមួយសន្លឹក។

លោក ដូណាល់ ត្រាំ បានប្រកាសថា “អ្នកទិញកាតមាស(Gold Card)នឹងទទួលបានសិទ្ធិដូចគ្នានឹងអ្នកកាន់កាតបៃតង(Green Card) និងជួយឱ្យជនបរទេសក្លាយជាពលរដ្ឋអាមេរិក”។

ជាទូទៅ កាតបៃតងជាឯកសារមួយ ដែលជនបរទេសជាច្រើនប្រាថ្នាចង់បាន ដោយសារកាតនេះអាចធានានូវស្ថានភាពលំនៅដ្ឋានអចិន្ត្រៃយ៍របស់ជនបរទេសនៅក្នុងសហរដ្ឋអាមេរិក។
ទោះជាយ៉ាងណា ការទិញកាតបៃតងជាដំណើរការដ៏ស្មុគស្មាញ ដែលត្រូវការចំណាយពេលវេលារាប់ឆ្នាំ។

ដោយឡែក ការទិញកាតមាស នឹងសម្រួលដំណើរការនៃការក្លាយជាពលរដ្ឋអាមេរិកឱ្យមានភាពសាមញ្ញ ហើយទំហំទឹកប្រាក់ ដែលប្រមូលបានពីការលក់កាតមាសរបស់លោក ដូណាល់ ត្រាំ នឹងយកទៅជួយកាត់បន្ថយបំណុលជាតិរបស់សហរដ្ឋអាមេរិក។

តើបុគ្គលប្រភេទណាមានសិទ្ធិទិញកាតមាសនេះ?។

ចំពោះសំណួរនេះ លោក ដូណាល់ ត្រាំ ធ្លាប់បានអះអាងថា “មនុស្សដែលមានលុយសុទ្ធតែអាចមានលក្ខណៈសម្បត្តិគ្រប់គ្រាន់ក្នុងការទិញកាតមាស”។

ចំណែក រដ្ឋមន្ត្រីក្រសួងពាណិជ្ជកម្មអាមេរិក លោក Howard Lutnick បានលើកឡើងថា អ្នកដាក់ពាក្យទិញកាតមាសនឹងត្រូវបានត្រួតពិនិត្យ ដើម្បីប្រាកដថា ពួកគេជាពលរដ្ឋលំដាប់ពិភពលោក។

គិតមកទល់ពេលនេះ សហរដ្ឋអាមេរិកក្រោមរដ្ឋបាលលោក ត្រាំ បានលក់ដាច់កាតមាសជាង១.០០០សន្លឹក ខណៈមនុស្សចំនួនជាង៣៧លាននាក់នៅទូទាំងពិភពលោកអាចមានលទ្ធភាពទិញកាតមាស។

ហេតុអ្វីបានជាកាតមាសមានសារៈសំខាន់?។

លោក ដូណាល់ ត្រាំ បានប្រកាសបង្កើតកាតមាសនេះឡើងដើម្បីដាក់ជំនួសកម្មវិធីទិដ្ឋាការប្រភេទ EB-5 ដែលត្រូវបានដាក់ឱ្យដំណើរការចាប់តាំងពីឆ្នាំ១៩៩០ តាមរយៈការលក់កាតបៃតងទៅឱ្យបណ្តាអ្នកវិនិយោគបរទេសក្នុងតម្លៃ១លានដុល្លារក្នុងមួយសន្លឹក។

សភាអាមេរិកបានអនុម័តបង្កើតកម្មវិធីទិដ្ឋាការប្រភេទ EB-5 ក្នុងគោលបំណងដើម្បីជំរុញសេដ្ឋកិច្ចរបស់សហរដ្ឋអាមេរិក តាមរយៈការបង្កើតការងារ និងការទាក់ទាញទុនវិនិយោគពីបរទេស។

ប៉ុន្តែ រដ្ឋបាលលោក ត្រាំ ជឿជាក់ថាគោលនយោបាយទិដ្ឋាការ EB-5 ត្រូវបានគេកេងប្រវ័ញ្ច។

លោក Lutnick បានថ្លែងថា “កម្មវិធី EB-5 ពោរពេញទៅដោយភាពមិនសមហេតុសមផល និងការក្លែងបន្លំ ហើយវាជាវិធីមួយដែលអនុញ្ញាតឱ្យជនបរទេសអាចទិញកាតបៃតងក្នុងតម្លៃថោក។ដូច្នេះ លោកប្រធានាធិបតី ត្រាំ នឹងបិទបញ្ចប់កម្មវិធី EB-5 នេះ”។

កាលពីឆ្នាំ២០២១ ការិយាល័យគណនេយ្យភាពរបស់រដ្ឋាភិបាលអាមេរិកបានអះអាងថា កម្មវិធីទិដ្ឋាការ EB-5 ប្រឈមមុខនឹងហានិភ័យខ្ពស់នៃការក្លែងបន្លំ ដោយសារផលលំបាកនៅក្នុងការតាមដានប្រភពនៃមូលនិធិរបស់អ្នកដាក់ពាក្យស្នើសុំទិដ្ឋាការ៕ប្រភព: Vnexpress៕

ដោយៈ គង់ សូរិយា

    កំពតៈ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានបញ្ជាក់ថា ត្បិរាជរដ្ឋាភិបាកកម្ពុជា រាប់អានជិតស្និទ្ធជាមួយចិន តែគឺជាកិច្ចសហប្រតិបត្តិការរវាងប្រទេស និងប្រទេស ប៉ុន្តែជំហរគោលនយោបាយរបស់កម្ពុជា គឺមានទំនាក់ទំនងជាមួយគ្រប់បណ្តាប្រទេសទាំងអស់នៅលើពិភពលោក។

សម្តេចបញ្ជាក់ថា “ការប្រកាន់គោលនយោបាយនេះ ដោយផ្អែកទៅលើគោលការ​ណ៍គោរពឯករាជ្យភាពជាតិ អធិបតេយ្យភាព និងការគោរពផលប្រយោជន៍គ្នាទៅវិញទៅមក ហើយរាជរដ្ឋាភិបាលកម្ពុជាមិនមែនរណបជាមួយប្រទេសណាមួយជាដាច់ខាត”។

ការបញ្ជាក់បែបនេះរបស់សម្តេចបវរធិបតី ហ៊ុន ម៉ាណែត បានធ្វើឡើងនៅក្នុងឱកាសដែលសម្តេច បានអញ្ជើញជាអធិបតីភាពសម្ពោធដាក់ឱ្យប្រើប្រាស់ជាផ្លូវការកំពង់ផែ ទេសចរណ៍អន្តរជាតិកំពត តម្លៃ១០លានដុល្លារ នាព្រឹកថ្ងៃទី២១ ខែមេសា ឆ្នាំ២០២៥នេះ។

សម្តេចបវរធិបតី ហ៊ុន ម៉ាណែត បានថ្លែងថា តាមរយៈដំណើរបំពេញទស្សនកិច្ចរបស់ប្រធានាធិបតីចិន ស៊ី ជីនពីង នៅកម្ពុជារយៈពេល២ថ្ងៃ ប្រជាពលរដ្ឋកម្ពុជាគួរតែមានមោទនភាព ពីព្រោះកម្ពុជា ជាប្រទេសតូច ប៉ុន្តែមានទំនាក់ទំនងស្មើមុខ ស្មើមាត់ជាមួយប្រទេសមហាអំណាច និងគ្រប់បណ្តាប្រទេសទាំងអស់នៅលើពិភពលោក។ ខណៈថ្មីៗនេះ កម្ពុជា ជាប្រទេសមួយក្នុងចំណោមចំនួន៣ នៅអាស៊ីអាគ្នេយ៍ ដែលប្រធានាធិបតីចិន បានមកបំពេញទស្សនកិច្ចជាផ្លូវរដ្ឋ។

សម្តេចបបវរធិបតី ហ៊ុន ម៉ាណែត បានបញ្ជាក់ដោយលើកជាសំណួរថា “សួរថា ទំនាក់ទំនងរវាងកម្ពុជា និងចិន ខុសអី? នៅពេលដែលកម្ពុជា មិនបានប្រកាន់ជំហរយក ប្រទេសណាមួយផ្តាច់ចោលប្រទេសណាមួយចោលនោះទេ គឺយើងមានទំនាក់ទំនងជាមួយគ្រប់បណ្តាប្រទេសលើពិភពលោក”។ សម្តេចបន្តថា “នេះជាជំហរនយោ​បាយរបស់យើង (កម្ពុជា) ផ្អែកទៅលើគោលការណ៍គោរពឯករាជ្យភាព អធិបតេយ្យភាព និងការគោរពផលប្រយោជន៍គ្នាទៅវិញទៅមក។ នេះជាអ្វីដែលកម្ពុជាធ្វើ ហើយខ្ញុំសូមបញ្ជាក់ យើងមិនមែនរណបអ្នកណាគេនោះទេ”។

សម្តេចបវរធិបតី ហ៊ុន ម៉ាណែត បានបន្ថែមថា ចំណុចនេះគឺជាការបញ្ជូនសារនយោបាយមួយ ទៅកាន់ជនរួមជាតិកម្ពុជាទាំងអស់ ឱ្យបានយល់ពីជំហរ នយោបាយរបស់រាជរដ្ឋាភិបាលកម្ពុជា។ ដូច្នេះ តាមរយៈការលើកឡើងផ្ទុយស្រឡះ ខុសពីការពិតពីសំណាក់បុគ្គលមួយចំនួនតូច ជុំវិញដំណើរទស្សនកិច្ចផ្លូវរដ្ឋរបស់លោក ស៊ី ជីនពីង ប្រធានាធិបតីចិន មកកាន់កម្ពុជា ពោលដំណើរទស្សនកិច្ចនេះគឺជាសារបញ្ជាក់យ៉ាងច្បាស់ នូវទំនាក់ទំនងរវាងកម្ពុជា និងចិន។ អ្នកវិភាគថា ចំណងទំនាក់ទំនងរវាងកម្ពុជា និងចិន មានឱនភាពនោះ ល្មមនឹងបញ្ចប់ហើយ។

ឆ្លៀតក្នុងឱកាសនេះដែរ សម្តេចបវរធិបតី នាយករដ្ឋមន្ត្រី ក៏បានពន្យល់ថា ពីសីលធម៌អ្នកនយោបាយ មិនត្រូវយកគំនុំផ្ទាល់ខ្លួនវាយប្រហារទៅដល់គ្រួសារដៃគូបដិបក្ខនោះទេ ត្រូវទទួលស្គាល់ពីភាពខុសគ្នានៃទស្សនៈនយោបាយ មិនត្រូវមើលងាយការងាររបស់របស់ដៃគូរ និងមិនត្រូវកេងចំណេញ នយោបាយពេលគេមានទុក្ខ ឬប្រជាជនមានទុក្ខទេ។

សម្ដេចបវរធិបតី ហ៊ុន ម៉ាណែត បានបញ្ជាក់ថា គ្មានអ្វីកើតឡើងដូចការលើកឡើងរបស់ក្រុមប្រឆាំងនោះទេ ផ្ទុយទៅវិញកម្ពុជា-ចិន បានឯកភាព ក្នុងទៅលើការគោរពអធិបតេយ្យភាព និងឯកភាពរបស់គ្នាទៅវិញទៅមក ហើយកម្ពុជាធានានូវភាពជាម្ចាស់ការ ក្នុងការកំណត់ទិសដៅទាំងក្នុងប្រទេស និងអន្តរជាតិដោយខ្លួនឯង។

រាជរដ្ឋាភិបាលកម្ពុជា- ចិន បានចេញសេចក្ដីថ្លែងការណ៍រួមមួយកាលពីថ្ងៃទី១៨ ខែមេសា ឆ្នាំ២០២៥ថ្មៗនេះ ដោយបានសម្រេចនូវការឯកភាពគ្នាជាច្រើន ទាក់ទងនឹងការកសាងសហគមន៍វាសនារួមកម្ពុជា-ចិន ការអនុវត្តគំនិតផ្ដួចផ្ដើមអភិវឌ្ឍន៍សកល សន្ដិសុខសកល និងអរិយធម៌សកល។

ក្នុងនោះចំណុចទី៣ ក្នុងការកសាងសហគមន៍​វាសនារួមកម្ពុជា-ចិនបានបញ្ជាក់យ៉ាងច្បាស់ថា ភាគីទាំងពីរបញ្ជាក់ជាថ្មីនូវការគាំទ្រផលប្រយោជន៍ស្នូល អធិបតេយ្យភាពជាតិ និងបូរណភាពទឹកដីរបស់គ្នា​ទៅវិញទៅមក ព្រមទាំងប្រឆាំងដាច់ខាត ចំពោះការជ្រៀតជ្រែករបស់បរទេស​ក្នុងកិច្ចការផ្ទៃក្នុងប្រទេសនីមួយៗ៕

ដោយ: គង់ លាងហួរ
អន្តរជាតិ: តម្លៃហាងឆេងមាសបានងើបឡើងថ្លៃក្នុងការជួញដូរនាព្រឹកថ្ងៃច័ន្ទដើមសប្តាហ៍នេះ ដោយសារការដាំក្បាលចុះនៃប្រាក់ដុល្លារ និងសង្គ្រាមពាណិជ្ជកម្មរវាងសហរដ្ឋអាមេរិក និងបណ្តាដៃគូសំខាន់ៗរបស់ខ្លួន ដែលបង្កឱ្យមានការភ័យខ្លាចចំពោះវិបត្តិសេដ្ឋកិច្ច។

តួយ៉ាង តម្លៃមាស Spot Gold បានកើនឡើង១,៦៥ភាគរយដល់ត្រឹម៣៣៨២,៥៩ដុល្លារក្នុងមួយអោន ខណៈតម្លៃហាងឆេងមាសរបស់សហរដ្ឋអាមេរិក U.S. gold futures បានកើនឡើង២ភាគរយដល់៣.៣៩៥ដុល្លារក្នុងមួយអោនគិតត្រឹមម៉ោង១០:៥៥នាទីព្រឹក។

យោងតាមឧបករណ៍ CME FedWatch បានឱ្យដឹងថា បច្ចុប្បន្ន ទីផ្សារមើលឃើញឱកាសចំនួន៦១,៥ភាគរយ ដែលធនាគារកណ្តាលអាមេរិក (Fed) នឹងអាចទម្លាក់អត្រាការប្រាក់ចំនួន០,២៥ភាគរយក្នុងកិច្ចប្រជុំគោលនយោបាយនៅថ្ងៃទី១៨ ខែមិថុនាខាងមុខ។

សន្ទស្សន៍ប្រាក់ដុល្លារ ដែលវាស់វែងរូបិយប័ណ្ណប្រាក់ដុល្លារអាមេរិកធៀបនឹងរូបិយប័ណ្ណធំៗចំនួន៦ ដូចជាប្រាក់យ៉េន និងប្រាក់អឺរ៉ូ បានដាំក្បាលចុះដល់៩៨,៣ពិន្ទុនាព្រឹកថ្ងៃច័ន្ទនេះ បន្ទាប់ពីបានបិទការជួញដូរត្រឹម៩៩,៣៨ពិន្ទុកាលពីថ្ងៃសុក្រសប្តាហ៍មុន។

ចំណែក តម្លៃលោហៈធាតុប្រាក់ Spot silver បានកើនឡើង១ភាគរយដល់៣២,៨ដុល្លារក្នុងមួយអោន ខណៈតម្លៃផ្លាទីនបានងើបឡើង០,១៨ភាគរយដល់៩៧៨,៨ដុល្លារក្នុងមួយអោន ហើយតម្លៃ palladium បានងើបឡើង០,២៣ភាគរយដល់៩៦៣ដុល្លារក្នុងមួយអោនគិតត្រឹមម៉ោង១០:៥៧នាទីព្រឹក៕

ដោយ គង់ សូរិយា

    កោះកុងៈ ការស្ថាបនាបញ្ចប់ផ្លូវជាតិលេខ១០ ដែលជាផ្លូវប្រវត្តិ​សាស្រ្តតភ្ជាប់តំបន់ភូមិភាគពាយ័ព្យ និងតំបន់ឆ្នេរ នឹងចូលរួមចំណែកលើកកំពស់សេដ្ឋកិច្ច និងទេសចរណ៍ខេត្តកោះកុង ឲ្យកាន់តែរីកចម្រើនមួយកម្រិតទៀត។

ផ្លូវជាតិដ៏សំខាន់នេះ តភ្ជាប់ពីស្រុកសំឡូតខេត្តបាត់ដំបង មកកាន់ខេត្តពោធិសាត់ និងតភ្ជាប់មកកាន់ខេត្តកោះកុង ដែលមានប្រវែងសរុបប្រមាណ១៩៨គីឡូម៉ែត្រ។

ជាមួយនឹងសក្តានុពលធនធានធម្មជាតិ ព្រៃភ្នំ ដងព្រែក ព្រៃកោងកាង និងសហគមន៍ធម្មជាតិប៉ាក់ខ្លង”រាប់រយកន្លែង ខេត្តកោះ​កុងក៏មានឆ្នេរសមុទ្រដ៏ស្រស់ស្អាតផងដែរ ពិសេសឆ្នេរបាក់ខ្លង ជាឆ្នេរមួយមានភាពស្រស់ស្អាត និងមានខ្យល់អាកាសបរិសុទ្ធ។

ប្រជាពលរដ្ឋ ព្រមទាំងភ្ញៀវទេសចរផង បានសម្ដែងក្តីសប្បាយរីករាយជាមួយទេសភាពស្រស់ស្អាត លាយឡំជាមួយខ្យល់សមុទ្របោកបក់បះកាយា នាំឱ្យរំសាយទុក្ខកង្វល់ បន្ទាប់ពីបានមកដល់រមណីយដ្ឋានឆ្នេរប៉ាក់ខ្លង ជាប់ជាយដែនកម្ពុជា-ថៃមួយនេះ តាមរយៈផ្លូវជាតិលេខ១០ ផ្លូវក្រវាត់ព្រំដែនខេត្តបាត់ដំបង-ពោធិ៍សាត់-កោះកុង និងផ្លូវជាតិលេខ៤៨ ដែលត្រូវបានស្តារកសាងពង្រីកធំថ្មី។

ខេត្តកោះកុង ត្រូវបានចាត់បញ្ចូលក្នុងចង្កោមខេត្តតំបន់ឆ្នេរ ដែលជាប់នាមថា “តារារះនាទិសនិរតី” និងជាខេត្តសម្បូរទៅដោយតំបន់អេកូទេសចរណ៍ សហគមន៍ទេសចរណ៍ និងទេសចរណ៍តំបន់ឆ្នេរសមុទ្រ ដែលមានសរុបប្រមាណជាង២០កន្លែង។

ជាមួយនឹងការតភ្ជាប់ពីតំបន់មួយទៅតំបន់មួយ ផ្លូវជាតិលេខ១០ មិនត្រឹមតែធ្វើសមាហរណកម្មសេដ្ឋកិច្ច ទេសចរណ៍ផ្ទៃក្នុងកម្ពុជានោះទេ តែក៏រួមចំណែកទាក់ទាញភ្ញៀវទេសចរណ៍ជាតិ អន្តរជាតិពីភូមិភាគពាយ័ព្យដ៏សម្បូរភោគទ្រព្យ ទៅទស្សននានៅខេត្តនេះកាន់តែជិត ដោយមិនចាំបាច់មកកាន់ខេត្តកណ្តាល ឬរាជធានីភ្នំពេញ មុនទៅកាន់ខេត្តកោះកុងដូចពីមុនឡើយ៕

ដោយៈ គង់ សូរិយា

    ភ្នំពេញៈ ជាដំណឹងរីករាយមួយ ដោយភាគីចិនក៏បានប្រកាសគាំទ្រដល់កម្ពុជា ដើម្បីជំរុញ​ការតភា្ជប់កា​រដឹ​ក​ជញ្ជូន​កម្ពុជា-ចិន និង ប្រ​ទេ​សក្នុងតំបន់។

ឯកអគ្គរដ្ឋទូតចិនប្រចាំ​នៅ​កម្ពុជា លោកវ៉ាង វិនប៊ិន ​បាន​ថ្លែង​បញ្ជាក់​នៅ​ក្នុង​សន្និសីទ​សារ​ព័ត៌មាន នៅថ្ងៃទី១៩ ខែមេសា ឆ្នាំ២០២៥នេះថា រដ្ឋាភិបាលចិន តាមរយៈ​ដំណើរ​ទស្សន​កិច្ច​ផ្លូវ​រដ្ឋ​របស់​ប្រធានាធិបតីស៊ី ជីនពីង នឹងបន្តផ្តល់ជំនួយបន្ថែមទៀតដល់កម្ពុជា ក្នុង​ការ​កសាង​ហេដ្ឋា​រ​ចនា​សម្ព័ន្ធ ផ្លូវ ស្ពាន ថ្នល់ ប្រពន្ធ័ទឹកស្អាត ស្ថានីយន៍វារីអគ្គីសនីបូមទឹកស្តុកទុក ថាម​ពល​ព្រះ​អាទិត្យ ថាមពលដើរដោយខ្យល់ និង បច្ចេកវិទ្យាថាមពលស្អាត ជាពិសេស ការជំរុញ​ការ​តភ្ជាប់​ការ​ដឹក​ជញ្ជូន​តាមផ្លូវដែក។

លោកបន្តថា “កិច្ចសហប្រតិបត្តិការផ្លូវដែក ចិនចាត់ទុកថា ជា​ចំនុច​សំខាន់ មិនត្រឹមតែផលសម្រាប់ចិន និងកម្ពុជាប៉ុណ្ណោះទេ ប៉ុន្តែ វានឹងលើក​កម្ពស់​ដល់​ការ​ដឹក​ជញ្ជូន​ពលរដ្ឋ និងការធ្វើពាណិជ្ជកម្មទ្វេរ រួមនឹង ពហុភាគីថែមទៀតផង”។ លោកបន្តថា “ផ្លូវដែកពីចិន តភ្ជាប់មកកម្ពុជា​នឹងមានកិច្ចពិភាក្សាគ្នានៅពេលខាងមុខ”។

ក្រៅពីវិស័យហេដ្ឋារចនាសម្ព័ន្ធ ភាគីចិនបាន​លើក​ទឹក​ចិត្តស្ថាប័នប្រព័ន្ធផ្សព្វផ្សាយ វិទ្យុ និងទូរទស្សន៍ក្នុងប្រទេសទាំង២ ពង្រឹងកិច្ច​សហកា​រ​គ្នា​ទៅ​វិញ​ទៅមក ដើម្បី​ចូលរួម​ប្រឆាំង​ព័ត៌មាន​ក្លែងក្លាយ​ ដែល​អាច​បង្ក​អោយ​មាន​ផ​ល​ប៉ះ​ពាល់​ណា​មួយ ​ដល់​ទំនាក់ទំនងមិត្ត​ភាពដែកថែបកម្ពុជា ចិន ។

លោកវ៉ាង វិនប៊ិន បានថ្លែង​ទៀត​ថា ជោគវាសនារួមគ្នា រវាងចិន-កម្ពុជា ត្រូវបានឆ្លុះ​បញ្ចាំង​ក្នុង​ការគាំទ្រ ​រាល់​កិច្ច​ប្រឹង​ប្រែង​គ្នា​ទៅ​វិញ​ទៅមក ដើម្បីការពារផលប្រយោជន៍ស្នូល។ ក្នុងនោះភាគីចិន បន្តប្រកាន់ភ្ជាប់ គោរពអធិប​តេយ្យភាព និងបូរណភាព ដែនដីកម្ពុជា និងគាំទ្រចំពោះជម្រើស​ នៃ​មាគ៌ា​អភិវឌ្ឍន៍​របស់​កម្ពុជា ​សម្របទៅនឹងលក្ខខណ្ឌរបស់កម្ពុជា គាំទ្រយ៉ាងម៉ឺងម៉ាត់​ចំពោះ​កម្ពុ​ជា​ ក្នុង​ការ​អភិវ​ឌ្ឍ​សេដ្ឋ​កិច្ច និងកែលម្អជីវភាពរស់នៅរបស់ប្រជាជន គាំទ្រ យ៉ាងពេញទំហឹងនូវតួនាទីរបស់កម្ពុជា លើ​បញ្ហាតំបន់ និងអន្តរជាតិ។

គិតមកដល់ពេលនេះរដ្ឋាភិបាលចិន បានចូលរួមចំណែកសាងសង់ផ្លូវនៅកម្ពុជា​បានចំនួន​៣០​ខ្សែ ដែលចំណាយថវិកាអស់ជិត ២០០០លានដុល្លារអាមេរិក ផ្លូវដែលចិន​បាន​ជួយ​កសាង​រួចនោះ គឺមានប្រវែងជាង៣០០០គីឡូម៉ែត្រ៕