ដោយៈ ស៊ីវ ម៉េង

    ភ្នំពេញៈ ក្រុមអ្នកជំនាញអចលនទ្រព្យជើងចាស់បានលើកឡើងដោយបានបង្ហាញសញ្ញាសុទិដ្ឋិនិយមតិចតួច ពីទីផ្សារអចលនទ្រព្យ ដែលនឹងងើបឡើងនៅឆ្នាំ២០២៥ខាងមុខនេះ។

    នៅសល់តែ១១ថ្ងៃទៀតប៉ុណ្ណោះ ឆ្នាំ២០២៤ដ៏សោកសៅសម្រាប់វិស័យនេះ នឹងកន្លងផុត ជាមួយការចាប់ផ្តើមនូវសញ្ញាមិនច្បាស់លាស់នៅឡើយ។

    អគ្គនាយកក្រុមហ៊ុនឆៃលីន ស៊ា រៀលធី លោកស៊ា ឆៃលីនបានមានប្រសាសន៍ឲ្យដឹងកាលពីដើមសប្តាហ៍នេះថា ឆ្នាំ២០២៥ ខាងមុខ យើងមិនទាន់ អាចមានសន្ទស្សន៍វិភាគបានច្រើននៅឡើយ ប៉ុន្តែតាមបទពិសោធន៍ កន្លងមកបានឲ្យយើងអាចគិតថា ឆ្នាំខាងមុខមិនទាន់មានសញ្ញាអ្វីគួរឲ្យកត់សំគាល់នៅឡើយ។ លោកបន្តថា ការផ្លាស់ប្តូរមេដឹកនាំអាមេរិក ដែលនឹងអាចជះឥទ្ឋិពល ដល់លំហូរពាណិជ្ជកម្មចិន អាចធ្វើឲ្យចិនជួបផលលំបាក នៅក្នុងការបង្ហូរទុនមកក្រៅប្រទេស។
លោកបន្តថា “គិតពីត្រីមាសចុងក្រោយនៃឆ្នាំនេះ និងរហូតដល់​ដើមឆ្នាំ២០២៥ ខ្ញុំមិនមើលឃើញសញ្ញានៃការងើបឡើងនៅឡើយទេ”។ លោកបន្ថែមថា “វិនិយោគទុនធំរបស់យើងគឺចិន ហេតុនេះបើចិនរងសម្ពាធពីអាមេរិក នឹងមិនមានលំហូរទុនមកកម្ពុជាច្រើននោះទេ”។

    ជាមួយគ្នានេះ លោកប៉ូ អ៊ាវគង់អគ្គនាយកក្រុមហ៊ុនadvance Realty បានមានប្រសាសន៍ឲ្យដឹងផងដែរថា យើងអាចប្រមើលមើលបណ្តើរៗបាន សម្រាប់ម៉ាក្រូនៅក្នុងវិស័យអចលនទ្រព្យ ដែលអាចមានស្ថានភាពមិនខុសគ្នានឹងឆ្នាំ២០២៤នោះទេ ដោយតម្រូវការនៃការទិញ លក់ និងលំហូរទុននៅក្នុងការអភិវឌ្ឍវិស័យនេះនៅមានកម្រិត ពិសេ​សតម្រូវការទាំងក្នុងនិងក្រៅប្រទេស ក៏មិនមានការកើនឡើងជាដុំកំភួននោះទេ។

    លោកបន្តថា “អ្វីដែលខ្ញុំមើលឃើញ គឺទីផ្សារនឹងមានសភាពប្រហាក់ប្រហែលនឹងឆ្នាំ២០២៤”។

    លោកពន្យល់ថា ការអះអាងបែបនេះ ដោយសារយើងមើលកត្តាមួយចំនួនដូចជា ទី១ ស្ថានភាពពិភពលោក នយោបាយនៃសង្រ្គាមនៅ​តែអូសបន្លាយ ទោះជាមានព័ត៌មានល្អក្តី ប៉ុន្តែការចចារអាចចំណា​យពេល៦ខែទៅមួយឆ្នាំ។ ទី២ សហរដ្ឋអាមេរិកផ្លាស់ប្តូរមេដឹកនាំថ្មី អាចធ្វើឲ្យជម្លោះពាណិជ្ជកម្មកើនឡើង ដោយប្រទេសនិមួយៗនឹងទាញយកផលប្រ​យោជន៍រៀងៗខ្លួន​ ទី៣ បញ្ហាបំណុលរបស់ពិភពលោកើនឡើងខ្ពស់ ដែលធ្វើឲ្យគ្រឹះស្ថានហិរញ្ញវត្ថុនានាបន្តប្រុងប្រយ័ត្ន ក្នុងការផ្តល់ឥណទានសម្រាប់វិស័យនេះ។

    ទោះជាយ៉ាងណា លោកប៉ូ អ៊ាវគង់បានបង្ហាញសុទិដ្ឋិនិយមផងដែរថា ស្ថានភាពម៉ាក្រូសេដ្ឋកិច្ចរបស់កម្ពុជាមានសភាពប្រសើរ ប៉ុន្តែកំណើនGDP មិនបានស្មើគ្នា ព្រោះស្ថានភាពកើនឡើងគឺសម្រាប់តែការនាំ​ចេញ ដែលលំហូរសាច់ប្រាក់បានហូរចេញទៅវិញ។

    ចំណែក លោកស្រីតាំង ហួរអគ្គនាយិកាក្រុមហ៊ុនAmatak Property Serviceបានមានប្រសាសន៍ឲ្យដឹង កាលពីថ្ងៃទី១០ ធ្នូ ដោ​យបានបង្ហាញនូវភាពសុទិដ្ឋិនិយមតិចតួច សម្រាប់វិស័យនេះផងដែរ។

    លោកស្រីបានបន្តថា “ទោះជាយ៉ាងណា យើងឃើញមានការខិតខំពីប្រមុខរាជរដ្ឋាភិបាល ដែលបានព្យាយាមទាក់ទាញការវិនិយោគ ហេតុនេះយើងរំពឹងថាឆ្នាំ២០២៥ នឹងមានភាពប្រសើរជាងឆ្នាំនេះ”។ លោកស្រីបន្តទៀតថា “យើងអ្នករកស៊ី ក៏ត្រូវមើលលើបញ្ហានយោ​បាយ ដែលកម្ពុជាមានស្ថេរភាពនយោបាយ ហើយថ្នាក់ដឹកនាំយើងបានខិតខំណាស់”។

    លោកស្រីតាំង ហួរបានបន្តថា លើសពីនេះប្រមុខរដ្ឋាភិបាល បានដោះស្រាយបញ្ហា ទាក់ទងការលើកលែងពន្ឋប្រថាប់ត្រា លើផ្ទអមានតម្លៃ៧ម៉ឺនចុះ និង២១ម៉ឺនដុល្លារចុះ ព្រមទាំងគោលនយោបាយលើកទឹកចិត្តជាច្រើនទៀត។

    លោកស្រីបន្តថា ជាមួយគ្នានេះ សហរដ្ឋអាមេរិកបានជ្រើរសរើសប្រធានាធិបតីថ្មី ដោយលោកដូណាល់ ត្រាំបានជាប់ឆ្នោត ហើយលោកត្រាំបានទទួលបានប្រជាប្រិយ ក្នុងចំណោមប្រជាពលរដ្ឋកម្ពុជា ដោយលោកធ្លាប់អញ្ជើញ មកចូលរួមកិច្ចប្រជុំកំពូលអាស៊ាននៅកម្ពុជា។

    លោកស្រីតាំង ហួរបានបញ្ជាក់ថា យើងរំពឹងថាលោកត្រាំ នឹងធ្វើឲ្យសេដ្ឋកិច្ចពិភពលោកប្រសើរជាងមុន ហើយស្ថានភាពទីផ្សារជារួមក្នុងវិស័យនេះនៅកម្ពុជា នឹងមានសភាពប្រសើរជាងឆ្នាំ២០២៤ ប៉ុន្តែមិនហក់ឡើងខ្លាំងនោះទេ”។

    ប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា លោកសន សៀបបានបដិសេធមិនអត្ថាធិប្បាយ ប៉ុន្តែលោកបានលើកឡើងកាលពីពេលថ្មីៗនេះថា ស្ថានភាពទីផ្សារអចលនវត្ថុកម្ពុជា ដើរស្របគ្នានឹងស្ថានភាពសេដ្ឋកិច្ចពិភពលោក ប៉ុន្តែស្ថានភាពទីផ្សារយ៉ាងណា យើងអាចមើលឃើញសញ្ញា កំរើកឡើងវិញបណ្តើរៗនៅក្នុងវិស័យនេះ។

    លោកបន្តថា “អ្វីៗទាមទារពេលវេលាបន្ថែមទៀត ដើម្បីជម្រុញឲ្យទីផ្សារនេះមានសភាពកាន់តែប្រសើរឡើង”៕

ដោយៈ ស៊ីវ ម៉េង

ព្រះសីហនុៈ ក្រុមហ៊ុនព្រីនស៍រៀល អ៊ីស្ទេត ខេមបូឌា និង

សណ្ឋា​គារ រីស៊ត ធួយប៊្លូនឹងលេចវត្តមាននៅក្រុងព្រះសីហនុ ដែលមានទីតាំងស្ថិតនៅក្នុងគំរោងរបស់ក្រុមហ៊ុន Prince Real estate Group។

លោកម៉ាង ស៊ីណេត អភិបាលខេត្តព្រះសីហនុ ដែលបានអញ្ជើញជាអធិបតីក្នុងពិធីចុះហត្ថលេខា នៃកិច្ចសហការរវាងក្រុមហ៊ុនទាំងពីរកាលពីថ្ងៃទី១០ ធ្នូបានថ្លែងថា ពិធីចុះហត្ថលេខា ស្តីពីការគ្រប់គ្រងសណ្ឋាគារ រវាងក្រុមហ៊ុនព្រីនស៍រៀល អ៊ីស្ទេត ខេមបូឌា (PRINCE REAL ESTATE Cambodia) និងសណ្ឋាគារ រីស៊ត ធួយប៊្លូ (TUI BLUE Hotels & Resorts) នៅលើទឹកដីតំបន់ឆ្នេរដ៏ស្រស់ស្អាត ដែលត្រូវបានប្រសិទ្ធនាមថាជា “តារារៈ នាទិសនិរតី” និងកំណត់ជាតំបន់សេដ្ឋកិច្ចពិសេសគំរូពហុបំណង ជាសក្ខីភាពបង្ហាញឪ្យឃើញពីការជឿជាក់របស់អ្នកវិនិយោគ ទុនមកលើរាជរដ្ឋាភិបាលកម្ពុជា។

លោកបានបញ្ជាក់ថា “ការចុះហត្ថលេខាពេលនេះ ពិតជាបានចូលរួមចំណែកយ៉ាងសំខាន់ក្នុងការលើក កម្ពស់វិស័យទេសចរណ៍ និងសេដ្ឋកិច្ចទទួលបានភាពទាក់ទាញ និងរីកចម្រើន ពិសេសផ្តល់ការងារជូនប្រជាពលរដ្ឋ នៅខេត្តព្រះសីហនុ”។ លោកបន្តថា “គំរោងនេះនឹងរួមចំណែកជាមួយរាជរដ្ឋាភិបាលកម្ពុជា ក្នុងការលើកកម្ពស់កម្រិតជីវភាព និងកាត់បន្ថយភាពក្រីក្ររបស់ប្រជាពលរដ្ឋ ស្របតាមគោលនយោបាយ និងយុទ្ធសាស្រ្តបញ្ចកោណដំណាក់កាលទី១ របស់រាជរដ្ឋាភិបាលកម្ពុជា គឺដើម្បីកំណើនការងារ សមធម៌ ប្រសិទ្ធភាព និងចីរភាពកសាងមូលដ្ឋានគ្រឹះ ឆ្តោះទៅសម្រេចបានចក្ខុវិស័យកម្ពុជាឆ្នាំ២០៥០”។

រាជរដ្ឋាភិបាលកម្ពុជា ចាត់ទុកវិស័យទេសចរណ៍ជាមាសបៃតងដើរតួនាទីជាកាតាលីករដ៏សំខាន់ក្នុងការ ជំរុញឱ្យមានសន្តិភាព និងជាស្ពានមេត្រីក្នុងការចម្លងនូវការយោគយល់ ការអនុគ្រោះ និងស្នាមញញឹមរួសរាយរាក់ទាក់។ ហើយចំណុចខ្លាំងដ៏ធំរបស់វិស័យទេសចរណ៍ ក្រៅពីអានុភាពសេដ្ឋកិច្ច គឺដើរតួនាទីយ៉ាងសំខាន់ ក្នុងការប្រមូលផ្តុំមនុស្សមកជួបជុំគ្នា បង្កើតបានទៅជាមាគ៌ាសន្តិភាព ស្របតាមអនុសាសន៍ ដ៏ថ្លៃថ្លារបស់សម្តេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភា នៃព្រះរាជាណាចក្រកម្ពុជា “អរគុណសន្តិភាព មានសន្តិភាពទើបមានអ្វីៗទាំងអស់”។

លោកម៉ាង ស៊ីណេតបានបន្តថា រាជរដ្ឋាភិបាលកម្ពុជានីតិកាលទី៧ ក្រោមការដឹកនាំរបស់សម្តេចមហាបវរធិបតី ហ៊ុន ម៉ាណែត បានបន្តលើកកម្ពស់វិស័យទេសចរណ៍ ពិសេសបន្តជំរុញការអភិវឌ្ឍទេស​ចរណ៍វប្បធម៌ និងធម្មជាតិ ដោយបន្ថែមទេស ចរណ៍បៃតង ស្អាត និងវៃឆ្លាត បង្កើតផលិតផលទេសចរណ៍ថ្មីៗ ដែលមានតម្លៃបន្ថែមខ្ពស់ និងទេសចរណ៍ធុរកិច្ច តាមរយៈការលើកកម្ពស់ការអនុវត្ត ក៏ដូចជាការរៀបចំ និងការដាក់ចេញគោលនយោបាយ និងផែនការមេអភិវឌ្ឍន៍វិស័យទេសចរណ៍ និងបានដាក់ចេញនូវ “កម្មវិធីពិសេសជំរុញការវិនិយោគក្នុងខេត្តព្រះសីហនុឆ្នាំ២០២៤”។

រដ្ឋបាលខេត្តព្រះសីហនុ បានកំពុងយកចិត្តទុកដាក់អភិវឌ្ឍ និងស្តារហេដ្ឋារចនាសម្ព័ន្ធផ្លូវថ្នល់ កែលម្អឆ្នេរសមុទ្រ ទឹកស្អាត អគ្គិសនី ការគ្រប់គ្រងសំណល់រឹង រាវ បន្ទប់ទឹក សាធារណៈ សួនច្បារ និងកំពង់ផែទេសចរណ៍ស្តង់ដា សេវាកម្មទេសចរណ៍ ពិសេសពង្រឹងការគ្រប់គ្រងសន្តិសុខ សុវត្ថិភាពសណ្តាប់ធ្នាប់សាធារណៈ រួមទាំងជំរុញយុទ្ធនាការទីក្រុងស្អាត ឆ្នេរស្អាតទាំងនៅក្នុងក្រុង ទីប្រជុំជន និងនៅតាមតំបន់ឆ្នេរ ឱ្យកាន់តែមានសោភ័ណភាព បរិស្ថានល្អប្រសើរជាពិសេសជំរុញការបង្កើនគុណភាពផលិតផល និងសេវាទេសចរណ៍រក្សាបាននូវសុខសន្តិភាព សុវត្ថិភាពទេសចរណ៍ ការធ្វើបដិសណ្ឋារកិច្ចស្វាគមន៍ភ្ញៀវយ៉ាងកក់ក្ដៅ ក្នុងស្មារតីស្រលាញ់រាប់អានសហប្រតិបត្តិការល្អ និងចូលរួមក្នុងចលនាប្រឡងប្រណាំងទីក្រុងស្អាត រមណីយដ្ឋានស្អាតសេវាល្អ ប្រែក្លាយជាគោលដៅទេសចរណ៍ ឈានមុខពោពេញដោយកាលានុវត្តភាព និងភាពកក់ក្តៅ ក្នុងគោលបំណងពន្លឿនការអភិវឌ្ឍខេត្តព្រះសីហនុ ក្លាយជាតំបន់សេដ្ឋកិច្ចពិសេសគំរូពហុបំណង ដែលជាប៉ូលសេដ្ឋកិច្ចដ៏សំខាន់ សម្រាប់វិស័យពាណិជ្ជកម្ម ឧស្សាហកម្ម ភស្តុភារកម្ម  ទេសចរណ៍ និងមជ្ឈមណ្ឌលសេវាហិរញ្ញវត្ថុអន្តរជាតិ៕