ដោយ: គង់ លាងហួរ
អន្តរជាតិ: ការឡើងកាន់តំណែងជាប្រធានាធិបតីអាមេរិកជាលើកទីពីររបស់លោកដូណាល់ត្រាំបានបង្កឱ្យមានការជជែកគ្នាក្នុងចំណោមបណ្តាអ្នកវិនិយោគអំពីឥទ្ធិពលដែលអាចកើតមានលើទិដ្ឋភាពសេដ្ឋកិច្ចរបស់បណ្តាប្រទេសនៅតំបន់អាស៊ាន រួមទាំងកម្ពុជា។

សហរដ្ឋអាមេរិកក្រោមការដឹកនាំរបស់លោកត្រាំ ត្រូវបានក្រុមអ្នកវិភាគព្យាករណ៍ថា នឹងធ្វើឱ្យមានការកើនឡើងនូវលទ្ធិគាំពារនិយម និងការផ្លាស់ប្តូរគោលនយោបាយពាណិជ្ជកម្ម។

តួយ៉ាង នាពេលថ្មីៗនេះ ក្រុមហ៊ុនប្រឹក្សាយោបល់ផ្នែកអចលនទ្រព្យ CBRE បាមចេញផ្សាយរបាយការណ៍វិភាគថ្មីមួយ ដែលបង្ហាញពីហានិភ័យ និងឱកាសសម្រាប់ប្រទេសកម្ពុជា ក្នុងបរិបទមួយដែលបរិយាកាសពិភពលោកកំពុងផ្លាស់ប្តូរ។

ការវិភាគរបស់ក្រុមហ៊ុន CBRE បង្ហាញថា ការផ្លាស់ប្តូរគោលនយោបាយសេដ្ឋកិច្ចរបស់សហរដ្ឋអាមេរិកអាចរារាំងអ្នកវិនិយោគបរទេស ដែលនាំទៅដល់ការកាត់បន្ថយលំហូរវិនិយោគផ្ទាល់ពីបរទេស (FDI) ចូលមកកាន់កម្ពុជា។

និន្នាការនេះអាចជះឥទ្ធិពលយ៉ាងខ្លាំងដល់សេដ្ឋកិច្ចកម្ពុជា ជាពិសេសនៅក្នុងវិស័យឧស្សាហកម្មស្នូលដូចជា ផលិតកម្ម ដែលជាកត្តាជំរុញដ៏សំខាន់សម្រាប់កំណើនសេដ្ឋកិច្ចរបស់ប្រទេសកម្ពុជាក្នុងរយៈពេលប៉ុន្មានឆ្នាំថ្មីៗនេះ។

ដើម្បីទប់ទល់នឹងហានិភ័យទាំងនេះ CBRE បានជំរុញឱ្យកម្ពុជាផ្តោតលើសារៈសំខាន់នៃការធ្វើពិពិធកម្មសេដ្ឋកិច្ច។

របាយការណ៍លើកឡើងថា ការពង្រឹងទំនាក់ទំនងសេដ្ឋកិច្ចរវាងកម្ពុជាជាមួយទីផ្សារក្នុងតំបន់អាស៊ាន ចិន និងអឺរ៉ុប ជាយុទ្ធសាស្ត្រដើម្បីកាត់បន្ថយការពឹងផ្អែកលើទំនាក់ទំនងពាណិជ្ជកម្មជាមួយសហរដ្ឋអាមេរិក។ CBRE ចង្អុលបង្ហាញថា កម្ពុជាបាននិងកំពុងស្វែងរកយ៉ាងសកម្មនូវភាពជាដៃគូពាណិជ្ជកម្មថ្មី ដែលអាចជួយកាត់បន្ថយផលប៉ះពាល់ពីការផ្លាស់ប្តូរគោលនយោបាយរបស់សហរដ្ឋអាមេរិក។

ចំណែក វិស័យអចលនទ្រព្យក៏ត្រូវបានគូសរំលេចនៅក្នុងរបាយការណ៍ខាងលើផងដែរ។ CBRE អះអាងថា វិស័យអចលនទ្រព្យកម្ពុជាអាចប្រឈមមុខនឹងកំណើនយឺត ប្រសិនបើលំហូរនៃការវិនិយោគផ្ទាល់ពីបរទេសធ្លាក់ចុះ។

ការវិភាគបង្ហាញថា បណ្តាវិនិយោគិនអន្តរជាតិអាចប្រកាន់យកវិធីសាស្រ្តប្រុងប្រយ័ត្នបន្ថែមទៀត ជាពិសេសក្រុមអ្នកវិនិយោគពីសហរដ្ឋអាមេរិក និងបណ្តាប្រទេសលោកខាងលិច ដោយសារតែហានិភ័យភូមិសាស្ត្រនយោបាយកើនឡើង។

CBRE បានជំរុញឱ្យបណ្តាអ្នកអភិវឌ្ឍន៍អចលនទ្រព្យនៅកម្ពុជាផ្តោតលើការជំរុញតម្រូវការក្នុងស្រុក និងធ្វើពិពិធកម្មផលប័ត្ររបស់ពួកគេ ដោយផ្តោតលើផ្នែក ដែលមានសក្តានុពលដូចជា ការអភិវឌ្ឍន៍លំនៅដ្ឋានតម្លៃសមរម្យជាដើម។ វិធីសាស្រ្តនេះអាចជួយទប់ទល់នឹងការប្រែប្រួលនៃការវិនិយោគពីបរទេស ដើម្បីគាំទ្រដល់ស្ថិរភាពក្នុងវិស័យអចលនទ្រព្យ៕ប្រភព: CBRE៕

ដោយ: គង់ លាងហួរ
អន្តរជាតិ: យោងតាមទិន្នន័យពីក្រុមហ៊ុនស្រាវជ្រាវអចលនទ្រព្យ Zillow បានឱ្យដឹងថា នៅខែតុលា ឆ្នាំ២០២៤ តម្លៃផ្ទះជាមធ្យមនៅសហរដ្ឋអាមេរិកបានកើនឡើងដល់ចំនួន៣៥៩.០៩៩ដុល្លារក្នុងមួយយូនីត កើនឡើង២,៦ភាគរយធៀបនឹងឆ្នាំមុន។

ខណៈឆ្នាំ២០២៤ជិតឈានដល់ទីបញ្ចប់ ក្រុមហ៊ុនស្រាវជ្រាវអចលនទ្រព្យ Zillow ក៏បានធ្វើការព្យាករណ៍និន្នាការចំនួន៤ សម្រាប់ទីផ្សារលំនៅដ្ឋានអាមេរិកក្នុងឆ្នាំ២០២៥ខាងមុខផងដែរ។

និន្នាការទី១: ការកើនឡើងនៃការលក់ផ្ទះ។

លោក Skylar Olsen ប្រធានក្រុមសេដ្ឋវិទូរបស់ក្រុមហ៊ុន Zillow បានអះអាងថា ទីផ្សារលំនៅដ្ឋានអាមេរិកកំពុងងើបឡើងវិញបន្តិចម្តងៗ ហើយនិន្នាការនឹងបន្តកើតមាន ស្របពេលដែលតម្លៃផ្ទះកើនឡើងក្នុងកម្រិតសន្សឹមៗ។

ក្រុមហ៊ុន Zillow បានព្យាករណ៍ថា តម្លៃផ្ទះនៅសហរដ្ឋអាមេរិកនឹងកើនឡើង២,៦% នៅឆ្នាំ២០២៥ ខណៈការលក់ផ្ទះដែលមានស្រាប់នឹងកើនឡើងដល់ចំនួន៤,៣លានយូនីត។

និន្នាការទី២: ការប្រែប្រួលនៃអត្រាការប្រាក់លើប្រាក់កម្ចីទិញផ្ទះ។

Zillow បានព្យាករណ៍ថា អត្រាការប្រាក់លើប្រាក់កម្ចីទិញផ្ទះរបស់សហរដ្ឋអាមេរិកនឹងកើនឡើងពេញមួយឆ្នាំ២០២៥ខាងមុខ។

Zillow បានលើកឡើងថា នាពេលថ្មីៗនេះ អត្រាការប្រាក់ថេររយៈពេល៣០ឆ្នាំលើប្រាក់កម្ចីទិញផ្ទះបានធ្លាក់ចុះ មុនពេលកើនឡើងដល់ជិត៧%នៅឆ្នាំ២០២៥ ខណៈទីផ្សារបានកែសម្រួលការរំពឹងទុកលើគោលនយោបាយអត្រាការប្រាក់របស់ធនាគារកណ្តាលអាមេរិក ស្របពេលដែលមានក្តីព្រួយបារម្ភចំពោះកំណើននៃអត្រាអតិផរណា នៅពេលដែលលោកដូណាល់ត្រាំ ដាក់ពន្ធលើការនាំចូលគ្រប់មុខទំនិញពីបរទេស បន្ទាប់ពីលោកចូលគ្រប់គ្រងសេតវិមាននៅខែមករា ឆ្នាំក្រោយ។

និន្នាការទី៣: ទីផ្សាររបស់អ្នកទិញស្ថិតនៅភាគនិរតីនៃប្រទេស។

យោងតាមទិន្នន័យរបស់ក្រុមហ៊ុន Zillow បង្ហាញថា បច្ចុប្បន្ន ទីផ្សាររបស់អ្នកទិញ(Buyer’s market)ភាគច្រើនស្ថិតនៅភាគអាគ្នេយ៍នៃសហរដ្ឋអាមេរិក។

ប៉ុន្តែ Zillow បានព្យាករណ៍ថា នៅឆ្នាំ២០២៥ អ្នកទិញអាចងាកទៅស្វែងរកឱកាសកាន់តែច្រើននៅភាគនិរតី ដោយសារតែស្តុកលំនៅដ្ឋានដែលមានស្រាប់នៅទីនោះត្រូវបានលក់ចេញជាបណ្តើរៗ។

ទីផ្សាររបស់អ្នកទិញ(Buyer’s market)ជាស្ថានភាពមួយ ដែលអ្នកទិញមានប្រៀបជាងអ្នកលក់។ លើសពីនេះ អ្នកទិញមានជម្រើសច្រើនក្នុងការជ្រើសរើស ខណៈអ្នកលក់ត្រូវតែរក្សាតម្លៃឱ្យនៅកម្រិតទាប ហើយអ្នកទិញមានប្រៀបដើម្បីចរចា។

និន្នាការទី៤: ការសាងសង់ផ្ទះដែលមានទំហំតូចជាងមុន(Smaller homes)។

Zillow បានព្យាករណ៍ថា គម្រោងសាងសង់ផ្ទះតូចៗនឹងបន្តកើនឡើង ខណៈអ្នកទិញអាចចាប់អារម្មណ៍ចំពោះការទិញផ្ទះប្រភេទនេះ ព្រោះវាមានតម្លៃសមរម្យជាងផ្ទះដែលមានទំហំធំ៕ប្រភព: Yahoo Finance៕

ដោយៈ គង់ ម៉ាលីនណា

    ភ្នំពេញៈ កាលពីចុងសប្តាហ៍មុន លោកជា វុទ្ធី អគ្គលេខាធិការគណៈកម្មាធិការវិនិយោគកម្ពុជា បានអញ្ជើញជាកិត្តិយសថ្លែងសុន្ទរកថាគន្លឹះក្នុងកិច្ចប្រជុំកំពូលសភាពាណិជ្ជកម្មអាស៊ាន ម៉ាទ្បេស៊ី (ASEAN Malaysian Business Chambers Summit) ដែលរៀបចំទ្បើងដោយសភាពាណិជ្ជកម្មម៉ាទ្បេស៊ីនៅកម្ពុជា (Malaysian Business Chamber of Cambodia, MBCC)។

កិច្ចប្រជុំកំពូលនេះ មានការចូលរួមពីសំណាក់លោក Shaharuddin Bin Onn ឯកអគ្គរដ្ឋទូតម៉ាទ្បេស៊ីប្រចាំកម្ពុជា ឧកញ៉ា តាន់ គីម៉េង ប្រធានសភាពាណិជ្ជកម្មម៉ាទ្បេស៊ីនៅកម្ពុជា តំណាងស្ថានទូតនៅតាមបណ្តាប្រទេសអាស៊ានមួយចំនួន ព្រមទាំងវិនិយោគិនក្នុងស្រុក និងវិនិយោគិនម៉ាឡេស៊ីនៅប្រទេសឡាវ មីយ៉ាន់ម៉ា ថៃ វៀតណាម ហ្វីលីពីន និងឥណ្ឌូនេស៊ី។

លោកជា វុទ្ធី អគ្គលេខាធិការគណៈកម្មាធិការវិនិយោគកម្ពុជាបានសម្តែងនូវសេចក្តីសោមន្សរីករាយ ដែលបានចូលរួមថ្លែងសុន្ទរកថាគន្លឹះ ក្នុងកិច្ចប្រជុំកំពូលដ៏មានសារៈសំខាន់នេះ និងបានវាយតម្លៃខ្ពស់ចំពោះសភាពាណិជ្ជកម្មម៉ាទ្បេស៊ីនៅកម្ពុជាដែលបានរៀបចំវេទិកាធុរកិច្ចកម្ពុជា-ម៉ាទ្បេស៊ីឆ្នាំ២០២៤ នៅទីក្រុងកូទ្បាទ្បាំពួរ ប្រទេសម៉ាទ្បេស៊ី ក្រោមអធិបតីភាពដ៏ខ្ពង់ខ្ពស់របស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា កាលពីដើមឆ្នាំ២០២៤ ប្រកបដោយជោគជ័យ ដែលវេទិកានេះ បានចូលរួមជំរុញផ្សព្វផ្សាយពីបរិស្ថាន និងសក្តានុពលវិនិយោគនៅកម្ពុជា ទៅដល់ធុរជននិងវិនិយោគិនម៉ាឡេស៊ី។

ឆ្លៀតក្នុងឱកាសនេះ លោកជា វុទ្ឋី បានជម្រាបជូនពីកត្តាសំខាន់ៗមួយចំនួន និងលក្ខខណ្ឌអំណោយផល ដែលបានទាក់ទាញក្រុមហ៊ុនម៉ាទ្បេស៊ី មកបណ្តាក់ទុនវិនិយោគនៅកម្ពុជា នាពេលកន្លងមក ព្រមទាំងបានគូសរំលេចបន្ថែមថា កម្ពុជាជាប្រទេសដែលជាទីតាំងយុទ្ធសាស្ត្រនៅក្នុងអាស៊ាន មានបរិយាកាសវិនិយោគដែលបើកចំហ មានតម្លាភាព និងអាចប៉ាន់ប្រមាណទុកជាមុនបាន មានកម្លាំងពលកម្មវ័យក្មេង, ព្រមទាំងបាននិងកំពុងបន្តកសាង ហេដ្ឋារចនាសម្ព័ន្ធរូបវន្តចាំបាច់ សម្រាប់សម្រួលដល់ការដឹកជញ្ជូន ដែលការណ៍នេះបានរួមចំណែកធ្វើឱ្យកម្ពុជា ក្លាយជាគោលដៅវិនិយោគ ដ៏ទាក់ទាញនៅក្នុងតំបន់៕

ដោយ: គង់ លាងហួរ
បាងកក: មជ្ឈមណ្ឌលស្រាវជ្រាវ SCB EIC បានព្យាករណ៍ថា ចំនួននៃការផ្ទេរលំនៅដ្ឋានថ្មីគិតជាយូនីតនៅទីក្រុងបាងកក នឹងធ្លាក់ចុះ១០%នៅឆ្នាំនេះ ហើយនឹងបន្តធ្លាក់ចុះបន្ថែមទៀតចាប់ពី១%ទៅ៣%នៅឆ្នាំ២០២៥ ដោយសារការធ្លាក់ចុះនៃសេដ្ឋកិច្ចថៃ។

ជាមួយគ្នានេះ ចំនួននៃការផ្ទេរលំនៅដ្ឋានថ្មីគិតជាទំហំទឹកប្រាក់នឹងដាំក្បាលចុះ៩ភាគរយនៅឆ្នាំ២០២៤ មុននឹងធ្លាក់ចុះចន្លោះពី០%ទៅដល់២% នៅឆ្នាំក្រោយ។នេះបើយោងតាមមជ្ឈមណ្ឌលស្រាវជ្រាវ SCB EIC។

ការធ្លាក់ចុះនៃទីផ្សារលំនៅដ្ឋានក្នុងទីក្រុងបាងកកបណ្តាលមកពីបញ្ហាប្រឈមផ្នែកសេដ្ឋកិច្ច រួមទាំងការកើនឡើងនៃថ្លៃចំណាយលើការរស់នៅ ការធ្លាក់ចុះអំណាចនៃការទិញ កំណើនបំណុលក្នុងគ្រួសារ ការកើនឡើងនៃអត្រាការប្រាក់ និងការរឹតបន្តឹងលក្ខណៈវិនិច្ឆ័យក្នុងការផ្តល់ប្រាក់កម្ចីទិញផ្ទះ។

កត្តាទាំងនេះកំពុងធ្វើឱ្យប្រជាជនថៃ ដែលមានបំណងទិញផ្ទះនាពេលអនាគត ជាពិសេសអ្នកទិញដែលមានប្រាក់ចំណូលកម្រិតទាបទៅកម្រិតមធ្យម ពន្យារពេលលើការសម្រេចចិត្តទិញផ្ទះក្នុងក្តីស្រមៃ។

លើសពីនេះទៀត ស្ថាប័ន SCB EIC បានព្យាករណ៍ថា ចំនួនលំនៅដ្ឋានថ្មី ដែលបើកដំណើរការលក់នៅក្នុងឆ្នាំ២០២៤ នឹងដាំក្បាលចុះ២៨ភាគរយធៀបនឹងឆ្នាំមុន។ប៉ុន្តែ តួលេខនេះត្រូវបានគេរំពឹងថា នឹងស្ទុះងើបឡើងវិញនៅឆ្នាំ២០២៥។

ដើម្បីឆ្លើយតបចំពោះលក្ខខណ្ឌមិនអំណោយផល អ្នកអភិវឌ្ឍន៍អចលនទ្រព្យកំពុងធ្វើពិពិធកម្មការវិនិយោគរបស់ខ្លួនទៅកាន់គម្រោងលំនៅដ្ឋានសម្រាប់អ្នកទិញដែលមានប្រាក់ចំណូលកម្រិតមធ្យម និងអ្នកទិញមានចំណូលកម្រិតខ្ពស់ ខណៈអំណាចនៃការទិញរបស់អតិថិជនទាំងនេះនៅតែមានភាពរឹងមាំ។

ជាមួយគ្នានេះ បណ្តាធនាគារក្នុងស្រុកធំៗរបស់ថៃបានរាយការណ៍ពីការធ្លាក់ចុះនៃការផ្តល់ប្រាក់កម្ចីទិញផ្ទះក្នុងអំឡុងរយៈពេលប្រាំបួនខែដំបូងដើមឆ្នាំនេះ ដោយសារតែការរឹតបន្តឹងលក្ខណៈវិនិច្ឆ័យក្នុងការផ្តល់ប្រាក់កម្ចីដល់អតិថិជន៕ប្រភព: Bangkok Post៕

ព្រឹកថ្ងៃសៅរ៍ ទី៧ ធ្នូ ឆ្នាំ២០២៤, ក្នុងពិធី​បើក​សន្និបាតលើកទី២០ របស់អង្គការក្រុមប្រឹក្សាផ្សព្វផ្សាយឥស្លាមតំបន់អាស៊ីអាគ្នេយ៍ និងប៉ាស៊ីហ្វិក (RISEAP), សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា បានថ្លែងថា សម្តេចអគ្គមហាសេនាបតីតេជោ ហ៊ុន សែន អតីតនាយករដ្ឋមន្ត្រី និងជាប្រធានព្រឹទ្ធសភា បានខិតខំកសាង និងថែទាំយ៉ាងយកចិត្តទុកដាក់​បំផុតចំពោះសន្តិភាព និងស្ថេរភាពយូរអង្វែងរបស់កម្ពុជា ដែលជាមូលដ្ឋានគ្រឹះ និងជាធាតុផ្សំមិន​អាចខ្វះបាន សម្រាប់ការអភិវឌ្ឍ និងការធានាបាននូវសុខដុមនីយ​កម្មជាតិសាសន៍ និងសាសនា​នៅព្រះរាជាណាចក្រកម្ពុជា។ ជាក់ស្តែង, សុខសន្តិភាពនេះ បានអនុញ្ញាតឱ្យ​កម្ពុជារៀបចំនូវព្រឹត្តិការណ៍អន្តរជាតិសំខាន់ៗ, ការជួបជុំគ្នាក្នុងទ្រង់ទ្រាយធំ និង ការរៀបចំ​សន្និបាតលើកទី២០ របស់អង្គការ RISEAP នាពេលនេះ។

សម្តេចបវរធិបតីនាយករដ្ឋមន្ត្រី បានថ្លែងថា ការជំរុញសុខដុមនីយកម្មសាសនា គឺជា ឌី.អេន.អេ (DNA) របស់គណបក្សប្រជាជនកម្ពុជា ហើយគ្រប់អាណត្តិនៃរាជរដ្ឋាភិបាលដែលដឹកនាំដោយ​គណបក្ស​ប្រជាជនកម្ពុជា គឺតែងប្រកាន់​ខ្ជាប់ជានិច្ចនូវគោលការណ៍នេះ។ ព្រមជាមួយគ្នានេះ បងប្អូនខ្មែរឥស្លាមជាច្រើន ក៏បានចូលរួម​ចំណែកជាមួយរាជរដ្ឋាភិបាលក្នុងតួនាទីជាថ្នាក់ដឹកនាំ រួមមានទាំងព្រឹទ្ធសភា, រដ្ឋសភា, សមាជិករាជរដ្ឋា​ភិបាល,​ រដ្ឋលេខាធិការ, អនុរដ្ឋលេខាធិការ, ទីប្រឹក្សា​ស្ថាប័នរដ្ឋ និងតួនាទីក្នុងក្របខណ្ឌថ្នាក់​ជាតិ និង ថ្នាក់ក្រោមជាតិ ព្រមទាំងក្នុងជួរកងកម្លាំងផងដែរ។

បន្ថែមពីនេះ​, ការរក្សាបាននូវទំនៀមទម្លាប់ និងប្រណិប័តន៍សាសនារបស់បងប្អូនខ្មែរឥស្លាម ក៏ត្រូវបាន​យកចិត្តទុកដាក់ និងអនុវត្តជាប្រចាំ ក្នុងនោះការរៀបចំអាហារស្រាយបួសរ៉ាម៉ាដន ជាទ្រង់ទ្រាយធំ ចាប់តាំងពីឆ្នាំ ២០១៤ មក។ ព្រមជាមួយគ្នានេះ, បងប្អូនខ្មែរឥស្លាមក៏មានសិទ្ធិសេរីភាពពេញលេញ ក្នុងការស្លៀកពាក់, ការសិក្សា និងការទទួលបាន​នូវសេវា​ព្យាបាល និងសេវាផ្សេងៗទៀត។

មុននឹងបញ្ចប់ សម្តេចបវរធិបតីនាយករដ្ឋមន្ត្រី បានគូសបញ្ជាក់បន្ថែមផងដែរថា សន្តិភាព ការ​ជឿនលឿននៃសង្គម-សេដ្ឋកិច្ច និងទំនាក់ទំនងអន្តរជាតិដ៏រស់រវើករបស់កម្ពុជា បងប្អូន​ខ្មែរឥស្លាម​ជាច្រើន ក៏មានឱកាសរៀនសូត្រនូវចំណេះដឹងផ្នែកសាសនាឥស្លាម ក៏ដូចជា​ជំនាញបច្ចេកទេស, វិទ្យាសាស្ត្រ និងបច្ចេកវិទ្យានៅតាមបណ្តាប្រទេសដៃគូជាច្រើននៅលើពិភពលោក ផងដែរ។

🌐 Hun Manet (https://www.facebook.com/profile.php?id=100069511484329)
🌐 Samdech Thipadei Hun Manet, Prime Minister (https://www.facebook.com/Dr.Hunmanetofcambodia)of Cambodia (https://www.facebook.com/Dr.Hunmanetofcambodia/posts/pfbid0LmbQiD5QcHYoUaa5j3CwGJa1w5cEYS1hdo8DNogvvBjAqxzRvVj5tovmbGWzX75ol)
🌐 Instagram (https://www.instagram.com/dr.hunmanetofcambodia)
🌐 X(Twitter) (https://twitter.com/dr_hunmanet_pm)
🌐 YouTube (https://www.youtube.com/@Dr.Hunmanetofcambodia)
🌐 Tiktok (https://www.tiktok.com/@dr.hunmanetofcambodia?is_from_webapp=1&sender_device=pc)

#ហនម៉ាណែត #Hunmanet #កមពុជា #cambodia #សនតិភាពនៅកម្ពុជា #Peaceincambodia

ដោយ: គង់ លាងហួរ
អន្តរជាតិ: រដ្ឋបាលខេត្ត Binh Dinh ដែលមានឆ្នេរសមុទ្រដ៏ស្រស់ស្អាត Quy Nhon ស្ថិតនៅភាគកណ្តាលប្រទេសវៀតណាម បានស្នើបើកដំណើរការតាក់ស៊ីហោះ ដើម្បីជំរុញវិស័យទេសចរណ៍ និងលើកកម្ពស់ការអភិវឌ្ឍន៍ប្រកបដោយនិរន្តរភាព។

គណៈកម្មាធិការប្រជាជនខេត្ត Binh Dinh បានស្នើដល់ក្រសួងដឹកជញ្ជូនជួយស្វែងរកការអនុម័តយល់ព្រមពីនាយករដ្ឋមន្ត្រីវៀតណាមលោក Pham Minh Chinh ដើម្បីអនុញ្ញាតឱ្យរដ្ឋបាលខេត្តអាចសាកល្បងប្រើប្រាស់តាក់សុីហោះសម្រាប់ដឹកអ្នកដំណើរ។

យន្តហោះ eVTOL ឬត្រូវបានគេស្គាល់ថាជា“តាក់ស៊ីហោះ” ជាជម្រើសដឹកជញ្ជូនភ្ញៀវទេសចរណ៍ប្រកបដោយនិរន្តរភាព ដោយសារការហោះហើរនេះមិនបង្កជាផលប៉ះពាល់ដល់បរិស្ថាន។

យោងតាមគណៈកម្មាធិការខាងលើបានឱ្យដឹងថា តាក់សុីហោះ (eVTOL) អាចផ្ទុកអ្នកដំណើរបានចាប់ពី៤នាក់ទៅ៥នាក់ និងមានភាពស្រដៀងនឹងឧទ្ធម្ភាគចក្រ។ ប៉ុន្តែ វាខុសគ្នាត្រង់ថា តាក់សុីហោះត្រូវបានដំណើរការដោយថាមពលអគ្គិសនី។

ភ្ញៀវទេសចរណ៍អាចជិះតាក់ស៊ីហោះដើម្បីគយទន់មើលទេសភាពនៅពីលើអាកាស និងភាពទាក់ទាញរបស់ខេត្ត Binh Dinh ព្រមទាំងចូលរួមចំណែកដល់គោលដៅបរិស្ថានរបស់ខេត្តមួយនេះដោយកាត់បន្ថយការបំភាយឧស្ម័នបានយ៉ាងច្រើន បើប្រៀបធៀបទៅនឹងរថយន្តប្រើប្រាស់ឥន្ធនៈ និងរថភ្លើង។

គណៈកម្មាធិការប្រជាជនខេត្ត Binh Dinh បានលើកឡើងថា ការធ្វើតេស្តសាកល្បងដើម្បីវាយតម្លៃលទ្ធភាពនៃការដាក់ឱ្យប្រើប្រាស់តាក់សុីហោះជាការណ៍ចាំបាច់ ហើយក្របខ័ណ្ឌច្បាប់ចាំបាច់ត្រូវតែបង្កើតឡើង។នេះបើយោងតាមការចុះផ្សាយដោយទីភ្នាក់ងារសារពត៌មានវៀតណាម Vnexpress។

បច្ចុប្បន្ន បណ្តាប្រទេសជាច្រើននៅលើពិភពលោក រួមទាំងប្រទេសចិន សហរដ្ឋអាមេរិក អាល្លឺម៉ង់ សិង្ហបុរី និងកូរ៉េខាងត្បូង កំពុងបើកការស្រាវជ្រាវលើការអភិវឌ្ឍន៍ និងការចាប់យកបច្ចេកវិទ្យាតាក់សុីហោះនេះ (eVTOL) ព្រោះវាអាចទាក់ទាញភ្ញៀវទេសចរណ៍ និងមិនបង្កផលប៉ះពាល់លើបរិស្ថាន៕ប្រភព: Vnexpress៕