ដោយ: គង់ លាងហួរ
អន្តរជាតិ: យោងតាមការិយាល័យនយោបាយនៃគណបក្សកុម្មុយនិស្តចិនអះអាងថា ប្រទេសចិនគ្រោងនឹងអនុវត្តន៍គោលនយោបាយរូបិយវត្ថុធូររលុងនៅឆ្នាំក្រោយ រួមជាមួយនឹងគោលនយោបាយសារពើពន្ធសកម្មបន្ថែមទៀតដើម្បីជំរុញកំណើនសេដ្ឋកិច្ច។

ប្រព័ន្ធផ្សព្វផ្សាយរដ្ឋចិន Xinhua បានរាយការណ៍ ដោយដកស្រង់លទ្ធផលចេញពីកិច្ចប្រជុំរបស់មន្ត្រីបក្សកុម្មុយនិស្តចិនថា ប្រទេសចិននឹងផ្តោតលើការពង្រីកតម្រូវការក្នុងស្រុក និងការបង្កើនការប្រើប្រាស់។

ទីភ្នាក់ងារសារព័ត៌មាន Xinhua បានអះអាងថា នៅឆ្នាំ២០២៥ អាជ្ញាធរត្រូវតែប្រកាន់ខ្ជាប់នូវគោលការណ៍នៃការបន្តសម្រេចបានវឌ្ឍនភាព និងការរក្សាបាននូវស្ថិរភាព។ ការិយាល័យនយោបាយបានគូសបញ្ជាក់បន្ថែមថា ទីផ្សារលំនៅដ្ឋាន និងទីផ្សារភាគហ៊ុនត្រូវតែមានស្ថិរភាព។

លោក Xing Zhaopeng អ្នកយុទ្ធសាស្រ្តចិនជាន់ខ្ពស់របស់ធនាគារ ANZ បានអះអាងថា “យើងគិតថា ការប្រកាសនេះចង្អុលបង្ហាញពីការជំរុញវិធានការសារពើពន្ធដ៏រឹងមាំ ការកាត់បន្ថយអត្រាការប្រាក់ទ្រង់ទ្រាយធំ និងការទិញទ្រព្យសកម្មនៅឆ្នាំ២០២៥”។

សេដ្ឋកិច្ចរបស់ប្រទេសចិនបានជួបប្រទះការលំបាកនៅឆ្នាំនេះ ដោយជំរុញឱ្យក្រុមមន្ត្រីបង្កើតគោលនយោបាយចិនចាត់វិធានការយ៉ាងច្រើននៅក្នុងខែកញ្ញា។

ក្នុងនោះ ធនាគារកណ្តាលចិនបានបន្ធូរបន្ថយគោលនយោបាយរូបិយវត្ថុខ្លាំងបំផុតមិនធ្លាប់មានចាប់តាំងពីជំងឺរាតត្បាត ដោយកាត់បន្ថយអត្រាការប្រាក់ និងចាក់បញ្ចូលទឹកប្រាក់១ទ្រីលានយ័នទៅក្នុងប្រព័ន្ធហិរញ្ញវត្ថុ និងវិធានការជាច្រើនផ្សេងទៀត។

ប្រទេសចិនត្រូវបានព្យាករណ៍ថា អាចសម្រេចបានគោលដៅកំណើនសេដ្ឋកិច្ចរបស់ខ្លួនក្នុងរង្វង់៥% នៅឆ្នាំនេះ។ ប៉ុន្តែការព្យាយាមរក្សាបាននូវល្បឿនសេដ្ឋកិច្ចចិននៅឆ្នាំ២០២៥អាចជួបការលំបាក ស្របពេលដែលប្រធានាធិបតីជាប់ឆ្នោតរបស់សហរដ្ឋអាមេរិកលោក ដូណាល់ត្រាំ នឹងត្រលប់មកកាន់សេតវិមានវិញ ដោយលោកបានគំរាមយកពន្ធចំនួន៦០% ឬច្រើនជាងនេះទៅលើការនាំចូលទំំនិញរបស់ចិន។

កាលពីខែវិច្ឆិកាកន្លងទៅ ប្រទេសចិនបានបង្ហាញកញ្ចប់បំណុលចំនួន១០ទ្រីលានយ័ន ដើម្បីបន្ធូរបន្ថយភាពតានតឹងផ្នែកហិរញ្ញប្បទានរបស់រដ្ឋបាលក្នុងតំបន់ និងស្តារស្ថិរភាពកំណើនសេដ្ឋកិច្ច៕ប្រភព: CNN៕

ដោយ: គង់ លាងហួរ
អន្តរជាតិ: កំពូលមហាសេដ្ឋីនៅលើពិភពលោក លោក Elon Musk ដែលជាម្ចាស់របស់បណ្តាក្រុមហ៊ុនខ្នាតយក្សជាច្រើនដូចជា Tesla និង SpaceX ត្រូវបានគេស្គាល់ថា ជាមនុស្សចូលចិត្តប្រកួតប្រជែងជាមួយដៃគូធំៗដ៏មានសក្តានុពលរបស់ខ្លួន។

តួយ៉ាង លោក Musk ធ្លាប់បានបបួលលោក Mark Zuckerberg នាយកប្រតិបត្តិរបស់ក្រុមហ៊ុន Meta មកប្រយុទ្ធគ្នាក្នុងទ្រុង។ លោក Musk បានហៅលោក Jeff Bezos ម្ចាស់ក្រុមហ៊ុន Amazon ថា ជា “មនុស្ស ដែលចម្លងតាមស្នាដៃអ្នកដទៃ ឬ Copycat”ហើយនាពេលថ្មីៗនេះលោកក៏បានប្តឹងលោក Sam Altman ម្ចាស់ក្រុមហ៊ុន OpenAI ផងដែរ។

សកម្មភាពទាំងនេះអាចជារឿងធម្មតាចំពោះការប្រកួតប្រជែងផ្នែកអាជីវកម្មរវាងបណ្តាបុគ្គល ដែលមានទ្រព្យសម្បត្តិច្រើនបំផុត និងជោគជ័យបំផុតមួយចំនួននៅលើពិភពលោក។

ប៉ុន្តែ ករណីនេះបានក្លាយជារឿងគួរឱ្យចាប់អារម្មណ៍ ព្រោះប្រធានាធិបតីជាប់ឆ្នោតអាមេរិកលោក ដូណាល់ ត្រាំ បានប្រកាសតែងតាំងលោក Elon Musk ឱ្យដឹកនាំអង្គភាពជំរុញប្រសិទ្ធភាពការងាររដ្ឋាភិបាលថ្មី ក្រោយពីលោក Elon Musk បានបោះទុនរាប់លានដុល្លារ ដើម្បីជួយគាំទ្រដល់យុទ្ធនាការឃោសនាបោះឆ្នោតរបស់លោកត្រាំ។

ការតែងតាំងនេះនឹងធ្វើឱ្យកំពូលមហាសេដ្ឋីមានទ្រព្យសម្បត្តិច្រើនបំផុតរបស់ពិភពលោករូបនេះកាន់តែមានឥទ្ធិពលខ្លាំងឡើង។

ស្របពេលដែលលោក Elon Musk នឹងមានឥទ្ធិពលខ្លាំងក្រោមរដ្ឋបាលថ្មីរបស់ប្រធានាធិបតីជាប់ឆ្នោតលោកដូណាល់ត្រាំ ក្រុមអ្នកវិភាគបានបង្ហាញការភ័យខ្លាចថា លោក Musk អាចប្រើប្រាស់អំណាចក្នុងជួររដ្ឋាភិបាលដើម្បីផ្តល់ផលប្រយោជន៍ដល់ក្រុមហ៊ុនផ្ទាល់ខ្លួនរបស់លោក និងធ្វើបាបដៃគូប្រជែង។

លោក Musk អាចធ្វើទុក្ខបុកម្នេញលើដៃគូប្រជែងរបស់លោកក្នុងទម្រង់នានាដូចជា ការបើកការស៊ើបអង្កេតលើក្រុមហ៊ុនរបស់ដៃគូប្រជែង ព្រមទាំងបង្កើត ឬកាត់បន្ថយបទប្បញ្ញត្តិ និងប្រគល់កិច្ចសន្យាគម្រោងអភិវឌ្ឍន៍នានារបស់រដ្ឋាភិបាលដើម្បីជាប្រយោជន៍ដល់ក្រុមហ៊ុនផ្ទាល់ខ្លួនរបស់លោក៕ប្រភព: CNN៕

ដោយៈ គង់ សូរិយា

ភ្នំពេញៈ រដ្ឋាភិបាលកម្ពុជា តាមរយៈក្រសួងអភិវឌ្ឍន៍ជនបទបានបច្ចុប្បន្នភាពទិន្នន័យផ្លូវជនបទ សរុបប្រវែង៥០,២៦២គីឡូម៉ែត្រ ក្នុងនោះ ផ្លូវក្រាលកៅស៊ូបានប្រវែង៦,៧២៣គីឡូម៉ែត្រ ផ្លូវបេតុង បានប្រ​វែង១,៨០៤គីឡូម៉ែត្រ ផ្លូវល្បាយក្រួស បានប្រវែង៣១៧០៤គីឡូ​ម៉ែត្រ និងផ្លូវដីស បានប្រវែង១០,០២៩គីឡូម៉ែត្រ។

ព័ត៌មាននេះបានធ្វើបច្ចុប្បន្នភាព ក្រោមអធិបតីភាព លោកឆាយ ឫទ្ធិសែន រដ្ឋមន្ត្រីក្រសួងអភិវឌ្ឍន៍ជនបទ បានអញ្ជើញដឹកនាំកិច្ចប្រជុំ បូកសរុបលទ្ធផលការងារឆ្នាំ២០២៤ និងទិសដៅការងារឆ្នាំ២០២៥ របស់កម្មវិធីទី១ របស់ក្រសួងអភិវឌ្ឍន៍ជនបទ “ការអភិវឌ្ឍហេដ្ឋារចនាសម្ព័ន្ធរូបវន្ដ និងគមនាគមន៍ជនបទប្រកបដោយភាពធន់”ដោយមានការអញ្ជើញចូលរួមពីមន្រ្តីពាក់ព័ន្ឋជាច្រើន។

យោងតាមរបាយការណ៍នាយកដ្ឋានជំនាញ គិតត្រឹមឆ្នាំ២០២៤ ក្រសួងអភិវឌ្ឍន៍ជនបទបានឲ្យដឹងទៀតថា ក្នុងឆ្នាំ២០២៤នេះ សមិទ្ធផលនៃការស្ថាបនា លើកកម្រិតហេដ្ឋារចនាសម្ព័ន្ធផ្លូវជនបទ សម្រេចបានផ្លូវ២៧១ខ្សែ ក្នុងនោះសាងសង់ និងកែលម្អផ្លូវក្រាលកៅស៊ូពីរជាន់៩៤០,៧១ គីឡូម៉ែត្រ សាងសង់ផ្លូវក្រាលបេតុងបានប្រវែង១៦៤,២១គីឡូម៉ែត្រ សាងសង់ផ្លូវក្រាលល្បាយក្រួស បានប្រវែង២១៨,០៥គីឡូម៉ែត្រ សាងសង់ស្ពានបេតុង បានចំនួន១២កន្លែង ស្មើនឹងប្រវែង៦៧៥ម៉ែត្រ ព្រមទាំងសំណង់សិល្បការ្យ គ្រប់ប្រភេទជាច្រើនទៀត ព្រមទាំងការថែទាំ និងជួសជុលផ្លូវបានចំនួន៤០៤ខ្សែ ប្រវែងសរុប៤,២៧២គីឡូម៉ែត្រ និងសំណង់សិល្បការ្យគ្រប់ប្រភេទ។

លោករដ្ឋមន្ត្រីបានថ្លែងថា ការអភិវឌ្ឍហេដ្ឋារចនាសម្ព័ន្ធរូបវន្ត និងគមនាគមន៍ជនបទប្រកបដោយភាពធន់ គឺជាបុរេលក្ខខណ្ឌដ៏ចាំបាច់ដើម្បីចូលរួមចំណែកសម្រេចនូវយុទ្ធសាស្រ្តបញ្ចកោណ ដំណាក់កាលទី ១ របស់រាជរដ្ឋាភិបាល ក្រោមការដឹកនាំប្រកបដោយគតិបណ្ឌិតរបស់ សម្ដេចមហាបវរធិបតី ហ៊ុន ម៉ាណែត នាយករដ្ឋមន្ដ្រី ក្នុងគោលដៅសម្រេចឱ្យបាននូវចក្ខុវិស័យកម្ពុជា ជាប្រទេសមានប្រាក់ចំណូលមធ្យមកម្រិតខ្ពស់នៅឆ្នាំ២០៣០ និងជាប្រទេសមានចំណូលខ្ពស់នៅឆ្នាំ២០៥០។

លោករដ្ឋមន្ត្រីបានដាក់ចេញនូវទិសដៅបន្តបន្ថែម ដូចជា

១.ត្រូវបន្តពង្រីកវិសាលភាព និងលើកកម្រិតគុណភាពហេដ្ឋារចនាសម្ព័ន្ធផ្លូវជនបទ។ ២.ត្រូវបន្តពង្រីកវិសាលភាពការថែទាំហេដ្ឋារចនាសម្ព័ន្ធផ្លូវជនបទ ដើម្បីឆ្លើយតបទៅនឹងទំហំតម្រូវការជាក់ស្តែងរបស់ប្រជាពលរដ្ឋ។ ៣. បន្តសិក្សាស្វែងរកបច្ចេកវិទ្យាថ្មីៗ ដូចជាការសិក្សាធ្វើបច្ចុ​ប្បន្នភាពលើបទដ្ឋានបច្ចេកទេស ការសិក្សារកវត្ថុធាតុដើមថ្មី (Stabilizer)ជាដើម។

លោកឆាយ រិទ្ឋីសែនបានបញ្ជាក់ថា “សមិទ្ធផលទាំងនេះសម្រេ​ចទៅបាន ក៏ដោយសារប្រទេសកម្ពុជា មានសុខសន្តិភាពពេញលេញ ស្ថិរភាពនយោបាយ និងការដឹកនាំដ៏ត្រឹមត្រូវរបស់សម្តេចអគ្គមហាសេនាបតីតេជោ ហ៊ុន សែនអតីតនាយករដ្ឋមន្ត្រី និងការដឹកនាំដ៏ឈ្លាសវៃរបស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា ព្រមទាំងការចូលរួមពីសំណាក់មន្ត្រីក្រសួងអភិវឌ្ឍន៍ជនបទគ្រប់លំដាប់ថ្នាក់ និងការចូលរួមរបស់ប្រជាជនទាំង​មូលផងដែរ”៕