ដោយៈ គង់ សូរិយា

ភ្នំពេញៈ លោកឧបនាយករដ្ឋមន្ត្រីស៊ុន ចាន់ថុល អនុប្រ​ធា​

នទី១នៃក្រុមប្រឹក្សាអភិវឌ្ឍន៍កម្ពុជា បានលើកឡើងអំពីភាពចាំបាច់ ក្នុងការពិនិត្យលទ្ធភាពបញ្ចុះតម្លៃ ដឹកជញ្ជូនទាំងផ្លូវគោក ផ្លូវទឹក និងភស្តុភារកម្មពាក់ព័ន្ធ ដោយធានាឱ្យបាននូវប្រសិទ្ធភាព សំដៅបង្កើនឧត្តមភាពប្រកួតប្រ​ជែងរបស់កម្ពុជា។

លោកបានលើកឡើងបែបនេះ ក្នុងឱកាសអនុញ្ញាតជូន លោកហាក់ លាងហ៊ ប្រធានសមាគមភស្តុភារកម្មកម្ពុជា (Cambodia Logistics Association-CLA) និងគណៈប្រតិភូអម ចូលជួបសម្តែងការគួរសម និងពិភាក្សាការងារ។

ក្នុងជំនួបនោះ លោកប្រធានសមាគមភស្តុភារកម្មកម្ពុជា បានជម្រាបជូនលោកឧបនាយករដ្ឋមន្រ្តី អំពីគោលបំណង និងសកម្មភាពការងាររបស់សមាគម ជាពិសេសបង្ហា​ញសមាសភាពថ្មី របស់ក្រុមប្រឹក្សាភិបាលនាអណត្តិទី៩ ឆ្នាំ២០២៤-២០២៦ ដែលទើបជ្រើសតាំងក្នុងចំណោម សមាជិកសមាគមទាំងអស់ប្រមាណ១៤០រូប។

ភ្ជាប់ក្នុងឱកាសនៃជំនួបនេះ លោកឧបនាយករដ្ឋមន្ត្រី បានផ្ដល់អនុសាន៍ណែនាំ មួយចំនួនជូនដល់សមាគម ក៏ដូចជាបានលើកបង្ហាញអំពីផែនការ គ្រប់ជ្រុងជ្រោយស្ដីពី ប្រព័ន្ធដឹកជញ្ជូនអន្តរមធ្យោបាយ និងភស្តុភារកម្ម ២០២៣-២០៣៣ ដែលរាជរដ្ឋាភិបាលបានកំណត់គោលដៅ១០ឆ្នាំ ក្នុងការអភិវឌ្ឍនគម្រោងចំនួនសរុប១៧៤ ជាមួយតម្រូវការថវិកាសរុបប្រមាណ ៣៦.៦ពាន់លានដុល្លារអាមេរិក។

បច្ចុប្បន្ន មានគម្រោងមួយចំនួន ស្ថិតក្នុងផែនការមេនេះកំពុងដំណើររួចមកហើយ រួមមាន គម្រោងសាងសង់ផ្លូវល្បឿនលឿន-ភ្នំពេញបាវិត គម្រោងព្រែកជីកហ្វូណនតេជោ ហើយគម្រោងមួយចំនួនទៀត មានលក្ខណៈជាគម្រោងផ្នែកទន់ ដែ​លផ្តោតទៅលើការសម្រួល បែបបទនីតិវិធីកិច្ចសម្រួលពាណិជ្ជកម្មឆ្លងកាត់ព្រំដែនជាដើម។

បន្ទាប់ពីទទួលបានអនុសាសន៍ ណែនាំដោយផ្ទាល់របស់លោកឧបនាយករដ្ឋមន្ត្រី រួចមក លោក ហាក់ លាងហ៊ ក្នុងនាមប្រធានសមាគមភស្តុភារកម្មកម្ពុជា បានថ្លែងអំណរអរគុណយ៉ាងជ្រាលជ្រៅ ព្រមទាំងទទួលយកអនុសាសន៍ណែនាំទាំងអស់ ទៅចូលរួមអនុវត្តន៍ឱ្យមានប្រសិទ្ធភាព។

សមាគមភស្តុភារកម្មកម្ពុជា ត្រូវបានបង្កើតកាលពីឆ្នាំ២០០៤ ដែលពីមុនមានឈ្មោះថា សមាគមភ្នាក់់ងារបញ្ជូនទំនិញកម្ពុជា ហៅកាត់ថាCAMFFA និងក្រោយមកទៀតត្រូវបានដូរឈ្មោះ ជាសមាគមភស្តុភារកម្មកម្ពុជា(CLA)។ សមាគមភស្តុភារកម្មកម្ពុជានេះ បង្កើតឡើងក្នុងគោលបំណង ដើម្បីពង្រឹងនិងពង្រីកទំនាក់ទំនង និងកិច្ចសហប្រតិបត្តិការ ទាំងក្នុងនិងក្រៅប្រទេសក្នុងវិស័យភស្តុភារកម្ម និងដឹកជញ្ជូន៕

ដោយ: គង់ លាងហួរ

អន្តរជាតិ: វិស័យបច្ចេកវិទ្យានៅលើពិភពលោក កំពុងបោះពួយទៅមុខឥតឈប់ឈរ។ ជាក់ស្ដែង វិស័យទេសចរណ៍ផ្លូវអាកាសបានរីកចម្រើន រាប់ចាប់តាំងពីការជិះយន្តហោះពា​ណិជ្ជកម្មធម្មតា រហូតដល់សេវាកម្មជិះគ្រាប់រ៉ុក្កែត ទៅទស្សនាភពផ្សេងៗនៅក្នុងលំហទីអវកាស។

ក្នុងនោះ ក្រុមហ៊ុនចិន Deep Blue Aerospace បានប្រកាសថា ក្រុមហ៊ុនគ្រោងលក់សំបុត្រ ជិះរ៉ុក្កែតចំនួន២សន្លឹកដំបូង ដែលនឹងនាំអ្នកដំណើរ ទៅកាន់ទីអវកាសនៅឆ្នាំ២០២៧ ដោ​យគិតតម្លៃ១,៥លានយ័ន(២១ម៉ឺនដុល្លារអាមេរិក) ដើម្បីទទួលបានបទពិសោធន៍ដ៏អស្ចារ្យនេះ។

ក្រុមហ៊ុន Deep Blue Aerospace គ្រោងនឹងដាក់លក់សំបុត្រនៅម៉ោងសកល1000 GMT នាថ្ងៃ​ព្រហស្បតិ៍នេះ ហើយ​ក្រុមហ៊ុន គ្រោង​នឹង​ដាក់​លក់​បន្ថែម​ទៀត ​នៅ​ខែ​វិច្ឆិកាខាងមុខ។អ្នកដំណើរនឹងត្រូវជិះ នៅលើជើងហោះហើរSuborbital ដែលមានន័យថា រ៉ុក្កែតនឹងបាញ់ទៅដល់ទីអវកាស។ ប៉ុន្តែរ៉ុក្កែតនឹងមិនចូលទៅក្នុងគន្លងនោះទេ។

ឧស្សាហកម្មដឹកជញ្ជូនអ្នកដំណើរ បែបពាណិជ្ជកម្មទៅកាន់ទីអវកាសរបស់ប្រទេសចិន កំពុងស្ថិតក្នុងដំណាក់កាលដំបូងរបស់ខ្លួន ខណៈក្រុមហ៊ុនអាមេរិក ដូចជា ក្រុមហ៊ុន Blue Origin និងក្រុមហ៊ុន SpaceX បាននាំមុខមុន។

លើសពីនេះ បណ្តាក្រុមហ៊ុន​អវកាសចិន​ផ្សេង​ទៀត ​ក៏បាន​ប្រកាស​ពី​គម្រោង​ឈានជើងចូល ​ក្នុង​វិស័យ​ទេសចរណ៍​អវកា សផងដែរ។

កាល​ពី​ខែ​ឧសភា ក្រុមហ៊ុន CAS Space ដែល​គ្រប់គ្រង​ដោយ​រដ្ឋាភិបាលចិន ​បាន​បង្ហើបឱ្យដឹង​ថា ​ខ្លួន​គ្រោងនឹង​ចាប់​ផ្តើម​ជើង​ហោះ​ហើរ ​ទេសចរណ៍​អវកាស​នៅ​ឆ្នាំ២០២៨។

ក្រុមហ៊ុនអវកាសចិន Deep Blue Aerospace គ្រោងនឹងទាញយកគ្រាប់រ៉ុក្កែតដឹកជញ្ជូន ចេញពីគន្លងគោចរក្នុងត្រីមាសទីមួយនៃឆ្នាំ២០២៥ ព្រោះការប្រើប្រាស់រ៉ុក្កែត ដែលធ្លាប់បាញ់បង្ហោះរួច មានសារៈសំខាន់ណាស់ ក្នុងការកាត់បន្ថយថ្លៃដើមក្នុងការបាញ់បង្ហោះ ទៅកាន់ទីអវកាសម្តងទៀត៕ប្រភព: Reuters៕

ដោយៈ គង់ សូរិយា

       ភ្នំពេញៈ លោកស៊ុន ចាន់ថុល ឧបនាយករដ្ឋមន្រ្តី អនុប្រ​ធានទី១ ក្រុមប្រឹក្សាអភិវឌ្ឍន៍កម្ពុជា និងលោកPark Jung Wook ឯកអគ្គរដ្ឋទូតកូរ៉េប្រចាំនៅកម្ពុជា បានដឹកនាំកិច្ចសន្ទនារវាងរដ្ឋ និងវិស័យឯកជនកម្ពុជា -កូរ៉េខាងត្បូងលើកទី១ ដោយមានការចូលរួមពីតំណាងក្រសួង-ស្ថាប័នពាក់ព័ន្ធចំនួន២០, ទីភ្នាក់ងារជំរុញពាណិជ្ជកម្ម និងវិនិយោគកូរ៉េ (KOTRA) ទីភ្នាក់ងារសហប្រតិបត្តិការអន្ដរជាតិកូរ៉េ (KOICA) សភាពាណិជ្ជកម្មកូរ៉េនៅកម្ពុជា (KOCHAM) និងវិស័យឯកជនជាច្រើនរូប។

កិច្ចសន្ទនាផ្លូវការនេះជាបៀបវារៈថ្មី ដែលរៀបចំឡើងក្រោ​មគំនិតផ្ដួចផ្ដើមរបស់ថ្នាក់ដឹកនាំ នៃប្រទេសទាំងពីរ គឺសម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជា និងលោកយូន ស៊កយ៉ល ប្រធានាធិបតីនៃសាធារណរដ្ឋកូរ៉េ ក្នុងជំនួបកាលពីថ្ងៃទី១៦ ខែឧសភា ឆ្នាំ២០២៤ នៅសាធារណរដ្ឋកូរ៉េ។

កិច្ចសន្ទនានេះ មានគោលបំណងពង្រឹង និងជំរុញកិច្ចសហប្រតិបត្តិការសេដ្ឋកិច្ច, ពាណិជ្ជកម្ម, និងការវិនិយោគ ព្រមទាំងធ្វើឱ្យប្រសើរឡើង នូវទំនាក់ទំនងសេដ្ឋកិច្ច បរិយាកាសវិនិយោគ និងកសាងជំនឿទុកចិត្ត ពីសំណាក់សហគមន៍ធុរកិច្ចកូរ៉េ សំដៅជំរុញការវិនិយោគបន្ថែមទៀតមកកម្ពុជា។

លោកឧបនាយករដ្ឋមន្ត្រីស៊ុន ចាន់ថុលបានថ្លែងថា កិច្ចសន្ទនានេះបានឆ្លុះបញ្ចាំង អំពីការយកចិត្តទុកដាក់របស់រាជរដ្ឋាភិបាលកម្ពុជា ដើម្បីស្ដាប់នូវរាល់កង្វល់របស់វិនិយោគិនកូរ៉េ តាមរយៈការប្រើប្រាស់របៀបវារៈ ផ្លូវការជាទៀងទាត់សំដៅធានាដល់ការតាមដាន និងដោះស្រាយបញ្ហាប្រឈមរបស់វិនិយោគិនជាអាទិភាព។

លើសពីនេះ លោកឧបនាយករដ្ឋមន្រ្ដី ក៏បានធ្វើបច្ចុប្បន្នភាពថ្មីនូវព័ត៌មាន ពាក់ព័ន្ធនឹងនិន្នាការវិនិយោគ នៅកម្ពុជាមានជាអាទិ៍ ស្ថានភាពនៃរំហូរវិនិយោគ និងវឌ្ឍនភាពនៃការដាក់ឱ្យដំណើរការសាកល្បង នូវប្រព័ន្ធគ្រប់គ្រងគម្រោងវិនិយោគកម្ពុជា (cdcIPM) ជូនភាគីមិត្តផងដែរ។

ជាមួយគ្នានេះឯកអគ្គរដ្ឋទូតកូរ៉េ បានបង្ហាញនូវសេចក្ដីសោមនស្សរីករាយក្រៃលែង ដែលបានសហការរៀបចំកិច្ចសន្ទនានេះក្នុងគោលដៅរួមគ្នាពិនិត្យ និងពិភាក្សាអំពីបរិយា​កាសវិនិយោគនៅកម្ពុជា ក៏ដូចជា ចូលរួមចំណែកក្នុងការកែលម្អបរិស្ថានធុរកិច្ចសំដៅពង្រឹង និងពង្រីកវត្តមានរបស់សហគ្រាសកូរ៉េឱ្យមកបណ្តាក់ទុនវិនិយោគ នៅលើទឹកដីកម្ពុជាបន្ថែ​មទៀត។

ស្របគ្នានេះ លោកឯកអគ្គរដ្ឋទូតបានថ្លែងអំណរគុណជូនចំពោះ លោកឧបនាយករដ្ឋមន្រ្ដី ដែលបានពន្យល់យ៉ាងក្បោះ​ ក្បាយ អំពីស្ថានភាពវិនិយោគនៅកម្ពុជា ហើយលោកមានជំនឿចិត្តយ៉ាងមុតមាំថា កិច្ចសហប្រតិបត្តិការសេដ្ឋកិច្ចទ្វេភាគីនឹងកាន់តែមានភាពស្រស់បំព្រងគួរជាទីមោទនៈ៕

ដោយ: គង់ លាងហួរ

អន្តរជាតិ: កំណើនសេដ្ឋកិច្ច របស់ប្រទេសមហាអំណាចធំចំនួន២នៅលើពិភពលោក រួមមាន សហរដ្ឋអាមេរិក និងចិន ជាតួលេខ ដែលមនុស្សជាច្រើន បានតាមដានយ៉ាងយកចិត្តទុក​ដាក់​ព្រោះថា ប្រសិនបើសេដ្ឋកិច្ចរបស់អាមេរិក និងចិនដាំក្បា​លចុះ នោះសេដ្ឋកិច្ចរបស់ពិភពលោក ក៏ជួបប្រទះបញ្ហាផងដែរ។

ផលទុនជាតិសរុប (GDP) របស់សហរដ្ឋអាមេរិកបានកើនឡើង នៅក្នុងអត្រាប្រចាំឆ្នាំ៣ភាគរយ នៅក្នុងត្រីមាសទីពីរនៃឆ្នាំ២០២៤។ កាលពីត្រីមាសទីមួយ កំណើន GDP របស់អាមេរិក បានកើនឡើង១,៦ភាគរយ។

GDP របស់សហរដ្ឋអាមេរិកត្រូវបានព្យាករណ៍ថា នឹងកើនឡើង ក្នុងអត្រាប្រចាំឆ្នាំ១,៩ភាគរយ នៅត្រីមាសទី៣។ នេះ​បើ​យោងតាម​​សេដ្ឋវិទូចំនួន៣៦រូប ​ដែល​ត្រូវបាន​ស្ទង់មតិ​ដោយ​ធនាគារ​កណ្តាល​អាមេរិក ប្រចាំទីក្រុង Philadelphia។

ជាមួយគ្នានេះ ផលទុនជាតិសរុប(GDP) របស់សហរដ្ឋអាមេរិកនៅត្រីមាសទី៤ ត្រូវបានព្យាករណ៍ថា នឹងកើនឡើងក្នុងអត្រាប្រចាំឆ្នាំ១,៧ភាគរយ។ ជារួម ក្រុមសេដ្ឋវិទូបានព្យាករណ៍ថា សេដ្ឋកិច្ចអាមេរិកនៅឆ្នាំ២០២៤ នឹងកើនឡើងក្នុងអត្រាប្រចាំឆ្នាំជាមធ្យម ចាប់ពី២,៥ភាគរយទៅ២,៦ភាគរយ។

ក្រុមសេដ្ឋវិទូរំពឹងថា អត្រាអ្នកគ្មានការងារធ្វើ នៅសហរដ្ឋអាមេរិក នឹងស្ថិតក្នុងរង្វង់៤,១ភាគរយនៅឆ្នាំ២០២៤ និងកើនឡើងដល់ក្នុងរង្វង់៤,៣ភាគរយ នៅឆ្នាំ២០២៥ខាងមុខ។

ដោយឡែក ក្រុមហ៊ុនប្រឹក្សាយោបល់ហិរញ្ញវត្ថុ Deloitte ដែលមានទីស្នាក់ការកណ្តាល នៅទីក្រុងឡុងដ៍ ប្រទេសអង់​គ្លេសបានអះអាងថា សេដ្ឋកិច្ចអាមេរិក នៅតែមានភាពរឹងមាំ ទោះបីជាមានការព្រួយបារម្ភជាប់រហូត ជុំវិញភាពធន់នៃកំណើ​ន និងគោលនយោបាយអត្រា​ការប្រាក់យ៉ាងណាក្តី។

ក្រុមហ៊ុនប្រឹក្សាយោបល់ហិរញ្ញវត្ថុDeloitte បានបង្ហាញសុទិដ្ឋិនិយមថា ក្រុម​មន្ត្រីបង្កើតគោលនយោបាយអាមេរិកមានលទ្ធភាពអូសទាញ អត្រាអតិផរណា ឱ្យស្ថិតក្រោមការគ្រប់​គ្រងបាន ដោយមិនបង្កឱ្យមានវិបត្តិសេដ្ឋកិច្ច។

ការរីកដុះដាលនៃការសាងសង់រោងចក្រ នឹងបន្តជំរុញសក្តានុពលសេដ្ឋកិច្ច ក្នុងរយៈពេលប៉ុន្មានឆ្នាំខាងមុខ។ ក្នុងរយៈពេលខ្លី ការបញ្ចុះអត្រាការប្រាក់ របស់ធនាគារកណ្តាលអាមេរិក (Fed) អនុញ្ញាតឱ្យគ្រួសារនានា មានលទ្ធភាពខ្ចីប្រាក់បានកាន់តែច្រើន និងគាំទ្រដល់កំណើន នៃការចំណាយលើការប្រើប្រាស់។

Deported រំពឹងថា សេដ្ឋកិច្ចអាមេរិក នឹងកើនឡើងក្នុងរង្វង់២,៧% នៅឆ្នាំនេះ ដែលស្រដៀងគ្នានឹងការព្យាករណ៍ខាងលើ។ ជារួម ស្ថានភាពសេដ្ឋកិច្ចអាមេរិក នៅតែមានភាពវិជ្ជមាន។ តួយ៉ាងការចំណាយរបស់អ្នកប្រើប្រាស់ បានបន្តកើនឡើងលើសការរំពឹងទុក និងត្រូវបានព្យាករណ៍ថា នឹងកើនឡើង២,៤​ភាគរយ ក្នុងឆ្នាំ២០២៤ ធៀបនឹងការកើនឡើង២,២%កាលពីឆ្នាំមុន។

ដោយឡែក ការវិនិយោគអាជីវកម្ម ត្រូវបានព្យាករណ៍ថា នឹងកើនឡើង៤,២% ក្នុងឆ្នាំនេះ ធ្លាក់ចុះបន្តិចធៀបនឹងកំណើន៤,៥% ដែលបានកត់ត្រាក្នុងឆ្នាំ២០២៣។

រដ្ឋាភិបាលអាមេរិក ក្រោមរដ្ឋបាលរបស់លោកប្រធានាធិ​បតី ចូ បៃដិនបានបង្កើតច្បាប់កាត់បន្ថយអតិផរណា(IRA) និងការលើកទឹកចិត្ត ក្នុងការផលិតបន្ទះឈីប  (CHIPS) និងច្បាប់វិទ្យាសាស្រ្ត។

ច្បាប់ទាំងនេះត្រូវបានព្យាករណ៍ថា នឹងបន្តជំរុញឱ្យការវិនិយោគលើគ្រឿងម៉ាស៊ីន និងឧបករណ៍មានការកើនឡើង ហើ​យក្រុមហ៊ុនបច្ចេកវិទ្យា បានបន្តបោះទុនវិនិយោគ ទៅលើផ្នែកទន់ និងកម្មសិទ្ធិបញ្ញាផ្សេងទៀតដូចជា បញ្ញាសិប្បនិម្មិត។

ចំណែក កំណើននៃការនាំចេញត្រូវបានគេរំពឹងថា នឹងថយ​ចុះមកត្រឹម២,២% ក្នុងឆ្នាំ២០២៤ មុនពេលស្ទុះងើបឡើងវិញនៅឆ្នាំបន្ទាប់ ខណៈការនាំចូលត្រូវបានព្យាករណ៍ថា នឹងកើនឡើង៣,៨% នៅឆ្នាំនេះ។ ការចំណាយរបស់រដ្ឋាភិបាលត្រូវបានព្យាករណ៍ថា នឹងកើនឡើង២,៩% នៅឆ្នាំ២០២៤។

ទោះជាយ៉ាងណា ជម្លោះ​នៅ​តំបន់អ៊ុយក្រែន និង​តំបន់មជ្ឈិមបូព៌ា ​កំពុង​ស្ថិត​ក្នុង​ដំណាក់​កាល ​ដ៏មានហានិភ័យ។ជម្លោះទាំង២ ស្ថិតនៅក្នុងតំបន់ផលិតកម្មប្រេងសំខាន់ៗ។ ដូច្នេះ តម្លៃប្រេងនឹងបន្តហក់ឡើងខ្ពស់ ប្រសិនបើជម្លោះផ្ទុះរាលដាលកាន់តែធំ។

លើសពីនេះ គោលនយោបាយពាណិជ្ជកម្ម កំពុងស្ថិតលើសមរភូមិនៃការប្រកួតប្រជែង ខណៈការបោះឆ្នោតប្រធានា​ធិបតីអាមេរិក កំពុងខិតជិតមកដល់។ បេក្ខជនមកពីគណបក្សធំៗទាំងពីរ រួមមានលោកអតីតប្រធានាធិបតីដូណាល់ ត្រាំ និងលោកស្រីអនុប្រធានាធិបតី Kamala Hariss បានត្រៀមខ្លួនក្នុងការបន្តប្រមូលយកពន្ធខ្ពស់ លើការនាំចូលទំនិញពីបរទេស។

គោលនយោបាយទាំងនេះ អាចនឹងជះផលប៉ះពាល់ដល់ក្រុមហ៊ុន និងអ្នកប្រើប្រាស់នៅសហរដ្ឋអាមេរិក ដោយសារការកើនឡើងនៃអតិផរណា។

ចំណែក ស្ថានភាពសេដ្ឋកិច្ចរបស់ចិន ដែលជាប្រទេសមហាអំណាចសេដ្ឋកិច្ចលេខ២ នៅលើពិភពលោកកំពុងបន្តស្ថិតក្នុងភាពមិនប្រាកដប្រជា។

កាលពីថ្ងៃទី​១៨ ខែតុលា ការិយាល័យ​ជាតិ​ស្ថិតិចិន​ បាន​ប្រកាសនូវ​កំណើនសេដ្ឋកិច្ច​ ប្រចាំត្រីមាសទី​៣ ឆ្នាំ​២០២៤ ដែល​បាន​កើនឡើងចំនួន​៤,៦%។ តួលេខ​នេះមានកម្រិត​លើសបន្តិច ពី​ការប៉ាន់ស្មានរបស់ក្រុមសេដ្ឋវិទូ ដែលរំពឹងថា នឹងកើនឡើង៤,៥%។

យ៉ាងណាមិញ អត្រាកំណើនសេដ្ឋកិច្ច​ចិន ប្រចាំត្រីមាសទី​៣ មានកម្រិតទាបជាង​ត្រីមាសទី២ ដែលបានកើនឡើងក្នុងរង្វង់៤,៧%។ នៅក្នុងរយៈពេល១ឆ្នាំកន្លះចុងក្រោយនេះ សេដ្ឋកិច្ច​ចិន ពុំដែលជួបប្រទះកំណើនសេដ្ឋកិច្ចទាប​ដូច្នេះទេ។

ការិយាល័យជាតិស្ថិតិចិនបានទទួលស្គាល់ថា​ សេដ្ឋកិច្ច​ចិន​កំពុងជួបប្រទះ នឹងឧបសគ្គធំៗជាច្រើន ដូចជា ភាពមិនអំណោយ​ផលនៃបរិបទខាងក្រៅ​​ ដែលបង្កការរាំងស្ទះដល់ការនាំចេញទំនិញរបស់ប្រទេសចិន​។

ទន្ទឹមគ្នានេះ​ ផ្អែកតាមតួលេខផ្លូវការ ​របស់ការិយាល័យជាតិស្ថិតិចិន​ គេសង្កេតឃើញមាន​ចំណុចវិជ្ជមានមួយចំនួន។ តួយ៉ាង ការលក់រាយក្នុងស្រុក ​បាន​កើនឡើងប្រមាណ៣,២% នៅក្នុងខែ​កញ្ញា ខណៈកាលពីខែសីហា ការលក់រាយបានកើនឡើងត្រឹមតែ២,១%ប៉ុណ្ណោះ។

អត្រាកំណើននៃការលក់រាយ​នេះ ជាសញ្ញាបង្ហាញអំពី​ភាពវិជ្ជមាន​ប្រសើរឡើង​ ក្នុងការ​​ចំណាយ​ក្នុងស្រុករបស់ប្រជាជនចិនជាទូទៅ និងជាក្តីសង្ឃឹម​ បន្ទាប់ពីមានការព្រួយបារម្ភនាពេលកន្លងមក​។

ក្នុងរយៈពេលប៉ុន្មានសប្តាហ៍​ចុងក្រោយនេះ រដ្ឋាភិបាលចិ​ន បានដាក់ចេញវិធានការជាបន្តបន្ទាប់ ដើម្បី​ចាក់បញ្ចូលសាច់ប្រាក់ទៅក្នុងចរន្ត​សេដ្ឋកិច្ច​​ និងជួយជាពិសេសដល់​វិស័យអច​ល​នទ្រព្យ ដែល​កំពុងបន្តស្ថិតក្នុងភាពជាប់គាំង​។

ជាមួយគ្នានេះ ធនាគារកណ្តាល​ចិន(PBOC) បានទាញទម្លាក់អត្រាការប្រាក់គោល សម្រាប់ប្រាក់កម្ចី​អចលនទ្រព្យ។ បន្ថែមពីនេះ អាជ្ញាធរចិនបានប្រកាសបោះទុនវិនិយោគ ប្រមា​ណ៤ទ្រីលានយ័ន ដើម្បីជួយដល់​គម្រោង​សំណង់​អចលនទ្រព្យដែល​ស្ថិតនៅទ្រឹង ព្រមទាំងបានលុបចោល​នូវ​ការហា​មឃាត់​ប្រជាជន មិនឱ្យទិញផ្ទះលើសពី២កន្លែងជាដើម។

លោក Benson Wu សេដ្ឋវិទូនៅ​ធនាគារ Bank of America Global Research បានលើកឡើងថា វិធានការថ្មីៗទាំងនេះ ជាចំណុចចាប់ផ្តើមដ៏ល្អ ក្នុងការ​ជំរុញសន្ទុះសេដ្ឋកិច្ច​ចិន។ ប៉ុន្តែ អាជ្ញាធរចិន នៅមិនទាន់លំអិតឱ្យបានច្បាស់នៅឡើយ អំពីទំហំនៃការចំណាយ​។ ការណ៍នេះបានបង្កការលំបាក ក្នុងការវិភាគ​ឱ្យបានច្បាស់ថា តើចំណាត់ការទាំងនេះ នឹងមានប្រសិទ្ធភាពកម្រិតណា?។

វិស័យអចលនទ្រព្យ ដែលជាស​រ​សរស្តម្ភដ៏សំខាន់មួយនៃសេដ្ឋកិច្ច​​ចិន នៅតែបន្តជាប់ផុងក្នុងវិបត្តិ​នៅឡើយ ដោយ​សារអ្នកអភិវឌ្ឍន៍កំពុងជំពាក់បំណុលច្រើន គម្រោងសំណង់ត្រូវបានបោះបង់ចោល ហើយ​តម្លៃផ្ទះក៏បានដាំក្បាលចុះផងដែរ។

យ៉ាងណាមិញ កាលពីខែ​កញ្ញា​​កន្លងទៅ ក្នុងចំណោមតម្លៃផ្ទះ​ថ្មី​​នៅតាមទីក្រុងធំៗ និងទីក្រុងខ្នាតមធ្យមទាំង​៧០ នៅទូទាំ​ងប្រទេសចិន គេសង្កេតឃើញមានតែ​ទីក្រុងចំនួន២ប៉ុណ្ណោះ ដែល​តម្លៃផ្ទះ បានកើនឡើងបន្តិចបន្តួច​។ ក្រៅពីនោះ តម្លៃផ្ទះនៅតាមទីក្រុងភាគច្រើនបានធ្លាក់ចុះ ឬស្ថិតក្នុងសភាពទ្រឹង។

ចំណែក លោកZhang Zhiwei ​អ្នកវិភាគនៅ​ក្រុមហ៊ុន Pinpoint Asset Management បានលើកឡើងថា ផ្អែក​តាមតួលេខ​កំណើនសេដ្ឋកិច្ចចិន ប្រចាំត្រីមាសទី​៣  គោលដៅសេដ្ឋកិច្ច​ក្នុងរង្វង់៥%​នៅឆ្នាំ​នេះ ដែល​​រដ្ឋាភិបាលចិនបានកំណត់នោះ ប្រហែលជាមិនអាចសម្រេចបាននោះទេ​។

ប៉ុន្តែទោះជាយ៉ាងណា ក្រុមអ្នកវិភាគកំពុងរង់ចាំមើល​លទ្ធផល​បោះឆ្នោត​ ប្រធានាធិបតីសហរដ្ឋអាមេរិក នៅថ្ងៃទី៥ ខែវិច្ឆិកាខាងមុខ ព្រោះលទ្ធផលនេះ អាចកំណត់ឥទ្ធិពល​មកលើ​សេដ្ឋកិច្ចរបស់ប្រទេសចិន៕ប្រភព: Deloitte៕

ដោយ: គង់ លាងហួរ

អន្តរជាតិ: បណ្តាអ្នកអភិវឌ្ឍន៍មួយចំនួន នៅទីក្រុងហុងកុង កំពុងបង្កើនតម្លៃអចលនទ្រព្យឡើងវិញបន្តិចម្តងៗ ខណៈទំនុកចិត្ត លើទស្សនវិស័យទីផ្សារលំនៅដ្ឋាន របស់ទីក្រុងមានការកើនឡើង ហើយការដាក់ចេញវិធានការមួយចំនួនបានជំរុញឱ្យអ្នកទិញឈានជើងចូលក្នុងទីផ្សារ។

តួយ៉ាងកាលពីថ្ងៃច័ន្ទ ទី២១ ខែតុលា ក្រុមហ៊ុន Chinachem Group បានដំឡើងតម្លៃផ្ទះល្វែងនៅឯគម្រោង Echo House ដែលមានផ្ទះសរុបចំនួន១៩៨យូនីត ស្ថិតនៅសង្កាត់ Cheung Sha Wan ​បន្ទាប់ពីអ្នកទិញចំនួន៥.៥០០នាក់ បានសម្រុ​កមកចុះឈ្មោះ។

ផ្ទះចំនួន៥០យូនីត ដែលត្រូវបានបើកលក់ នៅក្នុងជុំទី២កាលពីថ្ងៃច័ន្ទ មានតម្លៃជាមធ្យមចំនួន១៥.៤៤០ដុល្លារ ហុងកុង(ប្រហែល១៩៨៧ដុល្លារអាមេរិក) ក្នុងមួយហ្វីតការ៉េ កើនឡើង៣,៧% ធៀបនឹងផ្ទះចំនួន៥០យូនីត ដែលត្រូវបានបើកលក់ដំបូងក្នុងជុំទី១ កាលពីថ្ងៃសប្តាហ៍មុន ដែលមានតម្លៃចំនួន១៤.៨៨៨ដុល្លារហុងកុង ក្នុងមួយហ្វីតការ៉េ។

Echo House ជាគម្រោងអភិវឌ្ឍន៍លំនៅដ្ឋានរួមគ្នា រវាងក្រុមហ៊ុន Chinachem Group ជាមួយអាជ្ញាធរកែលំអរទីក្រុងហុងកុង(URA)។

លោក Derek Chan ប្រធានផ្នែកស្រាវជ្រាវនៅក្រុមហ៊ុន Ricacorp Properties បានលើកឡើងថា “កត្តាអំណោយផលជាច្រើន រួមទាំងការកាត់បន្ថយអត្រាការប្រាក់ ការងើបឡើងវិញនៃផ្សារហ៊ុនក្រុងហុងកុង និងវិធានការគោលនយោបាយ ដែលផ្តល់អត្ថប្រយោជន៍ ដល់ទីផ្សារអចលនទ្រព្យ បានធ្វើឱ្យស្ថានភាពទីផ្សារមានភាពប្រសើរឡើងគួរឱ្យកត់សម្គាល់”។

លោកបានបន្ថែមថា “ការលក់អចលនទ្រព្យថ្មីៗ បានកើនឡើងយ៉ាងខ្លាំង។ ការណ៍នេះបង្ហាញពីដំណើរការដ៏រឹងមាំ ខណៈអ្នកទិញ បានឈានជើងចូលទីផ្សារយ៉ាងសកម្ម ហើយអ្នកអភិវឌ្ឍន៍មានឱកាសដំឡើង តម្លៃអចលនទ្រព្យបន្តិចបន្តួច”។

ការដំឡើងថ្លៃផ្ទះនៅពេលនេះ បានកើតមានឡើង បន្ទាប់ពីរដ្ឋបាលទីក្រុងហុងកុង បានបន្ធូរបន្ថយការរឹតបន្តឹង លើការផ្តល់ហិរញ្ញប្បទានកម្ចីទិញផ្ទះ។

យោងតាមអាជ្ញាធររូបិយវត្ថុហុងកុងបានឱ្យដឹងថា អតិថិជនដែលទិញផ្ទះ មានតម្លៃលើសពី៣០លានដុល្លារហុងកុង ក្នុងមួយយូនីត នឹងមានសិទ្ធិទទួលបានហិរញ្ញប្បទានចំនួន៧០ភាគរយ បើធៀបនឹងការអនុញ្ញាតឱ្យខ្ចីប្រាក់ ពីមុនត្រឹមតែ៥០ភាគរយទៅ៦០ភាគរយ៕ប្រភព: SCMP៕