ដោយៈ ស៊ីវ ម៉េង

 ភ្នំពេញៈ លោកឧកញ៉ាបណ្ឌិតគីម ហ៊ាង  ប្រធាន KW Cambodia និងជាអ្នកអភិវឌ្ឍន៍បុរីវិមានសំណាង បានសម្រេចសាងសង់អាគារការិយាល័យថ្មីបន្ថែម ដើម្បីពង្រីកប្រតិបត្តិការអភិវឌ្ឍន៍អចលនវត្ថុបន្ថែម។

ការបើកការសាងសង់ការិយាល័យបន្ថែមនេះ បានធ្វើនៅព្រឹកថ្ងៃទី៤ ធ្នូនេះ ដែលមានទីតាំងនៅក្នុងទឹកដីរបស់បុរី វិមានសំណាង។

លោកឧកញ៉ាបណ្ឌិតគីម ហ៊ាង បានមានប្រសាសន៍ឲ្យដឹងតាមបណ្តាញតេឡេក្រាមនាព្រឹកថ្ងៃទី៤ ធ្នូនេះថា ការសាងសង់អាគារការិយាល័យថ្មីនេះ ធ្វើឡើងសម្រាប់កិច្ចការសំខាន់ និងក្រុមការងារអញ្ជើញមកពី ទី១ ក្រុមហ៊ុន ខ្មែរ រៀលអ៊ីស្ទេត Khmer Real Estate Co., Ltd  ទី២ KW Cambodia & KW Khmer Real Estate  ទី៣  ការិយាល័យគ្រប់គ្រងបុរី KS Residence & Samnang Land ទី៤ ការិយាល័យបន្ថែមសម្រាប់បុគ្គលិក បុរី វិមានសំណាង និងទី៥ ការិ​យា​ល័យធ្វើការ សម្រាប់ក្រុមការងារលក់បុរី វិមានសំណាង មកពីអាស៊ី និងក្រុមការងារសម្រាប់ត្រៀមធ្វើ ទីក្រុងសំណាង Samnang Town តម្លៃជាង៥០០លានដុល្លារ ក្នុងឆ្នាំ២០២៥៕

ដោយ: គង់ លាងហួរ
រីយ៉ាដ: ប្រទេសអារ៉ាប៊ីសាអូឌីត គ្រោងបោះទុនវិនិយោគ១០០លានដុល្លារ ដើម្បីបម្រើដល់អ្នកដំណើរចំនួន៣៥៦លាននាក់ ក្នុងគោលដៅជំរុញកិច្ចខិតខំប្រឹងប្រែងផ្នែកទេសចរណ៍ និងយុទ្ធសាស្រ្តអាកាសចរណ៍របស់ខ្លួន ស្របតាមចក្ខុវិស័យឆ្នាំ២០៣០។

លោក Abdulaziz Al-Duailej អាជ្ញាធរអាកាសចរណ៍ស៊ីវិលទូទៅ បានគូសបញ្ជាក់ឱ្យដឹងបែបនេះ នៅក្នុងសន្និសិទអន្តរជាតិលើកទី១៥ ស្តីពីការចរចាសេវាកម្មផ្លូវអាកាស ដែលរៀបចំឡើងដោយអង្គការអាកាសចរណ៍ស៊ីវិលអន្តរជាតិនៅទីក្រុងរីយ៉ាដកាលពីថ្ងៃអាទិត្យ ទី៣ ខែវិច្ឆិកា។លោកបានមាន ប្រសាសន៍ថា “យើងមានគោលបំណងក្នុងការអភិវឌ្ឍ និងធ្វើឱ្យប្រសើរឡើងនូវរាល់គ្រប់វិស័យអាកាសចរណ៍រួមមានក្រុមហ៊ុនអាកាសចរណ៍អារ៉ាប៊ីសាអូឌីតសេវាឡូជីស្ទីកសេវាដឹកជញ្ជូនទំនិញ និង សេវាគាំទ្រផ្សេងៗទៀត”។

ការចាក់បញ្ចូលហិរញ្ញវត្ថុនេះគូសបញ្ជាក់ពីការប្តេជ្ញាចិត្តរបស់អារ៉ាប៊ីសាអូឌីតក្នុងការក្លាយជាតួអង្គប្រកួតប្រជែងដ៏លេចធ្លោមួយនៅក្នុងសង្វៀនអាកាសចរណ៍ពិភពលោក។លោក Al-Duailej បានបង្ហាញពីគោលបំណងជាយុទ្ធសាស្ត្រថា “យើងកំពុងកសាងបណ្តាញអាកាសចរណ៍រួមបញ្ចូលគ្នាជាមួយទីក្រុងរីយ៉ាដ និងទីក្រុង Jeddah ជាមជ្ឈមណ្ឌលយុទ្ធសាស្ត្រ និងមជ្ឈមណ្ឌលកណ្តាល”។

ជាមួយគ្នានេះ លោក Al-Duailej បានគូសបញ្ជាក់ពីផែនការបង្កើតការតភ្ជាប់ជើងហោះហើរអន្តរជាតិ ជាមួយ នឹងគោលដៅទេសចរណ៍ចំនួន២៥០គោលដៅនៅត្រឹមឆ្នាំ២០៣០ខាងមុខ។

លោក Saleh Al-Jasser រដ្ឋមន្ត្រីក្រសួងដឹកជញ្ជូន និងសេវាកម្មដឹកជញ្ជូនអារ៉ាប៊ីសាអូឌីត ក៏បានសង្កត់ធ្ងន់លើផលប្រយោជន៍នៃយុទ្ធសាស្ត្រអាកាសចរណ៍ស៊ីវិល ដែលត្រូវបានរចនាឡើងមិនត្រឹមតែ ដើម្បីបង្កើនការដឹកជញ្ជូនប៉ុណ្ណោះទេ ប៉ុន្តែក៏ដើម្បីជំរុញទំនាក់ទំនង សម្រួលពាណិជ្ជកម្ម និងការបើកទ្វារសម្រាប់វិស័យទេសចរណ៍អារ៉ាប់ផងដែរ៕

ដោយៈ គង់ ម៉ាលីនណា

ភ្នំពេញៈ មន្រ្តីជាន់ខ្ពស់ក្រសួងសាធារណការ និងដឹកជញ្ជូន ជំរុញការប្រើប្រាស់យានយន្តអគ្គិសនី ស្របតាមយុទ្ធសាស្រ្តអភិវឌ្ឍន៍រយៈពេលវែងប្រកបដោយអព្យាក្រឹត្យកាបូននៅកម្ពុជា។

រដ្ឋលេខាធិការក្រសួងសាធារណៈការ និងដឹកជញ្ជូនលោកពៅ ម៉ាលី តំណាងដ៏ខ្ពង់ខ្ពស់ឯកឧត្តម ប៉េង ពោធិ៍នា រដ្ឋមន្ត្រីក្រសួងសាធារណការ និងដឹកជញ្ជូន បានអញ្ជើញជាអធិបតីក្នុងពិធីបើកសម្ពោធជាផ្លូវការរថយន្ត AION ម៉ូឌែល Y Plus ឆ្នាំ២០២៣ របស់ក្រុមហ៊ុនAION Cambodia។

ថ្លែងទៅកាន់អង្គពិធីនាឱកាសនោះ លោកពៅ ម៉ាលី បានគូសបញ្ជាក់ពីសារៈសំខាន់ នៃការចូលរួមពីវិស័យឯកជន ជាមួយរាជរដ្ឋាភិបាល ក្នុងការជំរុញវិស័យយានយន្តអគ្គិសនីនៅកម្ពុជា និងបានបន្ថែមថាការប្រើប្រាស់យានយន្តអគ្គិសនីនៅកម្ពុជា នាពេលបច្ចុប្បន្នមានការកើនឡើងគួរឱ្យកត់សម្គាល់ ដោយសារប្រជាពលរដ្ឋមានការយល់ដឹងពីគុណប្រយោជន៍ នៃការប្រើប្រាស់យានយន្តអគ្គិសនី មានផលចំណេញច្រើន បើធៀបជាមួយការប្រើប្រាស់យានយន្តចំហេះក្នុង។

ទន្ទឹមនឹងនេះ រាជរដ្ឋាភិបាល តាមរយៈក្រសួងសាធារណការ និងដឹកជញ្ជូន ដែលជាសេនាធិការ បានខិតខំជំរុញក្នុងការបង្កើនហេដ្ឋារចនាសម្ព័ន្ធគាំទ្រ ដូចជាការបង្កើតស្ថានីយសាកយានយន្តឱ្យបានច្រើនបន្ថែមទៀតនៅតាមរាជធានី ខេត្ត ដោយសព្វថ្ងៃនេះមានចំនួន១៨ទីតាំង និង២៣ស្ថានីយសាក(ទូសាក) ដើម្បីបង្កលក្ខណៈងាយស្រួលដល់បងប្អូនប្រជាពលរដ្ឋ ប្រើប្រាស់យានយន្តអគ្គិសនី ដែលយើងខិតខំពង្រីកបន្ថែមទៀត ឱ្យបានច្រើននៅតាមខេត្ត តំបន់ឆ្ងាយៗ ក៏ដូចជានៅតាមផ្លូវជាតិសំខាន់ៗ។

ក្រសួងសាធារណការ និងដឹកជញ្ជូន ដោយទទួលបានការអនុញ្ញាតដ៏ខ្ពង់ខ្ពស់ពីសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា នាពេលថ្មីៗនេះ ឱ្យដឹកនាំគណៈកម្មាធិការបច្ចេកទេសអន្តរក្រសួង ដើម្បីតាក់តែងលិខិតបទដ្ឋានគតិយុត្ត គោលនយោបាយ និងយុទ្ធសាស្ត្រជាតិ សម្រាប់គ្រប់គ្រង និងអភិវឌ្ឍយានយន្តអគ្គិសនី (គ.ល.គ.យ.អ.) ដើម្បីរៀបចំលិខិតបទដ្ឋានគតិយុត្តនានាក្នុងការគាំទ្រ លើកទឹកចិត្តឱ្យបងប្អូនប្រជាពលរដ្ឋ ប្រើប្រាស់យានយន្តអគ្គិសនី ក្នុងតម្លៃសមរម្យអាចប្រើប្រាស់បានយ៉ាងទូលំទូលាយនាពេលខាងមុខ៕

ដោយ: គង់ លាងហួរ

ភ្នំពេញ: សម្តេចធិបតីហ៊ុន ម៉ាណែត នាយករដ្ឋមន្ត្រីនៃកម្ពុជា បានជួបជាមួយរដ្ឋមន្ត្រីក្រសួងការពារជាតិថៃ លោក Sutin Klungsang សម្រាប់កិច្ចពិភាក្សាស្តីពី ពាណិជ្ជកម្មតាមព្រំដែន និងការដោះមីន នៅតាមព្រំដែនកាលពីថ្ងៃសៅរ៍ ទី២ ខែវិច្ឆិកា។

ចំណែក បញ្ហាផ្សេងទៀតដែលត្រូវបានលើកមកពិភាក្សា គឺការវិនិយោគ និងទេសចរណ៍រវាងប្រទេសជិតខាងទាំងពីរ។

យោងតាមសេចក្តីប្រកាសព័ត៌មានផ្លូវការ បន្ទាប់ពីកិច្ចប្រជុំបានឱ្យដឹងថា រដ្ឋាភិបាលនៃប្រទេសទាំងពីរ បានប្តេជ្ញាចិត្តក្នុងការជំរុញសន្តិភាពនៅតាមតំបន់ព្រំដែន តាមរយៈការខិតខំប្រឹងប្រែងរួមគ្នាដើម្បីលុបបំបាត់មីនសកម្មទាំងអស់នៅតាមព្រំដែន។លោក Sutin បានមានប្រសាសន៍ថា បេសកកម្មលុបបំបាត់មីននៅតាមព្រំដែន នឹងត្រូវបានជំរុញដោយកិច្ចប្រជុំ នៃគណៈកម្មាធិការព្រំដែនទូទៅនៅកម្ពុជាក្នុងខែមីនា ឆ្នាំក្រោយ រួមជាមួយនឹងកិច្ចប្រជុំរបស់គណៈកម្មាធិការព្រំដែនតំបន់ និង គណៈកម្មាធិការកម្រិតខ្ពស់។

ជាមួយគ្នានេះ ក្រសួងការពារជាតិនៃប្រទេសទាំងពីរ ក៏បានឯកភាពគ្នាក្នុងការសហការ លើការលើកកម្ពស់ការច្នៃប្រឌិត ផ្នែកយោធាផងដែរ។ដំណើរ​ទស្សនកិច្ច​របស់​លោក Sutin មក​កម្ពុជា​ជា​ដំណើរ​ទស្សនកិច្ច​អន្តរជាតិ​ លើក​ដំបូង​របស់​លោក ​ចាប់​តាំង​ពី​ឡើង​កាន់​តួនាទី​ជា​រដ្ឋមន្ត្រី​ការពារជាតិ ដែលបាន​គូសបញ្ជាក់​ពី​ទំនាក់ទំនង​ដ៏​យូរ​អង្វែង​រវាង​ប្រទេស​ជិតខាងទាំង​ពីរ។

លើសពីនេះ លោក​ Sutin Klungsang ក៏​បាន​ជួប​ពិភាក្សាជាមួយលោក​ឧបនាយករដ្ឋមន្ត្រី ទៀ សីហា រដ្ឋមន្ត្រី​ក្រសួងការពារជាតិ​កម្ពុជា​ផងដែរ​។

លោកឧបនាយករដ្ឋមន្ត្រី ទៀ សីហា  បាន​ថ្លែង​អំណរគុណ​ចំពោះ​ប្រទេស​ថៃ ​ដែល​បាន​ខិតខំ​ប្រឹងប្រែង​ ក្នុង​ការ​មើល​ថែ​ពលករ​ចំណាក​ស្រុក​របស់កម្ពុជា ដោយ​លោកបានគូសបញ្ជាក់​ថា ប្រទេស​ជិតខាងទាំង​ពីរ​គឺប្រៀប​ដូច​ជា​បងប្អូន៕The Nation៕

ដោយៈ គង់ សូរិយា

ភ្នំពេញៈ ទំហំ​ហិរញ្ញប្បទាន​របស់​ជប៉ុន​ត្រូវបាន​រំពឹងថា ​នឹង​កើន​ឡើងជា​បន្តបន្ទាប់ តាមរយៈ​ការចុះហត្ថលេខា​ លើ​លិខិត​ប្ដូរ​សារ​ក្នុង​ក្របខ័ណ្ឌ​ ដៃគូ​យុទ្ធសាស្ត្រ​គ្រប់​ជ្រុងជ្រោយរវាង​ប្រទេស​ទាំង​២ ខណៈ​៣០​ឆ្នាំ​មកនេះ ជប៉ុន​បាន​បើក​ផ្តល់​ហិរញ្ញប្បទាន​ ដល់​កម្ពុ​ជាជាង៤​ពាន់​លាន​ដុល្លារ​។​

យោងតាម​សេចក្តីប្រកាស​ព័ត៌មាន របស់​ក្រុមប្រឹក្សា​អភិវឌ្ឍន៍​កម្ពុជា ​(CDC) ស្តីពី​កិច្ចប្រជុំ​ពិគ្រោះ​យោបល់​កម្រិត​គោលនយោបាយ​ស្តីពី​ហិរញ្ញប្បទាន​អភិវឌ្ឍន៍​ផ្លូវការ រវាង​រាជរដ្ឋាភិបាល​កម្ពុជា និង​រដ្ឋាភិបាល​ជប៉ុនកាលពីពេលថ្មីៗនេះបានឲ្យដឹងថា ភាគី​ជប៉ុន​គឺជា​ដៃគូ​អភិវឌ្ឍន៍​ដ៍​សំខាន់​របស់​កម្ពុជា ដោយ​ចាប់ពី​ឆ្នាំ​១៩៩២ ដល់​ឆ្នាំ​២០២២ ភាគី​ជប៉ុន​ បាន​បើក​ផ្តល់​ហិរញ្ញប្បទាន​ដល់​កម្ពុជា​ប្រមាណ ៤៣១៩លាន​ដុល្លារ ស្មើនឹង១៤​ភាគរយ នៃ​ហិរញ្ញប្បទាន​ផ្តល់​ដោយ​ដៃគូ​អភិវឌ្ឍន៍​ទាំងអស់​។​ក្នុងជំនួបជាមួយលោក ឈៀង យ៉ាណា​រ៉ា ទេសរដ្ឋមន្ត្រី​ទទួលបន្ទុក​បេសកកម្ម​ពិសេស អនុប្រធាន​ទី២ ក្រុមប្រឹក្សា​អភិវឌ្ឍន៍​កម្ពុជា បានលើកឡើង​តាមរយៈ​សេចក្តីប្រកាស​ព័ត៌មាន​ថា កម្ពុជា ពិតជា​អរគុណ​​ដល់​រដ្ឋាភិបាល​ ​និង​ប្រជាជន​ជប៉ុន ចំពោះ​ការបន្ត​ប្តេជ្ញា​គាំទ្រ​ ដល់​ការអភិវឌ្ឍ​សង្គម​-​សេដ្ឋកិច្ច​នៅ​កម្ពុជា​។​

លោក​បាន​បន្ថែមថា កិច្ចប្រជុំ​ពិគ្រោះ​យោបល់​កម្រិត​គោលនយោបាយ​នេះ ត្រូវបាន​រៀបចំ​ឡើងជា​លើកដំបូង ​ក្នុង​អាណត្តិ​រាជរដ្ឋាភិបាល នីតិកាល​ទី​៧ នៃ​រដ្ឋសភា និង​ស្របពេល​ជាមួយ​ការរៀបចំ​ប្រារព្ធ​ខួប​លើក​ទី​៧០ នៃ​ទំនាក់ទំនង​ការទូត​រវាង​ប្រទេស​ទាំង​២ ដែ​ល​គ្រោង​នឹង​រៀប​ចំនា​ចុងឆ្នាំ​២០២៣​នេះ​។​លោក​បាន​បញ្ជាក់ថា​ “ក្របខ័ណ្ឌ​គោលនយោបាយ​របស់​រាជ​រដ្ឋាភិបាល​កម្ពុជា គឺ​ផ្តោត​ការយកចិត្តទុកដាក់​ លើ​កិច្ចសហប្រតិបត្តិការ​អភិវឌ្ឍ​ន៍ ដើម្បី​សម្រេចបាន​ទស្សនវិស័យ​របស់​កម្ពុ​ជា ​ក្លាយជា​ប្រទេ​ស​មាន​ចំណូល​មធ្យម​ កម្រិត​ខ្ពស់​នៅ​ឆ្នាំ​២០៣០ និង​ប្រទេស​មាន​ចំណូល​ខ្ពស់​នៅ​ឆ្នាំ​២០៥០”។​

លោក UENO Atsushi ឯកអគ្គរាជទូត​ជប៉ុន​ប្រចាំ​នៅ​កម្ពុជា​ ក៏បាន​លើកឡើង​ដែរ​ថា ធម្មនុញ្ញ​នៃ​កិច្ចសហប្រតិបត្តិការ​អភិវឌ្ឍ​ន៍ ដែល​រដ្ឋាភិបាល​ជប៉ុន​ បាន​កែសម្រួល​កាលពី​ខែមិថុនា ឆ្នាំ​២០២៣ កន្លងទៅ ភាគី​ទាំង​២​បានធ្វើ​ និង​បាន​ពិនិត្យឡើងវិញ​នូវ​គោលនយោ​បាយ​សហប្រតិបត្តិ​ការអភិវឌ្ឍន៍​សម្រាប់​កម្ពុជា​រួចហើយ​។​លោក​បាន​បញ្ជាក់ថា​ ​ភាគី​ទាំង​២ បានធ្វើនិង​ពិនិត្យឡើងវិញ​នូវ​គោលនយោបាយ​សហប្រតិបត្តិ​ការ អភិវឌ្ឍន៍​សម្រាប់​កម្ពុជា​ការពិភា​ក្សា និង​ផ្លាស់ប្ដូរ​យោបល់​គ្នា លើ​បញ្ហា​ប្រឈម​ក្នុងការ​អនុវត្ត​គម្រោ​ង​សហប្រតិបត្តិការ​នាពេល​កន្លងមក ក្នុងន័យ​បន្ត​ពង្រឹងសមត្ថភាព​នៃ​ការអនុវត្ត​គម្រោង​នាពេល​អនាគត៕

ដោយៈ គង់ សូរិយា

ភ្នំពេញៈ ផ្សារទំនើបអាស៊ីមួយ Shun Fat Supermarket ដែលមានសាខាចំនួន២៦ នៅរដ្ឋ កាលីហ្វ័រញ៉ា ណេវ៉ាដា និងតិចសាស់ បានបង្ហាញចំណាប់អារម្មណ៍ និងជំហរយ៉ាងច្បាស់លាស់ ក្នុងការទទួលផលិតផលកសិកម្មកែច្នៃ និងផលិតផលចំណីអាហារពីកម្ពុជាតាមរយៈការរៀបចំរបស់សមាគម IDI។

ព័ត៌មានដ៏មានសារៈសំខាន់នេះ ត្រូវបានលើកឡើងដោយថ្នាក់ដឹកនាំសមាគមវិនិយោគិន និងនវានុវត្តន៍កាលពីចុងសប្តាហ៍មុន បន្ទា​ប់ពីបានបំពេញ “ទស្សនកិច្ចគណៈប្រតិភូធុរកិច្ច និងវិនិយោគិនកម្ពុជាទៅសហរដ្ឋអាមេរិក ចាប់ថ្ងៃទី៧ ដល់ ថ្ងៃទី១៣ ខែវិច្ឆិកា ឆ្នាំ២០២៣កន្លងមកនេះ។លោកបណ្ឌិត ហោ សេរីវឌ្ឍន៍ ប្រធានក្រុមប្រឹក្សាភិបាលសមាគមIDI និងក្រុមហ៊ុន IDC បានមានប្រសាសន៍ថា “តាមរយៈការប្តេជ្ញាចិត្ត ក្នុងការគាំទ្រយុទ្ធសាស្រ្តរបស់រាជរដ្ឋាភិបាលកម្ពុជា និងក្រសួងពាក់ព័ន្ធ ក្នុងការជំរុញការនាំចេញកសិផល និងផលិតផលចំណីអាហារ សមាគមIDI បានរៀបចំដំណើរទស្សនកិច្ចនេះឡើង ដើម្បីបង្កើតឱកាសជួបអ្នកបញ្ជាទិញ បង្កើនការយល់ដឹង និងបទពិ​សោ​ធន៍ដល់ម្ចាស់សហគ្រាសធុនតូច និងមធ្យមអំពីតម្រូវការមូលដ្ឋាន និងលក្ខខណ្ឌកត្តិយុត្តពាក់ព័ន្ទនឹងការនាំចេញ ក៏ដូចជាស្តង់ដារនៃការផលិត ស្តង់ដារអនាម័យ និងការវេចខ្ចប់ផលិតផលចំណីអាហារ សំដៅជំរុញការនាំចេញទៅសហរដ្ឋអាមេរិក។

យោងតាមស្ថិតិក្រសួងពាណិជ្ជកម្មបានបង្ហាញថា សហរដ្ឋអាមេរិក គឺជាដៃគូពាណិជ្ជកម្មធំទីពីររបស់កម្ពុជា ជាមួយនឹងទំហំពាណិជ្ជកម្មទ្វេភាគីចំនួន៤,៣៥៥លានដុល្លារ ក្នុងឆមាសទីមួយនៃឆ្នាំ ២០២៣។ផលិតផលសំខាន់ៗរបស់កម្ពុជា ដែលនាំចេញទៅសហរដ្ឋអាមេរិកមានដូចជា សម្លៀកបំពាក់ ទំនិញផលិតពីស្បែក ទំនិញធ្វើដំណើរ កាបូប គ្រឿងម៉ាស៊ីន ឧបករណ៍អគ្គិសនី និងស្បែកជើង។ កម្ពុជាបាននាំចូលពីសហរដ្ឋអាមេរិកវិញនូវយានយន្ត គ្រឿងចក្រ គ្រឿងយន្ត ឧបករណ៍វេជ្ជសាស្ត្រ និងផលិតផល ឱសថ។

លោកបណ្ឌិត ហោ សេរីវឌ្ឍន៍ បន្ថែមថា “សហរដ្ឋអាមេរិកគឺជាទីផ្សារចម្បងមួយ ដែលកំពុងធ្វើពាណិជ្ជកម្មជាមួយកម្ពុជា នឹងនៅតែបន្តជាគោលដៅនាំចេញ ដ៏សំខាន់សម្រាប់កម្ពុជា។ យើងសង្ឃឹមថា តាមរយៈទស្សនកិច្ចកាលពីខែមីនា ឆ្នាំ២០២៣ និងទស្សនកិច្ចលើកនេះ យើងនឹងចាប់ផ្តើមឃើញបណ្តើរៗនូវកសិផល និងផលិតផលចំណីអាហារសក្តានុពលមួយចំនួន នៅលើបញ្ជីផលិតផលនាំចេញទៅសហរដ្ឋអាមេរិក ដែលសមិទ្ធផលនេះនឹងចូលរួមបង្កើននូវបរិមា​ណផលិតកម្ម និងប្រាក់ចំណូលសម្រាប់កសិករ និងអ្នកនាំចេញកម្ពុជា។ ក្នុងដំណើរទស្សនកិច្ចនេះ ប្រតិភូមួយចំនួនបានធ្វើការសម្រេចចិត្តដ៏ច្បាស់លាស់ ក្នុងការបញ្ចូលដើមទុនបន្ថែម ដើម្បីវិនិយោគក្នុងការធ្វើឲ្យប្រសើរឡើង នូវសមត្ថភាពនាំចេញរបស់ខ្លួន ដូចជា ការធ្វើពិពិធកម្មលើផលិតផលផ្លែស្វាយ និងមៀន ការបង្កើតសេវាកម្មឃ្លាំងស្តុក ការកែលម្អផលិតផលគ្រឿងសម្អាង និងតំហែទាំខ្លួនប្រាណ និងការកែច្នៃផ្លែឈើសម្ងួត។ល។៕

ក្រុមហ៊ុន ប៉េង ហួត គ្រុប បានសហការរៀបចំយុទ្ធនាការរត់ប្រណាំង ទិវាពិភពលោកប្រយុទ្ធនឹងជំងឺអេដស៍ ឆ្នាំ២០២៣ ជាមួយអង្គការមូលនិធិថែទាំសុខភាពអ្នកជំងឺអេដស៍(AIDS HEALTHCARE FOUNDATION) (AHF) ដើម្បីផ្សព្វផ្សាយនូវបញ្ហាប្រឈមនានា និងរួមចំណែកគាំទ្រដល់ការការបញ្ចប់ជំងឺអេដស៍ និងជំងឺកាមរោគត្រឹមឆ្នាំ២០៣០ ដែលមានអ្នកចូលរួមរត់ប្រមាណជាង ៦០០នាក់ មកពីស្ថាប័នរដ្ឋ មជ្ឈមណ្ឌលជាតិប្រយុទ្ធនឹងជំងឺអេដស៍ សើស្បែក

និងកាមរោគ រួមទាំងអង្គការមិនមែនរដ្ឋាភិបាល នាព្រឹកថ្ងៃទី០២ ខែធ្នូ ឆ្នាំ២០២៣ ស្ថិតនៅក្នុងគម្រោងបុរី ប៉េង ហួត ហ្គ្រេនស្តា ផ្លាទីនីម (បឹងស្នោ) ខណ្ឌច្បារអំពៅ រាជធានីភ្នំពេញ។​

ក្នុងឆ្នាំ២០២៣ នេះគម្រោង បុរី ប៉េង ហួត ហ្រ្គេនស្ដា ផ្លាទីនីម (បឹងស្នោ) ទទួលលបានដៃគូសហការរៀបចំព្រឹត្តិការណ៍កីឡាជាច្រើន ជាពិសេសគឺព្រឹត្តិការណ៍រត់ប្រណាំងក្នុងន័យសប្បុរសធម៌ រត់ដើម្បីលើកកម្ពស់សុខភាព រួមទាំងការរត់ដើម្បីផ្សព្វផ្សាយពីការយល់ដឹង និងលើកម្ពស់ការងារសង្គមផ្សេងៗដោយមានអ្នកចូលរួមរត់សរុបប្រមាណ ៤៦០០នាក់។

ក្នុងពេលឆាប់ៗខាងមុខនេះ​ក្រុមហ៊ុននឹងត្រៀមរៀបចំពិធីសម្ពោធផ្លូវជិះកង់ និងរត់ប្រណាំងក្នុងគម្រោងអភិវឌ្ឍលំនៅឋានរបស់ខ្លួនដំបូងគេក្នុងប្រទេសកម្ពុជាផងដែរ។

សូមបញ្ជាក់ថា ក្រុមហ៊ុន ប៉េង ហួត គ្រុប ត្រូវបានគេស្គាល់ថាជាក្រុមហ៊ុនប្រតិបត្តិមេត្រីភាពបរិស្ថាន ដែលគ្រប់គម្រោងលំនៅឋានមានដើមឈើរាប់ម៉ឺនដើម សួនកម្សាន្តផ្កាចម្រុះពណ៌ និងហេដ្ឋារចនាសម្ព័ន្ធបៃតងធំទូលាយ​ ហើយក៏ជាគោលដៅទាក់ទាញទេសចរណ៍ទាំងក្នុង និងក្រៅស្រុកផងដែរ៕