ដោយៈស៊ីវ ម៉េង

 ភ្នំពេញៈ តើទីផ្សារអ្វីនឹងមានភាពប្រសើរនៅឆ្នាំ២០២៤ ដែលនឹងខិតមកដល់នាពេលឆាប់ៗនេះ ពិសេសក្នុងវិស័យអចលនទ្រព្យនិងសំណង់?។

លោកឧកញ៉ាបណ្ឌិតគីម ហ៊ាងប្រធានKW Cambodia និងជាអ្នកអភិវឌ្ឍន៍បុរីវិមានសំណាង បានមានប្រសាសន៍ឲ្យដឹងតាមបណ្តាញតេឡេក្រាមកាលពីថ្ងៃទី២៩ វិច្ឆិកាថា ទីផ្សារលំនៅដ្ឋាននឹងមានភាពប្រសើរ ដោយនៅឆ្នាំ២០២៤ ជនបរទេសជាច្រើននឹងមកទិញលំនៅដ្ឋាននៅកម្ពុជា តាមរយៈច្បាប់បរធនបាលកិច្ច ដែលច្បាប់នេះអនុញ្ញាត្តឲ្យជនបរទេស មានសិទ្ឋកាន់កាប់អចលនទ្រព្យបាន តាមរយៈតំណាងស្របច្បាប់របស់ខ្លួន។

លោកបន្តថា “ពេលនេះជនបរទេសជាច្រើន បានចាប់អារម្មណ៍ទិញលំនៅដ្ឋាននៅកម្ពុជា ដែលនេះជាយន្តការលើកទឹកចិត្តពីរាជរដ្ឋាភិបាល ដើម្បីទាក់ទាញការវិនិយោគពីបរទេស”។

តាមរយៈច្បាប់បរធនបាលកិច្ច មានក្រុមហ៊ុនមេធាវី និងធនាគារពាណិជ្ជកម្មធំៗនៅកម្ពុជា កំពុងបង្ហាញផលិតផលរបស់ពួកគេ និងផ្សព្វផ្សាយទៅកាន់បរទេស ដើម្បីពួកគេអាចក្លាយជាតំណាងស្របច្បាប់របស់ជនបរទេស ដែលចង់ទិញដី និងលំនៅដ្ឋានជាប់ដីនៅកម្ពុជា ក្នុងរយៈពេលវែង ប៉ុន្តែការទិញបែបនេះ ជនបរទេសមិនមានសិទ្ឋស្របច្បាប់ក្នុងការគ្រប់គ្រងអចលនទ្រព្យ ដែលខ្លួនបានទិញ១០០ភាគរយទេ ប៉ុន្តែពួកគេអាចទិញ តាមរយៈអ្នកឬស្ថាប័នតំណាងស្របច្បាប់របស់ពួកគេ ដែលមានមូលដ្ឋាននៅកម្ពុជា។

លោកឧកញ៉ាបណ្ឌិតគីម ហ៊ាងបានបន្តថា តាមរយៈយន្តកាដ៏ល្អរបស់ច្បាប់នេះ ទីផ្សារលំនៅដ្ឋាននឹងមានភាពប្រសើរឡើង ខណៈបុរី​វិមានសំណាងដែលោកបាន និងកំពុងអភិវឌ្ឍន៍កំពុងទាក់ទាញអ្នកវិនិយោគបរទេស ដូចជា សឹង្ហបុរី ចិនជាដើម៕

ដោយៈ គង់ សូរិយា

        ភ្នំពេញៈ គំរោងទីក្រុងទំនើប និងជាមជ្ឈមណ្ឌលនៃការកំសាន្តលំដាប់អន្តរជាតិBay Of Lightនៅក្រុងព្រះសីហនុ បានបើកដំណើរការផ្លូវនៅក្នុងគំរោងរបស់ខ្លួន។

គំរោងវិនិយោគដ៏ធំ ដែលលាតសន្ឋឹងទំហំប្រមាណ៩០០ហិកតា នៅតំបន់រាម នៃខេត្តព្រះសីហនុនេះ បាននិងកំពុងក្លាយជាសក្តានុពលលើកកំពស់សេដ្ឋកិច្ច និងទាក់ទាញការវិនិយោគមកកាន់ខេត្តនេះកាន់តែច្រើននាពេលអនាគត។ជាមួយនឹងវឌ្ឍនភាពនៃដំណើរការអភិវឌ្ឍន៍The Bay Of Light លោក គង់ វិតាណៈ អភិបាលរងខេត្តព្រះសីហនុ បានអញ្ជើញជាអធិបតីក្នុងពិធីសម្ពោធផ្លូវមេរបស់គម្រោង Bay of Light ស្ថិតនៅស្រុកព្រៃនប់ ខេត្តព្រះសីហនុកាលពីម្សិលម៉ិញនេះ។ លោកបានថ្លែងនូវការកោតសរសើរ និងចូលរួមអបអរសាទរដោយស្មោះចំពោះ ពិធីសម្ពោធបើកឱ្យដំណើរការជាផ្លូវការ នាពេលនេះ ដែលជាសក្ខីភាពបង្ហាញឱ្យឃើញ ពីការជឿជាក់របស់អ្នកវិនិយោគទុន មកលើរាជរដ្ឋាភិបាលកម្ពុជា។ លោកបន្តថា ផ្លូវមេរបស់គម្រោង Bay of Light បានចូលរួមចំណែកយ៉ាងសំខាន់ ក្នុងការលើកម្ពស់វិស័យទេសចរណ៍ នៅក្នុងខេត្តឱ្យកាន់តែ មានភាពទាក់ទាញ់ និងរីកចម្រើនទៅមុខជាលំដាប់ ជាពិសេសបានផ្ដល់ការងារជាច្រើនជូនប្រជាពលរដ្ឋនៅខេត្តព្រះសីហនុ។

លោកគង់ វិតាណៈបានបញ្ជាក់ថា  “ផ្លូវដ៏សំខាន់នេះ នឹងចូលរួមចំណែកជាមួយរាជរដ្ឋាភិបាល កម្ពុជាក្នុងការលើកកម្ពស់កម្រិតជីវភាព និងកាត់បន្ថយភាពក្រីក្ររបស់ ប្រជាពលរដ្ឋស្របតាមគោលនយោបាយ និងយុទ្ធសាស្ត្រ បញ្ចកោណដំណាក់កាលទី១ របស់រាជរដ្ឋាភិបាលកម្ពុជា គឺដើម្បីកំណើនការងារ សមធម៌ ប្រសិសទ្ធភាព និងចីរភាព កសាងមូលដ្ឋានគ្រឹះឆ្ពោះ ទៅសម្រេចចក្ខុវិស័យកម្ពុជាឆ្នាំ២០៣០”។

លោកអភិបាលរងខេត្តបានបន្តទៀតថា ក្រោមការដឹកនាំប្រកប​ដោយគតិបណ្ឌិត និងភាពឈ្លាសវៃរបស់សម្តេច អគ្គមហាសេនាបតីតេជោ ហ៊ុន សែន កន្លងទៅ កម្ពុជាបានក្លាយជាប្រទេសដំបូងគេនៅក្នុងតំបន់ ដែលបានបើកប្រទេសពេញលេញ លើគ្រប់វិស័យប្រកប​ដោយសុវត្ថិភាព ដោយផ្តល់នូវភាពអំណោយផលដល់ការស្តារ និងលើកស្ទួយវិស័យទេសចរណ៍កម្ពុជា ឱ្យងើបឡើងវិញនៅក្នុងល្បឿនលឿនគួរឱ្យកត់សម្គាល់។

រាជរដ្ឋាភិបាលកម្ពុជានីតិកាលទី៧ ក្រោមការដឹកនាំប្រកបដោយភាពប៉ិនប្រសប់ និងគតិបណ្ឌិតដ៏ខ្ពង់ខ្ពស់របស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា បានកំពុងបន្តនូវវីរភាពគំរូ របស់សម្តេចអគ្គមហាសេនាបតីតេជោហ៊ុន សែន ក្នុងការបន្តស្តារ លើកស្ទួយ និងអភិវឌ្ឍវិស័យទេសចរណ៍ឱ្យកាន់តែរីកចម្រើនថែមទៀត ដើម្បីឈានទៅសម្រេចបាន នូវចក្ខុវិស័យទេស​ចរណ៍គ្រប់ជ្រុងជ្រោយមួយ ស្តីពីការលើកកម្ពស់កិត្យានុភាព និងភាពធន់របស់កម្ពុជា រយៈការប្រែក្លាយកម្ពុជាជាគោលដៅ ទេសចរណ៍សកលឈានមុខ ប្រកបដោយភាពសម្បូរបែបពោរពេញ ដោយកាលានុវត្តភាព និងភាពកក់ក្តៅ។

លោកបន្តថា តាមរយៈកិច្ចខិតខំប្រឹងប្រែងរបស់ ប្រមុខរាជរដ្ឋាភិបាល បានធ្វើឱ្យខេត្តព្រះសីហនុ មានការអភិវឌ្ឍផ្លាស់ប្តូរយ៉ាងឆាប់រហ័ស ពិសេសលើ ផ្នែកហេដ្ឋារចនាសម្ព័ន្ធ អគារខ្ពស់ៗ សណ្ឋាគារ និងតំបន់ពាណិជ្ជកម្មជាច្រើន។ តំបន់សេដ្ឋកិច្ចពិសេស កំពង់ផែសមុទ្រទឹកជ្រៅ អាកាសយានដ្ឋាន អន្តរជាតិ ផ្លូវល្បឿនលឿន រមណីយដ្ឋានធម្មជាតិ ជីវៈចម្រុះដ៏សម្បូរបែប ព្រមទាំងឆ្នេរសមុទ្រ កោះដ៏ស្រស់ស្អាត ត្រូវបានប្រសិទ្ធនាមជា “តារារៈ នាទិសនិរតី” បាននឹងកំពុងដើរតួនាទីយ៉ាងសំខាន់ក្នុងការជំរុញកំណើន សេដ្ឋកិច្ច និងវិស័យទេសចរណ៍ នៅក្នុងខេត្តបានទាក់ទាញភ្ញៀវទេសចរមក កម្សាន្តសប្បាយយ៉ាងច្រើនកុះករ៕

ដោយៈ គង់ ហ្វីអូណា

កោះកុងៈ សម្តេចធិបតី ហ៊ុន ម៉ាណែតនាយករដ្ឋមន្រ្តីនៃកម្ពុជា បានថ្លែងជំរុញឱ្យអគ្គិសនីកម្ពុជា ប្រឹងតបណ្តាញអគ្គិសនីជាតិដល់គ្រប់ភូមិពលរដ្ឋ ឱ្យបាន១០០ភាគរយទូទាំងប្រទេស ឱ្យបានមុនឆ្នាំ២០៣០។ រហូតមកទល់ពេលនេះ នៅសល់តែជាង១ភាគរយតែប៉ុណ្ណោះបណ្តាញអគ្គិសនីជាតិ នឹងបានតភ្ជាប់គ្រប់ភូមិពលរដ្ឋទូទាំងប្រទេស។

នេះជាការថ្លែងរបស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជានៅព្រឹកថ្ងៃទី៣០ ខែវិច្ឆិកា ឆ្នាំ២០២៣នេះក្នុងឱកាសអញ្ជើញជាអធិបតី ក្នុងពិធីបិទស្ទឹងសាងសង់ទំនប់វារីអគ្គិសនីស្ទឹងតាតៃលើ ស្ថិតក្នុងស្រុកថ្មបាំង ខេត្តកោះកុង។

សម្ដេចធិបតីបានថ្លែងថា “វិស័យអគ្គិសនី គឺជាវិស័យអាទិភាពមួយ ក្នុងចំណោមវិស័យអាទិភាពរបស់រាជរដ្ឋាភិបាល”។សម្ដេចធិបតី បានបន្តថា រាជរដ្ឋាភិបាលអាណត្តិទី៧ បន្តទទួលខុសត្រូវលើពលរដ្ឋ និងប្រទេសជាតិចំនួន៣ ដោយទី១ ជំរុញជីវភាពពលរដ្ឋ ទូទាំងប្រទេស និងសេដ្ឋកិច្ចជាតិឱ្យកាន់តែរីកចម្រើន។ ទី២ ទទួលខុសត្រូវ លើរាល់ការអភិវឌ្ឍទាំងអស់ ត្រូវគិតឱ្យបាន​ហ្មត់ចត់​បញ្ចៀស​រាល់ការប៉ះពាល់ និងទី៣ រួមទទួលខុសត្រូវលើផលប៉ះពាល់បរិស្ថានពិភពលោក និងការប្រែប្រួលអាកាសធាតុ។ សម្ដេចធិបតី ហ៊ុន ម៉ាណែត បញ្ជាក់ថា “កម្ពុជាត្រូវធានាឱ្យបាន នូវសន្តិសុខថាមអគ្គិសនី និងឯករាជ្យភាពថាមពលអគ្គិសនី ដើម្បីធានាដល់ការអភិវឌ្ឍ និងបម្រើដល់ជីវភាពប្រចាំថ្ងៃរបស់ពលរដ្ឋ មិនត្រូវពឹងតែទិញពីប្រទេសជិតខាងទេ”។គិតត្រឹមចុងឆ្នាំ២០២២ មានភូមិចំនួន១៣,៩២៣ ស្មើនឹង ៩៨.២៧ភាគរយនៅកម្ពុជា បានតខ្សែបណ្តាញអគ្គិសនីពីបណ្តាញជាតិសម្រាប់ប្រើប្រាស់រួចហើយ ខណៈនៅសល់ភូមិតែ២៤៥ប៉ុណ្ណោះ ស្មើនឹង១.៧៣ភាគរយ មិនទាន់តខ្សែបណ្តាញអគ្គិសនីពីបណ្តាញជាតិ ដោយសារតែភូមិទាំងនោះ នៅក្នុងតំបន់ព្រៃភ្នំដាច់ស្រាយាល នៅរាយប៉ាយ ហើយភូមិខ្លះនៅផ្ទៃទឹក តំបន់កោះ ឬភូមិខ្លះទើបនឹងបង្កើតថ្មី ដែលគ្មានផ្លូវធ្វើដំណើរជាដើម។

ប៉ុន្តែបើទោះបីជា ភូមិទាំង ២៤៥នោះ មិនទាន់ទទួលបានប្រភពអគ្គិសនីពីបណ្តាញជាតិក្តី ក៏ភូមិមួយចំនួនបានទទួលការផ្គត់ផ្គង់អគ្គិសនី ពីប្រភពថាមពលពន្លឺព្រះអាទិត្យរួចហើយ៕

ដោយ: គង់ លាងហួរ
ភ្នំពេញ: កម្ពុជាគ្រោងបោះបង់គម្រោងសាងសង់គម្រោងរោងចក្រអគ្គិសនីដើរដោយថាមពលធ្យូងថ្ម តម្លៃ១,៥ ពាន់លានដុល្លារ ដែលមានអានុភាព៧០០មេហ្គាវ៉ាត់ (MW) នៅស្រុកបុទុមសាគរ ខេត្តកោះកុង ហើយនឹងសាងសង់រោងចក្រដើរដោយឧស្ម័នធម្មជាតិរាវ៨០០មេហ្គាវ៉ាត់ជំនួសវិញ។

លោក កែវ រតនៈ រដ្ឋមន្ត្រីក្រសួងរ៉ែ និងថាមពល បានបញ្ជាក់ប្រាប់សារពត៌មាន Reuters ថា សម្តេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា គ្រោងនឹងប្រកាសនៅថ្ងៃទី៣០ ខែវិច្ឆិកា អំពីការលុបចោលគម្រោងរោងចក្រថាមពលធ្យូងថ្ម ដែលមានអានុភាព៧០០មេហ្គាវ៉ាត់នេះ នៅខេត្តកោះកុង និងផែនការជំនួស ដោយគម្រោងរោងចក្រអគ្គិសនីដើរដោយឧស្ម័នធម្មជាតិរាវ(LNG) ដែលមានអានុភាព៨០០មេហ្គាវ៉ាត់ ដោយគ្រោងនឹងដាក់ឱ្យដំណើរការក្រោយឆ្នាំ២០៣០។ទោះជាយ៉ាងនេះក្តី លោក កែវ រតនៈ មិនបានគូសបញ្ជាក់ប្រាប់សារពត៌មាន Reuters អំពីទំហំថវិកាដែលត្រូវចំណាយសម្រាប់ការសាងសង់គម្រោងថ្មីនេះទេ។

លោក កែវ រតនៈ បានបន្តថា ការសម្រេចចិត្តលុបចោលគម្រោងរោងចក្រថាមពលអគ្គិសនីដើរដោយធ្យូងថ្ម ដែលគ្រោងនឹងចាប់ផ្តើមផលិតថាមពលនៅចុងឆ្នាំ២០២៥ ឆ្លុះបញ្ចាំងឱ្យឃើញពីការប្តេជ្ញាចិត្តរបស់ប្រទេសកម្ពុជាចំពោះការប្រើប្រាស់ថាមពលស្អាតជាងមុន។

ជាក់ស្តែង កម្ពុជាគ្រោងបង្កើនចំណែកនៃសមត្ថភាពផលិតថាមពលស្អាតដល់៧០ ភាគរយនៅឆ្នាំ២០៣០ បើធៀបនឹង៥២ភាគរយនៅឆ្នាំ២០២២ តាមរយៈការសាងសង់កសិដ្ឋានថាមពលពន្លឺព្រះអាទិត្យ និងថាមពលដើរដោយខ្យល់ ព្រមទាំងគម្រោងវារីអគ្គីសនីថ្មីផងដែរ។

ស្របពេលដែលមានការលុបចោលនូវគម្រោងថាមពលធ្យូងថ្មនៅស្រុកបុទុមសាគរ ខេត្តកោះកុង ដូច្នេះ គម្រោងថាមពលដើរដោយធ្យូងថ្ម ដែលនៅសេសសល់តែមួយគត់របស់កម្ពុជា ដែលកំពុងស្ថិតក្រោមការអភិវឌ្ឍន៍ គឺជាគម្រោងខ្នាតតូច ដែលមានអានុភាព២៦៥មេហ្កាវ៉ាត់ នៅក្នុងខេត្តឧត្តរមានជ័យ។

លោក កែវ រតនៈ បានបន្ថែមថា គម្រោងថាមពលអគ្គិសនីដើរដោយធ្យូងថ្ម នៅស្រុកបុទុមសាគរ ខេត្តកោះកុង ដើមឡើយ នឹងត្រូវបានសាងសង់ គ្រប់គ្រង និងដំណើរការដោយក្រុមហ៊ុន Royal Group របស់កម្ពុជា  ហើយពេលនេះ ក្រុមហ៊ុននឹងសាងសង់គម្រោងរោងចក្រអគ្គិសនីដើរដោយឧស្ម័នជំនួសវិញ។

ទោះជាយ៉ាងនេះក្តីក្រុមហ៊ុន Royal Group មិនបានឆ្លើយតបភ្លាមៗ ចំពោះសំណើសុំការអត្ថាធិប្បាយ តាមអុីមែលរបស់សារពត៌មាន Reuters នោះទេ៕

តែម សុខុម

វ៉ាស៊ីនតោន: សេដ្ឋកិច្ចរបស់សហរដ្ឋអាមេរិក សម្រេចបានកំណើនខ្ពស់ជាងការរំពឹងទុក ហើយនេះឆ្លុះបញ្ចាំងពីភាពធន់ទ្រាំគួរឱ្យកត់សម្គាល់នៃសេដ្ឋកិច្ចធំបំផុតរបស់ពិភពលោកមួយនេះ ស្របពេលប្រឈមនឹងអតិផរណាហក់ឡើងខ្ពស់ នឹងការដំឡើងអត្រាការប្រាក់ខ្ពស់ក្នុងឆ្នាំនេះ។

យោងតាមការប៉ាន់ប្រមាណលើកទី២ របស់ក្រសួងពាណិជ្ជកម្មអាមេរិក កាលពីព្រឹកថ្ងៃពុធ ទី២៩ ខែវិច្ឆិកា បង្ហាញថា ផលទុនជាតិសរុប (GDP) របស់សហរដ្ឋអាមេរិក បានកើនឡើងក្នុងអត្រាប្រចាំឆ្នាំ៥,២%ក្នុងត្រីមាសទី៣ ឆ្នាំនេះ។កំណើននេះសម្រេចបានខ្ពស់ជាងការរំពឹងទុក បើធៀបនឹងអត្រាកំណើន៤,៩%ដែលក្រសួងពាណិជ្ជកម្មបានប៉ាន់ប្រមាណមុននេះ។ នេះឆ្លុះបញ្ចាំងពីកំណើននៃការវិនិយោគក្នុងអាជីវកម្ម ការចំណាយរបស់រដ្ឋាភិបាល ការវិនិយោគលើលំនៅឋាន និងកំណើនសន្និធិ។

ការវិនិយោគផ្នែកមិនមែនលំនៅឋាន ឬការចំណាយក្នុងអាជីវកម្មបានកើនឡើងពី០,១%ដល់១,៣%ក្នុងត្រីមាសទី៣។ ការវិនិយោគផ្នែកលំនៅឋានដែលជាទូទៅឆ្លុះបញ្ចាំងពីស្ថានភាពក្នុងទីផ្សារលំនៅឋាន បានកើនឡើងពី៣,៩%ដល់៦,២%។

ទន្ទឹមនេះ ការចំណាយរបស់អ្នកប្រើប្រាស់ (Consumer Spending) ដែលជាក្បាលម៉ាស៊ីនសេដ្ឋកិច្ចដ៏ចម្បងរបស់សហរដ្ឋអាមេរិក បានធ្លាក់ចុះតិចតួចពី៤%មកនៅត្រឹម៣,៦%។ ទោះជាយ៉ាងនេះក្ដី វានៅតែជាល្បឿនកំណើនដ៏រឹងមាំ៕ CNN៕

ដោយ: គង់ លាងហួរ

 អន្តរជាតិ: ប្រទេសចិនត្រូវបានគេរំពឹងថា នឹងសម្រេចបានកំណើនសេដ្ឋកិច្ច ដែលមានសុខភាពល្អ និងមាននិរន្តរភាព នៅឆ្នាំខាងមុខ ទោះបីជាជួបបញ្ហាប្រឈម ដែលបណ្តាលមកពីការផ្លាស់ប្តូរគំរូកំណើនសេដ្ឋកិច្ច ដែលជំរុញដោយវិស័យអចលនទ្រព្យ ទៅកាន់គំរូ ដែលផ្តោតលើកត្តាជំរុញកំណើនសេដ្ឋកិច្ចគុណភាពខ្ពស់។

លោក Pan Gongsheng ទេសាភិបាលធនាគារកណ្តាលចិន បានថ្លែងសុន្ទរកថា នៅឯសន្និសីទកម្រិតខ្ពស់ HKMA-BIS ឆ្នាំ២០២៣ កាលពីថ្ងៃអង្គារថា “ដោយសម្លឹងទៅមុខ សេដ្ឋកិច្ចចិននៅតែមានភាពធន់ខ្ពស់ ដោយសារភាពខ្លាំងរបស់សេដ្ឋកិច្ច ដូចជាសមត្ថភាពបង្កើតថ្មី ទីផ្សារដ៏ធំ ហេដ្ឋារចនាសម្ព័ន្ធល្អ សង្វាក់ឧស្សាហកម្មដែលបានបង្កើតឡើងយ៉ាងល្អ ធនធានមនុស្សសម្បូរបែប និងការអប់រំល្អ”។

លោកបានបន្តថា កាលពីមុន គំរូនៃកំណើនសេដ្ឋកិច្ចរបស់ប្រទេសចិន ដែលពឹងផ្អែក និងផ្តោតជាសំខាន់ទៅលើហេដ្ឋារចនាសម្ព័ន្ធ និងការវិនិយោគអចលនទ្រព្យ បានជំរុញឱ្យសេដ្ឋកិច្ចចិនសម្រេចបានកំណើនដ៏ខ្ពស់នាពេលកន្លងមក ប៉ុន្តែកំណើនបែបនេះទំនងជាមិនអាចបន្តទៅមុខទៀតបានឡើយ។

ផ្ទុយទៅវិញ ក្រុមអ្នកបង្កើតគោលនយោបាយ របស់ប្រទេសចិនកំពុងបង្វែរការយកចិត្តទុកដាក់របស់ពួកគេឆ្ពោះទៅរក “កំណើនប្រកបដោ យគុណភាពខ្ពស់ និងនិរន្តរភាព” ហើយកំពុងផ្តោតលើការកែលម្អរចនាសម្ព័ន្ធសេដ្ឋកិច្ចរបស់ប្រទេស និងបង្កើតកត្តាជំរុញកំណើនសេដ្ឋកិច្ចថ្មី។

លោក Pan Gongsheng អះអាងថា “ការផ្លាស់ប្តូរសេដ្ឋកិច្ច ដែលកំពុងបន្តនឹងក្លាយជាដំណើរដ៏វែងឆ្ងាយ និងលំបាក ប៉ុន្តែវាជាដំណើរដែលយើងត្រូវតែធ្វើ”។

លោក Pan ក៏បានចូលរួមក្នុងវគ្គសំណួរ និងចម្លើយ បន្ទាប់ពីថ្លែងសុន្ទរកថារួច ដោយបានមានប្រសាសន៍ថា “ស្របពេលដែលសេដ្ឋកិច្ចរបស់ប្រទេសចិន ឆ្លងកាត់ការផ្លាស់ប្តូរដ៏សំខាន់មួយ នោះទីផ្សារអចលនទ្រព្យរបស់ប្រទេសចិន ក៏កំពុងមើលឃើញការផ្លាស់ប្តូរជាច្រើនផងដែរ”។

លោកបានបន្ថែមថា គម្លាតនៃតម្រូវការលំនៅដ្ឋាន រវាងទីក្រុងលំដាប់ខ្ពស់ និងទីក្រុងលំដាប់ទាប កាន់តែមានភាពច្បាស់លាស់ ហើយតម្រូវការលំនៅដ្ឋានថ្មី កំពុងត្រូវបានជំនួសបន្តិចម្តងៗ ដោយលំនៅដ្ឋានប្រភេទជជុះ ឬហៅថា Second-hand និងផ្ទះជួលជាដើម”៕

ដោយ: គង់ លាងហួរ

អន្តរជាតិ: ការលក់ដីប្រភេទឧស្សាហកម្ម ដែលគ្រប់គ្រងដោយអាជ្ញាធរឧស្សាហកម្មថៃ (IEAT) បានហក់ឡើង១៨២% ក្នុងឆ្នាំសារពើពន្ធ២០២៣ ដល់៥.៦៩៣រ៉ៃ(៩១០,៨៨ហិកតា) ដោយសារការផ្លាស់ប្តូរទីតាំង ផលិតកម្មរបស់ក្រុមហ៊ុនបរទេស ទៅកាន់ប្រទេសថៃ និងវិធានការជំរុញការវិនិយោគរបស់រដ្ឋាភិបាល។

ចំនួន​នេះ​បាន​កើនលើស​ការ​ព្យាករ​ណ៍ ដែល​បាន​កំណត់​ទុក​ចំនួន២.៥០០រ៉ៃ(៤០០ហិកតា) ចាប់ពី​ថ្ងៃ​ទី១ ខែ​តុលា ឆ្នាំ២០២២ ដល់​ថ្ងៃ​ទី៣០ ខែ​កញ្ញា ឆ្នាំ​២០២៣នេះ។

លោក Veeris Ammarapala ប្រធានអាជ្ញាធរឧស្សាហកម្មថៃ  បានអះអាងថា ក្រៅពីការផ្លាស់ប្តូរទីតាំងរោងចក្រ ការកើនឡើងនៃការលក់ដីឧស្សាហកម្ម ត្រូវបានជំរុញដោយការវិនិយោគកាន់តែច្រើន នៅក្នុងច្រករបៀងសេដ្ឋកិច្ចភាគខាងកើត (EEC) និងគោលនយោបាយ ទិដ្ឋាការស្នាក់នៅរយៈពេលវែង ដែលផ្តល់ការស្នាក់នៅរយៈពេល១០ឆ្នាំដល់ជនបរទេស។លោក​បាន​បន្ត​ថា​ “ការ​លក់​ដី​ក្នុងតំបន់ច្រករបៀងសេដ្ឋកិច្ច ភាគខាងកើត (EEC) មាន​ចំនួន៤៧២៤,៨រ៉ៃ ខណៈ​ការ​លក់ដីនៅ​ក្រៅតំបន់ EEC មានចំនួន៩៦៧,៧រ៉ៃ”។

តំបន់ EEC ដែលគ្របដណ្តប់ផ្នែកខ្លះនៃខេត្ត Chon Buri ខេត្ត Rayong និងខេត្តChachoengsao នឹងត្រូវប្រែក្លាយទៅជាមជ្ឈមណ្ឌ​លឧស្សាហកម្ម បច្ចេកវិទ្យា លំដាប់ខ្ពស់របស់ប្រទេសថៃ ដែលមានឧស្សាហកម្ម S-curve គោលដៅចំនួន១២ រួមទាំងការផលិតរថយន្តជំនាន់ថ្មី និងគ្រឿងអេឡិចត្រូនិចឆ្លាតវៃផងដែរ។

ប្រទេសជប៉ុនជាប់ចំណាត់ថ្នាក់លេខ១ ដោយគ្របដណ្តប់ទុនវិនិយោគខ្ពស់ជាងគេបំផុត នៅក្នុងប្រទេសថៃ ស្មើនឹង៣០%នៃការវិនិ​យោគសរុប បន្ទាប់មកគឺប្រទេសចិន គ្របដណ្តប់១២% សិង្ហបុរីគ្របដណ្តប់៨%) សហរដ្ឋអាមេរិកគ្របដណ្តប់៦% និងងកោះតៃវ៉ាន់គ្របដណ្តប់៥%៕

ដោយៈ គង់ សូរិយា

ប្រទេសចិនៈ អភិបាលខេត្ត​ព្រះសីហនុ លោកគួច ចំរើនបាន​ស្នើ​ទៅកាន់​ខេត្ត​ជាំ​ង​ស៊ូ ជួយ​គាំទ្រ​ការបើក​ដំណើរការ ​នូវ​ការហោះហើរ​ត្រង់​ពី​ទីក្រុង​អ៊ូ​ស៊ី មក​ខេត្ត​ព្រះសីហនុ​ឡើងវិញ ​បន្ទាប់ពី​ខកខាន​មួយ​  រយៈពេល​ដោយសារ​កូ​វីដ និង​ជួយ​ជំរុញ​អ្នកវិនិយោគទុន។

ក្នុងដំណើរទស្សនកិច្ចទៅកាន់ខេត្តជាំងស៊ូ កាលពីសប្តាហ៍មុនលោកគួច ចំរើនបានជួបពិភាក្សាការងារ ជាមួយលោកស៊ី ឈុនលី និងបានជម្រុញ ឲ្យអ្នកធុរកិច្ចខេត្តនេះ​មក​បណ្តាក់ទុន នៅក្នុង​តំបន់​សេដ្ឋកិច្ច​ពិសេស​ក្រុងព្រះសីហនុ ឱ្យបា​ន​កាន់តែច្រើន​ថែមទៀត​។ជាការ​ឆ្លើយតប ភាគី​ចិន បានទទួល​យក​និង​គាំទ្រ​សំណើ​នះ នឹង​បាន​អះអាងថា នឹង​បន្ត​ពង្រឹង​កិច្ចសហប្រតិបត្តិការ ​ខេត្ត​ក្រុង​បងប្អូន ខេត្ត​ព្រះសីហនុ​-​ជាំ​ងស៊ូ និង​ក្រុងព្រះសីហនុ​-​អ៊ូ​ស៊ី លើ​វិស័យសេដ្ឋកិច្ច ឧស្សាហកម្ម ពាណិជ្ជកម្ម ការវិនិយោគ ទេសចរណ៍ និង​វប្បធម៌​បន្ថែមទៀត​។​

ទាកទិន​នឹង​កិច្ចសហការ​ជាមួយ​ចិន​នេះដែរ ថ្លែង​ក្នុងជំនួប​ពិភា​ក្សា​ការងារ​ ជាមួយ​លោក វ៉ាង អ៊ី​ប៉ (Wang Yubo) អភិបាលខេត្ត​យូ​ណាន នៃ​សាធារណរដ្ឋ​ប្រជាមានិត​ចិន កាល​ថ្ងៃទី​១៦ ខែវិច្ឆិកា លោក ហ៊ុន ម៉ា​ណែ​ត នាយករដ្ឋមន្ត្រី​កម្ពុជា បាន​លើកឡើងថា ចិន​តែងតែ​លើកកម្ពស់ ​ទំនាក់ទំនង​ជាមួយ​កម្ពុជា សំដៅ​ចូលរួមចំណែក​ក្នុង​ការជួយ​ ដល់​ប្រទេស​កំពុងអភិវឌ្ឍន៍​ឱ្យមាន​ការរីកចម្រើន​។​លោកបញ្ជាក់​ថា នៅ​កម្ពុជា​ក្រោម​ក្របខ័ណ្ឌ ​កិច្ចសហប្រតិបត្តិការ “ខ្សែក្រវាត់ និង​ផ្លូវ” គឺ​គម្រោង​អភិវឌ្ឍន៍​ហេដ្ឋារចនាសម្ព័ន្ធ​ធំៗ​ជាច្រើន បាន​លេចចេញ​ជា​រូបរាង​ឡើង រួមមាន  ការអភិវឌ្ឍ​តំបន់​សេដ្ឋកិច្ច​ពិសេស​ខេត្ត​ព្រះសីហនុ ផ្លូវ​ល្បឿន​លឿន​ភ្នំពេញ​-​ព្រះសីហនុ គម្រោង​សាងសង់​ផ្លូវ​ល្បឿន​លឿន​ភ្នំពេញ​-​បាវិត និង​អាកាសយានដ្ឋាន​អន្តរជាតិ​សៀមរាប​ អង្គរ​ថ្មី​នេះជាដើម​៕

​

ដោយៈ ស៊ីវ ម៉េង
ភ្នំពេញៈ ស្របពេលការធ្វើទីផ្សារឆ្ពោះទៅកាន់អន្តរជាតិ អ្នកវិនិយោគជាជនបរទេសកាន់តែច្រើន បាននិងកំពុងចាប់អារម្មណ៍ទិញផ្ទះនៅបុរីវិមានសំណាងសម្រាប់ស្នាក់នៅ ក៏ដូចជាការវិនិយោគ។
លោកឧកញ៉ាបណ្ឌិតគីម ហ៊ាងប្រធានKW Cambodia និងជាអ្នកអភិវឌ្ឍន៍បុរីវិមានសំណាង បានមានប្រសាសន៍ឲ្យដឹង តាមរយៈបណ្តាញតេឡេក្រាមនារសៀលថ្ងៃទី២៩ វិច្ឆិកានេះថា ការធ្វើទីផ្សារបុរីវិមានសំណាងបាន និងកំពុងផ្តោតលើរាជធានីភ្នំពេញ និងតាមបណ្តាខេត្តនានា។

លើសពីនេះ បុរីបាននិងកំពុងធ្វើទីផ្សារ នៅក្រៅប្រទេសដូចជា ប្រទេសឹង្ហបុរី ឥណ្ឌូនេស៊ី និងឥណ្ឌា។
លោកឧកញ៉ាបានបន្តថា យើងកំពុងផ្តោតលើទីផ្សារក្រៅប្រទេសបន្ថែមទៀត ដូចជា ប្រទេសចិន ជប៉ុន កូរ៉េ តៃវ៉ាន់ជាដើម ដើម្បីពង្រីកទីផ្សាររបស់យើងកាន់តែធំ ព្រោះបច្ចុប្បន្នជនបរទេសអាចមានសិទ្ឋទិញផ្ទះ ដីបានតាមរយៈច្បាប់បរធនបាលកិច្ច សម្រាប់ការស្នាក់នៅ និងវិនិយោគរយៈពេលវែងនៅកម្ពុជា”។

លោកឧកញ៉ាបណ្ឌិតគីម ហ៊ាងបានបន្តថា នៅក្រោមយន្តការនៃច្បាប់បរធនបាលកិច្ច ធនាគារធំៗមួយចំនួនកំពុងអនុវត្តន៍យន្តការដូចជា Philipytrust, Canatrust ជាដើម ដែលធនាគារពាណិជ្ជទាំងនេះ នឹងជួយសម្រួលបែបបទនិតិវិធីនានា ដល់ជនបរទេស ដែលអាចទិញ ផ្ទះនៅកម្ពុជាបាន ហើយអនុញ្ញាត្តឲ្យជនទាំងនោះធ្វើការ និងស្នាក់នៅរយៈពេលវែងនៅកម្ពុជា៕