ដោយៈ គង់ សូរិយា

        ភ្នំពេញៈ អ្នកជំនួញថៃមួយក្រុម ដឹកនាំដោយលោក ឈើតគៀត អត្ថាករ ឯកអគ្គរាជទូតថៃប្រចាំកម្ពុជា ព្រមជាមួយមន្ត្រីរាជការ នៃស្ថានទូតនិងវិស័យឯកជនថៃនៅកម្ពុជា ជាង២០ក្រុមហ៊ុន បានចុះទស្សនកិច្ច នៅខេត្តក្រចេះ ដើម្បីធ្វើការសិក្សាស្វែងយល់ពីឱកាសធ្វើធុរកិច្ច វិនិយោគ និងតំណរភ្ជាប់តំបន់សេដ្ឋកិច្ចថ្មី រវាងថៃ-កម្ពុជា។

ដំណើរទស្សនកិច្ចនេះ ដោយប្តេជ្ញាចិត្ត នៅក្នុងការបង្កើនផលប្រយោជន៍សេដ្ឋកិច្ចរវាងគ្នានឹងគ្នា ឲ្យកាន់តែច្រើនឡើងថែមទៀត ជាពិសេសការបង្កើន នូវទំហំការធ្វើពាណិជ្ជកម្ម និងវិនិយោគ និងការជំរុញគាំទ្រ វិស័យឧស្សាហកម្មរបស់ប្រទេសទាំងពីរ អាចតភ្ជាប់ខ្សែចង្វាក់ផ្គត់ផ្គង់បញ្ជូលគ្នា និងពង្រីកនូវឱកាសនៃតំណរភ្ជាប់ ទៅកាន់ប្រទេសនៅក្នុងតំបន់។

គណៈប្រតិភូដែលជាតំណាងរបស់រដ្ឋ និងឯកជនរបស់ថៃ បានធ្វើដំណើរទស្សនកិច្ច តំបន់សេដ្ឋកិច្ចពិសេសខេត្តក្រចេះ(UBE Snoul Special Economic Zone) និងបានស្តាប់អំពីការធ្វើបទបង្ហាញ ដោយលោក Hean Sopauline, Director of SEZ Operation And Management Department of CDC ដែលបានធ្វើការអត្ថាអធិប្បាយ អំពីសក្តានុពលរបស់តំបន់សេដ្ឋកិច្ចពិសេសថ្មី នៅក្នុងខេត្តក្រចេះ។

បន្ថែមពីនោះទៀត ព្រមទាំងមានការបង្ហាញឱកាស នៅក្នុងការវិនិយោគនៅក្នុងខេត្តក្រចេះ ដែលមានសក្តានុពលក្នុងវិស័យកសិកម្ម និងកសិឧស្សាហកម្ម ដោយបច្ចុប្បន្ននេះ មានរោងចក្រកែច្នៃកៅស៊ូ និងរោងចក្រឧស្សាហកម្ម បានបង្កើតជាបន្តបន្ទាប់ នៅក្នុងតំបន់សេដ្ឋកិច្ចពិសេសនេះផងដែរ។

លោកហេង សុថា អភិបាលរងខេត្តក្រចេះ ក៏បានទទួលស្វាគ​មន៍ នឹងអមដំណើរប្រតិភូទស្សនកិច្ច ច្រកទ្វារអន្តរជាតិត្រពាំងស្រែ (កម្ពុជា-វៀតណាម) (Tropeang Srea International Border Check Point) ដែលបានបង្ហាញឲ្យឃើញ អំពីការតភ្ជាប់គ្នារវាងកម្ពុជា និងវៀតណាម រួមទាំងឱកាសរបស់ថៃ នៅក្នុងការដឹកជញ្ជូនទំនិញទៅកាន់កំពង់ផែទឹកជ្រៅទីក្រុងហូជិមិញ បានយ៉ាងស្រួលទៀតផង។

សកម្មភាពទាំងអស់ខាងលើ ជាចំណែកមួយនៃភារកិច្ចការទូតសេដ្ឋកិច្ច ស្ទុះទៅមុខរបស់ស្ថានទូតថៃប្រចាំនៅកម្ពុជា ដែលការរៀបចំសកម្មភាព នៅក្នុងការស្វែងយល់ឱកាសសេដ្ឋកិច្ច ពាណិជ្ជកម្ម វិនិយោគ និងការតភ្ជាប់រវាងថៃ និងកម្ពុជានេះ ត្រូវបានរៀបចំឡើងជារៀងរាល់ឆ្នាំ។

ជាមួយគ្នានេះ ប្រតិភូដដែលបាន ចុះបំពេញទស្សនកិច្ចនៅខេត្តស្ទឹងត្រែង រយៈពេល២ថ្ងៃ គឺនៅថ្ងៃទី២-៣ ខែមេសា ឆ្នាំ២០២៤។

លោក ឈើតគៀត អត្តាករ បានដឹកនាំមន្រ្តីស្ថានទូត និងតំណាងវិស័យឯកជន ចូលជួនសម្តែងការគួរសម ពិភាក្សាការងារជាមួយឯលោក ស្វាយ សំអ៊ាង អភិបាលខេត្តស្ទឹងត្រែងផងដែរ។

ឯកអគ្គរាជទូតថៃ បានថ្លែងថា ក្នុងដំណើរទស្សនកិច្ចនៅខេត្តស្ទឹងត្រែងរយៈ២ថ្ងៃ ក្នុងគោលបំណងសំខាន់ គឺរៀបចំសកម្មភាព CSR រួមជាមួយសហគមន៍ថៃ និងវិស័យឯកជនថៃ នៅកម្ពុជា ដើម្បីជួយគាំទ្រ ដល់ការអភិវឌ្ឍន៍ សហគមន៍មូលដ្ឋាន ស្វែងរកឱកាសពាណិជ្ជកម្ម និងវិនិយោគក្នុងខេត្តស្ទឹងត្រែង ដើម្បីលើកកម្ពស់ការយល់ដឹងរបស់មន្រ្តីថៃ និងកម្ពុជា ឱ្យកាន់តែជិតស្និតបន្ថែទៀតលើផ្នែកពាណិជ្ជកម្ម និងការវិនិយោគ ព្រមទាំងតភ្ជាប់ក្នុងតំបន់។

អភិបាលខេត្តស្ទឹងត្រែង លោកស្វាយ សំអ៊ាងបានសម្តែងការរីករាយរាយ ដែលលោ​កឯកអគ្គរាជទូតថៃប្រចាំកម្ពុជា បានដឹកគណៈប្រតិភូ មកទស្សនកិច្ច និងសម្តែងការគួរសម ពិភាក្សាការងារ។

លោកអភិបាលខេត្ត បានជំរុញភាគីថៃ ពង្រឹងនៅកិច្ចសហប្រតិបត្តិការរវាងស្ថានទូតថៃ និងខេត្តស្ទឹងត្រែងឱ្យតែល្អប្រសើរ ជំរុញឱ្យទីប្រឹក្សាបច្ចេកទេស ជំនាញដែលពាក់ព័ន្ធផ្នែកសេដ្ឋកិច្ច សិក្សាស្វែងយល់បន្ថែមទៀតពីសក្កានុពល និងជីវភាពប្រជាពលរដ្ឋ ដើម្បីនាំអ្នកវិនិយោគ លើវិស័យឧស្សាហកម្ម កសិកម្មនៅខេត្តស្ទឹងត្រែង ដោយសារខេត្តស្ទឹងត្រែងមានការវិនិយោគ លើវិស័យ កសិកម្ម កសិឧស្សាហកម្ម ដូចជា៖ រោងចក្រកៅស៊ូ ស្វាយ ចន្ទី ចេកអំបូង វិស័យនានា៕

        ដោយៈ គង់ ម៉ាលីនណា

        ភ្នំពេញៈ ក្រសួងពាណិជ្ជកម្ម និងទីភ្នាក់ងារអភិវឌ្ឍន៍អង្គការសហប្រជាជាតិ(UNDP) បាននិងកំពុងផ្តោតលើកិច្ចសហប្រតិបត្តិការចំនួន៣សំខាន់ៗ។

ព័ត៌មាននេះ ត្រូវបានលើកឡើងក្នុងពេលលោកជំទាវ តឹករ៉េត កំរង រដ្ឋលេខាធិការក្រសួងពាណិជ្ជកម្ម តំណាងដ៏ខ្ពង់ខ្ពស់របស់ លោកជំទាវ ចម និម្មល រដ្ឋមន្ត្រីក្រសួងពាណិជ្ជកម្ម បានអនុញ្ញាតជូន លោកស្រី Alissar Chaker នាយិការUNDP Cambodia ចូលជួបសម្តែងការគួរសម និងពិភាក្សាការងារទាក់ទង នឹងលទ្ធភាពសម្រាប់កិច្ចសហប្រតិបត្តិការ៣។

កិច្ចសហប្រតិបត្តិការទាំងបីនោះរួមមាន ទី១ កិច្ចសហប្រតិបត្តិការនៅក្នុងកម្មវិធីការងាររបស់ UNDP Cambodia ២០២៤-២០២៨ ទី២ ការពង្រីកភាពជាដៃគូយុទ្ធសាស្រ្ត សម្រាប់ការពន្លឿន ដើម្បីបញ្ចប់ការសិក្សាការចាកចេញ ពីឋានៈជាប្រទេសអភិវឌ្ឍន៍តិចតួច (LDC Graduation) និងទី៣ ការធ្វើពិពិធកម្មសេដ្ឋកិច្ច ពាណិជ្ជកម្មតាមប្រព័ន្ធអេឡិចត្រូនិក និងសេដ្ឋកិច្ចឌីជីថល ព្រមទាំងការចូលរួម ក្នុងការបង្កើតក្របខ័ណ្ឌ គោលនយោបាយពាណិជ្ជកម្មកម្ពុជាឆ្ពោះទៅកាន់ ២០៣០ និងគោលនយោបាយពាណិជ្ជកម្មឌីជីថល។

ក្នុងឱកាសនោះ មន្រ្តីជាន់ខ្ពស់ក្រសួងពាណិជ្ជកម្មកម្ពុជា និង UNDP Cambodia បានបញ្ជាក់ពីជំហរយ៉ាងមុតមាំ ក្នុងការបន្តសហការគ្នានាពេលខាងមុខ៕

ដោយ: គង់ លាងហួរ

អន្តរជាតិ: យោងតាមការសិក្សាបានរកឃើញថា ប្រទេសថៃអាចបង្កើនប្រាក់ចំណូលពីវិស័យទេសចរណ៍ ប្រហែល១២ពាន់លានដុល្លារអាមេរិក ដោយប្រទេសនេះ នឹងអនុញ្ញាត្តឲ្យមានអាជ្ញាប័ណ្ណកាស៊ីណូស្របច្បាប់ និងដោះស្រាយបញ្ហាល្បែងស៊ីសងខុសច្បាប់រ៉ាំរ៉ៃ។

នៅពេលដែលមជ្ឈមណ្ឌលកម្សាន្តកាស៊ីណូ ត្រូវបានសាងសង់ឡើង ការចំណាយរបស់ភ្ញៀវទេសចរជាមធ្យម អាចកើនឡើងចំនួន៥២% ទៅដល់១៧៨៦,៦ដុល្លារអាមេរិក ក្នុងដំណើរកំសាន្តមួយលើក។ នេះ​បើ​យោងតាម​ការ​សិក្សា​របស់​ក្រុម​សមាជិក​សភា​ថៃ។

ការសិក្សាក៏បានរកឃើញផងដែរថា ការបង្កើតប្រាក់ចំណូលបន្ថែមទាំងនេះ អាចជួយចូលរួមចំណែកបង្កើន កំណើនផលទុនជាតិសរុប(GDP)របស់ប្រទេសថៃ ចំនួន១,១៦ភាគរយ។
លទ្ធផលវិជ្ជមានផ្នែកសេដ្ឋកិច្ចពីការសិក្សានេះ អាចជំរុញលើកទឹកចិត្តឱ្យសភាថៃ អនុម័តសេចក្តីព្រាងច្បាប់ ដើម្បីធ្វើឱ្យមានអាជីវកម្មកាស៊ីណូ និងទម្រង់លេងល្បែងស៊ីសងផ្សេងៗទៀត ក្លាយជាអាជីវកម្មស្របច្បាប់។

ប៉ុន្តែក្នុងពេលជាមួយគ្នានេះ ក្រុមសមាជិកសភា ដែលដឹកនាំដោយលោកអនុរដ្ឋមន្ត្រីក្រសួងហិរញ្ញវត្ថុថៃ Julapun Amornvivat បានផ្តល់អនុសាសន៍ ឱ្យមានវិធានការការពារមួយចំនួន ដើម្បីការពារប្រជាជនថៃ ពីការញៀននឹងការភ្នាល់ល្បែងស៊ីសង។នាយករដ្ឋមន្ត្រីថៃ លោក សេដ្ឋា ថាវីស៊ីន ដែលបាននិងកំពុងជំរុញដាក់ចេញគោលនយោបាយ ទាក់ទាញលំហូរវិនិយោគផ្ទាល់ពីបរទេស(FDI) ក៏បានប្រកាសចំណាត់ការនេះផងដែរ។ ដូច្នេះសេចក្តីព្រាងច្បាប់ អាចឆ្លងកាត់ការអនុម័តពីសភាដោយភាពងាយស្រួល។

លោក Julapun បានគូសបញ្ជាក់នៅលើបណ្តាញសង្គម X ថា “មជ្ឈមណ្ឌលកម្សាន្តរបស់យើង នឹងមិនមែនមានត្រឹមតែកាស៊ីណូប៉ុណ្ណោះទេ ប៉ុន្តែថែមទាំងមានសណ្ឋាគារលំដាប់ផ្កាយ៥ ភោជនីយដ្ឋាន និងកន្លែងទេសចរណ៍ផ្សេងទៀតផងដែរ”។

លោកបានបន្ថែមថា “យើងមានបំណងបង្កើតមជ្ឈមណ្ឌលកំសាន្តនេះឡើង ដើម្បីលើកកម្ពស់វិស័យទេសចរណ៍ តាមរយៈវិធីសាស្ត្រថ្មីមួយ ដើម្បីបង្កើនប្រាក់ចំណូលសម្រាប់ប្រទេសជាតិ និងដោះស្រាយបញ្ហាល្បែងស៊ីសងខុសច្បាប់”៕

        ដោយៈ គង់ សូរិយា

        សៀមរាបៈ  របាយការណ៍បានបង្ហាញថា គិតត្រឹមត្រីមាសទី១ ឆ្នាំ២០២៤នេះ អាកាសយានដ្ឋានអន្តរជាតិសៀមរាប-អង្គរ ទទួលបានជើងហោះហើរត្រង់ពីចំនួន៨ប្រទេស។

ក្នុងចំណោមអាកាសយានដ្ឋានមកពីប្រទេសចំនួន៨ មានប្រទេសចំនួន៦ក្នុងតំបន់អាស៊ាន បូករួមចិន និងកូរ៉េខាងត្បូង។ ខណៈឥណ្ឌា នឹងមានជើងហោះហើរត្រង់មកកម្ពុជា នាខែមិថុនាខាងមុខ។ នេះបើតាមការបញ្ជាក់ពីលោក ពេជ្រ សុប៉ុនតារា អ្នកទទួលបន្ទុកអភិវឌ្ឍន៍ការហោះហើរ នៃអាកាសយានដ្ឋានអន្តរជាតិសៀមរាប-អង្គរ។

លោកបន្ថែមថា “បច្ចុប្បន្នអាកាសយានដ្ឋាននេះ ទទួលបានភ្ញៀវភាគច្រើនពីប្រទេសថៃ និងប្រទេសវៀតណាម”។បច្ចុប្បន្នជាមធ្យមក្នុងមួយថ្ងៃ អាកាសយានដ្ឋាននេះទទួលបានជើងហោះហើរចំនួន៥០ជើងទាំងទៅ និងមក ហើយទទួលបានភ្ញៀវខ្ទង់៥០០០នាក់។ ចំនួននេះបានធ្វើឲ្យជើងហោះហើរ ក្នុងត្រីមាសទី១ នៃឆ្នាំ២០២៤នេះ មានការកើនឡើងប្រមាណ៥% បើធៀបនិងដំណាច់ឆ្នាំ២០២៣កន្លងទៅ។ នេះបើតាមការបញ្ជាក់ពីលោក ពេជ្រ សុប៉ុនតារា។អាកាសយានដ្ឋានអន្តរជាតិសៀមរាប-អង្គរ បានចាប់ផ្តើមសាងសង់កាលពីខែមីនា ឆ្នាំ២០២០ ដោយក្រុមហ៊ុន Angkor International Airport Investment (Cambodia) Co.,Ltd (AIAI) ក្រោមទុនវិនិយោគប្រមាណ១១០០ លានដុល្លារអាមេរិក ដែលជាការវិនិយោគ BOT (សាងសង់ ដំណើរការ និងផ្ទេរមកវិញ) ក្នុងរយៈពេល៥៥ឆ្នាំ។

ព្រលានយន្តនេះ ត្រូវកសាងឲ្យទៅជាលំដាប់ថ្នាក់ 4E សម្រាប់យន្តហោះធំៗគ្រប់ប្រភេទ ដែលអាចហោះឡើង និងចុះចតបាន។

ជាមួយគ្នានេះផងដែរ ក្នុងរយៈពេល៣ខែ ឆ្នាំ២០២៤នេះ កម្ពុជាទទួលបានចំណូលជាង១៦លានដុល្លារ ពីការលក់បណ្ណចូលទស្សនារមណីដ្ឋានអង្គរ ប្រាសាទកោះកែរ និងកំពង់ផែចុងឃ្លៀស។ នេះបើតាមសេចក្ដីប្រកាសព័ត៌មាន ស្តីពីស្ថិតិភ្ញៀវទេសចរបរទេស ទិញបណ្ណចូលទស្សនារមណីយដ្ឋានអង្គរ។

ក្នុងរយៈពេល៣ខែ ឆ្នាំ២០២៤នេះ ភ្ញៀវទេសចរបរទេស ទិញបណ្ណចូលទស្សនារមណីយដ្ឋានអង្គរ និងប្រាសាទកោះកែរ មានចំនួន ៣៤៧,៥៣៤នាក់កើន៤៧.០៥% និងទទួលបានចំណូលជាង ១៦,៥លានដុល្លារអាមេរិក កើនឡើង៤៨.៤៧% បើធៀបនឹងរយៈពេលដូចគ្នា នៅឆ្នាំ២០២៣៕

       ដោយៈ គង់ សូរិយា

       ភ្នំពេញៈ ក្រុមថ្នាក់ដឹកនាំសមាគមសហគ្រិន សារព័ត៌មានសេដ្ឋកិច្ចកម្ពុជា(CEMEA)បានបើកកិច្ចប្រជុំ ដើម្បីរៀបចំផែនទីបង្ហាញផ្លូវឆ្ពោះទៅមុខ តាមផែនការនិងយុទ្ឋសាស្រ្តរបស់ខ្លួន។

អ្វីដែលជាផែនការយុទ្ឋសាស្រ្តរបស់ CEMEA គឺផ្តោតលើការរួមចំណែកជាមួយរាជរដ្ឋាភិបាលកម្ពុជា ក្នុងការផ្សព្វផ្សាយព័ត៌មាន ដែ លមានភាពចម្រុះ ផ្នែកសេដ្ឋកិច្ចគ្រប់ជ្រុងជ្រោយ លឿនរហ័ស ប្រក បដោយមូលដ្ឋានវិជ្ជាជីវៈ និងអាចទុកចិត្តបានដល់សាធារណៈ និងអ្នកវិនិយោគជាតិ អន្តរជាតិ។

លោកយិន លាងគង់ប្រធានសមាគមសហគ្រិនសារព័ត៌មានសេដ្ឋកិច្ចកម្ពុជាបានមានប្រសាសន៍ បន្ទាប់ពីកិច្ចប្រជុំនាព្រឹកថ្ងៃទី០២ ខែមេសានេះថា ការរៀបចំផែនការលំអិត លើផែនការ និងយុទ្ឋសាស្រ្តរបស់សមាគម ពិតជាមានសារៈសំខាន់ណាស់ ប្រៀបដូចជាយើងមានផែនទីបង្ហាញផ្លូវថា យើងត្រូវដើរទៅណា ក្នុងគោលដៅអ្វី និងចង់សម្រេចបានលទ្ឋផលអ្វីនាពេលខាងមុខ។

លោកបន្តថា “បរិបទនេះ ការផ្តោតលើការផ្សព្វផ្សាយពីព័ត៌មានសេដ្ឋកិច្ច ដែលមានលក្ខណៈគ្រប់ជ្រុងជ្រោយ ពិតជាមានសារៈសំខាន់ណាស់ ដើម្បីគាំទ្រគោលនយោបាយរបស់រាជរដ្ឋាភិបាល ក្នុងការចាកចេញពីប្រទេសអភិវឌ្ឍន៍តិចតួច”។

លោកបន្តថា “យើងក៏គាំទ្រនូវគោលនយោនយោបាយរបស់រដ្ឋាភិបាល ក្នុងការរុញប្រទេសឆ្ពោះទៅកាន់ឋានៈ ជាប្រទេសមានប្រាក់ចំណូលមធ្យម កម្រិតខ្ពស់នៅឆ្នាំ២០៣០ និងប្រទេសមានប្រាក់ចំណូលខ្ពស់នៅឆ្នាំ២០៥០”។

ថ្នាក់ដឹកនាំសមាគម ដែលបានចូលរួមប្រជុំមាន លោកយិន លាងគង់ សហស្ថាបនិក និងអគ្គនាយកគេហទំព័រPropertyarea& Cambodiafinancialtimes.com លោកអ៊ុំ សារ៉ាវុធ ស្ថាបនិកគេហទំព័រCFN លោកកៃ គឹមសុង សហស្ថាបនិកគេហទំព័រ Amazadia Education លោកសយ សុភា និពន្ឋនាយកសារព័ត៌មានដើមអំពិល លោកលីម ឡាយហ៊ត ស្ថាបនិកគេហទំព័រASEAN Properties លោកស្រីហាន សូជីន ស្ថាបនិកព្រឹត្តិសកល លោកស្រីអេង ស្រីទៀង និពន្ឋនាយកសារព័ត៌មានដំរី លោកនុត ផាន់ណាតំណាងគេហទំព័រCambodiafinancialtimes.com លោកនួន សុថេរ៉ូ សហស្ថាបនិកគេហទំព័រ Amazadia Education ជាដើម៕

ដោយៈ គង់ សូរិយា
ភ្នំពេញៈ សម្តេចធិបតី ហ៊ុន ម៉ាណែត បានថ្លែងថា កម្ពុជាបានឆ្លងកាត់ការផ្លាស់ប្តូរគួរឱ្យកត់សម្គាល់ ដោយបានវិវត្តន៍ទៅជាសេដ្ឋកិច្ចទំនើប ដែលមានសមារណកម្មក្នុងសេដ្ឋកិច្ចសកល និងអាចវិលត្រលប់ទៅរកស្ថានភាពជំងឺរាតត្បាត ជាមួយអត្រាកំណើនក្នុងរង្វង់៧ភាគរយនៅឆ្នាំ២០២៨។
សម្តេចបានបញ្ជាក់បែបនេះ ក្នុងអញ្ជើញជាអធិបតីភាពដ៏ខ្ពង់ខ្ពស់ ក្នុងពិធីបើកកិច្ចប្រជុំកំពូលធុរកិច្ចអាស៊ាន-កម្ពុជា ឆ្នាំ២០២៤ នាព្រឹកថ្ងៃទី២ មេសានេះ។

សម្តេចបានបន្តថា “សេដ្ឋកិច្ចកម្ពុជា ក៏បានបង្ហាញពីភាពធន់គួរឱ្យកត់សម្គាល់”។
សម្តេចបន្ថែមថា មុនការឆ្លងរាលដាលនៃជំងឺកូវីដ-១៩, កម្ពុជារក្សាបាននូវអត្រាកំណើនសេដ្ឋកិច្ច ជាមធ្យមលើសពី ៧%ក្នុងមួយឆ្នាំ សម្រាប់រយៈពេល២ទសវត្សរ៍។ ទោះបីមានការបន្ទច់បង្អាក់នាពេលថ្មីៗនេះក៏ដោយ សេដ្ឋកិច្ចកម្ពុជា ក៏បានស្ទុះងើបឡើងវិញ ជាមួយនឹងអត្រាកំណើន៥,៦% ក្នុងឆ្នាំ២០២៣ និងត្រូវបានព្យាករថានឹងមានកំណើន៦,៦% ក្នុងឆ្នាំ២០២៤ ហើយនឹងអាចត្រលប់ ទៅរកអត្រាកំណើនមុនជំងឺរាតត្បាត ក្នុងរង្វង់ ៧% ក្នុងឆ្នាំ ២០២៨ ដែលការណ៍នេះ បង្ហាញអំពី អនាគតសេដ្ឋកិច្ចប្រកបដោយក្តីសង្ឃឹមរបស់កម្ពុជា។

សម្តេចធិបតីបានបន្តថា “កម្ពុជាគឺជាដៃគូដ៏រស់រវើក និងដ៏ទាក់ទាញ ក្នុងសហគមន៍អាស៊ាន។ ទីតាំងប្រកបដោយឧត្តមភាពរបស់កម្ពុជា ផ្តល់នូវការតភ្ជាប់ដោយរលូននៅទូទាំងតំបន់ និងបង្កើតឱ្យមានប្រព័ន្ធអេកូឡូស៊ីនៃកិច្ចសហការ ដែលផ្ដោតលើការផ្តល់ផលប្រយោជន៍ទៅវិញ-ទៅមក និងសុខុមាលភាពរួមក្នុងតំបន់”។
សម្តេចធិបតី ហ៊ុន ម៉ាណែត បានថ្លែងបញ្ជាក់ទៀតថា កម្ពុជាជឿជាក់យ៉ាងមុតមាំថា សហគមន៍សេដ្ឋកិច្ចអាស៊ាន ដែលមានភាពរឹងមាំ, ភាពធន់ និងសមាហរណកម្ម អាចនាំមកនូវវិបុលភាពរួម សម្រាប់រដ្ឋជាសមាជិកទាំងអស់ ។ ក្នុងស្មារតីនេះ, រាជរដ្ឋាភិបាលកម្ពុជា បាន និងកំពុងជំរុញការអនុវត្ត ”យុទ្ធសាស្ត្រប្រទេសបូក” (Plus-One Strategy) តាមរយៈការទាក់ទាញការវិនិយោគ ជាពិសេសក្នុងឧស្សា- ហកម្មដែលប្រើបច្ចេកវិទ្យាមធ្យម ឱ្យមកសាងសង់រោងចក្រនៅកម្ពុជា ដើម្បីផ្គត់ផ្គង់គ្រឿងបន្លាស់ ឬផលិតផលពាក់កណ្តាលសម្រេច ទៅឱ្យរោងចក្រធំៗ នៅក្នុងប្រទេសជិតខាងក្នុងតំបន់អាស៊ាន។ កម្ពុជាបានអនុម័តច្បាប់ថ្មីស្តីពី ការវិនិយោគ ដើម្បីផ្ដល់ជូនវិនិយោគិននូវសក្តានុពល និងឧត្តមភាពជាយុទ្ធសាស្ត្រ ដ៏គួរឱ្យទាក់ទាញ ជាមួយនឹងការលើកទឹកចិត្តជាច្រើន ដល់ គម្រោងវិនិយោគក្នុងវិស័យអាទិភាពសំខាន់ៗ។

សម្តេចបន្តថា រាជរដ្ឋាភិបាល បាននិងកំពុងអនុវត្តការកែទម្រង់គ្រប់ជ្រុងជ្រោយ ប្រកបដោយមហិច្ឆតា ដើម្បីសម្រួលនីតិវិធី និងបង្កើនភាពទាក់ទាញនៃការវិនិយោគជារួម។ រាជរដ្ឋាភិបាលក៏បាន និងកំពុងជំរុញបរិយាកាស នៃកិច្ចសន្ទនាបើកចំហ តាមរយៈការរៀបចំ វេទិការាជរដ្ឋាភិបាល ផ្នែកឯកជន ដើម្បីសហការយ៉ាងសកម្មជាមួយវិនិយោគិនជាតិ និងអន្តរជាតិ ក្នុងការដោះស្រាយបញ្ហាប្រឈម និងធានានូវភាពជោគជ័យនៃការធ្វើធុរកិច្ច និងការវិនិយោគនៅកម្ពុជា។

សម្តេចធិបតី ហ៊ុន ម៉ាណែត បានបង្ហើបឲ្យដឹងផងដែរថា រាជរដ្ឋាភិបាល ទើបបានដាក់ចេញនូវ “កម្មវិធីពិសេសជំរុញការវិនិយោគ ក្នុងខេត្តព្រះសីហនុ ឆ្នាំ២០២៤” ដើម្បីផ្តល់ “អត្ថប្រយោជន៍ពិសេស” ដល់ការវិនិយោគក្នុងឆ្នាំ ២០២៤ នៅក្នុងខេត្តព្រះសីហនុ ។
កម្មវិធីពិសេសនេះគឺជាជំហានដ៏សំខាន់មួយ ក្នុងការប្រែក្លាយខេត្តព្រះសីហនុ ជាតំបន់សេដ្ឋកិច្ចពិសេសពហុបំណង ដើម្បីបម្រើជា មជ្ឈមណ្ឌលតំបន់ សម្រាប់ផលិតកម្ម ពាណិជ្ជកម្ម ធុរកិច្ច ហិរញ្ញវត្ថុ ។ល។ រាជរដ្ឋាភិបាល ក៏បាននិងកំពុងរៀបចំការរចនាឡើងវិញនូវតំបន់សេដ្ឋកិច្ចពិសេស ដោយគិតគូរពីលក្ខណៈចម្រុះ នៃឧស្សាហកម្ម, វិនិយោគិន និងអ្នកអភិវឌ្ឍតំបន់សេដ្ឋកិច្ចពិសេស។

ទាក់ទងបរិបទតំបន់ សម្តេចធិបតីបានថ្លែងថា កិច្ចប្រជុំកំពូលធុរកិច្ចអាស៊ាន-កម្ពុជា មានគោលដៅជំរុញសក្តានុពលអាស៊ាន ដែលកម្ពុជា គឺជាចំណុចស្នូល និងលើកយកប្រធានបទសំខាន់ៗមកជជែកពិភាក្សារួមមាន៖ តំណភ្ជាប់ខ្សែបញ្ជូនថាមពលអាស៊ាន ចីរភាពនិងថាមពលកកើតឡើងវិញរបស់អាស៊ាន កម្ពុជា គឺជាច្រកទ្វារទៅកាន់អាស៊ាន និងការប្រើប្រាស់បច្ចេកវិទ្យា ដើម្បីកំណើនប្រកបដោយបរិយាប័ន្ន។
សម្តេចបន្តថា មូលបទ “បញ្ចេញសក្តានុពលអាស៊ាន៖ ការតភ្ជាប់បច្ចេកវិទ្យា និងកំណើនប្រកបដោយបរិយាប័ន្ន” គឺជារបៀបវារៈចំកាលៈទេសៈ និងមានមហិច្ឆតា”៕

ដោយ: គង់ លាងហួរ

អន្តរជាតិ: យោងតាមការសិក្សា​​ថ្មី​មួយបានរកឃើញ​ថា ប្រទេស​ចិន​ ខកខាន​​ផ្តល់​ប្រាក់កម្ចី​ចំនួន៥២​ពាន់​លាន​ដុល្លារ ដល់​គម្រោង​​ហេដ្ឋារចនាសម្ព័ន្ធ​នានានៅ​តំបន់​អាស៊ីអាគ្នេយ៍ ដែលស្ថិតក្រោម​គំនិត​ផ្ដួចផ្ដើម​ខ្សែក្រវ៉ាត់​ និង​ផ្លូវ (BRI)។

ការ​ខកខាន​ផ្តល់ប្រាក់កម្ចី ក្នុងទំហំទឹកប្រាក់ដ៏ធំនេះ កំពុង​ធ្វើ​ឱ្យ​អនាគត​នៃ​គំនិត​ផ្ដួចផ្ដើម​ខ្សែក្រវ៉ាត់ និង​ផ្លូវ​របស់​ប្រទេសចិន ​ស្ថិត​ក្នុង​ភាព​មិន​ច្បាស់លាស់។ នេះបើយោងតាមការ​សិក្សា​ ដែល​ចេញ​ផ្សាយ​ដោយ​វិទ្យាស្ថាន Lowy Institute ដែល​មាន​មូលដ្ឋាន​នៅ​ប្រទេស​អូស្ត្រាលី។

ការសិក្សាខាងលើបានរក​ឃើញ​ថា ក្នុង​ចំណោម​គម្រោង​​ហេដ្ឋារចនាសម្ព័ន្ធ​ខ្នាត​យក្ស​ចំនួន៣៤គម្រោង នៅ​តំបន់​អាស៊ីអាគ្នេយ៍ ដែ​ល​គម្រោង​នីមួយៗ ​មានតម្លៃ​ចាប់ពី១​ពាន់​លាន​ដុល្លារ​ឡើង​ទៅ ភាគីចិន ​បាន​ចូលរួមក្នុង​គម្រោង​ចំនួន២៤គម្រោង ដែល​មាន​តម្លៃ​សរុបចំនួន៧៧​ពាន់​លាន​ដុល្លារ​កាលពីពេលកន្លងទៅ។ទោះជាយ៉ាងណាក្តី ការសិក្សាបានបង្ហាញថា ភាគីចិន​មិនបានផ្តល់​ប្រាក់​កម្ចី ​ដូចការសន្យាក្នុង​ទំហំទឹក ប្រាក់​៥២​ពាន់​លាន​ដុល្លារ ដើម្បី​អនុវត្ត​ន៍គម្រោង​ទាំង២៤នេះឡើយ ជាពិសេស​គឺចាប់​តាំង​ពី​ផ្ទុះ​ជំងឺ​រាតត្បាត​កូវីដ​-១៩​។

វិទ្យាស្ថានខាងលើបានអះអាងថា មូលហេតុ​ដែល​នាំ​ឱ្យ​ប្រទេសចិន​ខកខាន​ផ្តល់មូលនិធិ គឺ​ដោយសារតែ​កត្តា​មួយចំនួន ដូចជា ភាគីចិន​ផ្ដោត​ខ្លាំងពេក ​ទៅលើ​គម្រោង​ហេដ្ឋារចនាសម្ព័ន្ធ​ខ្នាត​យក្ស ដែល​ងាយ​បង្ក​ឱ្យ​មាន​ហានិភ័យ ការពន្យារពេល អស្ថិរភាព​ផ្នែក​នយោបា​យ​ នៅក្នុង​បណ្តាប្រទេស​ដៃគូ​ក្នុង​តំបន់​អាស៊ី។ ភាពកំសោយលើការ​ពិគ្រោះ​យោបល់ជាមួយ​ដៃគូ​ពាក់ព័ន្ធ និង​​ការ​ងាក​ទៅ​ប្រើ​ប្រាស់​ថាម​ពល​ស្អាត។ការ​សិក្សា​បានវាយតម្លៃថា ​អនាគត​នៃ​គំនិត​ផ្តួច​ផ្តើម​ខ្សែក្រវ៉ាត់​និង​ផ្លូវ (BRI) របស់​ប្រទេសចិន ​កំពុងស្ថិតក្នុងភាពមិនប្រាកដប្រជាជាច្រើន។ ជាក់ស្តែង បញ្ហាបំណុល​នៅក្នុង​បណ្តាប្រទេស​កំពុងអភិវឌ្ឍន៍ និង​ការដាំក្បាលចុះនៃសេដ្ឋកិច្ច​ចិន បាន​នាំ​ឱ្យ​គំនិត​ផ្ដួចផ្ដើម​ខ្សែក្រវ៉ាត់​ និង​ផ្លូវ (BRI) របស់​ចិន ជួបស្ថានភាពមិនសូវអំណោយផល ដែលការណ៍នេះ នឹងជំរុញឱ្យ​ទីក្រុងប៉េកាំង ងាក​មក​ផ្តោត​លើ​គម្រោងហេដ្ឋារចនាសម្ព័ន្ធ​ខ្នាត​តូច និង​មធ្យម​នៅ​ក្រៅ​ប្រទេស​វិញ។

ទន្ទឹមនឹងនេះ គំនិត​ផ្ដួចផ្ដើម​ខ្សែក្រវ៉ាត់ និង​ផ្លូវ (BRI)  ត្រូវបានគេមើលឃើញ​ថា ជា​មធ្យោបាយពង្រីក​ឥទ្ធិពល​សេដ្ឋកិច្ច របស់​ប្រទេសចិន ​ក្នុង​គោលបំណង​ប្រែក្លាយខ្លួន ទៅជា​មហាអំណាច​របស់ពិភពលោក៕

ដោយ: គង់ លាងហួរ

អន្តរជាតិ: ស្របពេលដែលស្ថានភាពសេដ្ឋកិច្ច មិនទាន់ស្ទុះងើបឡើងវិញដូចដើមនៅឡើយ ដោយសារកម្រិតអត្រាការប្រាក់ខ្ពស់ និងភាពតានតឹងផ្នែកភូមិសាស្ត្រនយោបាយ គេសង្កេតឃើញថា មនុស្សជាច្រើន បានងាកមកជួលអាផាតម៉ិន ជំនួសឱ្យការទិញដែលត្រូវការដើមទុនច្រើន។

ជាក់ស្តែង ការជួលអាផាតម៉ិន នៅបណ្តាប្រទេសចំនួន២ក្នុងតំបន់អាស៊ាន រួមមាន ប្រទេសឥណ្ឌូនេស៊ី និងប្រទេសម៉ាឡេស៊ី បានកើនឡើងខ្ពស់គួរឱ្យកត់សម្គាល់។

ខាងក្រោមនេះគឺតម្លៃទិញ និងតម្លៃជួលអាផាតម៉ិន នៅទីក្រុងគូឡាឡាំពួរ ប្រទេសម៉ាឡេស៊ី និងទីក្រុងហ្សាការតា ប្រទេសឥណ្ឌូនេស៊ី ក្នុងត្រីមាសទី១ :

ទី១: ទីក្រុងគូឡាឡាំពួរ

ផលចំណេញត្រឡប់(return on investment) សរុបពីការជួលជាមធ្យម(Rental Yields) នៅក្នុងប្រទេសម៉ាឡេស៊ីស្ថិតក្នុងរង្វង់៥,១៦ភាគរយ នៅត្រីមាសទី១ ឆ្នាំ២០២៤នេះ។ នេះបើយោងតាមប្រភពពីគេហទំព័រ Global Property Guide។

អាផាតម៉ិន មានបន្ទប់គេងចំនួន១ នៅទីក្រុងគូឡាឡាំពួរ មានតម្លៃចំនួន២៤៩.៥២៨ដុល្លារ ក្នុងមួយយូនីត និងជួលប្រចាំខែមានតម្លៃ៧៣៥ដុល្លារ។

អាផាតម៉ិន ដែលមានបន្ទប់គេងចំនួន២ នៅទីក្រុងគូឡាឡាំពួរ មានតម្លៃចំនួន៣០៤.៥៥៨ដុល្លារក្នុងមួយយូនីត និងជួលប្រចាំខែមានតម្លៃ៩៤៥ដុល្លារ។ ចំណែកអាផាតម៉ិន ដែលមានបន្ទប់គេងចំនួន៣ មានតម្លៃចំនួន៣៦៧.៥៧០ដុល្លារក្នុងមួយយូនីត និងជួលប្រចាំខែមានតម្លៃ១.២៦០ដុល្លារ។

ទី២: ទីក្រុងហ្សាការតា

ផលចំណេញត្រឡប់ពីការវិនិយោគ(Return on Investment) ជាមធ្យម(Rental Yields) នៅក្នុងប្រទេសឥណ្ឌូនេស៊ី ស្ថិតក្នុងរង្វង់៥,៦៨ភាគរយ នៅត្រីមាសទី១ ឆ្នាំ២០២៤នេះ។ នេះបើយោងតាមប្រភពពីគេហទំព័រ Global Property Guide។

អាផាតម៉ិន ដែលមានបន្ទប់គេងចំនួន១ នៅទីក្រុងហ្សាការតា មានតម្លៃចំនួន៦៣.៤២៤ដុល្លារ ក្នុងមួយយូនីត និងជួលប្រចាំខែមានតម្លៃ១០៦ដុល្លារ។

អាផាតម៉ិន មានបន្ទប់គេងចំនួន២ នៅទីក្រុងដដែលនេះមានតម្លៃចំនួន៦៩.៧៦៦ដុល្លារ ក្នុងមួយយូនីត និងជួលប្រចាំខែមានតម្លៃ១៧៤ដុល្លារ។ ចំណែក អាផាតម៉ិន មានបន្ទប់គេងចំនួន៣ មានតម្លៃទិញចំនួន១៧១.២៤៤ដុល្លារ ក្នុងមួយយូនីត និងអាចជួលបានប្រចាំខែក្នុងតម្លៃ២៣៨ដុល្លារ៕