ដោយៈ សហការី

      ភ្នំពេញៈ កាលពីថ្ងៃទី២១ ខែសីហា ឆ្នាំ២០២៣ អូ ស៊ី អាយ ស៊ី ជាក្រុមហ៊ុនអចលទ្រព្យធំជាងគេ និងឈានមុខគេក្នុងប្រទេសកម្ពុជា ដែលពេលថ្មីៗកន្លងទៅនេះ អូ ស៊ី អាយ ស៊ី បានទទួលនូវពានរង្វាន់កិត្តិយស ជាក្រុមហ៊ុនអភិវឌ្ឍអចលនទ្រព្យល្អជាងគេ ​ប្រចាំឆ្នាំ២០២៣ (Best Developer 2023​)។

ចំណែក​គម្រោងដាយមិន បេ ហ្គាដិន (​Diamond Bay Garden) ដែលអភិវឌ្ឍដោយ អូ ស៊ី អាយ ស៊ី ក៏ទទួលបាននូវពានរង្វាន់ចំនួនពីរផងដែរ គឺ​ (១) ពានរង្វាន់អភិវឌ្ឍខុនដូល្អជាងគេ ក្នុងប្រទេសកម្ពុជា​ប្រចាំឆ្នាំ ២០២៣ (Best Condo Development 2023)​ និង (២) ​ពានរង្វាន់ខុនដូ មានទេសភាពជាប់ដងទន្លេរស្អាតជាងគេ ក្នុងប្រទេ​សកម្ពុជាប្រចាំឆ្នាំ ២០២៣​ (Best Waterfront Condo 2023)​។​

ជ័យលាភី ដែល​ក្រុមហ៊ុន អូ ស៊ី អាយ ស៊ី ទទួលបានក្នុងឆ្នាំ ២០២៣ នេះ ត្រូវបានរៀបចំឡើង និងផ្ដល់ជូនដោយ Property Guru​មកពីប្រទេស សិង្ហ បុរី ដែលបានមើលឃើញនូវស្នាដៃ ភាពច្នៃប្រឌិត លទ្ធផល ក៏ដូចជា ការគាំទ្ររបស់អតិថិជន ដែលបង្ហាញឱ្យឃើញថាក្រុមហ៊ុន អូ ស៊ី អាយ ស៊ី បានរួមចំនែកលើការអភិវឌ្ឍ និងលើកស្ទួយវិស័យអចលនទ្រព្យ នៅកម្ពុជាអស់ជាង២៣ឆ្នាំមកហើយ និងកំពុងបន្តបេសកកម្ម ក្នុងវិស័យអចលនទ្រព្យ ឱ្យកាន់តែមានភាពរីកចំរើនឡើង ប្រកបដោយចេរភាព។​

ក្នុងដំណើរនៃការបន្តបេសកកម្មនេះ គម្រោងខុនដូ​ ដាយមិន បេ​ ហ្គាដិន​ (Diamond Bay Garden) ដែលទទួលបានពានរង្វាន់ចំនួនពីរ គឺជាគម្រោងខុនដូ ចុងក្រោយគេ ដែលត្រូវបានអភិវឌ្ឍឡើងស្ថិតនៅទីតាំង ដ៏មានសក្ដានុពល ស្ថិតនៅកណ្ដាលទីក្រុងកោះពេជ្រ ហ៊ុំព័ទ្ធដោយអគារពាណិជ្ជកម្ម និងអគារតូចធំជាច្រើន ជាពិសេសនៅក្បែ ស្ពានឆ្លងទន្លេ ដែលតភ្ជាប់កោះពេជ្រ ទៅកាន់កោះនរា ដែលត្រៀមសម្ភោធដាក់ឱ្យប្រើប្រាស់នាដំណាច់ឆ្នាំ ២០២៣ខាងមុខនេះ។

ដាយមិន បេ​ ហ្គាដិន​ មានអគារសរុបចំនួន៣ មានបន្ទប់សរុប ១,៥០០យូនីត បំពាក់មកជាមួយគ្រឿងបរិក្ខាទំនើប មានសុវត្ថិភាព និងមានផាសុខភាព អមមកជាមួយទេសភាព ដ៏ត្រកាល នៃដងទន្លេទាំង ៤ និងអាចទស្សនាសម្រស់រាជធានីភ្នំពេញ បាន៣៦០ដឺក្រេ។ បច្ចុប្បន្ននេះ ដាយមិន បេ ហ្គាដិន បានប្រកាសដាក់លក់ហើយ ក្រោមការគាំទ្រយ៉ាងច្រើនពីសំណាក់អតិថិជន ដែលគ្រោងនឹងសម្ភោធន៍ជាផ្លូវការនាដំណាច់ឆ្នាំនេះផងដែរ។

នាឱកាសចូលរួមកម្មវិធីនោះ លោក TEA Theirry  អនុប្រធាននៃ ក្រុមហ៊ុន អូ ស៊ី អាយ ស៊ី បានបង្ហាញចំណាប់អារម្មណ៍ថា “យើងខ្ញុំពិតជាមានសេចក្តីត្រេកអរ ដែលគណៈកម្មាធិការ សុទ្ធសឹងជាអ្នកជំនាញផ្នែកវិស័យអចលទ្រព្យ បានធ្វើការកោតសរសើរ ​ទៅលើកិច្ចខិតខំប្រឹងប្រែង និងភាពឆ្នៃប្រឌិត ដែលយើងខ្ញុំបានសំរិតសំរាំងក្នុងការអភិវឌ្ឍគម្រោង ដាយមិន បេ ហ្គាដិន ជាពិសេសជ្រើសរើសទីតាំងដែលល្អឥតខ្ចោះ ជាមួយទេសភាពដងទន្លេ។

លោកបន្តថា អូ ស៊ី អាយ ស៊ី ពិតជាមានកិត្តិយសបំផុត ដែលបានឈ្នះពានរង្វាន់ដល់ទៅ៣ ដែលជ័យលាភីនេះ ប្រៀបបានជាកេរតំណែ​លដ៏សំខាន់ និងអស្ចារ្យមួយ ស្ថិតក្រោមម្លប់របស់ អ្នកឧកញ៉ាបណ្ឌិត ពុង ឃាវសែ ស្ថាបនិក ក្រុមហ៊ុនអូ ស៊ី អាយ ស៊ី ដែលរូបលោក បានលះបង់សម្រាប់ការអភិវឌ្ឍប្រទេសជាតិ ជាពិសេសវិស័យអចលទ្រព្យជាងពីរសតវត្សចុងក្រោយមកនេះ”។

លោកបានបន្ថែមទៀតថា​ “ជាមួយការទទួលស្គាល់ នូវភាពជោគ​ជ័យមួយនេះពី Property Guru ខ្ញុំបាទសូមយកឱកាសដ៏មានតម្លៃនេះ ថ្លែងអំណរគុណដល់ ដៃគូសហការណ៍ទាំងរដ្ឋ និងឯកជន អតិថិជនទាំងអស់ ដែលនៅតែបន្តគាំទ្រ និងជឿជាក់​មកលើក្រុមហ៊ុន ​  ក៏ដូចជាបុគ្គលិកគ្រប់ជាន់ថ្នាក់ទាំងអស់ ដែលបានចូលរួមចំណែកក្នុងការកសាងក្រុមហ៊ុន រហូតមកដល់ចំណុចនេះ”។ លោកបន្ថែមថា “​យើងមានជំនឿយ៉ាងមុតមាំថា រាល់សកម្មភាព និងបេសកកម្ម ដែលក្រុមហ៊ុនបានកសាងមក​ គឺជាកត្តាជំរុញភាពរីកចម្រើន របស់ប្រទេសកម្ពុជា​ ហើយពានរង្វាន់ទាំងនេះ និងកាន់តែលើកទឹកចិត្តឱ្យ យើងខ្ញុំបន្តការអភិវឌ្ឍ ស្ថាបត្យកម្មសំណង់ នៅកម្ពុជា ឱ្យកាន់តែមានភាពល្អប្រសើរ​ទ្វេរដងទៅទៀត”។

ការឈ្នះពានរង្វាន់ជា ក្រុមហ៊ុនអភិវឌ្ឍអចលនទ្រព្យល្អជាងគេ​ប្រចាំឆ្នាំ ២០២៣ (Best Developer 2023​) នេះ គឺជាការបើកទំព័រថ្មីមួយទៀត ដើម្បីជំរុញឱ្យ ក្រុមហ៊ុន អូ ស៊ី អាយ ស៊ី បន្តបំរើអតិថិជននៅ​ក្នុងវិស័យអចលទ្រព្យ ប្រកបដោយភាពជឿជាក់ មានទំនុកចិត្តខ្ពស់ ពោពេញដោយភាពឆ្នៃប្រឌិតខ្ពស់ ក៏ដូចជាបន្តកសាង និងស្ថាបនាប្រទេសជាតិ ឱ្យកាន់តែមានភាពរីកចម្រើនឡើង៕

នៅថ្ងៃអង្គារ ទី ២៩ខែសីហាម្សិលមិញ លោក Oriol Mohedano Segura បានចុះកុងត្រារយៈពេល ៥ឆ្នាំ ជាគ្រូបង្គោល និងជានាយកបច្ចេកទេសកីឡារបស់សៀមរាបយូណាយធីត។ ពិធីចុះហត្ថលេខាជាផ្លូវការ!  ត្រូវបានធ្វើឡើងដោយផ្ទាល់រវាងប្រធានក្លិបបាល់ទាត់សៀមរាបយូណាយធីត ឯកឧត្តម ម៉េត មករា ជាមួយលោកគ្រូ Oriol។

លោក Oriol មកកាន់សៀមរាបយូណាយធីត ដោយមិនត្រឹមតែដើម្បីជួយពង្រឹងការបណ្តុះបណ្តាលដល់ក្រុមកីឡាករអាយុក្រោម ១៤ឆ្នាំនោះទេ ប៉ុន្តែលោកក៏នឹងបង្កើនការអភិវឌ្ឍន៍ដល់ក្រុមកីឡាករដែលបានហ្វឹកហាត់ នៅសាលាបាល់ទាត់សៀមរាបយូណាយធីតផងដែរ៕

Siem Reap United is officially signing five years contract with Oriol Mohedano Segura as head coach and technical director. The signing ceremony joined by the SRU’s club president, his excellency Met Makara, Tuesday 29 August 2023.
Tactically and generally, coach Oriol will improve Siem Reap United U14 Academy team. Also, he will give a high level of football development in SRU Soccer School.

        ដោយៈ ហ្វីអូណា

ភ្នំពេញៈ សហភាពអឺរ៉ុប (EU) នឹងបន្តផ្តល់កិច្ចសហប្រតិបត្តិការល្អ និងជិតស្និទ្ធជាមួយរាជរដ្ឋាភិបាលកម្ពុជា ដើម្បីបន្តគាំទ្រដល់របៀបវារៈ និងកម្មវិធីកែទម្រង់ជាអាទិភាពនានា របស់រាជរដ្ឋាភិបាល សំដៅបន្តចូលរួមចំណែក ក្នុងការលើកស្ទួយកម្រិតជីវភាពរស់នៅ របស់ប្រជាជនគ្រប់ស្រទាប់វណ្ណៈ។

ការសន្យានឹងបន្តផ្តល់កិច្ចសហប្រតិបត្តិការ ល្អខាងលើនេះរបស់លោកស្រី ខាមែន ម៉ូរេនូ (Carmen Moreno) ឯកអគ្គរដ្ឋទូតសហភាពអឺរ៉ុបប្រចាំកម្ពុជា ក្នុងជំនួបសម្តែងការគួរសម និងជម្រាបលា ស្របពេលដែលលោកស្រី ត្រូវបញ្ចប់អាណត្តិបេសកកម្មការទូតនៅកម្ពុជា រវាងលោកអគ្គបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្រ្តី រដ្ឋមន្រ្តីក្រសួងសេដ្ឋកិច្ច និងហិរញ្ញវត្ថុ នៅថ្ងៃទី២៨ ខែសីហា ឆ្នាំ២០២៣ នាទីស្តីការក្រសួងសេដ្ឋកិច្ច និងហិរញ្ញវត្ថុ។

លោកអគ្គបណ្ឌិតសភាចារ្យ ឧបនាយករដ្ឋមន្រ្តី បានវាយតម្លៃខ្ពស់ ចំពោះកិច្ចខិតខំប្រឹងប្រែងរបស់លោកស្រី ខាមែន ម៉ូរេនូ ក្នុងការពង្រឹងកិច្ចសហប្រតិបត្តិការ រវាងកម្ពុជា និងសហភាពអឺរ៉ុប ក្នុងអំឡុងពេលដែលលោកស្រី បានបំពេញបេសកកម្មការទូតរបស់ខ្លួន និងបានសម្តែងនូវអំណរគុណ ចំពោះសហភាពអឺរ៉ុប ដែលតែងតែផ្តល់ការគាំទ្រដល់កិច្ចអភិវឌ្ឍ ក្នុងវិស័យអាទិភាពនានារបស់រាជរដ្ឋាភិបាល និងលើការដ្ឋាន ការងារកែទម្រង់សំខាន់ៗ ដែលសម្រេចបានសមិទ្ធផលជាច្រើនគួរជាទីមោទនៈ ទោះស្ថិតក្នុងគ្រាលំបាកនៃផល ប៉ះពាល់ពីវិបត្តិនៃជំងឺកូវីដ-១៩ និងសង្គ្រាមរុស្ស៊ី-អុយក្រែន ក្នុងរយៈពេលប៉ុន្មានឆ្នាំចុងក្រោយនេះក្តី។

លោកស្រី ខាមែន ម៉ូរេនូ បានវាយតម្លៃខ្ពស់ចំពោះកិច្ចខិតខំប្រឹងប្រែងរបស់រាជរដ្ឋាភិបាលកម្ពុជា ដែលធានាបាននូវស្ថិរភាពនយោបា យ និងសង្គម-សេដ្ឋកិច្ច និងការអភិវឌ្ឍប្រទេសលើគ្រប់វិស័យ។ ឆ្លៀ តក្នុងឱកាសនេះ លោកស្រីឯកអគ្គរដ្ឋទូត ក៏បានចូលរួមអបអរសាទរជាមួយប្រជាជនកម្ពុជា ដែលទើបទទួលបាននូវរាជរដ្ឋាភិបាលថ្មី កើតចេញពីការបោះឆ្នោតដោយសេរី ត្រឹមត្រូវ និងយុត្តិធម៌។

លោកស្រីក៏បានសម្តែងនូវការពេញចិត្តយ៉ាងខ្លាំង ចំពោះការដាក់ចេញនូវកម្មវិធីនយោបាយ មុតស្រួចច្បាស់លាស់ ពោលគឺយុទ្ធសាស្រ្តបញ្ចកោណដំណាក់កាលទី១ របស់រាជរដ្ឋាភិបាលនីតិកាលទី៧ នៃរដ្ឋសភា ក្រោមការដឹកនាំដ៏ខ្ពង់ខ្ពស់ របស់ឯកឧត្តមកិត្តិទេសា ភិបាលបណ្ឌិតហ៊ុន ម៉ាណែត នាយករដ្ឋមន្រ្តីនៃកម្ពុជា។

លោកអគ្គបណ្ឌិតសភាចារ្យ ឧបនាយករដ្ឋមន្រ្តី បានថ្លែងអំណរគុណយ៉ាងជ្រាលជ្រៅចំពោះសហភាព អឺរ៉ុបដែលមានឆន្ទៈ និងការប្តេជ្ញាចិត្តខ្ពស់ ក្នុងការបន្តចូលរួមចំណែក ក្នុងកិច្ចអភិវឌ្ឍនៅកម្ពុជាដោយោកបានគូសបញ្ជាក់ថា សហភាពអឺរ៉ុបគឺជាដៃគូពាណិជ្ជកម្មដ៏ធំ និងសំខាន់របស់កម្ពុជា និងជឿជាក់ថា “ទំនាក់ទំនង និងកិច្ចសហប្រតិបត្តិការនេះ នឹងកាន់តែរឹងមាំ និងកាន់តែស៊ីជម្រៅបន្ថែមទៀត បន្ទាប់ពីឯកអគ្គរដ្ឋទូតថ្មីរបស់ សហភាពអឺរ៉ុបប្រចាំកម្ពុជា ចូលកាន់តំណែងនាពេលដ៏ខ្លីខាងមុខ”៕

ដោយ: គង់ លាងហួរ

ហុងកុង: ស្ថានភាពដែលក្រុមហ៊ុនCountry Garden Holdings កំពុងប្រឈម នឹងបញ្ហាប៉ះទង្គិចខាងសាច់ប្រាក់ នឹងក្លាយជាការផ្តោតមើលជាសំខាន់ ខណៈក្រុមហ៊ុនអភិវឌ្ឍន៍អចលនទ្រព្យ ឯកជនដ៏ធំបំផុតមួយនេះ គ្រោងចេញផ្សាយលទ្ធផលហិរញ្ញវត្ថុ របស់ខ្លួននៅថ្ងៃពុធ។

ភាពតានតឹងផ្នែកសាច់ប្រាក់ នៅក្នុងក្រុមហ៊ុនបានលេចចេញឡើងជាសាធារណៈក្នុងខែសីហានេះ បន្ទាប់ពីក្រុមហ៊ុនខកខានការទូទាត់គូប៉ុងប្រាក់ដុល្លារចំនួន២  ដែលបង្កឱ្យមានការភ័យខ្លាចនៃការឆ្លងរាលដាលកាន់តែខ្លាំង នៅក្នុងវិស័យអចលនទ្រព្យ ដែលកំពុងជួបការលំបាករបស់ប្រទេសចិន និងជះផលប៉ះពាល់ទៅលើសេដ្ឋកិច្ចចិនកាន់តែទូលំទូលាយ។

បំណុលសរុបរបស់ Country Garden មានប្រហែល១៩៤ពាន់លានដុល្លារនៅចុងឆ្នាំ២០២២ ដោយក្រុមហ៊ុនបានព្រមានទុករួចមកហើយអំពីការខាតបង់សុទ្ធ រហូតដល់ទៅ៥៥ពាន់លានយ័ន (៧,៥៥ពាន់លានដុល្លារ) ក្នុងរយៈពេល៦ខែដំបូង ឆ្នាំ២០២៣នេះ ដែលជាការដាំក្បាលចុះដ៏គួរឱ្យភ្ញាក់ផ្អើល បើធៀបនឹងការខាតបង់ត្រឹមតែ៦,៧ពាន់លានយ័នក្នុងឆមាសទីពីរនៃឆ្នាំ២០២២។

ដូចទៅនឹងអ្នកអភិវឌ្ឍដទៃឯទៀតដែរ Country Garden ដែលជាក្រុមហ៊ុនអភិវឌ្ឍអចលនទ្រព្យ ដ៏ធំបំផុតរបស់ប្រទេសចិន បើគិតពីបរិមាណនៃការលក់រហូតដល់ឆ្នាំនេះ បានរងគ្រោះជាទំងន់ ដោយសា​រការធ្លាក់ចុះប្រាក់ចំណេញ ខណៈការលក់អចលនទ្រព្យ និងតម្លៃផ្ទះបានធ្លាក់ចុះ ចំពេលដែលសេដ្ឋកិច្ចចិនកំពុងយ៉ាប់យឺន។

ការលក់ធ្លាក់ចុះ គួបផ្សំនឹងលទ្ធភាពទទួលបានមូលនិធិថ្មីៗ កាន់​តែតឹងរ៉ឹង ក្នុងរយៈពេលប៉ុន្មានឆ្នាំចុងក្រោយនេះ បានធ្វើឱ្យស្ថានភាពវិបត្តិសាច់ប្រាក់ របស់អ្នកអភិវឌ្ឍកាន់តែវិវឌ្ឍអាក្រក់ទៅៗ។

អ្នកវិភាគម្នាក់ រួមជាមួយធនាគារវិនិយោគបរទេស បានលើកឡើងថា វិនិយោគិនកំពុងស្វែងរកព័ត៌មានលម្អិត អំពីបំណុលរយៈពេលខ្លី និងកម្ចីធនាគារថ្មី ដើម្បីយល់កាន់តែច្បាស់ អំពីលំហូរសាច់ប្រាក់របស់ Country Garden ។

មន្ត្រីក្រុមហ៊ុនបានអះអាងថា ដោយសារតែមូលនិធិភាគច្រើនរបស់ក្រុមហ៊ុន ត្រូវបានចាក់សោទុកនៅក្នុងគណនី រក្សាទុកដោយភាគីទី៣ (Escrow Account) របស់អ្នកម៉ៅការគម្រោង ដើម្បីធានាការប្រគល់ផ្ទះក្នុងរយៈពេល២ឆ្នាំខាងមុខ ដូច្នេះ ក្រុមហ៊ុនមានសាច់ប្រាក់តិចតួចណាស់សម្រាប់សងបំណុល។

Country Garden បានបដិសេធមិនធ្វើអត្ថាធិប្បាយ មុនពេលចេញផ្សាយលទ្ធផលប្រាក់ចំណូលរបស់ខ្លួន។ ក្រុមហ៊ុននេះ ក៏នឹងមិនបើកកិច្ចប្រជុំជាមួយអ្នកវិភាគ និងប្រព័ន្ធផ្សព្វផ្សាយផងដែរ បន្ទាប់ពីការប្រកាសរបាយការណ៍ ប្រាក់ចំណូល ហើយនេះជាលើកទីមួយ ដែលក្រុមហ៊ុនរំលងសន្និសីទទាំងនេះក្នុងរយៈពេលជាច្រើនឆ្នាំ៕

ដោយៈ តែម សុខុម

បាងកក: ប្រទេសកម្ពុជា ជាប់ចំណាត់ថ្នាក់លេខ១០៣ទូទាំងពិភពលោក នៅក្នុងការសម្រេចបានគោលដៅអភិវឌ្ឍន៍ ប្រកបដោយនិរន្តរភាព (SDGs)។ នេះបើយោងតាមសារព័ត៌មាន The Nation ចុះផ្សាយនៅថ្ងៃអង្គារ ទី២៩ ខែសីហា។

ទន្ទឹមនេះបណ្ដាញ United Nations Global Compact Network Thailand (UNGCNT) បាននិយាយកាលពីថ្ងៃច័ន្ទ ទី២៨ ខែសីហាកន្លងមកថា ប្រទេសថៃ បានជាប់ចំណាត់ថ្នាក់លេខ៤៣ ក្នុងចំណោម១៦៦ប្រទេស ដែលកំពុងធ្វើកិច្ចការលើគោលដៅអភិវឌ្ឍន៍ប្រកបដោយនិរន្តរភាព (SDGs)។

ដោយលើកឡើងពីរបាយការណ៍អភិវឌ្ឍន៍ ប្រកបដោយនិរន្តរភាពឆ្នាំ២០២៣ របស់បណ្តាញដំណោះស្រាយអភិវឌ្ឍន៍ ប្រកប​ដោ​យនិរន្តរភាព (SDSN) នាយកប្រតិបត្តិបណ្តាញ UNGCNT លោកស្រី ថាន់យ៉ាផន គ្រីចទីតាយ៉ាវុធ (Thanyaporn Krichtitayawuth ) បានលើកឡើងថា ប្រទេសថៃ បានជាប់ចំណាត់ថ្នាក់លេខ៤៤ កាលពីឆ្នាំមុន។

លោកស្រីបន្ថែមថា ប្រទេសថៃ ទទួលបាន៧៤,៧ពិន្ទុក្នុងឆ្នាំនេះ គឺខ្ពស់ជាងពិន្ទុជាមធ្យម សម្រាប់អាស៊ីបូព៌ា និងអាស៊ីខាងត្បូង ដែលទទួលបាន៦៧,២ពិន្ទុ។

ក្នុងចំណោមបណ្ដាប្រទេសជាសមាជិកអាស៊ាន ប្រទេសថៃ បានជាប់ចំណាត់ថ្នាក់លេខ១ ក្នុងរយៈពេល៥ឆ្នាំជាប់គ្នា (២០១៩-២០២៣) តាមពីក្រោយដោយប្រទេសវៀតណាម (ចំណាត់ថ្នាក់លេខ៥៥ ទូទាំងពិភពលោក) សិង្ហបុរី (ចំណាត់ថ្នាក់លេខ៦៤) ឥណ្ឌូនេស៊ី (ចំណាត់ថ្នាក់លេខ៧៥) ម៉ាឡេស៊ី (ចំណាត់ថ្នាក់លេខ៧៨) ហ្វីលីពីន (ចំណាត់ថ្នាក់លេខ៩៨) ព្រុយណេ (ចំណាត់ថ្នាក់លេខ១០២) កម្ពុជា (ចំណាត់ថ្នាក់លេខ១០៣) ឡាវ (ចំណាត់ថ្នាក់លេខ១១៥) និងមីយ៉ាន់ម៉ា (ចំណាត់ថ្នាក់លេខ១២៥)។

ក្រៅពីកិច្ចខិតខំប្រឹងប្រែងរបស់រដ្ឋាភិបាលថៃ ក្នុងការសម្រេចបានគោលដៅអភិវឌ្ឍន៍ ប្រកបដោយនិរន្តរភាព (SDGs) ស្របតាមយុទ្ធសាស្ត្រអភិវឌ្ឍន៍ជាតិរបស់ខ្លួន វិស័យធុរកិច្ចថៃ ក៏បានដើរតួនាទីយ៉ាងសំខាន់ផងដែរ នៅក្នុងការសម្រេចបាននូវគោលដៅទាំងនេះជាពិសេស SDG4 (ការអប់រំប្រកបដោយគុណភាព) SDG6 (ទឹកស្អាត និងអនាម័យ) SDG7 (ថាមពលស្អាត និងតម្លៃសមរម្យ) និង SDG12 (ការប្រើប្រាស់ និងផលិតកម្មប្រកបដោយការទទួលខុសត្រូវ)៕ The Nation៕