ដោយៈជេស៊ីកា
ភ្នំពេញៈ ចិនត្រលប់មកវិញហើយ! ដោយពួកគេបាននិងកំពុងចាប់អារម្មណ៍វិនិយោគលើវិស័យជាច្រើន ប៉ុន្តែយ៉ាងណាក៏ដោយចំនូននៃការមកដល់របស់វិនិយោគិនចិននៅមានកម្រិតនៅឡើយ។
អនុប្រធានសភាពាណិជ្ជកម្មកម្ពុជា លោកឧកញ៉ាលឹម ហេងបានមានប្រសាសន៍ឲ្យដឹងតាមទូរស័ព្ទ កាលពីល្ងាចថ្ងៃទី៣០ មិថុនាកន្លងមកថា អ្នកវិនិយោគចិន បានមកកាន់កម្ពុជាកាន់តែច្រើនហើយ និងរំពឹងមកកាន់តែច្រើនថែមទៀត បន្ទាប់ពីរដ្ឋាភិបាលចិនបានបន្ឋូរបន្ថយ លើការធ្វើដំណើរទាក់ទងនឹងបញ្ហាកូវីដ១៩។
លោកបន្តថា “អ្នកវិនិយោគចិន បានមកវិនិយោគនៅកម្ពុជាច្រើន ផ្តោតលើវិស័យសំណង់ កសិឧស្សាហកម្ម ធនធានរ៉ែ អនុវិស័យកាត់ដេរ និងវិស័យសំខាន់ៗជាច្រើនទៀត”។ លោកបន្តថា “ការចូលជាធរមាននៃកិច្ចព្រមព្រៀងFTAរវាងកម្ពុជា ចិន និងកិច្ចព្រមព្រៀងRCEPនឹងទាក់ទាញក្រុមហ៊ុនចិនកាន់តែច្រើន មកវិនិយោគនៅកម្ពយជា ដើម្បីនាំចេញដោយរួចពន្ឋទៅកាន់ប្រទេសចិន និងប្រទេសជាច្រើនទៀត”។
លោកឧកញ៉ាលឹម ហេងបានបន្តថា រដ្ឋាភិបាលចិនបានចាប់ផ្តើមអនុញ្ញាត្ត ឲ្យមានអ្នកដំណើរអន្តរជាតិ ចូលប្រទេសរបស់ខ្លួនហើយ ដែលធ្វើឲ្យស្ថានភាពមានភាពសេដ្ឋកិច្ចចិន កាន់តែប្រសើរឡើង។ លោកបន្តថា ទោះបីជារដ្ឋាភិបាលចិន បានរឹតបន្តឹងលំហូរសាច់ប្រាក់មកក្រៅប្រទេសក្តី ប៉ុន្តែមិនពាក់ព័ន្ឋច្រើនជាមួយកម្ពុជានោះទេ ដោយសារកម្ពុជាបានអនុវត្តន៍គំរោងខ្សែក្រវ៉ាត់ និងផ្លូវ និងភាពជាដៃគូយុទ្ឋសាស្រ្តគ្រប់ជ្រុងជ្រោយ រវាងរដ្ឋាភិបាលនៃប្រទេសទាំងពីរ។
ជាមួយគ្នានេះ លោកឃាង ភារម្យអ្នកនាំពាក្យរដ្ឋបាល ខេត្តព្រះសីហនុ បានមានប្រសាសន៍ឲ្យដឹងកាលពីពេលថ្មីៗនេះថា អ្នកវិនិយោគចិនបានមកដល់ខេត្តព្រះសីហនុបណ្តើរៗហើយ ដើម្បីចាប់ផ្តើមគំរោងវិនិយោគរបស់ពួកគេ ដោយអ្នកខ្លះមកធ្វើការ និងអ្នកខ្លះមកវិនិយោគ។
លោកបន្តថា “ដំណើរការសាងសង់អគារ ដែលជាប់គាំងកន្លងមក បានចាប់ផ្តើមបណ្តើរៗឡើងវិញហើយ ស្របពេលស្ថានភាពសេដ្ឋកិច្ចខេត្តព្រះសីហនុបានវិលមករកភាពប្រក្រតី”៕
