ដោយ: គង់ លាងហួរ
អន្តរជាតិ: នាយកដ្ឋានឥន្ធនៈរ៉ែ របស់ប្រទេសថៃបានឱ្យដឹងថា កាលបរិច្ឆេទសម្រាប់កិច្ចពិភាក្សារវាងប្រទេសថៃ និងកម្ពុជា ដើម្បីស្វែងរកប្រភពប្រេងថ្មី នៅក្នុងតំបន់ទាមទារត្រួតស៊ីគ្នា នៃឈូងសមុទ្រថៃ (OCA) អាចចាប់ផ្តើមឡើងវិញ ក្នុងរយៈពេល២ខែខាងមុខ។
លោក Sarawut Kaewtathip អគ្គនាយកនៃនាយកដ្ឋាននេះ បានមានប្រសាសន៍ថា គណៈកម្មាធិការបច្ចេកទេសរួមមួយ នៅក្រោមក្រសួងការបរទេស នៃប្រទេសទាំង២ នឹងចាប់ផ្តើមធ្វើការលើព័ត៌មានលម្អិតនៃកិច្ចពិភាក្សា ក្នុងរយៈពេល២ខែខាងមុខនេះ។
គេរំពឹងថា រដ្ឋបាលគ្រប់គ្រងថ្មីរបស់ប្រទេសថៃបន្ទាប់ នឹងជំរុញការចរចាជាបន្តបន្ទាប់ ខណៈអាណត្តិ៤ឆ្នាំរបស់សភាបច្ចុប្បន្ន នឹងត្រូវបញ្ចប់នៅដំណាច់ខែមីនាខាងមុខនេះ។
លោកបានបន្ថែមថា លោកជឿជាក់ថា “OCA ទំនងជាប្រភពប្រេងថ្មីសម្រាប់ប្រទេសថៃ និងកម្ពុជា ព្រោះទីតាំងនេះស្ថិតនៅជិតប្លុកឧស្ម័ន Bongkot និង Erawan”។
ប្លុកឧស្ម័នទាំងពីរដំណើរការដោយក្រុមហ៊ុន PTT Exploration and Production (PTTEP) គឺជាប្រភពសំខាន់នៃការផ្គត់ផ្គង់ឧស្ម័ន សម្រាប់ប្រទេសថៃ។ ប្រទេសថៃបាននាំចូលឧស្ម័នធម្មជាតិរាវ ដែលមានតម្លៃថ្លៃ សម្រាប់ប្រើក្នុងការផលិតថាមពល បន្ទាប់ពីមានការធ្លាក់ចុះនៃការផ្គត់ផ្គង់ឧស្ម័ន ក្នុងស្រុកនៅឈូងសមុទ្រ។
លោក Kurujit Nakornthap នាយកប្រតិបត្តិនៃវិទ្យាស្ថាន Petroleum of Thailand បានមានប្រសាសន៍ថា នេះជាហេតុផលចម្បង ដែលនាំឱ្យតម្លៃថាមពល ដែលប្រើសម្រាប់គណនាថ្លៃអគ្គិសនី កើនឡើងដល់កម្រិតខ្ពស់បំផុត។
លោកបានបន្តថា “ប្រទេសថៃ និងកម្ពុជាទាំងពីរបានរងផលប៉ះពាល់ដោយជំងឺកូវីដ-១៩ និងវិបត្តិតម្លៃថាមពលសកល ដូច្នេះ នៅឆ្នាំ២០២៣នេះនឹងក្លាយជាពេលវេលាដ៏សមស្របមួយ សម្រាប់ប្រទេសទាំងពីរ ក្នុងការធ្វើការរួមគ្នា ដើម្បីស្វែងរកទីតាំងប្រេងថ្មី”៕
