ដោយៈ ស៊ីវ ម៉េង
ភ្នំពេញៈ ក្រុមហ៊ុនអចលនទ្រព្យWH បាននិងកំពុងការផ្តល់សេវាកម្មជួលជំនួស និងផ្តល់ទំនុកចិត្តទាំងអ្នកជួល និងម្ចាស់អចលនទ្រព្យ ពិតជាសេវាកម្មមួយ ដែលបាននិងកំពុងចាប់ផ្តើមនៅកម្ពុជា។
អគ្គនាយកក្រុមហ៊ុនអចលនទ្រព្យWH លោកញឹម រាសីបានមានប្រសាសន៍ឲ្យដឹងកាលពីពេលថ្មីៗនេះថា ដើម្បីផ្តល់ឲ្យអ្នកស្វែងរកទីតាំងជួល និងម្ចាស់អចលនទ្រព្យទទួលបានភាពរីកចម្រើន និងឈរលើមូលដ្ឋានឈ្នះ ឈ្នះទាំងអស់គ្នា។
ក្រុមហ៊ុនអចលនទ្រព្យWH បាននិងកំពុងផ្តល់នូវគន្លឹះសំខាន់ៗចំនួន ដែលម្ចាស់អចលនទ្រព្យ អតិថិជន និងអ្នកផ្តល់សេវាកម្មគួរ ស្វែងយល់។ ចំណុចទាំងនោះមានដូចជា
ទី១ ការយល់ដឹងពីទីផ្សារ
ម្ចាស់អចលនទ្រព្យ ដែលមានខុនដូ ឬអាផាតម៉ិន១ឬពីរ ឬបីយូនីត ឬម្ចាស់អាគារណាមួយ ត្រូវសិក្សាពីទីផ្សារនៅក្នុងតំបន់របស់ខ្លួនថា តើអ្នកណា ជាអ្នកប្រកួតប្រជែងជាមួយយើង មានតម្លៃបែបណា ធៀបជាមួយទ្រព្យរបស់យើង ដើម្បីឲ្យគាត់ដាក់តម្លៃត្រូវទីផ្សារ។ ព៌តមានទីផ្សារទាំងនេះ ម្ចាស់ទ្រព្យអាចរកបាន តាមបណ្តាញទំនាក់ទំនងសង្គម Facebook, Telegram, វេបសាយមួយចំនួនដែលអាចរកបាន។
លោកបានលើកពីបទពិសោធន៍កន្លងមកថា យើងមានអាគារមួយ នៅក្បែរផ្សារកាប់គោ ដែលមានអ្នកជួលពេញៗ ប៉ុន្តែនៅពេលមួយអតិថិជនបានដើរចេញអស់ ដោយសារនៅទីតាំងនោះមានការដ្ឋាន ដែលមានសម្លេងរំខាន។
ប៉ុន្តែដើម្បីដោះស្រាយបញ្ហានេះបាន យើងបានផ្តល់សេវាកម្ម ប្រកបដោយភាពបត់បែន ដល់អតិថិជន ដោយយើងផ្លាស់ប្តូរ ពីការជួលរយៈពេលវែង មករយៈពេលខ្លី ដែលភ្ញៀវមកស្នាក់នៅរយៈពេលខ្លី ជាភ្ញៀវទេសចរណ៍ ឬអ្នកធ្វើការ ដែលពួកគេចាកចេញនៅពេលព្រឹក និងត្រលប់មកវិញនៅពេលយប់ ដែលពេលយប់គឺជាពេល ដែលការដ្ឋានសាងសង់បានផ្អាកធ្វើការ។
ជាលទ្ឋផល ភាពបត់បែនបែបនេះ បានធ្វើឲ្យគំរោងនោះទទួលបានភ្ញៀវពេញៗ និងទទួលបានប្រាក់ចំណូលច្រើនជាងមុន ព្រោះភ្ញៀវទាំងនោះ មកតាមវេបសាយអន្តរជាតិធំៗ ដូចជា Agoda, Booking.comជាដើម។
ទី២ រៀបចំផលិតផលរបស់យើងឲ្យស្របតម្រូវការទីផ្សារ
ម្ចាស់អចលនទ្រព្យ ដែលមានអាផាតម៉ិន មានទីតាំងស្ថិតនៅជុំវិញដោយស្ថានទូត សាលារៀនអន្តរជាតិជាដើម ពួកគាត់អាចរៀបចំអាផាតម៉ិនរបស់ខ្លួន ដើម្បីទាក់ទាញចិត្តងតិថិជន។
នៅពេលដែលយើងដឹងពីទីផ្សារហើយ យើងត្រូវរៀបចំទ្រព្យរបស់យើងឱ្យត្រូវនឹងតម្រូវការទីផ្សារ។
ឧទាហរណ៍ថា យើងមាអាផាតម៉ិន២បន្ទប់គេង ហើយស្ថិតទីតាំងនោះជាតំបន់ ដែលបណ្ដុំដោយសាលារៀន អង្គការ ដូច្នេះអ្នកជួលនោះ អាចជាអ្នកដែលមានគ្រួសារ មានកូន។ អញ្ចឹងម្ចាស់ទ្រព្យត្រូវរៀបចំអាផាតម៉ិននោះ ជាពីរបន្ទប់ ដោយ១សម្រាប់ឪពុកម្ដាយ និងមួយទៀតសម្រាប់កូនក្មេង និងត្រូវរៀបចំពណ៌ឱ្យមានភាពទាក់ទាញក្មេងៗ និងមានវេរ៉ងដាជាដើម។
លោកញឹម រាសីនាបបន្តថា “នៅពេលអ្នកចង់ជួល ចូលក្នុងអាផាតម៉ិនរបស់យើង ខ្ញុំជឿជាក់ថាពួកគាត់នឹងពេញចិត្ត ជាក់ជាមិនខានឡើយ”។
លោកបន្តថា កន្លងមក យើងមានបទពិសោធន៍មួយចំនួន ដោយម្ចាស់អចលនទ្រព្យខ្លះ មិនចង់រៀបចំទុកជាមុនទេ ខ្លាចមិនត្រូវចិត្តភ្ញៀវ មិនត្រូវនឹងទីផ្សារ ប៉ុន្តែការនាំភ្ញៀវមកមើល និងសម្រេចចិត្តកក់ស្នាក់នៅក្នុងថ្ងៃដដែល ពិតជាល្អ ដោយមិនចាំបាច់រង់ចាំយូរឡើយ។
លោកពន្យល់ថា យើងត្រូវបង្កើតអ្វីធ្វើឲ្យភ្ញៀវមានក្តីស្រម៉ៃ និងសម្រេចចិត្តលឿន និងអាចកក់ប្រាក់នាពេលនោះ។ ជាក់ស្តែងដូចគំរោងបុរី ខុនដូ ពេលភ្ញៀវមកដល់ពួកគេអាចទស្សនាបន្ទប់គំរូ ដែលធ្វើឲ្យអតិថិថិជនសម្រេចចិត្តលឿន។
ទី៣ ការយកចិត្តទុកដាក់លើអ្នកជួល
នៅពេលដែលយើងមានភ្ញៀវហើយ យើងត្រូវមានសេវាកម្មថែរទាំគាត់ (costumer care) ពីព្រោះជាទូទៅម្ចាស់ទ្រព្យ តែងតែមើលរំលងចំណុចនេះ ដោយពេលបានភ្ញៀវហើយ ស៊ីញ៉េ ធ្វើកុងត្រាចប់ គឺចប់ហើយ ប៉ុន្តែយើងផ្តោតលើទំនាក់ទំនងបន្ត ព្រោះបើគាត់មានបញ្ហា យើងដោះស្រាយជូនគាត់ ធ្វើឲ្យអ្នកជួលមានអារម្មណ៍ ដូចស្នាក់នៅផ្ទះបងប្អូន ដែលនេះជាចំណុចមួយ ជួយឲ្យគាត់ជួយថែរទាំផ្ទះរបស់យើង និងបន្តជួលបន្ត ហើយណែនាំមិត្ភភ័ក្តិឬបងប្អូនបន្តទៀត។
ចំណុចសំខាន់មួយទៀត គឺយើងអាចផ្តល់ទំនុកចិត្ត ដល់អ្នកនាំភ្ញៀវមកឲ្យយើង ដែលជាភ្នាក់ងារអចលនទ្រព្យ ព្រោះបើមានបញ្ហាអ្វីរវាងម្ចាស់ផ្ទះ និងអ្នកជួល គេនឹងទាក់ទងទៅអ្នកនាំភ្ញៀវមកហើយ។
លោកញឹម រាសីបានបន្តដោយលើកជាសំណួរថា “ហេតុនេះ បើគាត់នាំភ្ញៀវមកឲ្យយើង ឧស្សាហ៍មានបញ្ហា សួរថាតើគាត់នឹងមិននាំភ្ញៀវមកទៀតទេ?”។ លោកពន្យល់ថា ប៉ុន្តែបើគាត់នាំភ្ញៀវមក គាត់សប្បាយចិត្ត មិនមានបញ្ហា ទទួលបានទំនុកចិត្ត គាត់នឹងនាំភ្ញៀវមកឲ្យយើងបន្តទៀត គឺដាច់កុងត្រាមិនទាន់ទេ នឹងមានភ្ញៀវចាំជួលបន្តតែម្តង៕
