សុខុម
ញូវយ៉ក: ក្រុមហ៊ុនខ្នាតយក្ស McDonald’s Corp នឹងបិទការិយាល័យរបស់ខ្លួននៅសហរដ្ឋអាមេរិក ជាបណ្ដោះអាសន្ននៅសប្តាហ៍នេះ ខណៈខ្លួនត្រៀមប្រកាសជូនប្រកាសជូនដំណឹងអំពីការជម្រុះបុគ្គលិកទ្រង់ទ្រាយធំ ដែលជាផ្នែកមួយនៃការរៀបចំរចនាសម្ព័ន្ធដ៏ធំរបស់ក្រុមហ៊ុន។
កាសែត Wall Street Journal បានចុះផ្សាយកាលពីថ្ងៃអាទិត្យ ទី០២ ខែមេសា ថា តាមរយៈការផ្ញើអ៊ីមែលផ្ទៃក្នុងកាលពីសប្តាហ៍មុនទៅកាន់បុគ្គលិករបស់ខ្លួននៅសហរដ្ឋអាមេរិក និងបុគ្គលិកអន្តរជាតិមួយចំនួន ក្រុមហ៊ុនខ្សែសង្វាក់ផ្គត់ផ្គង់បឺកហ្គើដ៏ធំរបស់សហរដ្ឋអាមេរិក McDonald’s បានជូនដំណឹងឱ្យពួកគេធ្វើការងារពីផ្ទះចាប់ពីថ្ងៃច័ន្ទ ដល់ថ្ងៃពុធ ដើម្បីត្រៀមលក្ខណៈប្រកាសជម្រុះបុគ្គលិក។
-->
ទោះជាយ៉ាងណា គេមិនទាន់ដឹងទេថា តើបុគ្គលិកច្រើនកម្រិតណានឹងត្រូវជម្រុះចោល។
ក្រុមហ៊ុនដែលមានមូលដ្ឋាននៅទីក្រុងឈីកាហ្គោ (Chicago) ខាងលើនេះបានលើកឡើងតាមរយៈអ៊ីមែលផ្ទៃក្នុងដែលកាសែត Wall Street Journal ទទួលបានថា “អំឡុងសប្តាហ៍គិតចាប់ពីថ្ងៃទី៣ ខែមេសា យើងនឹងប្រកាសសម្រេចចិត្តសំខាន់ៗទាក់ទងនឹងតួនាទី និងបុគ្គលិកគ្រប់ជាន់ថ្នាក់នៅក្នុងស្ថាប័នទាំងមូល”។
យោងតាមការចុះផ្សាយរបស់កាសែត Wall Street Journal ឱ្យដឹងទៀតថា ក្រុមហ៊ុន McDonald’s ក៏បានប្រាប់ឱ្យបុគ្គលិកលុបចោលរាល់កិច្ចប្រជុំផ្ទាល់ជាមួយអ្នកលក់ និងភាគីខាងក្រៅផ្សេងទៀតនៅការិយាល័យកណ្តាលរបស់ខ្លួនផងដែរ។
ទោះជាយ៉ាងណា ពេលទីភ្នាក់ងារព័ត៌មាន Reuters ទាក់ទងទៅ ក្រុមហ៊ុន McDonald’s មិនបានឆ្លើយបំភ្លឺឡើយជុំវិញបញ្ហានេះ៕ Reuters៕
