ដោយៈ សុខុម
វៀងចន្ទន៍: ធនាគារពិភពលោក (World Bank) ព្យាករណ៍ថា កំណើនសេដ្ឋកិច្ចក្នុងបណ្ដាប្រទេសកំពុងអភិវឌ្ឍន៍នៃតំបន់អាស៊ីបូព៌ា និងប៉ាស៊ីហ្វិក នឹងបង្កើនល្បឿនក្នុងឆ្នាំ២០២៣ នេះ នៅពេលសេដ្ឋកិច្ចរបស់ប្រទេសចិន ស្ទុះងើបឡើងវិញ។
World Bank: កំណើនសេដ្ឋកិច្ចនៅអាស៊ីអាបូព៌ា និងប៉ាស៊ីហ្វិក នឹងបង្កើនល្បឿនសេដ្ឋកិច្ចចិន
យោងតាមរបាយការណ៍បច្ចុប្បន្នភាព សេដ្ឋកិច្ចអាស៊ីបូព៌ា និងប៉ាស៊ីហ្វិក ខែមេសា ឆ្នាំ២០២៣ (East Asia and Pacific April 2023 Economic Update) របស់ធនាគារពិភពលោកចេញផ្សាយកាលពីថ្ងៃព្រហស្បតិ៍ សប្ដាហ៍កន្លងទៅបង្ហាញថា សេដ្ឋកិច្ចនៅទូទាំងតំបន់អាចនឹងនៅទ្រឹងក្នុងឆ្នាំនេះ ដោយសារកំណើនសេដ្ឋកិច្ចពិភពលោកបង្អង់ល្បឿន ស្របពេលទំនិញឡើងថ្លៃ និងការរឹតបន្តឹងលក្ខខណ្ឌហិរញ្ញវត្ថុ ដើម្បីឆ្លើយតបទៅនឹងអតិផរណា ដែលកំពុងហក់ឡើងខ្ពស់។ នេះបើយោងតាមសារព័ត៌មាន Laotian Times ចុះផ្សាយនៅថ្ងៃពុធ ទី៥ ខែមេសា។
ផ្អែកតាមការព្យាករ កំណើនសេដ្ឋកិច្ច ក្នុងបណ្ដាប្រទេសកំពុងអភិវឌ្ឍន៍ក្នុងតំបន់អាស៊ីបូព៌ា និងប៉ាស៊ីហ្វិក នឹងបង្កើនល្បឿនដល់៥,១%ក្នុងឆ្នាំ២០២៣ បើធៀបនឹង៣,៥%ក្នុងឆ្នាំ២០២២ នៅពេលការបើកប្រទេសចិន ឡើងវិញជួយឱ្យសេដ្ឋកិច្ចប្រទេសនេះ សម្រេចបានកំណើន៥,១%បើធៀបនឹង៣%ក្នុងឆ្នាំ២០២២។
កំណើនក្នុងតំបន់នេះ នៅក្រៅប្រទេសចិន ត្រូវបានរំពឹងថានឹងធ្លាក់ចុះពី៥,៨%ក្នុងឆ្នាំ២០២២ មកនៅត្រឹម៤,៩% នៅពេលអតិផរណា និងបំណុលគ្រួសារដែលហក់ឡើងខ្ពស់ នៅក្នុងប្រទេសមួយចំនួនជះផលប៉ះពាល់ដល់តម្រូវការប្រើប្រាស់។
លោកស្រី Manuela V. Ferro អនុប្រធានធនាគារពិភពលោកប្រចាំតំបន់អាស៊ីបូព៌ា និងប៉ាស៊ីហ្វិក លើកឡើងថា “សេដ្ឋកិច្ចធំៗភាគច្រើនក្នុងតំបន់អាស៊ីបូព៌ា និងប៉ាស៊ីហ្វិក បានឆ្លងកាត់ការលំបាកនៃវិបត្តិកូវីដ-១៩ ប៉ុន្តែពេលនេះត្រូវតែសម្របខ្លួន ទៅតាមការប្រែប្រួលនៃបរិយាកាសពិភពលោក”។ លោកស្រីបន្តថា “ដើម្បីទទួលបានសន្ទុះសេដ្ឋកិច្ចឡើងវិញ មានការងារនៅសល់ ដែលត្រូវធ្វើដើម្បីជំរុញនវានុវត្តន៍ថ្មី ផលិតភាព និងដើម្បីបង្កើតមូលដ្ឋានគ្រឹះ សម្រាប់ការងើបឡើងវិញដែលមានពណ៌បៃតងជាងមុន”។
ក្នុងចំណោមសេដ្ឋកិច្ចធំៗនៅក្នុងតំបន់ សេដ្ឋកិច្ចភាគច្រើនរួមមានឥណ្ឌូនេស៊ី ហ្វីលីពីន និងវៀតណាម ផងដែរនោះត្រូវបានរំពឹងថានឹងសម្រេចបានកំណើនតិចតួច នៅក្នុងឆ្នាំ២០២៣ បើធៀបនឹងឆ្នាំ២០២២ ខណៈបណ្ដាប្រទេសដែនកោះនៅប៉ាស៊ីហ្វិក ភាគច្រើនត្រូវបានព្យាករថា នឹងកើនឡើងលឿនជាងមុននៅឆ្នាំ២០២៣៕ Laotian Times៕
