ដោយ: គង់ លាងហួរ
ភ្នំពេញ: គណៈកម្មាធិការដឹកនាំសាងសង់អាកាសយានដ្ឋានអន្តរជាតិសៀមរាបអង្គរ និងក្រុមហ៊ុនវិនិយោគយូណានអ៊ែរបានបើកកិច្ចប្រជុំ ដោយបញ្ជាក់ពីការសាកល្បងហោះហើរនៅអាកាសយានដ្ឋានអន្តរជាតិសៀមរាបអង្គរនៅខែឧសភា។
កិច្ចប្រជុំនេះ ដឹកនាំដោយលោក ទឹករ៉េត សំរេច រដ្ឋមន្ត្រីប្រតិភូអមនាយករដ្ឋមន្ត្រី និងជាប្រធានគណៈកម្មាធិការ លោក Zou Yuhui ប្រធានក្រុមហ៊ុន Yunnan Air investing Cambodia Airport Management និងមន្ត្រីរាជការ។
ក្រុមមន្ត្រីបានថ្លែងនៅក្នុងកិច្ចប្រជុំថា “យើងត្រៀមខ្លួនរួចជាស្រេចសម្រាប់សុពលភាពនៃការហោះហើរនៅពាក់កណ្តាលខែឧសភា ឆ្នាំ២០២៣នេះ”។
ក្នុងជំនួបនោះ ក្រុមមន្ត្រីបានជូនដំណឹងថា គិតត្រឹមដំណាច់ខែមីនា ឆ្នាំ២០២៣ គម្រោងសាងសង់ព្រលានយន្តហោះអន្តរជាតិសៀមរាបអង្គរសម្រេចបាន ៩២ភាគរយ។
ដំណើរការគ្រប់គ្រងប្រតិបត្តិការអាកាសយានដ្ឋានក៏សម្រេចបាននូវសកម្មភាពចំនួន៣៨ក្នុងចំណោមសកម្មភាពសរុបចំនួន៧៩នៃផែនការគ្រប់គ្រងប្រតិបត្តិការព្រលានយន្តហោះ ដែលត្រូវបានអនុម័តដោយរដ្ឋាភិបាលលើការអនុវត្តផែនការប្រតិបត្តិការ។
ក្រុមមន្ត្រីបានបន្តថា “យើងប្តេជ្ញាខិតខំប្រឹងប្រែងដើម្បីបញ្ចប់សកម្មភាពដែលនៅសល់ក្នុងលក្ខណៈទាន់ពេលវេលា ដែលនាំទៅដល់ការសម្ពោធជាផ្លូវការនៅខែតុលា ឆ្នាំ២០២៣នេះ”។
លោក ទឹករ៉េត សំរេច បានមានប្រសាសន៍ក្នុងកិច្ចប្រជុំថា “ក្រុមហ៊ុន និងគណៈកម្មាធិការបានឆ្លងកាត់ការងារជាច្រើនដើម្បីសម្រេចបានលទ្ធផលដូចពេលនេះ ហើយលទ្ធផលទាំងនេះគឺបានមកពីការប្តេជ្ញាចិត្ត និងការខិតខំប្រឹងប្រែងរបស់ក្រុមហ៊ុនក្នុងការអនុវត្តគម្រោងដោយមានការគាំទ្រពីគ្រប់ក្រសួងស្ថាប័នពាក់ព័ន្ធទាំងអស់”។
គម្រោងសាងសង់ព្រលានយន្តហោះអន្តរជាតិសៀមរាបអង្គរ អនុវត្តដោយក្រុមហ៊ុន Angkor International Airport Investment (Cambodia) Co., Ltd (AIAI) ដែលមានទុនវិនិយោគជាង៨៨០លានដុល្លារ។
អាកាសយានដ្ឋានអន្តរជាតិនេះកំពុងសាងសង់លើផ្ទៃដីប្រមាណ៧០០ហិកតា ក្នុងស្រុកសូទ្រនិគម ខេត្តសៀមរាប ដែលមានចម្ងាយប្រហែល៥០គីឡូម៉ែត្រពីក្រុងសៀមរាប និង៤០គីឡូម៉ែត្រពីបរិវេណប្រាសាទអង្គរវត្ត ដែលនឹងមិនប៉ះពាល់ដល់តំបន់ការពារបេតិកភណ្ឌឡើយ។
ការ សាងសង់ អាកាសយានដ្ឋាន អន្តរជាតិ សៀមរាប – អង្គរ បាន ចាប់ផ្តើម នៅ ខែមីនា ឆ្នាំ ២០២០ ដោយ ក្រុមហ៊ុន AIAI ។ លើសពីនេះទៀត ព្រលាន យន្តហោះ តម្លៃ៨៨០ លាន ដុល្លារ នេះគឺជា ប្រភេទ 4E ដែល អាច គ្រប់គ្រង យន្តហោះ ក្នុង រយៈ ចម្ងាយ ឆ្ងាយបាន៕
