ដោយៈ សុខុម
ញូវយ៉កៈ ក្រុមហ៊ុនអាហាររហ័សអាមេរិក Subway បានទម្លាយឱ្យដឹងកាលពីថ្ងៃអង្គារ ទី៦ ខែមិថុនា ថា ខ្លួនបានចុះកិច្ចព្រមព្រៀងបើកហាងសាំងវិចថ្មីៗ រហូតដល់ទៅជិត៤.០០០សាខា នៅទូទាំងប្រទេសចិន ក្នុងរយៈពេល២០ឆ្នាំខាងមុខ។
ការពង្រីកខ្លួននៅលើទីផ្សារអន្តរជាតិ ជាពិសេសទីផ្សារប្រទេសចិន នេះគឺជាយុទ្ធសាស្ត្រជំរុញកំណើនដ៏សំខាន់មួយ សម្រាប់ក្រុមហ៊ុនខ្សែសង្វាក់ផ្គត់ផ្គង់អាហាររហ័ស (Fast Food) ដែលមានមូលដ្ឋាននៅសហរដ្ឋអាមេរិក។
ខណៈស្វះស្វែងពង្រីកខ្លួននៅក្រៅប្រទេស ក្រុមហ៊ុននេះបាននិងកំពុងបិទហាងរាប់ពាន់ទីតាំង នៅសហរដ្ឋអាមេរិក ចំពេលមានបញ្ហាជាច្រើន រួមទាំង ការពង្រីកខ្លួនហួសកម្រិត និងការបញ្ចុះតម្លៃដែលធ្វើឱ្យទិញ Franchise (សិទ្ធិធ្វើអាជីវកម្មបន្ត) បាត់បង់ប្រាក់ចំណេញផងដែរ។
ទោះបីជាបែបនេះក្ដី ក៏ការលក់Franchise របស់ក្រុមហ៊ុន Subway នៅទូទាំងពិភពលោក បានកើនឡើង១២,១%ក្នុងត្រីមាសទី១។
ក្រុមហ៊ុនផ្សេងទៀត ក៏កំពុងបង្កើនវត្តមានរបស់ខ្លួន នៅក្នុងប្រទេសចិនផងដែរ រួមទាំងប៊្រែនហាងកាហ្វេអាមេរិក ដ៏ល្បីល្បាញ Starbucks ដែលគ្រោងនឹងបើកហាងកាហ្វេថ្មីៗ ចំនួន៣.០០០ទីតាំងនៅក្នុងប្រទេសចិន នៅឆ្នាំ២០២៥ ផងដែរ។
កិច្ចព្រមព្រៀងរបស់ក្រុមហ៊ុន Subway ជាមួយក្រុមហ៊ុន Shanghai Fu-Rui-Shi Corporate Development (FRS) ដែលជាអ្នកទិញសិទ្ធិបន្ត និងចែកចាយ (Master Franchisee) គឺជាកិច្ចព្រមព្រៀងដ៏ធំបំផុត នៅក្នុងប្រវត្តិសាស្រ្តរបស់ក្រុមហ៊ុន Subway។
ក្រុមហ៊ុន Shanghai Fu-Rui-Shi Corporate Development (FRS) នឹងទទួលបានសិទ្ធិផ្តាច់មុខ ក្នុងការគ្រប់គ្រង និងអភិវឌ្ឍគ្រប់ទីតាំងហាង Subway ទូទាំងប្រទេសចិន៕ Reuters៕
