ដោយៈ ជេស៊ីកា
បន្ទាយមានជ័យៈ ក្រុងប៉ោយប៉ែត បាននិងកំពុងអនុវត្តន៍គម្រោងទីក្រុងគួរឲ្យចង់រស់នៅ ដែលគម្រោងនេះចំណាយទឹកប្រាក់៧៨លានដុល្លារ ឲ្យមានភាពស៊ីវិល័យ និងទាក់ទាញភ្ញៀវទេសចរជាតិ និងអន្តរជាតិ។
អភិបាលនៃគណៈអភិបាលក្រុងប៉ោយប៉ែត ខេត្តបន្ទាយមាជ័យ លោកគាត ហ៊ុលបានមានប្រសាសន៍ប្រាប់សារព៌តមានក្នុងស្រុកថា ដើម្បីឆ្លើយតបទៅនឹងការកើនឡើង នៃប្រជាពលរដ្ឋភ្ញៀវទេសចរជាតិនិងអន្តរជាតិ ដែលឆ្លងកាត់ទៅមក តាមច្រកទ្វារអន្តរជាតិក្រុងប៉ោយប៉ែតរាជរដ្ឋាភិបាលបានគូសរំលេច នូវយុទ្ធសាស្ត្រមួយចំនួន សម្រាប់ត្រីវិស័យបង្ហាញផ្លូវពាក់ព័ន្ធក្នុងការអភិវឌ្ឍទីក្រុង។ 
ផែនការអភិវឌ្ឍទីក្រុងប៉ោយប៉ែត រួមមាន
ទី១ ត្រូវតែរៀបចំផែនការមេអភិវឌ្ឍន៍ទីក្រុង ហើយផ្អែកលើផែនការមេនេះ ត្រូវរៀបចំផែនការវិនិយោគហេដ្ឋារចនាសម្ព័ន្ធទីក្រុងប្រទាក់ក្រឡា និងមានលក្ខណៈជាប្រព័ន្ធ ដោយរួមបញ្ចូលទាំងការ អភិវឌ្ឍហេដ្ឋារចនាសម្ព័ន្ធផ្លូវអគ្គិសនី ទឹកស្អាត ប្រព័ន្ធបណ្តាញឌីជីថល និងការគ្រប់គ្រងកាក សំណល់រឹង និងទឹកកខ្វក់ជាដើម។ល។
លើសពីនេះទៅទៀត រដ្ឋបាលក្រុងប៉ោយប៉ែត ក៏ទទួលបានគម្រោងថ្នាក់ជាតិមួយ គឺ “គម្រោងទីក្រុងគួរឲ្យចង់រស់នៅ” ហើយនៅក្នុងគម្រោងនេះដែរគឺមាន គោលដៅធំៗ៤ក្នុងការអភិវឌ្ឍក្រុងទី១គឺអភិវឌ្ឍន៍ប្រព័ន្ធលូ ទី២ គម្រោងធ្វើផ្លូវ,ទី៣ធ្វើទីលានចាក់ សំរាម និង ទី៤ គម្រោងចម្រោះទឹកកខ្វក់ ខណៈបច្ចុប្បន្ននេះគម្រោងអភិវឌ្ឍន៍ប្រព័ន្ធលូត្រូវបានកសាងរួចរាល់ហើយ បានរំដោះជំនន់ទឹក ភ្លៀងមិនឲ្យក្រុងប៉ោយប៉ែតជន់លិចផងដែរ។
ទីក្រុងប៉ោយប៉ែត ជាទីក្រុងមួយដែលស្ថិតក្នុងគោលនយោបាយអភិវឌ្ឍន៍វិស័យឿស្សាហកម្មឆ្នាំ២០១៥ ២០២៥ ដែលរដ្ឋាភិបាលដាក់ចេញ និងមានគោលដៅប្រែក្លាយទីក្រុងនេះ ជាមជ្ឈមណ្ឌលពាណិជ្ជកម្ម និងឧស្សាហកម្ម។
