ដោយៈ គង់ ម៉ាលីនណា
ភ្នំពេញៈ ប្រធានក្រុមហ៊ុនRoyal Group អ្នកឧកញ៉ាគិត ម៉េងបាន បានចូលរួមជាមួយរាជរដ្ឋាភិបាល ដោយបានទម្លាក់ថវិកា ៥លានដុល្លាអាមេរិក ឱ្យរាជរដ្ឋាភិបាលខ្ចីដោយមិនគិតការប្រាក់ ក្នុងការអភិវឌ្ឍខ្សែបណ្តាញអគ្គិសនី ក្រោមបាតសមុទ្រចេញពីខេត្តកោះកុង ឆ្លងកាត់កោះជាច្រើនមកកាន់ក្រុងកោះរ៉ុង ខេត្តព្រះសីហនុ។
ព៌តមាននេះ ត្រូវបានលើកឡើងដោយលោកកែវ រតនៈរដ្ឋមន្រ្តី ប្រតិភូអមនាយករដ្ឋមន្រ្តី និងជាអគ្គនាយកអគ្គិសនីកម្ពុជាកាលពីថ្ងៃទី២១ មិថុនា។
លោកបានបន្តថា ក្រុមហ៊ុនរបស់អ្នកឧកញ៉ាគិត ម៉េង បានស្នើសុំឱ្យក្រុមហ៊ុនទទួលអាជ្ញាបណ្ណ ចែកចាយអគ្គិសនីបណ្តាញជាតិ បន្តចែកចាយតភ្ជាប់អគ្គិសនី ទៅដល់ខ្នងផ្ទះប្រជាពលរដ្ឋ។
លោកកែវ រតនៈបានបន្តថា កម្ពុជាមានបណ្តាញខ្សែកាបនៅបាតសមុទ្រ និងខ្សែកាបនៅបាតទន្លេ សម្រាប់ចែកជូនប្រជាពលរដ្ឋប្រើប្រាស់មកដល់បច្ចុប្បន្ននេះ អគ្គិសនីកម្ពុជាបានគ្របដណ្តប់លើភូមិចំនួន៩៩ភាគរយ និងបន្តឱ្យប្រជាពលរដ្ឋនៅតាមជនបទ មានភ្លើងប្រើប្រាស់នៅតាមខ្នងផ្ទះ ឱ្យបាន១០០ភាគរយនៅពេលខាងមុខ៕
