ដោយៈ គង់ សូរិយា
ភ្នំពេញៈ បណ្តាខេត្តនិមួយៗ សុទ្ឋតែមានសក្តានុពលខុសៗគ្នា អាស្រ័យលើស្ថានភាពភូមិសាស្រ្ត និងការវិនិយោគរបស់រដ្ឋាភិបាល។
តើខេត្តណាមួយ មានតំបន់សេដ្ឋកិច្ចពិសេសច្រើនជាងគេ?យោងតាមក្រុមប្រឹក្សាអភិវឌ្ឍន៍កម្ពុជា (CDC) បានបង្ហាញថា បច្ចុប្បន្នកម្ពុជាមានតំបន់សេដ្ឋកិច្ចពិសេស សរុបចំនួន២៤ ទីតាំង ដោយ៨ ទីតាំងនៅខេត្តស្វាយរៀង ៥ទីតាំងនៅខេត្តព្រះសីហនុ ៤ទីតាំងនៅរាជធានីភ្នំពេញ ៣ទីតាំងនៅក្នុងខេត្តបន្ទាយមានជ័យ ២ទីតាំងនៅខេត្តកណ្តាល ១ទីតាំងនៅខេត្តកោះកុង និង១ទីតាំងនៅខេត្តកំពត។
-->
អ្នកជំនាញសេដ្ឋកិច្ចនៃរាជបណ្ឌិត្យសភាកម្ពុជា លោកបណ្ឌិតហុង វណ្ណៈបានមានប្រសាសន៍ឲ្យដឹង កាលពីចុងសប្តាហ៍មុនថា ការបង្កើតតំបន់សេដ្ឋកិច្ចពិសេស ពិតជាមានប្រយោជន៍សម្រាប់អ្នកវិនិយោគ ដោយសារវាមានលក្ខណៈប្រមូលផ្តុំ ដែលបង្កលក្ខណៈងាយស្រួលសម្រាប់អ្នកវិនិយោគ ដែលមានបំណងចង់បើករោងចក្រ សហគ្រាស ឬឧស្សាហកម្មកែច្នៃផ្សេងៗនៅកម្ពុជា។
លោកបន្តថា “ជាទូទៅតំបន់សេដ្ឋកិច្ចពិសេស មានទីតាំងនៅតំបន់សមស្របបំផុត ដើម្បីជួយឱ្យអាជីវកម្មរបស់អ្នករីកចម្រើន និងជោគជ័យ”។
ជាមួយគ្នានេះសម្តេចតេជោហ៊ុន សែននាយករដ្ឋមន្រ្តីនៃកម្ពុជាបានថ្លែងនៅរាល់ពេលចុះ ជួបសំណេះសំណាលជាមួយកម្មករនិយោជិត តាមបណ្តាសហគ្រាសនានា ក្នុងតំបន់សេដ្ឋកិច្ចពិសេស តែងតែចាត់ទុកតំបន់សេដ្ឋកិច្ចពិសេសថា ដើរតួនាទី និងរួមចំណែកសំខាន់ក្នុងការអភិវឌ្ឍសេដ្ឋកិច្ច និងសង្គម។
សម្តេចតែងបន្តលើកទឹកចិត្ត ដល់វិនិយោគិនឱ្យបង្កើនការវិនិយោគ នៅក្នុងតំបន់សេដ្ឋកិច្ចពិសេសបន្ថែមទៀត តាមរយៈការអភិវឌ្ឍ និងប្រើប្រាស់តំបន់សេដ្ឋកិច្ចពិសេស ដែលមានស្រាប់ទាំងអស់ឱ្យអស់សក្តានុពល៕
