ដោយៈ គង់ សូរិយា
ភ្នំពេញៈ រដ្ឋបាលខេត្តកោះកុង កំពុងពិចារណាលើសំណើរបស់ក្រុមហ៊ុនទេសចរណ៍មួយ ដែលស្នើសុំការអនុញ្ញាតភ្ញៀវទេសចរជនជាតិថៃ ប្រើប្រាស់អត្តសញ្ញាណប័ណ្ណសញ្ជាតិថៃ ដោយមិនមានលិខិតឆ្លងដែន អាចមកធ្វើទេសចរណ៍កម្សាន្តរយៈពេលខ្លី ក្នុងតំបន់ទេសចរណ៍សំខាន់ៗនៅខេត្តកោះកុង។
អភិបាលរងខេត្តកោះកុង លោកអន សុធារិទ្ធបានមានប្រសាសន៍ឱ្យដឹងនៅថ្ងៃទី១០ ខែសីហាថា នៅក្នុងកិច្ចប្រជុំពិភាក្សាគ្នាមួយនាថ្ងៃទី៩ ខែសីហា អាជ្ញាធរខេត្តបានទទួលសំណើរ បស់ក្រុមហ៊ុនទេសចរណ៍មួយ ដែលស្នើសុំការអនុញ្ញាត ជាគោលការណ៍ពិសេស សម្រាប់ភ្ញៀវទេសចរជនជាតិថៃ ប្រើប្រាស់អត្តសញ្ញាណប័ណ្ណសញ្ជាតិថៃ ដែលមិនបានយកលិខិតឆ្លងដែន មកជាប់តាមខ្លួន គឺអាចមកធ្វើទេសចរណ៍កម្សាន្តរយៈពេលខ្លី ក្នុងតំបន់ទេសចរណ៍សំខាន់ៗ ក្នុងខេត្តកោះកុងបាន។
លោកបានបន្តថា បន្ទាប់ពីពិភាក្សាហើយ អាជ្ញាធរខេត្តបានប្រមូលយោបល់ និងគំនិតល្អៗជាច្រើន ពីសំណាក់សមាជិកពាក់ព័ន្ធទាំងអស់ សម្រាប់ជាមូលដ្ឋានក្នុងការសិក្សានីតិវិធីបន្ត ចំពោះករណីសំណើសុំខាងលើ ដើម្បីត្រៀមរាយការណ៍ ទៅខាងក្រសួងទេសចរណ៍។
-->
លោកបានឱ្យដឹងទៀតថា ក្នុងកិច្ចប្រជុំនេះដែរ ក៏មិនទាន់មានការសម្រេចអ្វីណាមួយឡើយ ជាមួយក្រុមហ៊ុនទេសចរណ៍ ហើយរាល់សំណើ ដែលក្រុមហ៊ុនស្នើសុំនេះ អាចនឹងមានការប្រជុំ និងមានការពិភាក្សាគ្នាជាបន្តបន្ទាប់ទៀត។លោកបានបន្ថែមថា ពីព្រោះករណីសំណើនេះ វាជាលើកដំបូងសម្រាប់ខេត្តកោះកុង ខណៈដែលយោងតាមឯកសារផ្សេងៗ និងលិខិតបទដ្ឋានគតិយុត្តនានារបស់ក្រសួង គឺតម្រូវឱ្យភ្ញៀវទេសចរត្រូវមានលិខិតឆ្លងដែន។
លោកអន សុធារិទ្ធបានមានប្រសាសន៍ឲ្យដឹងទៀតថា “ប្រសិនជាក្នុងករណី ទទួលបានការឯកភាពលើសំណើហ្នឹងហើយ នោះវាអាចនឹងកើនភ្ញៀវទេសចរចូលមក ដើម្បីជំរុញកំណើនសេដ្ឋកិច្ចរបស់ខេត្ត តាមរយៈភ្ញៀវទេសចរចូលមកកម្សាន្ត ប៉ុន្តែចំពោះសំណើនេះយើងមិនទាន់សម្រេចទេ”។ លោកបន្តថា “យើងត្រូវការប្រមូលធាតុចូលពីសំណាក់សមាជិកពាក់ព័ន្ធបន្ថែមទៀត ដើម្បីយើងមានមូលដ្ឋានធ្វើរបាយការណ៍ដាក់ជូនក្រសួង”។
ទន្ទឹមនឹងសំណើរបស់ក្រុមហ៊ុនទេសចរណ៍នេះ លោកថា អាជ្ញាធរខេត្ត ក៏កំពុងតែខិតខំធ្វើយ៉ាងណា លើកកម្ពស់វិស័យទេសចរណ៍ ដើម្បីឱ្យមានកំណើនភ្ញៀវទេសចរជាតិ និងភ្ញៀវទេសចរអន្តរជាតិចូលមកលេងកម្សាន្តខេត្តកោះកុងផងដែរ។
អភិបាលរងខេត្តបានបន្ថែមថា ចំពោះកំណើនភ្ញៀវទេសចរមកពីប្រទេសថៃ ក្នុងពេលបច្ចុប្បន្ននេះ គឺមិនសូវមានចំនួនច្រើន ចូលមកកម្សាន្តក្នុងខេត្តកោះកុងទេ ស្របពេលកន្លងមកអាជ្ញាធរខេត្ត ក៏បានសិក្សាអំពីកម្មវិធីមួយទៀត គឺការចុះអនុស្សរណៈយោគយល់គ្នាចំពោះខេត្ត ជាប់ព្រំដែនរវាងកម្ពុជា-វៀតណាម និងថៃ ដើម្បីជំរុញកំណើនភ្ញៀវទេសចរចូលមកលេងខេត្តកោះកុងផងដែរ៕
