ដោយ: គង់ លាងហួរ
អន្តរជាតិ: វិបត្តិអចលនទ្រព្យកាន់តែផុងជ្រៅ គួបផ្សំនឹងការភ័យខ្លាចកាន់តែខ្លាំងឡើងលើវិបត្តិបរិត្តផរណានៅប្រទេសចិន កំពុងបង្កឱ្យមានការព្រួយបារម្ភអំពីផលប៉ះពាល់នៃការរាលដាល ដែលអាចធ្វើឲ្យសេដ្ឋកិច្ចពិភពលោករង្គោះរង្គើ។
ភាពរំជើបរំជួលនេះកាន់តែអាក្រក់ទៅៗ ខណៈដែលក្រុមហ៊ុន Evergrande ដែលជាអ្នកអភិវឌ្ឍន៍អចលនទ្រព្យយក្សរបស់ចិន បានដាក់ពាក្យសុំការការពារការក្ស័យធននៅសហរដ្ឋអាមេរិកកាលពីថ្ងៃព្រហស្បតិ៍សប្តាហ៍មុន។
អាជ្ញាធរកូរ៉េ និងអ្នកជំនាញទីផ្សារបាននិងកំពុងតាមដានយ៉ាងយកចិត្តទុកដាក់លើការខូចខាតដែលអាចកើតមាន ប៉ុន្តែពួកគេរំពឹងថា ផលប៉ះពាល់លើសេដ្ឋកិច្ចកូរ៉េនៅមានកម្រិត ដោយសារភាពខុសគ្នាជាមូលដ្ឋាននៅក្នុងប្រព័ន្ធធនាគារ និងហិរញ្ញវត្ថុរបស់ប្រទេសចិនពីទីផ្សារមូលធននិយមជឿនលឿនផ្សេងទៀត។
អ្នកជំនាញចង្អុលបង្ហាញថា បណ្តាធនាគាររបស់ប្រទេសចិនបានរក្សាស្ថិរភាពក្នុងអំឡុងឆមាសទី១ ដោយបន្ថែមទៀតថា ឧស្សាហកម្មហិរញ្ញវត្ថុរបស់ចិនមិនមានឧបករណ៍និស្សន្ទ (Derivative Products) ណាមួយពាក់ព័ន្ធនឹងគម្រោងអភិវឌ្ឍន៍អចលនទ្រព្យនោះទេ។
លោក Seung Yeon-ju អ្នកជំនាញផ្នែកយុទ្ធសាស្ត្រចិននៅក្រុមហ៊ុន Shinyoung Securities បានពន្យល់ថា ការដាក់ពាក្យសុំក្ស័យធនរបស់ Evergrande នៅសហរដ្ឋអាមេរិក និងបញ្ហាហិរញ្ញវត្ថុរបស់ក្រុមហ៊ុន Country Garden គឺជាបញ្ហាដែលបានចាក់បញ្ចូលទៅក្នុងទីផ្សាររួចមកហើយ ដូច្នេះវាកំណត់វិសាលភាពនៃការឆ្លងរាលដាលផលប៉ះពាល់អវិជ្ជមានទៅលើសេដ្ឋកិច្ចពិភពលោក។
លោកបន្តថា ស្ថានភាពបច្ចុប្បន្នមិនតំណាងឱ្យក្រុមហ៊ុនអភិវឌ្ឍន៍អចលនទ្រព្យចិនទាំងអស់ទេ។ ចំពោះបញ្ហាក្រុមហ៊ុន Evergrande ក្រុមហ៊ុន Country Garden និងក្រុមហ៊ុនចិនមួយចំនួនទៀត ដោយហានិភ័យនៃការខកខានសងបំណុលត្រូវបានគេដឹង និងព្យាករណ៍រួចហើយក្នុងអំឡុងពេលប៉ុន្មានឆ្នាំកន្លងមកនេះ។
ជាងនេះទៅទៀត អ្នកវិភាគរូបនេះបានសង្កត់ធ្ងន់ថា សន្ទស្សន៍ចុងក្រោយបំផុតនៃសេដ្ឋកិច្ចចិនបង្ហាញថា វាបានចូលដល់ដំណាក់កាលស្ទុះងើបឡើងវិញ បន្ទាប់ពីឈានដល់ចំណុចទាបបំផុតកាលពីចុងឆ្នាំមុន។
លោកបញ្ជាក់ថា វាមិនទំនងទេដែលថាវិបត្តិខកខានសងបំណុលបច្ចុប្បន្ននឹងហក់រាលដាលមកលើប្រព័ន្ធហិរញ្ញវត្ថុទាំងមូល ដោយសារភាពខុសគ្នាជាមូលដ្ឋាននៃប្រព័ន្ធធនាគារចិនពីទីផ្សារមូលធននិយមផ្សេងទៀត។
លោក Han Ji-young អ្នកវិភាគប្រចាំក្រុមហ៊ុន Kiwoom Securities បានមានប្រសាសន៍ថា “វាមិនទំនងទេដែលថា ហានិភ័យអចលនទ្រព្យរបស់ចិនអាចរីករាលដាល និងក្លាយជាការគំរាមកំហែងជាប្រព័ន្ធចំពោះទីផ្សារហិរញ្ញវត្ថុកូរ៉េ ទោះបីជាវាអាចក្លាយជាបន្ទុកមួយសម្រាប់ទីផ្សារភាគហ៊ុនក្នុងស្រុកយ៉ាងណាក្តី”។
អ្នកវិភាគរបស់ក្រុមហ៊ុន KB Securities គឺលោក Park Soo-hyun និងលោក Kim Seung-min ក៏បានព្យាករថា វិបត្តិអចលនទ្រព្យចិននឹងមិនពង្រីកទៅជាស្ថានភាពដែលមិនអាចគ្រប់គ្រងបាននោះទេ ដោយសារតែមួយផ្នែកធំនៃបំណុលរបស់អ្នកអភិវឌ្ឍន៍ត្រូវបានបោះផ្សាយជារូបិយប័ណ្ណចិន។
ក្រុមអ្នកវិភាគលើកឡើងថា “រចនាសម្ព័ន្ធក្នុងវិបត្តិអចលនទ្រព្យចិននេះមិនស្មុគស្មាញទេ ព្រោះវាមិនមានទំនាក់ទំនងជាមួយឧបករណ៍និស្សន្ទ។ ដូច្នេះហើយវាមិនអាចទេដែលនិយាយថា ស្ថានភាពនេះនឹងវិវត្តទៅជាវិបត្តិកម្ចីទិញផ្ទះ subprime ដែលបានកើតឡើងនៅសហរដ្ឋអាមេរិកក្នុងអំឡុងចុងទសវត្សរ៍ឆ្នាំ២០០០នោះទេ”។
លោក Kim So-young អនុប្រធាននៃគណៈកម្មការសេវាកម្មហិរញ្ញវត្ថុ (FSC) ដែលជានិយតករហិរញ្ញវត្ថុកំពូលរបស់ប្រទេសកូរ៉េខាងត្បូង ក៏បានចែករំលែកទស្សនៈបែបនេះផងដែរ។
លោក Kim បង្ហាញការគិតឃើញថា “លទ្ធភាពដែលវិបត្តិអចលនទ្រព្យចិននឹងជះឥទ្ធិពលយ៉ាងខ្លាំងដល់សេដ្ឋកិច្ចកូរ៉េគឺស្តួចស្ដើងណាស់ហើយឥទ្ធិពលផ្ទាល់ពីវិបត្តិនេះត្រូវបានគេរំពឹងថានឹងនៅមានកម្រិត”៕
