ដោយៈ គង់ សូរិយា
ភ្នំពេញៈ អ្នកជំនាញទេសចរណ៍ប្រទេសកម្ពុជាបានរំពឹងថា ការរីកចម្រើនប្រកបដោយសក្តានុពល ក្នុងឧស្សាហកម្មទេសចរណ៍នឹងកាន់តែរីកចម្រើន នៅពេលមានការបើកជើងហោះហើរ ត្រង់កាន់តែច្រើនជាមួយប្រទេសផ្សេងទៀត ខណៈថ្មីៗនេះប្រទេសនូវែលសេឡង់ បានបញ្ចប់ការចរចាដោយជោគជ័យ សម្រាប់កិច្ចព្រមព្រៀងសេវាកម្មផ្លូវអាកាស (ASA) ជាមួយអាស៊ាន។
យោងតាមសារព័ត៌មាន Ch-Aviation បន្ទាប់ពីការចរចាដោយជោគជ័យលើកិច្ចព្រមព្រៀង ASA ជាមួយប្រទេសសមាជិកអាស៊ានផ្សេងៗទៀត ដែលបានធ្វើឡើងនៅក្នុងអំឡុងកិច្ចចរចាជុំចុងក្រោយនៅខេត្តសៀមរាបកាលពីថ្ងៃទី ១៣ ខែកញ្ញា កិច្ចព្រមព្រៀងសេវាកម្មអាកាសចរណ៍អាស៊ាន និងប្រទេសនូវែលសេឡង់ (ANZ-ASA) នឹងអនុញ្ញាតឱ្យក្រុមហ៊ុនអាកាសចរណ៍ មកពីបណ្ដាប្រទេសហត្ថលេខីដើម្បីប្រតិបត្តិការសេវាដឹកអ្នកដំណើរ និង/ឬទំនិញបន្ថែមទៀតរវាងតំបន់អាស៊ាន និងប្រទេសនូវែលសេឡង់។
ស្ថិតក្រោមកិច្ចព្រមព្រៀងនេះ ក្នុងពិធីសារទី១ នៃកិច្ចព្រមព្រៀង ANZ-ASA ក្រុមហ៊ុនអាកាសចរណ៍ ដែលទទួលបានសិទ្ធិអាចប្រតិ បត្តិការរវាងប្រទេសអាស៊ាន និងនូវែលសេឡង់ ជាមួយសិទ្ធិសេរីភាពចរាចរណ៍ទី៣ និងទី៤ មិនកំណត់។
លោក Tom Forster ប្រធានគ្រប់គ្រងបទប្បញ្ញត្តិសេដ្ឋកិច្ចនៅក្រសួងដឹកជញ្ជូនប្រទេសនូវែលសេឡង់ ត្រូវបានដកស្រង់សម្តីដោយលើកឡើងថា វាជាការល្អដែលរដ្ឋាភិបាល អាចទទួលបានកិច្ចព្រមព្រៀងសេវាកម្មផ្លូវអាកាសនេះ។
លោកបានបញ្ជាក់ថា “ទោះខ្ញុំសង្កេតឃើញថា ឧស្សាហកម្មនេះមិនទាន់បានស្ទុះងើបឡើងវិញដូចការរំពឹងទុក ដោយសារយើងមិនមានមធ្យោបាយធ្វើដំណើរច្រើន ជាពិសេសការហោះហើរត្រង់ពីគោលដៅផ្សេងទៀត ហើយថែមទាំងមានកំណើនយឺត ជាងប្រទេសជិតខាងរបស់យើងផងដែរ”។ លោកបន្តថា “ដូច្នេះ ការហោះហើរត្រង់កាន់តែច្រើនពីប្រទេសនិងទីក្រុងធំៗផ្សេងទៀត នឹងផ្តល់ឱ្យយើងកាន់តែមានភាពទាក់ទាញ សម្រាប់ភ្ញៀវទេសចរទៅកាន់ប្រទេសនានា”។
បើយោងតាមរដ្ឋលេខាធិការដ្ឋានអាកាសចរស៊ីវិល បច្ចុប្បន្នមានក្រុមហ៊ុនអាកាសចរណ៍អន្តរជាតិសរុបចំនួន២៦ បានដំណើរការជើងហោះហើរ ឬស្មើនឹង៨៤៤ ទៅមកក្នុង១សប្តាហ៍ គិតត្រឹមចុងខែឧសភា ដែលរាប់ទាំងជើងហោះហើរក្នុងស្រុក និងក្រៅស្រុក។
