សិង្ហបុរីគ្រោងយកពន្ធលើថ្លៃសំបុត្រយន្តហោះ ស្របពេលក្រុមហ៊ុនអាកាសចរណ៍នឹងប្តូរមកប្រើប្រាស់ថាមពលថ្មី នៅឆ្នាំ២០២៦

ដោយ: គង់ លាងហួរ

អន្តរជាតិ: ប្រទេសសិង្ហបុរី គ្រោងតម្រូវឱ្យក្រុមហ៊ុនអាកាសចរណ៍របស់ខ្លួន ប្រើប្រាស់ឥន្ធនៈអាកាសចរណ៍ ប្រកបដោយនិរន្តរភាព (SAF) ចាប់ពីឆ្នាំ២០២៦តទៅ ដែលជាផ្នែកមួយនៃផែនការឧស្សាហកម្ម ដើម្បីចូលរួមជួយកាត់បន្ថយការបំភាយកាបូន។

លោក Chee Hong Tat រដ្ឋមន្ត្រីក្រសួងដឹកជញ្ជូនសិង្ហបុរី បានថ្លែងប្រាប់កិច្ចប្រជុំកំពូល អាកាសចរណ៍មួយកាលពីពេលថ្មីៗនេះ ថា “ដោយសារតែប្រេងឥន្ធនៈ ដែលមិនប៉ះពាល់ដល់បរិស្ថាន(SAF) មានតម្លៃថ្លៃជាងប្រេងឥន្ធនៈធម្មតា ចន្លោះពី៣ ទៅ៥ដង ហេតុនេះ អាជ្ញាធរ នឹងយកពន្ធលើសំបុត្រធ្វើដំណើរ ដើម្បីជួយសម្រួលដល់ការចំណាយរបស់ក្រុមហ៊ុនអាកាសចរណ៍”។លោក Chee បានមានប្រសាសន៍បន្តថា ក្រុមហ៊ុនអាកាសចរណ៍នានា នឹងត្រូវប្រើប្រាស់ល្បាយឥន្ធនៈយន្តហោះ ដែលមានលាយផ្សំប្រេងឥន្ធនៈ ដែលមិនប៉ះពាល់ដល់បរិស្ថាន(SAF) ចំនួន១ភាគរយនៅឆ្នាំ២០២៦ ហើយបង្កើនបន្តិចម្តងៗដល់ចន្លោះពី៣ ទៅ៥ភាគរយនៅឆ្នាំ២០៣០ខាងមុខ។