ដោយ: គង់ លាងហួរ
អន្តរជាតិ: ធនាគារអភិវឌ្ឍន៍អាស៊ី (ADB) បានប្រកាសដាក់ឱ្យអនុវត្តន៍យុទ្ធសាស្ត្រភាពជាដៃគូប្រចាំប្រទេសថ្មីសម្រាប់កម្ពុជាចាប់ពីឆ្នាំ ២០២៤-២០២៨។ នេះបើយោងតាមការដកស្រង់ចុះផ្សាយដោយសារពត៌មាន Xinhua នៅថ្ងៃពុធ ទី២៩ ខែឧសភា។
យុទ្ធសាស្ត្រថ្មីនេះ ដែលមានភាពសុីសង្វាក់គ្នាជាមួយយុទ្ធសាស្ត្របញ្ចកោណដំណាក់កាលទី១ របស់រាជរដ្ឋាភិបាលកម្ពុជាសម្រាប់រយៈពេល៥ឆ្នាំដូចគ្នា មានគោលបំណងពង្រឹងដំណើរឆ្ពោះទៅរកកំណើនសេដ្ឋកិច្ចប្រកបដោយនិរន្តរភាព បរិយាបន្ន និងមានភាពធន់នៅក្នុងប្រទេសកម្ពុជា។
ធនាគារ ADB បានបន្តថា “យុទ្ធសាស្រ្តរយៈពេល៥ឆ្នាំនេះ ផ្តោតទៅលើការធ្វើការងារជាមួយរាជរដ្ឋាភិបាលកម្ពុជា និងដៃគូផ្សេងទៀត ដើម្បីពន្លឿនការធ្វើពិពិធកម្មសេដ្ឋកិច្ច ដែលដឹកនាំដោយវិស័យឯកជន ជំរុញការអភិវឌ្ឍន៍មនុស្ស និងពង្រឹងភាពធន់នឹងអាកាសធាតុ”។
ប្រភពខាងលើបានបន្ថែមថា យុទ្ធសាស្រ្តដ៏គ្រប់ជ្រុងជ្រោយនេះក៏រួមបញ្ចូលផងដែរនូវអាទិភាព ដើម្បីដោះស្រាយការប្រែប្រួលអាកាសធាតុ ពង្រឹងអភិបាលកិច្ច និងសមត្ថភាពស្ថាប័ន លើកកម្ពស់សមភាពយេនឌ័រ លើកកម្ពស់ឌីជីថលភាវូបនីយកម្ម និងធ្វើឱ្យស៊ីជម្រៅនូវកិច្ចសហប្រតិបត្តិការ និងសមាហរណកម្មក្នុងតំបន់។
យោងតាមធនាគារ ADB បានឱ្យដឹងទៀតថា យុទ្ធសាស្ត្រនេះសង្កត់ធ្ងន់ទៅលើវិបុលភាព តាមរយៈការពន្លឿនការធ្វើពិពិធកម្មសេដ្ឋកិច្ច ដោយទទួលស្គាល់តួនាទីសំខាន់របស់វិស័យឯកជនក្នុងការជំរុញកំណើនសេដ្ឋកិច្ចប្រកបដោយចីរភាព។
ធនាគារបញ្ជាក់ថា “គន្លឹះដ៏សំខាន់នៃយុទ្ធសាស្ត្រនេះ គឺការពង្រឹងហេដ្ឋារចនាសម្ព័ន្ធ ដែលមានភាពធន់នឹងអាកាសធាតុ និងមានគុណភាពខ្ពស់ ដើម្បីទាក់ទាញការវិនិយោគពីវិស័យឯកជន និងបង្កើតបរិយាកាសធុរកិច្ចដែលផ្តល់អត្ថប្រយោជន៍ជាពិសេសសម្រាប់សហគ្រាសធុនមីក្រូ ខ្នាតតូច និងមធ្យម”។
ជាងនេះទៅទៀត យុទ្ធសាស្រ្តនេះក៏នឹងធានាឱ្យបាននូវលទ្ធភាពទទួលបានសេវាប្រកបដោយគុណភាព និងមានតម្លៃសមរម្យ រួមទាំងការអប់រំ ការអភិវឌ្ឍន៍ជំនាញ ការថែទាំសុខភាព ការផ្គត់ផ្គង់ទឹកស្អាត និងសេវាអនាម័យ។
ធនាគារ ADB បានបន្ថែមថា “យុទ្ធសាស្រ្តរយៈពេល៥ឆ្នាំនេះក៏ផ្តល់អាទិភាពដល់ការពង្រីកប្រភពថាមពលកកើតឡើងវិញ និងការប្រែប្រួលអាកាសធាតុ ដោយធានានូវការប្តេជ្ញាចិត្តរបស់យើងចំពោះអនាគតដ៏បៃតង និងមានភាពធន់ជាងមុនសម្រាប់ប្រទេសកម្ពុជា” ៕ប្រភព: Xinhua៕
