ដោយៈ គង់ សូរិយា
ភ្នំពេញៈ សម្តេចធិបតីហ៊ុន ម៉ាណែតនាយករដ្ឋមន្រ្តីនៃកម្ពុជា និងឯកអគ្គរដ្ឋទូតហ្វីលីពីនប្រចាំកម្ពុជា លោកស្រី Flerida Ann Camille P. Mayo បានពិភាក្សាគ្នាជំរុញការតភ្ជាប់ជើងហោះហើរត្រង់ឡើងវិញពីទីក្រុងសេប៊ូ នៃប្រទេសហ្វីលីពីន មកកាន់ខេត្តសៀមរាប ដើម្បីជំរុញវិស័យទេសចរណ៍។
ភាគីទាំងពីរក៏បានពិភាក្សាគ្នា ជំរុញកំណើនទំហំពាណិជ្ជកម្ម និងការនាំចេញផលិតផលកសិកម្មផងដែរ។
ការពិភាក្សានេះធ្វើឡើងក្នុងជំនួបរវាង សម្តេចធិបតីហ៊ុន ម៉ាណែត និងលោកស្រី Mayo កាលពីថ្ងៃទី១៦ កក្កដា នៅរាជធានីភ្នំពេញ។
យោងតាមសេចក្តីប្រកាសព័ត៌មាន ដែលបានបង្ហោះក្នុងបណ្ដាញសង្គមនាយករដ្ឋមន្ត្រីនាថ្ងៃទី១៦ កក្កដា បញ្ជាក់ថា ភាគីទាំងពីរ បានពិភាក្សាលើវិស័យសេដ្ឋកិច្ច និងពាណិជ្ជកម្ម តាមរយៈការខិតខំបន្ថែមទៀត លើការជំរុញកំណើនទំហំពាណិជ្ជកម្ម ការនាំចេញផលិតផលកសិកម្ម, ការជំរុញវិស័យទេសចរណ៍ តាមរយៈការតភ្ជាប់ជើងហោះហើរត្រង់ឡើងវិញ ពីទីក្រុងសេប៊ូ ប្រទេសហ្វីលីពីន មកកាន់ខេត្តសៀមរាប, វិស័យអប់រំ និងវិស័យសំណង់។
ក្នុងជំនួបនេះ លោកស្រី Mayo បានបង្ហាញនូវជំហរ នៃការខិតខំប្រឹងប្រែងបន្តពង្រឹង និងពង្រីកទំនាក់ទំនង និងកិច្ចសហប្រតិបត្តិការហ្វីលីពីន–កម្ពុជាឱ្យ-កាន់តែរឹងមាំបន្ថែមទៀត នៅក្នុងអាណត្តិបេសកកម្មការទូត របស់លោកស្រី ខណៈនាយករដ្ឋមន្រ្តីកម្ពុជាជឿជាក់ថា ក្នុងបេសកកម្មការទូតរបស់លោកស្រី ទំនាក់ទំនងរវាងប្រទេសទាំងពីរ នឹងកាន់តែត្រូវបានបន្តពង្រឹង និងពង្រីកបន្ថែមទៀត។
សម្តេចបានបញ្ជាក់ថា ក្រសួង ស្ថាប័នពាក់ព័ន្ធនៃរាជរដ្ឋាភិបាលកម្ពុជា បានត្រៀមខ្លួនរួចជាស្រេច ក្នុងការធ្វើការយ៉ាងជិតស្និទ្ធ ជាមួយលោកស្រីឯកអគ្គរដ្ឋទូតដើម្បីពង្រឹង និងពង្រីកទំនាក់ទំនង និងកិច្ចសហប្រតិបត្តិការ នៃប្រទេសទាំងពីរឱ្យកាន់តែរឹងមាំ និងរីកចម្រើនបន្ថែមទៀត៕
