ដោយ នៅ ស៊ីវុត្ថា
ភ្នំពេញ៖ ក្រុមប្រឹក្សាអភិវឌ្ឍន៍កម្ពុជា (CDC) បានអនុម័តឲ្យក្រុមហ៊ុន “KAMFOR RECYCLE PULP AND PAPER CO.,LTD.” បង្កើតរោងចក្រកែច្នៃក្រដាសកាតុង តម្លៃ៥,១លានដុល្លារ នៅខេត្តព្រះសីហនុ។
យោងតាមការចុះផ្សាយហ្វេសបុករបស់ក្រុមប្រឹក្សាអភិវឌ្ឍន៍កម្ពុជា (CDC) បានឲ្យដឹងនៅថ្ងៃទី១៩ ខែមេសា ឆ្នាំ ២០១៩ នេះថា តាមសំណើសុំវិនិយោគលើគម្រោងបង្កើតរោងចក្រកែច្នៃក្រដាសកាតុង (ពីក្រដាសចាស់ៗប្រមូលទិញក្នុងស្រុក) និងផលិតកេសកាតុង របស់ក្រុមហ៊ុន “KAMFOR RECYCLE PULP AND PAPER CO.,LTD.” គណៈកម្មាធិការវិនិយោគកម្ពុជា នៃក្រុមប្រឹក្សាអភិវឌ្ឍន៍កម្ពុជា បានសម្រេចចេញ “វិញ្ញាបនប័ត្រចុះបញ្ជីជាស្ថាពរ” ជូនដល់ក្រុមហ៊ុនខាងលើ ដែលមានទីតាំងវិនិយោគស្ថិតនៅភូមិបឹងវែង ឃុំវាលរេញ ស្រុកព្រៃនប់ ខេត្តព្រះសីហនុ មានទុនវិនិយោគប្រមាណ ៥,១លានដុល្លារអាមេរិក និងអាចបង្កើតការងារបានចំនួន ១៨២កន្លែង។
លោក យន្ត មីន អភិបាលខេត្តព្រះសីហនុ បានធ្លាប់បានមានប្រសាសន៍ស្វាគមន៍រាល់ក្រុមហ៊ុនទាំងអស់ដែលមានគោលបំណងចង់ មកវិនិយោគនៅខេត្តព្រះសីហនុ ស្របពេលដែលខេត្តព្រះសីហនុ កំពុងត្រូវបានអភិវឌ្ឍន៍យ៉ាងគំហុក។ ម្យ៉ាងទៀតការអភិវឌ្ឍរមែងមានផលប៉ះពាល់ផ្នែកបរិស្ថាន អនាម័យមួយចំនួនផងដែរ ហេតុនេះក្រុមហ៊ុនត្រូវគោរពតាមគោលការណ៍ច្បាប់ នៃព្រះរាជាណាចក្រកម្ពុជា។
