ដោយៈ គង់ សូរិយា
ព្រះសីហនុៈ គិតរហូតមកទល់ពេលនេះ រដ្ឋាភិបាលបានអនុម័តគំរោងវិនិយោគចំនួន៣៣១នៅខេត្តព្រះសីហនុ តាមរយៈកម្មវិធីជម្រុញការវិនិយោគនៅខេត្តមួយនេះ។
ក្នុងចំណោមគំរោងទាំងនោះ មានជិតពាក់កណ្តាល ជាគម្រោងដែលជាប់គាំងនាពេលកន្លងមក។
ដើម្បីជំរុញឱ្យសកម្មភាពសាងសង់អគារ ដែលជាប់គាំងនៅខេត្តព្រះសីហនុមានដំណើរការឡើងវិញ រាជរដ្ឋាភិបាលកម្ពុជាបានដាក់ចេញនូវ “កម្មវិធីពិសេសជំរុញការវិនិយោគ ក្នុងខេត្តព្រះសីហនុ” ដែលកម្មវិធីនេះ នឹងផ្តល់ឱ្យអ្នកវិនិយោគ នូវការលើកទឹកចិត្តពិសេសជាច្រើន ដូចជា ការអនុគ្រោះ និងការសម្រួលនីតិវិធីមួយចំនួនក្នុងក្របខណ្ឌកម្មវិធីពិសេស ជំរុញការវិនិយោគក្នុងខេត្តព្រះសីហនុ។ កម្មវិធីនេះ ត្រូវបានដាក់ឱ្យអនុវត្តក្នុងឆ្នាំ២០២៤ និងបន្តរហូតដល់ឆ្នាំ២០២៥ នេះ។
ក្នុងកិច្ចប្រជុំក្រុមការងារជំរុញការវិនិយោគ ក្នុងខេត្តព្រះសីហនុដែលប្រព្រឹត្តិទៅកាលពីថ្ងៃទី២១ ខែ កក្កដា ឆ្នាំ ២០២៥ លោក អ៊ឹម សុខធី ប្រធានលេខាធិការដ្ឋានក្រុមការងារ ជំរុញការវិនិយោគក្នុងខេត្តព្រះសីហនុ បានឱ្យដឹងថា បើគិតចាប់ពីឆ្នាំ២០២៤ ដល់ខែមិថុនា ឆ្នាំ ២០២៥ ក្រុមការងារជំរុញការវិនិយោគក្នុងខេត្តព្រះសីហនុ បានសម្រេចផ្តល់ការលើកទឹកចិត្ត ជូនដល់គម្រោងវិនិយោគសរុបចំនួន ៣៣១ គម្រោង និងបានខិតខំប្រឹងប្រែងធ្វើការ ជាមួយក្រសួងស្ថាប័នពាក់ព័ន្ធ ដើម្បីអនុវត្តកម្មវិធីពិសេសជំរុញការវិនិយោគ ព្រមទាំងបង្កើនជំនឿទុកចិត្តដល់អ្នកវិនិយោគ គ្រប់ជាតិសាសន៍ដែលមានបំណង ឬកំពុងវិនិយោគក្នុងខេត្តព្រះសីហនុ។
លោកបន្តថា ក្នុងចំណោមគម្រោងទាំង៣៣១ គឺមានគម្រោងពាក់ព័ន្ធអគារជាប់គាំងចំនួន១៥៣គម្រោង គម្រោងមិនពាក់ព័ន្ធអគារជាប់គាំង(គម្រោងថ្មី)១៤២គម្រោង គម្រោងពង្រីកថ្មីចំនួន២៤គម្រោង និងគម្រោងមានស្រាប់១២គម្រោង។ ក្រៅពីផ្តល់ការលើកទឹកចិត្តពិសេសចំពោះគម្រោងទាំង៣៣១ ក្រុមការងារជំរុញការវិនិយោគក្នុងខេត្តព្រះសីហនុ ក៏បានធ្វើសកម្មភាពជាច្រើនទៀត ក្នុងន័យដើម្បីប្រែក្លាយបញ្ហាប្រឈម ទៅជាកាលានុវត្តភាព។
លោកបានបន្តថា ក្រៅពីការសម្រេចផ្តល់ការ លើកទឹកចិត្តពិសេសជាគោលការណ៍ ក្រុមការងារក៏បានសម្របសម្រួល ចុះបញ្ជីសហគ្រាស សម្របសម្រួលធ្វើផ្លូវ លូ ផ្តល់លិខិតអនុញ្ញាតសាងសង់ អាជ្ញាបណ្ណទេសចរណ៍ អាជ្ញាបណ្ណអាជីវកម្មអចលនវត្ថុ ដោះស្រាយវិវាទក្រៅប្រព័ន្ធតុលាការ រៀបចំវេទិកាទាក់ទាញ ដោយសហការជាមួយរដ្ឋបាលខេត្តព្រះសីហនុ ផ្តល់ការប្រឹក្សាយោបល់ និងការសម្របសម្រួលដោះស្រាយសំណូមពរផ្សេងៗរបស់វិនិយោគិន និងធុរជនទាំងខ្មែរ និងបរទេស។
ប្រធានសមាគមសហគ្រិនសារព័ត៌មានសេដ្ឋកិច្ចកម្ពុជា លោកយិន លាងគង់បានថ្លែងថា តាមរយៈកញ្ចប់លើកទឹកចិត្តជាច្រើនរបស់រដ្ឋាភិបាល ដល់វិនិយោគិនជាតិ អន្តរជាតិ គួបផ្សំជាមួយសក្តានុពលមូលដ្ឋាន ខេត្តព្រះសីហនុ ប្រៀបដូចជាមេដែកឆក់មួយ ដែលទាក់ទាញការវិនិយោគ សម្រាប់អ្នកធុរកិច្ចដែលមានចក្ខុវិស័យច្បាស់លាស់ និងមានផែនការអភិវឌ្ឍន៍រយៈពេលវែង។
លោកបន្តថា “កម្មវិធីជម្រុញការវិនិយោគ នៅខេត្តព្រះសីហនុ ប្រៀបបាននឹងដុំមាសមួយសដុំ ដែលរដ្ឋាភិបាលផ្តល់ឲ្យអ្នកវិនិយោគជាតិ អន្តរជាតិចាប់យក”។ លោកបន្ថែមថា “ការប្រែក្លាយ ខេត្តនេះជាតំបន់សេដ្ឋកិច្ចគំរូពហុបំណង បាននិងកំពុងធ្វើឲ្យខេត្តនេះកាន់តែទាក់ទាញសម្រាប់អនាគតដ៏ត្រចះត្រចង់មួយ”៕
