ទីផ្សារអចលនទ្រព្យរបស់ពិភពលោកអាចនឹងស្ទុះងើបឡើងវិញពេញលេញនៅឆ្នាំ២០២៦ខាងមុខ

ដោយ: គង់ លាងហួរ
អន្តរជាតិ: ទីផ្សារអចលនទ្រព្យរបស់ពិភពលោកត្រូវបានគេរំពឹងថា នឹងស្ទុះងើបឡើងវិញពេញលេញនៅឆ្នាំ២០២៦ខាងមុខ ជាពិសេសសកម្មភាពវិនិយោគ និងប្រាក់ចំណេញសរុប។ក្នុងនោះ ផ្នែកលំនៅដ្ឋាន និងភស្តុភារ នឹងងើបឡើងវិញលឿនជាងគេបំផុត។

យោងតាមក្រុមហ៊ុនប្រឹក្សាយោបល់អចលនទ្រព្យ Savills បានព្យាករណ៍ថា ការវិនិយោគលើទីផ្សារអចលនទ្រព្យរបស់ពិភពលោកនឹងហក់ឡើង២៧ភាគរយនៅឆ្នាំ២០២៥នេះដល់ទំហំទឹកប្រាក់ប្រមាណ៩៥២ពាន់លានដុល្លារអាមេរិក។

នៅឆ្នាំ២០២៦ខាងមុខ ការវិនិយោគលើទីផ្សារអចលនទ្រព្យរបស់ពិភពលោកត្រូវបានគេរំពឹងថា នឹងហក់ឡើងដល់ទំហំទឹកប្រាក់លើសពី១ទ្រីលានដុល្លារអាមេរិកជាលើកដំបូងមិនធ្លាប់មានគិតចាប់តាំងពីឆ្នាំ២០២២។

ជាមួយគ្នានេះ ក្រុមអ្នកជំនាញវាយតម្លៃថា សន្ទុះនៃទីផ្សារអចលនទ្រព្យអឺរ៉ុបហាក់កំពុងនាំមុខគេ ដោយសារការកាត់បន្ថយអត្រាការប្រាក់ដោយធនាគារកណ្តាលអឺរ៉ុប(ECB) និងការប្រែប្រួលយ៉ាងឆាប់រហ័សនៃតម្លៃអចលនទ្រព្យក្នុងតំបន់ ។

ទីផ្សារអចលនទ្រព្យនៅតំបន់អាមេរិកខាងជើង ជាពិសេសសហរដ្ឋអាមេរិក ត្រូវបានគេរំពឹងថា នឹងកើនឡើងនៅឆ្នាំ២០២៥ ខណៈការវិនិយោគលើទីផ្សារអចលនទ្រព្យអាមេរិកត្រូវបានព្យាករណ៍ថា នឹងសម្រេចបានអត្រាកំណើន៣៨ភាគរយឡើងដល់ទំហំទឹកប្រាក់ប្រហែល៥៧៥ពាន់លានដុល្លារនៅឆ្នាំនេះ និងបន្តកើនឡើងនៅឆ្នាំ២០២៦។

ចំណែក ទីផ្សារអចលនទ្រព្យរបស់តំបន់អាស៊ីប៉ាស៊ីហ្វិក (APAC) ត្រូវបានវាយតម្លៃថា កំពុងស្ថិតក្នុងចំណុចរបត់។ តម្លៃអចលនទ្រព្យនៅតំបន់នេះបានចាប់ផ្តើមងើបឡើងវិញចាប់តាំងពីត្រីមាសទី៣ ឆ្នាំ២០២៤។

ទន្ទឹមនឹងនេះ អត្រាផលចំណេញត្រឡប់មកវិញពីការវិនិយោគលើទីផ្សារអចលនទ្រព្យរបស់តំបន់អាស៊ីប៉ាស៊ីហ្វិកត្រូវបានរំពឹងថា នឹងកើនឡើងយ៉ាងរឹងមាំក្នុងរយៈពេលចន្លោះពី៣ឆ្នាំទៅ៥ឆ្នាំខាងមុខ៕ប្រភព: Savills៕