រដ្ឋាភិបាលសិង្ហបុរីប្រកាសដាក់ឱ្យដេញថ្លៃដីឡូតិ៍លំនៅដ្ឋានមួយកន្លែងនៅក្នុងតំបន់កណ្តាលទីក្រុងរបស់ខ្លួន

ដោយ: គង់ លាងហួរ
អន្តរជាតិ: រដ្ឋាភិបាលរបស់ប្រទេសសិង្ហបុរីបានសម្រេចដាក់លក់ដីឡូតិ៍លំនៅដ្ឋាននៅតាមបណ្តោយវិថី Bukit Timah។ នេះជាទីតាំងដីដំបូង ដែលត្រូវបានប្រកាសដាក់លក់ ក្រោមផែនការសាងសង់តំបន់លំនៅដ្ឋានថ្មីក្នុងសង្កាត់ Newton។

ការប្រកាសដាក់លក់ដីឡូតិ៍ទំហំ០,៥៨ហិកតានេះ ជាការលក់ដីរដ្ឋដំបូងគេក្នុងសង្កាត់ Newton ក្នុងរយៈពេលជិត៣ទសវត្សរ៍កន្លងមក និងត្រូវបានគេរំពឹងថា បណ្តាក្រុមហ៊ុនជាច្រើននឹងចូលរួមការប្រកួតដេញថ្លៃយ៉ាងក្តៅគគុក។

ដីឡូតិ៍ខាងលើអាចត្រូវបានប្រែក្លាយជាតំបន់លំនៅដ្ឋានប្រមាណ៣៤០យូនីត ដោយមានទីតាំងនៅជាប់ស្ថានីយ៍រថភ្លើង Newton MRT។នេះបើយោងតាមការចុះផ្សាយដោយកាសែត The Business Times។

ស្របពេលមានកំណើននៃទំនុកចិត្តទីផ្សារនៅតំបន់ស្នូលកណ្តាលក្រុងសិង្ហបុរី (Core Central Region) លោក Wong Siew Ying ប្រធានផ្នែកស្រាវជ្រាវរបស់ក្រុមហ៊ុន PropNex រំពឹងថា “ដីឡូតិ៍នេះនឹងទាក់ទាញការដេញថ្លៃក្នុងតម្លៃកប់ពពករវាង១.៥០០ដុល្លារសិង្ហបុរីទៅ១.៦០០ដុល្លារសិង្ហបុរីក្នុងមួយហ្វីតការ៉េ”។

លោក Wong បានកត់សម្គាល់ថា បណ្តាអ្នកអភិវឌ្ឍន៍បានលក់ផ្ទះថ្មីជាង៨៥០យូនីតនៅតំបន់ CCR គិតចាប់តាំងពីខែកក្កដា ដោយផ្អែកលើទិន្នន័យពីអាជ្ញាធរអភិវឌ្ឍន៍ទីក្រុងសិង្ហបុរី (URA)។

ការលក់លំនៅដ្ឋាននៅតំបន់ CCR នៅត្រីមាសទី៣ ឆ្នាំ២០២៥ ត្រូវបានគេរំពឹងថា នឹងសម្រេចបានអត្រាកំណើនខ្ពស់បំផុតប្រចាំត្រីមាស ចាប់តាំងពីត្រីមាសទី៤ ឆ្នាំ២០១០ ដោយកាលពីពេលនោះ បណ្តាអ្នកអភិវឌ្ឍន៍បានលក់ផ្ទះថ្មីចំនួន៩៩៤យូនីត៕ប្រភព: The Business Times៕