ដោយ: គង់ លាងហួរ
អន្តរជាតិ: យោងតាមក្រុមហ៊ុនប្រឹក្សាយោបល់អចលនទ្រព្យ Knight Frank បានឱ្យដឹងថា ទីផ្សារអចលនទ្រព្យឧស្សាហកម្មរបស់ប្រទេសម៉ាឡេស៊ីបន្តមានភាពរីកចម្រើន ក្រោយពីបានស្រូបទាញបានទុនវិនិយោគយ៉ាងច្រើនសន្ធឹកសន្ធាប់លើការសាងសង់មជ្ឈមណ្ឌលទិន្នន័យ។
ក្នុងនោះ រដ្ឋសំខាន់ៗចំនួន៤ រួមមានរដ្ឋ Selangor រដ្ឋ Johor រដ្ឋ Penang និងរដ្ឋ Sabah កំពុងក្លាយជាម៉ាស៊ីនកំណើនសេដ្ឋកិច្ច និងទទួលបានទំនុកចិត្តពីបណ្តាអ្នកវិនិយោគ ខណៈសួនបច្ចេកវិទ្យា Kota Petra Green របស់រដ្ឋ Sarawak បានផ្តោតលើនិរន្តរភាព និងឌីជីថលូបនីយកម្ម។
ទន្ទឹមនឹងនេះ ការចុះកិច្ចព្រមព្រៀងភាពជាដៃគូសេដ្ឋកិច្ចគ្រប់ជ្រុងជ្រោយ (CEPA) រវាងប្រទេសម៉ាឡេសុីជាមួយប្រទេសអេមីរ៉ាត់អារ៉ាប់រួមក្នុងខែមករា ឆ្នាំ២០២៥ រួមទាំងការចរចាកិច្ចព្រមព្រៀងពាណិជ្ជកម្មសេរីទ្វេរភាគីរវាងម៉ាឡេសុីជាមួយកូរ៉េខាងត្បូង និងការធ្វើជាប្រធានប្តូរវេនអាស៊ានរបស់ម៉ាឡេស៊ីនៅឆ្នាំ២០២៥នេះ បង្ហាញពីកិច្ចខិតខំប្រឹងប្រែងក្នុងការធ្វើឱ្យទំនាក់ទំនងពាណិជ្ជកម្មពិភពលោកកាន់តែមានភាពស៊ីជម្រៅ។
ក្រុមហ៊ុន Knight Frank រាយការណ៍ថា ការវិនិយោគផ្នែកឌីជីថលក្នុងប្រទេសម៉ាឡេសុីបានកើនឡើង៣ដងកាលពីឆ្នាំ២០២៤ ដល់ទំហំទឹកប្រាក់ចំនួន១៦៣,៦ពាន់លានរីងហ្គីត ខណៈការវិនិយោគលើការសាងសង់មជ្ឈមណ្ឌលទិន្នន័យ និងហេដ្ឋារចនាសម្ព័ន្ធ Cloud បានគ្របដណ្តប់ចំណែក៧៦,៨ភាគរយនៃទំហំទុនវិនិយោគសរុប។
ជាមួយគ្នានេះ រដ្ឋាភិបាលម៉ាឡេសុីនៅតែបន្តប្តេជ្ញាចិត្តក្នុងការទាក់ទាញការវិនិយោគថ្មីៗ ក្នុងគោលបំណងបង្កើតការងារ និងផ្តោតលើការចាប់យកប្រភពថាមពលកកើតឡើងវិញ និងការអភិវឌ្ឍន៍ប្រព័ន្ធអេកូឡូស៊ី។
ក្រុមហ៊ុនប្រឹក្សាអចលនទ្រព្យ Knight Frank បានឱ្យដឹងបន្តថា “នៅឆមាសទី១ ឆ្នាំ២០២៥នេះ ការវិនិយោគផ្នែកឌីជីថលក្នុងទំហំទឹកប្រាក់ចំនួន៤២,៦ពាន់លានរីងហ្គីតត្រូវបានអនុម័ត។ ទុនវិនិយោគជាង៧០ភាគរយផ្តោតទៅលើការសាងសង់មជ្ឈមណ្ឌលទិន្នន័យ និងគម្រោងហេដ្ឋារចនាសម្ព័ន្ធ Cloud”៕ប្រភព: The Edge Malaysia៕
