ដោយ: គង់ លាងហួរ
អន្តរជាតិ: ការលក់លំនៅដ្ឋាននៅប្រទេសចិនបានកើនឡើងតិចតួចនៅខែកញ្ញា ឆ្នាំ២០២៥ បន្ទាប់ពីរដ្ឋាភិបាលចិនបានដាក់ចេញគោលនយោបាយគាំទ្រជាបន្តបន្ទាប់ដើម្បីជំរុញវិស័យអចលនទ្រព្យ។
ការលក់ផ្ទះរបស់បណ្តាក្រុមហ៊ុនអចលនទ្រព្យចិនធំៗចំនួន១០០ បានកើនឡើង០,៤ភាគរយដល់ទំហំទឹកប្រាក់ចំនួន២៥២,៨ពាន់លានយ័ន(ប្រមាណ៣៥,៥ពាន់លានដុល្លារអាមេរិក)។នេះបើយោងតាមទិន្នន័យបឋមចុងក្រោយបំផុតពីក្រុមហ៊ុន China Real Estate Information។
តួលេខខាងលើបានបង្ហាញសញ្ញាប្រសើរឡើងបើប្រៀបធៀបទៅនឹងការដាំក្បាលចុះចំនួន១៧,៦ភាគរយកាលពីខែសីហា។នេះបើយោងតាមការគណនារបស់ទីភ្នាក់ងារសារព័ត៌មាន Bloomberg ។
ប្រទេសចិនបានដាក់ចេញនូវគោលនយោបាយជាបន្តបន្ទាប់ចាប់តាំងពីចុងឆ្នាំ២០២២ ក្នុងកិច្ចខិតខំប្រឹងប្រែងដើម្បីទប់ស្កាត់ការដាំក្បាលចុះនៃទីផ្សារលំនៅដ្ឋាន។ ការធ្លាក់ចុះនៃតម្លៃផ្ទះថ្មីនៅប្រទេសចិនកាលពីត្រីមាសទី២ បានបង្កឱ្យមានការព្រួយបារម្ភចំពោះវិបត្តិបរិត្តផរណា។
ក្រុមអ្នកវិភាគជាច្រើនបានអំពាវនាវឱ្យរដ្ឋាភិបាលចិនដាក់ចេញវិធានការគាំទ្របន្ថែមទៀតសម្រាប់ទីផ្សារលំនៅដ្ឋាន ដោយសារតែឥទ្ធិពលនៃវិធានការជំរុញលើកទឹកចិត្តកាលពីខែកញ្ញាឆ្នាំមុន កំពុងធ្លាក់ចុះ។
កាលពីខែសីហា ទីក្រុងធំៗរបស់ប្រទេសចិន ដូចជារដ្ឋធានីប៉េកាំង និងទីក្រុងសៀងហៃបានអនុញ្ញាតឱ្យពលរដ្ឋមូលដ្ឋានអាចទិញផ្ទះច្រើនយូនីតនៅតំបន់ជាយក្រុង៕ប្រភព: Bloomberg៕
